1, 2. a) Xú káʼnii xkujndu eraʼníí tikhun a̱ngiu̱lú rá. b) Xú káʼnii graxe̱ guriʼña̱a̱ rá.

MBÁA ndxájulú bi̱ mbiʼyuu Lije naʼthí rí índo̱ nigi̱ʼdu̱u̱ guerra náa xuajen Burundi, ikhaa gajmíi̱n bi̱ kúwi̱i̱n náa goʼwóo kuwa náa mbá asamblea. Ndiyáá rí xa̱bu̱ nugañún ga̱jma̱a̱ nujmidá ajua̱nʼ. Anu̱ú, gajmíi̱n 10 a̱ngui̱i̱n ga̱jma̱a̱ ikhaa ninikríyaminaʼ ga̱jma̱a̱ nguátháá rí guáʼdáá. Lije naʼthí: “Eʼwíínʼ a̱ngui̱i̱nʼ niʼngu̱u̱n niguáʼnu asndu náa Malaui náa kuwa eʼwíínʼ bi̱ nijuixkúún, naʼni mbá 1,600 kilómetros. Mámbáa tsáa ni̱jkha̱”.

² Náa xúgíʼ numbaaʼ kuwa mbá 65 millones xa̱bu̱ bi̱ nijuixkúún. Ndiyóoʼ muniñaʼ guʼwún numuu rí nirígá guerra o nuxkúún. Xó má nakujmaa náa mbá i̱yi̱i̱ʼ, nimbá miʼtsú takuwa wéñuʼ xa̱bu̱ bi̱ nijuixkúún. * Mbaʼin ñajúnʼ xa̱bi̱i̱ Jeobá, tikhun nikháñun a̱ngiu̱ún ga̱jma̱a̱ nindáti̱gu̱u̱n xúgíʼ rí niguáʼdáá. Ndiéjunʼ imbo̱ʼ xkujndu nuraʼníí xá. Xú káʼnii  gándoo mumbaʼñún a̱ngiu̱lú mu muni ñajunʼ Jeobá maski ajndu nuraʼníí xkujndu xúgi̱ kaʼnii xá. (Sal. 100:2.) Ga̱jma̱a̱ xú káʼnii gúʼtaruʼun xa̱bu̱ buʼko̱ bi̱ xóó tseniʼniiʼ Jeobá rá.

3. Náa numuu rí Jesús gajmíi̱n discípulos nijuixkúún rá.

³ Jesús, anu̱u̱ ga̱jma̱a̱ ru̱dúu̱ ndiyóoʼ mumbayúmíjná náa Egipto nda̱wa̱á rí mbáa ángel ndrígóo Jeobá niʼthúu̱n José rí rey Herodes nandoo maxíyáa Jesús. Ikha jngó niguanún ikhí asndu mbiʼi rí Herodes nikháñuu (Mat. 2:13, 14, 19-21). Mba̱yu̱ʼ tsiguʼ nda̱wa̱á, discípulos ndrígóo Jesús mámbáa náa ni̱jkha̱ “na’ mbayu Judea, gajma na’ mbayu Samaria” numuu rí nijuixkúún (Hech. 8:1). Jesús ndiʼyoo rí mbaʼin xa̱bi̱i̱ mbaʼyoo muniñaaʼ guʼwún. Ikhaa niʼthí: “Rido guxkahuiñaʼla naʼ xuajin rigueʼ”, agajnála mu̱ʼgua̱ i̱mba̱ xuajin (Mat. 10:23). Phú mingíjyúuʼ matatsiʼñáanʼ guʼwáaʼ.

4, 5. a) Xú káʼnii gamíi eguáʼnii bi̱ najuixkúún rá. b) Xú káʼnii gamíi rígá náa guʼwá rí kuwa bi̱ nijuixkúún rá.

⁴ Xa̱bu̱ bi̱ nagájnún guʼwún naguaʼnii mbaʼa gaʼkhu náa kamba̱a̱ o náa kúwi̱i̱n eʼwíínʼ xa̱bu̱ bi̱ nijuixkúún. Mbáa giʼtio̱o̱ ndxájulú Lije bi̱ nagumbiʼyuu Gad naʼthí: “Ikhúúnʼ gúʼdóʼ 12 tsiguʼ. Ni̱jkuá ga̱jma̱a̱ rajkúxu mbaʼa xmáná ga̱jma̱a̱ ndi̱ñu̱u̱nxu mbaʼin xa̱bu̱ bi̱ nikháñun. Niʼjuan rajkúʼ rí asndu ni̱thu̱u̱n a̱ngui̱i̱nʼ rí muniñuuʼ má ikhí. Mú anu̱ʼ táʼndoo ganiñuʼ náa ñawúúnʼ xa̱bu̱ ra̱míjínʼ, ikha jngó nigu̱u̱n. Nguáná, i̱ndó mango niphúxu rí nuxkamaaxu náa kamba̱a̱. Rí mutajkáanxu ga̱jma̱a̱ maku̱mu̱xu ku̱ya̱a̱ Jeobá nimbáyuxu mámbá mbiʼi” (Filip. 4:12, 13).

⁵ Mbaʼin bi̱ kuwa náa goʼwóo Lije nikuwa mba̱yu̱ʼ tsiguʼ náa guʼwá rí niʼni Naciones Unidas. Mú ikhí ma̱ngaa nirígá gamíi. Lije narmáʼáan a̱jkiu̱u̱n, bi̱ xúgi̱ nindxu̱u̱ superintendente de circuito: “Nimbáa na̱nguá nigiʼdoo ñajunʼ, ikha jngó nuni xtujtaa, najngi̱i̱n, nutsíin numuu mbújkha̱a̱ ga̱jma̱a̱ nuni kuʼwáʼ ma̱ngaa nubúunʼ gajmiún eʼwíínʼ”. Mu muñeumíjna̱ xa̱bi̱i̱ Jeobá ndiyóoʼ muni má xúʼko̱ ñajunʼ náa congregación (Heb. 6:11, 12; 10:24, 25). Numuu rí nindúún muñewa̱a̱n rí nambáxu̱u̱n gajmiún Jeobá, nijmún májánʼ mbiʼi. Ikha jngó mbaʼin ninindxu̱ún precursores. Nindxa̱ʼwa̱míjna̱ rí maʼga̱nú mbiʼi rí muniñaʼ náa kuwa, xó má israelitas niniñaaʼ rakuwa náa ku̱ba̱ʼ mixooʼ. Rígi̱ nimbáñun mu xákuwa gíná (2 Cor. 4:18).

6, 7. a) Ndiéjunʼ exkaxánʼ muʼniu̱u̱n a̱ngiu̱lú numuu rí nandulúʼ kuʼyáá Dios rá. b) Arathá tikhu xkri̱da rí nini tikhun a̱ngiu̱lú.

⁶ ‹Rí nandulúʼ kuʼyáá Dios› naʼni rí musngajmá rí nandulúʼ kuʼñúún a̱ngiu̱lú, iwáá índo̱ naguáʼníí xkujndu (atraxnuu 1 Juan 3:17, 18). * Mbá xkri̱da, nákha siglo timbá nirígá ewiʼ ga̱jma̱a̱ cristianos ndrígóo Judea nánguá niguáʼdáá rí mu̱phu̱. Ikha jngó a̱ngiu̱lú nimbañúún (Hech. 11:28, 29). Apóstol Pablo ga̱jma̱a̱ Pedro ma̱ngaa nithúún cristianos rí gíʼmaa mumbañún a̱ngiu̱lú (Rom.  12:13; 1 Ped. 4:9). Á mu ikháanʼlu nundríguíin májánʼ a̱ngiu̱lú bi̱ naguwáʼ gúyulu, iwáá náa a̱ngiu̱lú bi̱ niguaʼnii mbá gamiéjunʼ o nijuixkúún ga̱jma̱a̱ numuu fe ndrígu̱ún * (atraxnuu Proverbios 3:27). *

⁷ Xóó tséʼni mba̱yu̱ʼ rí mbaʼin xa̱bi̱i̱ Jeobá ndrígóo Ucrania ndiyóoʼ muniñaʼ guʼwún numuu guerra ga̱jma̱a̱ rí naguma gíníi. Mú tikhun niradíin. Ga̱jma̱a̱ mbaʼin a̱ngiu̱lú ndiyóoʼ maguanún náa guʼwún eʼwíínʼ xa̱bi̱i̱ Jeobá náa i̱mba̱ níʼkhá ndrígóo Ucrania ga̱jma̱a̱ náa Rusia. A̱ngiu̱lú bi̱ kuwa náa xuajen rígi̱ nini rí nindoo Dios, xúʼko̱ nisngajma rí na̱nguá ni̱ndxu̱ún náa numbaaʼ rígi̱. Ma̱ngaa nitaraʼa má xúʼko̱ “ajnga ri majan nuxi’” (Juan 15:19; Hech. 8:4).

8, 9. a) Xú káʼnii xkujndu eraʼníí bi̱ nijuixkúún rá. b) Náa numuu ndayóoʼ mumbaʼñún xá.

⁸ Tikhun bi̱ nijuixkúún ndayóoʼ magún i̱mba̱ níʼkhá náa xuajñún. Mú mbaʼin ndayóoʼ magún náa mbá xuajen rí tsíniʼnunʼ. Mbáa Xa̱bu̱ Ñajunʼ nuxnún ganitsu, xtíin ga̱jma̱a̱ guʼwá. Maski ajndu xúʼko̱ naguáʼdáá xkujndu. Mbá xkri̱da, mbáa ndayóoʼ maguʼwún mu̱phu̱ ganitsu rí mixtiʼkhu wéñuʼ. Tikhun naguwáʼ náa xuajen rí naʼni mijkha ga̱jma̱a̱ tséyáá xú káʼnii xtíin gúgíʼ náa naʼni gúwan. Eʼwíínʼ mbaʼyóoʼ majmañún majmúún ajua̱nʼ rí nuxi̱ʼ.

⁹ Tikhun Xa̱bu̱ Ñajunʼ guáʼdáá awan rí mumbáñún bi̱ nijuixkúún mu maguʼwún náa xuajen. Nuguáʼti̱i̱n rí bi̱ nijuixkúún muñajunʼ mu maguaʼdáá rí nda̱ñúnʼ. Rígi̱ ma̱ndoo maʼniún mingíjyúuʼ ikhiin numuu dí rígá mbaʼa rí ndayóoʼ majmañún. Mbá xkri̱da, ndayóoʼ majmañún mbá ajngáa nuxi̱ʼ ga̱jma̱a̱ costumbres rí nuxi̱ʼ. Ma̱ngaa ndayóoʼ majmañún nuxi̱ʼ xtángoo ga̱jma̱a̱ numuu impuestos ma̱ngaa facturas, numún e̱ji̱i̱n bi̱ nagúun escuela ga̱jma̱a̱ ajndu xóo muxprigún. Á mu a̱ngiu̱lú bi̱ nijuixkúún guáʼdáá xkujndu rígi̱, lá ma̱ndoo mumbaʼñún a̱ngiu̱lú ráʼ. (Filip. 2:3, 4.)

10. Xú káʼnii gándoo gúʼni gujkhuʼ fe ndrígu̱ún bi̱ nijuixkúún rá. (Atayáá timbá xtiʼkhu.)

¹⁰ Nguáná Xa̱bu̱ Ñajunʼ tséniñunʼ rí a̱ngiu̱lú bi̱ nijuixkúún magún náa congregación dí rígá ikhí. Tikhu organizaciones ndrígóo Xa̱bu̱ Ñajunʼ nuthúún rí muniñaʼ rumbañún. Mbáa nutún rí ni xákuwa náa xuajen rúʼko̱ á mu nuni gaʼduunʼ ñajunʼ rí xániñúnʼ magún náa reunión. Tikhun a̱ngiu̱lú nundrigú ñajunʼ numuu rí namiñun ga̱jma̱a̱ nakumu̱ún rí ní xáguáʼdáá ñajunʼ. Ikha jngó gíʼdoo numuu rí mbuʼñíinʼ mbá nacha̱ a̱ngiu̱lú. Ikhiin gíʼmaa mbuyáá rí naxmiéjunlú kuʼñúún. Rí naxmiéjunlú kuʼñúún ga̱jma̱a̱ rí numbáñunlú ma̱ndoo maʼni gujkhuʼ fe ndrígu̱ún (Prov. 12:25; 17:17).

11. a) Ndiéjunʼ eñúnʼ bi̱ nijuixkúún rá. b) Xú káʼnii gándoo gusngajma bi̱ nijuixkúún rí nuxna̱a̱ núma̱aʼ rá.

¹¹ Mbáa ginii mbaʼyóoʼ mumbañún a̱ngiu̱lú ga̱jma̱a̱ ganitsu, xtíin ga̱jma̱a̱  i̱ʼwáʼ. * Rí maraxna mbá corbata mbáa ndxájulú magiʼdoo wéñuʼ numuu. Mu, a̱ngiu̱lú bi̱ nijuixkúún ragíʼmaa munda̱ʼa̱a̱ wéñuʼ. Gíʼmaa musngajma rí nadxún ga̱jma̱a̱ numuu rí numbañún. Rígi̱ gaʼni rí a̱ngiu̱lú bi̱ nuxna makuwa gagi. Mu gíʼdoo numuu rí bi̱ nijuixkúún muni mbá tsiakii muñajunʼ. Á mu nuni, maʼndún kuyamijná ga̱jma̱a̱ mambáxu̱u̱n májánʼ gajmiún eʼwíínʼ a̱ngiu̱lú (2 Tes. 3:7-10). Maski asndu xúʼko̱, ndayóoʼ rí mumbáñuun ga̱jma̱a̱ rí gáʼñúnʼ xóó.

12, 13. a) Xú káʼnii gándoo gumbañúún bi̱ nijuixkúún rá. b) Arathá ndiéjunʼ rí nini tikhun a̱ngiu̱lú

¹² Tséyóoʼ maguaʼdáá wéñuʼ mbújkha̱a̱ mu mumbáʼñún a̱ngiu̱lú. Ikhiin nda̱ñúnʼ rí maʼndulú kuʼñúún ga̱jma̱a̱ rí makuwáanʼ gajmiúlú. Mbá xkri̱da, ma̱ndoo muʼthúún xú káʼnii gágun náa carro o xú káʼnii gutsi rí mu̱phu̱ náa na̱nguá minumuu. Ma̱ngaa ma̱ndoo mumbáʼñun xú káʼnii guxkamaa herramientas rí majmúún mu makhánun mbújkha̱a̱, xóo mbá ajua̱nʼ rí naʼxmí o mbá rí narujtu iná. Mú rí xóó gíʼdoo itháan numuu, rí mumbáñuun mu makuwá májánʼ náa congregación. Á mu nandoo, ma̱ndoo mu̱ʼgua̱ kuʼdiin reunión. Ma̱ngaa ma̱ndoo muʼsngúún xú káʼnii mutaruʼun itháan májánʼ xa̱bu̱ ikhí ga̱jma̱a̱ ma̱ndoo mu̱ʼgua̱ gajmiúlú.

 ¹³ Guʼyáá rí nigíʼnun a̱jkhui̱i̱n jiáma bi̱ nijuixkúún. Índo̱ niguáʼnu náa mbá congregación, mbaʼin bi̱ kuya̱ edxu̱u̱ nimbañúún. Nisngúún magún kuñu̱u̱n carro, muniraʼmáʼ cartas náa computadora ga̱jma̱a̱ xóó munda̱ʼa̱ ñajunʼ. Ma̱ngaa nisngúún muriyaʼ májánʼ awan mu muni ginii ñajunʼ Jeobá (Gál. 6:10). Tagajyúuʼ wéñuʼ, a̱jkhui̱i̱n ninindxu̱ún precursores. Ga̱jma̱a̱ numuu rí ninimi̱jna̱ muni itháan ñajunʼ Jeobá ma̱ngaa rí numbañún bi̱ kuya̱ edxu̱u̱, niyambáá itháan náa congregación ga̱jma̱a̱ túni rí nandoo numbaaʼ ndrígóo Satanás.

14. a) Ndiéjunʼ tsáʼkhá gíʼmaa munigaʼduunʼ bi̱ nijuixkúún rá. b) Arathá mbá xkri̱da ndrígóo mbáa bi̱ nisngájma fe.

¹⁴ Xó má xúgínʼ cristianos, xa̱bi̱i̱ Jeobá bi̱ nijuixkúún ndayóoʼ muraʼníí tsingíná ga̱jma̱a̱ mambaxúún itháan májánʼ gajmiún Jeobá raʼkháa rí maguaʼdáá itháan. * Lije bi̱ niʼthá ga̱jma̱a̱ numuu, ikhaa gajmíi̱n a̱ngui̱i̱n narmáʼáan a̱jkiu̱ún rí anu̱ún niʼsngúún rí gíʼdoo numuu fe índo̱ kuwa ragájnun. Ikhiin nuthi: “Anu̱xu ni̱jkha̱ radaʼ mámbá rí xajmuxu wéñuʼ. Nda̱wa̱á, nisngájmuxu bolsa rí nándáa rí kajti ga̱jma̱a̱ asndu nanduʼwá niʼthí: ‹Lá ndi̱ya̱a̱ ráʼ. Tséjmulú xúgíʼ rígi̱›” (atraxnuu 1 Timoteo 6:8). *

15, 16. a) Xú káʼnii gándoo gúxnún tsiakii a̱ngiu̱lú rá. b) Xú káʼnii gúʼni mu makuwá gagi xá.

¹⁵ Bi̱ nijuixkúún raʼkháa i̱ndó nda̱ñúnʼ ganitsu o xtíin. Nda̱ñúnʼ majmañún má xúʼko̱ ga̱jma̱a̱ numuu Dios (Mat. 4:4). Bi̱ kuya̱ edxu̱u̱ ma̱ndoo mbuyáaʼ i̱yi̱i̱ʼ náa ajngún ga̱jma̱a̱ mbuñíinʼ a̱ngiu̱lú bi̱ nuthi ajngún. Rígi̱ gíʼdoo wéñuʼ numuu, numuu rí mbaʼin bi̱ nijuixkúún ndiyóoʼ muniñaʼ xúgíʼ rí nduyáá. Nduñíinʼ a̱ngiu̱ún, xuajñún ga̱jma̱a̱ congregación ndrígu̱ún. Ndayóoʼ rí a̱ngiu̱lú maʼndún kuñún ga̱jma̱a̱ magaʼwíínʼ a̱jkiu̱ún kuñún mu xúʼko̱ mbuyáá rí Jeobá nandoo kaʼñún. Á mu tséyáá rígi̱, mbáa mbuyáaʼ náa eʼwíínʼ xa̱bu̱ bi̱ naguwáʼ náa xuajñún bi̱ tseni ñajunʼ Jeobá (1 Cor. 15:33). Índo̱ nundríguíin a̱ngiu̱lú náa congregación, numbaʼyíí Jeobá mu muñewu̱u̱n “bi̱ naguwáʼ i̱mba̱ níʼkhá” (Sal. 146:9).

¹⁶ Jesús gajmíi̱n anu̱u̱ tándoo gutangi̱ín náa xuajen índo̱ kuwa rutañajunʼ bi̱ nixkúún. Ikha jngó tikhun bi̱ nijuixkúún xándoo matangi̱ín náa xuajñún. Mbáa tikhun nánguá eñún matangi̱ín. Lije naʼthí rí mbaʼin bi̱ ndiyáá xú káʼnii nutsijmiin o nuradíin bi̱ kuñún na̱nguá eñún magún kudiin e̱jñún ikhí. Ikha jngó tsíñún gutangi̱ín náa xuajñún gajmiún e̱jñún. Á mu nandulúʼ mumbáñuun a̱ngiu̱lú gíʼmaa maʼndulú kuʼyamijná, maʼngo̱o̱ a̱jkiu̱lú ga̱jma̱a̱ manindxu̱lúʼ xa̱bu̱ guabaaʼ (1 Ped. 3:8). Rí niguma gíníi bi̱ nijuixkúún naʼniún mingíjyúuʼ mambaxúún gajmiún eʼwíínʼ xa̱bu̱. Mbáa matiñunʼ muthi rí niguáʼniin, itháan náa inún e̱jñún. Guraximíjna̱: “Xú káʼnii gáʼndoʼ magumún á mu ikhúún nigíʼnuʼ xúʼko̱ káʼnii rá.” (Mat. 7:12.)

17. Xú káʼnii embáñuun bi̱ nijuixkúún rí nuʼtáraʼa rá.

¹⁷ Rí mbiʼi xúgi̱, mbaʼin bi̱ nijuixkúún naguwaʼ náa xuajen rí xa̱bi̱i̱ Jeobá tséniñaʼ mutaraʼa. Mú, rí najuiʼtaraʼa mbaʼin bi̱ nijuixkúún nudxawíín timbá miʼtsú ajngáa ndrígóo reino (Mat. 13:19, 23). Mbaʼin bi̱ nijuixkúún bi̱ kuwa gíná naʼni a̱jkiu̱ún náa reunión ndrígúlú. Ikhú nduyáá rí Dios xtáa náa ikhiin (Mat. 11:28-30; 1 Cor. 14:25).

18, 19. Ndiéjunʼ gúʼni índo̱ gúʼtaruʼun bi̱ nijuixkúún rá.

¹⁸ Gíʼmaa muʼni tsumáá índo̱ nuʼtáruʼun bi̱ nijuixkúún (Prov. 22:3; Mat. 10:16). Índo̱ guʼtamíjná gajmiúlú, gíʼmaa muʼdxawíín májánʼ rí ethi. Mú xúʼthá numuu política. Gúʼni rí gáʼthulúʼ sucursal ga̱jma̱a̱ rí guthi Xa̱bu̱ Ñajunʼ. Xúʼko̱ muñeumíjna̱ ikháanʼ gajmiúlú eʼwíínʼ. Numuu rí bi̱ nijuixkúún naguwáʼ náa mixtiʼkhu religión ga̱jma̱a̱ costumbre, gíʼmaa mbuʼyáá xú kaʼnii endxa̱ʼwa̱a̱ edxu̱ún ga̱jma̱a̱ xóo ekumún ma̱ngaa gíʼmaa mbuʼyamajkún. Mbá xkri̱da, xa̱bu̱ náa tikhuu xuajen mbóó endxa̱ʼwa̱a̱ edxu̱ún rí xóo mugíʼ xtíin gu̱ʼu̱. Ikha jngó índo̱ gúʼtaruʼun xa̱bu̱ bugi̱, gíʼmaa mugíʼ mbá xtíin rí xáʼni magawúunʼ.

¹⁹ Bi̱ ni̱ndxu̱lú cristianos nandulúʼ mumbáñuun xa̱bu̱ bi̱ numíniiʼ, maski ajndu rañájúnʼ xa̱bi̱i̱ Dios. Índo̱ numbáñuun nduʼyaridáá xkridoo samaritano bi̱ niʼthí Jesús ga̱jma̱a̱ numuu (Luc. 10:33-37). Rí itháan májánʼ xóo mumbáñuun xa̱bu̱ nindxu̱u̱ rí mu̱ʼgua̱ kuʼyúlú ajngáa ndrígóo Reino. Mbáa bi̱ kayá edxu̱u̱ bi̱ nimbáñun mbaʼin bi̱ nijuixkúún niʼthí rí gíʼdoo numuu muʼthá rí ni̱ndxu̱lú xa̱bi̱i̱ Jeobá. Gíʼmaa muʼthúún rí kuwáanʼ ikhí mu mumbáñuun makru̱ʼu̱u̱n rí naʼthí náa Biblia rí marigá nda̱wa̱á, raʼkháa rí mumbáñuun ga̱jma̱a̱ numuu mbújkha̱a̱.

20, 21. a) Xú káʼnii gáyambáá rí maʼndulú kuʼñúún bi̱ nijuixkúún rá. b) Ndiéjunʼ gajmañulú náa imbo̱ʼ artículo rá.

²⁰ Rí musngajmá rí nandulúʼ kuʼñúún bi̱ naguwaʼ i̱mba̱ níʼkhá nayambáá wéñuʼ. Guʼyáá rí nigíʼnuu mbáa ndxájulú bi̱ xtáa náa Eritrea bi̱ mbiʼyuu Alganesh. Índo̱ ajmbio̱o̱ nikháñu, ikhaa ndiyóoʼ magajnúu náa xuajñu gajmíi̱n mbá majuiin e̱ji̱i̱n majkhinʼ ga̱jma̱a̱ numuu rí nijuixkúún. Ndiyóoʼ magún mbá migiñuʼ mbiʼi náa Ku̱ba̱ʼ mixooʼ. Nda̱wa̱á rí nigún mbaaʼ wéñuʼ, niguáʼnu náa Sudán. Ikhaa naʼthí: “A̱ngiu̱lú nindriguáanʼxu májánʼ wéñuʼ, niniuxu asndu xóo bi̱ kúwi̱i̱n guʼwún, nixnuxu ganitsu, xtíin, mbá guʼwá ga̱jma̱a̱ nimbáyuxu xóo ma̱ndoo murajtúun carro. Tsíin mangiin nundriguíin xa̱bu̱ bi̱ tsíniʼniúnʼ náa guʼwún i̱ndó numuu rí nduyamajkuíí ikháá má Dios xá. I̱ndó xa̱bi̱i̱ Jeobá” (atraxnuu Juan 13:35). *

²¹ Ndiéjunʼ gándoo muʼni mu mumbaʼñún e̱jñún bi̱ nagún gakuwa i̱mba̱ níʼkhá rá. Náa i̱mba̱ artículo majmañulúʼ xú kaʼnii gándoo gumbaʼñún mu mbuyamajkuíí Jeobá ga̱jma̱a̱ gagi.