NÁKHA tsiguʼ 1910, anu̱ʼ ga̱jma̱a̱ ru̱dúʼ niniñaaʼ xuajen Tiflis (Georgia) mú makuwíin náa mbá granja chíʼgíʼ dí rígá mijngii Pelly (Saskatchewan, náa oeste ndrígóo Canadá). Ikhúúnʼ nigumún nákha tsiguʼ 1928, ga̱jma̱a̱ ikhúúnʼ itháan giʼtháá ki xóo mbá majuiin a̱ngui̱i̱nʼ. Anu̱ʼ nikháñuu nákha tígo̱o̱ majun gu̱nʼ dí maxtáá, ga̱jma̱a̱ ru̱dúʼ nikháñuu índo̱ ikhúúnʼ ni̱ndxu̱ʼ mbáa ada̱. Nda̱wa̱á nikháñuu ndxájuʼ giʼnii bi̱ mbiʼyuu Lucy nákha gíʼdoo 17 tsiguʼ. Ikha jngó amuʼ Nick niñewu̱nʼ ikhúúnʼ ga̱jma̱a̱ eʼwíínʼ a̱ngui̱i̱nʼ.

Mbóo mbiʼi, a̱ngui̱i̱nʼ ndiyáá dí nigujtúun tsiyuuʼ wáyú. Kaʼnííʼ gúʼdoo a̱jma̱ tsiguʼ ikhú. Nimiñun wéñuʼ dí wáyú majngápruʼun, ikha jngó nithu̱nʼ gakhi̱i̱ mú maniʼñúʼ ragújtúun. Ikhúúnʼ gújun skidiʼ ga̱jma̱a̱ na̱nguá nidxawun. Maski ajndu nda̱a̱ dí nigíʼnuʼ, mbiʼi rúʼko̱ a̱ngui̱i̱n ndiyáá dí ikhúún tsédxuun.

Mbáa bi̱ nambáxu̱u̱ gajmíi̱n a̱ngui̱i̱nʼ niʼthí dí itháan májánʼ gaʼni dí ikhúúnʼ maʼgá náa escuela náa nusngáa ajngáa señas. Ikha jngó amuʼ Nick nikungunʼ maʼgá náa escuela náa nunigajmaa bi̱ tsedxawíín náa Saskatoon (Saskatchewan). Ikhúúnʼ nimíñuʼ wéñuʼ, numuu dí ikhú gúʼdoo witsu tsiguʼ ga̱jma̱a̱ escuela rígá mitsínguánʼ wéñuʼ náa kuwa a̱ngui̱i̱nʼ. I̱ndó ma̱ndoo mbañu̱u̱n  a̱ngui̱nʼ índo̱ narígá ndxa̱a̱ ga̱jma̱a̱ índo̱ ruʼphu. Nda̱wa̱á, nijmañún ajngáa señas, ga̱jma̱a̱ asndu niniguʼ maʼtsíin gajmíi̱n eʼwíínʼ e̱ji̱n.

Marion, mbáa ndxájuʼ bi̱ ninújunʼ ga̱jma̱a̱ Bill Danylchuck nákha 1939, a̱jmi̱i̱n ikhiin niñewu̱nʼ ikhúúnʼ ga̱jmu̱ʼ ndxájuʼ Frances. Ikhiin ninindxu̱ún timbíi̱n bi̱ ninigajmaa gajmiún xa̱bi̱i̱ Jeobá. Índo̱ narígá vacaciones, ikhiin ninimi̱jna̱ musngúúnxu dí najmañún náa Biblia. Niʼni miʼskhaa mutajmíjnaxu numuu dí tsíjmañún ajngáa señas. Maski ajndu xúʼko̱, ndiyáá dí naniguʼ wéñuʼ dí xtáá rajmañuʼ ga̱jma̱a̱ numuu Jeobá. Nikroʼoʼ dí kúwi̱i̱n runi nambánii ga̱jma̱a̱ dí naʼthí Biblia, ikha jngó ni̱jkhá gajmíi̱nʼ gátaráʼa. Tájyúuʼ má nindoʼ majngúnʼ iyááʼ. Nákha 5 ñajunʼ septiembre tsiguʼ 1941, Bill nikumúnʼ iyááʼ náa mbá barril dí ñajunʼ acero náa ninimajnííʼ iyaʼ ndrígóo pozo dí wéʼtsí me̱ndaʼkho.

Índo̱ nitangaánʼ goʼwóoʼ nákha tsiguʼ 1946, ni̱jkuáxu mbá asamblea náa Cleveland (Ohio, Estados Unidos). Timbá mbiʼi, a̱ngui̱i̱nʼ wa̱ʼxa̱ʼ niniraʼmáʼ mu mba̱yo̱o̱ dí nanújngoo náa programa. Mú dí raga̱jma̱ mbiʼi nidxuʼ wéñuʼ índo̱ ndi̱yo̱o̱ dí asamblea nijuiʼtájuíi náa ajngáa señas mu makru̱ʼu̱u̱n bi̱ tsedxawíín. Asndu ikhú niniguʼ itháan rí nanújngoo ga̱jma̱a̱ nakroʼoʼ rí naʼsngáa Biblia. ¡Niniguʼ wéñuʼ!

Índo̱ niguámbá A̱jma̱ Guerra náa Xúgíʼ Numbaaʼ xa̱bu̱ nindúún musngajma dí ni̱ndxu̱ún jmbiin náa xuajñún. Mú índo̱ nitangaánʼ náa escuela nda̱wa̱á dí nirígá asamblea, nitha dí mani̱ndxu̱ʼ jmbii náa Jeobá. Ikha jngó niniʼñúʼ raraxi̱i̱ bandera ga̱jma̱a̱ ajmúú ndrígóo himno nacional ga̱jma̱a̱ ndxa̱a̱. Ma̱ngaa niniʼñúʼ ra̱jkhá náa guʼwá ndxájkun gajmíi̱nʼ eʼwíínʼ e̱ji̱n. Rígi̱ tánigunʼ nditháan bi̱ nusngáa náa escuela, niniuʼ tsiakii ga̱jma̱a̱ nithi dí minduwaʼ mu mariʼkhu̱u̱ xóo endxa̱ʼwa̱mínáʼ. Bi̱ nanigajmaa gajmíi̱nʼ ndiyáá dí xtáa rarígá, rúʼko̱ niʼni dí ma̱ndoo matarúʼún. Tikhun ninigajmaa dí gajkhun nda̱wa̱á. Mbáa rí ikhiin ni̱ndxu̱ún Larry Androsoff, Norman Dittrick ga̱jma̱a̱ Emil Schneider, bi̱ kuwa xóó runi ñajunʼ Jeobá.

Índo̱ na̱jkhá náa i̱ʼwáʼ xuajen, naniminaʼ má xúʼko̱ matarúʼún bi̱ tsedxawíín. Mbá xkri̱da, náa Montreal ni̱jkhá náa nagimbíi̱n bi̱ tsedxawíín náa xuajen. Ikhí nitaróʼoo Eddie Tager, mbáa dxámá bi̱ nindxu̱u̱ pandillero. Eddie niʼni ñajunʼ náa congregación dí nuthi señas ndrígóo Laval (Quebec) asndu índo̱ nikháñu nákha timbá tsiguʼ. Ma̱ngaa niniʼnííʼ mbáa dxámá bi̱ mbiʼyuu Juan Ardanez. Xó má xa̱bu̱ bi̱ nikuwa náa Berea nákha siglo timbá, Juan niʼnigajmaa wéñuʼ mu mbaʼyoo á mu gajkhun dí xtáa rajmañuu rí naʼthí náa Biblia (Hech. 17:10, 11). Ikhaa ni̱jkha̱nú ninindxu̱u̱ Testigo ga̱jma̱a̱ niyéjkha̱ edxu̱u̱ náa congregación ndrígóo Ottawa (Ontario) asndu índo̱ nikháñuu.

Tsiguʼ 1950 ni̱jkhá gáxtáá náa Vancouver. Maski ajndu niniguʼ matarúʼún bi̱ tsedxawíín, nditháan xámbumuʼ dí nigíʼnuʼ índo̱ nitamíjná náa calle ga̱jmu̱ʼ mbáa a̱ʼgu̱ bi̱ naʼdxaun bi̱ mbiʼyuu Chris Spicer. Nindoo magruigú xúgíʼ gu̱nʼ revistas ga̱jma̱a̱ nindoo  maniʼnííʼ ajmbio̱o̱ bi̱ mbiʼyuu Gary. Ni̱jkhá náa goʼwóo ga̱jma̱a̱ nitamíjnáxu mba̱yu̱ʼ ga̱jma̱a̱ notas. Nánguá ndiyamíjnáxu asndu mba̱yu̱ʼ tsiguʼ nda̱wa̱á, índo̱ niguwaʼ guraxu̱u̱n náa mbá asamblea dí nirígá náa Toronto (Ontario). ¡Ra̱ʼkhá tháán nidxuʼ! Gary majngúun iyááʼ mbiʼi rúʼko̱. Experiencia rígi̱ niʼni mba̱yo̱o̱ dí gíʼdoo wéñuʼ numuu mataráʼa má xúʼko̱. Tséʼyáá á mu bi̱ nuʼtaráʼáá magruigú dí gajkhun nda̱wa̱á.

Nda̱wa̱á nitangaánʼ náa Saskatoon. Ikhí niniʼnííʼ mbáa a̱ʼgu̱ bi̱ nindo̱ʼo̱ʼ masngúún ga̱jma̱a̱ numuu Biblia a̱jmi̱i̱n e̱ji̱i̱n, bi̱ tsedxawíín. Nigumbiʼñún Jean ga̱jma̱a̱ Joan Rothenberger. Nájmi̱i̱n ninigajmaa ikháá má escuela dí ninigajmaa ikhúún. Tájñúúnʼ má índo̱ nithúún bi̱ nunigajmaa gajmiún dí kuwa rajmañún, ga̱jma̱a̱ mbáa witsiin wa̱ʼxa̱ʼ ninindxu̱ún xa̱bi̱i̱ Jeobá. Mbáa dí ikhiin nigumbiʼyuu Eunice Colin. Niniʼnííʼ náa imbóó tsíguʼ rí ninigajmaa náa escuela. Nákha ikhú, nixnúʼ mbá dulce ga̱jma̱a̱ niraxuʼ á mu ma̱ndoo mambaxúʼ ga̱jmu̱ʼ. Eunice ni̱jkha̱nú ninindxu̱u̱ mbáa bi̱ nigiʼdoo wéñuʼ numuu náa vida ndrígóʼ: Ni̱jkha̱nú ninindxu̱u̱ a̱ʼgiu̱ʼ.

Índo̱ ru̱dúu̱ Eunice ndiʼyoo dí ikhaa xtáa raʼnigajmaa Biblia, nindo̱ʼo̱o̱ director ndrígóo escuela mu maʼthúnʼ rí maniñuuʼ raʼnigajmaa. Maski ajndu nigíʼ maʼni dí maniñuʼ ga̱jma̱a̱ niríya kaʼyúʼ i̱yi̱i̱ʼ ndrígóo Biblia, Eunice nigíminaʼ mani̱ndxu̱u̱ jmbii náa Jeobá. Índo̱ nindoo majngúun iyááʼ, anu̱u̱ ga̱jma̱a̱ ru̱dúu̱ nitháán: “Á mu nanindxa̱ʼ xa̱bi̱i̱ Jeobá, magajnáaʼ náa guʼwá rígi̱”. Ikha jngó índo̱ Eunice nigiʼdoo 17 tsiguʼ ni̱jkha̱ gáxtáa gajmíi̱n bi̱ ni̱ndxu̱ún xa̱bi̱i̱ Jeobá. Niʼnigajmaa̱ má xúʼko̱ Biblia ga̱jma̱a̱ nijngúun iyááʼ. Nidamíjnáxu tsiguʼ 1960, mú anu̱u̱ ga̱jma̱a̱ ru̱dúu̱ na̱nguá nigún náa boda. Ninújngoo tsiguʼ,  anu̱u̱ ga̱jma̱a̱ ru̱dúu̱ nigíʼdi̱i̱ ndiyamajkhúnxu ga̱jma̱a̱ numuu dí nunimbuxu ma̱ngaa xóo enimbanuu e̱jñu̱xu.

Niguaʼdiinxu mbá juwiin e̱jñu̱xu bi̱ nudxawíín. Niʼni mingíjyúuʼ munimbaniixu. Mú ninimíjna̱xu dí majmañún señas mu ma̱ndoo mutamíjnáxu ga̱jma̱a̱ dí musngúúnxu dí gajkhun. A̱ngiu̱lú bi̱ kuwa náa congregación nimbáyuxu wéñuʼ. Mbá xkri̱da, mbáa anu̱ún e̱ji̱i̱n niʼnirámáʼ mú maʼthí dí mbáa a̱ʼdiúxu naʼthí ajngáa dí xkawiʼ náa Guʼwá nagimbáanʼ. Ninimbaniixu xkujndu ikhí má. E̱ji̱nʼ, James, Jerry, Nicholas ga̱jma̱a̱ Steven, ni̱ndxu̱ún bi̱ kuya̱ edxu̱u̱ náa congregación ga̱jma̱a̱ nuni ñajuunʼ Jeobá mbá kambáxu̱u̱n gajmiún bi̱ kuwa náa guʼwún. Ma̱ngaa Nicholas ga̱jma̱a̱ a̱ʼgiu̱u̱, Deborah, nuyambáá náa najuiʼtájuíi ajngáa señas náa sucursal ndrígóo Gran Bretaña. Steven ga̱jma̱a̱ a̱ʼgiu̱u̱, Shannan, kuwa náa nutajuíi Ajngáa señas náa sucursal ndrígóo Estados Unidos.

Mú índo̱ maʼni 40 tsiguʼ dí nidamíjnáxu, Eunice nikháñuu ga̱jma̱a̱ numuu cáncer. Xúgíʼ tsiguʼ rúʼko̱, nixnúu tsiakii  fe rí nigiʼdoo rí matuxi̱ín xa̱bu̱ bi̱ nikháñun. Ra̱ʼkhá tháán nandoʼ maʼgánú mbiʼi rúʼko̱ mú mba̱yo̱o̱ mbu̱júu̱ʼ.

Nákha febrero tsiguʼ 2012, nixpátrigu̱u̱n ga̱jma̱a̱ nijmigaʼ itsu̱ tsaguʼ. Ndi̱yo̱o̱ dí mbaʼyóoʼ mixtambáyúʼ, ikha jngó ni̱jkhá gaxtáa ga̱jmu̱ʼ mbáa a̱ʼdióoʼ. Nikúwáanʼxu náa congregación dí nuthi ajngáa señas ndrígóo Calgary (Alberta), náa niyéjkha̱ edxu̱u̱. Nindxu̱u̱ timbá miʼtsú rí xtáá náa congregación señas. Mú, xú káʼnii nindoo nimbáxuʼ májánʼ ga̱jmu̱ʼ Jeobá xúgíʼ tsiguʼ dí nixtáá náa congregación inglés rá. Ga̱jma̱a̱ tsiakii ndrígóo Jeobá. Ikhaa niʼnimbánuu dí mañewu̱u̱n e̱ji̱n xuáʼa̱ (Sal. 10:14). Naxni̱i̱n wéñuʼ núma̱aʼ xúgínʼ bi̱ nini notas, bi̱ nijmañún señas ga̱jma̱a̱ mutajuíi ajngáa señas mu mba̱yo̱o̱ ikhúúnʼ.

Nirígá mbiʼi dí nixtáá gíná ga̱jma̱a̱ nindoʼ maniʼñúʼ, numuu dí tákroʼoʼ rí nuthi ga̱jma̱a̱ nikumuʼ dí nimbáa tséʼyoo xú káʼnii gambáñun bi̱ tsedxawíín. Mbiʼi rúʼko̱ nandxa̱ʼo̱o̱ edxu̱ʼ dí Pedro niʼthún Jesús: “Señor, ¿tsala guʼ-guaxoʼ tsudu-ra? Ri indo-ma Ikan xtaʼda ajnga ri ndaʼya asjndo jamu” (Juan 6:66-68). Xó má eʼwíínʼ a̱ngiu̱lú bi̱ tsedxawíín bi̱ kuwa mba̱yu̱ʼ tsiguʼ runi ñajuunʼ Jeobá, ikhúúnʼ nijmañuʼ mani̱ndxu̱ʼ mbá xa̱bu̱ bi̱ naʼngo̱o̱ a̱jkiu̱u̱n ma̱ngaa maku̱mu̱u̱ ka̱yo̱o̱ Jeobá ga̱jma̱a̱ xuajñu. Rúʼko̱ nimbáyuʼ wéñuʼ. Rí xúgi̱ rígá mbaʼa i̱yi̱i̱ʼ náa ajngóoʼ ga̱jma̱a̱ nambáyuʼ wéñuʼ reunión ma̱ngaa asambleas náa nuthi ajngáa señas americano. Ra̱ʼkhá tháán nixtáá gagi ga̱jma̱a̱ Jeobá niʼni tsajkurámuʼ wéñuʼ.