1. Ndiéjunʼ rí nandoo Dios maguma mbiʼi xúgi̱ rá.

 RÍ NANDOO Dios maguma mbiʼi xúgi̱ nindxu̱u̱ dí miʼtáraʼa ajngáa dí májánʼ ga̱jma̱a̱ numuu Reino náa xúgíʼ tsu̱du̱u̱ Ku̱ba̱ʼ (Mar. 13:10; 1 Tim. 2:3, 4). Ñajunʼ rígi̱ ndrígóo Jeobá ga̱jma̱a̱ ikhaa ndaʼyoo dí gíʼdoo wéñuʼ numuu rí asndu niríyaaʼ A̱ʼdióo bi̱ nandoo kaʼyoo wéñuʼ mayéʼga̱ edxu̱u̱ náa ñajunʼ rígi̱. Numuu dí ra̱ʼkhá tháán májánʼ eʼni ikhaa, ikha jngóo nandoo nduʼyáá dí índo̱ gáguma gámbáa dí raʼkhí, Jeobá maniguuʼ ñajunʼ dí niguma (Mat. 24:14).

2. Ndiéjunʼ guʼyáá náa artículo rígi̱ rá.

² Náa artículo rígi̱ mbuʼyáá dí Jesús najmiuu “ñumbáá jmbii bi̱ májánʼ endxa̱ʼwáminaʼ” mu maxnúlú ganitsu dí na̱ʼkha̱ náa Dios ga̱jma̱a̱ maríyaʼ awan miʼtáraʼa xóo nimbá miʼtsú tárígá (Mat. 24:45). Ma̱ngaa mbuʼyáá ndiéjunʼ gándoo muʼni mu mumbáyii Jesús ga̱jma̱a̱ ñumbáá jmbii.

3. Ndiéjunʼ ñajuunʼ nikhánáá Jesús rá.

³ Jesús kayá edxu̱u̱ náa najuiʼtáraʼa. Xú káʼnii eʼyáá rá. Nákha xóó tséjkha̱a̱ mekhuíí, nigímbíin tikhun xa̱bi̱i̱ náa mbá kúbá ndrígóo Galilea ga̱jma̱a̱ niʼthúún: “Nijuixnájxuʼ xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ”. Ga̱jma̱a̱ guʼyáá ndiéjunʼ niʼthí nda̱wa̱á: “Ikha jngó gaʼguala ga̱jma̱a̱ gusngún xa̱bu̱ bi̱ kúwá náa xúgíʼ xuajen” (Mat. 28:18, 19). Ga̱jma̱a̱ numuu rígi̱ nandoo nduʼyáá dí Jesús nikhánáá mayéʼga edxu̱u̱ náa najuiʼtáraʼa.

4. Xóo eʼyáá dí Jesús nayéjkha̱ má xúʼko̱ edxu̱u̱ náa najuiʼtáraʼa rá.

 ⁴ Jesús niʼthí dí ñajunʼ dí majuiʼtáraʼa ga̱jma̱a̱ dí miʼsngúún xa̱bu̱ miʼni náa “xúgíʼ xuajen”, ga̱jma̱a̱ rí ikhaa maxtáa gajmíi̱n xa̱bi̱i̱ asndu índo̱ “gaguma gámbáa xúgíʼ dí raʼkhí náa numbaaʼ rígi̱” (Mat. 28:20). Ajngáa rígi̱ nasngájma kaʼwu dí Jesús mbayá edxu̱u̱ náa najuiʼtáraʼa asndu mbiʼi xúgi̱.

5. Xú káʼnii kuwáánʼ ruʼnimbánii mangáán dí naʼthí náa Salmo 110:3 rá.

⁵ Jesús ni̱jkha̱nú ndiʼyoo gajkhun dí náa iwáá mbiʼi makuwá mbaʼin wéñuʼ bi̱ muñajunʼ. Ndiʼyoo dí mambanúu dí nijuiʼtáriyaʼ rígi̱: ‹Xuajñaaʼ maxnáximinaʼ ga̱jma̱a̱ xúgíʼ a̱jkiu̱u̱n mbiʼi rí gáraxna ikhúún soldados ndrígáaʼ› (Sal. 110:3). Á mu ikháán naratáraʼa ajngáa rí májánʼ, xtaa ratambáyii Jesús ga̱jma̱a̱ ñumbáá jmbii, ma̱ngaa xtaa ratanimbánii ajngáa dí nijuiʼtáriyaʼ rígi̱. Rí xúgi̱ najuiʼtáraʼa má, mú rígá tikhu dí nuraʼníí.

6. Ndiéjuunʼ nindxu̱u̱ tikhu dí nuraʼníí mbiʼi xúgi̱ rá.

⁶ Mbóoʼ dí nuraʼníí nindxu̱u̱ dí tsíñún gúyulú. Bi̱ ni̱ndxu̱ún apóstata, político ga̱jma̱a̱ bi̱ kuya̱ edxu̱u̱ náa i̱ʼwáʼ religión, nuthi mbaʼa dí mindu̱wa̱ʼ ga̱jma̱a̱ numuu ñajunʼ ndrígúlú. Á mu bi̱ kuʼñúún, bi̱ nuniniáánʼlu ga̱jma̱a̱ bi̱ nuñajunʼ gajmiúlú nunimbu̱ún mindu̱wa̱ʼ rúʼko̱, mbáa munimijna dí muniʼñááʼ ru̱ʼni̱ ñajuunʼ Jeobá ga̱jma̱a̱ dí muʼtáraʼa. Náa tikhu xuajen, xa̱bu̱ sia̱nʼ nunigináanʼ, nuruguáanʼ ga̱jma̱a̱ asndu nuxudáanʼlu guʼwá e̱jua̱nʼ. Mú, rígi̱ tséʼniulú tsiánguá, numuu rí Jesús niʼthí: “Mawiñu̱u̱nʼ kuyala ga̱jma̱a̱ numuu mbiʼyuʼ” (Mat. 24:9). Índo̱ tsíñún gúyulú nasngájma dí nduʼyaridáá Jesús ga̱jma̱a̱ rí Jeobá nandoo kaʼyulú (Mat. 5:11, 12). Gixa̱a̱ xtáa rayambáá náa xúgíʼ rúʼko̱, mú ikhaa xáʼngo̱o̱ gáʼniga̱jma̱a̱ Jesús. Ga̱jma̱a̱ numuu rí Jesús nambáyulúʼ, mbaʼin xa̱bu̱ bi̱ kúwá náa xúgíʼ xuajen nudxawíín ajngáa dí májánʼ ga̱jma̱a̱ numuu Reino.

7. Xú káʼnii tayáá ikháán dí xtáa rambánuu dí naʼthí náa Apocalipsis 14:6, 7 rá.

⁷ I̱mba̱ dí nuraʼníí nindxu̱u̱ dí rígá mbaʼa wéñuʼ ajngáa. Náa mbá visión dí Jesús nisngájmuu mbaʼyoo apóstol Juan, nixnúu mbaʼyoo dí rúʼko̱ xárikhoo dí majuiʼtáraʼa ajngáa dí májánʼ (atraxnuu Apocalipsis 14:6, 7). Xóo eʼnilú mu muʼtáruʼun xa̱bu̱ bi̱ nuthi mbaʼa wéñuʼ ajngáa rá. Índo̱ nuʼni rí xa̱bu̱ mbuyáá náa sitio ndrígúlú náa jw.org, i̱yi̱i̱ʼ dí nagájnuu náa Biblia itháan dí 1,000 ajngáa. Ma̱ngaa, Cuerpo Gobernante nixná permiso dí majuiʼtájuíi itháan dí 700 ajngáa libro dí mbiʼyuu Araxtaa gagi kámuu rí itháan najmulú muxná ga̱jma̱a̱ estudio. Ma̱ngaa rígá mbaʼa video dí ma̱ndoo mambáñún bi̱ tsédxawíín ma̱ngaa mbaʼa i̱yi̱i̱ʼ náa ajngáa braille muraxnuu bi̱ tsékruigu̱u̱n. Índo̱ narígá xúʼko̱ naʼni rí mbaʼin wéñuʼ xa̱bu̱ mudrigú ajngáa rí májánʼ ga̱jma̱a̱ numuu Reino. Kuwáánʼ ruʼyáá dí xtáa rambánuu dí niʼtáriyaʼ náa Biblia: “Bi̱ nuthi xúgíʼ ajngáa náa xúgíʼ xuajen” kúwá rajmañún muthi “ajngáa mikaʼwu”, xó muʼthá, dí gajkhun dí naʼsngáa náa Biblia (Zac. 8:23; Sof. 3:9). Xúgíʼ rígi̱ nandoo narígá numuu rí Jesucristo kayá edxu̱u̱ ga̱jma̱a̱ nañewu̱u̱n ñajunʼ rígi̱.

8. Ndiéjunʼ dí májánʼ nirígá náa najuiʼtáraʼa asndu mbiʼi xúgi̱ rá.

⁸ Rí mbiʼi xúgi̱, itháan dí 8 millones xa̱bu̱ bi̱ kúwá náa itháan dí 240 países kúwá náa xuajñuu Jeobá. ¡Mámbá tsiguʼ najngún iyááʼ mbaʼin mindaʼkhu xa̱bu̱! Mú na̱nguá gíʼdoo wéñuʼ numuu nguáthi̱i̱n ejngúún iyááʼ, itháan gíʼdoo numuu rí niʼngu̱u̱n niriʼkumijná xa̱bu̱ bugi̱, náa Biblia naxná mbiʼñún “xóo i̱mba̱a̱ nuxi̱i̱ʼ xa̱bu̱” (Col. 3:8-10).  Mbaʼin dí ikhiin niniñanʼ dí nubaʼkhún gajmiún eʼwíinʼ, dí muxmijná, rí tsíñún gúñún eʼwíinʼ bi̱ ni̱ndxu̱ún mixtiʼkuiin ki xóo ikhiin ga̱jma̱a̱ bi̱ nindún muni xó má eñún ikhiin. Xtáa rambánuu kiʼtáriyaʼ dí naʼthí náa Isaías 2:4: “Nánguá majmañún muni itháan guerra”. Numuu rí nuʼni xó má eʼngo̱o̱ manindxu̱lúʼ imba̱a̱ nuxi̱i̱ʼ xa̱bu̱, nuʼni rí xa̱bu̱ manigu̱u̱nʼ maguwáʼ náa xuajñuu Dios ga̱jma̱a̱ nusngajmá dí na̱jkua̱ kidxuuʼ Jesucristo, bi̱ kayá edxu̱u̱ náa ikháanʼlu (Juan 13:35; 1 Ped. 2:12). Mú nimbá dí rígi̱ na̱nguá erígá i̱ndó ikháá, narígá numuu rí Jesús nambáyulúʼ.

9. Xó má naʼthí náa Mateo 24:45-47, ndiéjunʼ niʼthí Jesús dí marigá náa iwáá mbiʼi rá.

⁹ (Atraxnuu Mateo 24:45-47). Jesús niʼtáriyaʼ dí náa iwáá mbiʼi magíiʼ mbáa “ñumbáá jmbii bi̱ májánʼ endxa̱ʼwáminaʼ” mu maʼni ñajuunʼ dí maxnúlú ganitsu dí na̱ʼkha̱ náa Dios. Ikha jngóo ikhaa nagi̱ʼthu̱u̱n dí ñumbáá bugi̱ mañajunʼ gakhii wéñuʼ náa mbiʼi dí kuwáánʼ xúgi̱. Ga̱jma̱a̱ xúʼko̱ má xtáa raʼni. Jesús najmiuu guéjmi̱i̱n a̱ngiu̱lú bi̱ kaxtaʼwíin mu “maxníʼtsún bi̱ kúwá náa goʼwóo mbiʼi rí kaʼyoo”, xóo muʼthá, bi̱ ni̱ndxu̱ún xa̱bi̱i̱ Dios ga̱jma̱a̱ xa̱bu̱ bi̱ nanigu̱u̱n mudxawíín. Xa̱bekha̱ bugi̱ na̱nguá eni dí ikhiin “mutañajuínʼ fe ndrígu̱ún” eʼwíinʼ (2 Cor. 1:24). Ikhiin naguánu nduyáá dí Jesucristo nindxu̱u̱ “bi̱ kayá edxu̱u̱ ga̱jma̱a̱ bi̱ naʼtáñajunʼ” xuajñuu (Is. 55:4).

10. Náa biʼyaa libro dí na̱ʼkha̱ náa xtiʼkhu nimbáyaaʼ ikháán mi̱dxu̱ʼ náa kamba̱a̱ dí na̱jkha̱ kañáán maraxtaa rá.

¹⁰ Asndu má nákha 1919, ñumbáá jmbii niʼniratoo mbaʼa wéñuʼ i̱yi̱i̱ʼ dí maxnún xa̱bu̱ mu ma̱ndoo majmañún ga̱jma̱a̱ numuu Dios. Nákha 1921, ñumbáá jmbii niríyaʼ náa ajngáa inglés libro dí mbiʼyuu El Arpa de Dios mu  maʼsngúún xa̱bu̱ dí itháan nagájnuriyoo náa Biblia. Xó má ni̱jkha̱ rajngoo mbiʼi, ni̱jkha̱ rarígá i̱ʼwáʼ libro. Náá biʼyaa rí nidxuʼnú nitatsiʼniʼ ga̱jma̱a̱ nindaaʼ xtayáá Jeobá ikháán rá. Mbáa nindxu̱u̱ tikhu dí rígi̱: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Ndiéjunʼ phú eʼsngáa náa Biblia rá. Ndiéjunʼ eʼsngúlú Biblia rá. O mbáa xtaa ratanigajmaa ga̱jma̱a̱ i̱mba̱ nuxi̱ʼ libro dí mbiʼyuu ¡Araxtaa gagi kámuu mbiʼi!. Libro rígi̱ nigájnuu mu mambáyulúʼ muʼsngúún xa̱bu̱ ga̱jma̱a̱ ni̱ʼkha̱nú náa mbiʼi dí kaʼyoo.

11. Ndíjkha dí gíʼdoo wéñuʼ numuu rí xúgiáánʼ mudrígúlú ganitsu dí na̱ʼkha̱ náa Dios rá.

¹¹ Raʼkháa i̱ndó bi̱ nunigajmaa Biblia nda̱ñúunʼ ganitsu dí májánʼ. Rí phú gajkhun, xúgiáanʼ nda̱yúlúʼ. Apóstol Pablo niʼnirámáʼ: “Ganitsu gujkhuʼ naʼphu xa̱bu̱ wanii”. Ma̱ngaa niʼthí dí á mu nuʼgíʼ nuʼnimbánii dí najmañulúʼ mambáyulúʼ “muraʼwíí rí májánʼ ga̱jma̱a̱ dí ra̱májánʼ” (Heb. 5:14). Rí mbiʼi xúgi̱ ga̱jma̱a̱ numuu dí nánguá ti̱ñu̱u̱n muni dí raʼkhí xa̱bu̱, mbáa maʼni gakhii muʼnimbánii ikha ndrígóo Jeobá. Mú Jesús ndaʼyoo xóo eʼni mu makhánulúʼ ganitsu májánʼ dí nambáyulúʼ maʼni gújkiáánʼ ga̱jma̱a̱ dí na̱ʼkha̱ náa Ajngá rawuunʼ Dios dí nindxu̱u̱ Biblia. Ñumbáá jmbii naʼniratoo ga̱jma̱a̱ naxnáraʼa ganitsu rígi̱ xó má ikha dí naxná Jesús.

12. Ndiéjunʼ niʼni ikháanʼlu mu mbuʼyamajkuíí mbiʼyuu Dios xó má ni’ni Jesús rá.

¹² Ikháanʼ ma̱ngaa nuxnáá gamajkhu mbiʼyuu Dios xó má niʼni Jesús (Juan 17:6, 26). Mbá xkri̱da, nákha 1931 nigu mbiʼyulú testigos de Jeobá. Xúʼko̱ nisngajmá dí nandulúʼ muyéʼgua mbiʼyuu Anu̱lú bi̱ xtáa mekhuíí, numuu rí nduʼyáá dí gíʼdoo wéñuʼ numuu (Is. 43:10-12). Ga̱jma̱a̱ gu̱nʼ octubre  tsiguʼ má rúʼko̱, nigi̱ʼdu̱u̱ nikujmaa mbiʼyuu Dios náa timbá ináa ndrígóo revista rígi̱ náa ajngáa inglés. Ma̱ngaa, Biblia dí Traducción del Nuevo Mundo nitima̱a̱ mbiʼyuu Dios náa gíʼmaa maʼga. Rúʼko̱ nindxu̱u̱ mixtiʼkhu kayuuʼ xóo eni bi̱ kúwá náa guʼwá ndxajkun, bi̱ nunigu̱di̱i̱ mbiʼyuu Jeobá náa mbaʼa Biblia dí nutajuíi.

13. Ndiéjunʼ eʼni matayaa ikháán dí Jesús najmiuu “ñumbáá jmbii bi̱ májánʼ endxa̱ʼwáminaʼ” rí mbiʼi xúgi̱ rá. (Juan 6:68.)

¹³ Ga̱jma̱a̱ “ñumbáá jmbii bi̱ májánʼ endxa̱ʼwáminaʼ”, Jesús niʼngo̱o̱ niʼni dí xa̱bi̱i̱ maguaʼdáá mbá xuajñuu náa tsu̱du̱u̱ Ku̱ba̱ʼ náa naxkajxi̱i̱n xa̱bu̱ mbuyamajkuíí Dios xó má gíʼma. Ndiéjunʼ tatsaʼwáminaʼ ikháán ga̱jma̱a̱ numuu xuajen rígi̱ rá. Mbáa nakuma̱a̱ʼ xóo Pedro, bi̱ niʼthúu̱n Jesús: “Ikháán xtaʼdáá ajngáa rí makuwáanʼxu kámuu” (Juan 6:68). Xóo kuwáánʼ á mu na̱nguá niniʼnúu xuajñuu Jeobá rá. Jesús naʼni dí ikhí maguaʼdáá májánʼ ganitsu dí na̱ʼkha̱ náa Dios ga̱jma̱a̱ naʼniratháánʼlú mu manindxu̱lúʼ bi̱ naʼsngáa májánʼ. Ma̱ngaa nambáyulúʼ manindxu̱lúʼ “imba̱a̱ nuxi̱ʼ xa̱bu̱” mu xúʼko̱ muʼni dí maxtáa gagi Jeobá (Efes. 4:24).

14. Ndiéjunʼ nimbáyaaʼ ikháán rí maraxtaa náa xuajñuu Jeobá índo̱ kuwáánʼ náa majñu̱u̱ʼ nandii ndrígóo COVID-19 rá.

¹⁴ Índo̱ kuwáánʼ mbiʼi mingíjyúuʼ, Jesús naxná ikhulú májánʼ wéñuʼ. Rígi̱ nikujmaa májánʼ wéñuʼ índo̱ nirígá nandii COVID-19. Mbaʼin xa̱bu̱ bi̱ kúwá náa xúgíʼ numbaaʼ na̱nguá ndiyáá dí muni̱, mú Jesús niʼni dí mudrígúlú mbájmbu ikha rí xóo ma̱ndoo mañewu̱nlú. Nithulúʼ dí gíʼmaa majmulú cubreboca náa kúwá mbaʼin xa̱bu̱ ma̱ngaa dí xaguajúnlú mijngii wéñuʼ gajmiúlú eʼwíinʼ. Bi̱ kuya̱ edxu̱u̱ nijuiʼthúún dí gíʼmaa mutamijná  má xúʼko̱ gajmiún xúgínʼ publicadores ga̱jma̱a̱ rí gíʼmaa maxmiéjúnʼ mbuyáá ndiéjunʼ eñúunʼ ma̱ngaa rí xóo kúwá gajmiún Dios (Is. 32:1, 2). Náa informe dí nuxna a̱ngiu̱lú Cuerpo Gobernante nixnúlú itháan ikha ga̱jma̱a̱ tsiakii dí ndayúlú.

15. Ndiéjunʼ i̱ʼwáʼ ikha nikhánulú índo̱ kuwáánʼ náa majñu̱u̱ nandii rá. Ga̱jma̱a̱ ndiéjunʼ dí májánʼ nirígá rá.

¹⁵ Índo̱ kuwáánʼ náa majñu̱u̱ nandii, ma̱ngaa nidrígulu mbájmbu ikha xú káʼnii makuwáánʼ reunión ga̱jma̱a̱ rí xóo muʼtáraʼa. Mbá nacha̱ má niʼni dí kuwáánʼ raguáʼdáá reunión ga̱jma̱a̱ asamblea náa videoconferencia, ga̱jma̱a̱ dí nuʼtáraʼa ga̱jma̱a̱ carta ma̱ngaa teléfono. Jeobá niʼni tsajkurámuuʼ tsiakii ndrígúlú. Náa mbaʼa Betel a̱ngiu̱lú nuthi dí niʼni itháan mbaʼin publicadores. Náa xúgíʼ mbiʼi rígi̱ mbaʼin a̱ngiu̱lú guaʼdáá mbaʼa wéñuʼ experiencia dí mitsaanʼ (atayáá kúgumaʼá “ Jeobá naʼni tsajkurámuuʼ náa nuʼtáraʼa”).

16. Ndiéjunʼ rí ma̱ndoo mbuʼyáá gajkhun rá.

¹⁶ Mbáa tikhun a̱ngiu̱lú nindxaʼwamíjná dí xuajñuu Jeobá nújngo̱ó niñewumi̱na̱ʼ índo̱ niʼthá ga̱jma̱a̱ numuu nandii. Mú mbaʼa nuthu nikujmaa dí ikha dí nidrígúlú ninindxu̱u̱ májánʼ wéñuʼ (Mat. 11:19). Á mu nundxaʼwamíjná rí xu káʼnii Jesús exnulúʼ ikha, ma̱ndoo mbuʼyáá gajkhun dí asndu tséʼniuu má ndiéjunʼ ga̱ʼkha̱ nda̱wa̱á, Jeobá ga̱jma̱a̱ A̱ʼdióo makuwá ga̱jma̱á ni̱ndxu̱lú (atraxnuu Hebreos 13:5, 6).

17. Xú káʼnii ku̱ma̱a̱ʼ ikháán, índo̱ kuwáánʼ ruñajunʼ náa majñu̱u̱ ikha ndrígóo Jesús rá.

¹⁷ ¡Nadxuu wéñuʼ a̱jkiu̱lú índo̱ kuwáánʼ ruñajunʼ náa majñu̱u̱ ikha ndrígóo Jesús! Kuwáánʼ náa mbá xuajen náa na̱nguá erkuajuíi̱nʼ xa̱bu̱ ga̱jma̱a̱ numuu rí náa eguwáʼ, xóo nigaji̱i̱n o ajngáa dí nuthi. Kuaʼdáá mbaʼa dí muʼnigajmaa ga̱jma̱a̱ numuu Dios rí nindxu̱u̱ xóo ganitsu ga̱jma̱a̱ kuaʼdáá mbaʼa dí majmulú náa muʼtáraʼa. Ga̱jma̱a̱ mámbáa dí ikháanʼ xtáa rajmañuu mani̱ndxu̱u̱ imba̱a̱ nuxi̱i̱ʼ xa̱bu̱ ma̱ngaa rí maʼndulú kuʼñúún eʼwíinʼ. ¡Ra̱ʼkhá tháán edxu̱lúʼ ga̱jma̱a̱ numuu Jesucristo, bi̱ kayá edxu̱u̱ náa ikháanʼlu!