1. Ndiéjunʼ niʼni Jeobá nda̱wa̱á dí Adán ga̱jma̱a̱ Eva nikiéʼkhun rá. (Génesis 3:15.)

 NDA̱WA̱Á dí Adán ga̱jma̱a̱ Eva nikiéʼkhun, Jeobá niʼtáriyaʼ mbá ajngáa dí niʼni dí bi̱ gáguwáʼ náa ikhiin muguaʼthi̱i̱n mbá dí májánʼ nda̱wa̱á. Ajngáa rúʼko̱ nuxkamaa náa Génesis 3:15 (atraxnuu). b

2. Ndíjkha rí gíʼdoo wéñuuʼ numuu kiʼtáriyaʼ dí na̱ʼkha̱ náa Génesis 3:15 rá.

² Rí kiʼtáriyaʼ nakujmaa náa timbá libro ndrígóo Biblia, ga̱jma̱a̱ gíʼdoo wéñuuʼ numuu rí kiʼtáriyaʼ ikhí, numuu rí ajngáa dí na̱ʼkha̱ raʼthí náa Génesis 3:15 nagájnuriyo̱o̱ʼ itháan náa Biblia, ga̱jma̱a̱ xúgíʼ libro ndrígóo Biblia nambánii ga̱jma̱a̱ ikhaa. Ajngáa dí nagájnuriyo̱o̱ʼ náa Biblia nindxu̱u̱ dí maxtáa mbáa bi̱ maʼni káwíin xa̱bu̱ numbaaʼ ga̱jma̱a̱ rí maʼnimbáti̱ga̱a̱ Gixa̱a̱ gajmíi̱n xúgíinʼ bi̱ nagún kidxuuʼ ikhaa. c Índo̱ gambánuu kiʼtáriyaʼ rígi̱, xúgíinʼ bi̱ nduyamajkuíí Jeobá makuwá gagi.

3. Ndiéjunʼ guʼyáá náa artículo rígi̱ rá.

³ Náa artículo rígi̱ mbuʼyáá tikhu graxe̱ dí naʼthí ga̱jma̱a̱ numuu Génesis 3:15: Tsíin ni̱ndxu̱ún bi̱ na̱ʼkha̱ raʼthí náa kiʼtáriyaʼ  rígi̱ rá. Xú káʼnii ni̱ʼkha̱ rambánuu rá. Ga̱jma̱a̱ xkáʼnii embáyulú rí mbiʼi xúgi̱ rá.

4. Tsáa nindxu̱u̱ “a̱bu̱nʼ”, ga̱jma̱a̱ xú káʼnii eʼyáálú rá.

⁴ Náa Génesis 3:14, 15 na̱ʼkha̱ raʼthí ga̱jma̱a̱ numuu mbáa “a̱bu̱nʼ”, “bi̱ naguwáʼ” náa a̱bu̱nʼ, mbáa “a̱ʼgu̱” ga̱jma̱a̱ “bi̱ naguwáʼ” náa a̱ʼgu̱ buʼko̱. Biblia má nambáyulúʼ mbuʼyáá tsíin ni̱ndxu̱ún xúgíinʼ buʼko̱. d Gugíʼdíi mbuʼyáá ga̱jma̱a̱ numuu “a̱bu̱nʼ”. Xándoo mani̱ndxu̱u̱ mbáa a̱bu̱nʼ gajkhun, numuu rí ikhaa xándoo makro̱ʼo̱o̱ dí niʼthí Jeobá náa ixi̱ ri̱ʼi̱ Edén. Nindxu̱u̱ mbáa bi̱ najmañuu. Náa Biblia naʼthí kaʼwu tsáa nindxu̱u̱. Apocalipsis 12:9 naʼthí dí “a̱bu̱nʼ wayuu” nindxu̱u̱ Gixa̱a̱. Mú tsíin ni̱ndxu̱ún bi̱ naguwáʼ náa a̱bu̱nʼ rá.

5. Tsíin ni̱ndxu̱ún bi̱ naguwáʼ náa a̱bu̱nʼ rá.

⁵ Índo̱ náa Biblia naʼthí “bi̱ naguwáʼ”, nguáná nandoo gáʼthí dí nindxu̱ún bi̱ nduyaridáá xóo endxa̱ʼwáminaʼ ga̱jma̱a̱ xóo eʼni anu̱ún. Ikha jngóo bi̱ naguwáʼ náa a̱bu̱nʼ ni̱ndxu̱ún bi̱ tsékujmiin ma̱ngaa ni̱ndxu̱ún xa̱bu̱ bi̱ nuni xó má eʼni Gixa̱a̱ dí tsíñún gúyáá Jeobá ni má xa̱bu̱ bi̱ kúwá náa xuajñuu. Tikhun dí ikhiin ni̱ndxu̱ún ángeles bi̱ niniña̱a̱nʼ ñajunʼ dí guáʼdáá mekhuíí nákha mbiʼi rí nixtáa Noé ga̱jma̱a̱ xa̱bu̱ ra̱míjínʼ kayuuʼ bi̱ nuni̱ xó má Gixa̱a̱ bi̱ nindxu̱u̱ anu̱ún (Gén. 6:1, 2; Juan 8:44; 1 Juan 5:19; Jud. 6).

6. Ndíjkha dí raʼkháa Eva ninindxu̱u̱ a̱ʼgu̱ bi̱ na̱ʼkha̱ raʼthí náa Génesis 3:15 rá.

⁶ Guʼyáá xúgi̱ rá tsáa nindxu̱u̱ a̱ʼgu̱. Lá nindxu̱u̱ Eva ráʼ. Na̱nguá. Gundxaʼwámíjná numuu rígi̱. Náa nijuiʼtáriyaʼ na̱ʼkha̱ raʼthí dí bi̱ na̱ʼkha̱ náa a̱ʼgu̱ makujmbi̱i̱ edxu̱u̱ a̱bu̱nʼ. Xó má ndiʼyáá, a̱bu̱nʼ nindxu̱u̱ Gixa̱a̱ mbáa bi̱  tsékujmaa. Ikha jngóo, xándoo rí mbáa bi̱ na̱ʼkha̱ náa Eva, bi̱ nindxu̱u̱ xa̱bu̱ aʼkhá maʼngo̱o̱ maxíyáa Gixa̱a̱. Ndayóoʼ mbáa bi̱ ma̱ngoo maʼni rígi̱.

7. Xú káʼnii embáyuluʼ Apocalipsis 12:1, 2, 5, 10 mbuʼyáá tsáa nindxu̱u̱ a̱ʼgu̱ bi̱ na̱ʼkha̱ raʼthí náa Génesis 3:15 rá.

⁷ Náa iwáá kayuuʼ libro dí na̱ʼkha̱ náa Biblia naʼthúlú tsáa nindxu̱u̱ a̱ʼgu̱ bi̱ na̱ʼkha̱ raʼthí náa Génesis 3:15 (atraxnuu Apocalipsis 12:1, 2, 5, 10). Na̱nguá nindxu̱u̱ mbáa a̱ʼgu̱ xóo xa̱bu̱ numbaaʼ. Náa agoo rajkúu gíʼ gu̱nʼ ga̱jma̱a̱ náa edxu̱u̱ grígu mbá corona dí trámiinʼ 12 a̱ʼgua̱a̱n. Ma̱ngaa nagiʼdaa mbáa ada̱ bi̱ nindxu̱u̱ kiejunʼ, ikhaa nindxu̱u̱ Reino ndrígóo Dios. Numuu dí Reino rígi̱ rígá mekhuíí, ma̱ngaa a̱ʼgu̱ bugi̱ gíʼmaa mani̱ndxu̱u̱ ikhí. Ikhaa nandoo gáʼthúu̱n xuajñuu Jeobá dí rígá mekhuíí, náa kúwá ángeles bi̱ naguájun jmbu (Gál. 4:26).

8. Tsáa phú nindxu̱u̱ bi̱ na̱ʼkha̱ náa a̱ʼgu̱ rá. Ga̱jma̱a̱ nguáná ni̱jkha̱nú ninindxu̱u̱ xá. (Génesis 22:15-18.)

⁸ Núma̱aʼ má Ajngá rawuunʼ Dios, nambáyulúʼ mbuʼyáá tsáa phú nindxu̱u̱ bi̱ na̱ʼkha̱ náa a̱ʼgu̱. Ikhaa ma̱ʼkha̱ náa e̱ji̱i̱n Abrahán (atraxnuu Génesis 22:15-18). e Ga̱jma̱a̱ kiʼtáriyaʼ rúʼko̱ nimbánuu, numuu rí Jesús ni̱ʼkha̱ náa e̱ji̱i̱n ikhaa (Luc. 3:23, 34). Mú, bi̱ na̱ʼkha̱ ndayóoʼ mani̱ndxu̱u̱ itháan ki xóo mbáa xa̱bu̱ numbaaʼ mu maʼngo̱o̱ makujmbi̱i̱ ga̱jma̱a̱ maxíyáa Gixa̱a̱. Ikha jngóo, índo̱ Jesús gíʼdoo 30 tsiguuʼ, nixtiyáaʼ ikhaa, xúʼko̱ niʼni dí ninindxu̱u̱ A̱ʼdióo Dios bi̱ ni̱ʼkha̱ ga̱jma̱a̱ xi̱ʼ kaʼwu. Mbiʼi rúʼko̱, ni̱jkha̱nú ninindxu̱u̱ bi̱ phú na̱ʼkha̱ náa a̱ʼgu̱ (Gál. 3:16). Nda̱wa̱á dí nikháñuu ga̱jma̱a̱ ni̱ga̱bi̱i̱, Dios niʼni dí ‹maguma mba̱a̱ ga̱jma̱a̱ magruigú gamajkhu› ma̱ngaa nixnúu ‹maʼtáñajunʼ náa mekhu ga̱jma̱a̱ náa tsu̱du̱u̱ ku̱ba̱ʼ›, ma̱ngaa rí asndu ma̱ndoo ‹maʼnigámbáa dí naʼni Gixa̱a̱› (Heb. 2:7; Mat. 28:18; 1 Juan 3:8).

9, 10. a) Tsíin ma̱ngaa ni̱ndxu̱ún bi̱ naguwáʼ náa a̱ʼgu̱, ga̱jma̱a̱ nguáná nanindxuún bi̱ naguwáʼ náa ikhaa xá. b) Ndiéjunʼ gúʼyáá xúgi̱ rá.

⁹ Rí xúgi̱ mbuʼyáá dí kúwá eʼwíinʼ bi̱ naguwáʼ náa a̱ʼgu̱. Apóstol Pablo ndiʼyoo tsíin ni̱ndxu̱ún bi̱ naguwáʼ náa a̱ʼgu̱ índo̱ niʼnirámáʼ rígi̱ náa inún cristianos bi̱ kaxtaʼwíin bi̱ ni̱ndxu̱ún judío ga̱jma̱a̱ bi̱ na̱nguá ni̱ndxu̱ún judío: “Á mu ikháanʼ kaʼyála náa Cristo, nindxa̱la bi̱ naguwáʼ náa Abrahán, ga̱jma̱a̱ kaʼyála mundrígúu rí Dios nikudaminaʼ maxná” (Gál. 3:28, 29). Índo̱ Jeobá naraʼwíi mbáa cristiano ga̱jma̱a̱ xi̱ʼ kaʼwu, xa̱bu̱ buʼko̱ na̱jkha̱nú nanindxu̱u̱ mbáa bi̱ na̱ʼkha̱ náa a̱ʼgu̱. Ikha jngóo, bi̱ naguwáʼ náa a̱ʼgu̱ nindxu̱u̱ Jesucristo gajmíi̱n bi̱ 144,000 bi̱ maʼtáñajunʼ gajmíi̱n ikhaa (Apoc. 14:1). Xúgínʼ ikhiin nunimijna mundxaʼwamíjna̱ ga̱jma̱a̱ muni xó má Jeobá.

¹⁰ Niguámbulú ndiʼyáá tsíin ni̱ndxu̱ún bi̱ na̱ʼkha̱ raʼthí náa Génesis 3:15. Rí xúgi̱ matangaán mbuʼyáá ndiéjunʼ niʼni Jeobá mu maʼga̱ ráʼnimbánuu dí nikudaminaʼ maʼni, nda̱wa̱á mbuʼyáá xú káʼnii embáyulúʼ mbiʼi xúgi̱ dí kiʼtáriyaʼ rígi̱.

11. Xú káʼnii nigawúunʼ “níxtuun rajkúu” bi̱ na̱ʼkha̱ náa a̱ʼgu̱ rá.

¹¹ Náa Génesis 3:15 naʼthí dí a̱bu̱nʼ maʼnigawúunʼ “níxtuun rajkúu” bi̱ na̱ʼkha̱ náa e̱ji̱i̱n a̱ʼgu̱. Rúʼko̱ nimbánuu índo̱ Gixa̱a̱ nitsudiin bi̱ judío gajmíi̱n bi̱ romanos muxiyáa A̱ʼdióo Dios (Luc. 23:13, 20-24). Índo̱ mbáa nagawúunʼ  níxtuun rajkúu naʼni dí xándoo maʼga̱ guata mbayuuʼ. Xúʼko̱ má kayuuʼ, índo̱ Jesús nikháñuu ajtsú mbiʼi, ikhaa nda̱a̱ dí niʼngo̱o̱ maʼni (Mat. 16:21).

12. Nguáná ga̱jma̱a̱ xkáʼnii gúxumbi̱i̱ edxu̱u̱ a̱bu̱nʼ xá.

¹² Mu mambanúu dí naʼthí Génesis 3:15, Jesús xándoo maguanúu náa iñáʼ wajinʼ numuu dí náa kiʼtáriyaʼ naʼthí dí bi̱ na̱ʼkha̱ náa a̱ʼgu̱ makujmbi̱i̱ edxu̱u̱ a̱bu̱nʼ. Ikha jngóo ndiyóoʼ maʼni̱i̱ níxtuun rajkúu Jesús náa niguma gawíínʼ ¡Ga̱jma̱a̱ xúʼko̱ má nirígá! Índo̱ niʼni ajtsú mbiʼi dí nikháñuu Jesús, ikhaa ni̱ga̱bi̱i̱ xóo mbáa bi̱ xátanga̱a̱ makhañúu nditháan náa mekhuíí. Índo̱ gáʼga̱nú mbiʼi dí Dios gáʼthí, ikhaa makujmbi̱i̱ Gixa̱a̱ ga̱jma̱a̱ maxíyáa (Heb. 2:14). Bi̱ gútañajunʼ gajmiún Cristo mumbayíí muradíin xúgínʼ xa̱bu̱ sia̱nʼ ndrígóo Dios bi̱ kúwá náa tsu̱du̱u̱ Ku̱ba̱ʼ, xóo muʼthá bi̱ naguwáʼ náa a̱bu̱nʼ (Apoc. 17:14; 20:4, 10). f

13. Xú káʼnii embáyuluʼ kiʼtáriyaʼ rígi̱ rá.

¹³ Á mu ikháán niraxnáximinaʼ matani ñajuunʼ Dios, dí xóo xtáa rambánuu kiʼtáriyaʼ rígi̱ nambáyaʼ má mbiʼi xúgi̱. Jesús ni̱ʼkha̱ náa tsu̱du̱u̱ Ku̱ba̱ʼ xóo mbáa xa̱bu̱ numbaaʼ ga̱jma̱a̱ nisngájma májánʼ xóo nindxu̱u̱ Anu̱u̱ (Juan 14:9). Xóo ikhaa niʼni, nimbáyulúʼ muniʼnííʼ ga̱jma̱a̱ maʼndulú kuʼyáá Jeobá. Jesús nambáyulúʼ má xúʼko̱ ga̱jma̱a̱ kiʼsngáa ndrígóo ma̱ngaa rí xóo naxná ikha náa congregación cristiana rí mbiʼi xúgi̱. Niʼsngúlúʼ rí xóo makuwáánʼ rí naʼni maʼdxuu a̱jkiu̱u̱n Jeobá. Asndu rí nigawúunʼ níxtúu rajkhúu Jesús, xóo muʼthá rí nikháñuu, nambáyulú xúgiáánʼ. Índo̱ nigabi̱i̱ nixnáxi̱ eʼdiuu xóo mbá tsigijñaʼ rí mikaʼwu mu maʼni “kaʼwi̱i̱ aʼkhúlú” (1 Juan 1:7).

14. Xú kaʼnii eʼyáá dí niʼtariyaʼ Jeobá náa Edén támbánúu núkhu má ikhú rá.

¹⁴ Dí Jeobá niʼthí náa ixi̱ ri̱ʼi̱ Edén támbánúu núkhu. Ndiyóoʼ manújngoo mba̱yu̱u̱ʼ mbiʼi mu a̱ʼgu̱ magi̱ʼdi̱i̱n e̱ji̱i̱n ga̱jma̱a̱ asndu maxtáa bi̱ nijuiʼthá ma̱ʼkha̱, ma̱ngaa mu Gixa̱a̱ ma̱ndoo magímbíin xa̱bi̱i̱ bi̱ mawiñu̱u̱ʼ kuyáá e̱ji̱i̱n a̱ʼgu̱. Rígi̱ nambáyulú mbuʼyáá dí xa̱bu̱ bi̱ kúwá náa numbaaʼ rí naʼtáñajunʼ Gixa̱a̱ mawiñu̱u̱ʼ kuñúún xa̱bi̱i̱ Jeobá. Mba̱yu̱u̱ʼ tsiguʼ nda̱wa̱á Jesús xúʼko̱ má niʼthúún xa̱bi̱i̱ (Mar. 13:13; Juan 17:14). Tséʼni a̱jma̱ a̱jkiu̱lú rí ndiʼyáá xú kaʼnii nambánuu kiʼtáriyaʼ rígi̱, itháan náa iwáá 100 tsiguʼ rí ninújngoo. Náá numuu rí nuʼthá xígi̱ kaʼnii rá.

15. a) Náá numuu rí xa̱bu̱ nawiñu̱u̱nʼ kuyulú itháan xúgi̱ rá. b) Náá numuu rí xáʼyóoʼ mamiñulúʼ kuʼyáá Gixa̱a̱ xá.

¹⁵ Jesús nigíʼdu̱u̱ ninindxu̱u̱ Rey náa Mekhuíí nákhá 1914 ga̱jma̱a̱ táʼni má mba̱yu̱u̱ʼ rí nigida̱ʼ raʼtáñajunʼ índo̱ rí nixkriya̱a̱ʼ Gixa̱a̱ náa mekhuíí. Xúgi̱ Gixa̱a̱ i̱ndó naʼni rí ikhaa nandoo náa tsu̱du̱u̱ ku̱ba̱ʼ gi̱i̱ ga̱jma̱a̱ i̱ndó xtáa ragi̱ʼtu̱u̱n dí maʼga̱nú mbiʼi rí muxiyáa (Apoc. 12:9, 12). Mú, raʼkháa wíí gíʼ ragiʼthu̱u̱n. Nakasngáñu̱u̱ʼ wéñuuʼ ga̱jma̱a̱ na̱nguá eʼyoo dí maʼni, ikha jngóo naʼni gíníi xa̱bi̱i̱ Dios (Apoc. 12:13, 17). Ikhaa rúʼko̱ numuu dí xa̱bu̱ numbaaʼ nawiñu̱u̱nʼ kuyulú itháan rí mbiʼi xúgi̱. Mú, xáʼyóoʼ mamiñúlúʼ kuʼyáá Gixa̱a̱ gajmíi̱n xa̱bi̱i̱. Ikháanʼ mangáánʼ ma̱ndoo makumulúʼ xó má apóstol Pablo, bi̱ niʼnirámáʼ: “Á mu Dios xtáa ga̱jma̱a̱ ni̱ndxu̱lú, tsáá gáʼngo̱o̱ gáʼni ga̱jma̱á ni̱ndxu̱lú rá.” (Rom. 8:31.) Ma̱ndoo makumulúʼ kuʼyáá káxi̱ Jeobá numuu rí na̱jkuánu nduʼyáá dí mbaʼa dí naʼthí náa kiʼtáriyaʼ dí na̱ʼkha̱ náa Génesis 3:15 nimbánuu má.

16-18. Xú káʼnii nimbáyúu Curtis, Ursula ga̱jma̱a̱ Jessica makru̱ʼu̱u̱n dí naʼthí náa Génesis 3:15 rá.

¹⁶ Rí Jeobá niʼtáriyaʼ náa Génesis 3:15 nambáyulúʼ muraʼníí asndu xkáʼnii má tsáʼkhá dí  na̱ʼkha̱nú náa inulúʼ. Curtis, mbáa ndxájulú bi̱ nindxu̱u̱ misionero náa Guam, naʼthí: “Nguáná niraʼnuu xkujndu ga̱jma̱a̱ tikhu rí niʼni magawúnʼ dí niʼniuʼ gakhii maguajún jmbu náa Jeobá. Mú, índo̱ nandxa̱ʼwa̱mínáʼ kiʼtáriyaʼ dí na̱ʼkha̱ náa Génesis 3:15 nambáyuʼ maku̱mu̱ʼ ka̱yo̱o̱ má xúʼko̱ Anu̱ʼ bi̱ xtáa mekhuíí”. Curtis nandoo wéñuuʼ dí maʼga̱nú mbiʼi dí Jeobá maʼnigámbáa xúgíʼ dí naʼni mumíniiʼ.

¹⁷ Mbáa ndxájulú bi̱ na̱ʼkha̱ náa Baviera (Alemania) bi̱ mbiʼyuu Ursula naʼthí dí índo̱ nikro̱ʼo̱o̱ dí naʼthí náa Génesis 3:15 ni̱jkha̱nú ndiʼyoo gajkhun dí Biblia nindxu̱u̱ Ajngá rawuunʼ Dios. Mbóo dí ni̱jkha̱nú asndu náa a̱jkiu̱u̱n nindxu̱u̱ dí xúgíʼ kiʼtáriyaʼ dí na̱ʼkha̱ náa Génesis 3:15 kuajtuminaʼ ga̱jma̱a̱ i̱ʼwáʼ kiʼtáriyaʼ. Ikhaa naʼthí: “Niniguʼ wéñuuʼ dí Jeobá nacha̱ má ndiyáʼ xóo maʼni káwíin xa̱bu̱ numbaaʼ”.

¹⁸ Jessica, mbáa ndxájulú bi̱ xtáa náa Micronesia na’thí: “Kaʼníí narmáʼáan a̱jkiu̱nʼ xóo niku̱mu̱ʼ índo̱ ndi̱yo̱o̱ rí nixkamaa dí gajkhun. ¡Xtáa rambánuu kiʼtáriyaʼ dí na̱ʼkha̱ náa Génesis 3:15! Índo̱ nikro̱ʼo̱ʼ dí naʼthí ikhí, nijkhánú ndi̱yo̱o̱ rí xóo kuwáánʼ xúgi̱ raʼkháa xúʼko̱ phú gíʼmaa makuwáanʼ. Kiʼtáriyaʼ rígi̱, naʼni mba̱yo̱o̱ gajkhun dí á mu nu̱ʼni̱ ñajuunʼ Jeobá maʼni rí makuwáanʼ májánʼ xúgi̱ ga̱jma̱a̱ nda̱wa̱á makuwáanʼ itháan májánʼ”.

19. Náá numuu rí nduʼyáá gajkhun dí mambanúu iwáá dí na̱ʼkha̱ raʼthí náa kiʼtáriyaʼ rá.

¹⁹ Xó má ndiʼyáá, Génesis 3:15 xtáa má rambánuu. Nduʼyáá májánʼ tsíin nindxu̱ún e̱ji̱i̱n a̱ʼgu̱ ga̱jma̱a̱ e̱ji̱i̱n a̱bu̱nʼ. Jesús, bi̱ itháan gíʼdoo numuu bi̱ ni̱ʼkha̱ náa a̱ʼgu̱, ni̱ʼni̱i̱ má níxtuun rajkhúu náa dí niguma gawíínʼ ga̱jma̱a̱ dí xúgi̱ nindxu̱u̱ mbáa Rey bi̱ nditháan xákháñún ga̱jma̱a̱ gíʼdoo wéñuuʼ tsiakii. Inu má majxíin bi̱ niwaxtaʼwíin bi̱ naguwáʼ náa e̱ji̱i̱n a̱ʼgu̱. Numuu rí nimbánuu má tikhu rí nijuiʼtáriyaʼ, rígi̱ naʼni mbuʼyáá gajkhun dí mambanúu má tsiakii rí xóó ndayóóʼ mambanúu: ¡Edxu̱u̱ a̱bu̱nʼ maxtixmbi̱i̱! Asndu tsímáá gáʼni̱i̱ a̱jkiu̱ún xa̱bu̱ bi̱ guájun jmbu náa Dios índo̱ Gixa̱a̱ gáguma gámbáa. Mú xúgi̱ rí kuwáanʼ ruguáʼthi̱i̱n mbiʼi rúʼko̱, ndayóoʼ rí maʼngo̱o̱ a̱jkiu̱lú, xákanajkulú. Ndayóoʼ rí makumulú kuʼyáá Dios ndrígúlú ga̱jma̱a̱ xúgíʼ a̱jkiu̱lú. Bi̱ naguwáʼ náa e̱ji̱i̱n a̱ʼgu̱ muni tsajkurámíinʼ ‹xúgíinʼ xa̱bu̱ numbaaʼ› (Gén. 22:18).