Jesús niʼsngáa dí gíʼmaa muʼni marigá dí tsímáá. Mú, mbóo mbiʼi ikhaa niʼthúún apóstoles ndrígóo: “Xákumala rí ni̱ʼkhá ka̱yo̱ʼ dí tsímáá náa numbaaʼ, i̱ndó sia̱nʼ ni̱ʼkhá ka̱yo̱ʼ. Numuu rí ni̱ʼkhá gáni rí magiʼdoo xkujndu ada̱ ga̱jma̱a̱ anu̱u̱, wáxá ga̱jma̱a̱ ru̱dúu̱, gu̱ʼgúnʼ ga̱jma̱a̱ dxa̱giu̱u̱” (Mat. 10:34, 35). Ndiéjunʼ eyoo gáʼthúu̱n ajngáa rígi̱ rá.

Jesús tándoo markuájinʼ bi̱ kúwá náa mbá guʼwíin, mú ikhaa ni̱jkha̱nú ndiʼyoo dí kiʼsngáa ndrígóo maʼni dí marigá xúʼko̱. Bi̱ gaʼndún mani̱ndxu̱ún xa̱bi̱i̱ ikhaa ga̱jma̱a̱ majngún iyááʼ gíʼmaa mbuyáá dí mbáa tikhun bi̱ kúwá náa guʼwún xánigu̱u̱nʼ dí gúraʼwíí muni̱. Á mu mbáa ndaʼyóoʼ maraʼnuu dí bi̱ ndiyáa nakiʼnáa kaʼyoo o imba̱a̱ bi̱ kaʼyoo, mbáa maʼniuu gakhii mbaʼyáridoo Cristo.

Náa Biblia naʼthúún cristianos: “Gakuwáanʼ tsímáá gajmiála xúgíinʼ” (Rom. 12:18). Mú, kiʼsngáa ndrígóo Jesús migamíi maʼni dí marigá sia̱nʼ náa mbá guʼwíin. Narígá xúʼko̱ índo̱ mbáa bi̱ xtáa náa mbá guʼwá nagruigú dí niʼsngáa Jesús, mú eʼwíinʼ na̱nguá o asndu nditháan tsénigu̱u̱nʼ mudxawíín. “Bi̱ kúwá má náa goʼwóo” naguánu nanindxu̱ún xa̱bu̱ sia̱nʼ numuu dí xtáa rajmañuu dí gajkhun (Mat. 10:36).

Xa̱bi̱i̱ Cristo bi̱ kúwá gajmiún bi̱ nagún i̱mba̱ religión nguáná nuraʼníí xkujndu náa ndayóoʼ musngajma dí nandún kuyáá itháan Jeobá ga̱jma̱a̱ Jesús. Mbáa bi̱ kuñúún nutsudiin muniriyaaʼ tikhu ndxa̱a̱ dí na̱ʼkha̱ náa i̱ʼwáʼ religión. Ikhú ndayóoʼ muraʼwíí tsáá endún munimbún kuyáá. Jesús niʼthí: “Bi̱ nandoo kaʼyoo itháan anu̱u̱ o ru̱dúu̱ [ki xóo ikhúún] rakáʼyoo mani̱ndxu̱u̱ xa̱bi̱ʼ” (Mat. 10:37). Gajkhun má, Jesús na̱nguá nindoo gáʼthí dí mu manindxu̱lú xa̱bi̱i̱ ikhaa ndayóoʼ muniʼñááʼ raʼndulú kuʼyáá anu̱lú o rudu̱lúʼ. Rí nindoo gáʼthí nindxu̱u̱ dí gíʼmaa mbuʼyáá májánʼ ndiéjunʼ dí itháan gíʼdoo numuu muʼni. Á mu mbáa bi̱ kuʼyáá narikulúʼ muʼni ñajuunʼ Jeobá, nandulú kuʼyáá má xúʼko̱, mú nduʼyáá dí itháan má gíʼdoo numuu maʼndulúʼ kuʼyáá Jeobá ga̱jma̱a̱ muʼni ginii dí ikhaa nandoo.

Gajkhun má dí nagawúnlú wéñuʼ índo̱ bi̱ kuʼñúún tsíñún gúyulú. Mú, bi̱ nindxulú xa̱bi̱i̱ Jesús narmáʼáan a̱jkiu̱lú ajngáa rígi̱: “Bi̱ nandoo ma̱ʼkha̱ kidxuʼ mú tsíyoo rí maguma gínáa, xándoo mani̱ndxu̱u̱ xa̱bi̱ʼ” (Mat. 10:38). Ikha jngó, ikháanʼ bi̱ ni̱ndxu̱lú cristianos nduʼyáá dí á mu nandulú mu̱ʼgua̱ kidxuuʼ Jesús gíʼmaa makuwáánʼ xawii mumíniiʼ ga̱jma̱a̱ dí xáʼndúún gúyulú bi̱ kúwá náa guʼwúlú. Mú, nuguaʼthi̱i̱n dí ga̱jma̱a̱ numuu dí ikháanʼ nuʼni dí májánʼ mambáñún muriʼkhu̱u̱ xóo nundxa̱ʼwa̱míjna̱ ma̱ngaa rí manigu̱u̱nʼ mudxawíín dí naʼthí náa Biblia (1 Ped. 3:1, 2).