1. Ndiéjunʼ eʼni rí makuwáanʼ gagi rá.

NADXULÚ wéñuʼ índo̱ nduʼyáá rí na̱jkha̱ ra̱ja̱ xuajñu Jeobá. Rígi̱ nasngájma rí xa̱bi̱i̱ Dios nuni mambiʼi aguʼ ndrígu̱ún. Tsiguʼ rí ninújngoo, nisngúún itháan rí gu̱wa̱ʼ millón xa̱bu̱ ga̱jma̱a̱ numuu Biblia. Ma̱ngaa mbaʼin wéñuʼ xa̱bu̱ nigún náa Conmemoración ga̱jma̱a̱ nijmañún rí Jeobá nisngájma ngajua índo̱ nixnáxi̱i̱ A̱ʼdióo mu maʼni káwáanʼ (1 Juan 4:9).

2, 3. a) Ndiéjunʼ nindxu̱u̱ rí tsirikulú mu muʼni mambiʼi aguʼ ndrígúlú rá. b) Ndiéjunʼ gúʼyáá náa artículo rígi̱ rá.

² Náa xuajñu Jeobá nuthi mixtiʼkhu ajngáa. Mú rúʼko̱ tserikulú mu muʼni mba̱a̱ Anu̱lú bi̱ xtáa mekhuíí mbá kambáxulú (Rev. 7:9). Tséʼniuu má káʼnii ajngáa eʼthá o náa kuwáanʼ ma̱ndoo muʼni rí ‹mambiʼi náa numbaaʼ› (Filip. 2:15).

³ Rí nduʼyáá rí na̱jkha̱ ra̱ja̱ itháan, rí kuwáanʼ kambáxulú ga̱jma̱a̱ rí ndayóoʼ muʼtáraʼa nacha̱ naʼni muʼni mba̱a̱ Jeobá ga̱jma̱a̱ naʼni rí xa̱bu̱ manigu̱nʼ rí gajkhun. Náa artículo rígi̱ majmañulúʼ xú káʼnii gándoo gúʼni mu mambiʼi aguʼ ndrígúlú náa ajtsú enii (atraxnuu Mateo 5:14-16).

4, 5. a) Xú káʼnii gándoo gúʼni rí mambiʼi aguʼ ndrígúlú ga̱jma̱a̱ náa nuʼtáraʼa rá. b) Xú káʼnii eyambáá rí manindxu̱lúʼ májánʼ xa̱bu̱ rá. (Atayáá timbá xtiʼkhu.)

⁴ Náa número 1 ñajunʼ gu̱nʼ junio tsiguʼ 1925 náa revista rígi̱ náa ajngáa inglés, náa artículo “Luz en la oscuridad” niʼthí rígi̱: “Nimbáa xándoo mani̱ndxu̱u̱ jmbii ga̱jma̱a̱ gajkuwiin náa Señor náa mbiʼi rí xóo naguanúu [...] i̱ndó á mu naʼni mambiʼi aguʼ ndrígóo”. Ga̱jma̱a̱ xóó niʼthí: “Gíʼmaa maʼni rígi̱ rí maʼga̱ kayóo ajngáa rí májánʼ náa xuajen dí rígá náa tsu̱du̱u̱ Ku̱ba̱ʼ ga̱jma̱a̱ maxtáa xó má náa kamba̱a̱ rí nambiʼi”. Nakujmaa kaʼwu rí muʼtáraʼa ga̱jma̱a̱ numuu Reino ga̱jma̱a̱ rí muʼsngúún xa̱bu̱ nindxu̱u̱ mbá xóo muʼni rí mambiʼi aguʼ ndrígúlú (Mat. 28:19, 20). Ma̱ngaa rí xóo eʼni mayambáá mu muʼni mba̱a̱ Jeobá. Índo̱ nuʼtáraʼa, xa̱bu̱ nduyulú xú káʼnii eʼni. Rí nunduʼwá ga̱jma̱a̱ índo̱ nuraxi̱i̱n májánʼ xa̱bu̱ nakujmaa rí ni̱ndxu̱lú májánʼ xa̱bu̱ ga̱jma̱a̱ náa Dios bi̱ nuʼni ñajunʼ.

⁵ Jesús niʼthúún xa̱bi̱i̱: “Índo̱ gáta̱ʼa̱la náa guʼwá, guraxi̱i̱” (Mat. 10:12). Náa xuajen rí ikhiin nitaraʼa, xa̱bu̱ naguʼwún nuthúún manújngún náa guʼwún maski ajndu tsiniʼnunʼ. Mbáa rígi̱ tseguʼwun muni xa̱bu̱ náa kuwáanʼ. Mbaʼin xa̱bu̱ namiñun o asndu nakiʼníin índo̱ mbáa xa̱bu̱ bi̱ tsiniʼnii naʼdu̱u̱ xkrugún. Mú á mu ni̱ndxu̱lú májánʼ xa̱bu̱ mbáa rígi̱ maʼni rí xamiñun xa̱bu̱. Itháan májánʼ rí mundu̱ʼwa̱ gajmiúlú. Xúʼko̱ má narígá índo̱ nuʼtáraʼa ga̱jma̱a̱ carritos náa kuwa mbaʼin xa̱bu̱. Bi̱ nutaraʼa ikhí mbáa nduyáá rí mbaʼin xa̱bu̱ nadxún índo̱ nuraxi̱i̱n ga̱jma̱a̱ xnduʼwá. Tikhun asndu nuxuʼmamijná muda̱ i̱yi̱i̱ʼ ga̱jma̱a̱ nutamijná gajmiúlú.

6. Ndiéjunʼ nini xa̱bu̱ gajmii bi̱ guanii mu mambiʼi má xúʼko̱ aguʼ ndrígu̱ún xá.

⁶ Xa̱bu̱ gajmii bi̱ ni̱ndxu̱ún má xa̱bu̱ guanuu bi̱ kuwa náa Inglaterra nánguá eʼngu̱u̱n magún rutaraʼa mámbá guʼwá ga̱jma̱a̱ numuu rí naʼniún nandii. Mú ga̱jma̱a̱ numuu rí nandún mambiʼi má xúʼko̱ aguʼ ndrígu̱ún nigíʼdi̱i̱ nitaraʼa náa rexo̱o̱ guʼwún. Ikha jngó, nutsiji mbá mesa ga̱jma̱a̱ mbaʼa i̱yi̱i̱ʼ rí nagájnuu náa Biblia índo̱ xa̱bu̱ nagún gúdíin e̱jñún náa mbá escuela dí rígá mijngii. Ga̱jma̱a̱ numuu rí mbaʼin xa̱bu̱ nandún mbuyáá, nudégun nájma̱ volumen ndrígóo libro Lo que los jóvenes preguntan. Respuestas prácticas ga̱jma̱a̱ tikhuu folletos. Mbáa precursora nigíʼdu̱u̱ raʼtáraʼa ikhí gajmíi̱n xa̱bu̱ gajmii bugi̱. Ga̱jma̱a̱ numuu rí ikhaa májánʼ a̱jkiu̱u̱n ga̱jma̱a̱ tsiakii rí nuni xa̱bu̱ gajmii bugi̱, mbáa xa̱bu̱ bi̱ gíʼdiin e̱ji̱n nigruigú maʼnigajmaa Biblia.

7. Xú káʼnii gándoo gumbáñuun bi̱ nagún gumbáyumíjná náa i̱ʼwáʼ xuajen rá.

⁷ Náa iwáá tsiguʼ, náa mbaʼa xuajen mba̱ʼu̱ naguwá mbaʼin xa̱bu̱ bi̱ nandún mumbayúmíjná. Xú káʼnii gándoo gumbáñuun xa̱bu̱ bugi̱ mu muniʼniiʼ Jeobá ga̱jma̱a̱ rí naʼthí maʼni xá. Ginii ndayóoʼ majmañulúʼ muraxi̱ín ga̱jma̱a̱ ajngún. Mbáa mambáyulúʼ wéñuʼ aplicación JW Language. Ma̱ngaa ma̱ndoo majmañulúʼ tikhuu ajngáa rí itháan nanigu̱nʼ ikhiin. Nda̱wa̱á ma̱ndoo muʼthúún ga̱jma̱a̱ numuu ináa jw.org ga̱jma̱a̱ musngájmuun videos ga̱jma̱a̱ i̱yi̱i̱ʼ dí rígá náa ajngún (Deut. 10:19).

8, 9. a) Náa biʼyaa rí endrígú náa reunión mámbá xmáná rá. b) Xú káʼnii gándoo xa̱bu̱ gumbañúún e̱jñún mu muni comentar náa reunión xá.

⁸ Jeobá naxnúlú reunión Xóo kúwi̱i̱n ga̱jma̱a̱ xóo Etaraʼa Cristianos mu majmañulúʼ muʼtáraʼa itháan májánʼ. Ikha rí nundrígú ikhí nambáyulúʼ mu xámiñulu índo̱ gatangaánʼ guʼyáá mbáa xa̱bu̱ ga̱jma̱a̱ índo̱ gúʼsngáa ga̱jma̱a̱ numuu Biblia.

⁹ Mbaʼin xa̱bu̱ bi̱ naguwáʼ náa Guʼwá nagimbáanʼ nanigu̱nʼ índo̱ nduyáá rí e̱ji̱n nuxna comentario náa reunión. Ikha jngó májánʼ eni xa̱bu̱ índo̱ nusngúún e̱jñún muni  comentar rí nikru̱ʼu̱u̱n, mu xúʼko̱ mambiʼi aguʼ ndrígu̱ún. Índo̱ mbáa ada̱ nariʼña̱a̱ ga̱jma̱a̱ mbá ajngáa ramíʼskhoo rí nagájnuu náa a̱jkiu̱u̱n, rígi̱ nguáná naʼni rí xa̱bu̱ bi̱ ndiʼkhún e̱ʼkha̱ mbaʼyoo rí nixkamaa rí gajkhun (1 Cor. 14:25).

10. Xú káʼnii eyambáá rí munigajmaa mbá guʼwíin mu makuwá itháan kambáxu̱u̱n xá.

¹⁰ I̱mba̱ rí xóo muʼni mu mambiʼi aguʼ ndrígúlú nindxu̱u̱ rí xúniʼñáʼ rakuwáanʼ mbá kambáxulú ma̱ngaa náa congregación. Mbá xkri̱da, gíʼdoo wéñuʼ numuu rí xa̱bu̱ xúniñaʼ runigajmaa mbá guʼwíin. Mbaʼin nduyáá programa rí nagájnuu mámbá gu̱nʼ náa JW Broadcasting. Nda̱wa̱á rí naguámbu̱u̱n ruyáá, májánʼ nindxu̱u̱ rí xúgínʼ muthi xú káʼnii gúgíʼ munimbaníí rí nijmañún ikhú. Tátá bi̱ kayá edxu̱u̱ náa nunigajmaa mbá guʼwíin gíʼmaa marmáʼáan a̱jkiu̱u̱n rí e̱ji̱n ga̱jma̱a̱ jiáma mangiin wa̱ʼxa̱ʼ mixtiʼkhu nindxu̱u̱ rí nda̱ñúnʼ. Ikha jngó gíʼmaa mbayáaʼ rí gambáñun xúgínʼ bi̱ kuwa náa goʼwóo (Sal. 148:12, 13).

11-13. Xú káʼnii gándoo gúʼni xúgiáanʼ rí makuwáanʼ mbá kambáxulú náa congregación ga̱jma̱a̱ mumbáñuun eʼwíínʼ mu muni rí mambiʼi aguʼ ndrígu̱ún xá.

¹¹ Xúgiáanʼ ikháanʼ, mangiin jiáma ga̱jma̱a̱ wa̱ʼxa̱ʼ ma̱ndoo muʼni rí makuwáanʼ mbá kambáxulú náa congregación ga̱jma̱a̱ xúʼko̱ gúxnún tsiakii eʼwíínʼ mu muni mambiʼi aguʼ ndrígu̱ún. Mbá xkri̱da, jiáma ga̱jma̱a̱ wa̱ʼxa̱ʼ ma̱ndoo mugími̱jna̱ maxmiéjunʼ kuñún a̱ngiu̱lú xa̱bu̱ guanuu. Ma̱ndoo mundu̱ʼu̱u̱n rí muthún experiencia ndrígu̱ún rí xú káʼnii nini itháan ñajunʼ Jeobá. Ikhiin xó má a̱ngiu̱lú xa̱bu̱ guanuu maguaʼdáá tsiakii ga̱jma̱a̱ maxkaxi̱i̱n muni mambiʼi itháan aguʼ ndrígóo rí gajkhun. Ma̱ngaa, xúgiáanʼ ma̱ndoo muʼgími̱jna̱ mundrígúun bi̱ naguwáʼ náa Guʼwá nagimbáanʼ. Ma̱ndoo mundrígúun ga̱jma̱a̱ xnduʼwá, mumbáñuun muxkamaa náa mutrigi̱i̱n ga̱jma̱a̱ mu̱ʼgua̱ kuʼdiin a̱ngiu̱lú mu muniʼnunʼ. Xúʼko̱ gakumún rí asndu xóo kuwa náa guʼwún.

¹² Bi̱ nuyegun edxu̱u̱ náa reunión ma̱ndoo muyambáá mu a̱ngiu̱lú guanuu muni mambiʼi itháan aguʼ ndrígu̱ún. Ikha jngó, gíʼmaa mumbáñuun a̱ngiu̱lú mu muguaʼdáá mbóo territorio ndrígu̱ún. Nguáná ma̱ndoo munda̱ʼa̱a̱ mbáa dxámá o mbáa wáxá rí magajnún gajmiún ga̱jma̱a̱ mumbañún. Ma̱ngaa gíʼmaa makru̱ʼu̱u̱n ga̱jma̱a̱ numún bi̱ tséʼngu̱u̱n gutaraʼa wéñuʼ ga̱jma̱a̱ numuu rí naʼniún nandii ga̱jma̱a̱ i̱ʼwáʼ xkujndu. Á mu nduyáá rí nda̱ñúnʼ mumbañún  mutaraʼa ga̱jma̱a̱ gagi xúgínʼ, tséʼniuu á mu jiáma, wa̱ʼxa̱ʼ o xa̱bu̱ guanii, nuxunʼ o bi̱ najmañún itháan (Lev. 19:32).

¹³ Mbáa bi̱ niʼnirámáʼ salmo naʼthí: “¡Atayáá! Ra̱ʼkhá tháán májánʼ ga̱jma̱a̱ mitsaan rí a̱ngiu̱lú makuwa mbá kambáxu̱u̱n” (atraxnuu Salmo 133:1, 2). * Israelitas nimbáñun wéñuʼ mu mbuyamajkuíí Jeobá mbá kambáxu̱u̱n. Salmista niʼni mbríguii rí makuwá mbá kambáxu̱u̱n nindxu̱u̱ xóo aceite rí nusngatramaʼ náa edxu̱ún, rí nindxu̱u̱ májánʼ ga̱jma̱a̱ miguéʼtsi. Rí mbiʼi xúgi̱, náa numuu rí tséʼgimi̱jna̱ manindxu̱lúʼ mbáa xa̱bu̱ bi̱ naʼthí rí májánʼ náa congregación ga̱jma̱a̱ muʼni rí makuwáanʼ mbá kambáxulú bi̱ ni̱ndxu̱lú cristianos rá. Á mu kuwáanʼ má ru̱ʼni̱, kaʼyulú mutulú rí májánʼ eʼni. Mú, lá ma̱ndoo muniʼnúnʼ itháan a̱ngiu̱lú ga̱jma̱a̱ mambaxúlúʼ gajmiúlú xáʼ. (2 Cor. 6:11-13.)

14. Ndiéjunʼ gándoo gúʼni mu mambiʼi aguʼ ndrígúlú náa xuajñulú rá.

¹⁴ Lá ma̱ndoo muʼnimíjna̱ itháan mu muʼni rí aguʼ rí gajkhun rí na̱ʼkha̱ náa Biblia mambiʼi náa kuwáanʼlu ráʼ. Á mu ni̱ndxu̱lú mbáa xa̱bu̱ májáánʼ gajmiúlú bi̱ kúwi̱i̱n mijngii náa kuwáanʼlu, mbáa asndu maguánu mudxuun rí gajkhun. Guraximíjna̱: “Xú káʼnii endxaʼwamíjna̱ xa̱bu̱ bi̱ kuwa mijngii náa xtáá ga̱jma̱a̱ numuʼ rá. Lá mikaʼwu goʼwóoʼ ga̱jma̱a̱ náa mbájndi goʼwóoʼ ráʼ. Lá nayambáá rígi̱ mu maʼgui̱i̱ xuajñuʼ ráʼ. Lá xtáá xawii mu mambáñun eʼwíínʼ ráʼ.” Índo̱ nuʼtámíjná gajmiúlú a̱ngiu̱lú, guraxu̱u̱n xú káʼnii niyambáá rí mani̱ndxu̱ún míjínʼ xa̱bu̱ náa bi̱ kuwa mijngii, xó má a̱ngiu̱ún, bi̱ nunigajmaa gajmiún ga̱jma̱a̱ bi̱ nuñajunʼ gajmiún. Mbáa mutulú experiencia rí májánʼ (Efes. 5:9).

15. Ndíjkha jngó gíʼdoo numuu rí makuwáanʼ xawii rá.

¹⁵ Á mu nandulúʼ rí aguʼ ndrígúlú mambiʼi ga̱jma̱a̱ itháan tsiakii, gíʼmáanʼ mbuʼyáá májánʼ xú káʼnii nindxu̱u̱ mbiʼi rí kuwáanʼ. Jesús niʼthún má xúʼko̱ xa̱bi̱i̱: “Gajuhuala xahui” (Mat. 24:42; 25:13; 26:41). Mú á mu nakumulú rí xóó ndayóoʼ mba̱yu̱ʼ mbiʼi mu ma̱ʼkha̱nú índo̱ marigá “mapu-mba gaʼko” ga̱jma̱a̱ rí maʼga̱nú mbóo mbiʼi mú ikháanʼ xúʼyáá, rígi̱ maʼni rí xúʼyáá rí ndayóoʼ muʼtáraʼa nacha̱ (Mat. 24:21). Aguʼ ndrígúlú makágua̱ba̱ʼ ga̱jma̱a̱ majuiʼyúʼ.

16, 17. Ndiéjunʼ gándoo gúʼni mu makuwáanʼ xawii rá.

¹⁶ Xó má ejkha̱ ranújngoo mbiʼi gakhi̱i̱, mbaʼyóoʼ muñeumíjna̱ itháan. Dios maʼni rí kaʼyoo índo̱ gáʼga̱nú mbiʼi, ga̱jma̱a̱ gajkhun nindxu̱u̱ rúʼko̱ (Mat. 24:42-44). Mú ndayóoʼ maʼngo̱o̱ a̱jkiu̱lú ga̱jma̱a̱ makuwáanʼ xawii xúgíʼ mbiʼi. Guraxnuu Ajngá rawunʼ Dios tsejtsí mbiʼi ga̱jma̱a̱ gakuwáanʼ xawii mu muʼtájkáan “má xúʼko̱” (1 Ped. 4:7). Rí majmañulúʼ ga̱jma̱a̱ numún a̱ngiu̱lú bi̱ nini ñajunʼ Jeobá mba̱yu̱ʼ tsiguʼ. Ma̱ngaa ma̱ndoo mbuʼyááʼ náa i̱yi̱i̱ʼ ndrígúlú historia ndrígu̱ún a̱ngiu̱lú.

¹⁷ Guʼni má xúʼko̱ ñajunʼ Jeobá, guʼni rí májánʼ ga̱jma̱a̱ numún eʼwíínʼ ma̱ngaa ganújngulu mbiʼi gajmiúlú a̱ngiu̱lú. Xúʼko̱ gakuwáanʼ gagi ga̱jma̱a̱ xákumulú á mu nanújngoo mbiʼi (Efes. 5:16). Naʼni mbá siglo rí a̱ngiu̱lú nini itháan ñajunʼ Dios. Mú rí mbiʼi xúgi̱ ikha ndrígóo Jeobá naniñulú muʼni itháan ñajunʼ ikhaa. Aguʼ ndrígúlú nambiʼi ga̱jma̱a̱ itháan tsiakii rí nditháan tundxaʼwamíjna̱lú.

18, 19. Xú káʼnii gándoo guyambáá bi̱ kuya̱ edxu̱u̱ mu makuwáanʼ xawii ga̱jma̱a̱ muñajunʼ má xúʼko̱ rá. Araxná mbá xkri̱da.

¹⁸ Maski ajndu nakiéʼkulu mbaʼa nuthu, Jeobá naniñulú muʼni ñajunʼ. Mu mambáyulúʼ  makuwáanʼ xawii ga̱jma̱a̱ rí muñajunʼ má xúʼko̱ “nixníin xa̱bekha xóo regalo”, xóo muʼthá, bi̱ kuya̱ edxu̱u̱ náa congregación (atraxnuu Efesios 4:8, 11, 12). * Ikha jngó, índo̱ gáʼkha̱ gáʼyulúʼ mbáa bi̱ kayá edxu̱u̱, guʼniñamijná rí mambáyulúʼ xtágabu ndrígóo.

¹⁹ Náa xuajen Inglaterra, xa̱bu̱ gajmii bi̱ niguáʼdáá tikhuu xkujndu nindu̱ʼu̱u̱n bi̱ kuya̱ edxu̱u̱ mu mumbañún. A̱ʼgu̱ niʼthún rí ikhaa naku̱mu̱u̱ rí na̱nguá endxaʼwamíjna̱ mbrígu̱ú. Ga̱jma̱a̱ ajmbio̱o̱ ndiʼyoo rí na̱nguá eʼsngáa májánʼ ga̱jma̱a̱ nguánáá eʼnigajmaa gajmíi̱n bi̱ kuwa náa goʼwóo. A̱ngiu̱lú bi̱ kuya̱ edxu̱u̱ nitháán ga̱jma̱a̱ numuu Jesús bi̱ niñewu̱u̱n xa̱bi̱i̱ ga̱jma̱a̱ ndiʼyoo rí ndiñúnʼ. Bi̱ tátá nitháán rí gíʼmaa mbaʼyáridoo Jesús, ga̱jma̱a̱ a̱ʼgiu̱u̱ nitháán rí maʼngo̱o̱ a̱jkiu̱ún. Ma̱ngaa nixnúún tikhuu ikha rí xú káʼnii muni mu munigajmaa gajmiún a̱jmi̱i̱n e̱jñún (Efes. 5:21-29). Nda̱wa̱á, nitháán tátá rí májánʼ rí xtáa raʼni. Nitháán rí maʼni tsiakiminaʼ má xúʼko̱ ga̱jma̱a̱ mbaʼyoo rí xi̱ʼ kaʼwu gambáyúu mu mayéʼga májánʼ edxu̱u̱. Ngajua ndrígu̱ún bi̱ kuya̱ edxu̱u̱, rí nixmiéjunʼ ga̱jma̱a̱ rí xóo nimbañúún niʼni rí aguʼ ndrígu̱ún mbá guʼwíin bugi̱ maʼni mambiʼi itháan.

20. Ndiéjunʼ gárígá á mu nuʼni mambiʼi aguʼ ndrígúlú rá.

²⁰ Salmo 128:1 naʼthí: “Gagi kuwa xúgínʼ xa̱bu̱ bi̱ namiñun kuyáá Jeobá, bi̱ jngruigu̱u̱n náa kambo̱o̱”. Náa artículo rígi̱ ndiʼyáá mbaʼa enii rí xóo muʼni mambiʼi aguʼ ndrígúlú: Rí muʼthúún eʼwíínʼ xa̱bu̱ muni ñajunʼ Dios, rí muʼni mbá tsiakii mu makuwáanʼ itháan kambáxulú ga̱jma̱a̱ makuwáanʼ xawii. Á mu nuʼni xúʼko̱ kaʼnii, makuwáanʼ itháan tsímáá, eʼwíínʼ mbuyáá ñajunʼ rí nuʼnilú ga̱jma̱a̱ mbaʼin xa̱bu̱ maʼndún muni mba̱a̱ Anu̱lú bi̱ xtáa mekhuíí (Mat. 5:16).