Lá nitagíʼ edxa̱ʼ índo̱ nitraxnuu números rí ndiʼkhún nigájnuu náa Bi̱ Nayejngoo ráʼ. Atayáá á mu majmañaaʼ matriʼña̱a̱ graxe̱ rígi̱:

Ndiéjunʼ a̱jkhu̱ rí gándoo gúʼni mu ma̱ndoo muʼni ajmúú itháan májánʼ rá.

Muguajún májánʼ ga̱jma̱a̱ mbuʼyá mitsídaanʼ libro ndrígóo ajmúú, guʼyá májánʼ xi̱ʼ, muxuaján májánʼ rawunlu ga̱jma̱a̱ muʼni ajmúú gakhi̱i̱. Xúʼko̱ muʼni ajmúú xígu (w17.11, ináa 5).

Ndiéjunʼ ejmañulú rí xóo tri̱ga̱ xuajin náa nimbayúmíjná xa̱bu̱ náa Israel ga̱jma̱a̱ rí xóo májánʼ kamba̱a̱ rí ni̱jkha̱ kagu̱u̱n ikhí xa̱bu̱ rá.

Nirígá mbá majun xuajen náa nimbayúmíjná xa̱bu̱ náa xúgíʼ xuajen mba̱a̱, ga̱jma̱a̱ kamba̱a̱ rí na̱jkha̱ kagu̱u̱n ikhí májánʼ nindxu̱u̱. Ga̱jma̱a̱ xa̱bu̱ bi̱ nandoo mayambáminaʼ na̱jkha̱nú nacha̱ ga̱jma̱a̱ tséʼniuu mingíjyúuʼ maʼga̱nú ikhí (w17.11, ináa 14).

Náa numuu eʼthá rí Salmo 118:22 naʼthí rí nituxi̱i̱ Jesús rá.

Táʼnduun gúyáá Jesús xóo Mesías ga̱jma̱a̱ nixiyáa. Ndiyóoʼ matuxi̱i̱ mu mani̱ndxu̱u̱ mbá “itsí rí naxmátri̱ga̱a̱” (w17.12, ináa 9 ga̱jma̱a̱ 10).

Lá ndiyóoʼ rí mbáa mani̱ndxu̱u̱ aʼdá giʼnii mu náa ikhaa ma̱ʼkha̱ Mesías ráʼ.

Nguáná, tikhun ninindxu̱ún e̱jín giʼnuu náa ni̱ʼkha̱ Jesús, mú raʼkháa xúgínʼ. Judíos ndiyáá rígi̱ ga̱jma̱a̱ túni gaʼduunʼ, ndiyáá rí Cristo ma̱ʼkha̱ náa David, a̱ʼdióo Jesé bi̱ gi̱ʼta̱ (w17.12, ináa 14 ga̱jma̱a̱ 15).

Ndiéjunʼ ikha exkamaa náa Biblia rí xóo muñeumíjna̱ ga̱jma̱a̱ nandii rá.

Náa Xtángoo niʼthí rí índo̱ xa̱bu̱ niʼniún tikhuu nandii ndiyóoʼ makuwá wájíʼ a̱jma̱ skiñúʼ mbiʼi, mujña̱a̱ ñawúunʼ nda̱wa̱á rí murugua̱a̱ mbáa wa̱jinʼ, nudu rí nimixúnʼ ga̱jma̱a̱ nuthu mbájndi xtóo xuñúnʼ e̱ji̱n jiáma índo̱ eʼni mbá migiñuʼ mbiʼi rí nigumiin, numuu rí xúʼko̱ eʼdi nagímbuminaʼ nacha̱ (wp18.1, ináa 7).

Náa numuu rí mbáa cristiano gíʼmaa maʼndoo kaʼyaminaʼ xó má kaʼyoo rá.

Gíʼmaa maʼndulú kuʼñúún xa̱bu̱ numbaaʼ gajmiúlú xó má eyulú kuʼyamijná ikháanʼ (Mar. 12:31). Ga̱jma̱a̱ xa̱bekha gíʼmiin ‹maʼndún kuñún guʼñún xóo má eñún kuyamijná ikhiin› (Efes. 5:28). Mú, ngajua rí kuaʼdáá náa ikháanʼ ma̱ndoo mani̱ndxu̱u̱ ra̱májánʼ (w18.01, ináa 23).

Ndiéjunʼ gándoo muʼni mu mambaxúlúʼ itháan gajmiúlú Jeobá rá.

Gíʼmáanʼ muʼnigajmaa Ajngá rawunʼ Dios, mundxaʼwamíjna̱ rí naʼthí ikhí ga̱jma̱a̱ muʼgíʼ muʼnimbánii rí najmañulúʼ. Gíʼmaa muʼniñámíjná rí xi̱ʼ kaʼwu maxnúlúʼ ikha, muxnáa núma̱aʼ ga̱jma̱a̱ muʼniñámíjná rí mumbayúlú eʼwíínʼ (w18.02, ináa 26).

Náa numuu dí ragíʼmaa majmulúʼ astrología ga̱jma̱a̱ xawan mu mbuʼyáá rí gárígá nda̱wa̱á rá.

Rígá mbaʼa numuu, mú itháan, rí náa Biblia naguiyuʼ kaʼyoo xúgíʼ rígi̱ (wp18.2, ináa 4 ga̱jma̱a̱ 5).

Índo̱ mbáa gáʼtulú mu̱ʼgua̱ náa goʼwóo, á mu niriʼña má mu̱ʼgua̱, ndiéjunʼ gíʼmaa muʼni rá.

Á mu nindrígú rí mu̱ʼgua̱, gíʼmaa muʼnimbánii ajngáa ndrígúlú (Sal. 15:4). Ragíʼmaa muʼni skidimijná á mu nda̱a̱ mbá dí ragíʼdoo numuu. Bi̱ naʼthúlúʼ mu̱ʼgua̱ náa goʼwóo mbáa niʼni tsiakiminaʼ mu maʼni mújúnʼ mbá ganitsu (w18.03, ináa 18).

Ndiéjunʼ ikha gándoo gajmañún ga̱jma̱a̱ numuu Timoteo a̱ngiu̱lú bi̱ kuya̱ edxu̱u̱ rá.

Timoteo gajkhun nixmiéjunʼ ga̱jma̱a̱ numún eʼwíínʼ ga̱jma̱a̱ nigíʼ ginii maʼni ñajunʼ Dios. Niñajunʼ gakhi̱i̱ mu maʼni ñajunʼ Jeobá ga̱jma̱a̱ niʼnimbánuu rí nijmañuu. Niʼni rataminaʼ má xúʼko̱ mu maʼni ñajunʼ Dios ga̱jma̱a̱ niniñaminaʼ rí maxnúu ikha xi̱ʼ kaʼwu ndrígóo Jeobá. Raʼkháa i̱ndó bi̱ kuya̱ edxu̱u̱, xúgínʼ a̱ngiu̱lú ma̱ndoo mbuyaridáá xkridoo (w18.04, ináa 13 ga̱jma̱a̱ 14).