1. Ndiéjunʼ nindxu̱u̱ tikhuu gamíi dí muraʼníílú rá.

 GUNDXA̱ʼWA̱MÍJNA̱ ga̱jma̱a̱ numún a̱ngiu̱lú rí mbiʼi xúgi̱. Néstor ga̱jma̱a̱ a̱ʼgiu̱u̱ bi̱ mbiʼyuu María, ikhiin nindúún magún gúyambáá náa ndayóoʼ miʼtáraʼa. * Mu muni̱ rúʼko̱ ndayóoʼ dí xáguáʼdáá wéñuuʼ. Rúʼko̱ niʼni dí mamiñún. Numuu rí nikumu̱ún dí rúʼko̱ gáʼni dí xákúwá gagi á mu ikhiin xáguáʼdáá wéñuuʼ. Ndxájulú Biniam xtáa náa xuajen dí tséniñu̱u̱nʼ mutaraʼa a̱ngiu̱lú. Índo̱ ikhaa ninindxu̱u̱ testigo de Jeobá ni̱jkha̱nú ndiʼyoo dí ma̱ngaa xáʼndúún gúyáá. Ga̱jma̱a̱ rígi̱ niʼni dí mamiñúu, mú rígá imbo̱o̱ dí naʼni mamiñúu itháán: Nindxu̱u̱ xóo káʼnii gúthi bi̱ kúwá náa goʼwóo índo̱ gúdxawíín rí xtáa náa i̱mba̱ religión. Rí iwáá mbuʼyáá ga̱jma̱a̱ numuu Valeria, bi̱ nitháán dí gíʼdoo cáncer, ikhaa nandoo manimboo ikha ndrígóo Biblia dí xáta̱ʼa̱a̱ eʼdi, mú niʼniuu miʼskhaa maxkamaa mbáa doctor bi̱ mbaʼyamajkuu dí gáraʼwíí maʼni. Gajkhun má rí naʼni mamiñúu dí makhañúu.

2. Náa numuu gíʼmaa muʼnimi̱jna̱ mu xámiñulúʼ wéñuuʼ rá.

² Lá natraʼníí mangáán xóo niguáʼníí a̱ngiu̱lú bi̱ niʼthá náa kutriga̱ ginii dí niʼni mamiñáanʼ ráʼ. Mbaʼánʼ niguáʼníí xúʼko̱. Mú, migamíi nindxu̱u̱ dí mamiñúlúʼ wéñuuʼ, numuu dí rúʼko̱ gáʼni dí muraʼwíí mbá rí maʼni gachúu dí nambájxu gajmiúlú Jeobá. Rúʼko̱ dí nandoo Gixa̱a̱. Ikhaa nandoo majmuu dí namíñulú mú xúʼko̱ xúʼnimbulú kiʼtáñajunʼ ndrígóo Jeobá, xóo dí xúʼtáraʼa ajngáa rí májánʼ (Apoc. 12:17). Gajkhun má dí ikhaa nindxu̱u̱ xkawiiʼ ga̱jma̱a̱ gíʼdoo tsiakii. Mú rígá rí ma̱ndoo  mambáyulú mu muraʼníí tsáʼkhá rúʼko̱. Ndiéjunʼ nindxu̱u̱ rá.

3. Ndiéjunʼ gámbáyulú mu xámiñulúʼ rá.

³ Dí mbuʼyáá gajkhun dí Jeobá xtáa ga̱jma̱á ni̱ndxu̱lú ga̱jma̱a̱ rí nandoo kaʼyulúʼ, rúʼko̱ gámbáyulú dí xáʼngo̱o̱ gáʼnimíñulú Gixa̱a̱ (Sal. 118:6). Mbá xkri̱da bi̱ niʼnirámáʼ Salmo 118, niraʼnuu mbaʼa gamiéjunʼ. Náa versículo 9 ga̱jma̱a̱ 10 naʼthí dí nigiʼdiin xa̱bu̱ sia̱nʼ ndrígióo, tikhunʼ dí ikhiin ninindxu̱ún xa̱bu̱ bi̱ guáʼdáá wéñuuʼ numún. Náa versículo 13 naʼthí dí nguáná ikhaa ndiyóoʼ maʼngo̱o̱ rí nutháán eʼwíinʼ. Ma̱ngaa náa versículo 18 naʼthí dí Jeobá ndiyóoʼ maxprígúu. Maski asndu xúʼko̱ ikhaa niʼthí náa ajmúú dí niʼni: “Nditháan xamiñuʼ”. Náá numuu niʼthí xígi̱ xá. Numuu rí ndaʼyoo dí maski ajndu Anu̱u̱ bi̱ xtáa mekhuíí nixprígúu, mú niʼni ga̱jma̱a̱ ngajua. Ikha jngóo bi̱ niʼnirámáʼ rígi̱ ndiʼyoo gajkhun, dí garigá má dí gárígá, mú Dios ndrígóo xtáa xawii mu mambáyúu (Sal. 118:29).

4. Xkáʼnii nindxu̱u̱ tikhu gamíi dí maʼngulú muraʼníí á mu nakumulú dí Jeobá nandoo kaʼyulú rá.

⁴ Mámbáa dí ikháánʼlú gíʼmaa mbuʼyáá gajkhun dí Jeobá nandoo kaʼyulú. Á mu nduʼyáá gajkhun dí Jeobá nandoo kaʼyulú rúʼko̱ gámbáyulú muraʼníí ajtsú enii gamíi rígi̱: 1) Rí mamiñulúʼ dí xáʼngulú gúxnúún rí nda̱ñúunʼ bi̱ kúwá náa guʼwúlú, 2) rí mamiñulúʼ eni̱ xa̱bu̱, 3) rí mamiñulúʼ makhañúlúʼ. A̱ngiu̱lú bi̱ niʼthá náa timbá kutriga̱ niʼngu̱u̱n nini̱ gajmiún gamíi rígi̱ numuu rí ndiyáá dí Jeobá nandoo kaʼñúún.

5. Ndiéjunʼ eʼni makuwá ngíná bi̱ kuya̱ edxu̱u̱ náa mbá guʼwíin rá. (Atayáá xtiʼkhuu rí na̱ʼkha̱ náa timbá ináa.)

⁵ A̱ngiu̱lú bi̱ kuya̱ edxu̱u̱ náa mbá guʼwá ikhiin kajkuáa ñawúúnʼ dí muñewu̱u̱n ga̱jma̱a̱ muxnún rí ndañún bi̱ kúwá náa guʼwún (1 Tim. 5:8). Á mu mangáán nindxa̱a̱ʼ bi̱ kayá edxu̱u̱ náa mbá guʼwá, mbáa índo̱ nigíʼdu̱u̱ COVID-19 nixmiéjuáanʼ dí matani̱ mbáti̱ga̱ ñajunʼ dí xtaʼdáá mbáa rúʼko̱ niʼni maraxtaa gíná. Numuu dí tsétayáá xóo gáraxnu̱u̱n ganitsu bi̱ kúwá náa guʼwáaʼ o xóo gátani̱ numáá náa guʼwá rí xtaa. Ga̱jma̱a̱ rúʼko̱ niʼni makumaaʼ rí á mu natani̱ mbáti̱ga̱ ñajunʼ xátaxkamaa imbo̱ʼ. Xó ma Néstor ga̱jma̱a̱ María, bi̱ niʼthá ga̱jma̱a̱ numún nákha ginii, mbáa ikháán maku̱ma̱a̱ʼ dí xáraxtaa májánʼ á mu xáraʼdáá wéñuuʼ. Ga̱jma̱a̱ numuu gamíi rúʼko̱, Gixa̱a̱ najmuu dí mbaʼiin muniña̱a̱ʼ runi̱ ñajuunʼ Jeobá.

6. Ndiéjunʼ eyoo makumulúʼ Gixa̱a̱ rá.

⁶ Gixa̱a̱ nandoo dí makumulúʼ rí Jeobá na̱nguá exmiéjuunʼ kaʼyulú mámbáa dí ikháánʼ ga̱jma̱a̱ índo̱ nunda̱ʼa̱a̱ dí mambáyulú mú muxnún dí nda̱ñúunʼ bi̱ kúwá náa guʼwúlú ikhaa xáʼni nimbá. Á mu najngutíguáánʼlú náa tsáʼkhá rúʼko̱, ma̱ndoo makumulú rí itháán májánʼ dí muñajunʼ náa ñajunʼ ndrígúlú, maski asndu rúʼko̱ nanújngorámuuʼ ikha rí na̱ʼkha̱ náa Biblia.

7. Ndiéjunʼ eʼthúlú Jesús rá.

⁷ Nimbáa tséniʼniiʼ itháan májánʼ Anu̱lú Jeobá ki xóo Jesús. Ikha jngóo Jesús naʼthúlú xígi̱: “Ana̱la ndaʼyoo má rí eyála asndu nákha ikháanʼ xóó tsénda̱ʼa̱a̱la” (Mat. 6:8). Jesús ndaʼyoo dí Jeobá xtáa xawii maxnúlú dí ndayúlú. Bi̱ ni̱ndxu̱lú Cristiano kuwáanʼ náa xuajñuu Dios. Numuu dí ikhaa kayá edxu̱u̱, nduʼyáá gajkhun dí maʼni ikháá kayuuʼ xó má endu̱ʼu̱u̱n muni̱ bi̱ kuya̱ edxu̱u̱ náa mbá guʼwíin xó má eʼthí náa 1 Timoteo 5:8.

8. a) Ndiéjunʼ gámbáyulú muraʼníí gamíi dí xáʼngulú gúxnúún rí nda̱ñúunʼ bi̱ kúwá náa guʼwúlú rá. (Mateo 6:31-33.) b) Xú káʼnii gándoo gúʼyaridáá xkri̱da ndrígu̱ún xa̱bu̱ gajmii bi̱ nakujmiin náa xtiʼkhuu rá.

⁸ Á mu nduʼyáá gajkhun dí Jeobá nandoo kaʼyulú ga̱jma̱a̱ nandoo kaʼñúún bi̱ kúwi̱i̱n náa  guʼwúlú, rúʼko̱ gámbáyulú dí xáʼni a̱jma̱ a̱jkiu̱lú dí ikhaa má gáxnulú dí ndaʼyóoʼ (atraxnuu Mateo 6:31-33). Jeobá nandoo maxnúlú dí ndayúlú, naʼni rígi̱ numuu rí nandoo kaʼyulú. Índo̱ niʼni ku̱ba̱ʼ, ikhaa na̱nguá niʼni i̱ndó dí mbaʼyóoʼ dí makuwáanʼ ga̱jma̱a̱. Rí phú niʼni ni̱ndxu̱u̱ dí maʼni majtíí xúgíʼ rí mitsaanʼ mú xúʼko̱ ikháánʼ manigulúʼ makuwáánʼ (Gén. 2:9). Maski ajndu nguáná i̱ndó kuáʼdáá mú manújngulú ga̱jma̱a̱ mámbá mbiʼi, mú guxnáa núma̱aʼ numuu rí kuaʼdáálú. Jeobá xtáa má xúʼko̱ ga̱jma̱a̱ ni̱ndxu̱lú mu maxnúlú rí ‹muʼphu mbiʼi rígi̱› (Mat. 6:11). Garmáʼáan a̱jkiu̱lú dí tséʼngo̱o̱ gaguaʼdáá mbiʼi xúgi̱, Jeobá maxnúlú índo̱ gáʼnimbánuu rí nikudaminaʼ nda̱wa̱á. Rígi̱ rí ni̱jkha̱nú ndiʼyoo Néstor ga̱jma̱a̱ María (Is. 65:21, 22).

9. Ndiéjunʼ eʼsngúlú xkri̱da ndrígóo Néstor ga̱jma̱a̱ María rá.

⁹ Néstor ga̱jma̱a̱ María bi̱ kúwíin náa Colombia, ikhiin nadxún ga̱jma̱a̱ rí kuáʼdáá. Ikhiin nuthi: “Ninduxu̱ʼ muniʼñááʼ tikhuu rí kuáʼdááxu mú mutaráʼaxu itháán, mú nimíñuxuʼ. Niku̱mu̱xu dí rúʼko̱ xáʼni makuwáanʼxu gagi”. Xú káʼnii niʼngu̱u̱n nini̱ gajmiún gamíi rúʼko̱ xá. Nimbáñún wéñuuʼ dí nindxaʼwamíjna̱ dí mbaʼa nuthu Jeobá nisngájmúún dí nandoo kaʼñúún. Ndiyáá gajkhun dí Jeobá maxtáa xawii mú mañewu̱u̱n, ikha jngóo niniña̱a̱nʼ ñajunʼ rí kuáʼdáá náa nuni̱ numún májánʼ ma̱ngaa nigujua̱a̱ guʼwún mú magún náa i̱mba̱ xuajen náa ndayóoʼ miʼtáraʼa itháán. Xú káʼnii ekumu̱ún dí niraʼwíi muni̱ xá. Néstor naʼthí: “Rí xúgi̱ ndi̱ya̱a̱xu̱ xú káʼnii embánuu ajngáa dí naʼthí náa Mateo 6:33. Nimbá miʼtsú nda̱a̱ ndiyúxu̱. Xúgi̱ kúwáanʼxu itháán gagi”.

10. Náa numuu rí tséʼniulú tsiánguá dí xa̱bu̱ numbaaʼ namiñun kaʼyoo xa̱bu̱ numbaaʼ ga̱jma̱a̱ rá.

¹⁰ Asndu nákha wajyúuʼ, xa̱bu̱ nuni̱ gíníi eʼwíinʼ xa̱bu̱ gajmiún (Ecl. 8:9). Mbá xkri̱da, kúwi̱i̱n tikhuun bi̱ najmún ñajunʼ ndrígu̱ún mu muniu̱u̱n dí raʼkhí eʼwíinʼ, dí muni̱ gíníi o mutha wéñúúnʼ o asndu muthún rí muxnún bi̱ nagún gajmiún náa escuela o nuni̱ gíníi bi̱ kúwá náa guʼwún. ¡Ikha jngóo xa̱bu̱ numbaaʼ namiñuu eʼni xa̱bu̱ numbaaʼ ga̱jma̱a̱! Xú káʼnii ejmuu Gixa̱a̱ gamíi rúʼko̱ rá.

11, 12. Xú káʼnii ejmuu Gixa̱a̱ dí namíñulú kuʼñúún xa̱bu̱ rá.

¹¹ Gixa̱a̱ najmuu dí namíñulú kuʼñúún xa̱bu̱ mu maʼni dí muniʼñááʼ ruʼtáraʼa o dí muniʼñááʼ  ruʼnimbaníí i̱ʼwáʼ rí na̱ndu̱ʼu̱lú Jeobá. Ma̱ngaa ikhaa naʼni dí tikhuun xa̱bu̱ ñajunʼ xúniñulú muʼtáraʼa ga̱jma̱a̱ muni̱ gínáán (Luc. 21:12; Apoc. 2:10). Numuu dí Gixa̱a̱ xtáa raʼtáñajunʼ náa numbaaʼ rígi̱, mbaʼiin xa̱bu̱ nuthi dí nduwaʼ ga̱jma̱a̱ numún testigos de Jeobá. Mbáa xa̱bu̱ bi̱ gúnimbu̱ún nduwaʼ rúʼko̱ xáʼndúún gúyulú, mutsijmááʼlú o asndu muxnúlú (Mat. 10:36). Tséʼniulú má tsiánguá dí Gixa̱a̱ najmuu xúgíʼ rúʼko̱ numuu dí rígi̱ ma̱ngaa nijmuu nákhá siglo timbá (Hech. 5:27, 28, 40).

¹² Gixa̱a̱ raʼkháa i̱ndó najmuu gamíi o dí xa̱bu̱ ñájunʼ tséniñunlú muʼtáraʼa, ma̱ngaa najmuu dí namíñulú xóo gúthi bi̱ kúwá náa guʼwúlú índo̱ ikhiin gúdxawíín dí ni̱ndxu̱lú testigos de Jeobá. Rúʼko̱ dí naʼni mamiñún eʼwíinʼ ki xóo rí muni̱ gíníin. Numuu rí nandún kuñún bi̱ kúwá náa guʼwún ga̱jma̱a̱ nandún dí maguánú muniʼnuuʼ rí gajkhun ma̱ngaa rí maʼndún kuyáá Jeobá, mú nagawúnʼ índo̱ nudxawíín dí nuthi dí raʼkhí ga̱jma̱a̱ numuu Dios bi̱ gajkhun ma̱ngaa xa̱bi̱i̱. Mú nguáná bi̱ kúwá náa guʼwún bi̱ nákha ginii nakiʼníin naguánú nundrigú dí gajkhun mú, á mu mbáa bi̱ xtáa náa guʼwúlú tsíyoo gáʼdxuun, ndiéjunʼ gúʼni rá.

13. Ndíjkha dí gíʼdoo numuu mbuʼyáá dí Jeobá nandoo kaʼyulú índo̱ bi̱ kúwá náa guʼwúlú tsíñún gúyulú rá. (Salmo 27:10.)

¹³ Ajngáa mitsaanʼ dí na̱ʼkha̱ raʼthí náa salmo naʼni̱i̱ a̱jkiu̱lú Salmo 27:10 (Atraxnuu). * Á mu nduʼyáá gajkhun dí Jeobá nandoo kaʼyulú wéñuuʼ, rúʼko̱ gámbáyulú mu xámiñulúʼ maski ajndu eʼwíinʼ xáʼndúún gúyulú ma̱ngaa mambáyulú mbuʼyáá dí Jeobá má gáʼni tsajkurámááʼ á mu naʼngulú naguájun jmbu. Jeobá maxnúlú rí ndayúlú mu makuwáanʼ ga̱jma̱a̱, xóo dí mambájxu gajmiúlú ga̱jma̱a̱ dí nakumulú, ikhaa mañewu̱nlú itháán májánʼ ki xóo nimbáa táʼni, rúʼko̱ dí ni̱jkha̱nú ndiʼyoo Biniam, bi̱ niʼthá náa kutriga̱ 1.

14. Ndiéjunʼ eʼsngáaʼ xkridoo Biniam rá.

¹⁴ Biniam niraʼwíí mani̱ndxu̱u̱ testigo de Jeobá maski ajndu ndaʼyoo dí xa̱bu̱ ñajunʼ muni̱ gínáa wéñuuʼ. Ikhaa naʼthí: “Ra̱ʼkha̱ tháán gakhi̱i̱ nigíʼnuʼ índo̱ xa̱bu̱ ñajunʼ nini̱ gínún. Mú dí itháán nimíñúʼ dí bi̱ kúwíin náa goʼwóʼ xáʼndúún gúyóʼ. Ma̱ngaa nimíñúʼ dí á mu ikhúún naraʼwi̱i̱ mani̱ndxu̱ʼ testigo anu̱ʼ xándoo gáʼyoʼ ga̱jma̱a̱ dí xúyamajkhuʼ bi̱ kúwi̱i̱n náa goʼwóʼ”. Ndiéjunʼ nimbáyúu mu  xámiñuu xá. Dí mbaʼyoo rí Jeobá nandoo kaʼyoo ga̱jma̱a̱ na̱we̱ñu̱u̱n bi̱ nandún kuyáá. Biniam naʼthí: “Nindxa̱ʼwa̱mínáʼ xú káʼnii Jeobá nimbañúún mu maʼngu̱u̱n bi̱ na̱nguá kuáʼdáá mbújkha̱a̱, náa tsíñún gúñún xa̱bu̱ mixtiʼkhu color ga̱jma̱a̱ náa nagiʼdu̱u̱n. Nijkhánú ndi̱yo̱o̱, á mu naku̱mu̱ʼ kayóo kájxi̱ Jeobá ikhaa má gáʼni tsajkurámún. Mbaʼa nuthu nirugu̱u̱n asndu nixnuʼ. Náa mbiʼi mingíjyúuʼ rúʼko̱, ni̱jkhánú ndi̱yo̱o̱ gajkhun dí á mu naguajunlú jmbu náa Jeobá ikhaa mambáyulú wéñuuʼ”. Biniam ni̱jkha̱nú ndiʼyoo dí Jeobá nindxu̱u̱ anu̱u̱, ga̱jma̱a̱ dí a̱ngiu̱lú ni̱ndxu̱ún bi̱ kúwá náa goʼwóo.

15. Náá numuu dí na̱nguá má nindxu̱u̱ raʼkhí dí mamiñúlúʼ dí makhañúlúʼ rá.

¹⁵ Náa Biblia naʼthí dí nakháñulú nindxu̱u̱ xóo mbáa xa̱bu̱ sia̱nʼ ndrígúlú (1 Cor. 15:25, 26). Dí mundxaʼwamíjná ga̱jma̱a̱ numuu dí makhañúlúʼ naʼni maxmiéjunlú, itháán á mu ikháanʼ o mbáa bi̱ kuʼyáá nandoo kháñuun. Náá numuu dí namíñulú dí makhañúlúʼ rá. Numuu dí Jeobá niʼniáánʼ mu maʼndulú makuwáánʼlú kámuu mbiʼi (Ecl. 3:11). Dí namíñulú makhañúlúʼ nañewu̱nlú. Mbá xkri̱da, rúʼko̱ nambáyulú dí muñewa̱a̱n dí naʼphu̱, mu̱ʼni̱ ejercicio ga̱jma̱a̱ xákuwáanʼ náa gamíi ma̱ngaa mu̱ʼgua̱ náa xa̱bu̱ thana á mu nandoo kháñulú o mu̱ʼphu̱ thana á mu ndayóoʼ.

16. Xú káʼnii ejmuu Gixa̱a̱ dí namíñulú makhañúlúʼ rá.

¹⁶ Gixa̱a̱ ndaʼyoo dí nduʼyamajkuíí rí makuwáanʼ. Ikha jngóo ikhaa naʼthí dí mu̱ʼni̱ asndu ndiéjunʼ má, mú mu̱ʼni̱ kawumíjna̱, asndu dí muniʼñááʼ rambáxulú gajmiúlú Jeobá (Job 2:4, 5). ¡Mú dí naʼthí nindxu̱u̱ minduwaʼ! Numuu dí ikhaa “ma̱ngoo maʼni rí makhañúlúʼ”, ikha jngóo najmuu dí namíñulú mu xúʼko̱ xúguajun jmbu náa Jeobá (Heb. 2:14, 15). Nguáná, Gixa̱a̱ najmiuu xa̱bu̱ mu xúʼko̱ munimiñúlú, muthulú dí á mu tseniʼñáán ru̱ʼni̱ ñajuunʼ Jeobá muradiáanʼlú ma̱ngaa najmuu dí nandoo kháñulúʼ mú xúʼko̱ xúguajun jmbu náa Jeobá. Nguáná médico o bi̱ kuʼñúún bi̱ na̱nguá ni̱ndxu̱ún Testigo nutsudánʼlú muta̱ʼa̱áʼ eʼdi, rúʼko̱ nindxu̱u̱ mbá dí nanújngorámuʼ xtángoo. O muthulú dí mutha̱ʼa̱áʼ i̱ʼwáʼ thana dí nanújngorámuuʼ ikha dí na̱ʼkha̱ náa Biblia.

17. Xó má eʼthí Romanos 8:37-39, náá numuu dí ragíʼmaa mamiñúlúʼ dí makhañúlúʼ rá.

¹⁷ Gajkhun má nimbáa dí ikháanʼ tsíyoo makhañúu, mú nduʼyáá dí á mu nakháñulú Jeobá ma̱ndoo kaʼyulú má xúʼko̱ (atraxnuu Romanos 8:37-39). Índo̱ nakháñún bi̱ nambájxu̱u̱ gajmíi̱n Jeobá, ikhaa narmáʼáan a̱jkiu̱u̱n kaʼñún má xúʼko̱ asndu xóo káʼníí kúwá ruya (Luc. 20:37, 38). Ikhaa nandoo maʼni ga̱bi̱ín (Job 14:15). Jeobá asndu nixnajxíi a̱ʼdióo mu makhañúu mu xúʼko̱ makuwáánʼlú kámuu mbiʼi (Juan 3:16). Nduʼyáá gajkhun nguáthá e̱ndoo kaʼyulú ga̱jma̱a̱ nañewu̱nlú. Ikha jngóo, índo̱ nandoo khañunlú o nutulúʼ dí muradiáánʼ, tséniʼñáánʼlú. Rí phú nu̱ʼni̱ nuʼtháán ikhaa mu maʼni̱i̱ a̱jkiu̱lú, maxnúlú ku̱ma̱ ga̱jma̱a̱ tsiakii. Rúʼko̱ dí niʼni Valeria ga̱jma̱a̱ ajmbio̱o̱ (Sal. 41:3).

18. Ndiéjunʼ eʼsngáaʼ xkri̱doo Valeria rá.

¹⁸ Valeria nitháán dí gíʼdoo mbóoʼ cáncer rí na̱nguá ejmaʼnuunʼ ga̱jma̱a̱ mbiiʼ wéñuuʼ índo̱ ikhaa gíʼdoo 35 tsiguuʼ. Guʼyááʼ xóo kaʼnii dí nandoo kaʼyoo Jeobá nimbáyúu mu xúʼko̱ xámíñuu dí makhañúu. Ikhaa naʼthí: “Índo̱ nithu̱nʼ dí gúʼdoo nandii rúʼko̱, mbá nacha̱ nixtiʼkhuu xóo kuwáanʼxu̱. I̱ndó dí ma̱ndoo ma̱ni̱ ni̱ndxu̱u̱ dí mañuu operar minaʼ. Ni̱jkhá gáñu̱u̱n mbaʼiin xa̱bu̱ thana, mú, nimbáa tándoo gáʼñúnʼ operar numuu rí tsíyóʼ gajmuʼ eʼdi. Ra̱ʼkhá tháán nimíñúʼ, mú,  ga̱jma̱a̱ numuu rí nandoʼ manimbo̱ʼ ka̱yo̱o̱ Dios, ¡xániʼñami̱na̱ʼ dí mata̱ʼa̱a̱ʼ eʼdi! Náa xúgíʼ mbiʼi rí nixtáá Jeobá nisngájmuʼ rí nandoo kaʼyoʼ..., rí xúgi̱ ikhúún ndayóoʼ masngajmúu rí nandoʼ ka̱yo̱o̱. Mámbá índo̱ nuthu̱nʼ dí xámbáyúʼ, nda̱ya̱a̱ itháán tsiakii mú xúʼko̱ xániʼñúuʼ maʼni dí nandoo Gixa̱a̱. Nindoʼ dí Jeobá maʼdxuu ga̱jma̱a̱ nindxu̱ʼ. Nda̱wa̱á nindoo niniuʼ operar ga̱jma̱a̱ tájmuʼ má eʼdi, xúgíʼ nigájnuu májánʼ. Kaʼníí xtáá rani̱ mínaʼ má xúʼko̱ gajmuʼ i̱ʼwáʼ nandii, mú Jeobá naxnúxu̱ má xúʼko̱ rí ndayúxuʼ. Mbá xkri̱da, mbá xmáná wapháá nákha xóó tséthu̱nʼ dí gúʼdoo cáncer, ninigajma̱a̱xu̱ náa reunión mbá artículo dí mbiʼyuu ‹Afrontemos con valentía los golpes de la vida›. * Rúʼko̱ rí phú ndiyúxu, mbaʼa nuthu nitangaánʼ nirajxnúu̱nxu. Artículo xóo rígi̱, ma̱ngaa dí ninigajma̱a̱xu̱ má xúʼko̱, nimbáyúxu mú xámiñúnxuʼ ga̱jma̱a̱ mbu̱ya̱a̱xu̱ awáanʼ ma̱ngaa rúʼko̱ nimbáyúxu muraʼwi̱i̱ májánʼ dí munixu̱ʼ”.

19. Ndiéjunʼ dí nánguá má mba̱yu̱u̱ʼ maʼni Jeobá rá.

¹⁹ Náa xúgíʼ numbaaʼ Jeobá nimbáñún mbaʼiin a̱ngiu̱lú muraʼníí xkujndu gakhi̱i̱ ga̱jma̱a̱ niʼngu̱u̱n niguájun jthi̱i̱n Gixa̱a̱ (1 Ped. 5:8, 9). Ikháán maʼnga̱a̱ʼ mangáán matani̱. Nánguá má mba̱yu̱u̱ʼ dí Jeobá maʼthúu̱n Jesús ma̱ngaa bi̱ maʼtáñajunʼ gajmíi̱n dí ni̱jkha̱nú má mbiʼi ‹muni̱ gámbáa ñajunʼ rí naʼni Gixa̱a̱› (1 Juan 3:8). Nda̱wa̱á, xa̱bi̱i̱ Dios bi̱ kúwá náa tsu̱du̱u̱ ku̱ba̱ʼ mbuyáá xóo káʼnii gámbánuu kiʼtáriyaʼ rígi̱: ‹Ndimbá nda̱a̱ dí gáʼni mamiñún› (Is. 54:14; Miq. 4:4). Nákha xóo kúwáanʼ ruguaʼthi̱i̱n mbiʼi rúʼko̱, xúgi̱ gu̱ʼni̱ mbá tsiakii mu xámiñulú.

20. Ndiéjunʼ gámbáyulú mú xámiñulúʼ rá.

²⁰ Ndayóoʼ makumulúʼ kuʼyáá itháan Jeobá dí ikhaa nandoo kaʼyulú ga̱jma̱a̱ nañewu̱nlú. Ndiéjunʼ gámbáyulú rá. Dí mundxaʼwamíjna̱ xú káʼnii Jeobá niñewu̱u̱n xa̱bi̱i̱ ma̱ngaa dí muʼthúún ga̱jma̱a̱ numuu rúʼko̱ eʼwíinʼ. Ga̱jma̱a̱ garmáʼáan a̱jkiu̱lú xú káʼnii ikhaa nimbáyulúʼ índo̱ niraʼníí mbá xkujndu dí niʼni maxmiéjunlú wéñuuʼ. Jeobá má gámbáyulú mu maʼngulú mu̱ʼni̱ gajmiúlú dí namíñulú (Sal. 34:4).