1. Ndiéjunʼ gándoo mambáyulú mu muʼni má xúʼko̱ ñajunʼ ndrígóo Jeobá maski ajndu nuraʼníí mbaʼa xkujndu rá.

 NÁA Biblia naʼthí dí mbiʼi rí kuwáanʼlu “maʼni gakhi̱i̱ ga̱jma̱a̱ maʼni mingíjyúuʼ rí maʼngulú” (2 Tim. 3:1). Náa numbaaʼ rígi̱, xúgíinʼ guáʼdáá xkujndu, mú, ikháánʼ ma̱ngaa gíʼmaa muraʼníí dí muxkulú ga̱jma̱a̱ dí mawiñu̱u̱nʼ kuyulú. Ndiéjunʼ gándoo gámbáyulú mu muʼni má xúʼko̱ ñajunʼ ndrígóo Jeobá maski ajndu nuraʼníí rígi̱ rá. Mbá dí ma̱ndoo mambáyulú nindxu̱u̱ rí mbuʼyáá dí Jeobá “nindxu̱u̱ Dios bi̱ ndaʼya” (Jer. 10:10; 2 Tim. 1:12).

2. Ndiéjunʼ eʼyáá ga̱jma̱a̱ numuu Jeobá dí naxnáaʼlú tsiaki̱i̱ rá.

² Jeobá gajkhun xtáa. Ikhaa nambáyulú índo̱ nuraʼníí xkujndu ga̱jma̱a̱ ndayáaʼ xóo mambáyulú (2 Crón. 16:9; Sal. 23:4). Makánáaʼlú tsiaki̱i̱ mu maʼngulú muraʼníí asndu ndiéjunʼ má xkujndu á mu ikháanʼ nduʼyáá rí Dios gajkhun ndaʼya. Guʼyáá xú káʼnii nisngájmaa rígi̱ xkri̱doo rey David.

3. Ndiéjunʼ nindoo gáʼthí David índo̱ niʼthí “Jeobá ndaʼya” rá.

³ David nininiiʼ májánʼ Jeobá ga̱jma̱a̱ nikumu̱u̱ kaʼyoo. Nindoʼoo dí mambáyúu índo̱ rey Saúl ga̱jma̱a̱ eʼwíinʼ nikúwá ruxkáá (Sal. 18:6). Índo̱ David ndiʼyoo rí Jeobá niriʼña̱a̱ xóo niʼtájkáan ga̱jma̱a̱ niʼni kríyaaʼ, ikhaa niʼthí: “¡Jeobá ndaʼya!” (Sal. 18:46). “Ndiéjunʼ nindoo gáʼthí David rá.” Mbá i̱yi̱i̱ʼ dí na̱ʼkha̱ raʼthí ga̱jma̱a̱ numuu versículo rígi̱, eʼthí: “nisngájmaa dí naku̱mu̱u̱ kaʼyoo dí Jeobá nindxu̱u̱ Dios bi̱ gajkhun, rí nambáyúu  xuajñuu má xúʼko̱”. David ndiʼyoo rí Jeobá xtáa raʼyoo dí nagíʼnuu ga̱jma̱a̱ xtáa xawii mambáyúu, rígi̱ nixnáa tsiaki̱i̱ David mu maʼni má xúʼko̱ ñajuunʼ ga̱jma̱a̱ maʼni mba̱a̱ (Sal. 18:​28, 29, 49).

4. Xú káʼnii embáyulú rí maʼni kañiiʼ a̱jkiu̱lú dí Jeobá nindxu̱u̱ Dios bi̱ ndaʼya rá.

⁴ Rí maʼni kañiiʼ a̱jkiu̱lú dí Jeobá nindxu̱u̱ Dios bi̱ ndaʼya, mambáyulú mu muʼni ñajunʼ ndrígóo ga̱jma̱a̱ gagi, maxnúlú tsiaki̱i̱ mu maʼngulú muraʼníí asndu ndiéjunʼ má xkujndu ga̱jma̱a̱ maxkajxáánʼ muñajunʼ gakhii ga̱jma̱a̱ numuu ikhaa ma̱ngaa maʼni rí nditháan xáʼndulú muniʼñááʼ mambájxulú gajmiúlú ikhaa.

DIOS BI̱ NDAʼYA MAXNÁʼ TSIAKI̱I̱

5. Ndiéjunʼ embáyulú mu maʼngulú muraʼníí xkujndu rá. (Filipenses 4:13.)

⁵ Tséʼniuu má nguáthá mba̱a̱ mbá xkujndu, maʼngulú muraʼníí á mu narmáʼáan a̱jkiu̱lú rí Jeobá, bi̱ ndaʼya xtáa mu mambáyulú. Numuu dí nda̱a̱ gamiéjunʼ rí Jeobá mbaʼyoo mba̱a̱. Ikhaa nindxu̱u̱ Dios bi̱ gíʼdoo xúgíʼ tsiaki̱i̱ ga̱jma̱a̱ ikhaa ma̱ndoo maxnúlú tsiaki̱i̱ mu maʼngulú muraʼníí asndu ndiéjunʼ má (atraxnuu Filipenses 4:13). Ikha jngóo nduʼyáá dí gajkhun maʼngulú muraʼníí xkujndu. Índo̱ nduʼyáá rí Jeobá nambáyulú ga̱jma̱a̱ xkujndu dí itháan majkhiinʼ, naʼni kañiiʼ a̱jkiu̱lú dí ma̱ngaa má mambáyulú ga̱jma̱a̱ xkujndu rí itháan mba̱ʼu̱.

6. Ndiéjunʼ dí niraʼnuu David rí nimbáyúu mu maku̱mu̱u̱ kaʼyoo itháan Jeobá rá.

⁶ Guʼyáá a̱jma̱ xkri̱da xú káʼnii David nixtáa ga̱jma̱a̱ ndiéjunʼ nimbáyúu mu maku̱mu̱u̱ kaʼyoo itháan Jeobá. Índo̱ nindxu̱u̱ xóó ndxáma̱á bi̱ nañewu̱u̱n mugu̱, ni̱ʼkha̱ mbáa león ga̱jma̱a̱ nijkha kayáa mugiu̱u̱ anu̱u̱ ga̱jma̱a̱ i̱mba̱ míʼtsú ni̱ʼkha̱ mbáa oso nijkha kayáa mugiu̱u̱. A̱jma̱ nuthu rígi̱ niʼniminaʼ gajmíi̱n ga̱jma̱a̱ niʼnikríñiinʼ mugu̱. Ikhaa na̱nguá niʼnimbamínáʼ numuu rí ndiʼyoo dí Jeobá nixnúu tsiaki̱i̱ mu maʼngo̱o̱ (1 Sam. 17:​34-37). David támbumuu xú káʼnii nixtáa. Índo̱ nindxaʼwámi̱na̱ʼ rígi̱, ikhaa nikumu̱u̱ dí Dios bi̱ ndaʼya mambáyúu má xúʼko̱ nda̱wa̱á.

7. Ndiéjunʼ rí ndiʼyoo David ga̱jma̱a̱ xú káʼnii nimbáyúu rí maʼni rígi̱ rá.

⁷ Índo̱ David nindxu̱u̱ xóó ndxáma̱á ni̱jkha̱ náa gíi̱nʼ soldados israelitas. Ikhí ndiʼñún rí soldados israelitas ra̱ʼkhá tháán emíníiʼ numuu dí Goliat mbáa xa̱bu̱ bi̱ ra̱ʼkhá tháán mba̱yi̱i̱ʼ xtáa raʼthí: “¡Xúgi̱ natsijmiin soldado Israel!” (1 Sam. 17:​10, 11). Soldados ra̱ʼkhá tháán nimíñúún numuu rí i̱ndó ndiyáá dí Goliat mba̱yi̱i̱ʼ ga̱jma̱a̱ dí xtáa raʼthí (1 Sam. 17:​24, 25). Mú David raʼkháa i̱ndó rúʼko̱ ndiʼyoo. Ndiʼyoo rí Goliat xtáa ‹ratsíjmiin soldado ndrígóo Dios bi̱ ndaʼya›, raʼkháa soldados israelitas (1 Sam. 17:26). Ikhaa ndiʼyoo dí itháan gíʼdoo numuu Jeobá. Ndiʼyoo gajkhun rí Dios bi̱ nimbáyúu gajmíi̱n mugu̱, mambáyúu má xúgi̱ ma̱ngaa. Numuu rí nikumu̱u̱ kaʼyoo Jeobá ¡David niʼngo̱o̱ nixmínaʼ ga̱jma̱a̱ Goliat! (1 Sam. 17:​45-51).

8. Ndiéjunʼ gámbáyulú mu mbuʼyáá dí Jeobá gajkhun mambáyulú rá. (Atayáá ma̱ngaa xtiʼkhuu.)

⁸ Xó má David, maʼngulú muraʼníí xkujndu á mu narmáʼáan a̱jkiu̱lú dí Dios bi̱ ndaʼya xtáa xawii mu mambáyulú (Sal. 118:6). Ma̱ndoo maʼni itháán kañiiʼ a̱jkiu̱lú rí Jeobá mambáyulú á mu nundxaʼwamíjna̱ ndiéjunʼ niʼni nákhá ginii. Ma̱ndoo matraxnuu historias dí na̱ʼkha̱ náa Biblia rí mambáyáaʼ marmáʼáan a̱jkia̱a̱nʼ xú káʼnii Jeobá niʼni kríñiinʼ xa̱bi̱i̱ nákhá wajyúuʼ (Is. 37:​17, 33-37). Ma̱ngaa atraxnuu o atayáá rí nagájnuu náa jw.org náa na̱ʼkha̱ xú káʼnii Jeobá xtáa rambáñún xa̱bi̱i̱ xúgi̱. Ga̱jma̱a̱ atagíminaʼ marmáʼáan a̱jkia̱a̱nʼ xú káʼnii Jeobá nimbáyaaʼ ikháán. Mbáa matatsaʼwamínáʼ dí Jeobá táʼni  mbá dí ra̱ʼkhá tháán mitsaanʼ ga̱jma̱a̱ numaaʼ, xóo rí maʼni kríñanʼ náa ñawúunʼ mbáa oso o mbáa león. Mú rígá mbaʼa dí Jeobá niʼni ga̱jma̱a̱ numaaʼ. Ikhaa ni̱ʼkha̱ kañáán mu mambajxáaʼ ga̱jma̱a̱ʼ (Juan 6:44). Núma̱aʼ ma dí ikhaa nambáyaaʼ, ikháán najmáán natani̱ má xúʼko̱ ñajuunʼ. Atanda̱ʼa̱a̱ rí mambáyáaʼ mu marmáʼáan a̱jkia̱a̱nʼ xú káʼnii niriʼña̱a̱ dí niratájkáan, nimbáyaaʼ índo̱ itháán ndiyáaʼ o nixnáʼ tsiaki̱i̱ índo̱ nitraʼníí gamiéjunʼ dí itháán mingíjyúuʼ. Á mu ikháán natatsaʼwáminaʼ xú káʼnii Jeobá nambáyaaʼ ma̱ta̱ya̱a̱ itháán gajkhun dí ikhaa mambáyaaʼ má xúʼko̱.

9. Xú káʼnii gíʼmaa mbuʼyáá gamiéjunʼ ndrígulú rá. (Proverbios 27:11.)

⁹ Á mu ikháanʼ nduʼyáá dí Jeobá nindxu̱u̱ Dios bi̱ ndaʼya, mbuʼyáá xkujndu ndrígulú xó má kaʼyoo. Xú káʼnii rá. Índo̱ nuraʼníí mbá gamiéjunʼ, gíʼmaa mbuʼyáá ndiéjunʼ dí gíʼdoo itháán numuu. Gixa̱a̱ naʼthí dí muniʼñááʼ Jeobá á mu nuraʼníílú xkujndu. Ikha jngóo xóo nuraʼníí xkujndu ma̱ndoo maʼni dí Jeobá maxtáa gagi o maxtáa ngíná (Job 1:​10, 11; atraxnuu Proverbios 27:11). a Ikha jngóo á mu nuguajún jmbu nusngajmá dí nandulúʼ kuʼyáá Jeobá ga̱jma̱a̱ dí Gixa̱a̱ minduwaaʼ. Mbáa náa xtaa, xa̱bu̱ ñajunʼ tsíñún gúyáá xuajñuu Jeobá, mbáa natamíniiʼ ga̱jma̱a̱ numuu mbújkha̱a̱, mbáa, xa̱bu̱ náa naratáraʼa tsénigu̱u̱nʼ ajngáa májánʼ rí najuiʼtáraʼa o xtaa ratamíniiʼ ga̱jma̱a̱ i̱ʼwáʼ gamiéjunʼ. Á mu xúʼko̱ kaʼnii, garmáʼáan a̱jkia̱a̱nʼ rí xtaa ratraʼníí ma̱ndoo maʼni dí ikháán matani̱ rí Jeobá maxtáa gagi. Xámbumaaʼ dí ikhaa xániñuuʼ rí matraʼníí mbá dí xáʼnga̱a̱ʼ gátraʼníí (1 Cor. 10:13). Jeobá maxnáʼ tsiaki̱i̱ mu maʼngaaʼ matraʼníí gamiéjunʼ ndrígáaʼ.

DIOS BI̱ NDAʼYA MAʼNI TSAJKURÁMÁANʼ

10. Ndiéjunʼ gáʼni Jeobá ga̱jma̱a̱ numún bi̱ nduyamajkuíí rá.

¹⁰ Jeobá naʼni tsajkurámiinʼ bi̱ nduyamajkuíí (Heb. 11:6). Rí xúgi̱ naʼni dí makuwáanʼ  tsímáá ga̱jma̱a̱ gagi, ga̱jma̱a̱ nda̱wa̱á makuwáanʼ kámuu mbiʼi. Naʼni kañiiʼ a̱jkiu̱lú dí Jeobá nandoo maʼni tsajkurámáanʼ ga̱jma̱a̱ dí ikhaa gíʼdoo tsiaki̱i̱ mu maʼni rígi̱. Ikha jngóo índo̱ nduyamajkuíí, nuxnáá rí itháán dí májánʼ, xó má nini xa̱bi̱i̱ nákhá wajyúuʼ. Rí xúgi̱, guʼyáá dí niʼni Timoteo (Heb. 6:​10-12).

11. Ndiéjunʼ nixkajxi̱i̱ Timoteo mu mañajunʼ gakhii rá. (1 Timoteo 4:10.)

¹¹ (Atraxnuu 1 Timoteo 4:10). Timoteo nigiʼdoo mbá fe gujkhuʼ dí Dios bi̱ ndaʼya maʼni tsajkurámáánʼ. Ikha jngóo niñejunʼ gakhii ga̱jma̱a̱ numuu Jeobá ma̱ngaa ga̱jma̱a̱ numún eʼwíinʼ. Xú káʼnii niʼni rá. Apóstol Pablo nixkajxi̱i̱ mu maʼsngáa itháan májánʼ náa naʼtáraʼa ga̱jma̱a̱ náa congregación ma̱ngaa dí magíiʼ mbá májánʼ xkri̱da náa a̱ngiu̱lú jiámá ga̱jma̱a̱ a̱ngiu̱lú guanii. Pablo ma̱ngaa niʼthúu̱n rí gíʼmaa maxnún consejo bi̱ ndañún, xú káʼnii gíʼmaa maguma, mú gíʼmaa maʼthúún ga̱jma̱a̱ ngajua (1 Tim. 4:​11-16; 2 Tim. 4:​1-5). Nguáná eʼwíinʼ na̱nguá eyáá ñajunʼ dí naʼni Timoteo o na̱nguá exna̱a̱ núma̱aʼ, mú ikhaa ma̱ndoo mbaʼyoo gajkhun dí Jeobá maʼni tsajkurámaanʼ (Rom. 2:​6, 7).

12. Ndiéjunʼ ma̱ndoo maxkajxi̱i̱n a̱ngiu̱lú bi̱ kuya̱ edxu̱u̱ mu muni má xúʼko̱ ñajunʼ ndrígún rá. (Atayáá ma̱ngaa xtiʼkhuu.)

¹² Rí mbiʼi xúgi̱, ikhaa ma xóo Timoteo, bi̱ kuya̱ edxu̱u̱ ma̱ndoo mbuyáá gajkhun rí Jeobá ndaʼyoo ga̱jma̱a̱ nangajo̱o̱ xóo májánʼ eni̱ ñajunʼ ndrígún. Ikhiin nuxnún tsiakii a̱ngiu̱lú náa congregación, nusngáa, nutaraʼa, ma̱ngaa tikhuun a̱ngiu̱lú nuñambáá náa naguma guʼwá náa nagimba̱ánʼ ga̱jma̱a̱ numbañún eʼwíinʼ índo̱ narígá mbá gamiéjunʼ eʼwíinʼ nagún ruñún bi̱ naʼniún nandii o kúwíin náa Comité bi̱ Nuyambáá náa Hospitales. Bi̱ kuya̱ edxu̱u̱ nduyáá rí a̱ngiu̱lú kaʼñún Jeobá raʼkháa mbáa xa̱bu̱. Ikha jngóo nuni ga̱jma̱a̱ xúgíʼ a̱jkiu̱ún ñajunʼ rí nakánún ga̱jma̱a̱ nduyáá rí Jeobá maʼni tsajkurámiinʼ (Col. 3:​23, 24).

13. Xú káʼni eʼyoo Jeobá dí nuʼni ga̱jma̱a̱ numuu rá.

 ¹³ Raʼkháa mbá xúgiáanʼ ma̱ndoo manindxu̱lú mbáa bi̱ kayá edxu̱u̱, mú xúgiáanʼ ma̱ndoo muxná Jeobá rí itháán májánʼ dí kuaʼdáá. Ikhaa nadxuu índo̱ nuʼni xúgíʼ rí naʼngo̱o̱ muʼnilú. Xóo rí mbújkha̱a̱ dí nuxnálú náa obra mundial maski ajndu na̱nguá mba̱a̱. Jeobá nadxuu índo̱ nuʼni tsiakimíjna̱ muxujxí ñawúnlú maski ajndu namíñulú ga̱jma̱a̱ nadxuu índo̱ nuʼni mba̱a̱ a̱jkiu̱lú. Garmáʼáan a̱jkia̱a̱nʼ dí Jeobá nangajo̱o̱ rí naʼngo̱o̱ natani̱, maski ajndu naku̱ma̱a̱ʼ dí tséʼngo̱o̱ gátani̱ xó má eyaaʼ ikháán. Ikhaa nandoo kaʼyaaʼ ga̱jma̱a̱ maʼni tsajkurámáánʼ (Luc. 21:​1-4).

GAKUWÁÁNʼLÚ MIJNGII NÁA DIOS BI̱ NDAʼYA

14. Ndíjkha nuʼthá dí á mu nakuwáánʼ mijngii náa Jeobá nambáyulú mu muguajún jmbu rá. (Atayáá ma̱ngaa xtiʼkhuu.)

¹⁴ Á mu nduʼyáá rí gajkhun xtáa Jeobá, xáʼniulú mingíjyúuʼ muguajúnlu jmbu. Xúʼko̱ nigíʼnuu José, ikhaa niʼni gaʼduunʼ maʼni mbá aʼkhá jmbii. Numuu rí ndiʼyoo dí Jeobá naxmiéjunʼ dí gáraʼwíí maʼni (Gén. 39:9). Mu mambájxulú itháán májánʼ gajmiúlú Jeobá, gíʼmaa muríyaaʼ mbiʼi mu muʼtákáñiinʼ ga̱jma̱a̱ muʼnigajmaa Ajngá rawuunʼ. Á mu nambájxulú májánʼ gajmiúlú Jeobá xó má José, xúʼni̱ nimbá dí tsénigu̱u̱ʼ ikhaa (Sant. 4:8).

15. Ndiéjunʼ eʼsngúlú xkridún israelitas índo̱ nikúwíin náa ku̱ba̱ʼ mijxooʼ rá. (Hebreos 3:12.)

¹⁵ Bi̱ nambumún dí xtáa Jeobá, ma̱ndoo maʼga̱nú mbiʼi dí xáʼniuu miʼskhoo mu̱ni̱ tsíngumijná náa ikhaa. Gundxaʼwamíjna̱ dí nigíʼnúú israelitas índo̱ nikúwíin náa ku̱ba̱ʼ mijxooʼ. Ikhiin nduyáá má dí xtáa Jeobá, mú niguáʼdiin nini a̱jma̱ a̱jkiu̱ún á mu ikhaa maxnún dí nda̱ñúnʼ, asndu niraximíjna̱: “Lá xtáa Jeobá náa ikháanʼxu o na̱nguá dxe̱ʼ.” (Éx. 17:​2, 7.) Ikha jngóo ikhiin nixujximíjna̱ náa Dios. Ikháánʼ tsíyulú muʼni xóo nini̱ ikhiin (atraxnuu Hebreos 3:12).

16. Ndiéjunʼ ma̱ndoo maʼni dí majkhá guabaaʼ fe ndrígulú rá.

¹⁶ Numbaaʼ rígi̱ naʼni rí maʼni mingíjyúuʼ  makuwáanʼ mijngii náa Jeobá. Mbaʼin xa̱bu̱ nuthi dí Dios ndáwaa ga̱jma̱a̱ nakujmaa dí ikhiin kúwíin itháan májánʼ, rígi̱ gamíi maʼni guabaaʼ fe ndrígulú, maski ajndu nakumulú dí Dios xtáa, mú gamíi maʼni a̱jma̱ a̱jkiu̱lú á mu ikhaa mambáyulú. Ikhaa kayuuʼ nigíʼnuu bi̱ niʼnirámáʼ Salmo 73. Ndiʼyoo dí maski ajndu xa̱bu̱ nanújngurámúnʼ xtángoo ndrígóo Dios, nakúwá má májánʼ, rúʼko̱ niʼni dí marajximínáʼ á mu gíʼdoo numuu rí maʼni ñajuunʼ Jeobá (Sal. 73:​11-13).

17. Ndiéjunʼ gámbáyulú mu makuwáanʼ mijngii náa Jeobá rá.

¹⁷ Ndiéjunʼ nimbáyúu salmista mu mariʼkhuu xóo nindxa̱ʼwáminaʼ rá. Rí mandxaʼwáminaʼ ndiéjunʼ gagíʼnún bi̱ nambumún kuyáá Jeobá (Sal. 73:​18, 19, 27). Ma̱ngaa nindxa̱ʼwáminaʼ xú káʼnii gámbáyúu dí maʼni ñajuunʼ Jeobá (Sal. 73:24). Mangáanʼ ma̱ndoo mundxaʼwamíjna̱ ga̱jma̱a̱ xúgíʼ xóo eʼni tsajkurámáanʼ Jeobá ga̱jma̱a̱ muʼni mbríguíi xú káʼnii gákuwáanʼ á mu turaʼwíi muʼni ñajuunʼ. Rígi̱ mambáyulú mu maʼndulú muguajún má xúʼko̱ jmbu náa Jeobá ga̱jma̱a̱ muʼthá ikháá ma kayuuʼ dí niʼthá bi̱ niʼnirámáʼ salmo: “Ikhúún ra̱ʼkhá tháán májánʼ rí maʼgá kanuu náa Dios” (Sal. 73:28).

18. Ndíjkha rí na̱nguá gíʼmaa mamiñúlúʼ dí gáʼkha̱ nda̱wa̱á rá.

¹⁸ Ma̱ndoo muraʼníí asndu ndiéjunʼ má gamiéjunʼ náa iwáá mbiʼi rígi̱ numuu rí ‹nindxu̱lú ñumbáá ndrígóo mbáa Dios bi̱ ndaʼya ga̱jma̱a̱ bi̱ gajkuwiin› (1 Tes. 1:9).Jeobá gajkhun xtáa ga̱jma̱a̱ naxmiéjuunʼ eʼni̱ ga̱jma̱a̱ maxtáa má xúʼko̱ mu mambáyulú, niʼni má nákhá wajyúuʼ ga̱jma̱a̱ numún xa̱bi̱i̱ ga̱jma̱a̱ maʼni má mbiʼi xúgi̱. Inu má magi̱ʼdu̱u̱ má phú mba̱a̱ gaʼkhu, mú xákuwáanʼlú ndajkuáanʼ (Is. 41:10). “Ikha jngóo ma̱ndoo muʼthá ga̱jma̱a̱ xúgíʼ a̱jkiu̱lú: ‹Jeobá nindxu̱u̱ bi̱ nambáyuʼ. Xámiñuʼ›” (Heb. 13:​5, 6).