Ndayóoʼ muguaʼdáá fe mu maʼdxuu a̱jkiu̱u̱n Jeobá. Mú náa Biblia naʼthí “dí raʼkháa xúgíinʼ guáʼdáá fe” (2 Tes. 3:2). Índo̱ apóstol Pablo niʼnirámáʼ ajngáa rígi̱, nindoo gáʼthí ga̱jma̱a̱ numún xa̱bu̱ sia̱nʼ ndrígóo, “xa̱bu̱ bi̱ ra̱ʼkhá tháán mixkawi̱i̱nʼ” náa ndiyóoʼ maʼni kríyamínáʼ. Mú, dí niʼthí ga̱jma̱a̱ numuu fe na̱jkha̱ inún mbaʼin xa̱bu̱. Mbá xkri̱da, mbaʼin xa̱bu̱ tsénimbu̱u̱n dí xtáa mbáa Dios bi̱ niʼniwíi xúgíʼ dí rígá (Rom. 1:20). Ga̱jma̱a̱ eʼwíinʼ tsíñún gúthi rí xtáa mbáa bi̱ itháán mba̱a̱ ki xóo xa̱bu̱ numbaaʼ. Mú, raʼkháa fe rígi̱ nindxu̱u̱ dí gajkhun dí na̱ndu̱ʼu̱lú maguáʼdáá Jeobá.

Mu Dios magruiguáanʼ ndayóoʼ mbuʼyáá gajkhun rí ikhaa xtáa ga̱jma̱a̱ rí naʼni numi̱ín bi̱ guáʼdáá mbá fe gujkhuʼ (Heb. 11:6). Ga̱jma̱a̱ fe nindxu̱u̱ mbá cualidad rí na̱ʼkha̱ náa espíritu santo. Ikha jngóo, á mu nandulúʼ mudrigú espíritu rúʼko̱, gíʼmaa muʼtákáñii Jeobá rí maxnúlúʼ (Luc. 11:​9, 10, 13). Ma̱ngaa gíʼdoo numuu rí muraxnuu Biblia, Ajngáa rawuunʼ rí ikhaa niʼni rí magumaraʼmáʼ ga̱jma̱a̱ espíritu santo ndrígóo, ga̱jma̱a̱ nda̱wa̱á gundxaʼwámíjná ga̱jma̱a̱ numuu rí niraxnuu ma̱ngaa guʼgíʼ muʼni rí nijmañulúʼ. Ikhú, espíritu santo ma̱ndoo marigá náa ikháanʼlú ga̱jma̱a̱ mambáyulú muguaʼdáá mbá fe rí manigu̱u̱ʼ Jeobá.