Graxe̱ rí nuni bi̱ nuraxnuu
Salmo 12:7 naʼthí: “Ikháán matie̱wu̱u̱n”. Ndiéjunʼ eyoo gáʼthúu̱n ajngáa rígi̱ rá. Ga̱jma̱a̱ numún “xa̱bu̱ bi̱ numíníiʼ” (versículo 5) o ga̱jma̱a̱ numuu “ajngóo Jeobá” dxe̱ʼ. (Versículo 6.)
Náa mbá xúgíʼ rí na̱ʼkha̱ nasngájmaa rí naʼthí ga̱jma̱a̱ numún xa̱bu̱.
Salmo 12:1-4 naʼthí rí “ni ndáwi̱i̱n xa̱bu̱ jmbiin náa xa̱bu̱ numbaaʼ”. Rí xúgi̱, guʼyáá versículos náa na̱ʼkha̱ raʼthí ga̱jma̱a̱ numuu grajxe̱: Salmo 12:5-7.
“‹Ga̱jma̱a̱ numuu rí naguma ngíníi xa̱bu̱ bi̱ numíníiʼ,
ga̱jma̱a̱ numuu rí natsíná a̱jkiu̱ún xa̱bu̱ bi̱ ngíníi,
matu̱jxu̱ʼ ga̱jma̱a̱ manimbánuu numún›, eʼthí Jeobá.
“Ma̱ni̱ káwíin náa xa̱bu̱ bi̱ nuni̱ ngíníi”.
Ajngóo Jeobá nindxu̱u̱ kaʼwu,
xóo plata rí niguma kaʼwi̱i̱ náa mbá horno rí niguma ga̱jma̱a̱ ku̱ba̱ʼ, niguma kaʼwi̱i̱ mbá juwan nuthu.
Tátá Jeobá, ikháán matie̱wu̱u̱n,
ikháán matiewa̱a̱n mámbáa rí ikhiin, xa̱bu̱ bugi̱ ga̱jma̱a̱ xa̱bu̱ bi̱ gákúwá nda̱wa̱á”.
Náa versículo 5 naʼthí ga̱jma̱a̱ numuu rí Dios maʼni ga̱jma̱a̱ numún “xa̱bu̱ bi̱ numíníiʼ”: Ikhaa maʼni káwíin.
Náa versículo 6 naʼthí: “Ajngóo Jeobá nindxu̱u̱ kaʼwu, xóo plata rí niguma kaʼwi̱i̱”. Ajngáa rígi̱ nasngájma xóo kumulúʼ bi̱ nindxu̱lú cristianos ga̱jma̱a̱ numuu Ajngá rawuunʼ Jeobá (Sal. 18:30; 119:140).
Rí xúgi̱ gúʼyáá Salmo 12:7: “Tátá Jeobá, ikháán matie̱wu̱u̱n, ikháán matiewa̱a̱n mámbáa rí ikhiin, xa̱bu̱ bugi̱ ga̱jma̱a̱ xa̱bu̱ bi̱ gákúwá nda̱wa̱á”. Ndiéjunʼ eyoo gaʼthí índo̱ naʼthí, ikhiin, xá.
Numuu rí náa versículo 6 na̱ʼkha̱ raʼthí ga̱jma̱a̱ numuu “Ajngóo Jeobá”, mbáa tikhuun mundxaʼwamíjná rí náa versículo 7 índo̱ naʼthí ikhiin nandoo gaʼthí ikháá má ga̱jma̱a̱ numuu ajngóo Jeobá. Nduʼyáá rí Dios niñewu̱u̱n Biblia náa mbaʼin xa̱bu̱ sia̱nʼ bi̱ nindúún munigámbáa (Is. 40:8; 1 Ped. 1:25).
Mú gajkhun má rí ma̱ngaa nañewu̱u̱n xa̱bu̱, xó má naʼthí náa versículo 5. Jeobá nimbáñún ga̱jma̱a̱ niʼni káwíin “xa̱bu̱ bi̱ numíníiʼ” ga̱jma̱a̱ numuu rí naguma ngíníi ga̱jma̱a̱ maʼni káwíin má xúʼko̱ (Job 36:15; Sal. 6:4; 31:1, 2; 54:7; 145:20).
Ikha jngóo, ndiéjunʼ eyoo gaʼthí ajngáa ikhiin dí naʼthí náa versículo 7 rá.
Náa versículo rígi̱ naʼni makru̱ʼu̱lú rí naʼthí ga̱jma̱a̱ numún xa̱bu̱.
Salmo 12:1, 2 naʼthí rí nikúwíin mbaʼin xa̱bu̱ bi̱ nuni̱ nduwiinʼ xa̱bu̱ jmbiin. Nda̱wa̱á naʼthí rí Jeobá maʼni gámbíin xa̱bu̱ bi̱ nuthi dí raʼkhí. Náa Salmo naʼni mbuʼyáá rí Jeobá maʼni káwíin xa̱bu̱ xuajñuu numuu rí ajngóo nindxu̱u̱ kaʼwu.
Ikha jngóo, índo̱ náa versículo 7 naʼthí: “Ikháán matie̱wu̱u̱n” ga̱jma̱a̱ “ikháán matiewa̱a̱n mámbáa rí ikhiin”, nandoo gáʼthí ga̱jma̱a̱ numún xa̱bu̱ bi̱ numíníiʼ enii xa̱bu̱ ramíjíin.
Timbá míʼtsú dí hebreo naʼtájuíi ajngáa “ikháanʼ” náa ajngáa griego, nijmaa a̱jma̱ nuthu náa versículo 7. Ikha jngóo náa Salmo 12:7 (11:8, Septuaginta) nandoo gáʼthúu̱n ga̱jma̱a̱ numún xa̱bu̱ jmbiin bi̱ numíníiʼ. Ma̱ngaa náa versículo 7 ga̱jma̱a̱ 8 naʼthí rí Jeobá mañewu̱u̱n “mámbáa rí ikhiin” náa xa̱bu̱ bi̱ “nuni̱ rí marigá dí ra̱májánʼ” (Sal. 12:7, 8). Náa mbá i̱yi̱ʼ rí nijuiʼtájuíi náa ajngáa arameo, náa versículo 7 naʼthí: “Ikháán, oh Señor, matie̱wu̱u̱n bi̱ jmbiin, ikháán matie̱wu̱u̱n náa bi̱ nuni̱ dí ra̱májánʼ asndu kámuu. Xa̱bu̱ ra̱míjínʼ jngruigu̱u̱n náa mbájndi xóo ñe̱e̱nʼ o tsíʼkhá (sanguijuela) bi̱ naʼwa̱a̱n eʼdiún e̱jñu̱ún xa̱bu̱”. Xúgíʼ rígi̱ nasngájma rí Salmo 12:7 tséʼkha̱ raʼthí ga̱jma̱a̱ numuu ajngáa rawuunʼ Dios.
Ikha jngóo, náa versículo rígi̱ naxnún mbá rí muguaʼthi̱i̱n “bi̱ jmbiin”, rí Dios maʼni mbá rí májánʼ ga̱jma̱a̱ numún ikhiin.
