1, 2. Náá numuu rí bi̱ kuya̱ edxu̱u̱ ma̱ndoo mambáñún xkri̱da ndrígóo Pablo rá.

 APÓSTOL Pablo nindoo kaʼñún wéñuuʼ a̱ngui̱i̱n, ikhaa jngóo niʼni asndu xó má eʼngo̱o̱ mu mambáñún (Hech. 20:31). Ikhaa rúʼko̱ numuu rí mangiin nindúún kuyáá wéñuuʼ. Mbá xkri̱da, mbóo mbiʼi índo̱ bi̱ kuya̱ edxu̱u̱ náa Éfeso nidxawíín rí ní xátangi̱i̱n mbuyáá, “xúgíinʼ nimbi̱ya̱ʼ” (Hech. 20:37). Xúʼko̱ má kayuuʼ a̱ngiu̱lú bi̱ kuya̱ edxu̱u̱ rí mbiʼi xúgi̱ nandún kuñún a̱ngiu̱ún ga̱jma̱a̱ nuni̱ asndu xó má eʼngo̱o̱ mu mumbañún (Filip. 2:16, 17). Mú mangiin nguáná nuraʼníí dí naʼniún mingíjyúuʼ. Ndiéjunʼ gándoo gámbáñún xá.

² A̱ngiu̱lú bi̱ kuya̱ edxu̱u̱ bi̱ guáʼdáá wéñuuʼ ñajunʼ, májánʼ gáʼni rí mbuyaridáá xkri̱da ndrígóo apóstol Pablo (1 Cor. 11:1). Pablo na̱nguá má nindxu̱u̱ mbáa xa̱bu̱ bi̱ naʼngo̱o̱ naʼni wéñuuʼ, nindxu̱u̱ má mbáa xa̱bu̱ numbaaʼ xó má ikháánʼ bi̱ naʼniminaʼ mu maʼni rí májánʼ (Rom. 7:18-20). Maski má niraʼnuu mbaʼa xkujndu, ikhaa tákánajkooʼ ga̱jma̱a̱ nixtáa má xúʼko̱ gagi. Á mu bi̱ kuya̱ edxu̱u̱ nduyaridáá xkri̱da ndrígóo, ma̱ndoo muni̱ ñajuunʼ Jeobá ga̱jma̱a̱ gagi maski má nuraʼníí xkujndu. Guʼyáá xú káʼnii gándoo gúni̱.

3. Ndiéjunʼ guʼyáá náa artículo rígi̱ ga̱jma̱a̱ ndiéjunʼ gájmañulú rá.

³ Náa artículo rígi̱ mbuʼyáá a̱jkhu̱ enii rí mingíjyúuʼ dí nuraʼníí bi̱ kuya̱ edxu̱u̱: 1) Dí muri̱ya̱ʼ májánʼ awan mutaraʼa ga̱jma̱a̱ muni̱ i̱ʼwáʼ ñajunʼ, 2) mani̱ndxu̱ún báxtúu bi̱ májáanʼ a̱jkiu̱ún, 3) muni̱ gajmiún rí naʼni makiéʼkhún, 4) maʼngo̱o̱ a̱jkiu̱ún náa rí eʼwíinʼ tséʼngu̱u̱n gúni̱. Majmañulú xú káʼnii Pablo niraʼnuu mámbá rígi̱ ga̱jma̱a̱ xú káʼnii bi̱ kuya̱ edxu̱u̱ ma̱ndoo mbuyaridáá xkri̱da ndrígóo.

4. Náá numuu rí bi̱ kuya̱ edxu̱u̱, ma̱ndoo maʼniún mingíjyúuʼ rí mani̱ndxu̱ún mbá májánʼ xkri̱da náa miʼtáraʼa rá.

⁴ Náá numuu rí naʼniún mingíjyúuʼ xá. Numuu rí ikhiin ndayóoʼ mani̱ndxu̱ún mbá májánʼ xkri̱da náa najuiʼtáraʼa, mú ma̱ngaa guáʼdáá i̱ʼwáʼ ñajunʼ rí muni̱. Guʼyáá tikhuu. Nguáná ikhiin ndayóoʼ muxnajxi̱ reunión dí narígá ta̱pha̱ xmáná o muxnajxi̱ rí Najmañulúʼ ga̱jma̱a̱ numuu Biblia náa congregación. Ma̱ngaa guáʼdáá i̱ʼwáʼ dí muxnajxi̱, xóo discurso, ma̱ngaa nuri̱ya̱ʼ mbiʼi mu muniratiin siervos ministeriales ga̱jma̱a̱ dí muxnún tsiakii a̱ngiu̱lú (1 Ped. 5:2). Tikhuun a̱ngiu̱lú bi̱ kuya̱ edxu̱u̱ nuñambáá náa naguma o náa naguma májáanʼ Guʼwá náa nagimbáanʼ ga̱jma̱a̱ i̱ʼwáʼ guʼwá dí najmaa mu maguma mba̱a̱ Jeobá. Mú ñajunʼ rí itháan gíʼdoo numuu rí guáʼdáá bi̱ kuya̱ edxu̱u̱ ikhaa nindxu̱u̱ dí mutaraʼa, mbá rí kaʼñún má muni̱ xúgíinʼ publicadores (Mat. 28:19, 20).

5. Ndiéjunʼ xkri̱da nigíʼ Pablo rí xóo gíʼmaa miʼtáraʼa rá.

⁵ Xkridoo Pablo. Náa Filipenses 1:10 nuxkamaa náá numuu rí Pablo ninindxu̱u̱ mbáa xa̱bu̱ bi̱ niʼtáráʼa májánʼ wéñuuʼ. Ikhí naʼthúlú consejo rígi̱: Gíʼmaa “mbu̱ya̱a̱la ndiéjuunʼ dí itháan gíʼdoo numuu”. Ikhaa mina̱a̱ʼ niʼnimbánuu consejo rígi̱. Ikhaa nijuixnájxi̱i̱ mbá ñajunʼ rí maʼtáraʼa ga̱jma̱a̱ ndiʼyoo dí ñajunʼ rígi̱ gíʼdoo itháan numuu náa vida ndrígóo, niʼni ñajunʼ rígi̱ mba̱yu̱u̱ʼ tsiguʼ. Niʼtáráʼa “náa inún mbaʼin xa̱bu̱ ga̱jma̱a̱ náa mámbá guʼwá” (Hech. 20:20). Raʼkháa i̱ndó niʼtáráʼa nguáthá hora o mbóó mbiʼi mbá xmáná. Ikhaa niʼtáráʼa má xúʼko̱ asndu náá má kaʼnii maʼtáraʼa. Mbá xkri̱da, mbóo mbiʼi índo̱ ikhaa xtáa ragi̱ʼtu̱u̱n a̱ngui̱i̱n náa Atenas, nigíʼdu̱u̱ niʼtárúʼún mbá nguéjmi̱i̱n xa̱bu̱ bi̱ guáʼdáá numún bi̱ kúwá ikhí ga̱jma̱a̱ mbaʼiin dí ikhiin ninigu̱u̱nʼ nidxawíín (Hech. 17:16, 17, 34). Ma̱ngaa índo̱ nixtáa náa guʼwá e̱jua̱nʼ náa mbá guʼwá katiʼñáá, niʼni tsiakimínáʼ rí maʼtárúʼún xúgíinʼ bi̱ nagún ruyáá (Hech. 28:16-24; Filip. 1:13, 14).

6. Xú káʼnii Pablo niʼniratiin tikhuun a̱ngiu̱lú rá.

⁶ Pablo nijmañuu majmuu mbiʼi. Ikhaa niguʼwuun rí maʼga kagui̱i̱n eʼwíinʼ a̱ngiu̱lú náa maʼtáraʼa. Mbá xkri̱da, timbá miʼtsú rí ni̱jkha̱ gáʼtaraʼa ni̱jkha̱ kayáa Juan Marcos, índo̱ ni̱jkha̱ rí maʼni a̱jma̱ nuthu ni̱jkha̱ ga̱jma̱a̱ Timoteo (Hech. 12:25; 16:1-4). Niʼni tsiakimínáʼ mu maʼniratiin májánʼ xa̱bu̱ bugi̱, mu majmiin muri̱ya̱ʼ májánʼ awan náa congregación ma̱ngaa rí mani̱ndxu̱ún míjíinʼ báxtúu ga̱jma̱a̱ rí majmañún musngáa májánʼ (1 Cor. 4:17).

7. Xú káʼnii gándoo bi̱ kuya̱ edxu̱u̱ munimbaníí consejo rí nixná Pablo náa Efesios 6:14, 15 rá.

⁷ Rí najmañulúʼ. Bi̱ kuya̱ edxu̱u̱ ma̱ndoo mbuyaridáá Pablo, raʼkháa i̱ndó náa nutaraʼa mámbá guʼwá ma̱ngaa ma̱ndoo mutaraʼa asndu náá má kaʼnii mutaraʼa (atraxnuu Efesios  6:14, 15). * Mbá xkri̱da, ma̱ndoo mutaraʼa índo̱ nagún gútsi̱, náa nuñajunʼ o á mu kúwá ruñajunʼ náa mbá guʼwá dí narígá náa xuajñuu Jeobá, ma̱ndoo mutaruʼúún bi̱ kúwá mijngii gajmiún o bi̱ nagún kudúún rí ikhiin nutsi̱. Xó má niʼni Pablo, ma̱ndoo majmúún mbiʼi índo̱ kúwá rutaraʼa mu muniratiin eʼwíinʼ, xóo siervos ministeriales.

8. Ndiéjunʼ rí ndayóoʼ maʼni mbáa bi̱ kayá edxu̱u̱ rá.

⁸ Bi̱ kuya̱ edxu̱u̱ awán gíʼmaa majmúún mbiʼi rí muni̱ ñajunʼ dí rígá náa congregación o náa circuito mu xúʼko̱ ma̱ndoo maguaʼdáá mbiʼi mutaraʼa, mu ma̱ndoo muni̱ rígi̱ mbaʼyoo muthi rí xáʼngo̱o̱ gúni̱ tikhuu ñajunʼ. Rí mutajkáan ga̱jma̱a̱ numuu rígi̱, ma̱ndoo mambáñún mbuyáá rí muraʼwi̱i̱ muni̱ mbá ñajunʼ ma̱ndoo maʼni rí xáʼngu̱u̱n gúni̱ ñajunʼ rí itháan gíʼdoo numuu, xóo rí muni̱ gájmaa mbá guʼwíin mambá xmáná, muñambáá náa najuiʼtáraʼa o musngúún e̱jñún mutaraʼa. Tikhuun naʼniún mingíjyúuʼ muthi rí xúni̱ mbá ñajunʼ, mú gíʼmaa mbuyáá rí Jeobá nakro̱ʼo̱o̱ kaʼñún ga̱jma̱a̱ ikhaa nandoo rí awán gúni̱ náa xúgíʼ ñajunʼ.

9. Ndiéjunʼ rí naʼniún mingíjyúuʼ bi̱ kuya̱ edxu̱u̱ índo̱ guáʼdáá wéñuuʼ ñajunʼ rá.

⁹ Náá numuu rí naʼniún mingíjyúuʼ xá. Numuu rí kuwáánʼ náa iwáá mbiʼi, xúgiáanʼ ikháanʼ bi̱ ni̱ndxu̱lú xa̱bi̱i̱ Jeobá nuraʼníí mbaʼa ga̱ʼkhu̱. Ikhaa rúʼko̱ numuu rí xúgiáánʼ ndayúlú rí mumbayulúʼ, muxnulú tsiakii ga̱jma̱a̱ muni̱i̱ a̱jkiu̱lú. Nguáná tikhuun ndayóoʼ rí mumbañún mu xúni̱ dí rakáʼyoo (1 Tes. 5:14). Gajkhun má rí a̱ngiu̱lú bi̱ kuya̱ edxu̱u̱ xáʼngu̱u̱n gúni̱ gámbáa ga̱ʼkhu̱ dí nuraʼníílú. Mú Jeobá nandoo rí muni̱ asndu xó má eʼngu̱u̱n mu muxnún tsiakii ga̱jma̱a̱ muñewu̱u̱n mugiu̱u̱. Ikhiin guáʼdáá wéñuuʼ ñajunʼ, mú xú kaʼnii gándoo muri̱ya̱ʼ mbiʼi mu mumbañún a̱ngiu̱ún xá.

10. Xó má eʼthí náa 1 Tesalonicenses 2:7, xú káʼnii niʼni Pablo gajmíi̱n a̱ngiu̱lú rá.

¹⁰ Xkridoo Pablo. Ikhaa ndiyáʼ má xúʼko̱ xú káʼnii mambáñún ga̱jma̱a̱ maxnún tsiakii a̱ngiu̱lú. Májánʼ gáʼni rí a̱ngiu̱lú bi̱ kuya̱ edxu̱u̱ mbuyaridáá xkri̱da ndrígóo índo̱ gúmbañún a̱ngiu̱lú (atraxnuu 1 Tesalonicenses 2:7). * Pablo nisngájmúún a̱ngiu̱lú rí ikhaa nandoo kaʼñún xúʼko̱ má Jeobá ma̱ngaa (2 Cor. 2:4; Efes. 2:4, 5). Ndiʼñún xóo bi̱ nambájxu̱u̱ gajmíi̱n ga̱jma̱a̱ niri̱ya̱ʼ mbiʼi mu maxtáa gajmíi̱n. Nisngájmúún rí naku̱mu̱u̱ kaʼñún índo̱ niʼthún rí ikhaa naʼni mamiñúu ga̱jma̱a̱ rí tséʼngo̱o̱ gáʼni (2 Cor. 7:5; 1 Tim. 1:15). Ikhaa na̱nguá nixmiéjuunʼ wéñuuʼ eʼni xkujndu ndrígóo, ndiyáʼ itháan rí mambáñún a̱ngiu̱lú.

11. Náá numuu rí Pablo nixnúún consejo a̱ngui̱i̱n rá.

¹¹ Nguáná Pablo ndiyóoʼ rí maxnún consejo  a̱ngui̱i̱n. Mú na̱nguá niʼni numuu rí tsénigu̱u̱ʼ rí eni̱, niʼni numuu rí naxmiéjuunʼ kaʼñún nindoo mambáñún mu xáguáʼdáá xkujndu. Ikhaa niʼni tsiakimínáʼ maxnún consejo rí xáʼni mingíjyúuʼ mikru̱ʼu̱u̱n ga̱jma̱a̱ nixmiéjuunʼ rí mugímijna̱ munimbáníí. Mbá xkri̱da, índo̱ niʼnirámáʼ inún bi̱ corintios, niʼthún mbájmbu ndiéjunʼ rí ndayóoʼ munimbáníí. Nda̱wa̱á nikuʼmaa Tito mu maʼga gáʼñún numuu rí nindoo mbaʼyoo á mu a̱ngiu̱lú nimbáñúún rí ikhaa niʼnirámáʼ náa i̱yi̱i̱ʼ. ¡Ra̱ʼkhá tháán nidxuu índo̱ niʼdxuun rí a̱ngiu̱lú bugi̱ ninimbáníí consejo rí ikhaa nixnúún! (2 Cor. 7:6, 7).

12. Ndiéjuunʼ ma̱ndoo muni̱ bi̱ kuya̱ edxu̱u̱ mu muxnún tsiakii a̱ngiu̱lú rá.

¹² Rí najmañulú. Bi̱ kuya̱ edxu̱u̱ ma̱ndoo mbuyaridáá Pablo índo̱ nuri̱ya̱ʼ mbiʼi mu mumbañún a̱ngiu̱lú. Mbá rí xóo ma̱ndoo muni̱ nindxu̱u̱ rí maguánú wapháá náa reunión mu mutamijná gajmiún a̱ngiu̱lú ga̱jma̱a̱ muxnún tsiakii. Maski ajndu tsétamijná mba̱yu̱u̱ʼ gajmiún mbáa ndxájulú mú ajngáa rí gútháán ma̱ndoo maxnúu tsiakii ga̱jma̱a̱ muni̱i̱ a̱jkiu̱u̱n (Rom. 1:12; Efes. 5:16). Bi̱ kuya̱ edxu̱u̱ nduyaridáá Pablo índo̱ najmún Biblia mu muxnúún tsiakii a̱ngiu̱lú ga̱jma̱a̱ muthúún rí Jeobá nandoo kaʼñún. Ma̱ngaa nusngajmún rí nandún kuñún índo̱ nutamijná má xúʼko̱ gajmiún ga̱jma̱a̱ nuthúún rí májánʼ eni̱. Á mu mbáa bi̱ kayá edxu̱u̱ ndayóoʼ maxnúu consejo mbáa, ndayóoʼ majmuu Ajngá rawuunʼ Dios. Gíʼmaa maʼthí mbájmbu, mú ajngáa rí gáʼthí gíʼmaa manidxu̱u̱ májánʼ mu xúʼko̱ masngájma rí nandoo kaʼyoo ndxájuu (Gál. 6:1).

13. Ndiéjuunʼ gamíi magíʼnuu mbáa bi̱ kayá edxu̱u̱ á mu nadxaʼwáminaʼ má xúʼko̱ náa rí nakiéʼkúun rá.

¹³ Náá numuu rí naʼniún mingíjyúuʼ xáʼ. Bi̱ kuya̱ edxu̱u̱ mangiin nindxu̱ún xa̱bu̱ aʼkhá xó má xúgiáanʼ, ikha jngóo nakiéʼkúún xó má xúgiáanʼlú (Rom. 3:23). Nguáná ndayóoʼ muni̱ tsiakimijna mbuyáá awán náa rí nakiéʼkúún. Mbáa tikhun nakáwabiinʼ numuu rí nundxaʼwamíjná má xúʼko̱ náa rí tséʼgu̱u̱n gúni. Eʼwíinʼ tséyáá náa rí nakiéʼkúún ikha jngóo nundxa̱ʼwa̱míjna̱ rí tséyóoʼ má muriʼkumijnáa.

14. Xó má eʼthí náa Filipenses 4:13, xú káʼnii nimbáyúu Pablo rí ninindxu̱u̱ xa̱bu̱ guabaaʼ mu maʼngo̱o̱ ga̱jma̱a̱ náa rí nikiéʼkúun rá.

¹⁴ Xkridoo Pablo. Ikhaa ndiʼyoo rí xáʼngo̱o̱ tsiakii ndrígóo mambáyúu mu maʼngo̱o̱ maʼni ga̱jma̱a̱ náa rí nakiéʼkúun. Ni̱jkha̱nú ndiʼyoo rí ndayóoʼ mambáyúu Dios. Nákhá ginii ikhaa niʼni gíníin a̱ngiu̱lú. Mú nda̱wa̱á ni̱jkha̱nú ndiʼyoo dí niʼni nindxu̱u̱ raʼkhí ga̱jma̱a̱ niriʼkhu̱u̱ xóo xa̱bu̱ nindxu̱u̱ (1 Tim. 1:12-16). Jeobá nimbáyúu mu mani̱ndxu̱u̱ mbáa báxtúu májáanʼ bi̱ nagáwíinʼ a̱jkiu̱u̱n ma̱ngaa rí mani̱ndxu̱u̱ xa̱bu̱ guabaaʼ. Nagawúunʼ ga̱jma̱a̱ xúgíʼ rí niʼni, mú ikhaa ndiʼyoo rí Jeobá má gáʼni mba̱a̱  a̱jkiu̱u̱n kaʼyoo ma̱ngaa rí ní xándxaʼwáminaʼ ga̱jma̱a̱ náa rí nikiéʼkúun (Rom. 7:21-25). Ndiʼyoo rí xándoo gáʼni xúgíʼ rí májánʼ, ikha jngóo niʼni tsiakimínáʼ rí mariʼkhu̱u̱ xóo xa̱bu̱ nindxu̱u̱ ga̱jma̱a̱ ninindxu̱u̱ xa̱bu̱ guabaaʼ índo̱ niniñaminaʼ rí Jeobá majmiuu mu maʼtáraʼa (1 Cor. 9:27; atraxnuu Filipenses 4:13). *

15. Ndiéjunʼ gíʼmaa maʼni mbáa bi̱ kayá edxu̱u̱ á mu rígá mbá rí tséʼngo̱o̱ gáʼnimbánuu rá.

¹⁵ Rí najmañulú. A̱ngiu̱lú bi̱ nakhánún rí muñégún edxu̱u̱ tsékánún ñájunʼ rígi̱ numuu rí nindxu̱ún xa̱bu̱ jmbiin o nuni̱ xúgíʼ rí májánʼ, mú Jeobá gíʼthu̱u̱n rí mbuyáá rí naʼni tígu̱u̱n ga̱jma̱a̱ munimíjna̱ mani̱ndxu̱ún míjíinʼ cristianos (Efes. 4:23, 24). Ndayóoʼ rí mundxaʼwamíjná májánʼ ndiéjunʼ eʼthí náa Ajngá rawuunʼ Dios ga̱jma̱a̱ muriʼkhu̱u̱ náa rí ndayóoʼ. Mu xúʼko̱ Jeobá mambáñún makuwá gagi ga̱jma̱a̱ munimbaníí májánʼ ñajunʼ rí guáʼdáá (Sant. 1:25).

16. Ndiéjunʼ gárígá á mu bi̱ kuya̱ edxu̱u̱ i̱ndó nduyáá náa rí a̱ngiu̱lú tséʼngu̱u̱n gúnimbaníí rá.

¹⁶ Náá numuu rí naʼniún mingíjyúuʼ xáʼ. Bi̱ kuya̱ edxu̱u̱ ma̱ndoo mbuyáá rí tséʼngu̱u̱n gúni̱ a̱ngiu̱lú índo̱ kúwá ruñajunʼ gajmiún. Á mu ikhiin tséñawumíjna̱ rúʼko̱ gáʼni rí ma̱ndoo makiʼníin, ní xánindxu̱ún xa̱bu̱ guabiinʼ o mutha numún. Pablo niʼthún cristianos nákhá wajyúuʼ dí rúʼko̱ rí nandoo Gixa̱a̱ (2 Cor. 2:10, 11).

17. Ndiéjunʼ ndiʼyoo Pablo náa a̱ngui̱i̱n rá.

¹⁷ Xkridoo Pablo. Ikhaa ndaʼyoo má xúʼko̱ náa rí májánʼ nuni̱ a̱ngui̱i̱n. Gajkhun má rí nguáná ndaʼyoo náa rí naʼni tígu̱u̱n numuu rí ikhaa naʼni maxmiéjuunʼ. Maski má xúʼko̱ ikhaa ndaʼyoo índo̱ mbáa naʼni rí májánʼ ga̱jma̱a̱ mbáa xa̱bu̱ ra̱májáanʼ. Nandoo kaʼñún a̱ngui̱i̱n ga̱jma̱a̱ naʼniminaʼ mbaʼyoo náa rí májánʼ eni̱. Á mu mbáa xtáa raʼni tsiakimínáʼ mu maʼni rí májánʼ, ikhaa ndaʼyoo rí nindxu̱u̱ mbáa xa̱bu̱ bi̱ májáanʼ a̱jkiu̱u̱n, i̱ndó ndayóoʼ rí mixtambáyíí mbá chíʼgíiʼ.

18. Ndiéjunʼ ejmañulú rí xóo Pablo nimbáyúu Evodia ga̱jma̱a̱ Síntique rá. (Filipenses 4:1-3.)

¹⁸ Guʼyáá mbá xkri̱da, xú káʼnii Pablo nimbáñún a̱jmi̱i̱n a̱ngiu̱lú gu̱ʼu̱ bi̱ kúwá náa congregación ndrígóo Filipos (atraxnuu Filipenses 4:1-3). * Evodia ga̱jma̱a̱ Síntique nini̱ tsíngumijná ga̱jma̱a̱ numuu mbá xkujndu rí niguáʼdáá. Pablo na̱nguá niríñúún ní má na̱nguá niʼthá numún. Ikhaa ndiʼyoo náa dí naʼngu̱u̱n ga̱jma̱a̱ rí niguájun jmbu nákhá ginii. Ndiʼyoo má dí Jeobá nandoo kaʼñún. Ga̱jma̱a̱ rí ikhaa i̱ndó ndiʼyoo náa dí májánʼ eni̱, ikha jngóo niʼthún rí mambajxíín. Rí xú káʼnii ndiʼñún a̱ngui̱i̱n rúʼko̱ nimbáyúu maxtáa gagi má xúʼko̱ ga̱jma̱a̱ rí mambaxúu  májánʼ gajmíi̱n bi̱ kúwá náa congregación ndrígóo Filipos.

19. a) Ndiéjunʼ gándoo muni̱ bi̱ kuya̱ edxu̱u̱ mu mbuyáá rí májánʼ eni̱ a̱ngiu̱lú rá. b) Ndiéjunʼ eʼsngúlú xtiʼkhuu náa nakujmaa bi̱ kayá edxu̱u̱ naʼni kaʼwi̱i̱ Guʼwá náa nagimbáanʼ rá.

¹⁹ Rí najmañulú. Ikháanʼ bi̱ kuya̱ edxu̱u̱ gu̱ya̱a̱ náa májánʼ rí nuni̱ a̱ngiu̱lú. Gajkhun má rí xájmiin gúni̱ xúgíʼ rí májánʼ, mú rígá dí májánʼ nuni̱ dí gíʼmaa mbuyamajkuíí (Filip. 2:3). Nguáná ikháanʼ mbaʼyóoʼ má rí muxpríguíí mbáa. Índo̱ gúni̱ rígi̱ guyaridáá xkridoo Pablo, xúya̱a̱ i̱ndó rí xóo nuthi o rí xó nuni̱ numuu dí rígi̱ migamíi maʼni gawúúnʼ eʼwíinʼ. Gu̱ya̱a̱ rí ndxájulú bugi̱ nandoo kaʼyoo Jeobá, naʼni ñajuunʼ ga̱jma̱a̱ majmaa maʼni itháan májánʼ. Índo̱ a̱ngiu̱lú bi̱ kuya̱ edxu̱u̱ nduyáá rí májánʼ eni̱ a̱ngiu̱lú nuni̱ dí marigá ngajua ma̱ngaa dí maʼndún kuyamijná bi̱ kúwá náa congregación.

20. Ndiéjunʼ ma̱ndoo muni̱ bi̱ kuya̱ edxu̱u̱ mu majmañún itháan xkridoo Pablo rá.

²⁰ A̱ngiu̱lú bi̱ kuya̱ edxu̱u̱ mambáñún wéñuuʼ xkri̱da ndrígóo Pablo á mu nduyáʼ xóó itháan majmañún. Mbá xkri̱da, náa Índice de las publicaciones Watch Tower ma̱ndoo mbuyáʼ náa naʼthí “Pablo” ndáwa̱á matu̱ʼu̱u̱n náa naʼthí “ejemplo para los ancianos”. Índo̱ gúyáá tikhuu ikha dí na̱ʼkha̱ ikhí ma̱ndoo murajximíjna̱: “Xú káʼnii gándoo gámbáyúʼ xkri̱da ndrígóo Pablo mu ma̱ni̱ má xúʼko̱ ga̱jma̱a̱ gagi ñajunʼ ndrígóʼ rá.”

21. Ndiéjunʼ dí ragíʼmaa mambumún bi̱ kuya̱ edxu̱u̱ rá.

²¹ Bi̱ kuya̱ edxu̱u̱, garmáʼáan a̱jkia̱la rí Jeobá tségiʼthu̱u̱n rí mani̱ndxa̱la mbáa bi̱ ragíʼdoo aʼkhá, mú ikhaa gíʼthu̱u̱n dí muguajúnʼla jmbu (1 Cor. 4:2). Ikhaa ndiʼyamajkuu xúgíʼ rí niʼni Pablo ma̱ngaa rí niwi̱ji̱ jmbu. Gu̱ya̱a̱ gajkhun rí Jeobá ndaʼyamajkuu xúgíʼ ñajunʼ rí mangáanʼ nu̱nila xó má eʼthí náa Hebreos 6:10, ikhaa “tsémbumuu kaʼyoo ñajunʼ rí nu̱nila, ma̱ngaa ngajua rí nisngajmá ga̱jma̱a̱ numuu mbiʼyuu, índo̱ nimbáñún bi̱ ikhaa niraʼwíin ga̱jma̱a̱ rí numbáñúlá má xúʼko̱”.