1. Ndiéjunʼ esngájma rí xóo nuʼni rá.

 TSÉʼNIUU á mu ndiʼkhún eʼni nguáthá mbiʼi dí nijngúlú má iyááʼ o mbayuuʼ má tsiguʼ, xúgiáanʼ nandulú manindxu̱lúʼ xa̱bu̱ bi̱ maʼni rí nandoo Jeobá. Mu maʼni xúʼko̱ ndayóoʼ muñewa̱a̱n dí mundxaʼwamíjna̱. Náá numuu rá. Numuu rí xóo nuʼni nasngájma ndiéjunʼ endxa̱ʼwámíjnalú. Á mu nundxaʼwamíjná má xúʼko̱ dí nagua̱ʼa̱ maʼni xuyulúʼ, muʼthá o muʼni dí raʼkhí (Efes. 4:17-19). Mú, á mu nundxaʼwamíjná dí májánʼ, maʼni rí muʼthá ga̱jma̱a̱ muʼni dí nanigu̱u̱ʼ Anu̱lú Jeobá (Gál. 5:16).

2. Ndiéjunʼ graxe̱ gúriʼña̱a̱ náa artículo rígi̱ rá.

² Xó má ndiʼyáá náa artículo dí ginii, xándoo má murikháá dí xúndxaʼwamíjna nimbá dí raʼkhí. Mú ma̱ndoo muraʼwíí dí xúʼni dí raʼkhí. Nákha xóó tséjngulú iyááʼ, ndiyóoʼ muniʼñááʼ dí xúʼthá ni má xúʼni dí Jeobá tsénigu̱u̱ʼ. Rúʼko̱ ninindxu̱u̱ mbá dí nigiʼdoo wéñuʼ numuu muʼni mu muriʼkhumijná. Mú rígá i̱mba̱ dí ndayóoʼ muʼni mu maʼdxuu̱ a̱jkiu̱u̱n itháan Jeobá kaʼyulú, ikhaa nindxu̱u̱ dí muʼnimbánii kiʼtáñajunʼ rígi̱: “Ganindxa̱la xóo i̱mba̱a̱ nuxi̱i̱ʼ xa̱bu̱” (Col. 3:10). Náa artículo rígi̱ muriʼña̱a̱ a̱jma̱ graxe̱: Ndiéjunʼ eyoo gáʼthúu̱n dí ma̱nindxa̱a̱ʼ “xóo i̱mba̱a̱ nuxi̱i̱ʼ xa̱bu̱” rá. Ga̱jma̱a̱ xú káʼnii gándoo manindxu̱lúʼ i̱mba̱a̱ nuxi̱i̱ʼ xa̱bu̱ rá.

3. a) Ndiéjunʼ eyoo gáʼthúu̱n dí ma̱nindxa̱a̱ʼ “xóo i̱mba̱a̱ nuxi̱i̱ʼ xa̱bu̱” rá. b) Xú káʼnii gándoo manindxu̱lúʼ i̱mba̱a̱ nuxi̱i̱ʼ xa̱bu̱ rá. (Gálatas 5:22, 23.)

³ Dí ma̱nindxa̱a̱ʼ “xóo i̱mba̱a̱ nuxi̱i̱ʼ xa̱bu̱” nindxu̱u̱ dí matatsaʼwamínáʼ ga̱jma̱a̱ matani xó má kaʼnii Jeobá. Mú, xú káʼnii gándoo manindxu̱lúʼ i̱mba̱a̱ nuxi̱i̱ʼ xa̱bu̱ rá. Índo̱ nundxaʼwamíjná,  nakumulú ga̱jma̱a̱ nuʼni xó má eyoo xi̱ kaʼwu ndrígóo Dios (atraxnuu Gálatas 5:22, 23). * Mbá xkri̱da, bi̱ “nindxu̱u̱ i̱mba̱a̱ nuxi̱i̱ʼ xa̱bu̱” nandoo kaʼyoo Jeobá ga̱jma̱a̱ nandoo kaʼñún xa̱bi̱i̱ ikhaa (Mat. 22:36-39). Naxtáa gagi maski ajndu naraʼnuu mbaʼa gaʼkhu (Sant. 1:2-4). Naʼni marigá dí tsímáá (Mat. 5:9). Naʼngo̱o̱ a̱jkiu̱u̱n ga̱jma̱a̱ májánʼ a̱jkiu̱u̱n gajmíi̱n eʼwíinʼ (Col. 3:12, 13). Nandoo kaʼyoo dí májánʼ, ga̱jma̱a̱ naʼni dí májánʼ (Luc. 6:35). Nasngájma ga̱jma̱a̱ dí naʼni dí naku̱mu̱u̱ kaʼyoo Anu̱u̱ bi̱ xtáa mekhuíí (Sant. 2:18). Na̱nguá kiʼnáa índo̱ nuni makiʼnáa (Tito 3:2). Ga̱jma̱a̱ naʼngo̱o̱ narikhoo xáni dí raʼkhí índo̱ naraʼnuu (1 Cor. 9:25, 27).

4. Ndíjkha rí xándoo maguaʼdáá mámbá má xúʼko̱ dí na̱ʼkha̱ náa Gálatas 5:22, 23 rá.

⁴ Mu manindxu̱lúʼ imba̱a̱ nuxi̱i̱ʼ xa̱bu̱, ndayóoʼ muʼni xóo dí na̱ʼkha̱ raʼthí náa Gálatas 5:22, 23 ga̱jma̱a̱ dí na̱ʼkha̱ raʼthí náa i̱ʼwáʼ texto. * Rí manindxu̱lúʼ xúʼko̱ kaʼnii, kajua̱a̱ ga̱jma̱a̱ i̱ʼwáʼ, na̱nguá nindxu̱u̱ xóo xtíin dí nuʼgíʼ mámbá má xúʼko̱. Mbá xkri̱da, á mu gajkhun nandulúʼ kuʼñúún eʼwíinʼ, maʼngo̱o̱ a̱jkiu̱lú ga̱jma̱a̱ manindxu̱lúʼ májáanʼ xa̱bu̱. Ma̱ngaa mu manindxu̱lúʼ májáanʼ xa̱bu̱, gíʼmaa dí xakiʼnáanʼlu ga̱jma̱a̱ muʼni gaʼduunʼ muʼni dí raʼkhí.

5. Ndiéjunʼ eyoo gáʼthúu̱n dí maguaʼdáá “ku̱ma̱ ndrígóo Cristo”, ga̱jma̱a̱ ndíjkha gíʼmaa muʼnigajmaa xóo niʼni Jesús rá. (1 Corintios 2:16.)

⁵ (Atraxnuu 1 Corintios 2:16). * Mu manindxu̱lúʼ imba̱a̱ nuxi̱i̱ʼ xa̱bu̱ ndayóoʼ maguaʼdáá “ku̱ma̱ ndrígóo Cristo”, xóo muʼthá, ndayóoʼ majmañulúʼ mundxaʼwamíjná xóo endxa̱ʼwáminaʼ Jesús mu mbuʼyaridáá. Jesús nisngájma májánʼ wéñuʼ xóo nindoo xi̱ʼ kaʼwu ndrígóo Dios. Xó má mbá ni̱wa̱nʼ dí nakujmaa májánʼ, Jesús nisngájma xóo phú nindxu̱u̱ Jeobá (Heb. 1:3). Índo̱ dí nundxaʼwamíjná nambríguii ga̱jma̱a̱ dí xóo nindxa̱ʼwáminaʼ Jesús, muʼni xó má niʼni ikhaa ga̱jma̱a̱ mbuʼyaridáá itháan májánʼ xó má ninindxu̱u̱ ikhaa (Filip. 2:5).

6. Ndiéjunʼ gíʼmaa marmáʼáan a̱jkiu̱lú índo̱ nuʼnimi̱jna̱ manindxu̱lúʼ imba̱a̱ nuxi̱i̱ʼ xa̱bu̱ rá.

 ⁶ Lá gajkhun ma̱ndoo mbuʼyaridáá xkri̱da ndrígóo Jesús ráʼ. Mbáa ikháán natatsaʼwáminaʼ: “Jesús ninindxu̱u̱ xa̱bu̱ jmbii, ¡Nditháan xáʼga̱nú mani̱ndxu̱ʼ xóo ikhaa!”. Á mu xúʼko̱ tatsaʼwáminaʼ, garmáʼáan a̱jkia̱a̱nʼ ajtsú enii rígi̱. Timbá, rí ikháán nigumariña̱a̱n mu ma̱ndoo mbiyaridáá Jeobá ga̱jma̱a̱ Jesús. Ikha jngóo ikháán ma̱ndoo matraʼwíí dí mbiyaridáá ga̱jma̱a̱ majmáán mbiyaridáá asndu náa má eʼngo̱o̱ (Gén. 1:26). Raga̱jma̱, xi̱ʼ kaʼwu ndrígóo Dios nindxu̱u̱ mbá dí itháan gíʼdoo tsiakii dí rígá. Ikha jngóo ga̱jma̱a̱ tsiakii rúʼko̱, ikháán majmáán matani̱ dí nditháan xájmáán gátani mbáwiin. Ragajtsú, Jeobá na̱nguá má gíʼthu̱u̱n dí matani mbájmbu xúgíʼ dí na̱ʼkha̱ náa xi̱ʼ kaʼwu xúgi̱. Atatsaʼwáminaʼ dí Anu̱lú Jeobá maxnún bi̱ nuguaʼthi̱i̱n makuwá náa tsu̱du̱u̱ Ku̱ba̱ʼ mbá 1,000 tsiguʼ mu mani̱ndxu̱ún xa̱bu̱ jmbiin (Apoc. 20:1-3). Rí Jeobá nagi̱ʼthu̱u̱n muʼni xúgi̱ nindxu̱u̱ rí muʼnimijna xó má eʼngo̱o̱ ga̱jma̱a̱ makumulúʼ kuʼyáá dí ikhaa má gambáyulú.

7. Ndiéjunʼ guʼyáá xúgi̱ rá.

⁷ Xú káʼnii gándoo guʼyaridáá Jesús rá. Guʼyáá a̱jkhu̱ dí nayambáá xi̱ʼ kaʼwu ndrígóo Dios maguaʼdáá. Mbuʼyáá xú káʼnii nisngájma Jesús mámbá cualidad rígi̱ ga̱jma̱a̱ ndiéjunʼ gándoo majmañulúʼ ikháanʼ. Ma̱ngaa mbuʼyáá tikhu graxe̱ dí mambáyulú mbuʼyáá á mu ndayóoʼ manindxu̱lúʼ itháan májáanʼ xa̱bu̱.

8. Xú káʼnii nisngájma ngajua Jesús rá.

⁸ Jesús nindoo kaʼyoo wéñuʼ Jeobá dí asndu nixkaxi̱i̱ maʼni gínáminaʼ ga̱jma̱a̱ numuu ma̱ngaa ga̱jma̱a̱ numulúʼ ikháanʼ (Juan 14:31; 15:13). Ma̱ngaa rí xóo nixtáa náa tsu̱du̱u̱ Ku̱ba̱ʼ nisngájma dí nindoo kaʼñún wéñuʼ xa̱bu̱. Nindoo kaʼñún ga̱jma̱a̱ nigáwi̱i̱nʼ a̱jkiu̱u̱n kaʼñún má xúʼko̱ xa̱bu̱, asndu bi̱ taʼndun gúyáá. Itháan má nisngájma ngajua índo̱ niʼthún xa̱bu̱ ga̱jma̱a̱ numuu Reino ndrígóo Dios (Luc. 4:43, 44). Ma̱ngaa nisngájma dí nindoo kaʼyoo wéñuʼ Dios ga̱jma̱a̱ dí nindoo kaʼñún xa̱bu̱ índo̱ niniñaminaʼ mamínuuʼ ga̱jma̱a̱ makhañúu náa ñawún xa̱bu̱ aʼkhá. Xúʼko̱ niʼni dí xúgiáanʼ ma̱ndoo makuwáánʼ kámuu mbiʼi.

9. Xú káʼnii gándoo guʼyaridáá Jesús índo̱ nusngajmá ngajua rá.

⁹ Numuu rí nandulú kuʼyáá Anu̱lú Jeobá, ikha jngóo nixnaxímíjná náa ikhaa ga̱jma̱a̱ nijngúlú iyááʼ. Numuu rúʼko̱, gaʼndulúʼ kuʼñúún xa̱bu̱ xó má niʼni Jesús. Apóstol Juan niʼnirámáʼ: “Bi̱ tsíyoo kaʼyoo ndxájuu bi̱ ndaʼyoo ga̱jma̱a̱ iduu, nda̱a̱ xóo maʼndoo kaʼyoo Dios bi̱ na̱nguá eʼngo̱o̱ gáʼyoo” (1 Juan 4:20). Guraximíjna̱: “Lá gajkhun nandoʼ kañu̱u̱n eʼwíinʼ ráʼ. Lá nagáwi̱i̱nʼ a̱jkiu̱nʼ ka̱ñu̱u̱n eʼwíinʼ maski ajndu ikhiin nuthu̱nʼ dí raʼkhí xáʼ. Lá naríyaʼ mbiʼi ga̱jma̱a̱ tsiakii ndrígóʼ mathu̱u̱n eʼwíinʼ xa̱bu̱ ga̱jma̱a̱ numuu Jeobá numuu dí nandoʼ ka̱yo̱o̱ ráʼ. Nataráʼa má xúʼko̱ maski ajndu mbaʼin xa̱bu̱ tsíñún gudxawíín o asndu nuni gaʼduunʼ dí natha xáʼ. Lá ma̱ndoo maríyaʼ itháan mbiʼi mataraʼa ráʼ.” (Efes. 5:15, 16.)

10. Ndiéjunʼ niʼni Jesús mu maʼni marigá dí tsímáá rá.

¹⁰ Jesús na̱nguá niʼni marigá xkujndu. Á mu mbáa niʼniuu dí raʼkhí, na̱nguá ta̱nga̱a̱ maʼniuu dí raʼkhí ma̱ngaa. Mú rígá mbá dí niʼni. Ikhaa ginii ndayáaʼ marigá dí tsímáá ga̱jma̱a̱ nambáñún eʼwíinʼ munimbánii xkujndu ndrígu̱ún. Mbá xkri̱da, niʼsngáa dí á mu nandún magruigú Jeobá dí nduyamajkuíí gíʼmaa mambaxíiʼ gajmiún a̱ngiu̱ún (Mat. 5:9, 23, 24). Ma̱ngaa índo̱ xa̱bi̱i̱ nigiʼdu̱u̱n mu mbuyáá tsáa dí ikhiin gíʼdoo itháan numuu, Jesús mbaʼa nuthu niʼthún muniñaaʼ ragi̱ʼdu̱u̱n (Luc. 9:46-48; 22:24-27).

11. Xóo gándoo muʼni marigá dí tsímáá rá.

 ¹¹ Mu muʼni marigá dí tsímáá raʼkháa i̱ndó ndayóoʼ dí xúʼyáʼ xkujndu. Ma̱ngaa ndayóoʼ dí ikháanʼlu mbuʼyáʼ mambaxíiʼ gajmiúlú eʼwíinʼ ga̱jma̱a̱ rí mumbañún a̱ngiu̱lú munimbánii xkujndu ndrígu̱ún (Filip. 4:2, 3; Sant. 3:17, 18). Ma̱ndoo murajximijnalu: “Asndu náá gániminaʼ ikhúún rí mbaʼyaʼ mambaxíiʼ gajmíi̱n eʼwíinʼ ráʼ. Lá nayexíi sia̱nʼ á mu mbáa ndxájuʼ naʼni gawúnʼ ráʼ. Lá naniʼñúuʼ dí imba̱a̱ xa̱bu̱ magíʼdu̱u̱ manimbánuu xkujndu ráʼ. O ikhúún nagíʼdu̱u̱ mbaʼyáʼ xóo manimbánuu xkujndu maski ajndu naku̱mu̱ʼ dí ikhaa gíʼdoo aʼkhúun dxe̱ʼ. Á mu májánʼ gáʼni, lá na̱thu̱u̱n rí mambaxíin bi̱ nda̱yo̱o̱ guaʼdáá xkujndu ráʼ.”

12. Xú káʼnii nisngájma Jesús rí ninindxu̱u̱ májáanʼ xa̱bu̱ rá.

¹² Jesús ninindxu̱u̱ májáanʼ xa̱bu̱ (Mat. 11:28-30). Naʼni dí májánʼ ga̱jma̱a̱ nakro̱ʼo̱o̱ kaʼñún xa̱bu̱, maski ajndu ninindxu̱u̱ mbiʼi mingíjyúuʼ. Mbá xkri̱da̱, mbáa a̱ʼgú fenicia niʼtákáñuu rí maʼni thanuu wáxioo, ginii kayuuʼ Jesús na̱nguá niʼni dí niʼthúu̱n, mú ninindxu̱u̱ májáanʼ xa̱bu̱ ga̱jma̱a̱ niʼnitanuu wáxioo índo̱ ndiʼyoo dí gíʼdoo mbá fe gujkhuʼ (Mat. 15:22-28). Mú ikhaa na̱nguá eniñami̱na̱ʼ maʼni xó má eni eʼwíinʼ. Nguáná ga̱jma̱a̱ numuu rí nindxu̱u̱ májáanʼ xa̱bu̱ niʼthúún mbájmbu bi̱ nandoo kaʼñún. Mbá xkri̱da, índo̱ Pedro nigíʼ marikhoo Jesús dí maʼnimbánuu ñajuunʼ Jeobá, ikhaa nikiʼnáa kaʼyoo náa inún eʼwíinʼ xa̱bi̱i̱ (Mar. 8:32, 33). Na̱nguá niʼni xúʼko̱ mu maríyaʼ majkhuu Pedro, niʼni mu maʼsngóo, ga̱jma̱a̱ mu eʼwíinʼ xa̱bi̱i̱ mbuʼyáá rí ndayóoʼ wéñuuʼ mumbayíí ga̱jma̱a̱ xurikháá dí maʼni rí nandoo Dios. Mbáa Pedro niti̱yu̱u̱ʼ mbá chíʼgíiʼ mú nimbáyúu má ikhaa.

13. Ndiéjunʼ gáʼyóoʼ muʼni nguáná mu muʼthá dí májánʼ rá.

¹³ Rí muʼthúún dí májánʼ xa̱bu̱ bi̱ nandulúʼ kuʼñúún, nguáná ndaʼyóoʼ muʼthá mbájmbu. Índo̱ gúʼni xúʼko̱ guʼyaridáá Jesús ga̱jma̱a̱ guʼthá xó má ikha dí na̱ʼkha̱ náa Ajngá rawuunʼ Dios, mú guʼthá ga̱jma̱a̱ ajngáa májánʼ. Guguaʼthíin dí májánʼ náa ikhiin ga̱jma̱a̱ guʼyáá dí bi̱ nandún kuyáá Jeobá ga̱jma̱a̱ nandún kuyulúʼ mudrigú ajngáa dí gúʼthúu̱n ga̱jma̱a̱ májánʼ. Guraximíjna̱: “Lá xámiñuʼ mathu̱u̱n á mu nda̱yo̱o̱ dí xtáa raʼni mbá dí raʼkhí mbáa bi̱ nandoʼ ka̱yo̱o̱ ráʼ. Xú káʼnii eni ráʼ. Lá natha ga̱jma̱a̱ ajngáa wa̱ba̱ʼ ráʼ o nariyúu dxe̱ʼ. Ma̱ngaa, náá numuu dí na̱thu̱u̱n xá. Lá na̱thu̱u̱n numuu dí nakiʼnún ka̱yo̱o̱ xáʼ o numuu rí nandoʼ maxtáa májánʼ dxe̱ʼ”.

14. Xú káʼnii nisngájma Jesús dí niʼni dí májánʼ rá.

¹⁴ Jesús niʼni dí májánʼ raʼkháa i̱ndó ndiʼyoo ndiéjunʼ ninindxu̱u̱ dí májánʼ. Ikhaa nandoo kaʼyoo Anu̱u̱, ikha jngóo naʼni má xúʼko̱ dí májánʼ ga̱jma̱a̱ mbá numuu májánʼ. Xa̱bu̱ bi̱ naʼni dí májánʼ, ndayáʼ má xúʼko̱ xóo gándoo mambáñún eʼwíinʼ. Gíʼmaa muʼni dí májánʼ raʼkháa i̱ndó ndayóoʼ mbuʼyáá ndiéjunʼ nindxu̱u̱ dí májánʼ ga̱jma̱a̱ gíʼmaa muʼni ga̱jma̱a̱ mbá numuu májánʼ. Mbáa xa̱bu̱ ma̱ndoo marajximi̱na̱ʼ: “Lá rígá matani dí májánʼ mú ga̱jma̱a̱ mbá numuu dí raʼkhí ráʼ.” Rígá. Mbá xkri̱da, Jesús niʼthí ga̱jma̱a̱ numún xa̱bu̱ bi̱ nuxnún limosna xa̱bu̱ gíníi, rí ikhiin nduyáá á mu kúwá xa̱bu̱ ruyáá dí ikhiin muxna. Nusngajma náa inún xa̱bu̱ dí nuni dí májánʼ, mú Jeobá na̱nguá eʼyoo xúʼko̱ (Mat. 6:1-4).

15. Xú káʼnii phú gándoo manindxu̱lúʼ májáanʼ xa̱bu̱ rá.

¹⁵ I̱ndó ma̱ndoo manindxu̱lúʼ májáanʼ xa̱bu̱ á mu nuʼni dí májánʼ índo̱ nundxaʼwamíjná ga̱jma̱a̱ numún eʼwíinʼ raʼkháa i̱ndó dí mambáyulúʼ ikháanʼ. Gíʼmaa murajximíjna̱: “Lá ma̱ndoo mata̱ rí nani dí májánʼ raʼkháa i̱ndó nda̱yo̱o̱ ndiéjunʼ nindxu̱u̱ dí májánʼ ráʼ. Náá numuu nani dí májánʼ rá.”

16. Ndiéjunʼ gíʼmaa muʼni xúgíʼ mbiʼi, ga̱jma̱a̱ náá numuu rá.

¹⁶ Xúndxaʼwamíjna rí índo̱ najngúlú iyááʼ niʼni má xúgíʼ xóo kaʼyoo maʼni imba̱a̱ nuxi̱i̱ xa̱bu̱ rí asndu nánguá má eyóoʼ muʼnimi̱jna̱ itháan. Rí manindxu̱lúʼ xóo imba̱a̱ nuxi̱i̱ʼ xa̱bu̱ nindxu̱u̱ xóo mbá xtíin dí gíʼmaa muñewa̱a̱n má xúʼko̱. Ikha jngóo xúgíʼ mbiʼi, ndayóoʼ mbuʼyáʼ xóo gándoo musngajmá dí na̱ʼkha̱ náa xi̱ʼ kaʼwu ndrígóo Dios. Numuu rí Jeobá nindxu̱u̱ mbáa Dios bi̱ naʼni dí naʼthí, ga̱jma̱a̱ xi̱ʼ kaʼwu ndrígóo nindxu̱u̱ mbá tsiakii dí nayambáá má xúʼko̱ (Gén. 1:2). Rígi̱ nandoo gáʼthí rí mámbá cualidad dí na̱ʼkha̱ náa xi̱ʼ kaʼwu ndrígóo Dios ma̱ndoo ga̱jma̱a̱ gíʼmaa maxkajxáánʼ muʼnimbánii. Mbá xkri̱da, xa̱bi̱i̱ Jesús bi̱ mbiʼyuu Santiago niʼnirámáʼ: “Mbá fe rí nda̱a̱ dí eʼni nindxu̱u̱ asndu xóo rí nikháñuu má” (Sant. 2:26). Xúʼko̱ má gándoo muʼthá ga̱jma̱a̱ numuu i̱ʼwáʼ cualidad dí na̱ʼkha̱ náa xi̱ʼ kaʼwu ndrígóo Dios ma̱ngaa. Mámbá índo̱ nusngajmá nakujmaa dí xi̱ʼ kaʼwu ndrígóo Dios rígá náa ikháanʼlu.

17. Ndiéjunʼ gándoo muʼni á mu na̱nguá esngajmá cualidad dí na̱ʼkha̱ náa xi̱ʼ kaʼwu xó má eyulú ikháanʼ rá.

¹⁷ Asndu cristianos bi̱ nijngún má iyááʼ mbayuuʼ tsiguʼ nguáná na̱nguá esngajmá cualidad dí na̱ʼkha̱ náa xi̱ʼ kaʼwu xó má gíʼmaa. Mú rí itháan gíʼdoo numuu nindxu̱u̱ dí xáʼyóoʼ makanájkhúún. Guʼgíʼ mbá xkri̱da. Á mu nithu mbáa xtíñúlúʼ dí nanigulúʼ wéñuʼ, lá mu̱ʼda̱ʼ mbá nacha̱ náa náska ráʼ. Mbáa muʼgíiʼ muʼni májáanʼ á mu nandoo, ikhú nuʼnimíjna̱ dí muñewa̱a̱n itháan. Xúʼko̱ má kayuʼ, á mu nguáná na̱nguá eʼthá ga̱jma̱a̱ ajngáa májánʼ, tséjyúu kiʼnáanʼlú o na̱nguá nini̱ndxu̱lú májáanʼ xa̱bu̱ gajmiúlú mbáa xó má gíʼmaa, xákanájkulúʼ. Rí muʼthán maʼni mba̱a̱ a̱jkiu̱u̱n mayambáá wéñuʼ mu mayambáá mambaxíiʼ gajmiúlú xa̱bu̱ buʼko̱. Ga̱jma̱a̱ rí muʼnimi̱jna̱ manindxu̱lúʼ itháan májáanʼ xa̱bu̱ nda̱wa̱á.

18. Ndiéjunʼ rí ma̱ndoo mbuʼyáá gajkhun rá.

¹⁸ ¡Nadxulú wéñuʼ dí ma̱ndoo mbuʼyaridáá Jesús! Á mu nduʼyaridáá itháan xóo endxaʼwamínáʼ, xáʼniulu miʼskhoo muʼni xóo ikhaa. Xúʼko̱ gáʼni dí muriʼkhumijná itháan májánʼ xóo imba̱a̱ nuxi̱i̱ʼ xa̱bu̱. Náa artículo rígi̱, káaʼ niʼthá a̱jkhu̱ cualidad dí na̱ʼkha̱ náa xi̱ʼ kaʼwu ndrígóo Dios. Mú, májánʼ gáʼni á mu nuríyaʼ mbiʼi muʼnigajmaa i̱ʼwáʼ cualidad dí na̱ʼkha̱ náa xi̱ʼ kaʼwu mu mbuʼyáá náa eyóoʼ muriʼkhumijná itháan májánʼ. Muxkamaa mbaʼa artículo dí mambáyulú náa Ikha rí munigajmaa xa̱bi̱i̱ Jeobá, náa kayá edxu̱u̱ “Xóo gíʼmaa makuwá cristianos” nda̱wa̱á náa naʼthí “Rí na̱jma̱a̱ náa xi̱ʼ kaʼwu”. Ma̱ndoo mbuʼyáá gajkhun dí Jeobá má gambáyuluʼ á mu nuʼnimíjna̱ muriʼkhumijná manindxu̱lúʼ xóo imba̱a̱ nuxi̱i̱ʼ xa̱bu̱ ga̱jma̱a̱ dí xúniʼñáʼ ruriʼkhumijná muʼni dí májánʼ.