1. Ndiéjunʼ dí nandún xabuanii bi̱ nindxu̱ún cristianos rá.

 NDU̱YA̱A̱XU dí ikháán xabuanii nandala ga̱jma̱a̱ xúgííʼ a̱jkia̱la mumbañún e̱jña̱la mu muniʼniiʼ ga̱jma̱a̱ maʼndún kuyáá Jeobá. Mú, ikhaa nindxu̱u̱ mbáa Dios bi̱ tsékujmaa, ndiéjunʼ gándoo gúni mu e̱jña̱la mbuyáá dí ikhaa gajkhun xtáa ga̱jma̱a̱ magún kanuu náa ikhaa xá. (Sant. 4:8.)

2. Xkáʼnii gándoo xabuanii musngúún e̱jñu̱ún numuu Jeobá ga̱jma̱a̱ cualidad dí gíʼdoo xá.

² Mbóoʼ dí gíʼdoo wéñuʼ numuu dí xabuanii ma̱ndoo mumbañún e̱jñu̱ún mu magún kanuu náa Jeobá nindxu̱u̱ dí munigajmaa mbá jnduʼ gajmiún Biblia (2 Tim. 3:14-17). Náa Biblia ma̱ngaa naʼthúlú imbo̱ʼ dí ma̱ndoo muni̱ jiámá ga̱jma̱a̱ wa̱ʼxa̱ʼ mu majmañún itháán numuu Jeobá. Náa libro ndrígóo Proverbios, ikhí mbáa xa̱bu̱ nikhi̱i̱ naʼthúu̱n a̱ʼdióo mbaʼyoo má xúʼko̱ cualidad dí nakujmaa náa xúgíʼ dí nigumawíi (Prov. 3:19-21). Nda̱wa̱á mbuʼyáá xú káʼnii gándoo gájmúún dí nigumawíi xabuanii mu musngúún e̱jñu̱ún numuu Jeobá ga̱jma̱a̱ cualidad dí gíʼdoo.

3. Xkáʼnii gándoo gumbañúún e̱jñu̱ún xabuanii rá.

³ Náa Biblia naʼthí dí maski má ikháanʼlú nda̱a̱ xóo mbuʼyáá xóo nindxu̱u̱ Dios, “mú asndu nákha niguma numbaaʼ nakujmaa kaʼwu xóo nindxu̱u̱ ikhaa” (Rom. 1:20). Lá tséniguala ikháanʼla ráʼ. Xabuanii índo̱ nagájnalá mu madaaʼ giñánʼ e̱dxa̱la gajmiála e̱jña̱la ráʼ. Gájmala mbiʼi rúʼko̱ mu mumbañún e̱jña̱la mbuyáá dí “xúgíʼ rí niʼni” Jeobá nasngájma cualidad dí gíʼdoo. Guʼyáá ndiéjunʼ gámbañún xabuanii dí xóo niʼsngáa Jesús.

4. Xú káʼnii nijmuu Jesús dí nigumawíi mu maʼsngúún xa̱bi̱i̱ rá. (Lucas 12:24, 27-30.)

 ⁴ Guʼyáálú xú káʼnii Jesús nijmuu dí nigumawíi mu maʼsngáa. Mbá miʼtsu, ikhaa nindu̱ʼu̱u̱n xa̱bi̱i̱ mbuñún yu̱wa̱ʼ ga̱jma̱a̱ lirio (atraxnuu Lucas 12:24, 27-30). Jesús ma̱ndoo maʼthí ga̱jma̱a̱ numuu asndu xkáʼnii má xujkhúʼ o planta, mu ikhaa nijmiuu ño̱ʼo̱ ga̱jma̱a̱ ri̱ʼi̱ numuu dí xa̱bi̱i̱ nuniʼnúuʼ májánʼ. Mbáa Jesús asndu nisngájma náa egún ga̱jma̱a̱ náa katriga̱ índo̱ niʼthí. Ndiéjunʼ niʼni Jesús nda̱wa̱á dí niʼthí numuu xkri̱da rígi̱ rá. Niʼsngúún xa̱bi̱i̱ dí xúgííʼ rúʼko̱ naʼsngúlú dí ra̱ʼkhá tháán májáanʼ a̱jkiu̱u̱n ga̱jma̱a̱ naxná rí gíʼdoo Anu̱lú bi̱ xtáá mekhuíí: Jeobá maxnún dí muphu ga̱jma̱a̱ dí maguʼwúnʼ xa̱bi̱i̱ bi̱ naguajún jmbu náa ikhaa xó má eʼni gajmíi̱n yu̱wa̱ʼ ga̱jma̱a̱ ri̱ʼi̱ dí rígá xánáá.

5. Xkáʼnii nindxu̱u̱ tikhu dí nigumawíi ma̱ndoo majmúún xabuanii mu musngúún e̱jñu̱ún numuu Jeobá rá.

⁵ Xabuanii, xú káʼnii guyaridáá dí niʼsngáa Jesús rá. Mbá xkri̱da, ma̱ndoo muthu̱u̱n e̱jña̱la mbóoʼ dí itháán naniguala dí nigumawíi xóo mbóo planta o xujkhúʼ bi̱ nanigiala. Xambumala muthu̱u̱n ndiéjunʼ eʼsngúlú ga̱jma̱a̱ numuu Jeobá xúgíʼ rúʼko̱. Nda̱wa̱á gura̱jxi̱i̱ a̱ʼdiála xkáʼnii xujkhúʼ o planta dí itháán naniguuʼ. Á mu najmala mbóoʼ dí ikhiin naniguuʼ mu nuthu̱u̱n numuu Jeobá, itháán gáʼndún mudxawíín dí gárathu̱u̱n.

6. Ndiéjunʼ ejmañulú dí xóo niʼni ru̱dúu̱ Christopher rá.

⁶ Rígi̱ na̱nguá eyoo gáʼthúu̱n dí xabuanii ndayóoʼ mbuyáʼ wéñuuʼ majmañuu numuu mbáa xujkhúʼ o mbá planta kiejunʼ. Jesús na̱nguá niʼni gajíminaʼ mu maʼthí kudúún ndiéjunʼ e̱ʼphu̱ yu̱wa̱ʼ o xú káʼnii eja̱a̱ lirio. Mbáa a̱ʼdiáaʼ naniguuʼ majmañuu kudúún dí nigumawíi. Mú nguáná ma̱ndoo muʼthá mbóoʼ dí na̱nguá gakhi̱i̱ o mbóoʼ graxe̱ mu xúʼko̱ muʼsngúún numuu Jeobá. Mbá xkri̱da, mbáa ndxájulú bi̱ mbiʼyuu Christopher narmáʼáan a̱jkiu̱u̱n: “Ru̱dúxu̱ naʼthúxu mbóo dí ra̱mingíjyúuʼ ga̱jma̱a̱ numuu dí rígá náa kúwáanʼxu mu mambáyuxu mbuya̱a̱ dí mitsaanʼ nindxu̱u̱ dí nigumawíi. Índo̱ ndu̱ya̱a̱xu mbóoʼ kúbá, ikhaa naʼthúxu̱: ¡Ra̱ʼkhá tháán mitsídánʼ ga̱jma̱a̱ mitsaanʼ kúbá rúʼko̱! Lá ragájkhun dí ra̱ʼkhá tháán mitsaan xóo nindxu̱u̱ Jeobá ráʼ. O índo̱ na̱jkuáxu náa lamáa, ikhaa naʼthúxu: ¡Ra̱ʼkhá tháán xkujyuuʼ ola! Nakujmaa dí Dios gíʼdoo tsiakii”. Christopher naʼthí: “Maski ajndu na̱nguá mingíjyúuʼ dí naʼthúxu mu mbaʼa dí naʼni mundxaʼwáá edxu̱xu”.

7. Ndiéjunʼ gándoo gúni̱ mu musngúún e̱jña̱la mu mundxaʼwamíjná náa dí nigumawíi rá.

⁷ Índo̱ gáʼga ranii e̱jña̱la, ma̱ndoo musngúún mu mundxaʼwamíjná náa dí nigumawíi ga̱jma̱a̱ ndiéjunʼ dí naʼsngúún numuu Jeobá xúgíʼ rúʼko̱. Ma̱ndoo majmalaʼ mbóoʼ dí nigumawíi ga̱jma̱a̱ murajxi̱i̱ a̱ʼdiála: Ndiéjunʼ eʼsngúlú numuu Jeobá rígi̱ ku̱ma̱a̱ʼ ján. Mbáa maʼniaʼ tsiánguá dí xóo kaʼnii ikhiin guriʼña̱a̱ (Mat. 21:16).

8. Ndiéjunʼ ndiyóo’ muni israelita índo̱ jngruigu̱u̱n gajmiún e̱jñu̱ún náa kamba̱a̱ rá.

⁸ Israelita nijuiʼthúún dí ndayóoʼ musngúún e̱jñu̱ún kiʼtáñajunʼ ndrígóo Jeobá asndu náá mínaaʼ má jngruigu̱u̱n (Deut. 11:19). Náa kamba̱a̱ dí rígá náa Israel kúwi̱i̱n mbaʼa enii xujkhúʼ ga̱jma̱a̱ ri̱ʼi̱. Ikha jngóo israelitas ma̱ndoo majmúún dí rígá náa nagún mu maxkajxi̱i̱n e̱jñu̱ún manigu̱u̱nʼ majmañún dí Jeobá niʼniwíi. Ikhaa ma kayuʼ ma̱ndoo muni̱ xabuanii dí mbiʼi xúgi̱ ma̱ngaa. Guyáá ndiéjunʼ nini̱ tikhuun dí ikhiin.

9. Ndiéjunʼ ejmañaaʼ ikháán náa Punitha ga̱jma̱a̱ Katya rá.

⁹ Mbáa a̱ʼgú nikhi̱i̱ bi̱ mbiʼyuu Punitha, bi̱ xtáa náa mbá xuajen mba̱a̱ dí rígá náa India naʼthí: “Índo̱ najkhuá guñuxu bi̱ kuñu̱u̱n bi̱ kúwá náa kúbá ikhú nuriyáʼxu mbiʼi dí  musngúún ejñuxu ga̱jma̱a̱ numuu xúgíʼ dí rígá dí Jeobá niʼniwíi. Naku̱mu̱ʼ dí índo̱ na̱nguá kuwáanʼxu̱ náa kúwíin mbaʼin wéñuʼ xa̱bu̱ ga̱jma̱a̱ náa rígá mbaʼa wéñuʼ carro naʼni dí e̱ji̱n xáʼniún miʼskhoo makru̱ʼu̱u̱n ndiéjunʼ eʼsngúún dí rígá nigumawíi”. Xabuanii mbáa e̱jña̱la nditháan xámbumún índo̱ nikuwáanʼ gajmiála náa mitsaanʼ rígá iná maxaʼ. Katya, mbáa ndxájulú bi̱ na̱ʼkha̱ náa Moldavia, naʼthí: “Xóo asndu nákha ri̱xi̱ ni̱jkhá gajmíʼ xabuaníʼ náa kúbá kumuʼ. Naxníín wéñuʼ núma̱aʼ numuu rí asndu nákha chíʼgiúúnʼ nisngo̱ʼ maguajún ga̱jma̱a̱ mba̱yo̱o̱ dí Jeobá niʼniwíi ga̱jma̱a̱ mandxaʼwáminaʼ xóo káʼnii xa̱bu̱ nindxu̱u̱ ikhaa”.

10. Ndiéjunʼ gándoo muni̱ xabuanii á mu naʼniún gakhi̱i̱ magajnún magún náa rígá iná maxaʼ ga̱jma̱a̱ náa kúwá xujkhúʼ rá. (Atayáá náa kúgumaʼá “ Dí ma̱ndoo mambáñún xabuanii”.)

¹⁰ Á mu ikháanʼ naʼniala mingíjyúuʼ muʼguala náa rígá iná maxaʼ ga̱jma̱a̱ kúwi̱i̱n xujkhúʼ rá. Amol bi̱ ma̱ngaa xtáa náa India naʼthí: “Náa xtáa ikhúún xabuanii nuñajunʼ mbayuuʼ wéñuʼ ga̱jma̱a̱ tsídánʼ gajnúu magajnáaʼ mi̱dxu̱ʼ náa rígá iná maxaʼ. Mú índo̱ nagájnuxu na̱jkua̱xu náa parque o náa rexo̱o̱ guʼwá nandoo ndu̱ya̱a̱xu dí nigumawíi ga̱jma̱a̱ nandoo nuthu̱u̱n e̱jñu̱xu numuu Jeobá”. Xabuanii á mu ndu̱ya̱a̱la májánʼ, mbáa ma̱ndoo muxkamaa náa mijngii kuwáanʼ tikhu dí rígá nigumawíi dí ma̱ndoo musngajmúún e̱jña̱la (Sal. 104:24). Mbáa mbuñu̱u̱nla ño̱ʼo̱, xujkhúʼ majkhiinʼ, iná maxaʼ o i̱ʼwáʼ. Karina, bi̱ xtáa náa Alemania, naʼthí: Ruduʼ naniguuʼ wéñuuʼ ri̱ʼi̱. Nákha chíʼgiúúnʼ najkhuáxu pasiá, ikhaa nasngájmuʼ náa rígá ri̱ʼi̱ dí mitsaanʼ náa kamba̱a̱”. Ma̱ngaa ma̱ndoo majmalaʼ mbaʼa video ga̱jma̱a̱ i̱yi̱ʼ dí niguwíi xuajñuu Jeobá náa na̱ʼkha̱ raʼthí ga̱jma̱a̱ numuu rí nigumawíi. Tséʼñuu asndu náá ma xtáa, ma̱ndoo mumbañún e̱jña̱la mbuyáá dí Jeobá niʼniwíi. Xúgi̱ mbuʼyáá xú káʼnii xa̱bu̱ nindxu̱u̱ Jeobá dí ma̱ndoo mutamijná gajmiála e̱jña̱la.

11. Ndiéjunʼ gándoo gúni xabuanii mu e̱jñu̱ún mbuyáá dí Jeobá nandoo kaʼñúún xá.

¹¹ Mu mumbañún e̱jña̱la mbuyáá dí Jeobá nandoo kaʼñún, ma̱ndoo mutamíjnála xú kaʼnii mitsaanʼ eñawu̱u̱n e̱jñu̱ún mbaʼin xujkhúʼ (Mat. 23:37). Ma̱ngaa guthu̱u̱nla dí xú kaʼnii mixtiʼkhu enii dí rígá nigumawíi. Karina bi̱ niʼthá náa kutriga̱ ginii, naʼthí: “Índo̱ nagájnuxu na̱jkuá, ru̱dúʼ naʼthúnʼ dí maguajún mba̱yo̱o̱ xú káʼnii mitsaan ga̱jma̱a̱ mixtiʼkhu enii mámbá ri̱ʼi̱, ma̱ngaa naʼthúnʼ dí rúʼko̱ nasngájmaa dí Jeobá nandoo kaʼyulú”. Maski ajndu ninújngoo mbayuuʼ tsiguuʼ, kaʼníí nda̱yo̱o̱ xú káʼnii mixtiʼkhu enii, xóo jnii ga̱jma̱a̱ color ri̱ʼi̱ dí rígá. Xúgíʼ rúʼko̱ naʼni marmáʼáan a̱jkiu̱nʼ dí ra̱ʼkhá tháán nandoo kaʼyulú Jeobá”.

12. Ndiéjunʼ gándoo gúni xabuanii mu mumbañún e̱jñu̱ún mbuyáá xú káʼnii ejmañuu Jeobá rá. (Salmo 139:14; atayáá xtiʼkhuu.)

¹² Gumbañúún e̱jña̱la mbuyáá dí Jeobá ra̱ʼkhá tháán ejmañuu, nimbáa ndawaa tsáa ejmañuu xóo ikhaa (Rom. 11:33). Mbá xkri̱da ma̱ndoo muthu̱u̱nla dí iyaʼ naguajta̱a̱ du̱u̱n mu xúʼko̱ xájyúuʼ gáʼga kayóo giñánʼ náa imbríʼkhá xuajen (Job 38:36, 37). Ma̱ngaa ma̱ndoo muthu̱u̱nla xú káʼnii mitsaanʼ kiʼniwáanʼlu (atraxnuu Salmo 139:14). b Guʼyáálu xú káʼnii niʼni mbáa xa̱bu̱ nikhi̱i̱ bi̱ mbiʼyuu Vladimir. Ikhaa naʼthí: “Mbóoʼ mbiʼi aʼdiuxu nixpatriguii náa bicicleta ga̱jma̱a̱ nikambiyuuʼ. Mú nda̱wa̱á dí niʼnii. Ikhú nithanxu rí Jeobá niʼniriyá célula ndrígúlu mu maʼnii ikháá náa nikambiyuuʼ. Ma̱ngaa nitha̱a̱nxu dí rúʼko̱ nimbáa xa̱bu̱ xáʼngo̱o̱ gáʼni. Mbá xkri̱da mbóoʼ carro na̱nguá guma májáanʼ ikháá nda̱wa̱á dí niguma gachúu. Rígi̱ niʼni dí aʼdiuxu nikro̱ʼo̱o̱ dí Jeobá ra̱ʼkhá tháán ejmañuu”.

13. Ndiéjunʼ gándoo gúni̱ xabuanii mu mumbañún e̱jñu̱ún mundxaʼwamíjná tsiakii dí gíʼdoo Jeobá rá. (Isaías 40:26.)

¹³ Jeobá naʼthúlú dí muyejxiraʼanʼ mekhuíí ga̱jma̱a̱ mundxaʼwamíjná xú káʼnii mba̱a̱ tsiakii gíʼdoo, dí ikhaa niʼni rí xúgíinʼ a̱ʼgua̱a̱n makuwá náa tri̱gi̱i̱n má (atraxnuu Isaías 40:26). c Ma̱ndoo muthu̱u̱n muyejxiraʼanʼ e̱jña̱la mekhuíí ga̱jma̱a̱ mundxaʼwamíjna̱ dí nduyáá. Mbáa ndxájulú bi̱ na̱ʼkha̱ náa Taiwán bi̱ mbiʼyuu Tingting narmáʼáan a̱jkiu̱u̱n nákhi  chíʼgíiʼ. Ikhaa naʼthí: “Mbá miʼtsú ikhúún gajmuʼ ru̱dúʼ nigájnu nijkhuáxu pasiá, ikhí nindoo ndiya̱a̱xu mbaʼin a̱ʼgua̱a̱n katrigi̱i̱n náa mekhu”. Nákha ikhú a̱ngui̱nʼ bi̱ na̱jkháaʼ gajmíʼ náa escuela nutsudún ma̱ni̱ dí raʼkhí, ikha jngóo nimíñúʼ makiéʼkhun náa inuu Jeobá. Ru̱dúʼ niʼthún mandxaʼwáminaʼ xú káʼnii Jeobá nijmuu tsiakii ndrígóo mu maʼniwíin xúgíinʼ a̱ʼgua̱a̱n buʼko̱ ma̱ngaa niʼni marmáʼáan a̱jkiu̱nʼ dí ikhaa ma̱ndoo majmuu tsiakii dí gíʼdoo mu mambáyuʼ maguajún jmbu náa inuu. Nda̱wa̱á dí ndi̱yo̱o̱ xúgíʼ dí nigumawíi, nindoʼ maniʼníiʼ itháán májánʼ Jeobá ga̱jma̱a̱ ma̱ni̱ ñajuunʼ tséʼniuu ma asndu ndiéjunʼ ma dí garigá”.

14. Xú káʼnii gájmúún dí nigumawíi xabuanii mu e̱jñu̱ún mbuyáá dí Jeobá nindxu̱u̱ mbáa Dios bi̱ nadxuu a̱jkiu̱u̱n rá.

¹⁴ Xúgíʼ dí Jeobá niʼniwíi nasngájma dí ikhaa nadxuu a̱jkiu̱u̱n ga̱jma̱a̱ nandoo dí ikháanʼlu maʼdxuu a̱jkiu̱lú. Científico niguánú ndiyáá dí mbaʼin xujkhúʼ nutsíin, asndu ño̱ʼo̱ ga̱jma̱a̱ e̱gi̱ʼ (Job 40:20). Mbáa e̱jña̱la nindu̱ʼwa̱ nini̱ ejín mijxtun índo̱ ndiñún nagún ruxkháá bolóo gúmá o ejín xúwánʼ bi̱ kuiji̱i̱n rutsíin. Imbo̱ʼ aʼphu̱ índo̱ e̱jña̱la gunduʼwa gúni̱ xujkhúʼ, guthu̱u̱nla dí ¡ikháanʼlu nuʼni ñajuunʼ mbáa Dios gagi! (1 Tim. 1:11).

15. Ndiéjunʼ gándoo gambáñún xabuanii mu mbuyáá ndiéjunʼ endxaʼwamijna e̱jñu̱ún rá. (Proverbios 20:5; atayáá xtiʼkhu.)

¹⁵ Nguáná xabuanii naʼniún gakhi̱i̱ mbuyáá xú kaʼnii gúni mu e̱jñu̱ún muthúún xkujndu dí guáʼdáá. Á mu ikháanʼ nagíʼnala xúʼko̱, ndiéjunʼ gándoo gámbáyala mu mbu̱ya̱a̱ ndiéjunʼ endxaʼwamíjna̱ e̱jña̱la rá. (Atraxnuu Proverbios 20:5). d Tikhuin xabuanii niguanún ndiyáá dí nandoo nutamijná gajmiún e̱jñu̱ún índo̱ nagún náa rígá iná maxaʼ, xujkhúʼ, ixi̱ ga̱jma̱a̱ i̱ʼwáʼ. Náá numuu rá. Mbá dí ikhaa nindxu̱u̱ numuu dí nda̱a̱ imbo̱ʼ dí naʼni jngarígáanʼxu. Mbáa xa̱bu̱ nikhi̱i̱ bi̱ na̱ʼkha̱ náa Taiwán bi̱ mbiʼyuu Masahiko naʼthí imbo̱ʼ numuu: “Índo̱ najkhuáxu gajmiúxu ejñu̱xu náa kúbá o náa playa mu madaaʼ giñán edxu̱xu̱ʼ ikhú asndu tsímáá  a̱jkiu̱ún eʼni. Ikha jngóo tseʼniuxu gakhi̱i̱ mutamijná gajmiúxu ga̱jma̱a̱ mbu̱ya̱a̱xu ndiéjunʼ endxa̱ʼwa̱a̱ edxu̱ún ga̱jma̱a̱ xóo ku̱mu̱ún”. Katya, bi̱ niʼthá ga̱jma̱a̱ numuu náa kutriga̱ 9 naʼthí: “Nda̱wa̱á dí nagajnáaʼ náa escueloʼ, ru̱dúʼ na̱jkha̱ kañún náa mbóoʼ parque. Índo̱ na̱jkhá gajmuʼ ikhí tséʼniuʼ gakhi̱i̱ mathu̱u̱n dí nagíʼnuʼ náa escueloʼ ga̱jma̱a̱ dí naʼni maxmiéjunʼ”.

16. Xú káʼnii gándoo bi̱ kúwá mbá guʼwíin manigu̱u̱nʼ xúgíʼ dí Jeobá niʼniwíi rá.

¹⁶ Xúgíʼ dí niʼniwíi Jeobá ma̱ngaa naʼni dí bi̱ kúwá náa mbá guʼwíin muni̱ gagimijná ga̱jma̱a̱, rúʼko̱ eʼni dí makuwá itháán kambájxu̱u̱n. Náa Biblia naʼthí dí rígá “mbiʼi rí mundu̱ʼwa̱” ga̱jma̱a̱ “mbiʼi rí makixáanʼ” (Ecl. 3:1, 4). Jeobá niʼniwíi mbaʼa dí mitsaanʼ mu ma̱ndoo muʼni dí nanigulúʼ. Mbaʼin bi̱ kúwá náa mbá guʼwíin nanigu̱nʼ muríyaʼ mbiʼi mu magún gúni gagimijná náa xanáá náa kúbá o náa playa. Tikhunʼ e̱ji̱n nanigu̱nʼ magáñún o muʼtsíin náa mbóoʼ parque, mbuñún xujkhúʼ o magún gútsíin náa iyaʼ. Rígá mbaʼa enii dí xú káʼnii ma̱ndoo muʼni gagimijná ga̱jma̱a̱ xúgííʼ dí Jeobá niʼniwíi.

17. Náá numuu dí xabuanii gíʼmaa mumbañún e̱jñu̱ún manigu̱u̱nʼ dí niʼniwíi Jeobá rá.

¹⁷ Náa numbaaʼ nuxi̱ʼ, xabuanii gajmiún e̱jñu̱ún ra̱ʼkhá tháán gánigu̱u̱n xúgíʼ dí Jeobá gaʼniwíi. Ní xámiñúlú gúni̱ xujkhúʼ ní má ikhiin xámiñún kuyulú (Is. 11:6-9). Maguaʼdáá mbiʼi mu mbuʼyáá xúgíʼ dí Jeobá niʼniwíi (Sal. 22:26). Mú, ikháanʼla xabuanii xúguaʼthi̱i̱nla asndu ikhú mu muthu̱u̱n e̱jña̱la mbuyáá dí nigumawíi ga̱jma̱a̱ ndiéjunʼ dí gajmañún numuu Jeobá ikhí. Á mu numbáñúlá asndu nákha xúgi̱, rígi̱ gáʼni dí ikhiin maku̱mu̱ún xó má rey David, ikhaa niʼthí: ‹Nda̱wa̱a̱ i̱mba̱ ki xóo ikháán Jeobá, ní má nda̱a̱ i̱ʼwáʼ dí niguma xóo dí nitaniwíi ikháán› (Sal. 86:8).