Náá numuu dí “xa̱bu̱” niʼthí dí mbayáa Rut maʼni dí “mandáti̱ga̱a̱” dí gíʼdoo rá. (Rut 4:1, 6.)

Nákha mbiʼi dí nikúwíin israelitas, á mu mbáa xa̱bu̱ bi̱ gíʼdaa a̱ʼgiu̱u̱ nakháñúu dí asndu na̱nguá nigiʼdiin e̱ji̱i̱n, mbaʼin nurajximíjna̱. Tsáá gágúu jmbayuuʼ xá. Mandáti̱ga̱a̱ mbájkuún mbiʼyuu xáʼ. Graxe̱ xóo rígi̱ naxtiʼña̱a̱ náa Xtángoo dí niʼnirámáʼ Moisés.

Á mu mbáa xa̱bu̱ nakháñúu o nagujua̱a̱ jmbayuuʼ numuu dí niguanúu gínáa, mbáa ndxájuu o mbáa bi̱ kaʼyoo ma̱ndoo maʼtsi̱i̱ jmbayuuʼ, mu xúʼko̱ jmbaaʼ rúʼko̱ maʼni má ndrígu̱ún bi̱ kaʼñún (Lev. 25:23-28; Núm. 27:8-11).

Ndiéjuunʼ eni̱ mu xándáti̱ga̱a̱ mbiʼyuu xa̱bu̱ bi̱ nikháñuu xá. Ndxájuu o giʼtio̱o̱ xa̱bu̱ bi̱ nikháñuu ma̱ndoo mbayáa a̱ʼgú xuáʼa buʼko̱, mú xúʼko̱ magiʼdaa ada̱ bi̱ mbayá mbiʼyuu xa̱bu̱ bi̱ nikháñuu ga̱jma̱a̱ magruigúu dí kaʼyoo. Índo̱ nuni̱ rígi̱ nambáyúu ma̱ngaa a̱ʼgú xuáʼa mu xáʼyóoʼ nimbá (Deut. 25:5-7; Mat. 22:23-28).

Gundxaʼwamíjna̱ ga̱jma̱a̱ numuu Noemí, ikhaa ndiyáa Elimélec, mú índo̱ Elimélec nikháñúu gajmíi̱n e̱ji̱i̱n, ndáwa̱a̱ nimbáa xa̱biya̱ tsáa ma̱ndoo maxnúún rí nda̱ñúunʼ gu̱ʼú xuáʼa (Rut 1:1-5). Índo̱ Noemí nitanga̱a̱ náa Judá niʼthúu̱n guʼgiúunʼ dí maʼthúu̱n Boaz rí maʼtsi̱i̱ jmbayuuʼ, ikhaa nindxu̱u̱ mbáa xa̱bu̱ bi̱ kaʼyoo Elimélec (Rut 2:1, 19, 20; 3:1-4). Mú Boaz ndiʼyoo dí xtáa mbáa “xa̱bu̱ bi̱ kaʼyoo itháán mijngii” Noemí, ga̱jma̱a̱ dí xa̱bu̱ buʼko̱ nindxu̱u̱ ginii bi̱ ma̱ndoo mambáyúu (Rut 3:9, 12, 13).

Nákha wapháá xa̱bu̱ buʼko̱ nindoo maʼtsi̱i̱ ku̱ba̱ʼ (Rut 4:1-4). Maski ajndu ndiʼyoo dí mitsidanʼ numuu, ga̱jma̱a̱ dí Noemí nikhi̱i̱ má mu magiʼdaa mbáa ada̱ bi̱ magruigúu dí kaʼyoo Elimélec. Rígi̱ niʼni mbaʼyoo dí nindxu̱u̱ májánʼ ga̱jma̱a̱ dí ku̱ba̱ʼ rúʼko̱ maʼni̱i̱ ndrígóo ikhaa.

Mú índo̱ ni̱jkha̱nú ndiʼyoo rí ndayóoʼ mbayáa Rut, ikhú niraʼwíí dí xáʼtsi̱i̱ má jmbaaʼ rúʼko̱. Ikhaa niʼthí: “Xándoo matsiríya̱a̱ʼ numuu rí gamíi mandáti̱ga̱a̱ rí gúʼdoo ikhúún gáʼni” (Rut 4:5, 6). Náá numuu niʼthí mbu̱júu̱ʼ dí xáʼtsi̱i̱ xá.

Á mu xa̱bu̱ bigi̱ o imba̱a̱ xa̱bu̱ bi̱ kaʼyoo mijngii Noemí ndayáa Rut ga̱jma̱a̱ nagiʼdaa a̱ʼdióo, ada̱ buʼko̱ magruigúu jmbayuuʼ Elimélec. Náá numuu gándáti̱ga̱a̱ jmbayuuʼ xa̱bu̱ bigi̱ á mu narígá xúʼko̱ rá. Náa Biblia tséʼthí. Mú gundxaʼwamíjna̱ tikhuu numuu.

• Timbá, mbáa nindxa̱ʼwáminaʼ dí mbaʼ gátsíjmuú mbújkho̱o̱, numuu dí ku̱ba̱ʼ ndrígóo Elimélec maʼni̱i̱ ndrígóo a̱ʼdióo Rut raʼkháa ndrígóo ikhaa.

• Ragajma, mbaʼyóoʼ maxnúu dí ndayóoʼ Noemí ga̱jma̱a̱ Rut.

• Ragajtsú, á mu dí ikhaa ga̱jma̱a̱ Rut nagua̱ʼdi̱i̱n itháan e̱jñu̱ún, e̱ji̱n buʼko̱ mbaʼyóoʼ muñajunʼ mbóó gajmiún e̱ji̱nʼ bi̱ gíʼdiin má xa̱biya̱.

• Rí maʼni a̱jkhu̱, á mu dí xa̱biya̱ buʼko̱ na̱nguá gíʼdiin e̱ji̱n, bi̱ gágiʼdiin gajmíi̱n Rut muda̱a̱ jmbayuuʼ Elimélec ga̱jma̱a̱ ndrígóo ikhaa. Xúʼko̱ gándáti̱ga̱a̱ jmbayuuʼ dí magruigúu ada̱ bi̱ magu̱ mbiʼyuu Elimélec. Xa̱bu̱ buʼko̱ tándoo mandáti̱ga̱a̱ jmbayuuʼ mu mambáyúu Noemí. Ndiʼyoo dí itháán májánʼ má gáʼni dí Boaz gáʼtsi̱i̱ jmbaaʼ rúʼko̱, numuu dí ikhaa nindxu̱u̱ imba̱a̱ bi̱ ma̱ndoo maʼtsiríyáaʼ jmbaaʼ. Boaz ninigu̱u̱ʼ má rígi̱, numuu dí ikhaa nandoo rí jmbayuuʼ xa̱bu̱ bi̱ nikháñúu mayéʼga má mbiʼyuu (Rut 4:10).

Xúgíʼ dí niʼni xa̱bu̱ buʼko̱ nakujmaa dí i̱ndó nindoo dí xandatiga̱a̱ mbiʼyuu ga̱jma̱a̱ dí nigiʼdoo. ¡I̱ndó nixmiéjuunʼ kaʼyaminaʼ ikhaa! Mú xúgííʼ dí niʼni nda̱a̱ dí nijma̱a̱, numuu dí nimbáa na̱nguá nirmáʼáan a̱jkiu̱u̱n kaʼyoo nda̱wa̱á. Nindáti̱go̱o̱ mbóoʼ dí mitsaanʼ wéñuʼ dí nigiʼdoo Boaz: Numuu dí náa ikhaa ni̱ʼkha̱ Jesucristo bi̱ nindxu̱u̱ Mesías (Mat. 1:5; Luc. 3:23, 32). Phú ngíná dí xa̱bu̱ buʼko̱ i̱ndó nixmiéjunʼ kaʼyaminaʼ ikhaa ga̱jma̱a̱ mbáa bi̱ itháán ndiyóoʼ.