1, 2. a) Ndiéjunʼ erígá índo̱ mbáa najngúun iyááʼ rá. b) Ndiéjunʼ gúʼnigajma̱a̱ náa artículo rígi̱ rá.

 LÁ NITAÑÚN mbá miʼtsu bi̱ inu majngún iyááʼ ráʼ. Índo̱ nuriʼña̱a̱ a̱jma̱ graxe̱ rí naʼñúún bi̱ naxná discurso, ikhú nawáán dí nuriʼña ga̱jma̱a̱ xúgíʼ a̱jkiu̱ún. Bi̱ kuñúún ga̱jma̱a̱ bi̱ nambájxu̱u̱n gajmiún ra̱ʼkhá tháán nadxún. Índo̱ ikhiin nagájnáa náa iyaʼ nakujmaa dí nadxuu a̱jkiu̱ún ga̱jma̱a̱ bi̱ kúwá ikhí ra̱ʼkhá tháán nawáán dí nuxuba̱a̱ ñawúúnʼ. Mámbá xmáná mbaʼin wéñuuʼ nuraʼwíí muni̱ rígi̱, xúʼko̱ naguánu nanindxu̱ún xa̱bi̱i̱ Jeobá bi̱ nuxnaximíjna̱ ga̱jma̱a̱ najngún iyááʼ.

² Á mu ikháán natatsaʼwáminaʼ rí majnguáanʼ iyááʼ, rúʼko̱ eyoo gaʼthí dí “xtaa ratayáaʼ Jeobá” ga̱jma̱a̱ rúʼko̱ eʼni dí maxpíbinʼ náa numbaaʼ rí mikrína rígi̱ (Sal. 14:1, 2). Tséʼñuu á mu nindxa̱a̱ʼ dxámá o dxáʼgú o xa̱bu̱ nikhi̱i̱ má. Artículo rígi̱, nigumaratoo mu mambáyáaʼ. Gi̱jyooʼ gúʼnigajma̱a̱ káaʼ ajtsú numuu dí rígá mu matani ñajuunʼ Jeobá. Mú, lá mambáñún mangiin bi̱ nijngún má iyááʼ ráʼ. Artículo rígi̱, mambáñún mu muni̱ má xúʼko̱ ñajuunʼ Jeobá kámuu mbiʼi.

3. Ndíjkha rí bi̱ nindxu̱lú xa̱bi̱i̱ Jeobá nandulú kuʼyáá dí gajkhun ga̱jma̱a̱ rí jmbu rá. (Salmo 119:128, 163.)

³ Jeobá nixnúún xtángoo rígi̱ xa̱bi̱i̱: “Gaʼndala ku̱ya̱a̱ rí gajkhun” (Zac. 8:19). Ga̱jma̱a̱ Jesús niʼthí dí gíʼdoo wéñuuʼ numuu dí mbuʼyáʼ dí jmbu (Mat. 5:6). Rígi̱ eyoo gáʼthúu̱n dí gíʼma maʼndulú kuʼyáá ga̱jma̱a̱ xúgíʼ tsiakii ndrígulú mu mu̱ʼni̱ rí jmbu, rí májánʼ ga̱jma̱a̱ dí raʼkhí xó má eyoo Dios. Lá nandaaʼ xtayáá dí gajkhun ga̱jma̱a̱ rí jmbu ikháán ráʼ. Mbáa xúʼko̱, ikha jngóo ikháán nditháan tsínigua̱ʼ dí minduwaʼ, xúgíʼ dí raʼkhí  ga̱jma̱a̱ dí xkawiʼ dí rígá (atraxnuu Salmo 119:128, b 163 c). Bi̱ nuninduwaʼ nuni̱ xó má eʼni Gixa̱a̱ bi̱ naʼtáñajunʼ náa numbaaʼ rígi̱ (Juan 8:44; 12:31). Mbá dí itháán nandoo Gixa̱a̱ nindxu̱u̱ dí mani gachúu mbiʼyuu Jeobá rí nindxu̱u̱ mikaʼwu. Ikhaa na̱ʼkha̱ raʼthí má xúʼko̱ rí minduwaaʼ ga̱jma̱a̱ numuu Jeobá asndu má nákha náa ku̱ba̱ʼ mitsaanʼ Edén. Ikhí niʼthí dí Jeobá na̱nguá eʼtáñajunʼ májánʼ ga̱jma̱a̱ i̱ndó ndayáʼ rí nandoo ikhaa, rí minduwaaʼ ga̱jma̱a̱ dí tsíyoo dí xa̱bu̱ numbaaʼ mundrígú dí májánʼ (Gén. 3:1, 4, 5). Numuu xúgíʼ minduwaaʼ dí naʼthí, mbaʼin xa̱bu̱ naku̱mu̱ún dí raʼkhí ga̱jma̱a̱ numuu Jeobá. Índo̱ xa̱bu̱ nuraʼwíi dí xáʼndúún kuyáá dí gajkhun, ikhú Gixa̱a̱ na̱jkha̱ kagui̱i̱n mu muni xúgíʼ dí raʼkhí ga̱jma̱a̱ dí xkawiʼ (Rom. 1:25-31).

4. Xú káʼni nisngájmaa Jeobá dí nindxu̱u̱ “Dios bi̱ gajkhun” rá. (Atayáá xtiʼkhu.)

⁴ Jeobá nindxu̱u̱ “Dios bi̱ gajkhun” ga̱jma̱a̱ tséjmídúu maʼsngúún dí gajkhun xa̱bu̱ bi̱ nandún kuyáá (Sal. 31:5). Xúʼko̱ narmbáʼta̱a̱ idún ga̱jma̱a̱ naʼni káwíin náa minduwaʼ ndrígóo Gixa̱a̱. Ma̱ngaa Jeobá naʼsngúún xa̱bi̱i̱ muthi dí gajkhun ga̱jma̱a̱ muni̱ dí gajkhun, rúʼko̱ naʼni dí makuwá ga̱jma̱a̱ gamajkhu ma̱ngaa makuwá tsímáá (Prov. 13:5, 6). Lá nitayáá ikháán rúʼko̱ asndu má nákha nitagíʼdi̱i̱ nitanigajma̱a̱ Biblia ráʼ. Nijmañaaʼ dí i̱ndó ikha rí naxná Jeobá nindxu̱u̱ rí itháán májánʼ mu muguaʼdáá xa̱bu̱ numbaaʼ ga̱jma̱a̱ ikháán (Sal. 77:13). Ikha jngóo nandaaʼ matanimbáníí xúgíʼ rí Dios naʼthí rí májánʼ (Mat. 6:33). Nandaaʼ marasngúún eʼwíinʼ rí gajkhun ga̱jma̱a̱ dí Gixa̱a̱ niʼninduwaʼ índo̱ niʼthá numuu Dios ndrígulú, Jeobá. Mú, xú káʼnii gándoo gátani̱ rúʼko̱ rá.

5. Ndiéjunʼ ma̱ndoo matani̱ ikháán mu maratambáyíí dí gajkhun ga̱jma̱a̱ dí jmbu rá.

⁵ Rí ikháán gátani̱, gasngájmúún eʼwíinʼ rí nathani gaʼduunʼ xúgíʼ minduwaaʼ dí naʼthí Gixa̱a̱ ga̱jma̱a̱ naratambáyíí dí gajkhun, dí nandaaʼ dí Jeobá maʼtáñájuaanʼ ga̱jma̱a̱ nandaaʼ matanimbaaʼ xúgíʼ dí naʼthí ikhaa dí májánʼ. Mu makujmaa dí rúʼko̱ nandaaʼ, gíʼmaa maraxna̱a̱ ajngáaʼ Jeobá náa maratha̱a̱n dí matani̱ dí nandoo ikhaa kámuu mbiʼi. Nda̱wa̱á gíʼmaa majnguáanʼ iyááʼ mu matasngajmún náa inúú xúgíinʼ dí niraxnáximinaʼ náa ikhaa. Rí nandaaʼ xtayáá rí gajkhun ga̱jma̱a̱ rí jmbu nindxu̱u̱ mbá rí gíʼdoo numuu mu maxkajxi̱i̱n majnguáanʼ iyááʼ.

6. Xó má eʼthí náa Salmo 45:4, ndíjkha rí gíʼmaa maʼndaaʼ xtayáá Jesús rá.

⁶ Ndíjkha rí nandaaʼ xtayáá Jesús ikháán rá. Nuxkamaa tikhu rí gíʼdoo numuu náa Salmo 45:4 d (atraxnuu). Jesús nindxu̱u̱ xa̱bu̱ wabaaʼ, naʼthí dí gajkhun ma̱ngaa naʼni dí jmbu ga̱jma̱a̱ ikhaa nandoo dí eʼwíinʼ muni xúʼko̱ ma̱ngaa. Ikha jngóo, á mu ikháán nandaaʼ xtayáá dí gajkhun ga̱jma̱a̱ dí jmbu, ma̱ngaa gíʼmaa maʼndaaʼ xtayáá Jesús. Atatsaʼwáminaʼ xúgíʼ tsiakii dí Jesús nigiʼdoo mu mambáyúu marígá dí gajkhun ga̱jma̱a̱ dí jmbu (Juan 18:37). Mu xú káʼnii nisngájma dí nindxu̱u̱ xa̱bu̱ wabaaʼ ga̱jma̱a̱ dí nindoo dí marígá xá.

7. Ndiéjunʼ itháan nanigua̱a̱ʼ eʼni xóo nasngájmaa Jesús dí nindxu̱u̱ xa̱bu̱ wabaaʼ ráʼ.

⁷ Jesús nigíʼ xkri̱da mu mangáanʼ manindxu̱lú mbáa xa̱bu̱ wabaaʼ. Niʼni mba̱a̱ má xúʼko̱ Anu̱u̱, nditháan táyáʼ dí maguma mba̱a̱ ikhaa (Mar. 10:17, 18; Juan 5:19). Xú káʼni tayáá ikháán xóo nisngájma Jesús dí nindxu̱u̱ xa̱bu̱ wabaaʼ rá. Lá tsíxkajxi̱i̱n maʼndaaʼ xtayáá A̱ʼdióo Dios ga̱jma̱a̱ rí matayaridáá xáʼ. Mbáa xúʼko̱. Náá numuu dí ra̱ʼkhá tháán nindxu̱u̱ xa̱bu̱ wabaaʼ xáʼ. Numuu dí Jeobá nindxu̱u̱ xúʼko̱ ga̱jma̱a̱ Jesús nandoo kaʼyoo ma̱ngaa ra̱ʼkhá tháán májánʼ ndaʼyaridoo xu kaʼnii Anu̱u̱ (Sal. 18:35; Heb. 1:3). Lá ragájkhun dí rígi̱ naʼni dí maʼndaaʼ xtayáá itháan Jesús ráʼ.

8. Náá numuu nanigulúʼ dí Jesús nindxu̱u̱ Rey ndrígulú rá.

⁸ Nanigulúʼ dí Jesús nindxu̱u̱ Rey ndrígulú numuu rí ikhaa nindxu̱u̱ ra̱ʼkhá tháán májáanʼ bi̱ maʼtáñajunʼ. Mínaaʼ má Jeobá niʼnirataa ga̱jma̱a̱ nigíiʼ mani̱ndxu̱u̱ Rey (Is. 50:4, 5). Atatsaʼwáminaʼ ga̱jma̱a̱ numuu xóo nisngájma Jesús dí nandoo kaʼyulú dí niʼni gínáminaʼ ga̱jma̱a̱ numulú (Juan 13:1). Numuu dí Jesús nindxu̱u̱ Rey ndrígulú, ikhaa kaʼyoo dí maʼndulú kuʼyáá. Ikhaa niʼthí dí xa̱bu̱ bi̱ nandún kuyáá (bi̱ Jesús ndaʼñún xóo migiuuʼ) nusngajma rígi̱ índo̱ nunimbún kiʼtáñajunʼ ndrígóo (Juan 14:15; 15:14, 15). ¡Ra̱ʼkhá tháán mitsaan dí ma̱ndoo mambájxulú gajmiulúʼ A̱ʼdióo Jeobá!

9. Ndiéjunʼ dí nambríguii xóo nijngúun iyááʼ Jesús ga̱jma̱a̱ xóo najngún iyááʼ xa̱bi̱i̱ rá.

⁹ Mbá kiʼtáñajunʼ ndrígóo Jesús nindxu̱u̱ dí xa̱bi̱i̱ majngún iyááʼ (Mat. 28:19, 20). Ikhaa mínaʼ nigíʼ xkri̱da. Maski ajndu rígá dí naʼni mixtiʼkhu xóo nijngúun iyááʼ ikhaa ga̱jma̱a̱ xóo nijngún iyááʼ xa̱bi̱i̱ mu ma̱ngaa rígá dí naʼni mbríguii (atayáá náa kúgumaʼá “ Rí mixtiʼkhu xóo nijngúun iyááʼ Jesús ga̱jma̱a̱ xóo najngún iyááʼ xa̱bi̱i̱”). Mbá xkri̱da índo̱ Jesús nijngún iyááʼ nixnáximinaʼ mu maʼni dí nandoo Anu̱u̱ (Heb. 10:7). Ikhaa má kayuuʼ rígá ga̱jma̱a̱ numún xa̱bi̱i̱ ma̱ngaa. Índo̱ najngún iyááʼ nusngajmaa náa inúú xúgíinʼ xa̱bu̱ dí nixnaxímíjná náa Jeobá ga̱jma̱a̱ dí itháán gíʼdoo numuu eyá ikhiin nindxu̱u̱ dí muni̱ dí nandoo Dios, raʼkháa dí nandún ikhiin. Índo̱ nuni̱ rígi̱ nduyaridáá xkridoo Jesús.

10. a) Náá numuu dí gíʼmaa maʼndaaʼ xtayáá Jesús rá. b) Ndiéjunʼ gáxkajxi̱i̱n matani ga̱jma̱a̱ numuu di nandaaʼ xtayáá xá.

¹⁰ Ikháán mínaʼ natayáá di mbáwíí Jesús nindxu̱u̱ bi̱ Jeobá niʼnii mínaʼ ikhaa, ma̱ngaa dí nindxu̱u̱ Rey bi̱ nigíiʼ mú maʼtáñajunʼ. Natayáá dí Jesús nindxu̱u̱ mbáa xa̱bu̱ wabaaʼ ga̱jma̱a̱ ndaʼyaridoo májánʼ Anu̱u̱. Nijmañaʼ xu káʼnii nixnúún ganitsu bi̱ nixkidxu̱u̱n niʼni a̱jkiu̱ún bi̱ nikáwabiinʼ asndu niʼni thanún bi̱ nindoo káñún (Mat. 14:14-21). Ma̱ngaa natayáá dí nayéjkha̱ edxu̱u̱ náa xuajñuu Jeobá di mbiʼi xúgi̱ (Mat. 23:10). Ma̱ngaa natayáá rí índo̱ magiʼi mani̱ndxu̱u̱ xa̱bu̱ ñajunʼ ndrígóo Dios maʼni rí mitsaan ga̱jma̱a̱ numún xa̱bu̱ nda̱wa̱á. Xú káʼnii gándoo gatasngajmá  dí nandaaʼ xtayáá xáʼ. Índo̱ natayaridáá xkridoo (Juan 14:21). Ikha jngóo rí ma̱ndoo matani nindxu̱u̱ dí maraxnaxíminaʼ náa Jeobá ga̱jma̱a̱ majnguáanʼ iyááʼ.

11. Ndiéjunʼ dí itháán gíʼdoo numuu mu majnguáanʼ iyááʼ rá.

¹¹ Ndiéjunʼ nindxu̱u̱ dí itháán gíʼdoo numuu mu majnguáanʼ iyááʼ ráʼ. Jesús niʼthí ndiéjunʼ nindxu̱u̱, índo̱ niʼthúlú kiʼtáñajunʼ dí itháán gíʼdoo numuu: “Gaʼndaaʼ xtayáá Jeobá Dios ndrígáaʼ ga̱jma̱a̱ xúgíʼ a̱jkia̱a̱nʼ, ga̱jma̱a̱ xúgíʼ xóo nindxa̱a̱ʼ ga̱jma̱a̱ xúgíʼ ku̱ma̱ ndrígáaʼ” (Mar. 12:30). Lá xúʼko̱ nandaaʼ xtayáá Jeobá ikháán ráʼ.

12. Ndíjkha dí nandaaʼ xtayáá ikháán Jeobá rá. (Atayáá xtiʼkhu.)

¹² Rígá mbaʼa numuu dí maʼndulú kuʼyáá Jeobá. Mbá xkri̱da, ikháán nijmañaaʼ rí náa ikhaa “na̱ʼkha̱ rí nandoo nduya” ga̱jma̱a̱ xúgíʼ dí naxnúlú “nindxu̱u̱ májánʼ ga̱jma̱a̱ nindxu̱u̱ kájxi̱” (Sal. 36:9; Sant. 1:17). Xúgíʼ rí májánʼ dí xtaʼdáá na̱ʼkha̱ náa Jeobá, ikhaa tséjmídúu ga̱jma̱a̱ nandoo kaʼyulú wéñuuʼ.

13. Ndíjkha dí nijuiʼtsiwáanʼ nindxu̱u̱ mbá regalo kiejunʼ rá.

¹³ Dí nijuiʼtsiwáanʼ nindxu̱u̱ mbá regalo kiejunʼ dí naxnúlú Jeobá. Náá numuu nuʼthá xígi̱ rá. Gundxaʼwamíjna̱ nguáthá mba̱a̱ nandún kuyamijná Jeobá ga̱jma̱a̱ A̱ʼdióo. Jesús niʼthí: “Anu̱ʼ nandoo kaʼyoʼ” ga̱jma̱a̱ ikhúún “nandoʼ ka̱yo̱o̱ Anu̱ʼ” (Juan 10:17; 14:31). Numuu  dí ra̱ʼkhá tháán mbayuʼ tsiguʼ nikúwíin jnduʼ ikha jngóo nimbájxu̱u̱n wéñuuʼ (Prov. 8:22, 23, 30). Atatsaʼwáminaʼ nguáthá mba̱a̱ nigawúunʼ Jeobá índo̱ niniñuuʼ dí A̱ʼdióo mamínuuʼ ga̱jma̱a̱ dí muxiyáa. Mú, Jeobá nandoo kaʼñún wéñuuʼ xa̱bu̱ numbaaʼ ga̱jma̱a̱ nandoo kaʼyaaʼ ikháán, ikha jngóo nixnájxi̱i̱ A̱ʼdióo xóo mbá tsigijñaʼ mu ikháán ga̱jma̱a̱ eʼwíinʼ xa̱bu̱ ma̱ndoo makuwá kámuu mbiʼi (Juan 3:16; Gál. 2:20). Nda̱a̱ imbo̱ʼ dí itháán gíʼdoo numuu mu maʼndaaʼ xtayáá Jeobá.

14. Ndiéjunʼ nindxu̱u̱ dí itháán májánʼ matraʼwíí matani rá.

¹⁴ Xúgíʼ dí natayáá ga̱jma̱a̱ numuu Jeobá naʼni dí maʼndaaʼ xtayáá itháán. Mbáa nandaaʼ dí mambájxáaʼ itháán ga̱jma̱a̱ʼ xúgi̱ ga̱jma̱a̱ asndu kámuu. Ma̱ndoo marígá rígi̱ á mu dí naratá ga̱jma̱a̱ dí natani̱ naʼni maʼdxuu a̱jkiu̱u̱n Jeobá. Ikhaa mínaʼ naxkajxi̱i̱n mu matani rígi̱ (Prov. 23:15, 16). Dí gátraʼwíí matani̱ masngájma á mu gajkhun nandaaʼ xtayáá Jeobá (1 Juan 5:3). Rígi̱ nindxu̱u̱ dí itháán májánʼ dí mataʼgíʼ matani.

15. Xú káʼni gándoo gatasngajmá dí nandaaʼ xtayáá Jeobá ráʼ.

¹⁵ Xú káʼni gándoo gátasngajmáá dí nandaaʼ xtayáá Jeobá rá. Ginii ndayóoʼ maratajkáan kiejuunʼ náa maratha̱a̱n Jeobá dí nataxnáximina mu matani dí nandoo ikhaa, bi̱ nindxu̱u̱ Dios bi̱ gajkhun (Sal. 40:8). Nda̱wa̱á, gíʼmaa majnguáanʼ iyááʼ mu matasngajmún eʼwíinʼ dí niraxnáximinaʼ náa Jeobá. Xó má niʼthá nákha ginii, rígi̱ nindxu̱u̱ mbá mbiʼi kiejuunʼ ga̱jma̱a̱ gagi dí gíʼdoo wéñuuʼ numuu. Mbiʼi rúʼko̱ ni xáraxtaa xó nandaaʼ ikháán, maraxtaa xóo nandoo Jeobá (Rom. 14:8; 1 Ped. 4:1, 2). Mbáa maku̱ma̱a̱ʼ dí rígi̱ nindxu̱u̱ ra̱ʼkhá tháán miʼskhoo matraʼwíí matani. Mu á mu natraʼwíí majnguáanʼ iyááʼ ma̱ta̱ya̱a̱ dí maraxtaa itháán májánʼ. Guʼyáá náa numuu.

16. Xó má eʼthí náa Salmo 41:12, xú káʼni gaʼni tsajkurámiinʼ Jeobá bi̱ nuraʼwíí muni ñajuunʼ rá.

¹⁶ Nda̱wa̱a̱ imba̱a̱ xóo Jeobá bi̱ tséjmídúu, tséʼniuu guata ma gáraxna̱a̱ ikhaa maxnáa itháán (Mar. 10:29, 30). Asndu ma nákha xúgi̱ di inu martumuu mbiʼi Jeobá ma̱ndoo maʼni di maraxtaa mitsaan, tsímáá ga̱jma̱a̱ gagi xóo nditháan táraxtaa. Rígi̱ ndiʼkhún gi̱ʼdu̱u̱. Xóo maraxtaa nda̱wa̱á di nijnguán iyááʼ tséʼyoo martumuu, ma̱ndoo matani má xúʼko̱ di nandoo Ana̱a̱ʼ Jeobá asndu kámuu mbiʼi. Di nandaaʼ xtayáá ikháán ga̱jma̱a̱ xó má nandoo kaʼyaaʼ  ikhaa maʼga ra̱ja̱a̱ itháán ga̱jma̱a̱ ikháán ma̱ndoo maraxtaa xó má ikhaa, asndu kámuu mbiʼi (atraxnuu Salmo 41:12). e

17. Ndiéjunʼ nindxu̱u̱ dí na̱nguá gíʼdoo Jeobá dí ma̱ndoo maraxna ikháán rá.

¹⁷ Índo̱ naraxnáximinaʼ ga̱jma̱a̱ majnguáanʼ iyááʼ, ikháán xtaʼdáá mbóoʼ dí gíʼdoo wéñuuʼ numuu mú maraxna Ana̱a̱ʼ. Xúgíʼ rí májánʼ dí xtaʼdáá ga̱jma̱a̱ xóo niraxtaa, naraxnáá Jeobá. Ma̱ngaa ma̱ndoo maraxna̱a̱ bi̱ niʼni mekhuíí ga̱jma̱a̱ niʼni ku̱ba̱ʼ mbóoʼ di na̱nguá gíʼdoo ikhaa rí mañajún jmbu ga̱jma̱a̱ rí matani ñajuunʼ tséʼniuu má asndu ndiéjunʼ má gátraʼníí (Job 1:8; 41:11; Prov. 27:11). Nda̱a̱ imbo̱ʼ xóo maraxtaa, xó má eʼyáá rí maʼndaaʼ xtayáá Jeobá nindxu̱u̱ dí itháán gíʼdoo wéñuuʼ numuu majnguáanʼ iyááʼ.

18. Ndiéjunʼ ma̱ndoo matrajximínáʼ rá.

¹⁸ Nda̱wa̱á dí ndiʼyáálú mbá xúgíʼ rígi̱, lá nandaaʼ majnguáanʼ iyááʼ ráʼ. I̱ndó ikháán ma̱ndoo matriʼña̱a̱ graxe̱ rígi̱. Imbo̱o̱ di ma̱ndoo mambáyáaʼ nindxu̱u̱ di matrajximínáʼ: “Lá xtaa xawii mu majngúnʼ iyááʼ ráʼ.” (Hech. 8:36.) Garmáʼáan a̱jkia̱a̱nʼ ajtsú enii di ndiʼyáálú dí maʼni majnguáanʼ iyááʼ. Ginii: Rí nandaaʼ xtayáá rí gajkhun ga̱jma̱a̱ rí jmbu. Atrajxi̱mínáʼ: “Lá nandoʼ maʼga̱nú mbóoʼ mbiʼi dí xúgíinʼ xa̱bu̱ mutha dí gajkhun ga̱jma̱a̱ muni dí jmbu ráʼ.” Ragajma: Rí nandaaʼ xtayáá Jesús. Atrajxi̱mínáʼ: “Lá nandoʼ dí A̱ʼdióo Dios mani̱ndxu̱u̱ Rey ndrígóo ga̱jma̱a̱ nandoʼ mani dí ikhaa naʼni ráʼ.” Ragajtsú, dí itháán gíʼdoo numuu: Rí nandaaʼ xtayáá Jeobá. Atrajxi̱mínáʼ: “Lá nandoʼ mani ñajuunʼ Jeobá ga̱jma̱a̱ mani maʼdxun a̱jkiu̱u̱n ráʼ.” Á mu nitriʼña̱a̱ dí xúʼko̱ graxe̱ rígi̱. Ndíjkha na̱nguá ejnguáanʼ iyááʼ rá. Dí lá erikhaaʼ rá. (Hech. 16:33.)

19. Ndíjkha rí na̱nguá gíʼmaa matani a̱jma̱ a̱jkia̱a̱nʼ mu majnguáanʼ iyááʼ rá. Atagíʼ mbá xkri̱da (Juan 4:34.)

¹⁹ Á mu xó tsétayáá xi majnguáanʼ iyááʼ, atatsaʼwáminaʼ xkridoo Jesús (atraxnuu Juan 4:34). Jesús niʼthí dí maʼni dí nandoo Anu̱u̱ nindxu̱u̱ asndu xóo mbó ganitsu. Náá numuu rá. Numuu rí ganitsu nambáyulú. Jesús ndaʼyoo rí xúgíʼ dí Jeobá na̱ndu̱ʼu̱lú, ikháanʼ má gámbáyulú. Jeobá xánduʼulú mbá dí maʼni gawúnlú. Ikhaa nandoo dí majnguáanʼ iyááʼ (Hech. 2:38). Ikha jngóo ma̱ndoo maʼni kañiiʼ a̱jkia̱a̱nʼ dí rígi̱ maʼni dí maraxtaa májánʼ. Lá ragájkhun dí miʼtsu mbá nacha̱ mbá ganitsu dí ra̱ʼkhá tháán miʼtsí náa xúgíʼ numbaaʼ ráʼ. Xúʼko̱ má gíʼmaa matani ma̱ngaa dí majnguáanʼ iyááʼ.

20. Ndiéjunʼ guʼyáá náa imbo̱ʼ artículo rá.

²⁰ Ndiéjunʼ erikún eʼwíinʼ mu xájngúnʼ iyááʼ rá. Naku̱mu̱ún di na̱nguá kúwi̱i̱n xawii, gajkhun má di matraʼwi̱i̱ maraxnajximinaʼ mu majnguáanʼ iyááʼ nindxu̱u̱ rí gíʼdoo wéñuuʼ numuu matani̱. Atatsaʼwáminaʼ májánʼ, atríya̱ʼ mbiʼi, atagíminaʼ maraxtaa xawii. Á mu ikháán nandaaʼ majnguáanʼ iyááʼ ndiéjunʼ gámbáyáaʼ mú maraxtaa xawii rá. Mbuʼyáálú náa imbo̱ʼ artículo.