1, 2. Á mu xóó na̱nguá xtaa xawii majnguáanʼ iyááʼ, náá numuu dí xáʼyóoʼ maxmiéjuanʼ rá. (Atayáá xtiʼkhu dí na̱ʼkha̱ náa timbá ináa.)

 Á MU ikháán nandaaʼ majnguáanʼ iyááʼ, nutha̱a̱nʼxu dí májánʼ nindxu̱u̱ dí natatsaʼwáminaʼ rígi̱. Xtaa má xawii dí majnguáanʼ iyááʼ ráʼ. Á mu ikháán naku̱ma̱a̱ʼ dí xtaa xawii ga̱jma̱a̱ a̱ngiu̱lú bi̱ kuya̱ edxu̱u̱ nuthi rí ma̱ndoo má, xátani a̱jma̱ a̱jkia̱a̱nʼ rí majnguáanʼ iyááʼ wapháá, rúʼko̱ gámbáyáaʼ maraxtaa tsímáá ratani̱ ñajuunʼ Jeobá.

² Mú xájmáanʼ á mu nitha̱nʼ dí na̱nguá xóó xtaa xawii majnguáanʼ iyááʼ o á mu ikháán naku̱ma̱a̱ʼ dí xóó na̱nguá xtaa xawii. Ikháán ma̱ndoo mataniminaʼ má xúʼko̱ mu mi̱dxu̱ʼnú majnguáanʼ iyááʼ, tséʼniuu á mu nindxa̱a̱ʼ dxámá, dxáʼgú o xa̱bu̱ nikhi̱i̱.

3. Ndiéjunʼ niʼthúu̱n Felipe mbáa xa̱bu̱ ñajunʼ bi̱ na̱ʼkha̱ náa Etiopía rá. Ga̱jma̱a̱ ndiéjunʼ eʼni murajximíjna̱ rá. (Hech. 8:36, 38.)

³ (Atraxnuu Hechos 8:36, 38). Mbáa xa̱bu̱ ñajunʼ bi̱ na̱ʼkha̱ náa Etiopía nirajxu̱u̱ Felipe bi̱ naʼtáraʼa: “Dí lá erikhoʼ rí xájngúnʼ iyááʼ rá.” Nikujmaa kaʼwu dí ikhaa nindoo majngúun iyááʼ. Mú, lá xtáa xawii maʼni mbá dí gíʼdoo wéñuʼ numuu xáʼ.

4. Xú káʼnii nisngájma xa̱bu̱ ñajunʼ etíope dí nindoo majmañuu itháan rá.

⁴ Xa̱bu̱ ñajunʼ bi̱ na̱ʼkha̱ náa Etiopía “ni̱jkha̱ náa Jerusalén mu mbaʼyamajkuu Dios” (Hech. 8:27). Mbáa ikhaa ninindxu̱u̱ bi̱ nirtajximina̱a̱ʼ judío. Nininuuʼ xúgíʼ dí na̱ʼkha̱ náa Escrituras Hebreas ikhí nijmañuu ga̱jma̱a̱ numuu Jeobá. Mú nindoo mbaʼyoo itháan, nisngájma rúʼko̱ índo̱ xtáa raguxnuu rollo dí niʼnirámáʼ profeta Isaías (Hech. 8:28). Rí naʼthí ikhí mingíjyúuʼ makrua̱ʼa̱a̱ʼ. Xa̱bu̱ ñajunʼ etíope nindoo majmañuu itháan, ikha jngóo ndiyáaʼ mbaʼyoo itháan.

5. Ndiéjunʼ niʼni etíope ga̱jma̱a̱ numuu dí nijmañuu rá.

⁵ Xa̱bu̱ buʼko̱ nindxu̱u̱ xa̱bu̱ ñajunʼ bi̱ gíʼdoo numuu bi̱ naʼni ñajunʼ Candace mbáa reina bi̱ xtáa náa Etiopía. “Ikhaa naguxi xúgíʼ mbújkho̱o̱ reina” (Hech. 8:27). Mbáa ikhaa nigiʼdoo mbaʼa ñajunʼ ga̱jma̱a̱ nditháan tségua̱pha̱ mú niriyaʼ mbiʼi mu maʼni ñajuunʼ Jeobá. Raʼkháa i̱ndó nijmañuu dí gajkhun, rí ndiʼyoo rúʼko̱ nixkajxi̱i̱ maʼni. Ikhaa nixtáa xawii maʼga asndu náa templo ndrígóo Jerusalén mu mbaʼyamajkuu Jeobá. Mbáa dí nijkha ikhí mitsínguánʼ wéñuuʼ ga̱jma̱a̱ minumuu nigájnuu, mú xa̱biya̱ bugi̱ nindoo maʼni ñajuunʼ Jeobá, tséʼniuu má nguáthá mba̱a̱ tsiakii gáʼyoo maʼni.

6, 7. Xú káʼnii niʼni xa̱bu̱ ñajunʼ etíope mu maʼndoo kaʼyoo itháan Jeobá rá.

⁶ Felipe niʼthún xa̱bu̱ ñajunʼ etíope mbaʼa rí gíʼdoo numuu rí ikhaa na̱nguá ndiʼyoo, xóo dí Jesús nindxu̱u̱ Mesías (Hech. 8:34, 35). Mbáa etíope buʼko̱ ra̱ʼkhá tháán niniguʼ índo̱ ni̱jkha̱nú nijmañuu xúgíʼ rí Jesús niʼni ga̱jma̱a̱ numuu ikhaa. Ndiéjunʼ gaʼni xá. Ikhaa ma̱ndoo maʼga̱a̱ má xúʼko̱ xó má mbáa bi̱ nirtajximinaaʼ judío. Mú ga̱jma̱a̱ numuu dí ra̱ʼkhá tháán nindoo kaʼyoo Jeobá ga̱jma̱a̱ Jesús, ikha jngóo niraʼwíí mbá rí gíʼdoo wéñuʼ numuu maʼni, rí majngún iyááʼ mu maʼga̱nú mani̱ndxu̱u̱ xa̱bi̱i̱ Jesús. Felipe ni̱jkha̱nú ndiʼyoo dí xtáa xawii mu mani̱ndxu̱u̱, ikha jngóo dí nikumaʼ iyááʼ.

⁷ Xkri̱doo etíope mambáyáaʼ mu matanirataminaʼ majnguáanʼ iyááʼ. Xó má ikhaa ma̱ndoo marata mangáán: “Dí lá erikhoʼ rí xájngúnʼ iyááʼ rá.” Mbuʼyáá xú káʼnii gándoo matani ikháán xó má niʼni ikhaa: Dí mi̱dxu̱ʼ rajmañaʼ má xúʼko̱, dí matanimbánii dí najmañaaʼ ga̱jma̱a̱ rí maʼndaaʼ xtayáá itháán Jeobá.

8. Xó má naʼthí náa Juan 17:3, ndiéjunʼ dí gíʼmaa matani rá.

⁸ (Atraxnuu Juan 17:3). Lá nimbáyaaʼ ajngáa dí niʼthí Jesús mu matagíʼdi̱i̱ matanigajma̱a̱ Biblia ráʼ. Ajngáa rúʼko̱ nimbáñún mbaʼin. Ajngáa rígi̱ ma̱ngaa naxnúlú tsiaki̱i̱ mu muʼnigajma̱a̱ má xúʼko̱ Biblia. Dí mu̱ʼgua̱nú muniʼníi “mbawíí Dios bi̱ gajkuwiin” nindxu̱u̱ mbá rí nditháan xátumuu (Ecl. 3:11). Majmañulú má xúʼko̱ kámuu mbiʼi. Índo̱ guniʼníi itháán Jeobá rúʼko̱ gámbáyulú mu mu̱ʼgua̱ kanuu itháán náa ikhaa (Sal. 73:28).

9. Ndiéjunʼ ndayóoʼ muʼni nda̱wa̱á rí nijmañulúʼ kiʼsngáa dí ra̱mingíjyúuʼ dí na̱ʼkha̱ náa Biblia rá.

⁹ Índo̱ mbáa nagíʼdu̱u̱ najmañuu ga̱jma̱a̱ numuu Jeobá, nagíʼdu̱u̱ najmañuu ga̱jma̱a̱ kiʼsngáa dí ra̱mingíjyúuʼ, dí Pablo nixná mbiʼyuu “nigíʼdi̱i̱ nijmaña”. Na̱nguá eyoo gaʼthí dí ragíʼdoo numuu dí kiʼsngáa dí ra̱mingíjyúuʼ; xtáa raʼthí ga̱jma̱a̱ numuu rí nindxu̱u̱ asndu xóo yáʼdú rí naʼga̱a̱n ada̱ chíʼgíiʼ (Heb. 5:12; 6:1). Ikhaa ma̱ngaa niʼthúún cristianos  dí raʼkháa i̱ndó ndayóoʼ majmañún kiʼsngáa dí ra̱mingíjyúuʼ, gíʼmaa dí majmañún kiʼsngáa dí miʼskhoo dí na̱ʼkha̱ náa Ajngá rawuunʼ Dios. Lá ikháán mangáán naku̱ma̱a̱ʼ rí ndayáa majmañaaʼ kiʼsngáa dí ra̱mingíjyúuʼ dí na̱ʼkha̱ náa Biblia rá.ʼ Lá xtaa xawii majmañaaʼ itháán ga̱jma̱a̱ numuu Jeobá ga̱jma̱a̱ rí nakudaminaʼ maʼni nda̱wa̱á xáʼ.

10. Náá numuu rí tikhun naʼniún miʼskhoo rí munigajma̱a̱ rá.

¹⁰ Tikhun naʼniún miʼskhoo wéñuʼ rí munigajma̱a̱. Ikháán rá. Lá nisngáa matraxnuu ma̱ngaa matanigajma̱a̱ náa escuela xáʼ. Ninigua̱a̱ʼ matanigajma̱a̱ ráʼ. O ni̱dxu̱ʼnú nitayáá dí ikháán na̱nguá enigua̱a̱ʼ matraxnuu dxe̱ʼ. Á mu xúʼko̱, na̱nguá xtaa mbáwíín. Mú, Jeobá xtáa a̱ʼkhu̱ mu mambáyáaʼ. Ikhaa nindxu̱u̱ jmbii ga̱jma̱a̱ nindxu̱u̱ bi̱ itháán májáanʼ bi̱ Naʼsngáa.

11. Ndíjkha rí Jeobá nindxu̱u̱ bi̱ “Naʼsngáa itháán Májánʼ” rá.

¹¹ Jeobá naʼthí rí ikhaa nindxu̱u̱ bi̱ “Naʼsngáa itháán Májánʼ” (Is. 30:20, 21). Ikhaa nindxu̱u̱ mbáa bi̱ Naʼsngáa bi̱ naʼngo̱o̱ a̱jkiu̱u̱n, bi̱ naʼthí ga̱jma̱a̱ ajngáa gua̱ba̱ʼ ma̱ngaa bi̱ nakro̱ʼo̱o̱, ikhaa ndaʼyoo má xúʼko̱ náa rí májánʼ nuni̱ bi̱ naʼsngúún (Sal. 130:3). Ikhaa nditháan na̱nguá endu̱ʼu̱lu mbá rí xáʼngulú gúʼni. Xámbumulú dí ikhaa niʼniriyaʼ ngáñulú, mbóoʼ regalo dí ra̱ʼkhá tháán mitsaanʼ (Sal. 139:14). Ma̱ngaa niʼni rí ikháanʼ manigulúʼ majmañulú má xúʼko̱ kámuu mbiʼi ga̱jma̱a̱ rí manigulúʼ. Ikha jngóo asndu nákha xúgi̱ ndayóoʼ rí manigulúʼ gajkhun majmañulú dí na̱ʼkha̱ náa Biblia (1 Ped. 2:2). Ndiéjunʼ gándoo gámbáyáaʼ rá. Atagíminaʼ matani̱ mbá rí majmáán matani, atraxnuu ga̱jma̱a̱ atanigajma̱a̱ Biblia xúgíʼ mbiʼi (Jos. 1:8). Jeobá má gámbáyáaʼ dí manigua̱a̱ʼ majmañaaʼ itháán dí matraxnuu ga̱jma̱a̱ matatsaʼwamínáʼ dí na̱ʼkha̱ raʼthí ikhí.

12. Ndíjkha rí gíʼdoo wéñuʼ numuu rí muʼnigajma̱a̱ xóo niʼni ga̱jma̱a̱ xóo niʼtáráʼa Jesús rá.

¹² Atríya̱ʼ mbiʼi mu matatsaʼwamínáʼ xú káʼnii nixtáa ga̱jma̱a̱ ñajunʼ rí niʼni Jesús. Mu matani ñajuunʼ Jeobá, itháán náa rí mbiʼi mingíjyúuʼ rígi̱, ndayóoʼ rí matani xóo má Jesús niʼni (1 Ped. 2:21). Jesús niʼthúún xa̱bi̱i̱ dí múraʼníí mbaʼa gaʼkhu (Luc. 14:27, 28). Mú ni̱jkha̱nú má ndiʼyoo ma̱ngaa rí xa̱bi̱i̱ mangiin maguajún jmbu xó má niʼni ikhaa (Juan 16:33). Atanigajma̱a̱ xóo nixtáa Jesús ga̱jma̱a̱ atagíminaʼ rí matayaridáá xúgíʼ mbiʼi.

13. Ndiéjunʼ gíʼmaa matanda̱ʼa̱a̱ má xúʼko̱ Jeobá ga̱jma̱a̱ náá numuu rá.

¹³ Índo̱ nuʼnigajmaa raʼkháa i̱ndó nuʼni mu majmañulú. Rí phú nandulú rí muniʼníiʼ itháán Jeobá, maʼndulú kuʼyáá ga̱jma̱a̱ rí makumulú kuʼyáá (1 Cor. 8:1-3). Índo̱ ga̱ʼga̱ rajmañaʼ itháán ga̱jma̱a̱ numuu Jeobá, xátatsiʼñááʼ ratanda̱ʼa̱a̱ rí mambáyáaʼ maraʼdáá itháán fe (Luc. 17:5). Ikhaa má gáxnáa rí natanda̱ʼa̱a̱. Á mu ikháán xtaʼdáá mbá fe gujkhuʼ ga̱jma̱a̱ xúgíʼ rí nijmañaaʼ ga̱jma̱a̱ numuu Dios ndrígúlú, rúʼko̱ gámbáyáaʼ mu maʼga̱ rajmañaʼ má xúʼko̱ (Sant. 2:26).

14. Xú káʼnii nisngájma Pedro rí gíʼdoo numuu muʼni xó má kuwáanʼ rajmañulúʼ rá. (Atayáá xti’khu.)

¹⁴ Apóstol Pedro niʼthí rí gíʼdoo wéñuʼ numuu rí xa̱bi̱i̱ Cristo muni xóo egún rajmañún. Niʼthí ga̱jma̱a̱ xkri̱da ndrígóo Noé. Jeobá niʼthúu̱n Noé dí maku̱ngua̱nʼ mbá ruʼwa mbiʼ mu maʼni gámbíin xúgíinʼ xa̱bu̱ ra̱míjíinʼ bi̱ kúwá nákha ikhú. Mú raʼkháa i̱ndó ndiyóoʼ mbuyáá dí marigá rúʼko̱ mu makáwíin. Garmáʼáan a̱jkiu̱lú dí Pedro niʼthí ajngáa rígi̱ “índo̱ xtáa raguma arca”, nákha xóo tséxnúu ruʼwa mbiʼ (1 Ped. 3:20). Noé gajmíi̱n bi̱ kúwá náa goʼwóo nini̱ xó má Jeobá niʼthúún ga̱jma̱a̱ nini̱ mbá arca mba̱a̱ wéñuʼ (Heb. 11:7). Nda̱wa̱á  Pedro niʼnimbríguíi rí niʼni Noé ga̱jma̱a̱ rí xóo majnguáanʼ iyááʼ ikhaa niʼthí: “Ma̱ndoo muʼnimbríguíi dí nirígá mbiʼi rúʼko̱ ga̱jma̱a̱ rí xóo ikháanʼ najnguála iyááʼ dí naʼni káwáanʼla” (1 Ped. 3:21). Xúʼko̱ má kayuuʼ dí ikháán natani̱rataminaʼ mu majnguáanʼ iyááʼ, nindxu̱u̱ xóo rí niʼni Noé gajmíi̱n bi̱ kúwá náa goʼwóo xúgíʼ tsiguʼ rí ikhiin ndijñún mu muni arca. Ikha jngóo ndiéjunʼ gáʼyoo matani ikháán ráʼ.

15. Ndiéjunʼ eyoo gáʼthúu̱n dí gajkhun mata̱nga̱a̱ a̱jkia̱a̱nʼ rá.

¹⁵ Mbá rí ndayóoʼ muʼni nindxu̱u̱ dí matanga̱a̱ a̱jkiu̱lú ga̱jma̱a̱ numuu xúgíʼ aʼkhá dí ni̱ʼni̱ (Hech. 2:37, 38). Índo̱ gajkhun natanga̱a̱ a̱jkiu̱lú nuriʼkhu̱u̱ dí nu̱ʼni̱. Lá nitatsíñáʼ má xúgíʼ rí Jeobá tsénigu̱u̱ʼ ráʼ. Xóo rí matabaʼkháanʼ gajmiáanʼ eʼwíinʼ, matasikha ndíí, marata dí raʼkhí o ajngáa rí tsaga (1 Cor. 6:9, 10; 2 Cor. 7:1; Efes. 4:29). Á mu xóo na̱nguá etani̱, ataniminaʼ má xúʼko̱ asndu náa maʼnga̱a̱ʼ. Mbáa ma̱ndoo maratha̱a̱n bi̱ naʼsngáa ga̱jma̱a̱ numuu Biblia o a̱ngiu̱lú bi̱ kuya̱ edxu̱u̱ mu makhánaa consejo. Á mu kaʼníí nindxa̱a̱ʼ dxámá o dxáʼgú ga̱jma̱a̱ kaʼníí xóo xtáa gajmiáanʼ ana̱a̱ʼ o ru̱dáaʼ ma̱ndoo marathu̱u̱n ikhiin dí mumbayáaʼ matatsiʼñáánʼ dí narikha̱a̱ʼ mu majnguáanʼ iyááʼ.

16. Ndiéjunʼ nindxu̱u̱ rí gíʼmaa muʼni mu mu̱ʼgua̱ kanuu itháán mijngii náa Dios rá.

¹⁶ Ma̱ngaa gíʼdoo wéñuʼ numuu rí ikháán matani rí mi̱dxu̱ʼ kanuu itháan mijngii náa Dios, xóo dí mi̱dxu̱ʼ náa reunión ga̱jma̱a̱ rí mataxujxíí ñawáanʼ ikhí (Heb. 10:24, 25). Índo̱ gútaanʼ mani̱ndxa̱a̱ʼ publicador bi̱ xóo tséjngúun iyááʼ ataniminaʼ marataráʼa xúgíʼ mbiʼi. Ma̱ta̱ya̱a̱ dí índo̱ gárataráʼa itháán, itháán manigua̱a̱ʼ (2 Tim. 4:5). Á mu nindxa̱a̱ʼ dxámá o dxáʼgú ga̱jma̱a̱ kaʼníí xóo xtáa ga̱jma̱a̱ ana̱a̱ʼ o ru̱dáaʼ, atrajxi̱mínáʼ: “Lá ikhiin nuthu̱nʼ má xúʼko̱ dí maʼgá náa reunión o dí mataráʼaʼ ráʼ. O nani numuu rí ikhúún nanigu̱ʼ dxe̱ʼ”. Índo̱ ikháán natani̱ rígi̱ numuu rí ikháán nanigua̱a̱ʼ natasngájma rí xtaʼdáá fe, rí nandaaʼ xtayáá Jeobá ga̱jma̱a̱ rí nara̱xnáa núma̱aʼ. Índo̱ ikháán nataniminaʼ matani̱ má xúʼko̱ rígi̱, ‹naraxnáá gamajkhu Dios› nindxu̱u̱ asndu xóo rí ikháán naraxnáá mbá regalo Jeobá (2 Ped. 3:11; Heb. 13:15). Jeobá nanigu̱u̱ʼ wéñuʼ dí muxnáá regalo numuu dí ikháanʼ nandulú, raʼkháa ga̱jma̱a̱ numuu rí eʼwíinʼ nutsudáanʼlu (atayáá ma̱ngaa 2 Corintios 9:7). Ikháanʼ má gakuwáánʼ gagi índo̱ nuxnáá rí itháán májánʼ Jeobá.

17, 18. Ndiéjunʼ rí gámbáyáaʼ mu matanimbánii rí majnguáanʼ iyááʼ ga̱jma̱a̱ náá numuu rá. (Proverbios 3:3-6.)

¹⁷ Índo̱ xtáa ratanirataminaʼ mu majnguáanʼ iyááʼ matraʼníí mbaʼa xkujndu. Mbáa tikhuun mutsijmáánʼ o asndu muni gínáán ga̱jma̱a̱ numuu dí xtáa rajmañaʼ (2 Tim. 3:12). O mbáa naʼniaaʼ mingíjyúuʼ matatsiʼñáánʼ mbájkhu mbóoʼ dí raʼkhí. O mbáa naku̱ma̱a̱ʼ dí gakhi̱i̱ wéñuʼ nindxu̱u̱ rí majnguáanʼ iyááʼ. Ndiéjunʼ gámbáyáaʼ mu xákanajkhaa rá. Rígá mbóoʼ dí gíʼdoo wéñuʼ numuu: Ikhaa nindxu̱u̱ rí maʼndaaʼ xtayáá Jeobá.

¹⁸ Rí maʼndaaʼ xtayáá Jeobá rúʼko̱ nindxu̱u̱ mbá rí itháán mitsaanʼ dí ma̱ndoo maraʼdáá (atraxnuu Proverbios 3:3-6). b Na̱nguá nindxu̱u̱ mbóoʼ dí maku̱ma̱a̱ʼ dí maʼga̱ raguámbá, rúʼko̱ nindxu̱u̱ rí mambáyáaʼ mu nditháan xákanajkhaa índo̱ gátraʼníí xkujndu. Náa Biblia naʼthí mbaʼa nuthu dí Jeobá nasngájmúún ngajua rí jmbu xa̱bi̱i̱. Rígi̱ eyoo gaʼthí rí nditháan tséniñúnʼ ga̱jma̱a̱ nditháan tseniñuu dí nandoo kaʼñún (Sal. 100:5). Numuu rí ikháán niguma xóo má kaʼnii Dios (Gén. 1:26). Ikha jngóo xú káʼnii gándoo matasngajmá ngajua rúʼko̱ rá.

19. Ndiéjunʼ gándoo matani̱ mu maraxnaa núma̱aʼ Jeobá rí naʼni ga̱jma̱a̱ numaaʼ rá. (Gálatas 2:20.)

¹⁹ Timbá nindxu̱u̱ rí maraxna núma̱aʼ (1 Tes. 5:18). Atrajxi̱mínáʼ xúgíʼ mbiʼi: “Xú káʼnii nisngájmuʼ Jeobá mbiʼi rígi̱ dí nandoo kaʼyoʼ ráʼ”. Nda̱wa̱á índo̱ gárata káñii, araxnáa núma̱aʼ ga̱jma̱a̱ numuu rúʼko̱ ma̱ngaa dí nindoo kaʼyaaʼ. Atayáá xúgíʼ rí ikhaa naʼni rí nandoo kaʼyaaʼ xó má ni̱jkha̱nú niʼni apóstol Pablo (atraxnuu Gálatas 2:20). Ga̱jma̱a̱ atrajxi̱mínáʼ: “Nandoʼ masngajmúu Jeobá rí nandoʼ ka̱yo̱o̱ ráʼ”. Índo̱ ikháán gaʼndaaʼ xtayáá itháán, rúʼko̱ gámbáyáaʼ mu maʼnga̱a̱ʼ matraʼníí asndu ndiéjunʼ má tsáʼkhá ga̱jma̱a̱ asndu xkáʼnii má xkujndu ma̱ngaa rí matani má xúʼko̱ ñajuunʼ ikhaa. Xúʼko̱ gatasngajmá xúgíʼ mbiʼi rí ikháán nandaaʼ xtayáá Ana̱a̱ʼ bi̱ xtáa mekhuíí.

20. Ndiéjunʼ eyoo gáʼthúu̱n dí maraxnaxíminaʼ náa Jeobá ga̱jma̱a̱ ndíjkha rí gíʼdoo wéñuʼ numuu rá.

²⁰ Numuu rí ikháán nandaaʼ xtayáá wéñuʼ Jeobá, rúʼko̱ gáxkajxi̱i̱n maratakáñii náa naraxúdaminaʼ dí matani̱ ñajuunʼ ikhaa kámuu mbiʼi. Índo̱ ikháán gátaxnaxíminaʼ náa Jeobá ma̱ndoo mani̱ndxa̱a̱ʼ ndrígóo ikhaa kámuu  mbiʼi. Índo̱ ikháán naraxnáximinaʼ náa Jeobá nataxúdaminaʼ dí matani ñajuunʼ ikhaa tséʼniuu má dí gárígá. Nindxu̱u̱ mbá ajngáa dí natani̱ káaʼ mbóó nuthu náa xúgíʼ vida ndrígáaʼ. Gajkhun má dí maraxnaxíminaʼ nindxu̱u̱ mbá dí gíʼdoo wéñuʼ numuu. Mú, garmáʼáan a̱jkia̱a̱nʼ dí rúʼko̱ nindxu̱u̱ mbá dí gíʼdoo itháán numuu matani (Sal. 50:14). Gixa̱a̱ maʼni xó má eʼngo̱o̱ dí maʼni gámbáa rí ikháán nandaaʼ xtayáá Jeobá mu matatsiʼñáánʼ ratani̱ ñajuunʼ. Mú, xátani̱ dí Gixa̱a̱ maʼngo̱o̱ (Job 27:5). Numuu rí ikháán nandaaʼ xtayáá wéñuʼ Jeobá rúʼko̱ gámbáyáaʼ dí matanimbaníí dí nitaxúdaminaʼ matani̱ ñajuunʼ ga̱jma̱a̱ rí mi̱dxu̱ʼ kanuu itháán mijngii náa ikhaa.

21. Ndíjkha rí nuʼthá rí majnguáanʼ iyááʼ nindxu̱u̱ rí ndiʼkhún egi̱ʼdu̱u̱ rá.

²¹ Nda̱wa̱á rí ikháán gáraxnaxíminaʼ náa Jeobá, aratamíjná gajmiáanʼ bi̱ kuya̱ edxu̱u̱ mu mutha̱a̱n ndiéjunʼ gátani̱ nda̱wa̱á. Mú garmáʼáan a̱jkia̱a̱nʼ rí majnguáanʼ iyááʼ raʼkháa ikhú guámbá dí natagímináʼ matani̱, ikhú egi̱ʼdu̱u̱ dí matani̱ ñajuunʼ Jeobá kámuu mbiʼi. Ikha jngóo gaʼndaaʼ xtayáá itháán Jeobá asndu nákha xúgi̱ ga̱jma̱a̱ atagíminaʼ dí ngajua rúʼko̱ maʼga̱ rajoo mambá mbiʼi. Rúʼko̱ gámbáyáaʼ dí mi̱dxu̱ʼnú majnguáanʼ iyááʼ. Mbiʼi rúʼko̱ mani̱ndxu̱u̱ kiejuunʼ wéñuʼ rí nditháan xámbumaaʼ. Ikhú ndiʼkhún egi̱ʼdu̱u̱. Nditháan ragíʼmaa matatsiʼñáánʼ martumuu ngajua rí xtaʼdáá náa Jeobá ga̱jma̱a̱ náa a̱ʼdióo.