1, 2. Ndiéjunʼ xkujndu eraʼníí tikhun xa̱bi̱i̱ Jeobá rá.

APÓSTOL Pablo nixnúu tsiakii Timoteo ma̱ngaa a̱ngiu̱lú mu munimbáníí ñajunʼ rí nijuiʼtún muni̱ (2 Tim. 4:5). Gajkhun rí xúgiáanʼ nuʼni mbá tsiakii mu muʼnimbaníí consejo rígi̱, mú miʼskoo nindxu̱u̱. Mbaʼin a̱ngiu̱lú ndañúunʼ tsiakii mu mutaraʼa náa xuajin rí kúwá (2 Tim. 4:2). Gundxaʼwamíjna̱ ga̱jma̱a̱ numún a̱ngiu̱lú bi̱ kúwá náa mbá xuajen rí na̱nguá eniñu̱nʼ mutaraʼa. Ikhiin nagájnún gútaraʼa maski ajndu nduyáá rí gamíi mixtugui̱i̱n.

² Mbaʼin xa̱bi̱i̱ Jeobá nuraʼníí mixtiʼkhu xkujndu ga̱jma̱a̱ rúʼko̱ naʼni rí makáguabiinʼ. Mbaʼin rí ikhiin ndayóoʼ muñejunʼ gakhi̱i̱ wéñuʼ mu muxnúún rí ndañúu̱nʼ bi̱ kúwá náa guʼwún. Eʼwíinʼ nanigu̱nʼ mutaraʼa mú índo̱ narámaaʼ xmáná naʼni néʼngu̱u̱n wéñuʼ. Mú eʼwíinʼ tséʼngu̱u̱n gúni̱ wéñuʼ numuu rí guáʼdáá mbá nandii gakhi̱i̱ ga̱jma̱a̱ numuu rí wanii má. Mbáa eʼwíinʼ tsíyoo gágajnún náa guʼwún ga̱jma̱a̱ eʼwíinʼ nakumún dí raguáʼdáá numún xó má eʼthí mbáa ndxájulú bi̱ mbiʼyuu Mary * bi̱ xtáa náa Oriente Medio: “Naniga̱jmu̱ʼ ku̱ma̱ rí xkawiʼ rí naʼni maʼni néʼngoʼ wéñuʼ. Nda̱wa̱á ikhú má naku̱mu̱ʼ rí gúʼdoo aʼkhúnʼ numuu rí naríyaʼ kaʼyúʼ mbiʼi ga̱jma̱a̱ tsiakii rí gúʼdoo mu majmuʼ náa mataráʼa”.

3. Ndiéjunʼ gúʼyáá náa artículo rígi̱ rá.

³ Tséʼniuu asndu xú káʼnii má xkujndu rí kuaʼdáá, Jeobá maxnúlú tsiakii mu maʼngulú muraʼníí ma̱ngaa rí mu̱ʼni̱ má xúʼko̱ ñajuunʼ maski ajndu nuraʼníí mbaʼa gamiéjunʼ. Náa artículo rígi̱, mbuʼyáá xú káʼnii Jeobá gámbáyulú. Mú ginii kayuuʼ mbuʼyáá xú káʼnii Pablo nimbáyúu Timoteo mu maʼnimbánúu ñajunʼ rí gíʼdoo maski ajndu niraʼnuu xkujndu.

4. Ndiéjunʼ dí mingíjyúuʼ niraʼnuu Pablo rá.

⁴ Pablo ma̱ngaa niraʼnuu mbaʼa wéñuʼ xkujndu. Ndiyóoʼ tsiakii índo̱ nixnáá ga̱jma̱a̱ itsí ma̱ngaa índo̱ nixuda̱a̱ʼ náa guʼwá e̱jua̱nʼ (2 Cor. 11:23-25). Ma̱ngaa tátiyuuʼ maʼthí rí ma̱ngaa xtáa raʼniminaʼ ga̱jma̱a̱ ku̱ma̱ dí ra̱májánʼ (Rom. 7:18, 19, 24). Mú ikhaa nindo̱ʼo̱o̱ má xúʼko̱ Jeobá rí maríyaaʼ “tsuwanʼ rí fráʼa náa xuyuuʼ” rí naʼni mamínuuʼ wéñuʼ (2 Cor. 12:7, 8).

5. Ndiéjunʼ niʼngo̱o̱ niʼni Pablo maski ajndu niraʼnuu xkujndu rá.

⁵ Jeobá nixnúu tsiakii Pablo mu maʼnimbánuu ñajunʼ ndrígóo maski ajndu niraʼnuu mbaʼa wéñuʼ xkujndu. Gundxa̱ʼwámi̱jna̱ ndiéjunʼ niʼngo̱o̱ niʼni apóstol. Mbá xkri̱da, índo̱ ikhaa xtáa náa guʼwá e̱jua̱nʼ náa Roma, ikhaa nimbáyúu má xúʼko̱ rí gajkhun náa inún xa̱bu̱ edi̱ judíos ga̱jma̱a̱ mbáa náa xa̱bu̱ ñajunʼ (Hech. 28:17; Filip. 4:21, 22). Ma̱ngaa niʼtáruʼun bi̱ nuñewa̱a̱n guʼwá e̱jua̱nʼ ma̱ngaa xúgíinʼ xa̱bu̱ bi̱ nagún ruyáá (Hech. 28:30, 31; Filip. 1:13). Ikhaa má mbiʼi rúʼko̱ Jeobá nijmiuu Pablo mu maʼnirámáʼ carta rí mambáñun a̱ngiu̱lú mbiʼi rúʼko̱ ma̱ngaa rí mbiʼi xúgi̱. Núma̱a̱ má ga̱jma̱a̱ numuu xkri̱da ndrígóo, a̱ngiu̱lú bi̱ kúwá náa Roma niguáʼdáá “itháan tsiakii mu xámiñuun mutariyaʼ Ajngá rawunʼ Dios” (Filip. 1:14). Maski ajndu táʼngo̱o̱ gáʼni wéñuʼ xó má nindoo maʼni, niʼni xó má niʼngo̱o̱ ga̱jma̱a̱ niʼthí rí xúgíʼ rí nigíʼnuu niyambáá mu majuiʼtáraʼa ajngáa rí májánʼ (Filip. 1:12).

6. Xó má eʼthí náa 2 Corintios 12:9 ga̱jma̱a̱ 10, ndiéjunʼ nimbáyúu Pablo mu maʼngo̱o̱ maʼnimbánuu ñajunʼ ndrígóo rá.

⁶ Pablo ndaʼyoo rí xúgíʼ ñajunʼ rí naʼni náa Jeobá na̱nguá eʼni ga̱jma̱a̱ tsiakii ndrígóo. Núma̱a̱ má tsiakii rí naxnúu Jeobá. Ikha jngóo niʼnirámáʼ rí tsiaki̱i̱ ndrígóo Dios nindxu̱u̱ itháan májánʼ náa mbáa xa̱bu̱ bi̱ guabaaʼ (atraxnuu 2 Corintios 12:9, 10). * Jeobá nixnúu xi̱ʼ kaʼwu Pablo ga̱jma̱a̱ rúʼko̱ nimbáyúu mu maʼnimbánuu ñajunʼ rí nikhánáá, maski ajndu ninigínáa, ni̱jkha̱ guʼwá e̱jua̱nʼ ga̱jma̱a̱ niraʼnuu i̱ʼwáʼ xkujndu.

7. Ndiéjunʼ xkujndu niraʼnuu Timoteo mu maʼnimbánuu ñajunʼ rí nikhánáá rá.

 ⁷ Dxámá Timoteo ma̱ngaa ndiyóoʼ tsiakii ndrígóo Dios mu maʼngo̱o̱ maʼnimbánúu ñajunʼ rí maʼtáraʼa. Mbá xkri̱da, ikhaa ni̱jkha̱ ga̱jma̱a̱ Pablo índo̱ ni̱jkha̱ mitsínguánʼ wéñuʼ xóo misionero. Ma̱ngaa Pablo nikuʼmaa Timoteo mu maʼga gáʼñúún a̱ngiu̱lú ma̱ngaa rí maxnún tsiakii náa mámbá congregación (1 Cor. 4:17). Mbáa Timoteo nikumu̱u̱ rí ñajunʼ ndrígóo nindxu̱u̱ gakhi̱i̱ wéñuʼ, mbáa ikha jngóo Pablo niʼthúu̱n: “Xátatsiʼñáʼ rí nimbáa mbaʼyaaʼ rí nda̱a̱ numaaʼ numuu rí dxáma̱á nindxa̱a̱ʼ” (1 Tim. 4:12). Ma̱ngaa Timoteo nigiʼdoo tsuwanʼ náa xuyuuʼ, náa Biblia naʼthí rí nángí eʼni exkamaa nandii (1 Tim. 5:23). Mú Timoteo ndaʼyoo rí xi̱ʼ kaʼwu ndrígóo Jeobá gíʼdoo wéñuʼ tsiakii rí maʼngo̱o̱ maxnúu tsiakii mu maʼtáraʼa má xúʼko̱ ajngáa rí májánʼ ma̱ngaa rí ma̱ndoo mambáñun a̱ngiu̱lú bi̱ kúwá náa congregación (2 Tim. 1:7).

8. Xú káʼnii exnúlú tsiakii Jeobá rí mbiʼi xúgi̱ rá.

⁸ Rí mbiʼi xúgi̱ Jeobá naxnúlú “tsiakii rí itháan mba̱a̱” mu xúʼko̱ muguajún jmbu ga̱jma̱a̱ mu muʼnimbáníí ñajunʼ dí kuaʼdáá (2 Cor. 4:7). Gi̱i̱ mbuʼyáá mbá a̱jkhu̱ enii rí Jeobá naxnúlú mu muxnámijná ga̱jma̱a̱ tsiakii, ga̱jma̱a̱ mu mumbaʼyúmijná mu xúʼko̱ muguajún jmbu: Rí muʼtájkháan, Biblia, a̱ngiu̱lú ga̱jma̱a̱ rí muʼtáraʼa.

9. Xú káʼnii embáyulú rí muʼtájkáan rá.

⁹ Rí muʼtájkháan. Náa Efesios 6:18 Pablo niʼthí: “Gunda̱ʼa̱ má xúʼko̱”. Á mu nu̱ʼni̱ xúʼko̱, Dios má gámbáyulú ga̱jma̱a̱ maxnúlú tsiakii. Xó má eʼthí mbáa ndxájulú bi̱ mbiʼyuu Jonnie, bi̱ xtáa náa Bolivia. Nikumu̱u̱ rí Jeobá nimbáyúu índo̱ niraʼnuu mbaʼa xkujndu. Anu̱u̱, ru̱dúu̱ ga̱jma̱a̱ a̱ʼgiu̱u̱ nindoo káñúún mbóó mitsúú nixkamiin nandii. Niʼniuu gakhi̱i̱ mañewu̱u̱n nájtsíin. Mú ru̱dúu̱ nikháñuu, a̱ʼgiu̱u̱ ga̱jma̱a̱ anu̱u̱ ndijyúuʼ mu maʼni̱i̱ nandii rí niguáʼdáá. Jonnie narmáʼáan a̱jkiu̱u̱n: “Índo̱ niku̱mu̱ʼ rí néʼngoʼ nitakháñúu Jeobá ga̱jma̱a̱ Jeobá má nimbáyúʼ mu maʼngoʼ maraʼnuu xúgíʼ gamiéjunʼ rí ni̱ʼkha̱nú náa inuʼ”. Náa xuajen má rúʼko̱, mbáa ndxájulú bi̱ mbiʼyuu Ronald niʼdxaun dí ru̱dúu̱ gíʼdoo cáncer ga̱jma̱a̱ mbáagu̱nʼ nda̱wa̱á nikháñuu. Ndiéjunʼ nimbáyúu xá. Ikhaa naʼthí: “Rí matajkháan nimbáyúʼ mu marmbáʼtoo a̱jkiu̱nʼ mu mathu̱u̱n Jeobá xúgíʼ rí naʼni maxmiéjunʼ. Nda̱yo̱o̱ rí ikhaa nakro̱ʼo̱o̱ itháán májánʼ”. Mbáa ikháánʼ nakuwáánʼlu gíná rí asndu tséʼyáá ndiéjunʼ gúʼtájkháan, mú Jeobá naʼthúlú rí muʼtákháñii maski ajndu tséʼyáá dí gúʼthán (Rom. 8:26, 27).

10. Xó má eʼthí náa Hebreos 4:12, ndíkha rí gíʼdoo numuu muraxnuu Biblia ga̱jma̱a̱ mundxaʼwamíjna̱ rí naʼthí ikhí rá.

¹⁰ Biblia. Xó má Pablo, mangáánʼ ma̱ndoo muraxnuu Biblia mu xúʼko̱ ma̱ndoo muguaʼdáá tsiakii ga̱jma̱a̱ maʼni̱i̱ a̱jkiu̱lú (Rom. 15:4). Índo̱ nuraxnuu ga̱jma̱a̱ nundxa̱ʼwa̱míjna̱, Jeobá ma̱ndoo majmuu xi̱ʼ kaʼwu ndrígóo mu mambáyulú náa xkujndu rí kuaʼdáá (atraxnuu Hebreos 4:12). * Ndxájulú Ronald bi̱ niʼthá náa kutriga̱ 9. Ikhaa naʼthí: “Nadxuʼ rí naguʼwunʼ magúxnuu Biblia xúgíʼ mbruʼun ga̱jma̱a̱ nandxaʼwamínáʼ wéñuʼ náa cualidad ndrígóo Jeobá. Ga̱jma̱a̱ rí xóo ndaʼya nga̱jui̱i̱n xa̱bi̱i̱ rúʼko̱ nambáyúʼ mu mba̱ya̱a̱ tsiakii”.

11. Xú káʼnii nimbáyúu Biblia mbáa ndxájulú bi̱ xtáa ramínuuʼ rá.

¹¹ Rí mundxaʼwamíjna̱ náa Ajngá rawunʼ Dios nambáyulú mu mbuʼyáá xú káʼnii gúʼnimbáníí xkujndu rí kuaʼdáálú. Guʼyáá ga̱jma̱a̱  numuu mbáa ndxájulú bi̱ nikháñuu ajmbio̱o̱. Mbáa ndxájulú bi̱ kayá edxu̱u̱ niʼthúu̱n rí maguxnuu libro ndrígóo Job ga̱jma̱a̱ rúʼko̱ gámbáyúu. Índo̱ niguxnuu, ikhú ikhaa nikumu̱u̱ dí raʼkhí ga̱jma̱a̱ numuu Job: “Ra̱májánʼ kayuuʼ rí xtaa ratani̱”. Mú ikhaa ni̱jkha̱nú ndiʼyóo rí xóo niʼni Job xúʼko̱ má niʼni ma̱ngaa. Rígi̱ nimbáyúu mu mariʼkhu̱u̱ rí nandxaʼwáminaʼ, ga̱jma̱a̱ rígi̱ nixnúu tsiakii mu maʼngo̱o̱ maraʼnuu gamiéjunʼ rí niʼnimbáti̱ga̱a̱ ajmbio̱o̱.

12. Xú káʼnii ejmiuu Jeobá a̱ngiu̱lú mu mumbayúlá rá.

¹² A̱ngiu̱lú. Jeobá najmiuu a̱ngiu̱lú mu mumbayúlú. Pablo niʼnirámáʼ rí nandoo mbaʼñúún wéñuʼ a̱ngui̱i̱n mu muxnamijná tsiakii (Rom. 1:11, 12). Mary bi̱ niʼthá náa kutriga̱ 2, ikhaa nanigu̱u̱ʼ maxtáa gajmíi̱n a̱ngiu̱lú. Ikhaa naʼthí: “Jeobá najmiuu a̱ngiu̱lú mu mumbayúʼ maski ajndu tséyáá rí xtáá ragíʼnuʼ. Ga̱jma̱a̱ nuthu̱nʼ mbá ajngáa rí maxnúʼ tsiakii ma̱ngaa nuxuʼma mbá i̱yi̱ʼ, rúʼko̱ rí phú ndayóoʼ. Ma̱ngaa nambáyúʼ mu matamíjná gajmíi̱nʼ a̱ngiu̱lú bi̱ niguáʼníí ikháá má xóo ikhúúnʼ. A̱ngiu̱lú bi̱ kuya̱ edxu̱u̱ nuni̱ mba̱yo̱o̱ rí gúʼdoo numuʼ náa Guʼwá nagimbáanʼ”.

13. Xú káʼnii gándoo gúxnámíjnálú tsiakii náa Guʼwá nagimbáanʼ rá.

¹³ Mbá náa ma̱ndoo muxnámíjnálú tsiakii nindxu̱u̱ náa Guʼwá nagimbáanʼ. Índo̱ na̱jkua̱lú ma̱ndoo muʼthúún a̱ngiu̱lú rí nandulú kuʼñúún ga̱jma̱a̱ rí nuxniin núma̱aʼ ga̱jma̱a̱ xúgíʼ rí nuni̱. Mbá xkri̱da, nákha xóo tsígi̱ʼdu̱u̱ reunión, mbáa ndxájulú bi̱ kayá edxu̱u̱ bi̱ mbiʼyuu Peter, niʼthúu̱n mbáa ndxájulú a̱ʼgu̱ bi̱ tséʼnigajmaa ajmbio̱o̱: “Ra̱ʼkhá tháán nadxuxu rí ndu̱ya̱ʼ gi̱i̱ ga̱jma̱a̱ rí nadxaʼ jxtiin mbá majuin ejña̱a̱nʼ ga̱jma̱a̱ nataniratiin mu muxna comentario”. Ndxájulú ra̱ʼkhá tháán nixnáa núma̱aʼ ga̱jma̱a̱ nimbiyaʼ, niriʼñuu: “Ikhaa rúʼko̱ rí nandoʼ madxuun xúgi̱”.

14. Xú káʼnii embáyulú rí nuʼtáraʼa rá.

¹⁴ Rí muʼtáraʼa. Rí muʼtáraʼa naʼni rí makuwáánʼ májánʼ ga̱jma̱a̱ naxnúlú tsiakii, maski ajndu tikhuun xa̱bu̱ tsíñún gúdxawíín ajngáa rí na̱jkua kuʼyulú (Prov. 11:25). Mbáa ndxájulú bi̱ mbiʼyuu Stacy ndiʼyoo rí gajkhun nindxu̱u̱ rígi̱. Índo̱ nini̱i̱ expulsar mbáa bi̱ kaʼyoo, ikhaa nigawúunʼ wéñuʼ. Ikhaa naraximínáʼ má xúʼko̱ á mu rígá rí ndiyóoʼ mambáyúu. I̱ndó rúʼko̱ rí nandxa̱ʼwáminaʼ. Ndiéjunʼ nimbáyúu xá. Rí magajnúu gáʼtáraʼa. Índo̱ nagájnuu gáʼtáraʼa nigíʼdu̱u̱ nindxa̱ʼwáminaʼ ga̱jma̱a̱ numún xa̱bu̱ bi̱ kúwá náa xuajin rúʼko̱. Ikhaa naʼthí: “Jeobá nixniúʼ mbáa a̱ʼgu̱ bi̱ masngóo ga̱jma̱a̱ numuu Biblia ga̱jma̱a̱ nacha̱ niriʼkuminaʼ ga̱jma̱a̱ rúʼko̱ nixnúʼ wéñuʼ tsiakii. Rí magajnúʼ gátaráʼa nambáyuʼ wéñuʼ”.

15. Ndiéjunʼ eʼsngúlú rí niʼthí Mary rá.

¹⁵ Mbáa nakumulu rí tsíyoo gúʼni̱ wéñuʼ ñajuunʼ Jeobá, numuu rí kuaʼdáá mbá rí naʼni maxmiéjunlú. Mú garmáʼáan a̱jkiu̱lú á mu nu̱ʼni̱ xó má eʼngo̱o̱, Jeobá maxtáa gagi maski ajndu chíʼgíiʼ rí gúxnáá. Índo̱ Mary ni̱jkha̱ náa i̱mba̱ congregación náa nuthi i̱mba̱ nikumu̱u̱ rí nimbá xáʼngo̱o̱ gáʼni ikhí. Ikhaa naʼthí: “Nákha ginii, kaáʼ mbóó comentario exna̱ dí ramíʼskhoo o nagúxnuu mbá texto. I̱ndó tratado exna̱ mbóoʼ índo̱ nataráʼa”. Ikhaa naku̱mu̱u̱ rí tséjmaa gáʼni numuu rí a̱ngiu̱lú bi̱ nuthi májánʼ ajngáa nuni̱ itháan májánʼ. Mú niriʼkhu̱u̱ xóo nindxa̱ʼwáminaʼ, numuu rí ndiʼyoo dí Jeobá ma̱ndoo majmiuu mu maʼni ñajuunʼ maski ajndu na̱nguá eʼthí májánʼ ajngáa rúʼko̱. Ikhaa naʼthí: “Kiʼsngáa rí na̱ʼkha̱ raʼthí náa Biblia na̱nguá nindxu̱u̱ miʼskhaa ga̱jma̱a̱ ragákhíi makruaʼaʼ, naʼni rí xa̱bu̱ muriʼkumijnáá”.

16. Ndiéjunʼ gáxnún tsiakii bi̱ tsíyoo magajnún náa guʼwún rá.

¹⁶ Á mu tsíyoo magajnúlú náa guʼwúlú, Jeobá ndaʼyoo nguáthá eyulú muʼtáraʼa ga̱jma̱a̱  ndaʼyoo rí gíʼdoo numuu. Ikhaa ma̱ndoo maʼni rí ma̱ndoo muʼtáráʼáá xa̱bu̱ bi̱ nañewunlú o médico. Mbáa majmáa a̱jkiu̱lú á mu nuʼnimbríguii rí nu̱ʼni̱ xúgi̱ ga̱jma̱a̱ rí ni̱ʼni̱ nákha ginii. Á mu rí nduʼyáá xú káʼnii Jeobá embáyulú rí mbiʼi xúgi̱, rúʼko̱ gámbáyulú mu muguaʼdáá tsiakii rí maʼngulú muraʼníí xúgíʼ xkujndu rí gáʼkha̱ ga̱jma̱a̱ rí makuwáánʼ má xúʼko̱ gagi.

17. Xó má eʼthí náa Eclesiastés 11:6, náá numuu rí gíʼmaa muʼtáraʼa má xúʼko̱ maski ajndu na̱nguá ekujmaa mbá nacha̱ ñajunʼ rí nu̱ʼni̱ rá.

¹⁷ Na̱nguá eʼyáá náá guáʼyaa tsígáʼ rí gajkhun rí nuʼdu gáxkuaʼán ajmu̱u̱ ga̱jma̱a̱ makráʼáan (atraxnuu Eclesiastés 11:6). * Mbá xkri̱da, mbáa ndxájulú a̱ʼgú nikhi̱i̱ bi̱ gíʼdoo 80 tsiguuʼ bi̱ mbiʼyuu Barbara naʼtáraʼa má xúʼko̱ ga̱jma̱a̱ teléfono ma̱ngaa ga̱jma̱a̱ carta. Náa mbá sobre nirajkuáa La Atalaya dí 1 ñajunʼ gu̱nʼ marzo tsiguʼ 2014 rí kayá edxu̱u̱: “¿Qué ha hecho Dios por usted?”. Ikhaa nikuʼma carta náa inún xa̱bu̱ gajmii rí asndu tséʼyoo á mu ninindxu̱ún xa̱bi̱i̱ Jeobá nákha ginii. Ikhiin mbaʼa nuthu nitangi̱ín niraxnuu revista. Ajmbio̱o̱ a̱ʼgu̱ bugi̱ nikumu̱u̱ rí asndu xóo mínaaʼ Jeobá xtáa raʼtámíjná ga̱jma̱a̱. Nitangiín nigún mbu̱júu̱ʼ reunión ga̱jma̱a̱ nitangiín ninindxu̱ún xa̱bi̱i̱ Jeobá nda̱wa̱á rí 27 tsiguʼ rí niniñaaʼ. Lá naʼngo̱o̱ nundxa̱ʼwa̱míjna̱ xú káʼnii ndiyáa tsiakii ndxájulú Barbara índo̱ ndiʼyoo rí xígi̱ nirígá ráʼ. ¡Mbóoʼ cárta̱á niʼngo̱o̱ niʼni xúgíʼ rígi̱!

18. Ndiéjunʼ gíʼmaa mu̱ʼni̱ mu Jeobá maxnúlú tsiakii rá.

¹⁸ Xó má ndiʼyáá, mbaʼa xóo exnúlú tsiakii ndrígóo Jeobá. Gajmulú májánʼ rí ikhaa nixnúlú, xóo rí muʼtájkháan, Biblia, a̱ngiu̱lú ga̱jma̱a̱ rí muʼtáraʼa. Á mu najmulú májánʼ xúgíʼ rígi̱, musngajmá rí nakumulú kuʼyáá rí ikhaa maʼngo̱o̱ ga̱jma̱a̱ nandoo rí mambáyulú. Gumbáyumíjná má xúʼko̱ náa Anu̱lú bi̱ xtáa mekhuíí numuu rí ikhaa nandoo “maʼnikáwíin bi̱ guáʼdáá káxi̱ a̱jkiu̱ún náa ikhaa” (2 Crón. 16:9).