1. Ndiéjunʼ eʼthúlú muʼni Jeobá rá. (Atayáá xtiʼkhu ma̱ngaa.)

 TSÁÁ gándoo guʼtháán mu maxnúlú ikha ga̱jma̱a̱ maʼni̱i̱ a̱jkiu̱lú rá. Ikháanʼlu nduʼyáá kaʼwu rí ma̱ndoo muʼtákáñii Jeobá numuu dí ikhaa na̱ndu̱ʼu̱lú rí muʼni. Ikháanʼ nduʼyáálú rí ikhaa nandoo muʼtháán tsejtsí mbiʼi numuu dí ikhaa naʼthúlú: “Gutájkháanla má xúʼko̱” (1 Tes. 5:17). Ma̱ndoo mbuʼyáá gajkhun dí ikhaa naʼdxawunlú ga̱jma̱a̱ munda̱ʼa̱a̱ maxnúlú ikha náa xúgíʼ rí guʼni (Prov. 3:5, 6). Numuu rí Jeobá raʼkhá tháán májánʼ ikha jngóo naniñulú rí muʼthán; asndu nguáthá nuthu eyulú ikháanʼ.

2. Ndiéjunʼ guʼyáá náa artículo rá.

² Rí muʼtájkáan nindxu̱u̱ mbóoʼ rí nimináanʼlú dí raʼkhá tháán gíʼdoo numuu, maski ajndu xúʼko̱ nguáná naʼniulú gakhi̱i̱ muríyaʼ mbiʼi muʼtámijná gajmiúlú Jeobá, numuu rí tseguapháanʼlu. Mbáa nguáná nundxa̱ʼwa̱míjna̱ rí ndayúlú dí muʼtájkáan itháán májánʼ. Mú, Biblia ma̱ndoo mambáyulú mbuʼyáá xú káʼnii gándoo guʼni. Náa artículo rígi̱ mbuʼyáá xkri̱da ndrígóo Jesús ga̱jma̱a̱ majmañulú muríyaʼ mbiʼi muʼtájkáan. Ma̱ngaa mbuʼyáá rí ma̱ndoo muʼtájkáan itháan májánʼ á mu nuʼthá mbá witsu enii rí gíʼdoo numuu.

3. Ndiéjunʼ dí ndiʼyoo má Jesús nákha ginii rá.

³ Nákha xóó tséʼkha̱ Jesús náa tsu̱du̱u̱ ku̱ba̱ʼ ndiʼyoo rí Jeobá ndaʼyoo dí ra̱ʼkhá tháán gíʼdoo numuu rí nuʼtájkáan. Ndiʼyoo xú káʼnii Anu̱u̱ niriʼña̱a̱ rí nitajkháan xa̱bi̱i̱. Mbá xkri̱da ikhaa nixtáa ga̱jma̱á nindxu̱u̱ índo̱ niriʼña̱a̱ dí niʼtájkháan Ana,  David, Elías ga̱jma̱a̱ eʼwíinʼ bi̱ nitajkháan (1 Sam. 1:10, 11, 20; 1 Rey. 19:4-6; Sal. 32:5). Ikha jngóo Jesús niʼthún xa̱bi̱i̱ rí mutajkáan má xúʼko̱ ga̱jma̱a̱ muthi xúgííʼ xú káʼnii ku̱mu̱ún (Mat. 7:7-11).

4. Xú káʼnii májánʼ xkri̱da niniñuuʼ Jesús rá.

⁴ Jesús nigíʼ mbá májánʼ xkri̱da náa xa̱bi̱i̱. Ikhaa niʼtájkháan má xúʼko̱ índo̱ nixtáa raʼnimbánuu ñajunʼ rí nigiʼdoo. Ikhaa ndiyóoʼ maríya̱ʼ mbiʼi mu maʼtájkháan numuu dí nigiʼdoo mbaʼa ñajunʼ ga̱jma̱a̱ xa̱bu̱ nagún má xúʼko̱ kidxuuʼ (Mar. 6:31, 45, 46). Ikhaa na̱gi̱xi̱i̱ miʼcha̱ mu xúʼko̱ maxtáa mbáwii maʼtámíjná ga̱jma̱a̱ Anu̱u̱ (Mar. 1:35). Mbá miʼtsu, nákha xóó tséraʼwíí mbá rí gíʼdoo wéñuuʼ numuu dí maʼni, ikhaa niguanúu kañiiʼ mbruʼun mu maʼtájkháan (Luc. 6:12, 13). Xúʼko̱ má niʼni ma̱ngaa nákha inu makhañúu, Jesús niʼtákáñuu nángi eʼni Jeobá numuu rí ndiʼyoo dí wíji̱ magíʼnuu nindxu̱u̱ mbóoʼ dí itháán gakhi̱i̱ dí magíʼnuu náa tsu̱du̱u̱ ku̱ba̱ʼ (Mat. 26:39, 42, 44).

5. Xú káʼnii gándoo guʼyaridáá Jesús rá.

⁵ Dí niʼni Jesús naʼsngúlú dí maski ajndu ra̱ʼkhá tháán kuaʼdáá ñajunʼ ndayóoʼ muríyaʼ mbiʼi mu muʼtákáñíí Jeobá. Mbáa mbaʼyóoʼ muriʼyáʼ májánʼ awan mu mbuʼyáá náa mbiʼi guʼtájkáan; ma̱ndoo muguaxúu̱n itháán miʼcha̱ o xúʼnuʼlú guapháá. Á mu nuʼnilú xúʼko̱ musngajmáá Jeobá dí raʼkháa tháán nangajulú rí ikhaa nimínáanʼlu. Ndxájulú Lynne narmáʼáan a̱jkiu̱u̱n dí ra̱ʼkhá tháán nixnáa núma̱aʼ índo̱ nijmañuu rí ma̱ndoo maʼtámíjná ga̱jma̱a̱ Jeobá. Ikhaa naʼthí: “Índo̱ nijmañuʼ rí Jeobá xtáa xawii maʼdxawunʼ xúgíʼ mbiʼi, nigíʼdu̱u̱ ndi̱yo̱o̱ xóo mbáa bi̱ gajkhun nambájxu gajmuʼ. Ikha jngóo niʼgíʼ dí matajkháan itháán májánʼ”. Mbáa mbaʼánʼ nakumulú xóo ku̱mu̱u̱ ikhaa. Xúgi̱ rá. Mbuʼyáá mbá witsu rí gíʼdoo wéñuuʼ numuu dí ma̱ndoo muʼthá índo̱ nuʼtájkáan.

6. Ndiéjunʼ kaʼyoo magruigú Jeobá eʼthí náa Apocalipsis 4:10, 11 rá.

⁶ Guʼni mba̱a̱ Jeobá. Náa mbá visión dí ra̱ʼkhá tháán mitsaanʼ rí ndiʼyoo apóstol Juan náa ndiʼñún bi̱ mbá 24 bi̱ kuya̱ edxu̱u̱ náa mekhuíí rusmbati̱gu̱u̱n náa Jeobá. Ikhiin nini̱ mba̱a̱ numuu rí niguánú ndiyáá dí i̱ndó ‹Ikhaa kaʼyoo magruigú gamajkhu, dí maguma mba̱a̱ ga̱jma̱a̱ magruigú tsiakii› (atraxnuu Apocalipsis 4:10, 11). Rígá mbaʼa numuu rí ángeles  nuni̱ mba̱a̱ ga̱jma̱a̱ nduyamajkuíí Jeobá. Numuu dí kúwi̱i̱n gajmiún náa mekhuíí ma̱ngaa nuniʼníiʼ májánʼ. Ga̱jma̱a̱ xúgíʼ rí ikhaa naʼni, nduyáá xú káʼnii cualidad rí gíʼdoo, rúʼko̱ naxkajxi̱i̱n dí muni mba̱a̱ (Job 38:4-7).

7. Xú káʼnii eʼni mba̱a̱ Jeobá índo̱ nuʼtájkáan rá.

⁷ Mangáánʼ gíʼmaa muʼni mba̱a̱ Jeobá índo̱ nuʼtámíjná gajmiúlú. Nuʼnilú rígi̱ índo̱ nuʼtháán mbóoʼ dí nanigulúʼ rí ikhaa naʼni, ga̱jma̱a̱ ndíjkha dí nanigulúʼ. Índo̱ nuraxnuu ga̱jma̱a̱ nuʼnigajma̱a̱ Biblia nuʼnimíjna rí mbuʼyáá cualidad dí nanigulúʼ rí gíʼdoo Jeobá (Job 37:23; Rom. 11:33). Nda̱wa̱á guʼtháán ndiéjunʼ kumulú índo̱ nundxa̱ʼwa̱míjna̱ náa xúgíʼ cualidad dí gíʼdoo. Ma̱ngaa ma̱ndoo muʼni mba̱a̱ Jeobá índo̱ guʼyáá xú káʼnii embáyulú o nambáñun eʼwíinʼ a̱ngiu̱lú. Ikhaa xtáa xawii má xúʼko̱ mu mambáyulú ga̱jma̱a̱ mañewu̱nlú (1 Sam. 1:27; 2:1, 2).

8. Xú káʼnii nindxu̱u̱ tikhu dí ma̱ndoo muxnáa núma̱aʼ Jeobá rá. (1 Tesalonicenses 5:18.)

⁸ Guxna̱a̱ núma̱aʼ Jeobá. Ma̱ndoo muxna̱a̱ núma̱aʼ ga̱jma̱a̱ numuu mbaʼa rí naʼni ga̱jma̱a̱ nindxu̱lú (atraxnuu 1 Tesalonicenses 5:18). Guxna̱a̱ núma̱aʼ ga̱jma̱a̱ numuu xúgíʼ dí májánʼ rí kuaʼdáálú. Numuu dí náa ikhaa e̱ʼkha̱ xúgíʼ dí májánʼ (Sant. 1:17). Mbá xkri̱da, ma̱ndoo muxna̱a̱ núma̱aʼ ga̱jma̱a̱ numuu xú káʼnii mitsaanʼ rí kiʼniwíi dí rígá náa numbaaʼ rí kuwáánʼlú, dí guaʼdiin bi̱ kuʼñúún bi̱ nambájxulu gajmiúlúʼ ma̱ngaa ga̱jma̱a̱ numuu rí kuwáánʼlú. Ga̱jma̱a̱ xúgíʼ dí mitsaanʼ dí kuaʼti̱i̱n nda̱wa̱á, ma̱ngaa nuxnáa núma̱aʼ ga̱jma̱a̱ numuu dí ikhaa naniñulú dí mambájxulú gajmiúlú.

9. Náá numuu rí naʼni gakhi̱i̱ maraxna̱a̱ núma̱aʼ rá.

⁹ Ndíjkha rí mámbáa dí ikháanʼlu gíʼmaa maxnáa núma̱aʼ Jeobá rá. Mbáa maʼniulúʼ gakhi̱i̱ mbuʼyáá xúgíʼ rí naʼni ga̱jma̱á nindxu̱lú Jeobá numuu dí kuwáanʼ náa mbá numbaaʼ rí xa̱bu̱ nánguá eguʼwún muxna̱a̱ núma̱aʼ, numuu dí i̱ndó naxmiéjúnʼ ga̱jma̱a̱ numuu rí nandún raʼkháa dí muxna̱a̱ núma̱aʼ ga̱jma̱a̱ numuu dí guaʼdáá. Á mu mangáanʼ nundxa̱ʼwa̱míjna̱ xúʼko̱, rúʼko̱ gáʼni dí índo̱ nuʼtájkáan i̱ndó munda̱ʼa̱ dí nandulú, mu xágiʼnulú xúʼko̱, ndayóoʼ maguʼwunlú muxnáa núma̱aʼ ga̱jma̱a̱ muʼni tsiakimijna dí muxnáa núma̱aʼ Jeobá ga̱jma̱a̱ numuu xúgíʼ rí ikhaa naxnúlú (Luc. 6:45).

10. Xú káʼnii nimbáyúu mbáa ndxájulú a̱ʼgu̱ rí maxnáa núma̱aʼ rá. (Atayáá xtiʼkhu ma̱ngaa.)

¹⁰ Rí muxnáa núma̱aʼ nambáyulú mu maʼngulú muraʼníí xkujndu. Guʼyáá mbá xkri̱da ndrígóo ndxájulú Kyung-sook, dí nigájnuu náa Bi̱ Nayejngoo 15 ñajunʼ gu̱nʼ enero tsiguʼ 2015. Nitháán rí gíʼdoo cáncer náa xtitiu̱u̱n rí nánguá gíʼdoo thanuu. Ikhaa niʼthí: “Ra̱ʼkhá tháán nigawúnʼ índo̱ nidxuun rí gúʼdoʼ nandii. Niku̱mu̱ʼ dí nándáa rí mani ga̱jma̱a̱ nimíñúʼ wéñuuʼ”. Ndiéjunʼ nimbáyúu maraʼnuu rígi̱ xá. Ikhaa niʼthí: “Mámbá mbruʼun nákha xóó tséjkha̱a̱ gígú natsimuʼ náa tsu̱du̱u̱ guʼwá mu matájkáan. Ikhú natha̱ gakhi̱i̱ mu maxna̱a̱ núma̱aʼ ga̱jma̱a̱ numuu mbá witsu rí májánʼ rí nigíʼnu mbiʼi rúʼko̱. Rúʼko̱ niʼni rí xaxmiéjunʼ ga̱jma̱a̱ nixkajxu̱u̱n mathu̱u̱n Jeobá rí nandoʼ ka̱yo̱o̱”.  Ikhaa mínaaʼ ni̱jkha̱nú ndiʼyoo xú káʼnii Jeobá naguguambañun xa̱bi̱i̱ bi̱ nuraʼníí mbá gamiéjunʼ gakhi̱i̱ ga̱jma̱a̱ ndiʼyoo dí itháán má rígá rí naguma tsajkurámaaʼ ki xóo xkujndu dí naraʼnuu. Xó má Kyung-sook, kuaʼdáá mbaʼa numuu mu muxna̱a̱ núma̱aʼ Jeobá, maski má nuraʼníí mbá gaʼkhu. Dí muxnáa núma̱aʼ Jeobá nambáyulú mu maʼngulú ga̱jma̱a̱ naʼni rí maʼdxuu a̱jkiu̱lú má xúʼko̱.

11. Náá numuu ndiyóoʼ rí xámíñún xa̱bi̱i̱ Jesús rá.

¹¹ Gunda̱ʼa̱a̱ Jeobá rí xámiñulu muʼtáraʼa. Índo̱ inu mata̱nga̱a̱ Jesús mekhuíí niʼni marmáʼáan a̱jkiu̱ún xa̱bi̱i̱ dí gíʼdoo numuu muthi ga̱jma̱a̱ numuu ikhaa “náa Jerusalén, náa xúgíʼ Judea ga̱jma̱a̱ náa Samaria, ma̱ngaa asndu náa naguámbári̱go̱o̱ numbaaʼ” (Hech. 1:8; Luc. 24:46-48). Nda̱wa̱á tikhun judío nirugua̱a̱ Pedro ga̱jma̱a̱ Juan, nigún kudiin náa xa̱bu̱ ede̱ ndrígiu̱ún. Ikhí nithúún rí muniñaaʼ rutaraʼa ga̱jma̱a̱ ninimiñún (Hech. 4:18, 21). Xú káʼnii niriʼña̱a̱ apóstoles bugi̱ rá.

12. Xó má eʼthí náa Hechos 4:29, 31, ndiéjunʼ nini discípulos rá.

¹² Ga̱jma̱a̱ numuu xúgíʼ rí nithi, Pedro ga̱jma̱a̱ Juan niriʼña: “Á mu rí májánʼ eya̱a̱la náa inuu Dios rí munimbuxu ku̱ya̱la ikháanʼ, raʼkháa náa Dios, ikháanʼ má gúya̱a̱la. Mú ikháanʼxu xándoo muniʼñááʼ ru̱ta̱ rí ndi̱ya̱a̱xu ga̱jma̱a̱ dí nidxáwinxu” (Hech. 4:19, 20). Índo̱ xa̱bu̱ ede̱ judío niniñu̱u̱nʼ magúun, nájmiin apóstoles bugi̱ ndiwi̱ín gajmiún eʼwíinʼ discípulos. Mbá kambájxu̱u̱n nitakáñíí Jeobá mu mambáñún muni má xúʼko̱ rí nandoo ikhaa. Nithi: “Atani̱ rí xa̱bia̱a̱ʼ muthi má xúʼko̱ ajngá rawaanʼ ga̱jma̱a̱ rí xámiñún”, Jeobá niriʼña̱a̱ dí nitajkháan (atraxnuu Hechos 4:29, 31).

13. Ndiéjunʼ ejmañulú náa xkri̱da ndrígóo Jin-hyuk rá.

¹³ Ma̱ndoo mbuʼyaridáá xkri̱da ndrígún discípulos buʼko̱ ga̱jma̱a̱ rí xúniʼñááʼ ruʼtáraʼa índo̱ xa̱bu̱ ñajunʼ gútulú rí muniʼñááʼ. Rúʼko̱ nindxu̱u̱ rí niʼni Jin-hyuk, mbáa ndxájulú bi̱ nixuda̱a̱ʼ guʼwá e̱jua̱nʼ numuu rí nindoo maʼni rí nanigu̱ʼ Jeobá. Índo̱ nixtáa ikhí nitháán dí maxnún dí ndañún bi̱ kajchún ikhí. Mú nitháán dí xándoo maʼthúún ga̱jma̱a̱ numuu Biblia. Ikhaa nindo̱ʼo̱o̱ Jeobá rí xámiñuu ga̱jma̱a̱ mbaʼyoo tsumáá nguáná ma̱ndoo maʼtárúʼún (Hech. 5:29). Ikhaa naʼthí: “Jeobá niriʼña̱a̱ rí nitajkháan, niʼni dí xámiñuʼ ma̱ngaa nixnúu ku̱ma̱. Nindoo nigíʼdúu nisngúún bi̱ kajchún náa guʼwá e̱jua̱nʼ mbá witsu minuto náa riejun cuarto rí tri̱ʼi̱i̱n, mbruʼun naniraʼmáʼ carta mu maxnaráʼa imbo̱o̱ mbiʼi”. Xó má Jin-hyuk, nduʼyáá gajkhun dí Jeobá mambáyulúʼ rí xúniʼñáánʼ ruʼtáraʼa ga̱jma̱a̱ ma̱ndoo munda̱ʼa̱a̱ rí xámíñulu ga̱jma̱a̱ dí maxnúlú ku̱ma̱.

14. Ndiéjunʼ gámbáyáaʼ mu matraʼníí xkujndu rá. (Salmo 37:3, 5.)

¹⁴ Gunda̱ʼa̱a̱ Jeobá rí mambáyulú mu muraʼníí xkujndu. Mbaʼánʼ rí ikháanʼ numíniiʼ ga̱jma̱a̱ numuu dí niʼnimbáti̱ga̱a̱ mbáa bi̱ nandulú kuʼyáá, numuu dí nuni̱ gináanlu, nandoo káñulú, rí naxmiéjunlú xóo kúwíin bi̱ kuʼñún, ga̱jma̱a̱ numuu nandii dí nirígá náa xúgíʼ numbaaʼ ga̱jma̱a̱ guerra niʼni dí maku̱mu̱u̱ itháán xkujndu rígi̱. Ikha jngóo aratháán Jeobá ga̱jma̱a̱ xúgííʼ a̱jkia̱a̱nʼ, aratháán xúgííʼ rí naku̱ma̱a̱ʼ xó má naratháán mbáa bi̱ nambájxáaʼ májánʼ ga̱jma̱a̱ʼ. Ma̱ndoo ma̱ta̱ya̱a̱ gajkhun rí Jeobá má gámbáyáaʼ (atraxnuu Salmo 37:3, b 5). c

15. Xú káʼnii embáyulú dí muʼtájkáan mu maʼngulú muraʼníí xkujndu rá. Arathá mbóoʼ xkri̱da.

¹⁵ Dí muʼtájkáan má xúʼko̱ nambáyulú muraʼníí xkujndu (Rom. 12:12). Jeobá ndaʼyoo xúgííʼ dí kúwíin ruguaʼníí xa̱bi̱i̱, ikhaa  naʼdxawuun índo̱ “nutakáñíí rí mambáñun” (Sal. 145:18, 19). Kristie mbáa precursora bi̱ gíʼdoo 29 tsiguuʼ ni̱jkha̱nú ndiʼyoo dí gajkhun nindxu̱u̱ ajngáa rígi̱. Mbá nacha̱ ikhaa nigíʼdu̱u̱ nindoo kháñuu wéñuuʼ, rúʼko̱ niʼni dí maxmiéjuunʼ. Nda̱wa̱á nitháán dí ru̱dúu̱ nándáa thanuu nandii dí gíʼdoo. Kristie naʼthí xóó: “Nindo̱ʼo̱o̱ Jeobá dí maxnúʼ tsiakii mu xúʼko̱ xákanajkoʼ. Nditháan taniʼñúuʼ raʼnigajmaa mbáwún ga̱jma̱a̱ ni̱jkhá má xúʼko̱ reunión”. Dí matajkháan nimbáyúʼ índo̱ ra̱ʼkhá tháán nixtáá ngíná. Niʼni̱i̱ a̱jkiu̱nʼ índo̱ ni̱jkhánú ndi̱yo̱o̱ dí Jeobá xtáa má xúʼko̱ ga̱jma̱á nindxu̱ʼ. Maski ajndu táʼni̱i̱ a̱jkiu̱nʼ mbá nacha̱, mú Jeobá niriʼña̱a̱ dí nitakáñuu, nimbáyúʼ mu maxtáá tsímáá”. Garmáʼáan a̱jkiu̱lú má xúʼko̱ dí “Jeobá najmañuu maʼnikáwíin xa̱bi̱i̱ bi̱ nduyamajkuíí” (2 Ped. 2:9).

16. Náá numuu rí ndayúlú Jeobá mambáyúlú muʼni gajmiúlú dí nagua̱ʼa̱ muʼni rá.

¹⁶ Gunda̱ʼa̱a̱ Jeobá dí mambáyulú maʼngulú muʼni gajmiúlú dí nagua̱ʼa̱ muʼni. Numuu dí nindxu̱lú xa̱bu̱ aʼkhá, ikha jngóo ndayóoʼ muʼni gajmiúlú má xúʼko̱ dí nagua̱ʼa̱ muʼni dí raʼkhí, Gixa̱a̱ naʼni xúgííʼ xó má eʼngo̱o̱ mu maʼniulú gakhi̱i̱ muʼni gáʼdu̱u̱n tsáʼkhá rígi̱. Mbá xkri̱da, ikhaa nandoo muʼni gachíí rí nundxaʼwamíjna̱ ga̱jma̱a̱ xúgíʼ dí ra̱májánʼ dí rígá muʼni gagimijná náa numbaaʼ rígi̱. Xúgíʼ dí ra̱májánʼ rígi̱ naʼni dí mundxaʼwa̱míjna̱ dí tsaga̱ dí naʼni rí ní xáʼni kaʼwáánʼ náa iduu Jeobá ga̱jma̱a̱ ma̱ndoo maʼga kaguáánʼ muxuʼdámijnalú aʼkhá mbiiʼ (Mar. 7:21-23; Sant. 1:14, 15).

17. Raʼkháa i̱ndó ndayóoʼ muʼtájkáan, ndiéjunʼ imbo̱ʼ eyóoʼ muʼni mu muʼni gaʼduun tsaʼkhá rá. (Atayáá xtiʼkhu ma̱ngaa.)

¹⁷ Xáʼngulú guʼni gajmiúlú ndajkuáánʼ dí nagua̱ʼa̱ muʼni, ndayúlú dí Jeobá mambáyúlú, Jesús ma̱ngaa niʼthúlú rígi̱ índo̱ niʼsngúlú xú kaʼnii mutajkáan: “Xátatsiʼñááʼ rí majngutíguáanʼxu náa tsáʼkhá, atani̱ káwáanʼxu náa ñawúunʼ Gixa̱a̱” (Mat. 6:13). Jeobá nandoo dí mambáyúlú, mú, ndaʼyóoʼ dí munda̱ʼa̱. Raʼkháa i̱ndó ndayóoʼ muʼtájkáan, ma̱ngaa ndayóoʼ  muʼgími̱jna̱ muʼni xó má eʼngo̱o̱ mu xúʼni gachíí ku̱ma̱ ndrígulú ga̱jma̱a̱ xúgííʼ dí rígá náa numbaaʼ ndrígóo Gixa̱a̱ (Sal. 97:10). Mu muñewa̱a̱n ku̱ma̱ ndrígulú ga̱jma̱a̱ mundxaʼwamíjná dí májánʼ, ndayóoʼ dí muraxnuu ga̱jma̱a̱ muʼnigajmaa Biblia, mu̱ʼgua̱ reunión ga̱jma̱a̱ mu̱ʼgua̱ guʼtáraʼa. Jeobá naʼthúlú dí nditháan xániñulú muraʼníí mbóoʼ dí xáʼngulú (1 Cor. 10:12, 13).

18. Ndiéjunʼ gíʼmaa muʼni xúgiáánʼ rá.

¹⁸ Mu maʼngulú maguajúnlú jmbu náa iwáá mbiʼi mingíjyúuʼ rígi̱. Ndayóoʼ dí muʼtájkáan itháán. Jeobá nandoo dí ‹muʼtháán xúgíʼ dí gíwa̱nʼ náa a̱jkiu̱lú› (Sal. 62:8). Ikha jngóo atríya̱ʼ xúgííʼ mbiʼi mu mu ma̱ra̱ta̱a̱n xúgííʼ dí kajkuáa náa a̱jkia̱a̱nʼ. Atani̱ mba̱a̱, araxnáa núma̱aʼ ga̱jma̱a̱ numuu xúgííʼ dí ikhaa naʼni, atanda̱ʼa̱a̱ mu xámiñaaʼ marataráʼa ga̱jma̱a̱ mambáyáaʼ matraʼníí xkujndu. Ma̱ngaa dí maʼnga̱a̱ʼ matani̱ ga̱jma̱a̱ dí nagua̱ʼa̱ matani̱. Nimbáa xátatsiʼñáʼ dí marikha̱ʼ dí maratakáñíí má xúʼko̱ Jeobá. Xú káʼnii eriʼña̱a̱ ikhaa dí nuʼtajkháan xá. Graxe̱ rígi̱ mbuʼyáá náa imbo̱ʼ artículo.