1. Ndiéjunʼ dí naʼniulú gakhi̱i̱ xúgiáanʼ rá.

 LÁ NITAGÍMINAʼ matani̱ mbá dí niʼniaaʼ gakhi̱i̱ matanimbaníí rá’. b A mu xúʼko̱, raʼkháa i̱ndó ikháán egíʼnaaʼ xúʼko̱, mbá xkri̱da, Philip nindoo maʼtájkháan xúgííʼ mbiʼi ma̱ngaa maʼtákáñuu itháan májánʼ Jeobá, mu niʼniuu gakhi̱i̱ maríyá’ mbiʼi. Erika nigíminaʼ maʼga̱nú wapháá náa magajnúu maʼtáraʼa, maski ajndu xúʼko̱ wakhaʼ e̱jkha̱nú. Tomáš mbaʼa nuthu niʼniminaʼ maguxnuu kájxi̱ Biblia, naʼthí: “Na̱nguá enigu̱ʼ maguxnuu Biblia. Ajtsú nuthu ninimina̱ʼ maguxnuu, mú tséʼngo̱ʼ gaguamboʼ Levítico”.

2. Ndíjkha dí xáʼyóoʼ makanájkulú á mu dí tséʼngulú guʼnimbánii mbá dí niraʼwíí muʼni rá.

² Xákanajkhaaʼ á mu dí tséʼnga̱a̱ʼ gátanimbaníí mbóoʼ meta dí xtaʼdáá. Mu matanimbaníí mbóoʼ meta tséʼniuu á mu dí ragákhi̱i̱ ndayóoʼ mbiʼi ga̱jma̱a̱ tsiakii. Á mu tsékanájkaaʼ matasnga̱jmá dí nandaaʼ mambajxáaʼ má xúʼko̱ ga̱jma̱a̱ Jeobá ga̱jma̱a̱ dí nandaaʼ maraxna̱ dí itháán májánʼ. Xúgíʼ rígi̱ Jeobá ndaʼyoo ga̱jma̱a̱ ikhaa tsénda̱ʼa̱a̱ʼ matani mbóoʼ dí xáʼnga̱a̱ʼ gátani̱ (Sal. 103:14; Miq. 6:8). Ikha jngóo gíʼmaa matayaa á mu meta dí nitraʼwíí matani̱ gajkhun maʼnga̱a̱ʼ matanimbaníí. Ndiéjunʼ gándoo gámbáyáaʼ mu maʼnga̱a̱ʼ matanimbaníí rá. Guʼyáálu.

3. Ndíjkha dí gíʼdoo numuu mataxkajximinaʼ matani rá.

³ Mu muʼnimbánii dí niʼgimijná muʼni gíʼdoo numuu dí muxkajximijna  muʼni. Náá numuu rá. A mu nuʼgíʼ muʼnimbaníí dí nimbanumíjná muʼnimíjna xó má eʼngo̱o̱. Dí muxkajximijna muʼni nindxu̱u̱ xóo giñáʼ dí na̱jkha̱ ka̱yo̱o̱ barco. Á mu dí giñáʼ naxnúu má xúʼko̱ barco maʼga̱nú náa ejkha̱, á mu itháán gakhi̱i̱ exnún, rígi̱ gáʼni dí barco maʼga̱nú itháán nacha̱. Ikhaa ma kayuuʼ á mu nuxkajximijna muʼnimbaníí mbóoʼ dí niʼgímijná muʼni, muʼni xó má eʼngo̱o̱ mu muʼnimbaníílu. Mbáa ndxájulú bi̱ na̱ʼkha̱ náa xuajen Salvador bi̱ mbiʼyuu David naʼthí: Índo̱ nataxkajximinaʼ matani mbá dí nitraʼwíí matani̱, natani̱ xó má eʼngo̱o̱ mu matanimbaníí. Mú ndiéjunʼ gámbáyáaʼ mataxkajximinaʼ matani itháan rá.

4. Ndiéjunʼ gándoo gunda̱ʼa̱a̱ Jeobá rá. (Filipenses 2:13; atayáá xtiʼkhu ma̱ngaa.)

⁴ Atanda̱ʼa̱a̱ Jeobá dí mambáyáaʼ mataxkajximinaʼ matani itháan. Ga̱jma̱a̱ espíritu santo ndrígóo gámbáyáaʼ mu mataxkajximinaʼ matanimbaníí dí nitagíminaʼ matani̱ (atraxnuu Filipenses 2:13). Na̱nguá ma nindxu̱u̱ raʼkhí dí muʼgímijná muʼni mbá dí nakumulú dí gíʼmáanʼ muʼni. Mú mbáa náa awúu̱n a̱jkiu̱lú na̱nguá eyulú muʼni. Rúʼko̱ nindxu̱u̱ dí nigíʼnuu mbáa ndxájulú bi̱ mbiʼyuu Norina bi̱ na̱ʼkha̱ náa Uganda. Ikhaa nigíminaʼ dí maʼsngóo mbáa xa̱bu̱ ga̱jma̱a̱ numuu Biblia, mú nikumu̱u̱ dí xájmaa numuu dí ndaʼyoo dí tseʼsngáa májánʼ. Mu ndiéjunʼ nimbáyúu xá. Ikhaa naʼthí: “Nigíʼdu̱u̱ nindo̱ʼo̱o̱ Jeobá xúgííʼ mbiʼi mu mambáyuʼ manigu̱ʼ masngáa numuu Biblia. Ga̱jma̱a̱ niʼgíminaʼ masngáa itháán májánʼ. Nguáthá igu̱nʼ nda̱wa̱á ndi̱yo̱o̱ dí naxkaxu̱u̱n mani itháan, tsiguʼ má rúʼko̱ nigíʼdu̱u̱ nisngúún a̱jmi̱i̱n xa̱bu̱ numuu Biblia”.

5. Ndiéjunʼ gándoo gundxaʼwamíjna̱ mu maʼndulú muʼni dí niʼgímíjná muʼni rá.

⁵ Atatsaʼwáminaʼ xúgííʼ dí niʼni Jeobá ga̱jma̱a̱ numaaʼ (Sal. 143:5). Apóstol Pablo nindxa̱ʼwáminaʼ xúgíʼ xú káʼnii májánʼ a̱jkiu̱u̱n Jeobá, rígi̱ nixkájxi̱i̱ mu maʼni ñajunʼ ga̱jma̱a̱ xúgíʼ a̱jkiu̱u̱n (1 Cor. 15:9, 10; 1 Tim. 1:12-14). Ikhaa má kayuʼ á mu itháán natatsaʼwáminaʼ xú káʼnii nimbáyaʼ Jeobá, rígi̱ gáxkajxi̱i̱n dí matanimbánii meta rí xtaʼdáá (Sal. 116:12). Atayáá ndiéjunʼ nimbáyúu mbá ndxájulú bi̱ na̱ʼkha̱ náa Honduras mu mani̱ndxu̱u̱ precursora regular. Ikhaa naʼthí: “Niʼgúnʼ nindxa̱ʼwa̱mínáʼ rí Jeobá ra̱ʼkhá tháán nandoo kaʼyoʼ. Ni̱ʼkha̱ kañún náa xuajñuu, nañewu̱nʼ ga̱jma̱a̱ nambáyuʼ. Índo̱ nandxa̱ʼwa̱mínáʼ xúgíʼ rígi̱, niʼni dí maʼndoʼ ka̱yo̱o̱ itháán Jeobá, ga̱jma̱a̱ itháán ninigu̱ʼ mani̱ndxu̱ʼ precursora”.

6. Ndiéjunʼ imbo̱ʼ gambáyúlú maxkajxáán muʼnimbáníí meta ndrígulú rá.

⁶ Atayáá ndiéjunʼ rí májánʼ gárígá á mu natanimbáníí meta ndrígáaʼ. Gatanga̱án mbuʼyáá xkri̱da ndrígóo Erika bi̱ niʼthá náa timbá kutriga̱. Ndiéjunʼ nimbáyúu mu maʼga̱nú wapháá náa magajnúu gáʼtaraʼa xá. Ikhaa naʼthí: “Mbaʼa dí nandáti̱go̱ʼ índo̱ na̱jkhánú wakhaʼ, mú á mu na̱jkhánúwapháá ma̱ndoo marajxi̱ín a̱ngiu̱lú ga̱jma̱a̱ maʼtamijna gajmíʼ. Ma̱ngaa  ma̱ndoo madxun dí naʼthí ndxájulú bi̱ naguwíin grupo dí mambáyuʼ náa mataraʼa”. Erika niʼngo̱o̱ niʼnimbánuu meta ndrígóo numuu dí ndiʼyoo ndiéjunʼ dí májánʼ gagruigú á mu na̱jkha̱nú wapháá náa magajnúʼ gáʼtaraʼa. Á mu meta ndrígáaʼ nindxu̱u̱ dí matraxnuu Biblia o dí maratajkáan itháán májánʼ, atayáá ndiéjunʼ dí májánʼ gátandrígúu, atatsaʼwáminaʼ xú káʼnii gaʼni mambaxáaʼ itháán májánʼ ga̱jma̱a̱ Jeobá (Sal. 145:18, 19). Á mu nandaaʼ ma̱nindxa̱a̱ʼ itháán májáanʼ xa̱bu̱, atayáá xú káʼnii gámbáyáaʼ dí mambaxáʼ gajmiáanʼ eʼwíinʼ (Col. 3:14). Ndiéjunʼ i̱ʼwáʼ ma̱ndoo matani̱ rá. Ataniraʼmáʼ náá numuu dí nandaʼ matanimbánii meta rúʼko̱. Tomáš bi̱ niʼthá nákha nagi̱ʼdu̱u̱, naʼthí: “Á mu nda̱yo̱o̱ dí rígá mbaʼa numuu dí manimbánuu mbá meta, rúʼko̱ naʼni dí xákanajkoʼ”.

7. Ndiéjunʼ niʼni Julio ga̱jma̱a̱ a̱ʼgiu̱u̱ mu munimbáníí meta ndrígún rá.

⁷ Gambájxáaʼ gajmiáanʼ xa̱bu̱ bi̱ muxnaaʼ tsiakii (Prov. 13:20). Julio ga̱jma̱a̱ a̱ʼgiu̱u̱ nindúún magún guñambáá náa ndayóoʼ itháan. Ikhaa naʼthí ndiéjunʼ nimbáñun mu munimbáníí: “Ndiʼñíinʼ mambajxuxu gajmiúxu bi̱ mumbáyúxu̱ ga̱jma̱a̱ ni̱thu̱u̱n dí nanduxu muni̱. Nixnúxu májánʼ consejo numuu dí ikhiin mangiin ninimbaníí meta xóo rúʼko̱. Ma̱ngaa nurajxuxu ndiéjunʼ enixu̱ mu munimbaníí meta ndrígúxu̱, ga̱jma̱a̱ índo̱ ndayuxu ikhiin nuxnuxú tsiakii”.

8. Ndiéjunʼ garigá á mu i̱ndó nuʼnimíjná muʼnimbáníí meta ndrígulú índo̱ nadxuu a̱jkiu̱lú rá. (Atayáá xtiʼkhu ma̱ngaa.)

⁸ Gajkhun má, xúgiáanʼ rígá mbiʼi dí na̱nguá edxuu a̱jkiu̱lú muʼni nimbá. Lá rúʼko̱ eʼyoo gáʼthúu̱n rí muniʼñááʼ ruʼnimbaníí meta ndrígulú rá. Nánguá. Gutanga̱án guʼyáá xkri̱da ndrígóo giñánʼ ga̱jma̱a̱ barco, giñánʼ ma̱ndoo maʼni dí barco maʼga náa ejkha̱, mu nguáná tséxnúu gakhi̱i̱ o nguáná mbájkhu ma tséʼni giñánʼ. Lá rúʼko̱ eʼyoo gáʼthúu̱n dí bi̱ na̱jkha̱ kayóo barco ní xándoo maʼga rá. Nánguá. Mbá xkri̱da tikhuu barco gíʼdoo motor ndrígóo ga̱jma̱a̱ i̱ʼwáʼ gíʼdoo ixi̱ dí nagún kuñu̱u̱ ga̱jma̱a̱, ikha jngóo bi̱ na̱jkhá kayóo ma̱ndoo majmuu mu maʼga náa ejkha̱. Ikhaa ma kayuuʼ, rígá mbiʼi dí nadxulú itháán ki xóo i̱ʼwáʼ mbiʼi. Ikha jngóo á mu i̱ndó nuʼnimíjna índo̱ nadxulú mbáa nditháan xáʼngulú guʼnimbánii meta ndrígulú, mú xó má bi̱ na̱jkha̱ kayóo barco maski ma tséxnúu giñánʼ naʼniminaʼ maʼga̱nú náa ejkha̱. Ikháanʼlu mangáanʼ gíʼmaa muʼnimíjna muʼnimbáníí meta ndrígulú maski má na̱nguá edxu̱u̱ a̱jkiu̱lú muʼni, gajkhun má mbaʼyóoʼ mba̱a̱ tsiakii, mú magiʼdoo numuu dí gúʼni. Nákha xóó tséʼyáá ndiéjunʼ gambáyúlú náa mbiʼi mingíjyúuʼ, guriʼña̱a̱ mbá graxe̱ dínuni̱ tikhun.

9. Lá nindxu̱u̱ májánʼ rí muʼnimbaníí meta ndrígulú maski má tsíyulú guʼni rá.

⁹ Jeobá nandoo rí makuwáanʼ gagi ruʼni ñajuunʼ ga̱jma̱a̱ xúgíʼ a̱jkiu̱lú (Sal. 100:2; 2 Cor. 9:7). Ndíjkha rí gíʼmaa muʼnimíjna̱ muʼnimbaníí  meta dí muʼni ñajuunʼ Dios á mu na̱nguá egájnuu asndu náa a̱jkiu̱lú rá. Gundxaʼwamíjna̱ ga̱jma̱a̱ numuu xkri̱da ndrígóo apóstol Pablo. Ikhaa niʼthí: “Na̱ni̱ gínáa xuyuʼ ga̱jma̱a̱ na̱ni̱ rí manindxu̱u̱ ñumbáá ndrígóʼ” (1 Cor. 9:25-27). Pablo nigíminaʼ maʼni dí Jeobá nigíʼthu̱u̱n maʼni maski má niríga mbiʼi dí na̱nguá edxuu a̱jkiu̱u̱n. Lá nidxuu Jeobá ga̱jma̱a̱ numuu xúgíʼ rí Pablo niʼni ráʼ. Xúʼko̱. Jeobá niʼni tsajkurámáaʼ ga̱jma̱a̱ numuu xúgííʼ tsiakii rí niʼni (2 Tim. 4:7, 8).

10. Ndiéjunʼ rí májánʼ gúndríʼgú á mu nuʼni tsiakimíjna̱ muʼnimbaníí meta ndrígulú maski má na̱nguá exnáa a̱jkiu̱lú muʼni rá.

¹⁰ Jeobá ma̱ngaa nadxuu índo̱ ndaʼyoo dí nuʼni tsiakimíjna̱ muʼnimbáníí meta ndrígulú, maski má ajndu tséxnáa a̱jkiu̱lú muʼni. Náa numuu rá. Nuʼnilú numuu dí nandulú kuʼyáá maski asndu tsénigulú ñajunʼ dí niʼgímíjna muʼni. Jeobá niʼni tsakuramáʼ Pablo ga̱jma̱a̱ xúʼko̱ má gáʼni tsajkurámáanʼlu mangáánʼ á mu nuʼni tsiakimíjna̱ (Sal. 126:5). Índo̱ nduʼyáá dí Jeobá naʼni tsajkurámuuʼ ñajunʼ dí nuʼni, mbáa rúʼko̱ gaʼni dí maʼdxulu itháán. Mbáa ndxájulú bi̱ na̱ʼkha̱ náa Polonia bi̱ mbiʼyuu Lucyna naʼthí: “Nguáná tsíyóʼ gágajnuʼ gátaraʼa, itháán índo̱ naʼni néʼngo̱ʼ. Mú índo̱ nagájnuʼ ga̱jma̱a̱ natangu̱ún goʼwóoʼ raʼkhá tháán gagi xtáá; nindxu̱u̱ mbá regalo dí tsembríguíi ga̱jma̱a̱ nimbá”. Rí xúgi̱ guʼyáá ndiéjunʼ gándoo gúʼni índo̱ na̱nguá edxuu a̱jkiu̱lú muʼni nimbá.

11. Xú káʼnii embáyulú Jeobá muñewa̱a̱n rí muʼni rá.

¹¹ Atanda̱ʼa̱a̱ Jeobá dí mambáyáaʼ matiewa̱a̱n rí matani̱. Xa̱bu̱ bi̱ nañewu̱u̱n rí naʼni najmañuu nañewu̱u̱n xóo ku̱mu̱u̱. Cualidad rígi̱ raʼkháa i̱ndó nambáyulú mu xúʼni dí ra̱májánʼ ma̱ngaa nambáyulú mu muʼni rí májánʼ. Itháán índo̱ naʼniulú gakhi̱i̱ ga̱jma̱a̱ nánguá edxuu a̱jkiu̱lú. Garmáʼáan a̱jkiu̱lú rí matiewa̱a̱n rí matani nindxu̱u̱ rí naxná espíritu santo, ikha jngóo á mu nunda̱ʼa̱a̱ Jeobá espíritu santo, ma̱ndoo maguaʼdáá cualidad dí gíʼdoo numuu rígi̱ (Luc. 11:13; Gál. 5:22, 23). David, bi̱ niʼthá náa kutriga̱ 3, nigíminaʼ maʼnigajmaa itháán mbáwíi. Ikhaa ndiʼyoo dí ra̱ʼkhá tháán gíʼdoo numuu rí maʼtájkháan, naʼthí: “Nindo̱ʼo̱o̱ Jeobá dí mambáyuʼ mañewu̱u̱n rí ma̱ni̱ ga̱jma̱a̱ ndi̱yo̱o̱ dí ikhaa nimbáyuʼ. Rí xúgi̱. Gúʼdoʼ mbá májánʼ awan dí nanigajmaa̱ mbáwun”.

12. Xú kaʼnii embáyulú Eclesiastés 11:4 mu muʼnimbánii rí nuʼgímijna muʼni itháán ñajuunʼ Dios rá.

¹² Xáraʼthi̱i̱n maraxtaa xóo eyaaʼ ikháán. Á mu i̱ndó kua̱ʼthi̱i̱n maʼgánú mbiʼi dí makuwáán májánʼ mbáa nditháan xáʼngulú guʼnimbáníí meta ndrígulú numuu dí náa numbaaʼ rígi̱ naʼni mingíjyúuʼ maraxtaa májánʼ (atraxnuu Eclesiastés 11:4). c Mbáa ndxájulú bi̱ mbiʼyuu Dayniel naʼthí xígi̱: “Nimbá miʼtsu xadxuʼnu maraxtaa ikhaa kayuuʼ xó má ikháán eyaaʼ, mú a mu natani̱ xó má eʼnga̱a̱ʼ, maʼga ragájnuu má”. Paul, i̱mba̱a̱ ndxájulú bi̱ na̱ʼkha̱ náa Uganda, naʼthí i̱mba̱ numuu dí ragíʼmaa muniʼñaʼ ruʼnimbánii meta ndrígulú: “Jeobá ma̱ndoo mambáyúlú á mu nuʼgíʼ nuʼnimbáníí dí nandulú maski ma naʼniulú gakhi̱i̱” (Mal. 3:10).

13. Ndiéjunʼ dí májánʼ erígá á mu natani̱ xó má eʼnga̱a̱ʼ rá.

¹³ Atani̱ xó má dí naʼnga̱a̱ʼ. Á mu dí naku̱ma̱a̱ʼ dí xáʼnga̱a̱ʼ gátanimbaníí mbóoʼ meta dí nitagímináʼ matani̱. Atagíʼdi̱i̱ matani̱ dí xáʼniaaʼ miʼskhoo. Á mu dí nandaaʼ maraʼdáá mbóoʼ cualidad atagíʼdi̱i̱ matasnga̱jmá náa gándoo. Á mu nandaaʼ matraxnuu káxi̱ Biblia, atríya̱ʼ májánʼ awan, mú xátraxnuu mba̱a̱ wéñuuʼ. Tomáš, bi̱ niʼthá nákha gi̱ʼdu̱u̱ artículo rígi̱, niʼniuu gakhi̱i̱ maʼnimbánuu dí nigíminaʼ  mambóo raguxnuu Biblia mbá tsiguʼ. Ikhaa naʼthí: “Ni̱jkhánú ndi̱yo̱o̱ dí ra̱ʼkhá tháán gakhi̱i̱ gaʼniuʼ dí mambóʼ ragúxnuu Biblia mbá tsiguʼ, ikha jngóo nitangu̱ún nigíʼdu̱u̱ nigúxnuu, xó má ikhúún eʼngo̱ʼ, káaʼ chíʼgíiʼ eguxnuu dí mbá mbiʼi ga̱jma̱a̱ naniminaʼ madxaʼwaminaʼ dí nijmañu’, rígi̱ ni’ni dí manigu̱ʼ magúxnuu”. Numuu dí rígi̱ ni’ni maʼdxuu wéñuuʼ ikha jngóo niriyaʼ itháán mbiʼi maguxnuu, xígi̱ niʼni dí niguámbóo niguxnuu kañiiʼ Biblia. d

14. Ndíjkha naʼniulú gakhi̱i̱ muʼnimbáníí dí niʼgímijná muʼni rá.

¹⁴ Maski ajndu ra̱ʼkhá tháán nandulú muʼnimbaníí dí niʼgímijná muʼni. Mú mbáa nguáná naʼniulú gakhi̱i̱ muʼnimbaníí ga̱jma̱a̱ narígú kaʼyulú mbiʼi índo̱ nuraʼníí mbóoʼ “gamiéjunʼ rí na̱nguá kuáʼti̱i̱n” (Ecl. 9:11). Nguáná nuraʼníílu xkujndu dí naʼni makáguabáanʼ ga̱jma̱a̱ naʼni dí nánguá maguaʼdáálu itháán tsiakii (Prov. 24:10). Numuu dí nindxu̱lú xa̱bu̱ aʼkhá ikha jngóo nguáná nuʼnilú mbóoʼ dí xambáyulú muʼnimbaníí dí niʼgími̱jna̱ muʼni (Rom. 7:23). O tseʼgíʼ muʼni numuu dí naʼni néʼngulú (Mat. 26:43). Ndiéjunʼ gámbáyulú mu xákanajkulú rá.

15. Ndíjkha dí tséʼni kaguabamijnalú maski ajndu naʼniulú gakhi̱i̱ rá.

¹⁵ Xakanájkaaʼ á mu rígá náa nakaguábáánʼ. Náa Biblia naʼthí dí muraʼníí mbaʼa xkujndu, mú ikhí ma naʼthí dí Jeobá ma gámbáyulú mu xákanajkulú ga̱jma̱a̱ maʼngulú muʼnimbaníí meta ndrígulú (atraxnuu Salmo 145:14). e Philip, bi̱ niʼthá ga̱jma̱a̱ numuu náa timbá kutriga̱, ndaʼyoo xígi̱ kaʼnii: “Dí itháán gíʼdoo numuu e̱yo̱o̱ ikhúún nindxu̱u̱ dí nguáthá nuthu etujxaaʼ midxuʼ, raʼkháa dí nguáthá nuthu expatrigaanʼ”. Guʼyáá mbu̱júu̱ dí nigíʼnuu David. Ikhaa naʼthí: “Índo̱ na̱nguá xtáá májánʼ o rígá mbóoʼ dí naʼniuʼ gakhi̱i̱, ikhú nda̱yo̱o̱ xóo  mbóoʼ náa ma̱ndoo mathu̱u̱n Jeobá dí nandoʼ ka̱yo̱o̱”. Á mu dí tsékanájkulú maski ajndu nuraʼníí xkujndu nusngajmáá Jeobá dí nandulú muʼni dí naniguuʼ. Lá naʼngo̱o̱ natatsaʼwáminaʼ xú káʼnii edxu̱u̱ Jeobá kaʼyaaʼ índo̱ ndaʼyoo dí natani̱ tsiakimínáʼ matanimbaníí meta ndrígáaʼ ráʼ.

16. Ndiéjunʼ gándoo maʼsngulú náa dí narikhulú muʼni dí nandulú rá.

¹⁶ Atayáá ndiéjunʼ gándoo gajmañaaʼ náa xkujndu dí narikhaaʼ. Atayáá dí natraʼníí ga̱jma̱a̱ atrajxi̱mínáʼ: “Ndiéjunʼ nindxu̱u̱ dí ndayóoʼ mariʼkhu̱u̱ mu nimbá nda̱a̱ dí garikhoʼ rá.” (Prov. 27:12). Á mu mbaʼa nuthu natagíʼ matanimbaníí meta dí xtaʼdáá mu tseʼnga̱a̱ʼ, mbáa ndayóoʼ matriʼkhu̱u̱ meta. Mu matayaa á mu ndayóoʼ matani̱, atatsaʼwáminaʼ á mu dí nitraʼwíí matani̱ kaʼnii maʼngaaʼ matanimbáníí ikháán.  f Jeobá xándxaʼwáminaʼ dí tséjmáán á mu tséʼnga̱a̱ gátanimbaníí mbóoʼ dí ikháan xáʼngaaʼ gátani̱ (2 Cor. 8:12).

17. Ndíjkha dí xáʼyóoʼ mambumulú dí niʼngulú ma niʼni rá.

¹⁷ Xámbumaaʼ xúgííʼ dí niʼnga̱a̱ʼ nitanimbaníí. Náa Biblia naʼthí: “Dios nindxu̱u̱ jmbii, ga̱jma̱a̱ tsémbumuu kaʼyoo ñajunʼ rí nu̱nila” (Heb. 6:10). Ikha jngóo nditháan xámbumaaʼ mangáán dí nitani̱. Atatsaʼwáminaʼ xúgííʼ meta dí niʼnga̱a̱ʼ nitanimbaníí xóo dí mambajxaaʼ ga̱jma̱a̱ Jeobá, magajnáaʼ gárataráʼa o majnguáanʼ iyááʼ. Xúgííʼ meta dí niʼnga̱a̱ʼ nitanimbaníí nasngájma dí maʼnga̱a̱ʼ matanimbaníí dí natagíminaʼ matani̱ xúgi̱ (Filip. 3:16).

18. Ndiéjunʼ gíʼmaa matani̱ índo̱ nadxuʼratanimbaníí meta dí xtaʼdáá rá. (Atayáá xtiʼkhu ma̱ngaa.)

¹⁸ Jeobá ma gámbáyáaʼ mu maʼnga̱a̱ matanimbaníí meta dí xtaʼdáá, ikhaa kayuuʼ xó má mbáa bi̱ na̱jkha̱ kayóo barco asndu nadxuu índo̱ na̱jkha̱nú náa ejkha̱, mbaʼin dí ikhiin nuxkamaa dí nanigu̱nʼ índo̱ nagún ka̱mba̱a̱. Ikháán mangáán ma̱ndoo maraxtaa tsímáá índo̱ gídxúʼ ratanimbaníí meta dí xtaʼdáá á mu natayáá xú káʼnii Jeobá nambáyaaʼ ga̱jma̱a̱ naʼni tsajkhuramánʼ (2 Cor. 4:7). Mbaʼa dí májánʼ wéñuʼ gátandrígúu nda̱wa̱á á mu tsékanájkhaaʼ (Gál. 6:9).