1. Xú káʼnii nindxu̱u̱ ngajua dí gajkhun eʼthí náa Biblia rá.

 NÁA Biblia naʼthí dí ngajua dí gajkhun: ‹Nindxu̱u̱ riʼyu̱u̱ agiuuʼ Jeobá, aguʼ rí nakha má xúʼko̱, xu̱u̱ʼ iyaʼ xáʼngo̱o̱ gaʼni gámbáa ngajua, ní má iyaʼ dí xkujyuuʼ xáʼngo̱o̱ gáʼga kayóo› (Cant. 8:6, 7). b ¡Ra̱ʼkhá tháán mitsaanʼ nindxu̱u̱ xóo nijuiʼthá ga̱jma̱a̱ numuu ngajua dí gajkhun! Ajngáa rígi̱ nasngájma dí ngajua dí guaʼdáá xa̱bu̱ bi̱ nidamijná ma̱ndoo mbajyúuʼ xúgííʼ mbiʼi dí gakúwi̱i̱n, nimbáa xáʼngo̱o̱ gaʼni gámbáa.

2. Ndiéjunʼ gáʼyóoʼ muni̱ bi̱ nidamijná mu xúniñaaʼ raʼndúún kuyamijná rá.

² Ndayóoʼ muni̱ mbá tsiakii mba̱a̱ xa̱bu̱ bi̱ nidamijná mu xáguámbáa dí nandún kuyamijná. Gundxaʼwamíjna̱ ga̱jma̱a̱ numuu aguʼ mu xáguíyúuʼ ndayóoʼ majti̱i̱ má xúʼko̱ ixi̱. Ikhaa ma kayuuʼ rígá náa xa̱bu̱ bi̱ nidamijná ma̱ngaa, á mu dí tséni mbóoʼ tsiakii mba̱a̱ mu maʼndún kuyamijná. Mbáa maʼni rí xáʼndúún kuyamijná ga̱jma̱a̱ numuu dí nda̱a̱ mbújkha̱a̱, nandii o nuni̱ mbaji̱i̱n e̱jñu̱ún. Xkáʼnii gándoo gátani̱ ikháán mu xáraxna̱a̱ maguiʼyúuʼ ‹riʼyu̱u̱ agiuuʼ Jeobá› rá. Náa artículo rígi̱ mbuʼyáá ajtsú enii dí ma̱ndoo mambáyala mu maʼndalá kuyamijná má xúʼko̱ ga̱jma̱a̱ maʼdxuu a̱jkia̱la. c

3. Xkáʼnii embañún xa̱bu̱ bi̱ nidamijná dí mambajxúun májánʼ gajmiún Jeobá mu xúniñaʼ raʼndúún kuyamijná xá. (Eclesiastés 4:12; atayáá ma̱ngaa xtiʼkhu.)

³ Mu xúxnáá maguíʼyúuʼ ‹riʼyu̱u̱ agiuuʼ Jeobá› xa̱bu̱ bi̱  nidamijná ndayóoʼ mambajxu̱u̱n májánʼ gajmiún Jeobá. Nuʼthalu rígi̱ numuu dí á mu mbá najmiin nambájxu̱u̱n májánʼ gajmiún Jeobá rígi̱ gaʼni dí munimbu̱ún consejo ndrígóo. Mu xúʼko̱ xuniña̱a̱ raʼndúún kuyamijná maski ajndu narígá xkujndu ga̱jma̱a̱ maʼngu̱u̱n munimbáníí (atraxnuu Eclesiastés 4:12). d Bi̱ nambájxu̱u̱n májánʼ gajmiún Jeobá nunimíjna̱ dí maguaʼdáá cualidad xó má dí gíʼdoo ikhaa, mbá xkri̱da, nanindxu̱ún xa̱bu̱ wabiinʼ, naʼngo̱o̱ a̱jkiu̱ún, ga̱jma̱a̱ nuni̱ mba̱a̱ a̱jkiu̱ún kuyamijná (Efes. 4:32–5:1). Á mu nunimíjna̱ maguaʼdáá cualidad rúʼko̱ xa̱bu̱ bi̱ nidamijná gajkhun maʼndún kuyamijná. Mbáa ndxájulú bi̱ mbiʼyuu Lena bi̱ nayéjkha̱ ma 25 tsiguʼ dí ninuju̱nʼ naʼthí: “¡Tseʼni gakhi̱i̱ maʼndaaʼ xtayáá ga̱jma̱a̱ mbiyamajkuíí mbá xa̱bu̱ bi̱ naʼni dí naniguuʼ Dios!”.

4. Náá numuu dí Jeobá niraʼwíi José ga̱jma̱a̱ María mu mani̱ndxu̱u̱ anu̱u̱ ga̱jma̱a̱ ru̱dúu̱ Mesías rá.

⁴ Guʼyáá mbóo’ xkri̱da dí na̱ʼkha̱ náa Biblia. Náa xúgíinʼ bi̱ naguwaʼ náa David, náá numuu dí Jeobá niraʼwíi José ga̱jma̱a̱ María mu mani̱ndxu̱u̱ anu̱u̱ ga̱jma̱a̱ ru̱dúu̱ Mesías rá. Numuu dí mbá najmiin ikhiin nambájxu̱u̱ gajmíi̱n, ma̱ngaa ndiʼyoo dí mugíʼ muni̱ ginii dí nandoo ikhaa ki xóo i̱ʼwáʼ ñajunʼ. Ndiéjunʼ gándoo gajmañún bi̱ nidamijná náa José ga̱jma̱a̱ María rá.

5. Xkáʼnii gándoo guyaridáá José xa̱bu̱ bi̱ ninigu̱nʼ rá.

⁵ Dí táʼni a̱jma̱ a̱jkiu̱u̱n José maʼnimbo̱o̱ kaʼyoo Jeobá niʼni dí mani̱ndxu̱u̱ mbá májáanʼ xa̱bu̱ nikhi̱i̱. Náa ajtsú ikha dí nixnúu Dios maʼni ga̱jma̱a̱ numún bi̱ kúwá náa goʼwóo. Ikhaa mbá nacha̱ niʼni maski ma gakhi̱i̱ niʼniuu maʼnimbánuu (Mat. 1:20, 24; 2:13-15, 19-21). José nijmaa niñewu̱u̱n María numuu dí niʼnimbo̱o̱ kaʼyoo Jeobá. Rígi̱ niʼni dí María maʼndoo kaʼyoo ga̱jma̱a̱ mbaʼyamajkuu itháán. Ikháanʼla xabuanii ma̱ndoo manindxa̱la xóo José ga̱jma̱a̱ mbuʼyala consejo dí kagu̱ Biblia dí ma̱ndoo mambáyala muñewu̱u̱n bi̱ kúwíin náa guʼwála. e Índo̱ nuʼgíʼ nunimbanííla, maski ajndu rígi̱ gáʼni dí mbaʼa náa mbaʼyóoʼ muriʼkhumijnála mú xígi̱ gusngajmá dí gajkhun nandala kuñu̱u̱n guʼyala. Ma̱ngaa rígi̱ gáʼni dí xúniʼñáánʼ raʼndala kuyamíjna̱. Mbáa ndxájulú bi̱ na̱ʼkha̱ náa Vanuatu bi̱ nayéjkha̱ má 20 tsiguʼ dí ninuju̱nʼ naʼthí: “Índo̱ nda̱yo̱o̱ dí a̱jmbio̱ʼ ndayáʼ ikha ndrígóo Jeobá ga̱jma̱a̱ nagíʼ naʼnimbánuu naʼni dí mbayamajkuu itháán ma̱ngaa naʼni dí xámiñuʼ ga̱jma̱a̱ rígi̱ naʼni mba̱yo̱o̱ dí májánʼ nindxu̱u̱ dí niraʼwíí maʼni”.

6. Ndiéjunʼ gándoo gájmañún gu̱ʼu̱ bi̱ ninuju̱nʼ dí niʼni María rá.

⁶ María nimbájxu̱u̱ ga̱jma̱a̱ Jeobá. Na̱nguá nigi̱ʼthu̱u̱n dí gáʼni José gámbáyúu magiʼdoo mbóoʼ fe gujkhuʼ ga̱jma̱a̱ mambajxúu ga̱jma̱a̱  Jeobá. Ikhaa nikro̱ʼo̱o̱ májánʼ dí naʼthí náa Kiʼniraʼmáʼ (Lucas 1:46). f Ma̱ngaa niriya̱ʼ mbiʼi mu mandxaʼwáminaʼ dí niguxnuu (Luc. 2:19, 51). María ninindxu̱u̱ mbáa májánʼ a̱ʼgu̱ numuu dí nimbájxu̱u̱ májánʼ ga̱jma̱a̱ Dios. Mbaʼin a̱ngiu̱lú bi̱ kúwá dí mbiʼi xúgi̱ nunimíjna̱ muni̱ xó má niʼni María. Guʼyáá xkri̱da ndrígóo Émiko. Ikhaa naʼthí: Nákha xóó mbáwún gúʼdoo májánʼ awan dí nanigajmaa̱, mu nda̱wa̱á dí ninuju̱nʼ ni̱jkha̱nú ndi̱yo̱o̱ dí nagúʼtúu̱n dí gáʼni a̱jmbio̱ʼ maʼni magúʼdoo mbóoʼ fe gújkhúʼ numuu dí ikhaa naʼtájkáan ga̱jma̱a̱ numuxu ga̱jma̱a̱ naʼsngúxu má xúʼko̱ numuu Dios. Mú, nijkhánú ndi̱yo̱o̱ dí mangúún gíʼmaa mambájxuʼ májánʼ gajmuʼ Jeobá, ikha jngóo xúgi̱ naríyaʼ itháán mbiʼi maxtáá mbáwún mu maguxnuu ga̱jma̱a̱ mandxa̱ʼwa̱mínáʼ dí naʼthí náa Biblia” (Gál. 6:5). Ikháanʼla gu̱ʼu̱ bi̱ ninuju̱nʼ, a̱jmbia̱la maʼdúún kuyala ga̱jma̱a̱ mutala dí májánʼ dí kuwáanʼla runi̱ á mu nunimíjna̱ dí mambajxála májánʼ gajmiála Jeobá (Prov. 31:30).

7. Ndiéjunʼ gándoo gajmañún bi̱ nidamijná náa xkri̱da ndrígóo José ga̱jma̱a̱ María rá.

⁷ Mu José ga̱jma̱a̱ María mambájxuun májánʼ gajmiún Jeobá niñajunʼ mbá kambájxu̱u̱n. Ikhiin ndiyáá dí gíʼdoo wéñuuʼ numuu mbuyamajkuíí Jeobá mbá jnduʼ gajmiún bi̱ kúwá náa guʼwún (Luc. 2:22-24, 41; 4:16). Mbáa niʼñúún gakhi̱i̱ muni xúgííʼ rígi̱ itháán índo̱ niʼni mbaʼin. Mú niʼngu̱u̱n. Ikhiin niniñaaʼ mbá májánʼ xkri̱da náa bi̱ nidamijná. Á mu ikháanʼla mangáanʼ kuáʼdiin e̱jña̱la mbáa naʼniala miʼskhaa muʼguala reunión ga̱jma̱a̱ muríyaʼ mbiʼi munigajmaa mbá guʼwáanʼ. Itháán naʼniala gakhi̱i̱ ma̱ngaa muríyaʼ mbiʼi munigajmaa ga̱jma̱a̱ muʼtájkáan mbá najmaaʼ. Mú garmáʼáan a̱jkia̱la xí á mu mbá kambájxala nduyamajkuíí Jeobá, rígi̱ gáʼni dí mambajxála itháán májánʼ gajmiála ga̱jma̱a̱ makuwáanʼla jnduʼ. Ikha jngóo guʼgíʼ munila ginii dí nandoo Jeobá.

8. Á mu guaʼdáá xkujndu bi̱ nidamijná, ndiéjunʼ gándoo gúni mu munigajmaa mbá guʼwíin xá.

⁸ Ndiéjunʼ gándoo gúni̱la á mu kuaʼdáá xkujndu gajmiála bi̱ ndiyáa rá. Mbáa ga̱jma̱a̱ numuu rígi̱ naʼni dí maʼniala gakhi̱i̱ dí munigajmaa mbá guʼwáanʼ. Á mu xúʼko̱ kuwáanʼla, ma̱ndoo mugíʼdi̱i̱ munigajmaa káaʼ mbá chíʼgíiʼ, mbóoʼ dí mitsaan dí mbá najmaaʼ nanigua̱la. Rígi̱ gánindxu̱u̱ timbá dí ma̱ndoo mambáyala mu maʼndalá kuyamíjna̱ má xúʼko̱ ga̱jma̱a̱ maxkajxáanʼla muni̱ dí Dios naniguuʼ.

9. Náá numuu dí ndayóoʼ muríyaʼ mbiʼi makuwíin mbóó xa̱bu̱ bi̱ nidamijná rá

⁹ Xúniña̱a̱ʼ raʼndúún kuyamijná xa̱bu̱ bi̱ nidamijná á mu nuríyaʼ mbiʼi makuwíin mbóó. Ma̱ngaa rígi̱ gambáñún mu mbuyáá xkáʼnii endxaʼwamíjna̱ ga̱jma̱a̱ xú káʼnii ekumu̱ún (Gén. 2:24). Guʼyáá ndiéjunʼ dí ni̱jkha̱nú ndiʼyoo Lilia ga̱jma̱a̱ Ruslán índo̱ ndiʼkhún nidamijná nákhá timbá 15 tsiguʼ. Lilia naʼthí: “Ni̱jkuánú ndi̱ya̱a̱xu̱ dí xándoo makuwáanʼxu mbóó xó má niku̱mu̱xu, numuu dí niguáʼdááxu̱ wéñuuʼ ñajunʼ... ga̱jma̱a̱ nda̱wa̱á ndiyóoʼ muñewu̱u̱n ejñuxu. Mú nijkhuánú ndiya̱a̱xu dí muni tsíngumíjnáxu xí tsériyaʼxu mbiʼi makuwáanʼxu mbóó”.

10. Xkáʼnii gándoo gunimbaníí dí naʼthí náa Efesios 5: 15, 16 bi̱ nidamijná rá.

¹⁰ Xa̱bu̱ bi̱ nidamijná ndayóoʼ muriyaʼ mbá májánʼ awan ga̱jma̱a̱ muriyaʼ mbiʼi mu xúʼko̱ ma̱ndoo makuwi̱i̱n mbóó (atraxnuu Efesios 5:15, 16). Mbáa ndxájulú bi̱ na̱ʼkha̱ náa Nigeria bi̱ mbiʼyuu Uzondu naʼthí: “Índo̱ naríyaʼ awan dí ma̱ni̱, naniraʼmá mbiʼi dí maxtáá gajmuʼ a̱ʼgiu̱ʼ. Numuu dí nda̱yo̱o̱ dí gíʼdoo wéñuuʼ numuu mbiʼi rúʼko̱” (Filip. 1:10). Guʼyáá xkri̱da ndrígóo Anastasia mbáa a̱ʼgiu̱u̱  ndxájulú circuito náa Moldavia. Ikhaa naʼthí xkáʼnii eʼni mu majmuu májánʼ mbiʼi: “Índo̱ a̱jmbio̱ʼ naʼni ñajunʼ dí gíʼdoo, ikhú ikhúún ma̱ngaa nani ñajunʼ dí gúʼdoʼ numuu dí xúʼko̱ nandoo nakúwáanʼxu mbóó índo̱ naguámbuxu”. Ndiéjunʼ gándoo gúnila á mu na̱nguá eʼngo̱o̱ guríyala mbiʼi makuwáanʼla mbóó jnduʼ rá.

11. Ndiéjunʼ ñajunʼ niʼni mbóó Áquila ga̱jma̱a̱ Priscila rá.

¹¹ Rígá mbaʼa dí ma̱ndoo majmañún bi̱ nidamijná náa xkri̱da ndrígóo Áquila ga̱jma̱a̱ Priscila xa̱bu̱ gajmii bi̱ nikúwi̱i̱n nákha siglo timbá (Rom. 16:3, 4). Maski ajndu náa Biblia na̱nguá eʼthí kuduun xkáʼnii nikúwi̱i̱n xa̱bu̱ gajmii bigi̱, mú mámbá índo̱ naʼthí ga̱jma̱a̱ numún naʼthí dí mbóó niñajunʼ ma̱ngaa nitaraʼa ga̱jma̱a̱ xúʼko̱ má mbóó nimbañúún eʼwíinʼ (Hech. 18:2, 3, 24-26).

12. Ndiéjuunʼ gándoo gúni̱ bi̱ nidamijná mu makuwíin itháan mbóó jnduʼ rá. (Atayáá xtiʼkhu ma̱ngaa.)

¹² Xkáʼnii gándoo xa̱bu̱ bi̱ nidamijná mbuyaridáá xkri̱da ndrígóo Áquila ga̱jma̱a̱ Priscila rá. Gundxaʼwámíjná náa xúgííʼ ñajunʼ dí ndayóoʼ maʼni mámbáa dí ikháanʼla. Lá rígá tikhu ñajunʼ dí ma̱ndoo muni̱ mbá nájmáanʼla rá. Garmáʼáan a̱jkiu̱lú, Áquila ga̱jma̱a̱ Priscila nitaraʼa mbóó, lá naguʼwanla muni̱ xúʼko̱ mangáanʼ ráʼ. Ma̱ngaa Áquila ga̱jma̱a̱ Priscila niñajunʼ mbá kambájxu̱u̱n. Gajkhun ma dí na̱nguá kuaʼdáá ikháá ñajunʼ dí nuni̱la. Mú ma̱ndoo munila mbóó jnduʼ ñajunʼ dí rígá náa guʼwála (Ecl. 4:9). Á mu numbayúmijnala maʼni dí maku̱ma̱la dí kúwáanʼ mbá kambájxala ga̱jma̱a̱ ma̱ndoo mutamíjnála. Robert ga̱jma̱a̱ Linda bi̱ nuyégún má 50 tsiguʼ dí nidamijná. Robert naʼthí: Na̱nguá kuaʼdááxu̱ wéñuuʼ mbiʼi muda̱a̱xu jxu̱ mu dí muni̱xu mbóó ñajunʼ naʼni dí makuwáanʼxu jnduʼ ga̱jma̱a̱ maʼnduxu kuyamíjna̱xu itháán. Índo̱ najñáaʼ traste a̱ʼgiu̱ʼ nambáyúuʼ makudi̱i̱ o índo̱ nani kaʼwii ixi̱ ri̱ʼi̱ ikhaa na̱jkha̱ gámbáyúʼ, rígi̱ naʼni dí maʼdxuu wéñuuʼ a̱jkiu̱nʼ.

13. Ndiéjunʼ eyóoʼ muni̱ xa̱bu̱ bi̱ nidamijná á mu nandún makuwíin mbóó jnduʼ xá.

¹³ Garmáʼáan a̱jkia̱la má xúʼko̱: Raʼkháa dí kuwáanʼla mbóó nandoo gáʼthúu̱n dí kuwáanʼla má jnduʼ. Mbáa ndxájulú bi̱ xtáa náa Brasil bi̱ ninuju̱nʼ má naʼthí: “Ga̱jma̱a̱ numuu dí rígá wéñuuʼ ñajunʼ dí matani̱ naʼni matatsaʼwamínáʼ dí ga̱jma̱a̱ numuu dí kuwáanʼ mbóó náa mbá guʼwá naʼni maku̱mu̱lúʼ dí kuwáanʼ má mbá jnduʼ. Mú ni̱jkhánú ndi̱yo̱o̱ dí kúwáanʼxu mbóó káaʼ nindxu̱u̱ mbá ta̱pha̱ kamba̱a̱, imbá ta̱pha̱ kamba̱a̱ nindxu̱u̱ dí ma̱ni̱ mbáʼwi̱i̱ a̱jmbio̱ʼ”. Guʼyáá ndiéjunʼ niʼni Bruno ga̱jma̱a̱ a̱ʼgiu̱u̱ bi̱ mbiʼyuu Tays, mu mbuyáá ndiéjunʼ eñúu̱nʼ. Bruno naʼthí: “Mu ma̱ndoo mutamíjnaxu índo̱ kúwáanʼxu mbóó nuniʼñááʼ ruya̱a̱xu̱ celular”.

14. Ndiéjunʼ gándoo gúni bi̱ nidamijná á mu tsénigu̱u̱nʼ muríyaʼ mbiʼi makuwíin mbóo jnduʼ xá.

¹⁴ Mú, á mu tsénigualá muríyaʼ mbiʼi makuwáanʼla mbóó jnduʼ rá. Mbáa ga̱jma̱a̱ numuu dí mixtiʼkhu dí nanigua̱la o ga̱jma̱a̱ numuu dí nagi̱ʼdala. Á mu xúʼko̱ káʼnii kuwáanʼla. Gudxa̱ʼwa̱míjna̱ ga̱jma̱a̱ numuu aguʼ dí nitamíjná  nákha ginii índo̱ ndiʼkhún matagídáʼ mi̱kha káaʼ chíʼgíiʼ riʼyu̱u̱ agiuuʼ eʼni, mu mikatiyo̱o̱ʼ itháán ndayóoʼ mañu mañúú matadríyáʼ xuíʼtóo ixi̱ dí itháán mba̱ʼu̱, ikhaa ma kayuuʼ ma̱ndoo munila mangáanʼ, ma̱ndoo muríyaʼla káaʼ mbá xngaa dí mámbá mbiʼi mu ma̱ndoo makuwáanʼla jnduʼ guʼyáʼ munila dí nanigua̱la ga̱jma̱a̱ dí xáʼni makiʼnáanʼla (Sant. 3:18). Á mu nugíʼdi̱i̱ nuni̱ xúgííʼ rígi̱, maʼni dí matangaán maʼndalá kuyamijná mbu̱júu̱.

15. Ndíjkha dí ndayóoʼ mbuyamajkumijná xa̱bu̱ bi̱ nidamijná rá.

¹⁵ Gíʼdoo wéñuuʼ numuu dí mbuyamajkumijná xa̱bu̱ bi̱ nidamijná. Nindxu̱u̱ xóo mataxpiñaʼ aguʼ, á mu tsetaxpiñaaʼ xájyúuʼ gaguíyúuʼ, ikháá ma kayuuʼ rígá náa xa̱bu̱ bi̱ nidamijná ma̱ngaa á mu dí tséyamajkumijná gamíi muniñaaʼ raʼndúún kuyamijná. Garmáʼáan a̱jkia̱a̱nʼ dí itháán gíʼdoo numuu nindxu̱u̱ dí imba̱a̱ xa̱bu̱ mbaʼyoo dí natayamajkuíí, raʼkháa dí naku̱ma̱a̱ʼ ikháán dí xtaʼdáá gamajkuaʼ. Penny ga̱jma̱a̱ Aret bi̱ nuyégún má 25 tsiguʼ dí nidamijná. Penny naʼthí: “Náa guʼwúxu rígá ngajua numuu dí nduyamajkhumijnaxu nandoo nutamijnáxu xúgííʼ xóo ku̱mu̱xu ga̱jma̱a̱ dí nduyamajkumijnáxu numuu dí ndu̱ya̱a̱xu dí gíʼdoo numuu dí naʼthí mámbáa”. Ndiéjunʼ gándoo gátani̱ mu a̱ʼgia̱a̱ʼ o ajmbia̱a̱ʼ maku̱mu̱u̱ dí natayamajkuíí rá. Guʼyáá dí niʼni Abrahán ga̱jma̱a̱ Sara.

16. Ndiéjunʼ gándoo gajmañún xa̱bekha bi̱ ninigu̱nʼ xkri̱doo Abrahán rá. (1 Pedro 3:7; atayáá xtiʼkhu ma̱ngaa.)

¹⁶ Abrahán ndiʼyamajkuu Sara. Niʼdxawuun dí niʼthúu̱n ga̱jma̱a̱ nikro̱ʼo̱o̱ kaʼyoo. Mbóoʼ miʼtsú Sara, niʼthúu̱n xúgííʼ dí naʼni makiʼnáa asndu niʼthúu̱n dí ikhaa gíʼdoo aʼkhúnʼ, mú Abrahán na̱nguá niríyúu ní má táʼthúu̱n ajngáa dí maʼni magawúunʼ numuu dí nininiiʼ májánʼ Sara ga̱jma̱a̱ ndaʼyoo dí ndaʼyamajkhuu ma̱ngaa nambáyúu dí naraʼwíí maʼni. Ikha jngóo ikhaa nidxawuun ga̱jma̱a̱ niʼnimbánuu xkujndu (Gén. 16:5, 6). Ndiéjunʼ eʼsngúlú rígi̱ rá. Dí xa̱bu̱ nikhi̱i̱ kaʼyoo maraʼwíí dí gúni bi̱ kúwíin náa goʼwóo (1 Cor. 11:3). Mú, numuu dí nandoo kaʼyoo a̱ʼgiu̱u̱ ikha jngóo naʼdxawuun dí naʼthúu̱n ga̱jma̱a̱ ndaʼyoo á mu dí niraʼwíí maʼni nindxu̱u̱ májánʼ (1 Cor. 13:4, 5). Lá naraxnatiʼñamina̱ʼ matadxawíín ikháán índo̱ a̱ʼgia̱a̱ʼ naʼtháanʼ xóo ku̱mu̱u̱ o dí naʼni maxmiéjuunʼ ráʼ. (Atraxnuu 1 Pedro 3:7.) Angela bi̱ itháán maʼni 30 tsiguʼ dí ninuju̱nʼ naʼthí ndiéjunʼ e’ni ajmbio̱o̱ mu maku̱mu̱u̱ dí ndaʼyamajkuu. “Dimitri naʼdxawuun ma xúʼko̱ índo̱ na̱thu̱u̱n ga̱jma̱a̱ naʼngo̱o̱ a̱jkiu̱u̱n kaʼyoʼ maski ajndu ikhúún nakiʼnún o nambiyaʼ”.

17. Ndiéjunʼ gándoo gúni̱ gu̱ʼu̱ bi̱ nidiin xa̱bu̱ mu mbuyaridáá xkridoo Sara rá. (1 Pedro 3:5, 6.)

¹⁷ Sara nisngájma dí ndiʼyamajkuu Abrahán numuu dí nimbáyúu náa dí niraʼwíí maʼni (Gén. 12:5). Mbá miʼtsu índo̱ Abrahán nindoo maxniʼtsún xa̱bu̱ bi̱ ndaa tsu̱ma̱ niguánu  náa goʼwóo. Ikha jngóo nindo̱ʼo̱o̱ Sara dí maʼni mújúunʼ ganitsu, maski ajndu ikhaa nigiʼdoo i̱ʼwáʼ ñajunʼ (Gén. 18:6). Mú, mbá nacha̱ niʼnimbo̱o̱ dí niʼthúu̱n Abrahán. Ikháanʼla gu̱ʼu̱ bi̱ nidiin xa̱bu̱ ma̱ndoo munila xó má niʼni Sara ga̱jma̱a̱ mumbáñún náa dí niraʼwíí muni̱ a̱jmbia̱la. Á mu nu̱nila xígi̱ kaʼnii, maʼni dí maʼndalá kuyamijná itháán (atraxnuu 1 Pedro 3:5, 6). Dimitri, bi̱ niʼthá náa kutriga̱ dí nijngoo, naʼthí ndiéjunʼ eʼni a̱ʼgiu̱u̱ mu maku̱mu̱u̱ dí ndaʼyamajkuu: “Maski ajndu tsémbánii dí nutaxu, mú a̱ʼgiu̱ʼ naʼni dí naraʼwíí ma̱ni̱, índo̱ tsegájnun májánʼ ikhaa na̱nguá eʼthúnʼ dí ikhúún gúʼdoʼ aʼkhúnʼ. ¡Ra̱ʼkhá tháán naxnáa núma̱aʼ dí xúʼko̱ kaʼnii Angela!”. ¡Tséʼni mingíjyúuʼ maʼndaaʼ xtayáá mbáa bi̱ ndaʼyamajkhuaʼ!

18. Ndiéjunʼ garigá á mu nuni̱ xó má eʼngo̱o̱ mu maʼndalá kuyamíjna̱ má xúʼko̱ rá.

¹⁸ Gixa̱a̱ nandoo mandijyúuʼ riʼyu̱u̱ agiuuʼ ngajua dí rígá náa bi̱ nidamijná. Numuu dí ndaʼyoo xí á mu nuniñanʼ raʼndúún kuyamijná mugíʼdi̱i̱ muni tsíngumíjná náa Jeobá. ¡Mú, nda̱a̱ nimbá dí maʼngo̱o̱ maʼnigámbáa ngajua dí gajkhun! Ikha jngóo. Gunimíjna̱la maguaʼdáá mbóoʼ ngajua xóo dí naʼthí náa Cantar de los Cantares. Guʼgíiʼ ginii Jeobá, guríyala mbiʼi makuwáanʼla mbóó jnduʼ, gusngajmála dí nduyamajkumijnála índo̱ nakrua̱ʼa̱la kuyamijná ga̱jma̱a̱ dí nuxnamijnálá dí ndayala, á mu nuni̱la xígi̱ káʼnii, munila mba̱a̱ Jeobá náa na̱ʼkha̱ ngajua dí gajkhun. Ga̱jma̱a̱ rígi̱ gáʼni dí nandala kuyamíjna̱ mani̱ndxu̱u̱ xóo aguʼ dí nditháan tséguiyuuʼ.