1, 2. Ndiéjunʼ dí mbáa muʼgua̱nú murajximíjnalú rá.

 LÁ NITRAJXIMÍNÁʼ mbá miʼtsú á mu rí Jeobá nariʼña̱a̱ dí naratájkáan ráʼ. Á mu xúʼko̱ raʼkháa i̱ndó ikháán, mbaʼiin a̱ngiu̱lú nuni̱ grajximíjná xúʼko̱ káʼnii, itháán índo̱ kúwá ruraʼníí xkujndu. Mbáa mangáanʼlu naʼniulú mingíjyúuʼ mbuʼyáá xú káʼnii eriʼña̱a̱ Jeobá rí nuʼtajkháan índo̱ numíniiʼ.

² Náa artículo rígi̱, matangáan mbuʼyáá rí Jeobá gajkhun nariʼña̱a̱ rí nutajkháan xa̱bi̱i̱ (1 Juan 5:15). Ma̱ngaa mbuʼyáá ndíjkha dí nguáná nakumulú dí Jeobá tsériʼña̱a̱ dí nuʼtákáñíí, mú ma̱ngaa mbuʼyáá xóo káʼnii eriʼñulú.

3. Náa numuu rí Jeobá nandoo muʼtákáñíí rá.

³ Náa Biblia naʼtulúʼ rí Jeobá nandoo kaʼyulú wéñuuʼ ga̱jma̱a̱ ikhaa ndaʼyoo rí kuaʼdáá numulú (Ageo 2:7; 1 Juan 4:10). Ikha jngóo ikhaa naʼtulúʼ rí muʼtákáñíí ga̱jma̱a̱ munda̱ʼa̱a̱ rí mambáyulú (1 Ped. 5:6, 7). Ikhaa nandoo mambáyulú mu makuwáánʼ mijngii náa ikhaa ga̱jma̱a̱ mambáyulú maʼngulú muraʼníí xúgííʼ xkujndu rí kuaʼdáá.

4. Xú káʼnii eʼyáá rí Jeobá nariʼña̱a̱ dí nutajkháan xa̱bi̱i̱ rá. (Atayáá xtiʼkhu ma̱ngaa.)

⁴ Náa Biblia na̱ʼkha̱ mbaʼa historia ndrígún xa̱bi̱i̱ Jeobá bi̱ niriʼñúún dí nitakáñíí. Lá narmáʼáan a̱jkiu̱lú xkri̱da ndrígóo rey David ráʼ. Ikhaa mbayuuʼ mbiʼi rí nixtáa nixmínaʼ gajmíi̱n xa̱bu̱ sia̱nʼ ndrígióo, mú ikhaa mbaʼa nuthu naʼtákáñuu Jeobá mu mambáyúu. Mbá mbiʼi ikhaa niʼtákáñuu: “Jeobá, atadxawíín dí nathanʼ; atadxuun dí natakáñaaʼ mu matambáyuʼ.  Ga̱jma̱a̱ numuu dí natani̱ rí jmbu ma̱ngaa dí májánʼ, atriʼñuʼ” (Sal. 143:1). Jeobá niriʼñuu ga̱jma̱a̱ niʼni kríyaaʼ (1 Sam. 19:10, 18-20; 2 Sam. 5:17-25). Ikha jngóo David niʼthí: “Jeobá xtáa mijngii náa xúgínʼ xa̱bu̱ bi̱ nutakáñíí, náa xúgínʼ xa̱bu̱ bi̱ nutháán rí gajkhun”. Ikha kayuuʼ ma̱ndoo makumulú mangáanʼ (Sal. 145:18).

5. Lá niriʼña̱a̱ Jeobá rí nitakáñii xa̱bi̱i̱ xó má ikhiin niguáʼthi̱i̱n xáʼ. Atagíʼ mbá xkri̱da. (Atayáá xtiʼkhu ma̱ngaa.)

⁵ Nguáná Jeobá xáriʼña̱a̱ rí nuʼtákáñíí xó má ikháán kuáʼti̱i̱n, rúʼko̱ nindxu̱u̱ rí nigíʼnuu apóstol Pablo. Ikhaa “nifraʼa tsuwanʼ náa xuyuʼ” rí niʼni mamínuʼ, ajtsú nuthu nitakáñuu Dios mu maríya̱a̱ʼ. Lá niriʼña Jeobá rí niʼtájkháan xáʼ. Xúʼko̱, mu raʼkháa xó Pablo nigíʼthu̱u̱n. Numuu rí tárigu rí niʼni mamínuʼ, mú, Jeobá nixnúu tsiakii rí ndiyóoʼ mu xúʼko̱ mawiji̱ jmbu ga̱jma̱a̱ maʼni má xúʼko̱ ñajuunʼ (2 Cor. 12:7-10).

6. Náa numuu dí nguáná ma̱ndoo makumulú dí Jeobá tsériʼñulú rá.

⁶ Mbáa xáxtiʼña̱a̱ dí niʼtájkáanʼlú xó ma ikháanʼ kuáʼti̱i̱n mú ma̱ndoo mbuʼyáá gajkhun rí Jeobá ndaʼyoo ndiéjunʼ rí itháán májánʼ náa ikháanʼlu. Rí “ma̱ndoo maʼni itháán ki xóo rí nunda̱ʼa̱ ga̱jma̱a̱ rí nundxaʼwamíjná” (Efes. 3:20). Ikha jngóo ikhaa ma̱ndoo mariʼñulu mbóoʼ mbiʼi dí ikháanʼlu tseguáʼti̱i̱n o majmiuu mbáa bi̱ ikháanʼlu na̱nguá kumulú dí majmiuu.

7. Ndíjkha dí ndayóoʼ muriʼkui̱i̱ dí nunda̱ʼa̱a̱ Jeobá rá. Arathá mbá xkri̱da.

⁷ Mbáa nguáná mbaʼyóoʼ muriʼkui̱i̱ di nunda̱ʼa̱a̱ Jeobá índo̱ na̱jkua̱nú nakru̱ʼu̱lú májánʼ di ikhaa nandoo. Guʼyáá xkri̱da ndrígóo ndxájulú Martin Poetzinger. Nda̱wa̱á dí ninigúnʼ nixuʼmaa nijkha náa campo de concentración nazi. Nákha ginii na̱ndo̱ʼo̱o̱ Jeobá dí muniñaaʼ magajnáa mu maxtáa ga̱jma̱a̱ a̱ʼgiu̱u̱ ma̱ngaa rí maʼtáraʼa mbu̱júu̱ʼ. Mú nda̱wa̱á dí nijngoo a̱jma̱ xmáná ndiʼyoo dí Jeobá na̱nguá eʼni kríyaaʼ. Ikha jngóo ndxájulú Poetzinger nindo̱ʼo̱o̱: “Mbá péñu atambáyúʼ mba̱yo̱o̱ ndiéjunʼ dí nandaʼ mani̱”. Ikhú nigíʼdúu nindxa̱ʼwáminaʼ xúgíʼ xkujndu rí kúwá ruguaʼníí eʼwíinʼ a̱ngiu̱lú bi̱ kúwá ikhí. Mbaʼin dí ikhiin kúwá naxmiéjúnʼ eni̱ guʼñún ga̱jma̱a̱ e̱jñu̱ún ikha jngóo ndxájulú Poetzinger niʼthúu̱nʼ Jeobá: “Núma̱aʼ ga̱jma̱a̱ numuu imbo̱ʼ nuxi̱ʼ ñajunʼ dí niraxnúʼ, atambáyúʼ maxníín tsiakii a̱ngui̱nʼ ga̱jma̱a̱ rúʼko̱ nindxu̱u̱ dí niʼni mbá nueve tsiguʼ rí nixtáa kugura̱ʼa̱a̱.

8. Ndiéjunʼ rí gíʼdoo numuu marmáʼáan a̱jkiu̱lú índo̱ nuʼtajkháan rá.

⁸ Gíʼmaa marmáʼáan a̱jkiu̱lú dí Jeobá  maʼnimbánuu rí nikudaminaʼ maʼni nda̱wa̱á. Ikhaa nikudaminaʼ dí maʼni gámbáa mbá kayuʼ xúgíʼ rí naʼni mumíniiʼ, xó má gamiéjunʼ rí narígá, nandii ga̱jma̱a̱ rí nakháñulú. Jeobá maʼnimbánuu xúgííʼ rígi̱ índo̱ gáʼtañajunʼ Xa̱bu̱ Ñajunʼ ndrígióo (Dan. 2:44; Apoc. 21:3, 4). Mú rí xúgi̱ naniñuuʼ rí Gixa̱a̱ maʼtáñajunʼ náa numbaaʼ rígi̱ (Juan 12:31; Apoc. 12:9). b Á mu Jeobá naʼnimbánuu xkujndu ndrígún xa̱bu̱ numbaaʼ rí mbiʼi xúgi̱, maʼni makujmaa dí Gixa̱a̱ na̱nguá má eʼni dí ra̱májánʼ. Ikha jngóo maski ajndu nuguaʼthi̱i̱n dí Jeobá maʼnimbánuu rí nikudaminaʼ maʼni, raʼkháa rúʼko̱ eyoo gáʼthúu̱n dí na̱nguá embáyulú. Guʼyáá tikhu rí naʼni ga̱jma̱a̱ numulú.

9. Xú káʼnii embáyulú Jeobá índo̱ ndayóoʼ muraʼwíí májánʼ dí muʼni rá. Atagíʼ mbá xkri̱da.

⁹ Naxnúlú ku̱ma̱. Jeobá nakudaminaʼ maxnúlú ku̱ma̱ rí ndayúlú mu muraʼwíí májánʼ dí muʼni, itháán índo̱ ndayúlú muraʼwíí mbá rí mbajyúuʼ asndu kámuu náa vida ndrígulú, xóo rí muraʼwíí á mu muʼdamijná o na̱nguá (Sant. 1:5). Guʼyáá experiencia ndrígóo ndxájulú María c bi̱ xóó tsénújúnʼ. Ikhaa xtáa gagi raʼni ñajuunʼ Jeobá xóo precursora regular índo̱ nininiiʼ mbá ndxájulú. Ikhaa naʼthí: “Ni̱jkhua̱nú nimbájxuxu májánʼ ga̱jma̱a̱ nda̱wa̱á ni̱nduxu̱ kuyamíjna̱, ndiyóoʼ maraʼwíí dí mani, ikha jngóo nitakáñuu wéñuuʼ Jeobá ga̱jma̱a̱ numuu rúʼko̱, mú ni̱jkhánú má ndi̱yo̱o̱ dí ikhúún má kaʼyoʼ maraʼwíi dí mani”. María nikumu̱u̱ dí Jeobá niriʼña̱a̱ dí niʼtájkháan ga̱jma̱a̱ nixnúu ku̱ma̱. Xú káʼnii rá. Ikhaa ndiyáʼ náa i̱yi̱ʼ ndrígulú ga̱jma̱a̱ nixkamaa mbaʼa artículo náa nixtiʼña̱a̱ graxe̱ ndrígóo. Ma̱ngaa ru̱dúu̱ bi̱ nindxu̱u̱ Testigo nixnúu májánʼ consejo dí nimbáyúu mbaʼyoo xóo phú ku̱mu̱u̱. Nda̱wa̱á, María niraʼwíi májánʼ dí maʼni.

10. Xó má eʼthí náa Filipenses 4:13, xú káʼnii gambáñún xa̱bi̱i̱ Jeobá rá. Arathá mbá xkri̱da. (Atayáá xtiʼkhu ma̱ngaa.)

¹⁰ Naxnulu tsiakii maʼngulú. Xó má ni’ni ga̱jma̱a̱ apóstol Pablo, Jeobá maxnúlú tsiakii mu maʼngulú náa numíniiʼ (atraxnuu Filipenses 4:13). Mbuʼyáá xú káʼnii nimbáyúu mbá ndxájulú bi̱ mbiʼyuu Benjamin. Asndu nákha ninindxu̱u̱ dxámá nixtáa mbayuuʼ tsiguʼ gajmíi̱n bi̱ kúwá náa goʼwóo náa África náa nagún xa̱bu̱ bi̱ nuni̱ kawumíjná. Naʼthí: “Nitakáñuu wéñuuʼ Jeobá ga̱jma̱a̱ nindo̱ʼo̱o̱ maxnúʼ tsiakii mu mani̱ rí májánʼ. Jeobá niriʼña̱a̱ rí nitajkháan, niʼni rí maxtáá tsímáá ga̱jma̱a̱ niʼni dí xámiñuʼ mataraʼa má xúʼko̱ ma̱ngaa nixnuʼ i̱yi̱ʼ rí manigajmaa mu maguajún gujkhuʼ náa inuu ikhaa”. Naʼthí xóó: “Rí magúxnuu experiencia ndrígún eʼwíinʼ testigos ga̱jma̱a̱ mba̱yo̱o̱ xú káʼnii Jeobá nimbáñún maʼngu̱u̱n, rúʼko̱ nimbáyúʼ mu xákanajkoʼ ga̱jma̱a̱ maguajún má xúʼko̱ jmbu”.

11, 12. Xó gándoo gájmiuu Jeobá a̱ngiu̱lú bi̱ kúwá náa xuajñuu mu mariʼña̱a̱ rí nuʼtajkháan rá. (Atayáá xtiʼkhu ma̱ngaa.)

 ¹¹ Najmiuu a̱ngiu̱lú bi̱ kúwá náa xuajñuu. Mbruʼun rí inuu makhañúu Jesús niʼtákáñuu Jeobá dí xa̱bu̱ xúriyaʼ majkuíí ní má xúthi dí ikhaa niʼtáwéñuuʼ ikhaa. Mú táʼni dí niʼthúu̱n, rí phú niʼni ikhaa nikunguanʼ mbáa ángel mu maxnúu tsiaki̱i̱ (Luc. 22:42, 43). Xúʼko̱ má xúgi̱ ma̱ngaa, Jeobá ma̱ndoo makuʼmiin a̱ngiu̱lú maguwáʼ gúyulú o mutaru̱ʼu̱lu mu muxnúlú tsiakii. Xúgiáanʼlú ma̱ndoo mbuʼyáʼ xóo gándoo guʼthúún “mbá ajngáa májánʼ” a̱ngiu̱lú (Prov. 12:25).

¹² Guʼyáá experiencia ndrígóo mbá ndxájulú bi̱ mbiʼyuu Míriam. Nda̱wa̱á rí nikháñuu ajmbio̱o̱, mbawíí niguanúu náa goʼwóo ga̱jma̱a̱ nixtáa mingíná wéñuʼ. Tséʼngo̱o̱ ganiñuuʼ rambiyaʼ ga̱jma̱a̱ ndiyóoʼ mbáa bi̱ maʼtámijna ga̱jma̱a̱. Naʼthí: “Nánguá gúʼdoo tsiakii mataróʼoo nimbáa, ikha jngóo nitakáñuu Jeobá, nambiyaʼ índo̱ xtáá ratajkáan ni̱ʼkha̱nú mbá llamada ndrígóo mbáa ndxájulú bi̱ kayá edxu̱u̱ bi̱ nimbájxuʼ májánʼ gajmuʼ”. Ikhaa ga̱jma̱a̱ a̱ʼgiu̱u̱ nini̱ rí maʼni̱i̱ a̱jkiu̱u̱n Míriam, ga̱jma̱a̱ ikhaa ndaʼyoo gajkhun rí Jeobá nindxu̱u̱ bi̱ niʼni rí ndxájulú bugi̱ mataróʼoo.

13. Arathá mbá xkri̱da xú káʼnii Jeobá ma̱ndoo majmiuu xa̱bu̱ bi̱ tséyamajkuíí mu mariʼña̱a̱ dí nuʼtajkháan.

¹³ Ma̱ndoo majmiuu xa̱bu̱ bi̱ tséyamajkuíí (Prov. 21:1). Jeobá nguáná naʼni rí xa̱bu̱ bi̱ tséyamajkuíí mumbáñún xa̱bi̱i̱ mu mariʼña̱a̱ dí nutajkháan. Mbá xkri̱da, niʼni dí rey Artajerjes maniñuuʼ Nehemías mu matanga̱a̱ náa Jerusalén mu mañambáá náa maguma májáanʼ xuajen (Neh. 2:3-6). Rí mbiʼi xúgi̱ Jeobá ma̱ndoo maʼni rí asndu xa̱bu̱ bi̱ na̱nguá nindxu̱ún Testigos ma̱ndoo mumbayulúʼ náa ndayúlú.

14. Xú káʼnii embayáaʼ dí nigíʼnuu Soo Hing rá. (Atayáá xtiʼkhu ma̱ngaa.)

¹⁴ Mbáa ndxájulú bi̱ mbiʼyuuʼ Soo Hing nikumu̱u̱ dí Jeobá nijmiuu médico mu mambáyúu. A̱ʼdióo gíʼdoo mbaʼa nandii náa edxuu ma̱ngaa nimínuuʼ ga̱jma̱a̱ numuu mbá gamiéjunʼ. Ikhú Soo Hing ga̱jma̱a̱ ajmbio̱o̱ niniñanʼ ruñajunʼ mu muñewa̱a̱n aʼdiún. Rúʼko̱ niʼni rí ni xaguaʼdáá mbújkha̱a̱, ra̱ʼkhá tháán gakhi̱i̱ ninindxu̱u̱ dí asndu Soo Hing niʼthí dí ní xáʼngo̱o̱ itháán, rí nánguá gíʼdoo tsiakii. Ikha jngóo niʼthún Jeobá xúgííʼ xú káʼnii ku̱mu̱u̱ ga̱jma̱a̱ nindoʼoo  dí mambáyúu. Doctor nikro̱ʼo̱o̱ xu káʼnii xtáa, núma̱aʼ má ga̱jma̱a̱ numuu rúʼko̱ nindoo nindrígú dí mixtambáñún náa xa̱bu̱ ñajunʼ, nixkamaa mbá guʼwá dí na̱nguá numuu wéñuuʼ mu makuwá. Nda̱wa̱á Soo Hing niʼthí: “Ndiya̱a̱xu xúgííʼ xú káʼnii Jeobá nimbáyuxu. Phú gajkhun dí ikhaa ‹naʼdxuun rí nuʼtajkháan›” (Sal. 65:2).

15. Ndiéjunʼ nimbáyúu mbáa ndxájulú mbaʼyoo rí Jeobá nariʼña̱a̱ rí naʼtájkháan rá.

¹⁵ Jeobá na̱nguá eriʼña̱a̱ pa̱jnu rí nuʼtájkáan. Mú índo̱ nariʼñulú nambáyulú mu maguajún jmbu. Ikha jngóo gíʼmaa muʼgími̱jna̱ mbuʼyáálú xú káʼnii eriʼñulú Anu̱lú bi̱ xtáa mekhuíí. Mbáa ndxájulú bi̱ mbiʼyuu Yoko nikumu̱u̱ rí na̱nguá exti̱ʼña̱a̱ dí naʼtájkháan, ikhú nigíʼdúu niʼnirámáʼ xúgííʼ rí na̱ndo̱ʼo̱o̱ Jeobá, nda̱wa̱á dí nitanga̱a̱ ndiʼyoo náa niʼnirámáʼ, ni̱jkha̱nú ndiʼyoo dí Jeobá niriʼña̱a̱ xúgííʼ rí niʼtájkháan asndu tikhu rí na̱nguá ermáʼáan a̱jkiu̱u̱n. Májánʼ gaʼni rí nguáná muriʼyáʼ mbiʼi mu mundxaʼwamíjna̱ xú káʼnii eriʼña̱a̱ Jeobá dí nuʼtájkáan (Sal. 66:19, 20).

16. Xú káʼnii embáyulúʼfe índo̱ nuʼtajkáan rá. (Hebreos 11:6.)

¹⁶ Raʼkháa i̱ndó ndayóoʼ maguaʼdáá fe mu muʼtákáñíí Jeobá, ma̱ngaa ndayóoʼ mundrígúlu asndu xkáʼnii má xóo eriʼña̱a̱ (atraxnuu Hebreos 11:6). Guʼyáá xkri̱da ndrígún xa̱bu̱ gajmii Mike ga̱jma̱a̱ Chrissy, ikhiin nindúún magún gúyambáá náa Betel. Mike naʼthí: “Mbaʼa nuthu nixuʼmáxu solicitud ga̱jma̱a̱ nángii eʼni nitakáñixu Jeobá ga̱jma̱a̱ numuu rígi̱, mu nditháan túthuxu muʼguá”. Mike ga̱jma̱a̱ Chrissy túniña̱a̱ʼ rakumu̱ún rí Jeobá ma gáʼyoo náa phú eyóoʼ muñambáá. Ni̱ni̱ má xúʼko̱ ñajuunʼ xó má eʼngu̱u̱n, nikúwi̱i̱n ruñambáá náa ndiyóoʼ majuiʼtáraʼa ga̱jma̱a̱ túniña̱a̱ʼ ranindxu̱ún precursor regular ikhí, ma̱ngaa nigún guñambáá náa naguma guʼwá nagimbáanʼ. Rí xúgi̱ nindxu̱ún circuito. Mike naʼthí: “Jeobá na̱nguá niriʼña̱a̱ xó má ikháanʼ ninduxu̱, mú ikhaa niriʼñuxu asndu itháán májánʼ ki xó ikháanʼ niku̱mu̱xu”.

17, 18. Xó má naʼthí náa Salmo 86:6, 7, ndiéjunʼ dí nduʼyáálu gajkhun rá.

¹⁷ (Atraxnuu Salmo 86:6, 7). d David ndiʼyoo gajkhun rí Jeobá niʼdxawuun ga̱jma̱a̱ nariʼña̱a̱ rí niʼtájkáan. Ikháán mangáán ma̱ndoo matayaa dí gajkhun nindxu̱u̱ ajngáa rígi̱. Xkri̱da rí ndiʼyáá náa artículo rígi̱ nasngájmulú rí  Jeobá maxnúlú ku̱ma̱ ga̱jma̱a̱ tsiakii rí ndayúlú mu maʼngulú, xó má ndiʼyáá dí ikhaa ma̱ndoo majmiuu a̱ngiu̱lú bi̱ kúwíin náa xuajñuu o eʼwíinʼ xa̱bu̱ bi̱ na̱nguá eyamajkuíí mu mumbayúlú.

¹⁸ Nduʼyáá rí Jeobá gajkhun mariʼña̱a̱ rí nuʼtájkáan maski ajndu nguáná ikhaa xáriʼñulú xó má ikháanʼlu eyulú. Ikhaa maxnúlú rí ndayúlú mbiʼi rí gáʼyulúʼ. Ikha jngóo índo̱ guʼtajkháan guguaʼdáá fe rí Jeobá mañewu̱nlú xúgi̱ ga̱jma̱a̱ náa numbaaʼ nuxi̱ʼ “maxnún rí nda̱ñúunʼ xúgíinʼ bi̱ kúwá nduya” (Sal. 145:16).