1. Ndiéjunʼ nijmañulúʼ náa reunión dí nirígá 2023 rá.

 ¡RA̱ʼKHÁ THÁÁN mitsaanʼ reunión dí nirígá nákha 2023! a Ikhí ni̱ʼkha̱ raʼthí ga̱jma̱a̱ numuu rí nuʼnimbulú ma̱ngaa i̱ʼwáʼ anuncios dí na̱ʼkha̱ raʼthí ga̱jma̱a̱ numuu xú káʼnii majuiʼtáraʼa. Mbá xkri̱da, ikhí ni̱ʼkha̱ raʼthúlú dí tikhuun xa̱bu̱ maguaʼdáá mbiʼi mu muniʼniiʼ Jeobá nda̱wa̱á rí gámbáa Babilonia rí Mba̱a̱. Ma̱ngaa niʼthúlú rí noviembre tsiguʼ 2023, ní xáʼyóoʼ má muxnajxíi̱ hora xó má kaʼyoo. Lá rígi̱ eyoo gáʼthúu̱n rí najuiʼtáraʼa nánguá má gíʼdoo numuu xó má nákha ginii ráʼ. ¡Na̱nguá!

2. Náá numuu rí mámbá mbiʼi ndaʼyóoʼ muʼtáraʼa itháán nacha̱ rá. (Marcos 13:10.)

² Mámbá mbiʼi rí nanújngoo, dí muʼtáraʼa gíʼdoo itháán numuu. Náá numuu rá. Numuu rí mbiʼi na̱jkha̱ rajngiyuu. Gundxaʼwámíjná rí niʼthí Jesús ga̱jma̱a̱ dí najuiʼtáraʼa índo̱ gáʼni iwáá mbiʼi, xóo eʼthí Marcos 13:10 (atraxnuu). Xó má eʼthí ma̱ngaa náa Mateo, Jesús niʼthí rí ajngáa rí májánʼ majuiʼtáraʼa náa mbá xúgíʼ tsu̱du̱u̱ Ku̱ba̱ʼ nákha xóó “tsértumuu mbiʼi” (Mat. 24:14). Rígi̱ nandoo gáʼthúu̱n rí mambáa mbiʼi ndrígóo Gixa̱a̱. Jeobá ndaʼyoo “náá mbiʼi ga̱jma̱a̱ náá hora gáʼni” rí nikudaminaʼ maʼnimbánuu (Mat. 24:36; 25:13; Hech. 1:7). Mámbá mbiʼi rí nanújngoo nánguá mba̱yu̱u̱ʼ guanúu (Rom. 13:11). Nákha xóó tsértumuu mbiʼi ndaʼyóoʼ muʼtáraʼa má xúʼko̱.

3. Náá numuu nuʼtáraʼa rá.

³ Rígá mbá rí gíʼdoo wéñuuʼ numuu dí xúgiáanʼ gíʼmaa murajximíjnalú:  Náá numuu nuʼtáraʼa ajngáa rí májánʼ rá. Nuʼtáraʼa numuu rí kuaʼdáá ngajua. Índo̱ nuʼtáraʼa nusngajmá dí nandulúʼ kuʼñúún xa̱bu̱ ga̱jma̱a̱ dí ra̱ʼkhá tháán eyulú kuʼyáá Jeobá ga̱jma̱a̱ mbiʼyuu. Guʼyáá mámbá dí rígi̱.

NUʼTÁRAʼA NUMUU RÍ NANDULÚʼ KUʼYÁÁ AJNGÁA RÍ MÁJÁNʼ

4. Ndiéjunʼ e̱ʼni̱ índo̱ nuʼdxawíín mbá ajngáa rí májánʼ rá.

⁴ Garmáʼáan a̱jkia̱a̱nʼ ga̱jma̱a̱ numuu mbá ajngáa májánʼ rí niʼtháanʼ mbáa. Mbáa niʼtháanʼ rí mbáa bi̱ xtayáá nigiʼdaa mbáa ada̱ o nixnaraʼaaʼ mbá ñajunʼ rí ikháán mba̱yu̱u̱ʼ má xtaa ratayáʼ. Xú káʼnii niku̱ma̱a̱ʼ rá. Mbáa ra̱ʼkhá tháán niraxtaa gagi ga̱jma̱a̱ nindaaʼ marathu̱u̱n bi̱ xtañún ga̱jma̱a̱ bi̱ natambájxa̱a̱ʼ gajmiáanʼ. Lá ragájkhun rí xúʼko̱ má niku̱ma̱a̱ʼ índo̱ nitadxawíín dí nagui̱i̱ wéñuuʼ xóo: Ajngáa rí májánʼ ga̱jma̱a̱ numuu Reino ndrígóo Dios ráʼ.

5. Xú káʼnii niku̱ma̱a̱ʼ índo̱ nitanigajma̱a̱ Biblia rá. (Atayáá ma̱ngaa xtiʼkhuu.)

⁵ Atatsaʼwáminaʼ xú káʼni niku̱ma̱a̱ʼ índo̱ nijmañaaʼ timbá míʼtsú ga̱jma̱a̱ numuu Biblia. Índo̱ nijmañaaʼ dí Jeobá nandoo kaʼyaaʼ, dí nandoo rí ikháán maraxtaa náa xuajñuu, dí nikudaminaʼ maʼni gámbóo ga̱ʼkhu̱ ga̱jma̱a̱ dí numínííʼ ga̱jma̱a̱ dí náa numbaaʼ nuxi̱ʼ maʼnigabi̱ín xúgíinʼ a̱ngia̱a̱nʼ bi̱ nikháñún (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Xúgíʼ kiʼsngáa gajkhun rúʼko̱ ni̱jkha̱nú asndu náa a̱jkia̱a̱nʼ (Luc. 24:32). Ra̱ʼkhá tháán nindaaʼ xtayáá kiʼsngáa dí gíʼdoo wéñuuʼ numuu dí xtaa rajmañaaʼ ga̱jma̱a̱ nindaaʼ marathu̱u̱n eʼwíinʼ mbá xúgíʼ (atani̱ mbríguii ga̱jma̱a̱ Jeremías 20:9).

6. Ndiéjunʼ eʼsngáaʼ experiencia ndrígóo Ernest ga̱jma̱a̱ Rose rá.

⁶ Guʼthá ga̱jma̱a̱ numuu mbáa ndxájulú bi̱ mbiʼyuu Ernest. b Ikhaa naʼthí rí índo̱ nigiʼdoo gu̱wa̱ʼ tsiguuʼ, anu̱u̱ nikháñúu ga̱jma̱a̱ naʼthí: “Nirajximínáʼ: Lá ni̱jkha̱a̱ mekhuíí xáʼ.  Lá ndawa̱a̱ mbá kayuuʼ xáʼ. Nixígúʼ ka̱ñu̱u̱n e̱ji̱n bi̱ guáʼdiin anu̱ún ga̱jma̱a̱ rudún”. Ikhaa gájtsi e̱jkha̱ náa panteón ga̱jma̱a̱ nasmbáti̱go̱o̱ náa nibáaʼ anu̱u̱ ga̱jma̱a̱ naʼtájkháan: “Mbá péñu Dios, nandoʼ mba̱yo̱o̱ náá xtáa anu̱ʼ”. Índo̱ nigiʼdoo 27 tsiguuʼ, nitháán maʼnigajma̱a̱ Biblia ga̱jma̱a̱ ikhaa mbá nacha̱ nigruigú maʼnigajma̱a̱. Ra̱ʼkhá tháán nidxuu índo̱ ndiʼyoo rí bi̱ nikháñún, nánguá ku̱mu̱ún ga̱jma̱a̱ rí asndu xóo nunuʼ ga̱jma̱a̱ rí náa Biblia naʼthí rí mbóo mbiʼi muguajxúnʼ bi̱ nikháñún (Ecl. 9:​5, 10; Hech. 24:15). ¡Ni̱jkha̱nú nixkamaa xóo exti̱ʼña̱a̱ grajxe̱ rí mba̱yu̱u̱ʼ má tsiguʼ nirajximínáʼ! Ra̱ʼkhá tháán gagi nixtáa ga̱jma̱a̱ nidxuu wéñuuʼ ga̱jma̱a̱ numuu kiʼsngáa ndrígóo Biblia rí xtáa rajmañuu. A̱ʼgiu̱u̱ bi̱ mbiʼyuu Rose, nigíʼdúu niʼnigajma̱a̱ mbóó ga̱jma̱a̱, ma̱ngaa ikhaa ra̱ʼkhá tháán ninigu̱u̱ʼ rí xtáa rajmañuu. Tsiguʼ nda̱wa̱á, nákha 1978 mbá nájmiin nijngúún iyááʼ ga̱jma̱a̱ gagi nithúún bi̱ kuñún, bi̱ nambájxu̱u̱n gajmiún, ga̱jma̱a̱ xúgíinʼ bi̱ nandún mudxuun dí kúwá runimbu̱ún. Mba̱yu̱u̱ʼ tsiguʼ Ernest ga̱jma̱a̱ Rose nimbañúún itháán rí 70 xa̱bu̱ mu maguánú muniʼniiʼ Jeobá ga̱jma̱a̱ majngúún iyááʼ.

7. Ndiéjunʼ gárígá á mu a̱jkiu̱lú nandoo kaʼyoo itháan kiʼsngáa ndrígóo Biblia rá. (Lucas 6:45.)

⁷ Á mu nadxuu a̱jkiu̱lú ga̱jma̱a̱ numuu kiʼsngáa ndrígóo Biblia, maʼndulú muʼthá ga̱jma̱a̱ numuu ikhaa (atraxnuu Lucas 6:45). Nakumulú xóo nikumu̱ún xa̱bi̱i̱ Jesús nákha siglo timbá índo̱ nithi: “Xándoo muniʼñááʼ ru̱ta̱ rí ndi̱ya̱a̱xu ga̱jma̱a̱ dí nidxáwinxu” (Hech. 4:20). Ra̱ʼkhá tháán endulúʼ kuʼyáá dí gajkhun dí nandulúʼ muʼthúún xúgíinʼ xa̱bu̱ asndu xó má eʼngo̱o̱.

NUʼTÁRAʼA NUMUU RÍ NANDULÚʼ KUʼÑÚÚN XA̱BU̱

8. Ndiéjunʼ exkajxáánʼ mu muʼtáruʼún ajngáa rí májánʼ xa̱bu̱ rá. (Atayáá kúgumaʼá “ Ma̱ndoo mumbáñún xa̱bu̱: á mu nandulúʼ kuʼñúún”; atayáá ma̱ngaa xtiʼkhuu.)

⁸ Ikhaa má xóo Jeobá ga̱jma̱a̱ Jesús, ikháánʼ mangáánʼ nandulúʼ kuʼñúún xa̱bu̱ (Prov. 8:31; Juan 3:16). Nagáwíinʼ a̱jkiu̱lú kuʼñúún bi̱ nda̱a̱ dí kuaʼti̱i̱n ga̱jma̱a̱ “ni má Dios” ndawa̱a̱ náa ikhiin (Efes. 2:12). Xóo muʼthá, nindxu̱u̱ xóo kajchún náa mbá iñáʼ mi̱jnu̱ʼ ga̱jma̱a̱ numuu xúgíʼ xkujndu dí rígá. Mú ikháánʼ kuaʼdáá mbá ñuñuu dí ma̱ndoo maguwíin: Rí nindxu̱u̱ ajngáa rí májánʼ ga̱jma̱a̱ numuu Reino ndrígóo Dios. Ngajua ga̱jma̱a̱ rí nagáwíinʼ a̱jkiu̱lú maxkajxáánʼ mu̱ʼni̱ asndu xó má eʼngulú mu muʼtáruʼún xa̱bu̱. Nindxu̱u̱ mbá rí gíʼdoo wéñuuʼ numuu, maʼni rí makuwíin gagi dí mbiʼi xúgi̱ ga̱jma̱a̱ maʼni “rí makuwíin májánʼ nda̱wa̱á” náa ma̱ndoo makuwá kámuu mbiʼi (1 Tim. 6.19).

9. Ndiéjunʼ eʼthúún xa̱bu̱ dí wíji̱ marígá ga̱jma̱a̱ náá numuu rá. (Ezequiel 33:​7, 8.)

⁹ Ngajua rí kuaʼdáá náa xa̱bu̱ naxkajxáánʼ muʼthúún rí inuu maguma gámbáa numbaaʼ  xkawiʼ rígi̱ (atraxnuu Ezequiel 33:​7, 8). c Nakuwáánʼ ngíná índo̱ nduʼñún xa̱bu̱ bi̱ náa nuʼtáruʼún ga̱jma̱a̱ bi̱ kuʼñúún bi̱ na̱nguá nindxu̱ún testigos numuu rí na̱nguá eyáá rí wíji̱ marigá. Mateo 24:21 naʼthí rí “marigá mbá ga̱ʼkhu̱ rí majphú mba̱a̱” ga̱jma̱a̱ dí “mbá ga̱ʼkhu̱ xóo rígi̱, nimbá miʼtsú tárígá asndu nákhá nigi̱ʼdu̱u̱ numbaaʼ, ní má xúgi̱, ga̱jma̱a̱ ní xátanga̱a̱ marigá”. Nandulúʼ dí mbuyáá ndiéjunʼ gárígá índo̱ Jeobá gándi̱ʼi̱i̱n cuenta: Ginii maguma gámbáa xúgíʼ religión rí nindxu̱u̱ mindu̱wa̱ʼ ga̱jma̱a̱ nda̱wa̱á índo̱ gárígá Armagedón mambáa xúgíʼ rí ra̱májánʼ dí rígá náa numbaaʼ (Apoc. 16:​14, 16; 17:​16, 17; 19:​11, 19, 20). Nuʼtákáñii Jeobá rí xa̱bu̱ mudxawíín ajngáa rí najkua kuʼyúlú ga̱jma̱a̱ mundrigú muni̱ ñajuunʼ ga̱jma̱a̱ nindxu̱lú. Ndiéjunʼ gúgíʼníín xa̱bu̱ ma̱ngaa bi̱ kuʼñúún bi̱ tséndrigú ajngáa rí najkua kuʼyúlú dí mbiʼi xúgi̱ rá.

10. Náá numuu rí gíʼmaa muʼthúún má xúʼko̱ xa̱bu̱ dí wíji̱ marigá rá.

¹⁰ Xó má ndiʼyáá náa artículo rí nijngoo, mbáa Jeobá maraʼwíí maʼni káwíin bi̱ gúriʼkhu̱u̱ xóo endxaʼwamíjna̱ índo̱ gúyáá rí naguma gámbáa Babilonia rí Mba̱a̱. Rígi̱ naʼni mbuʼyáá rí gíʼdoo wéñuuʼ numuu muʼtáruʼún má xúʼko̱ xa̱bu̱. Náá numuu rá. Gundxaʼwámíjná ga̱jma̱a̱ numuu rígi̱: Rí gúʼthúún dí mbiʼi xúgi̱ mbáa rúʼko̱ nindxu̱u̱ rí gármáʼáan a̱jkiu̱ún nda̱wa̱á (atanimbríguii ga̱jma̱a̱ Ezequiel 33:33). Mbáa marmáʼáan a̱jkiu̱ún ga̱jma̱a̱ numuu rí niʼthúún ga̱jma̱a̱ muraʼwíí muni̱ ñajuunʼ Jeobá ga̱jma̱a̱ nindxu̱lú nákha xóó rígá mbiʼi. Xó má bi̱ nañewu̱u̱n guʼwá e̱jua̱nʼ náa Filipos, i̱ndó nigruigú rí gajkhun índo̱ ndiʼyoo rí niʼxma gakhi̱i̱ wéñuuʼ. Mbáa kúwíin xa̱bu̱ rí mbiʼi xúgi̱ bi̱ tsíñún gúndrigú ajngáa rí májánʼ, mú mbáa mundrigú índo̱ gúyáá “gaʼxma gakhii” ga̱jma̱a̱ numuu rí naguma gámbáa Babilonia rí Mba̱a̱ rí maʼni kaʼwii numbaaʼ (Hech. 16:​25-34).

NUʼTÁRAʼA NUMUU RÍ NANDULÚʼ KUʼYÁÁ JEOBÁ GA̱JMA̱A̱ MBIʼYUU

11. Xú káʼnii exnáá ‹gamajkhu, e̱ʼni̱ mba̱a̱ ga̱jma̱a̱ xú káʼnii exnáá tsiakii› Jeobá rá. (Apocalipsis 4:11; atayáá ma̱ngaa xtiʼkhuu.)

¹¹ Mbá rí gíʼdoo numuu rí nuʼtáraʼa ajngáa rí májánʼ nindxu̱u̱ numuu rí nandulúʼ kuʼyáá Jeobá ga̱jma̱a̱ rí nandulúʼ kuʼyáá mbiʼyuu rí nindxu̱u̱ kaʼwu. Guʼyáá dí nuʼtáraʼa náa xóo ma̱ndoo mu̱ʼni̱ mba̱a̱ Dios bi̱ nandulúʼ kuʼyáá. Nduʼyáá rí Jeobá kaʼyoo magruigú ‹gamajkhu, dí maguma mba̱a̱ ga̱jma̱a̱ magruigú tsiakii› (atraxnuu Apocalipsis 4:11). Xú káʼnii exnáá gamajkhu ga̱jma̱a̱ xú káʼnii e̱ʼni̱ mba̱a̱ xá. Índo̱ nuʼthúún xa̱bu̱ ga̱jma̱a̱ numuu  rí nasngájma kaʼwu rí Jeobá niʼniwíi xúgíʼ dí rígá ga̱jma̱a̱ rí ikhaa niʼni makuwáanʼ. Ga̱jma̱a̱ xú káʼnii exnáá tsiakii ndrígulú xá. Nuxnáá tsiakii índo̱ najmulú mbiʼi ndrígulú ga̱jma̱a̱ rí kuaʼdáá mu muñambáá náa muʼtáraʼa xó má eʼngulú (Mat. 6:33; Luc. 13:24; Col. 3:23). Xóo muʼthá, nanigulúʼ muʼthá ga̱jma̱a̱ numuu Dios bi̱ nandulúʼ kuʼyáá mú ma̱ngaa nandulúʼ muʼthá ga̱jma̱a̱ numuu mbiʼyuu ga̱jma̱a̱ ndiéjunʼ eyoo gáʼthúu̱n. Náá numuu rá.

12. Xú káʼnii e̱ʼni̱ kaʼwi̱i̱ mbiʼyuu Jeobá índo̱ nuʼtáraʼa rá.

¹² Numuu rí nandulúʼ kuʼyáá Jeobá ikha jngóo nandulúʼ dí maguma kaʼwii mbiʼyuu (Mat. 6:9). Xóo muʼthá, nandulúʼ mu̱ʼni̱ kaʼwi̱i̱ mbiʼyuu náa xúgíʼ nduwaʼ rí niʼthí Gixa̱a̱ ga̱jma̱a̱ numuu (Gén. 3:​1-5; Job 2:4; Juan 8:44). Ikha jngóo náa nuʼtáraʼa nandulúʼ mumbáyíí mbiʼyuu Jeobá ga̱jma̱a̱ rí muʼthán rí gajkhun ga̱jma̱a̱ numuu asndu tsáá bi̱ gándoo maʼdxawunlú. Nandulúʼ dí xúgíinʼ xa̱bu̱ numbaaʼ mbuyáá rí cualidad dí rígá náa ikhaa nindxu̱u̱ ngajua, rí natañájunʼ nindxu̱u̱ jmbu ga̱jma̱a̱ dí xa̱bu̱ ñajunʼ ndrígóo gítháán má tígo̱o̱ maʼni gámbáa tsingíná ga̱jma̱a̱ ma̱ʼkha̱ kayóo rí tsímáá ga̱jma̱a̱ gagi náa xa̱bu̱ numbaaʼ (Sal. 37:​10, 11, 29; 1 Juan 4:8). Índo̱ nu̱ʼni̱ xúgíʼ rígi̱, kuwáanʼ ru̱ʼni̱ kaʼwi̱i̱ mbiʼyuu Jeobá. Ga̱jma̱a̱ nadxulú numuu rí nuʼnimbánii rí kaʼyulú xóo testigos ndrígóo. Náá numuu nuʼthá rígi̱ rá.

13. Ndíjkha rí nadxulú rí nagu̱ mbiʼyulú testigos de Jeobá rá. (Isaías 43:​10-12.)

¹³ Jeobá niraʼwáánʼ mu manindxu̱lú testigos ndrígóo (atraxnuu Isaías 43:​10-12). d Nguáthá  tsiguʼ kidííʼ Cuerpo Gobernante niʼthí náa mbá carta: “Nda̱a̱ i̱mba̱ dí ra̱ʼkhá tháán nagui̱i̱ dí magumbiʼyulú testigos de Jeobá”. e Guʼgíʼ mbá xkri̱da, gundxaʼwámíjná dí kuwáánʼ náa inún xa̱bu̱ ñajunʼ numuu dí mbáa nikruigáánʼlú ga̱jma̱a̱ numuu rí ni̱ʼni̱ mbá dí ra̱májánʼ ga̱jma̱a̱ ndayúlú rí mbáa maʼthí ga̱jma̱a̱ numulú. Mbáa gajkhun rí muʼthán mbáa xa̱bu̱ bi̱ nuniʼníiʼlú májánʼ ga̱jma̱a̱ bi̱ nakujmaa májánʼ mu xúʼko̱ magiʼdoo numuu rí gáʼthí. Ikhaa má kayuuʼ Jeobá niraʼwáánʼ ikháánʼ mu muʼthá ga̱jma̱a̱ numuu rí mbáwíí ikhaa nindxu̱u̱ Dios bi̱ gajkhun numuu rí nanináánʼlú májánʼ ga̱jma̱a̱ rí naku̱mu̱u̱ kaʼyulú. Ikháánʼ nduʼyáá dí ra̱ʼkhá tháán gíʼdoo numuu rí manindxu̱lú testigos ndrígóo, ikha jngóo nu̱ʼni̱ xó má eʼngo̱o̱ mu muʼthá ga̱jma̱a̱ numuu mbiʼyuu ma̱ngaa rí nindxu̱u̱ nduwaʼ xúgíʼ rí nithi ga̱jma̱a̱ numuu ikhaa. Xígi̱ nuʼnimbánii rí kaʼyulú: Rí nindxu̱lú testigos de Jeobá (Sal. 83:18; Rom. 10:​13-15).

GUʼTÁRAʼA ASNDU GÁRTUMUU MBIʼI

14. Ndiéjunʼ rí nagui̱i̱ wéñuuʼ kua̱ʼthi̱i̱n marigá rá.

¹⁴ ¡Kua̱ʼthi̱i̱n mbuʼyáá marigá rí nagui̱i̱ wéñuuʼ! Nandulúʼ rí Jeobá má gámbáyulúʼ mu muxkamiin itháán xa̱bu̱ bi̱ mudrigú ajngáa rí gajkhun nákha xóó tségi̱ʼdu̱u̱ mbá ga̱ʼkhu̱ rí majphú mba̱a̱. Ma̱ngaa kuwáanʼ gagi numuu rí índo̱ gárigá ga̱ʼkhu̱ rí majphú mba̱a̱, mbiʼi rí mani̱ndxu̱u̱ gakhi̱i̱ náa xa̱bu̱ numbaaʼ, makuwíin xa̱bu̱ bi̱ muniña̱a̱ʼ numbaaʼ ndrígóo Gixa̱a̱ ga̱jma̱a̱ mbuyamajkuíí Jeobá ga̱jma̱á nindxu̱lú (Hech. 13:48).

15, 16. Ndiéjunʼ gákuwáánʼ ru̱ʼni̱ ga̱jma̱a̱ asndu nguáná rá.

¹⁵ Mbiʼi xúgi̱ kuaʼdáá mbá ñajunʼ rí mu̱ʼni̱. Kuaʼdáá rí itháán gíʼdoo numuu, nindxu̱u̱ rí muʼtáraʼa ajngáa rí májánʼ ga̱jma̱a̱ numuu Reino ndrígóo Dios náa xúgíʼ tsu̱du̱u̱ Ku̱ba̱ʼ. Ma̱ngaa ndayóoʼ rí muʼthúún má xúʼko̱ xa̱bu̱ dí na̱jkha̱ rartumuu mbiʼi ndrígóo numbaaʼ xkawiiʼ rígi̱. Índo̱ gáʼganú mbiʼi rí mixtandi̱ʼi̱i̱n cuenta xa̱bu̱, maguánú mbuyáá rí niʼtáráʼa na̱ʼkha̱ náa Jeobá (Ezeq. 38:23).

¹⁶ Ikha jngóo, ndiéjunʼ kuwáánʼlú xawii mu̱ʼni̱ rá. Numuu rí nandulúʼ kuʼyáá ajngáa rí májánʼ, nandulúʼ kuʼñúún xa̱bu̱ ga̱jma̱a̱ rí nandulúʼ kuʼyáá Jeobá ga̱jma̱a̱ mbiʼyuuʼ, muʼtáraʼa má xúʼko̱ asndu índo̱ Jeobá gáʼthí: “¡Ikhí rá!”.