Xú káʼnii gaguʼwaanʼ náa mbá nuxi̱ʼ congregación
“ÍNDO̱ niriʼkhu̱u̱ náa congregación rígi̱, nimíñuʼ wéñuʼ, eʼthí Allen. * Tséyóo á mu mambaxúʼ gajmíi̱nʼ eʼwíínʼ o á mu a̱ngiu̱lú manigu̱nʼ xóo xa̱bu̱ ni̱ndxu̱ʼ”. Allen xtáa rayambáá náa i̱mba̱ nuxi̱ʼ congregación naʼni mbá 1,400 kilómetros rí mitsínguánʼ asndu náa goʼwóo.
Á mu ikháánʼ nitriʼkhu̱u̱ congregación ndrígáʼ, mbáa mangáán naku̱ma̱ʼ rí namíñaʼ mbá chíʼgíʼ. Ndiéjunʼ gambayaaʼ mu maguʼwaanʼ rá. Ndiéjunʼ gátani á mu naʼniaʼ mingíjyúuʼ maguʼwaanʼ rá. Ga̱jma̱a̱ maski ajndu ikháánʼ xóó tsítriʼkhu̱u̱ congregación, xú káʼnii gándoo gatambáñuun bi̱ naguwáʼ náa congregación ndrígáʼ rá.
XÚ KÁʼNII GÁTANI MU MAGUʼWAANʼ RÁ.
Índo̱ mbá ixi̱ nudu̱u̱ i̱mba̱ níʼkhá tseguʼun nacha̱. Mu mudujnga̱a̱ májánʼ, ndayóoʼ murujtuu ajmu̱u̱. Nda̱wa̱á, nakráʼáan nacha̱ ajmu̱u̱. Xúʼko̱ má ma̱ngaa rí mi̱dxu̱ʼ náa i̱mba̱ congregación maʼniaʼ mingíjyúuʼ maguʼwaanʼ. Numuu rí ikháánʼ niguʼwaanʼ má náa congregación rí xtaa nákha ginii, rí nimbáxaʼ májánʼ gajmiáanʼ eʼwíínʼ ga̱jma̱a̱ xtaʼdáá májánʼ awan rí xú káʼnii matani ñajunʼ Dios. Rí xúgi̱ gíʼmaa maguʼwaanʼ náa imbo̱o̱ congregación. Ndiéjunʼ gambayaaʼ rá. Mataʼgíʼ matanimbánii ikha ndrígóo Biblia. Guʼyáá tikhuu xóo gúʼni.
Xa̱bu̱ bi̱ naguxnuu má xúʼko̱ Ajngá rawunʼ Dios nindxu̱u̱ “xóo mbóo ixi̱ rí wíji̱ náa rawunʼ iyaʼ, naxná xndúu índo̱ na̱jkha̱nú mbiʼi rí maxná ga̱jma̱a̱ inúu tséjndóʼ, ga̱jma̱a̱ xúgíʼ rí gáʼni magajnúu májánʼ” (Sal. 1:1-3).
Xó má mbóo ixi̱ ndayóoʼ ma̱jnu̱ʼ iyaʼ má xúʼko̱ mu mbaja̱a̱ májánʼ, mbáa cristiano ndayóoʼ maʼnigajmaa má xúʼko̱ Ajngá rawunʼ Dios mu mawiji̱ gujkhuʼ. Ikha jngó, xátatsiʼñáʼ ratanigajmaa Biblia, mi̱dxu̱ʼ náa reunión, rí munigajmaa mbá guʼwáanʼ ga̱jma̱a̱ matanigajmaa mbáwíín. Garmáʼáan a̱jkia̱nʼ rí gíʼmaa mataniminaʼ xó má tani nákha ginii mu mambaxáʼ májánʼ ga̱jma̱ʼ Jeobá.
“Bi̱ narngújyooʼ eʼwíínʼ ikhaa ma̱ngaa murngujyááʼ” (Prov. 11:25).
Maxnáʼ itháan tsiakii ga̱jma̱a̱ maguʼwaanʼ nacha̱ á mu narataraʼa má xúʼko̱. “Rí itháan nimbáyuʼ ikhúúnʼ ga̱jmu̱ʼ a̱ʼgiu̱ʼ rí mani̱ndxu̱xuʼ precursor auxiliar nákha ndiʼkhún niguáʼnuxu náa congregación”, eʼthí Kevin, bi̱ xtáa rayambáá xóo bi̱ kayá edxu̱u̱. Ga̱jma̱a̱ naʼthí xóó: “Nacha̱ má niniʼnúnʼ a̱ngiu̱lú, precursores ga̱jma̱a̱ náa mutaráʼaxu”. Roger, bi̱ ni̱jkha̱ gáxtáa itháan rí 1,600 kilómetros rí mitsínguánʼ náa ikhaa xtáa, naʼthí: “Rí itháan májánʼ rí maguʼwaanʼ náa i̱mba̱ nuxi̱ʼ congregación rí magajnáʼ gárataráʼa. Ma̱ngaa rí matambáñun bi̱ kuya̱ edxu̱u̱ asndu ndiéjunʼ má rí gáʼyóóʼ xóo rí matani kaʼwi̱i̱ Guʼwá náa nagimbáanʼ, rí matriʼkuriyaʼ mbáa ndxájulú náa reunión o rí mi̱dxu̱ʼ jcháa mbáa náa reunión. Á mu a̱ngiu̱lú nduyáá rí ni̱ndxa̱ʼ mbáa xa̱bu̱ bi̱ nandoo mayambáá, nacha̱ gundriguíín”.
“Gurmbáʼtaa a̱jkia̱lá” (2 Cor. 6:13).
Gíʼdoo wéñuʼ numuu rí maʼndulú kuʼñúún eʼwíínʼ a̱ngiu̱lú. Índo̱ Melissa gajmíi̱n bi̱ kuwa náa goʼwóo nigún gúyambáá náa i̱mba̱ nuxi̱ʼ congregación, ninimi̱jna̱ mambaxúún gajmiún eʼwíínʼ. “Nákha xóó tsígi̱ʼdu̱u̱ ga̱jma̱a̱ índo̱ naguámbá reunión nambáxuxu gajmiúxu̱ a̱ngiu̱lú, eʼthí Melissa. Xúʼko̱ naguapáanʼxu mu mutamíjná gajmiúxu̱ raʼkháa i̱ndó
mutaxu, xú káʼnii xtaa ga̱jma̱a̱ mba̱ya̱ʼ mbu̱júu̱ʼ”. Rígi̱ ma̱ngaa nimbáñun mu majmañún nacha̱ mbiʼñún a̱ngiu̱lú. Ma̱ngaa, nindrigúun a̱ngiu̱lú, ga̱jma̱a̱ rúʼko̱ niʼni rí mambáxu̱u̱n itháan gajmiún. Melissa xóó naʼthí: “Nixnamíjnaxu número ndrígóo teléfono. Xúʼko̱ ma̱ndoo mutamíjná gajmiúxú ga̱jma̱a̱ mutuxu índo̱ gáʼyooʼ maguma mbá ñajunʼ ga̱jma̱a̱ índo̱ garigá mbá ndxa̱a̱”.Á mu naʼniaʼ mingíjyúuʼ mataniʼnúnʼ bi̱ ndiʼkhún eguwáʼ, ma̱ndoo matanduʼwa gajmiáanʼ maski ajndu tsíyaaʼ. Rí matanduʼwa matani rí eʼwíínʼ muxuʼmamijná náa ikháánʼ. Náa Biblia naʼthí rí índo̱ “naxpíbi̱ʼ idulú naʼni maʼdxuu a̱jkiu̱lú” (Prov. 15:30). Rachel, bi̱ ni̱jkha̱ gáxtáa mitsínguánʼ náa nigaja̱a̱, ikhaa naʼthí: “Ra̱ʼkhá tháán míñúʼ, mú xúʼko̱ má ni̱ndxu̱ʼ”. Ga̱jma̱a̱ xóó naʼthí: “Nguáná ndayóoʼ maniminaʼ mu matamíjná gajmíi̱nʼ a̱ngiu̱lú náa congregación rí xtáá xúgi̱. Rí nani, ndaʼyáaʼ mbáa bi̱ gíʼ mbáwíi ga̱jma̱a̱ bi̱ na̱nguá xtáa raʼtámíjná ga̱jma̱a̱ nimbáa. Mbáa xa̱bu̱ buʼko̱ namiñuu xó má mangúún”. Náa numuu rí tsetagíminaʼ mu maratamíjná ga̱jma̱ʼ mbáa nákha xóó tsígi̱ʼdu̱u̱ ga̱jma̱a̱ índo̱ guámbá reunión rá.
Mú nguáná, índo̱ ndiʼkhún edxa̱ʼnú nandaʼ mataniʼnúʼ a̱ngiu̱lú. Mú gagi rí xtaʼdáá maʼga̱ raxa̱ mañu mañúú. Á mu xúʼko̱ giʼnaʼ, mbaʼyóoʼ mataʼgíminaʼ mu mambaxáʼ má xúʼko̱ gajmiáanʼ eʼwíínʼ a̱ngiu̱lú.
Índo̱ ixi̱ nudu̱u̱ i̱mba̱ níʼkhá tseguʼun nacha̱, mú nda̱wa̱á, nakráʼáan nacha̱ ajmu̱u̱.
MBAʼYÓOʼ MBIʼI RÍ MAGUʼWAANʼ
Tikhu ixi̱ ndayóoʼ mba̱yu̱ʼ mbiʼi mu maxkrígú ajmu̱u̱. Xúʼko̱ má, raʼkháa xúgínʼ naguʼwún náa i̱mba̱ congregación nacha̱ wéñuʼ. Ikha rí na̱ʼkha̱ náa Biblia mambáyaʼ á mu niʼni má mba̱yu̱ʼ rí nitriʼku̱u̱ congregación ndrígáʼ ga̱jma̱a̱ á mu naku̱ma̱ʼ rí xóó tseguʼwaanʼ:
“Ikha jngó xáʼgáanʼ muʼni rí májánʼ, numuu rí maʼga̱nú mbiʼi muʼdaʼ á mu tséʼgáanʼ” (Gál. 6:9).
Á mu naku̱ma̱ʼ rí tseguʼwaanʼ nacha̱, atríyaʼ itháan mba̱yu̱ʼ mbiʼi mu maguʼwaanʼ. Mbá xkri̱da, mbaʼin misioneros bi̱ nigún náa Escuela ndrígóo Galaad ga̱jma̱a̱ nixuʼmiin magún i̱mba̱ níʼkhá náa raʼkháa xuajñún nakuwa ikhí mba̱yu̱ʼ tsiguʼ, nda̱wa̱á naguwáanʼ náa xuajñún. Rúʼko̱ naʼni rí mambaxúún itháan májánʼ gajmiún a̱ngiu̱lú bi̱ kuwa ikhí ga̱jma̱a̱ rí maguʼwún xóo kuwa ikhí.
Alejandro nigájnuu mbaʼa nuthu ga̱jma̱a̱ ndaʼyoo rí naʼni mingíjyúuʼ maguʼwún nacha̱. Ikhaa naʼthí: “Náa iwáá rí niriʼkumijnáxu, a̱ʼgiu̱ʼ niʼthí: ‹¡Xúgínʼ bi̱ nambáxuʼ gajmíi̱nʼ kuwa náa imbo̱o̱ congregación!›”. Ikhú ikhaa niʼni marmáʼáan a̱jkiu̱u̱n rí a̱jma̱ tsiguʼ kidíiʼ, índo̱ niriʼkhu̱u̱ náa congregación rúʼko̱, ikhaa niʼthí ikháá kayúʼ xó má rígi̱. Mú náa a̱jma̱ tsiguʼ rúʼko̱ a̱ʼgiu̱u̱ nisngájma rí naxmiéjunʼ kaʼñún eʼwíínʼ, ga̱jma̱a̱ bi̱ tseʼninunʼ nákha ginii ni̱jkha̱nú nimbáxu̱u̱ májánʼ gajmíi̱n.
“Xárata: ‹Náa numuu rí itháan májánʼ ninindxu̱u̱ mbiʼi rí ninújngoo ki xóo rígi̱ rá.› Raʼkháa numuu rí xtaʼdáá ku̱ma̱ jngó nitraxi rígi̱” (Ecl. 7:10).
Xataʼgíʼ matanimbánii congregación náa niraxtaa nákha ginii ga̱jma̱a̱ náa xtaa xúgi̱. Mbáa a̱ngiu̱lú bi̱ kuwa náa congregación rí xtaa xúgi̱ tsethi wéñuʼ, o nuthi mbájmbu. Asndu xó má, atagíʼ ma̱ta̱ya̱a̱ xóo májánʼ xa̱bu̱ ni̱ndxu̱ún, xó má eniguaʼ muniaʼ ikháánʼ. Tikhun a̱ngiu̱lú bi̱ niriʼkhu̱u̱ congregación ndrígu̱ún niguánu ndiyáá rí mbaʼyóoʼ muraximíjna̱: “Lá gajkhun nandoʼ ka̱ñu̱u̱n ‹xúgínʼ a̱ngiu̱lú ráʼ.›” (1 Ped. 2:17.)
“Gundaʼala, ikajngo majanaʼla” (
Gunda̱ʼa̱a̱ má xúʼko̱ rí mambáyulúʼ Jeobá. Mbáa bi̱ kayá edxu̱u̱ bi̱ nagumbiʼyuu David naʼthí: “Xataʼgíʼ matani mbáwíín”. Ga̱jma̱a̱ xóó naʼthí: “Rígá mbaʼa rí ma̱ndoo muʼni i̱ndó á mu Jeobá nambáyulúʼ. Ikha jngó aratájkáan ga̱jma̱a̱ numuu rúʼko̱”. Rachel, bi̱ niʼthá ga̱jma̱a̱ numuu, naʼthí xúʼko̱. Ikhaa naʼthí: “Á mu ikhúúnʼ ga̱jmu̱ʼ ajmbioʼ tsembáxuxu májánʼ gajmiúxu̱ a̱ngiu̱lú náa congregación, nutakháñii Jeobá ga̱jma̱a̱ numuu rúʼko̱ ga̱jma̱a̱ nunda̱ʼa̱a̱xu rí mbu̱ya̱a̱xu á mu rígá mbá rí nunixu rí a̱ngiu̱lú xambáxu̱u̱n ga̱jma̱á ni̱ndxu̱xu̱ʼ. Ikhú, nunimíjna̱xu makuwáanʼ itháan gajmiúxu̱ ikhiin”.
Xa̱bu̱ guanuu, á mu e̱jña̱la naʼniún mingíjyúuʼ mambaxúún gajmiún a̱ngiu̱lú, guríyaaʼ mbiʼi mu mutajkáan ga̱jma̱a̱ numuu rúʼko̱. Gumbáñun mu mbuñíínʼ nuxi̱nʼ bi̱ mambaxúún gajmiún, bi̱ nuni rí májánʼ.
ATAMBÁÑUN MAGUʼWÚN BI̱ NDIʼKHÚN EGUAʼNU
Ndiéjunʼ gándoo matani ikháánʼ gajmiáanʼ bi̱ ndiʼkhún eguaʼnuʼ náa congregación ndrígáʼ rá. Ataniminaʼ mu mambaxáʼ májánʼ gajmiáanʼ asndu nákha xóó tsitatsiʼnuʼ. Atatsaʼwáminaʼ ndiéjunʼ ganigua̱ʼ muni ga̱jma̱á ni̱ndxa̱ʼ á mu ndiʼkhún edxaʼnú náa congregación, ga̱jma̱a̱ atani (Mat. 7:12). Lá ma̱ndoo marathu̱u̱n bi̱ ndiʼkhún niguwáʼ náa nunigajmaa mbá guʼwáanʼ o náa programa rí mámbá gu̱nʼ JW Broadcasting ráʼ. Náa numuu rí tsitriyaʼ awan mu marataráʼa gajmiáanʼ xá. Ga̱jma̱a̱ mbáa marmáʼáan a̱jkiu̱ún kuyaaʼ rí májánʼ nindrígúun índo̱ narathúún magún guphiʼtsu náa guʼwáaʼ. Lá rígá i̱ʼwáʼ xóó rí ma̱ndoo matani ga̱jma̱a̱ numún xáʼ.
“Índo̱ ni̱jkuánúxu náa i̱mba̱ congregación, eʼthí Carlos, mbáa ndxájulú nixnúxu mbá lista ndrígóo mbaʼa tiendas náa na̱nguá minumuu wéñuʼ. Rúʼko̱ niyambáá wéñuʼ”. Mbáa tikhun bi̱ naguwaʼ i̱mba̱ níʼkhá nuxna̱a̱ núma̱aʼ rí xú káʼnii esngajmúún rí xóo mugíʼ xtíin índo̱ naʼni mijkha o naʼni miguwan o índo̱ naxnúu wéñuʼ ruʼwa. Á mu narathúún xú káʼnii ni̱ʼkha̱ ragiʼi xuajen, káʼnii religión rí guáʼdáá xa̱bu̱, ma̱ndoo mambáñún mutaraʼa itháan májánʼ.
TSIAKII RÍ GÚʼNI XÁNINDXU̱U̱ NDÍÍ
Niʼni itháan rí mbá tsiguʼ rí Allen, bi̱ niʼthá ga̱jma̱a̱ numuu nákha ginii, rí xúgi̱ xtáa náa i̱mba̱ nuxi̱ʼ congregación, ga̱jma̱a̱ rí xúgi̱ ikhaa naʼthí: “Nákhi ginii niniminaʼ maniʼnúnʼ a̱ngiu̱lú. Mú rí xúgi̱ nda̱ñu̱u̱n xóo a̱ngui̱i̱nʼ bi̱ kuwa náa goʼwóoʼ, ga̱jma̱a̱ nadxuʼ wéñuʼ”. Allen ni̱jkha̱nú ndiʼyoo dí rígi̱ niʼni mambáxúu itháan gajmíi̱n eʼwíínʼ, ga̱jma̱a̱ mbáa mambaxúún kámuu mbiʼi.
^ párr. 2 Nixtiʼkhu̱u̱ mbiʼñún.