NÁKHA wajyúúʼ, tsigijñaʼ nigiʼdoo wéñuʼ numuu náa nduyamajkuíí Jeobá. Bi̱ israelitas nuxnaxi̱i̱n xujkhúʼ xóo tsigijñaʼ, ga̱jma̱a̱ cristianos nijmaʼnuʼ numuu rí nuxnaxi̱ tsigijñaʼ “mu maʼga̱ gamajkhu náa inuu Dios”. Mú rígá imbo̱ʼ tsigijñaʼ rí nanigu̱u̱ʼ Dios (Heb. 13:15, 16). Bi̱ nuxnaxi̱ nakuwa gagi ga̱jma̱a̱ naguma tsajkurámíínʼ, xó má esngajma náa xkri̱da rígi̱.

Ana ninindxu̱u̱ mbáa israelita bi̱ niwi̱ji̱ jmbu bi̱ nindoo wéñuʼ magiʼdaa mbáa ada̱, mú ikhaa tsigiʼdiin e̱ji̱n. Índo̱ niʼtájkáan nindo̱ʼo̱o̱ Jeobá á mu nagiʼdaa mbáa ada̱, maxnáxi̱i̱ mu maʼni ñajuunʼ “xúgíʼ mbiʼi rí gáxtáa” (1 Sam. 1:10, 11). Nda̱wa̱á, Ana nigu ewáan ada̱ ga̱jma̱a̱ nigiʼdaa mbáa dxámá bi̱ nixná mbiʼyuu Samuel. Índo̱ niniñuʼ raʼxúu, ni̱jkha̱ kayáa náa tabernáculo mu maʼni ñajuunʼ Jeobá, xó má niʼthí maʼni. Jeobá niʼni tsajkurámááʼ Ana ga̱jma̱a̱ numuu tsigijñaʼ rúʼko̱. Ikhaa nigiʼdiin imbá witsiin e̱ji̱i̱n, ga̱jma̱a̱ Samuel ni̱jkha̱nú ninindxu̱u̱ gaʼyee ma̱ngaa niʼnirámáʼ Biblia (1 Sam. 2:21).

Xó má Ana ga̱jma̱a̱ Samuel, bi̱ cristianos mangiin ma̱ndoo muxnaximi̱jna̱ muni ñajunʼ náa bi̱ Niʼniáanʼ. Jesús niʼthí rí mundrígú mbaʼa dí májánʼ ga̱jma̱a̱ numuu tsiakii rí gúʼni mu muʼni ñajunʼ Jeobá (Mar. 10:28-30).

Dorcas ninindxu̱u̱ mbáa cristiana bi̱ nixtáa nákha siglo timbá bi̱ nijmaʼniiʼ wéñuʼ ga̱jma̱a̱ numuu rí “mapu-majan” niʼni ga̱jma̱a̱ nimbáñun ‹bi̱ ndañúnʼ›, xóo muʼthá, ga̱jma̱a̱ numuu tsiakii rí niʼni ga̱jma̱a̱ numuu eʼwíínʼ. Gíná niʼni índo̱, “nixnu nandi” ga̱jma̱a̱ “nijañu”, ga̱jma̱a̱ a̱ngui̱i̱n bi̱ kuwa náa congregación nikuwa gíná wéñuʼ. Índo̱ nidxawíín rí Pedro xtáa mijngii, nitha káñii mu maʼga̱ nacha̱. ¡Atatsaʼwáminaʼ xóo gagi nikuwa índo̱ Pedro ni̱jkha̱nú ga̱jma̱a̱ niʼniga̱bi̱i̱ Dorcas! Rígi̱ nindxu̱u̱ timbá aʼphu̱ rí Biblia naʼthí rí mbáa apóstol nikuxi̱i̱ mbáa xa̱bu̱ (Hech. 9:36-41). Dios na̱nguá nimbumuu tsiakii rí niʼni Dorcas (Heb. 6:10). Historia ndrígóo nigumaraʼmáʼ náa Biblia, ga̱jma̱a̱ mbiʼi xúgi̱ ma̱ndoo mbuʼyaridáá xkri̱da ndrígóo.

Apóstol Pablo ma̱ngaa nindxu̱u̱ mbáa májánʼ xkri̱da mu mbuʼyaridáá numuu rí nixná mbiʼi ndrígóo ga̱jma̱a̱ rí niʼtámíjná gajmíi̱n eʼwíínʼ. Niʼnirámáʼ náa inún cristianos bi̱ kuwa náa Corinto: “Ikhúúnʼ asndu nadxuʼ rí majmuʼ rí gúʼdoo ga̱jma̱a̱ majmuʼ káxi̱ ga̱jma̱a̱ numala” (2 Cor. 12:15). Pablo nijmañuu rí á mu nuʼni gínámíjná ga̱jma̱a̱ numún eʼwíínʼ makuwáanʼlu tsímáá ga̱jma̱a̱ muxkamaa imbo̱ʼ rí itháan gíʼdoo numuu: Rí maguma tsajkurámáánʼ ga̱jma̱a̱ rí Jeobá ma̱ndoo kaʼyulú (Hech. 20:24, 35).

Jeobá naniguʼ majmulúʼ mbiʼi ga̱jma̱a̱ tsiakii ndrígúlú ga̱jma̱a̱ numuu Reino ga̱jma̱a̱ numún a̱ngiu̱lú. Mú, lá rígá imbo̱ʼ rí ma̱ndoo muʼni rá. Xúʼko̱. Ma̱ndoo muʼni rí májánʼ ga̱jma̱a̱ numún eʼwíínʼ, ma̱ndoo mbuʼyamajkuíí Jeobá ga̱jma̱a̱ mbújkha̱a̱ rí nuxná. Mbújkha̱a̱ rí nuxná najmaa mu miʼtáraʼa náa xúgíʼ numbaaʼ. Mbá xkri̱da, mbújkha̱a̱ rúʼko̱ nuxnún misioneros ga̱jma̱a̱ eʼwíínʼ bi̱ kuwa runi káxi̱ ñajunʼ Jeobá. Mbújkha̱a̱ rígi̱ ma̱ngaa ndayóoʼ mu magumaratáá ga̱jma̱a̱ miʼtájuíi i̱yi̱i̱ʼ ga̱jma̱a̱ videos, mixtambáñuun a̱ngiu̱lú náa narígá gamiéjunʼ ga̱jma̱a̱ maguma i̱ʼwáʼ Guʼwá náa nagimbáanʼ. Nduʼyáá rí á mu nuxná rí kuaʼdáá, maguma tsajkurámáánʼ. Ma̱ngaa mbuʼyamajkuíí Jeobá ga̱jma̱a̱ “rí gíʼdoo wéñuʼ numuu” (Prov. 3:9; 22:9).