1, 2. a) Xú káʼnii premio guaʼthi̱i̱n mudrigú xa̱bi̱i̱ Jeobá rá. b) Ndiéjunʼ gambáyulú mu mundxaʼwamíjna̱ ma xúʼko̱ náa premio rá. (Atayáá timbá xtiʼkhu.)

IKHÁÁ má xóo apóstol Pablo, cristianos bi̱ kaxtaʼwíin bi̱ kuwa mbiʼi xúgi̱ guaʼthi̱i̱n mbá rí mitsaan dí mudrigú ‹rí maxnún Dios› mekhuíí (Filip. 3:14). Nandún wéñuʼ rí makuwa gajmiún Jesús náa Reino dí rígá mekhuíí ga̱jma̱a̱ mumbañún xa̱bu̱ mu mani̱ndxu̱ún xa̱bu̱ bi̱ ní xaguaʼdáá aʼkhá (Rev. 20:6). ¡Mbá rí mitsaan wéñuʼ nixnúún Jeobá! Mu bi̱ eʼwíínʼ mugu̱ mixtiʼkhu rí kuaʼti̱i̱n. Nandún makhánúu premio rí makuwa kámuu náa tsu̱du̱u̱ Ku̱ba̱ʼ, rí naʼni makuwa gagi wéñuʼ (2 Ped. 3:13).

² Mu mambáñún a̱ngui̱i̱n bi̱ kaxtaʼwíin mu maguajún jmbu ga̱jma̱a̱ makhánun premio, Pablo niʼthún xúgi̱ kaʼnii: “Gundxaʼwamíjna̱ má xúʼko̱ dí rígá rijma̱a̱” (Col. 3:2). Ndiyóoʼ mundxaʼwamíjna̱ ma xúʼko̱ rí mitsaan rí kuaʼti̱i̱n rí makuwá gajmiún Dios mekhuíí (Col. 1:4, 5). Á mu kuaʼti̱i̱n makuwáanʼ mekhuíí o náa Ku̱ba̱ʼ, rí mundxaʼwamíjna̱ má xúʼko̱ rí Jeobá niʼthí maxnúu xa̱bi̱i̱ mambáyulúʼ rí mundxaʼwamíjna̱ má xúʼko̱ náa premio (1 Cor. 9:24).

3. Xú káʼnii nindxu̱u̱ gamíi rí Pablo niʼthún cristianos rá.

 ³ Pablo ma̱ngaa niʼthún a̱ngui̱i̱n ga̱jma̱a̱ numuu tikhu gamíi rí maʼni mandáti̱gu̱u̱n premio, xóo muʼthá, maʼni rí xáʼngu̱u̱n gakánun. Mbá xkri̱da, niʼnirámáʼ náa congregación ndrígóo Colosas ga̱jma̱a̱ numún cristianos bi̱ ni̱ndxu̱ún minduwiinʼ bi̱ ninimíjna̱ rí Dios ma̱ndoo kaʼñún índo̱ nunimbaníí Xtángoo, raʼkháa rí mugíʼ fe náa Jesús (Col. 2:16-18). Ma̱ngaa, niʼthún ga̱jma̱a̱ numuu rí nagua̱ʼa̱ xuyulúʼ maʼni xóo rí xkawiiʼ, xkujndu gajmiúlú eʼwíínʼ cristianos ga̱jma̱a̱ xkujndu dí rígá náa guʼwúlú. Gamíi rígi̱ xóó rígá xúgi̱, ga̱jma̱a̱ ajngámaʼa rí niʼthí Pablo kaʼníí gíʼdoo numuu xúgi̱. Ikha jngó guʼyáá tikhuu rí niʼthí náa carta rí nikuʼma náa Colosas.

4. Ndíjkha jngó rí ma̱ndoo mandáti̱gu̱lu premio ga̱jma̱a̱ numuu rí nagua̱ʼa̱ xuyulúʼ muʼni rá.

⁴ Nda̱wa̱á rí niʼni marmáʼáan a̱jkiu̱ún a̱ngui̱i̱n rí mitsaan wéñuʼ rí guáʼthi̱i̱n, Pablo niʼnirámáʼ: “Guni gámbáa dí na̱nda̱ʼa̱ xuyala dí rígá náa tsu̱du̱u̱ ku̱ba̱ʼ rí mataxuʼdáminaʼ aʼkhá ga̱jma̱ʼ mbáa, dí mitsaga wéñuʼ, dí nagua̱ʼa̱ wéñuʼ mataba̱ʼ ga̱jma̱ʼ mbáa, dí nandaʼ matani gawúunʼ eʼwíínʼ ga̱jma̱a̱ dí maʼndaʼ maraʼdáá wéñuʼ” (Col. 3:5). Rí nagua̱ʼa̱ xuyulúʼ ma̱ndoo maʼni itháan gakhi̱i̱ ga̱jma̱a̱ maʼni rí xakánulú rí gíʼdoo numuu rí na̱ʼkha̱ náa Dios, xóo rí mambáxulúʼ gajmiúlú Jeobá ga̱jma̱a̱ rí kuaʼti̱i̱n. Mbáa ndxájulú bi̱ niniñaminaʼ maʼni rí nandoo xuyuʼ ga̱jma̱a̱ bi̱ nda̱wa̱á nitanga̱a̱ náa congregación niʼthí dí rúʼko̱ ninindxu̱u̱ gakhi̱i̱ wéñuʼ, numuu rí nindxaʼwáminaʼ asndu nda̱wa̱á rí káʼnii niʼni.

5. Ndiéjunʼ gúʼni mu muñeumíjna̱ náa tsáʼkhá rí nindxu̱u̱ gamíi wéñuʼ rá.

⁵ Ra̱ʼkhá tháán gíʼdoo numuu rí makuwáanʼ xawii índo̱ kuwáanʼ náa maxkaxáanʼ rí xúʼnimbulúʼ xtángoo ndrígóo Jeobá. Mbá xkri̱da, májánʼ gáʼni rí bi̱ ni̱ndxu̱ún novios mugíʼ mbá awan asndu nákha gi̱ʼdi̱i̱ mani̱ndxu̱ún novios xóo rí xuxkajmami̱jná, xúphu̱ rawúnʼ o rí xakúwíin ndajkuíin (Prov. 22:3). Cristianos ma̱ndoo muraʼníí mbá tsáʼkhá mba̱a̱ índo̱ kuwa mitsínguánʼ náa guʼwún ga̱jma̱a̱ numuu ñajunʼ o índo̱ nuñajunʼ gajmiún mbáa bi̱ túyáa (Prov. 2:10-12, 16). Á mu naguaʼnii xúʼko̱ kaʼnii gusngajmá rí ni̱ndxu̱lú xa̱bi̱i̱ Jeobá, guʼni rí májánʼ ga̱jma̱a̱ garmáʼáan a̱jkiu̱lú rí marigá dí ra̱májánʼ á mu ikháanʼ nusngajmá rí nanigiulú mbáa. Gíʼmaa muñeumíjna̱ itháan índo̱ kuwáanʼ gíná o índo̱ nini gawúnlú. Ikhú, mbáa maʼndulú rí mbáa masngájmulú rí kuaʼdáá numulúʼ. Mbáa maʼndulú wéñuʼ rí asndu tsáa mambáyulúʼ. Á mu naguaʼnii xúʼko̱ kaʼnii, gunda̱ʼa̱a̱ Jeobá ga̱jma̱a̱ a̱ngiu̱lú rí mumbayúlú mu xúʼni̱ nimbá rí marikhulú makhánulúʼ premio (atraxnuu Salmo 34:18; * Proverbios 13:20). *

6. Ndiéjunʼ gúʼni índo̱ guraʼwíí rí muʼni gagimijnáa rá.

⁶ Mú muʼni gámbáa rí nagua̱ʼa̱ xuyulúʼ rí muxuʼdámíjná aʼkhá, ndayóoʼ muʼni gaʼduunʼ rí maʼni maxkaxáanʼ muxuʼdámíjná aʼkhá. Náa mbaʼa rí nuʼni gagimijná rí mbiʼi xúgi̱ naʼni marmáʼáan a̱jkiu̱lú dí nirígá náa xuajen Sodoma ga̱jma̱a̱ Gomorra (Jud. 7). Bi̱ nuxná ikha náa xúgíʼ rígi̱ nuni rí xa̱bu̱ mundxaʼwamíjna̱ rí na̱nguá mitsáʼkhúun aʼkhá rí xkawiiʼ, rí nda̱a̱ rí gugíʼniin nda̱wa̱á. Gakuwáanʼ xawii má xúʼko̱ ga̱jma̱a̱ xundrígú xúgíʼ rí ikhiin nuxnaruʼulú. Á mu tsíñewa̱a̱n rí muʼni ma̱ndoo mandáti̱gu̱lú premio rí makuwáanʼ kámuu (Prov. 4:23).

7. Ndiéjunʼ xkujndu gándoo garigá náa congregación rá.

⁷ Xúgiáanʼ nduʼyáá rí makuwáanʼ náa guʼwá nagimbáanʼ nindxu̱u̱ májánʼ. Rí muʼnigajmaa  Ajngá rawunʼ Dios náa guʼwá nagimbáanʼ ga̱jma̱a̱ tsiakii rí nuxnámíjná kaníkháanʼ ga̱jma̱a̱ ngajua ma̱ngaa rí májánʼ a̱jkiu̱lú mambáyulúʼ mu xándáti̱gu̱lú premio. Mú, nguáná rí tsíkru̱ʼu̱lú májánʼ ma̱ndoo maʼni rí marigá xkujndu náa a̱ngiu̱lú. Á mu tseʼnimbaníí xkujndu rígi̱ ma̱ndoo maʼni rí muyexíi sia̱nʼ (atraxnuu 1 Pedro 3:8, 9). *

8, 9. a) Ndiéjunʼ rí gambáyulú muxkamaa premio rá. b) Ndiéjunʼ gambáyulú mu makuwáanʼ tsímáá á mu mbáa ndxájulú naʼni gawúnlú rá.

⁸ Ndiéjunʼ gándoo gúʼni mu sia̱nʼ xarikulú rí muxkamaa premio rá. Pablo niʼthún bi̱ Colosas: “Xóo e̱ji̱i̱n Dios, mikaʼwáanʼ bi̱ nandoʼ kayala, aguaʼdáá rí nandala kuyamíjna̱ numuu rí nagáwiinʼ a̱jkia̱la gani̱ndxa̱la xa̱bu̱ bi̱ májánʼ a̱jkiu̱u̱n, xunimbami̱jna̱, gani̱ndxa̱la xa̱bu̱ guabáanʼ wéñuʼ ga̱jma̱a̱ gaʼngo̱o̱ a̱jkia̱la. Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ. Mú, ga̱jma̱a̱ xúgíʼ dí i̱ʼwáʼ, gíʼmaa maʼndala ku̱ñu̱u̱n xúgínʼ, numuu dí rúʼko̱ naruwáanʼla májánʼ wéñuʼ” (Col. 3:12-14).

⁹ Rí maʼndulú kuʼyamijná ga̱jma̱a̱ rí maʼni májánʼ a̱jkiu̱lú mambáyulúʼ muʼni mba̱a̱ a̱jkiu̱lú kuʼyamijná. Mbá xkri̱da, á mu nagawúnlú rí niʼthí o niʼni mbáa ndxájulú, guʼgíʼ marmáʼáan a̱jkiu̱lú índo̱ ikháanʼ niʼthá o niʼni mbá rí niʼni gawúunʼ imba̱a̱ xa̱bu̱. Gajkhun rí nuxníin núma̱aʼ a̱ngiu̱lú numuu rí nisngájma ngajua ga̱jma̱a̱ rí májánʼ a̱jkiu̱ún índo̱ nini mba̱a̱ a̱jkiu̱ún rí nikiéʼkulu náa ikhiin (atraxnuu Eclesiastés 7:21, 22). * Nuxnáa núma̱aʼ wéñuʼ ga̱jma̱a̱ numuu rí Jesús májánʼ a̱jkiu̱u̱n náa xa̱bu̱ bi̱ gajkhun nduyamajkuíí Dios (Col. 3:15). Xúgiáanʼ nandulúʼ kuʼyáá ikháá má Dios, nuʼtáraʼa ikháá má ajngáa ga̱jma̱a̱ nuraʼníí mbaʼa xkujndu rí nindxu̱u̱ ikháá má. Á mu nandulúʼ kuʼñúún a̱ngiu̱lú, nani̱ndxu̱lú májánʼ a̱jkiu̱lú gajmiúlú ikhiin ga̱jma̱a̱ nuʼni mba̱a̱ a̱jkiu̱lú kuʼyamijná kaníkháanʼ, nuyambáá mu makuwáanʼ mbá kambáxulú ga̱jma̱a̱ nuʼgíʼ muxkamaa premio rí maʼni makuwáanʼ.

10, 11. a) Náa numuu rí gamíi wéñuʼ rí maxígulú rá. b) Xú káʼnii gándoo gáʼni rí tsíxígú ma̱ndoo marigu kaʼyulú premio rá.

¹⁰ Tsíxígú ma̱ndoo marikhulú rí xakánulú premio. Náa Biblia na̱ʼkha̱ xkri̱da rí nasngájma rí gamíi nindxu̱u̱. Mbá xkri̱da, Caín nixígúu kaʼyoo ndxájuu Abel ga̱jma̱a̱ nixíyáa. Coré, Datán ga̱jma̱a̱ Abiram nixígu̱u̱n kuyáá Moisés ga̱jma̱a̱ nixuximíjna̱ náa ikhaa. Ga̱jma̱a̱ rey Saúl nixígúu kaʼyoo David ga̱jma̱a̱ xúgíʼ rí niʼni ma̱ngaa nigíʼ maxíyáa. Tséʼniulú tsiánguá rí náa Biblia naʼthí: “Numuu náa rígá tsíxígú ga̱jma̱a̱ xkujndu, ga̱jma̱a̱ ikhí rígá dí ra̱májánʼ wéñuʼ” (Sant. 3:16).

¹¹ Maʼni itháan mingíjyúuʼ rí makumulúʼ rí naxígúlú á mu kuaʼdáá ngajua ga̱jma̱a̱ nani̱ndxu̱lú májánʼ xa̱bu̱. Ajngá rawunʼ Dios naʼthí: “Rí maʼndulú kuʼñúún eʼwíínʼ gáʼni rí maʼngulú xúgíʼ ga̱jma̱a̱ muʼni rí májánʼ. Rí maʼndulú kuʼñúún eʼwíínʼ maʼni rí xaxígulúʼ” (1 Cor. 13:4). Mu tsíxígú xágiwa̱nʼ náa awúu̱n a̱jkiu̱lú, gíʼmaa mbuʼyáá xó má eʼyoo Jeobá. Gíʼmaa makru̱ʼu̱lú rí a̱ngiu̱lú ni̱ndxu̱ún mbóó xuwiʼ, rí nindxu̱u̱ congregación. Rígi̱ mambáyulúʼ makumulúʼ xóo ekumún eʼwíínʼ, xóo rí naʼthí gi̱i̱: “Á mu mbáa nduyamajkuíí, xúgínʼ nakuwa gagi ga̱jma̱a̱ numuu ikhaa” (1 Cor. 12:16-18, 26). Xúʼko̱ xáxígulú, maʼdxulú rí eʼwíínʼ maguma tsajkurámiinʼ. Gundxaʼwamíjna̱ ga̱jma̱a̱ numuu Jonatán, mbáa a̱ʼdióo rey Saúl. Ikhaa na̱nguá nixígúu numuu rí Jeobá taraʼwíí mu mani̱ndxu̱u̱ rey, niraʼwíí David. Mú Jonatán nisngájmuu David rí nandoo  kaʼyoo ga̱jma̱a̱ rí májánʼ a̱jkiu̱u̱n, ga̱jma̱a̱ nixnúu tsiakii ga̱jma̱a̱ nimbáyúu (1 Sam. 23:16-18). Lá ma̱ndoo mbuʼyaridáá xkri̱da ndrígóo xáʼ.

12. Ndiéjunʼ xtágabu rí na̱ʼkha̱ náa Biblia mambáñun bi̱ kuwa náa mbá guʼwíin mu muxkamaa premio rá.

¹² Rí muʼgíʼ muʼnimbaníí ikha rí na̱ʼkha̱ náa Biblia naʼni rí makuwáanʼ tsímáá ga̱jma̱a̱ gagi, ga̱jma̱a̱ nambáyulúʼ muxkamaa premio. Ndiéjunʼ xtágabu nixná Pablo náa bi̱ kuwa mbá guʼwíin náa carta rí nikuʼma náa colosenses rá. Niʼthí: “Gu̱ʼu̱ bi̱ ninuju̱nʼ gunimbaníí rí nuthi ajmbiala, xó má eʼthí Señor. Xa̱bekha bi̱ guáʼdiin guʼñún, gaʼndala kuñu̱u̱n má xúʼko̱ guʼyala ga̱jma̱a̱ xajmanguala wéñuʼ kuñu̱u̱n. E̱ji̱n gunimbala ku̱ñu̱u̱n ana̱ʼla náa xúgíʼ, numuu dí rígi̱ naʼgui̱i̱ náa inu Señor. Xa̱bu̱ guanii, xúni̱ rí makiʼníin e̱ji̱n, mu ikhiin xakaguabiinʼ” (Col. 3:18-21). Mbáa mangáán natayáá rí xtágabu rígi̱ nambáñun bi̱ gajmii rí mbiʼi xúgi̱ mangiin e̱ji̱n.

13. Xú káʼnii gándoo mbáa ndxájulú a̱ʼgu̱ maʼni rí ajmbio̱o̱ maʼndoo maʼnigajmaa xá.

¹³ Gundxaʼwamíjna̱ rí mbáa ndxájulú nandxa̱ʼwáminaʼ rí ajmbio̱o̱ bi̱ na̱nguá nindxu̱u̱ xa̱bi̱i̱ Jeobá tséʼniuu rí májánʼ. Lá maʼdu̱u̱ rí ikhiin magi̱ʼdu̱u̱n ga̱jma̱a̱ numuu rí xú káʼnii eni xáʼ. Á mu naʼni rí ikhaa nandoo, lá maʼni  rí ajmbio̱o̱ maʼni ñajunʼ Jeobá xáʼ. Na̱nguá. Mani̱ndxu̱u̱ mixtiʼkhu á mu ikhaa nasngájmuu gamajkhu bi̱ kayá edxu̱u̱ náa goʼwóo. Maʼni rí makuwa tsímáá náa goʼwóo, mbaʼyamajkuu Jeobá ga̱jma̱a̱ asndu ikhaa maʼga̱nú maʼni ñajunʼ Dios. Mbáa nájmi̱i̱n maʼngo̱o̱ muxkamaa premio (atraxnuu 1 Pedro 3:1, 2). *

14. Ndiéjunʼ gándoo maʼni mbáa ndxájulú á mu rí a̱ʼgiu̱u̱ tséʼyamajkhuu xá.

¹⁴ Guʼthá ga̱jma̱a̱ numuu ndxájulú xa̱biya̱ bi̱ gíʼdaa a̱ʼgiu̱u̱ bi̱ na̱nguá nindxu̱u̱ xa̱bi̱i̱ Jeobá, na̱nguá eʼyamajkuu. Lá ma̱ndoo maʼni rí mbaʼyamajkuu á mu nandxaʼwájmaa mu masngájmuu tsáa eʼtáñajunʼ náa guʼwá xáʼ. Na̱nguá. Jeobá gíʼthu̱u̱n rí ikhaa mbaʼyáridoo Jesús ga̱jma̱a̱ ma̱ndoo kaʼyoo a̱ʼgiu̱u̱ (Efes. 5:23). Cristo nayéjkha̱ edxu̱u̱ náa congregación ga̱jma̱a̱ ngajua ma̱ngaa naʼngo̱o̱ a̱jkiu̱u̱n (Luc. 9:46-48). Cristiano bi̱ ndaʼyaridoo Jesús mbáa maʼngo̱o̱ maʼni rí a̱ʼgiu̱u̱ ma̱ngaa maʼni ñajuunʼ Jeobá.

15. Xú káʼnii esngájma mbáa cristiano rí nandoo kaʼyoo a̱ʼgiu̱u̱ rá.

¹⁵ Náa Biblia naʼthúún xa̱bekha: “Gaʼndala kuñu̱u̱n má xúʼko̱ guʼyala ga̱jma̱a̱ xajmanguala wéñuʼ kuñu̱u̱n” (Col. 3:19). Cristiano bi̱ nandoo kaʼyoo a̱ʼgiu̱u̱ ndaʼyamajkuu índo̱ naʼdxuun rí naʼthúu̱n ga̱jma̱a̱ nasngájmuu rí nangajo̱o̱ rí naʼthí (1 Ped. 3:7). Maski ajndu xáʼngo̱o̱ gáʼni xúgíʼ rí na̱nda̱ʼa̱, rí maraxu̱u̱ xú káʼnii endxa̱ʼwáminaʼ mambáyúu maraʼwíí maʼni dí májánʼ (Prov. 15:22). Mbáa xa̱biya̱ bi̱ nandoo kaʼyoo a̱ʼgiu̱u̱ tséʼni kháñuu mbaʼyamajkuu, ga̱jma̱a̱ rí naʼni, naʼni rí mbaʼyamajkuu. Índo̱ mbáa cristiano nandoo kaʼyoo a̱ʼgiu̱u̱ gajmíi̱n e̱ji̱i̱n, mbáa rígi̱ maʼni rí ikhiin muni ñajunʼ Jeobá ga̱jma̱a̱ gagi ga̱jma̱a̱ muxkamaa premio rí makuwa kámuu.

16, 17. Á mu ni̱ndxa̱ʼ dxámá, ndiéjunʼ gándoo gátani mu xaxmiéjuanʼ wéñuʼ rí xóo eʼni ana̱ʼ ga̱jma̱a̱ ru̱dáʼ rá.

¹⁶ Mbáa ni̱ndxa̱ʼ mbáa dxámá bi̱ naku̱ma̱ʼ rí ana̱ʼ tsíkru̱ʼu̱u̱n rí natani numuu rí ikhiin ni̱ndxu̱ún xa̱bi̱i̱ Jeobá. Mbáa índo̱ xtaa gíná maʼni rí ma̱ta̱ya̱a̱ rí matani ñajunʼ Jeobá xánindxu̱u̱ májánʼ. Mú, á mu natatsiñaʼ rí gajkhun, ma̱ta̱ya̱a̱ rí a̱ngiu̱lú náa congregación ga̱jma̱a̱ ana̱ʼ naxmiéjunʼ wéñuʼ kuyaaʼ.

¹⁷ Ndayóoʼ wéñuʼ rí ana̱ʼ ga̱jma̱a̱ ru̱dáʼ muxpriguáʼ. Á mu nimbá miʼtsú expriguá, lá xatraximínaʼ á mu gajkhun naxmiéjunʼ kuyaaʼ xáʼ. (Heb. 12:8.) Mú mbáa nakiʼnán ga̱jma̱a̱ numuu rí xóo expriguáʼ. Mú xataʼgíʼ ma̱ta̱ya̱a̱ rúʼko̱, atagíʼ ma̱ta̱ya̱a̱ náa numuu xúʼko̱ eni. Ikha jngó, xakiʼnáán ga̱jma̱a̱ atagíminaʼ mu mataxpríguminaʼ. Náa Biblia naʼthí rí bi̱ gíʼdoo ku̱ma̱ ga̱jma̱a̱ bi̱ nandxa̱ʼóo májánʼ edxu̱u̱ najmañuu maxpríguminaʼ mu xákiʼnáa (Prov. 17:27). Atagíʼ manindxa̱ʼ mbáa xa̱bu̱ bi̱ tsíkiʼnáa índo̱ natandrígú xtágabu, ga̱jma̱a̱ rí mambáyaʼ rígi̱ ma̱ngaa xaxmiéjuanʼ wéñuʼ xú káʼnii nixnaʼ xtágabu (Prov. 1:8). Á mu ana̱ʼ ga̱jma̱a̱ rudáaʼ ni̱ndxu̱ún cristianos bi̱ nandún kuyáá Jeobá mambáyaʼ wéñuʼ. Ikhiin nandún mumbayááʼ mu makánaʼ premio rí maraxtaa kámuu.

18. Náa numuu rí tsíyaaʼ ikháánʼ mandáti̱ga̱ʼ premio rá.

¹⁸ Xúgiáanʼ ma̱ndoo makánulu mbá premio rí mitsaan wéñuʼ: Rí makuwá kámuu mekhuíí o makuwá kámuu náa Ku̱ba̱ʼ mitsaan. Nindxu̱u̱ mbá rí gajkhun xtaʼti̱i̱n, numuu rí bi̱ Niʼniáanʼ niʼthí maʼni rígi̱. Ikhaa naʼthí ga̱jma̱a̱ numuu xú káʼnii gakuwáanʼ náa Ku̱ba̱ʼ mitsaan: “Nándáa rí guni ní má xúnigachíí kúbá ndrígóoʼ rí mikaʼwu; numuu rí náa ku̱ba̱ʼ marigá wéñuʼ ku̱ma̱ ndrígóo Jeobá xó má iyaʼ kajníʼ náa lamáa” (Is. 11:9). Xúgínʼ bi̱ gakuwa náa tsu̱du̱u̱ Ku̱ba̱ʼ Dios ma gáʼsngúún. Gíʼdoo numuu muʼnimíjna̱ mu makánulu premio. Ikha jngó, gundxaʼwamíjna̱ má xúʼko̱ rí nikudaminaʼ maʼni Jeobá. Nimbá xáʼni rí maríya kaʼyúlú premio.