1, 2. Xó má naʼthí náa 1 Pedro 4:7, 8, dí gambáyulú índo̱ gugíʼniin mbaʼa gamiéjunʼ rá.

KUWÁANʼLU náa “iwáá mbiʼi”, mbáa mugíʼniin mbaʼa gamiéjunʼ (2 Tim. 3:1). Mbá xkri̱da, nda̱wa̱á rí nijngoo mbá campaña rí nuni político, nigi̱ʼdu̱u̱ nirígá wéñuʼ xkujndu náa África occidental, rí nigajyúuʼ itháan rí majun igu̱nʼ, a̱ngiu̱lú bi̱ nikúwá náa awúu̱n xkujndu rígi̱, gakhi̱i̱ niguáʼniin. Ndiéjunʼ nimbáñun xá. Tikhun nimbayúmíjná náa guʼwún eʼwíínʼ a̱ngiu̱lú náa nda̱a̱ wéñuʼ gamíi. Mbáa ndxájulú niʼthí: “Nákha mbiʼi rúʼko̱, nixtáá gagi numuu rí nimbayú’ bi̱ nambáxuʼ gajmíi̱nʼ. Nixnamíjnaxu tsiakii”.

² Índo̱ gági̱ʼdu̱u̱ marigá “majphú mba̱a̱ gaʼkhu”, maʼdxulú numuu rí makuwáanʼ gajmiúlú bi̱ nambáxulúʼ gajmiúlú bi̱ gajkhun nandún kuyulúʼ (Apoc. 7:14). Ikha jngó gíʼdoo wéñuʼ numuu rí mambaxúlúʼ májánʼ gajmiúlú eʼwíínʼ asndu nákha mbiʼi xúgi̱ (atraxnuu 1 Pedro 4:7, 8). * Majmañulúʼ mbaʼa rí nigíʼnuu Jeremías, rí nimbayíí bi̱ nimbáxu̱u̱ gajmíi̱n índo̱ niguma gámbáa Jerusalén. * Xú káʼnii gándoo gúʼyaridáá xkridoo xá.

3. a) Ndiéjunʼ nigíʼ maʼni dí Jeremías maʼni wájíminaʼ rá. b) Ndiéjunʼ rí niʼthúu̱n secretario ndrígóo, ga̱jma̱a̱ dí nirígá rá.

³ Naʼni mbá a̱jma̱ skiñúʼ tsiguʼ rí Jeremías nixtáa náa majñúnʼ  xa̱bu̱ bi̱ túni rí májánʼ, ninindxu̱ún tikhun bi̱ kúwá mijngii náa nixtáa ga̱jma̱a̱ mbáa tikhun bi̱ kaʼñún bi̱ nikúwá náa xuajñuu rí mbiʼyuu Anatot (Jer. 11:21; 12:6). Mú táʼni wájíminaʼ. Ikhaa niʼthúu̱n xúgíʼ rí nikumu̱u̱ secretario ndrígóo bi̱ nigumbiʼyuu Baruc, ikha jngó, nigumaraʼmáʼ ga̱jma̱a̱ nixtagixi̱i̱, asndu rígá mu mbuʼyáá mangáanʼ rí mbiʼi xúgi̱ (Jer. 8:21; 9:1; 20:14-18; 45:1). Mbáa xúgíʼ mbiʼi rí nikúwá mbóó, Baruc niʼnirámáʼ xúgíʼ rí nigíʼnuu Jeremías ga̱jma̱a̱ rúʼko̱ niʼni rí maʼndún kuyamijná ga̱jma̱a̱ mbuyamajkumijná (Jer. 20:1, 2; 26:7-11).

4. Ndiéjunʼ niʼthúu̱n Jeobá Jeremías dí maʼni ga̱jma̱a̱ náa numuu rí ñajunʼ rígi̱ niʼni rí mambaxúu itháan ga̱jma̱a̱ Baruc xá.

⁴ Jeremías támiñuu mu maʼthúún israelitas dí wíji̱ magíʼnuu Jerusalén (Jer. 25:3). Náa iwáá tsiakii rí niʼni mu maʼthúún xa̱bu̱ rí mata̱nga̱a̱ a̱jkiu̱ún, ikhú Jeobá niʼthúu̱n Jeremías rí maʼnirámáʼ náa mbá rollo rí wíji̱ marigá (Jer. 36:1-4). Gajkhun rí Jeremías ga̱jma̱a̱ Baruc nixnamíjná tsiakii náa mbaʼa igu̱nʼ rí nini ñajunʼ rígi̱.

5. Ndíjkha rí nduʼyáá dí Baruc nimbáxu̱u̱ májánʼ ga̱jma̱a̱ Jeremías rá.

⁵ Índo̱ ni̱jkha̱nú mbiʼi rí magixnuu rí naʼthí náa rollo, Jeremías nixnúu ñajunʼ rígi̱ Baruc mu maʼni (Jer. 36:5, 6). Baruc támiñuu ga̱jma̱a̱ niʼnimbánuu ñajunʼ rí gakhi̱i̱ rígi̱. Lá nundxa̱ʼwa̱míjna̱ xú káʼnii nidxuu wéñuʼ Jeremías índo̱ Baruc ni̱jkha̱ gáguxnuu rollo náa rexo̱o̱ templo mu ga̱jma̱a̱ náa inún xúgínʼ xa̱bu̱ xuajin ráʼ. (Jer. 36:8-10.) Índo̱ príncipe bi̱ kúwá náa Judá niguánu nidxawíín rí niʼni Baruc, nithán rí maguxnuu rollo mu mudxawíín (Jer. 36:14, 15). Ikhú ikhiin nithán rey Jehoiaquim dí Jeremías niʼthí náa rollo. Májánʼ nini rí nitháán Baruc xóo ma̱ndoo maʼni “Ayuʼ, gátarkaʼuminaʼ ga̱jma̱a̱ʼ Jeremías, náa rí nimbáa xándoo maxkamáanʼla” (Jer. 36:16-19).

6. Xú káʼnii niʼni Jeremías ga̱jma̱a̱ Baruc índo̱ niraʼníí xkujndu rá.

 ⁶ Índo̱ rey Jehoiaquim niʼdxaun dí niʼnirámáʼ Jeremías, nikiʼnáa wéñuʼ rí asndu nitsikha rollo ga̱jma̱a̱ niʼthí rí murugua̱a̱ gaʼyee ga̱jma̱a̱ secretario ndrígóo. Mú Jeremías nditháan támiñuu. Nigujthun i̱mba̱ rollo ga̱jma̱a̱ nixnúu Baruc mu maʼnirámáʼ mbu̱júu̱ʼ ajngóo Jeobá. Ikha jngó Baruc niʼnirámáʼ “xúgíʼ ajngáa rí kiʼniráʼmáʼ náa timbá rollo dí Jehoiaquim rey ndrígóo Judá nitsikha.” (Jer. 36:26-28, 32.)

7. Ndiéjunʼ dí nirígá náa Jeremías ga̱jma̱a̱ Baruc índo̱ niñajunʼ mbóó rá.

⁷ Índo̱ nájmi̱i̱n bi̱ nambáxu̱u̱n nakúwá mbóó índo̱ nuraʼníí xkujndu, ikhú naguánu nambáxu̱u̱n itháan májánʼ. Ikha jngó índo̱ Jeremías ga̱jma̱a̱ Baruc nigi̱ʼdi̱i̱ niniraʼmáʼ mbu̱júu̱ʼ rollo dí rey Jehoiaquim bi̱ xkawiʼ a̱jkiu̱u̱n nitsikhá, rúʼko̱ niʼni rí nimbáxu̱u̱n itháan májánʼ. Ndiéjunʼ ejmañuluʼ náa xkri̱da ndrígu̱ún a̱jmi̱i̱n xa̱bu̱ bi̱ niguájun jmbu bugi̱ rá.

8. Ndiéjunʼ gaʼniulúʼ gakhi̱i̱ mu mbuʼñíinʼ bi̱ mambaxúlúʼ májánʼ gajmiúlú, ga̱jma̱a̱ náa numuu rí xáʼyóoʼ makáguabáanʼlú rá.

⁸ Á mu mbá miʼtsú niʼniulúʼ dí raʼkhí mbáa, maʼniulú gakhi̱i̱ muʼthúún rí gajkhun eʼwíínʼ (Prov. 18:19, 24). Mbáa makumulúʼ rí tseguapháanʼlu ga̱jma̱a̱ rí tséʼngo̱o̱ mu̱ʼni̱ rí mambaxúlúʼ májánʼ gajmiúlú eʼwíínʼ. Mú ragíʼmaa makáguabáanʼ. Á mu nandulú rí a̱ngiu̱lú mumbayulúʼ índo̱ gáʼkha̱nú tsáʼkhá inulú, gíʼmáanʼ muʼthúún asndu nákha xúgi̱ xóo ekumulúʼ ga̱jma̱a̱ xóo endxaʼwamíjna̱. Rígi̱ nindxu̱u̱ mbá rí xóo ma̱ndoo mambaxáʼ májánʼ ga̱jma̱a̱ʼ mbáa (1 Ped. 1:22).

9. a) Xú káʼnii nisngájma Jesús rí nikumu̱u̱ kaʼñún bi̱ nimbáxu̱u̱ gajmíi̱n rá. b) Xú káʼnii gándoo gambáyulú rí muʼtámíjná májánʼ mu xúʼko̱ mambáxulu gajmiúlú eʼwíínʼ rá. Araxná mbá xkri̱da.

⁹ Jesús nisngájmaa rí nikumu̱u̱ kaʼñún bi̱ nimbáxu̱u̱ gajmíi̱n índo̱ niʼtámíjná gajmíi̱n má xúʼko̱ (Juan 15:15). Ma̱ndoo mbuʼyaridáá xkridoo á mu nuʼtámíjná gajmiúlú eʼwíínʼ rí naʼni maʼdxulú, rí naxmiéjunlú ga̱jma̱a̱ rí naʼni makuwáánʼlu gíná. Imbo̱o̱ rí gíʼmaa muʼni, nindxu̱u̱ rí muʼdxawíín májánʼ índo̱ xtáa raʼtulúʼ mbáa, xúʼko̱ ma̱ndoo mbuʼyáá rí nambánii rí nundxa̱ʼwa̱míjna̱ ga̱jma̱a̱ rí nakumulú ma̱ngaa rígá mbaʼa rí nanigulúʼ mu̱ʼni̱. Guʼyáá xkridoo mbáa ndxájulú bi̱ mbiʼyuu Cindy, ikhaa gíʼdoo 29 tsiguuʼ. Nimbáxu̱u̱ májánʼ ga̱jma̱a̱ mbáa precursora bi̱ gíʼdoo itháan rí 60 tsiguuʼ bi̱ mbiʼyuuʼ Marie-Louise. Mámbá miʼcha̱ jueves, nagájnún mbóó gutaraʼa ga̱jma̱a̱ mbaʼa enii rí nutamijná. Cindy naʼthí: “Ra̱ʼkhá tháán eniguʼ matamíjná gajmíi̱n bi̱ nambáxuʼ májánʼ gajmíi̱nʼ numuu dí rígi̱ nambáyuʼ mu maniʼnúnʼ itháan májánʼ ga̱jma̱a̱ makroʼoʼ xóo ekumún”.  Índo̱ nutamijná májánʼ, xúʼko̱ naguanu nambáxu̱u̱n itháan májánʼ. Ikha jngó ganindxu̱lú xóo Cindy ga̱jma̱a̱ guʼgími̱jna̱ mu muʼtámíjná májánʼ gajmiúlú mbáa (Prov. 27:9).

10. Xó má naʼthí náa Proverbios 27:17, dí gándoo marigá índo̱ nuñajunʼ gajmiúlú a̱ngiu̱lú rá.

¹⁰ Xó má nigíʼnuu Jeremías ga̱jma̱a̱ Baruc, índo̱ nuñajunʼ gajmiúlú a̱ngiu̱lú ga̱jma̱a̱ nduʼyáá xóo xa̱bu̱ ni̱ndxu̱ún, mbaʼa rí ejmañulúʼ náa ikhiin ma̱ngaa na̱jkua̱nú nambáxulúʼ májánʼ gajmiúlú (atraxnuu Proverbios 27:17). * Mbá xkri̱da, á mu nagájnulú gúʼtaraʼa gajmiúlú mbáa ndxájulú ga̱jma̱a̱ nduʼyáá rí tsémiñuu maʼthí ga̱jma̱a̱ numuu fe rí gíʼdoo náa Jeobá ma̱ngaa rí nikudaminaʼ maʼni, mbáa rúʼko̱ gáʼni rí maʼndulú kuʼyáá itháan.

11, 12. Araxná mbá xkri̱da rí xú káʼnii eʼni rí mambáxu̱u̱n itháan májánʼ a̱ngiu̱lú índo̱ nagájnún gutaraʼa mbó.

¹¹ Guʼyáá a̱jma̱ xkri̱da xóo esngájma rí nambáxu̱u̱n a̱ngiu̱lú índo̱ nagájnún gutaraʼa mbóó. Adeline bi̱ gíʼdoo 23 tsiguʼ ni̱ndo̱ʼo̱o̱ Candice bi̱ nambáxu̱u̱ ga̱jma̱a̱ rí magún gutaraʼa náa mbá xuajen rí tsétaraʼa nángi eʼni. Adeline naʼthí: “Ninduxu rí maniguxu mutaráʼa itháan. Mbá nájmáanʼ ninduxu muni itháan ñajuunʼ Dios”. Xú káʼnii nimbáñun rí mutaraʼa mbóó xá. Adeline naʼthí: “Índo̱ naʼni wakíʼ, nutamíjná xú káʼnii niku̱mu̱xu náa ni̱jkuá, ma̱ngaa xú káʼnii naxnúxu tsiakii rí nitamíjná gajmiúxu̱ xa̱bu̱ ga̱jma̱a̱ xú káʼnii ndi̱ya̱a̱ xóo nimbáyuxu Jeobá. Nájmáanʼ naniguxu mutamijná wéñuʼ, ga̱jma̱a̱ xúʼko̱ na̱jkuánu nuniʼnumijnáxu itháan májánʼ”.

¹² Laïla ga̱jma̱a̱ Marianne xóó tsénu̱ju̱nʼ, bi̱ kúwá náa Francia, nigún gutaraʼa mbá witsu xmáná náa Bangui, náa nawi̱i̱n wéñuʼ xa̱bu̱ náa naʼtáñajunʼ República Centroafricana. Laïla narmáʼáan a̱jkiu̱u̱n: “Ikhúúnʼ ga̱jmu̱ʼ Marianne niguáʼdááxu tikhu xkujndu, mú ga̱jma̱a̱ numuu rí nutamíjnaxu májánʼ rúʼko̱ niñambáá mu mambaxúxuʼ itháan májánʼ. Mbá rí niniguʼ náa ikha rí tséʼniuu gakhi̱i̱ maʼthúún  xa̱bu̱ ga̱jma̱a̱ rí nandoo kaʼñún bi̱ kuwa náa xuajen rúʼko̱ ga̱jma̱a̱ rí naniguuʼ maʼtáraʼa”. Tséyóoʼ má mu̱ʼgua̱ i̱mba̱ xuajen mu makumulúʼ xóo nikumu̱ún ikhiin. Mámbá rí nagájnulú gúʼtaraʼa gajmiúlú mbáa ndxájulú náa congregación ndrígúlú, rúʼko̱ naʼni rí muniʼníiʼ itháan májánʼ ga̱jma̱a̱ rí mambaxúlúʼ gajmiúlú.

13. Káʼnii gamíi marigá índo̱ kuwáánʼ ruñajunʼ gajmiúlú a̱ngiu̱lú rá.

¹³ Nguáná, índo̱ nuñajunʼ gajmiúlú a̱ngiu̱lú, ra̱ʼkhá i̱ndó nduʼyáá rí najmiin nuni ma̱ngaa náa rí naʼni tígu̱u̱n. Ndiéjunʼ gándoo gambáyulú índo̱ naguaʼnii rígi̱ rá. Gúʼthá mbujúu xkri̱da ndrígóo Jeremías. Ndiéjunʼ nimbáyúu ikhaa mbaʼyoo rí májánʼ náa eʼwíínʼ ga̱jma̱a̱ rí xáʼyoo náa naʼnitigu̱n xá.

14. Ndiéjunʼ nijmañuu Jeremías náa Jeobá ga̱jma̱a̱ xú káʼnii nimbáyúu rígi̱ xá.

¹⁴ Mbáa Jeremías niʼnirámáʼ libro ndrígóo Biblia dí na̱ʼkha̱ náa 1 ga̱jma̱a̱ 2 ndrígóo Reyes, ga̱jma̱a̱ náa libro dí na̱ʼkha̱ má mbiʼyuu. Ga̱jma̱a̱ numuu ñajunʼ rígi̱ ndiʼyoo dí ra̱ʼkhá tháán májánʼ a̱jkiu̱u̱n Jeobá kaʼñún xa̱bu̱ aʼkhá. Mbá xkri̱da, índo̱ ndiʼyoo dí rey Acab nitanga̱a̱ a̱jkiu̱u̱n náa rí nikiéʼkúun, Jeobá niʼthí rí xánindxu̱u̱ ma̱jti̱ʼ índo̱ gakhañúu (1 Rey. 21:27-29). Ma̱ngaa niʼdxaun rí maski ajndu Manasés, niʼnitigo̱o̱ itháan náa idú Jeobá ki xóo Acab, Jeobá niʼni mba̱a̱ a̱jkiu̱u̱n kaʼyoo índo̱ nitanga̱a̱ a̱jkiu̱u̱n (2 Rey. 21:16, 17; 2 Crón. 33:10-13). Mbáa rí ndiʼyoo rígi̱ nimbáyúu wéñuʼ Jeremías mu xúʼko̱ mbaʼyáridoo rí tsekiʼnáa nacha̱ ga̱jma̱a̱ rí nigáwiinʼ a̱jkiu̱u̱n Dios kaʼñún bi̱ nambáxu̱u̱ gajmii (Sal. 103:8, 9).

15. Xú káʼnii ndiʼyáridoo Jeremías rí naʼngo̱o̱ a̱jkiu̱u̱n Jeobá índo̱ Baruc bi̱ nindxu̱u̱ mígiu̱u̱ niʼni ngarígaminaʼ rá.

¹⁵ Gundxaʼwamíjna̱ dí niʼni Jeremías índo̱ mígiu̱u̱ Baruc niʼni ngarígaminaʼ mbá xngaa náa ñajunʼ rí nigiʼdoo. Mú Jeremías tániñuuʼ, ikhaa nimbáyúu mu mariʼkuminaaʼ ga̱jma̱a̱ niʼthúu̱n ajngáa guabaaʼ ndrígóo Jeobá (Jer. 45:1-5). Ndiéjunʼ ejmañulú rá.

16. Xó má eʼthí Proverbios 17:9, dí gíʼmaa muʼni mu mambáxulú májánʼ gajmiúlú mbáa rá.

¹⁶ Gajkhun má, xáguaʼthi̱i̱n rí a̱ngiu̱lú mani̱ndxu̱ún xa̱bu̱ jmbiin. Ikha jngó, guʼni tsiakimijna mu mambaxúlúʼ májánʼ gajmiúlú. Á mu bi̱ nambáxulúʼ gajmiúlú naʼni tígo̱o̱ náa iduu Dios, mbáa mbaʼyóoʼ muʼthán mbájmbu mú ga̱jma̱a̱ májánʼ ma̱ngaa muʼthán xtágabu rí na̱ʼkha̱ náa Biblia (Sal. 141:5). Ga̱jma̱a̱ á mu niʼniulúʼ dí raʼkhí, gíʼmaa muʼni mba̱a̱ a̱jkiu̱lú kuʼyáá. Á mu ni̱ʼni̱ má mba̱a̱ a̱jkiu̱lú kuʼyáá, guniʼñáaʼ ruʼthá mbá kayuuʼ náa nijngawa̱a̱n (atraxnuu Proverbios 17:9). * Ra̱ʼkhá tháán gíʼdoo numuu mbuʼyáá náa rí naʼngu̱u̱n nuni a̱ngiu̱lú ra̱ʼkhá náa naʼni tígu̱u̱n numuu rí kúwáanʼ mbiʼi mingíjyúuʼ. Á mu nuʼni xúʼko̱, mambáxulú itháán májánʼ. Ga̱jma̱a̱ gíʼdoo numuu rí muʼni numuu rí mbaʼyúlú bi̱ mambáxulú májánʼ gajmiúlú índo̱ gakuwáanʼ náa majphú mba̱a̱ gaʼkhu.

17. Náá numuu nduʼyáá dí Jeremías ninindxu̱u̱ mbáa bi̱ nimbáxu̱u̱ májánʼ gajmíi̱n índo̱ niʼni mbiʼi mingíjyúuʼ rá.

¹⁷ Gaʼyee Jeremías ninindxu̱u̱ mbáa bi̱ nimbáxu̱u̱ májánʼ gajmíi̱n índo̱ niʼni mbiʼi mingíjyúuʼ. Mbá xkri̱da, guʼyáá xóo nimbáyúu Ébed-Mélec. Bi̱ nindxu̱u̱ Xa̱bu̱ Ñajunʼ niʼnikríyaaʼ náa pozo rí kajnu̱ʼ gaʼcha̱ʼ. Mú, nda̱wa̱á rí niʼnikríyaaʼ, Ébed-Mélec nimiñuu rí príncipe muni̱i̱ dí raʼkhí. Índo̱ Jeremías niʼdxaun rígi̱, ikhaa na̱nguá niguanúu wíí mu mígiu̱u̱ maʼnimbánuu  mbáwíi xkujndu. Maski ajndu kraʼaa náa guʼwá e̱jua̱nʼ, niʼni asndu xó má niʼngo̱o̱ ga̱jma̱a̱ numuu ikhaa, ma̱ngaa niʼthúu̱n rí nikudaminaʼ maʼni Jeobá (Jer. 38:7-13; 39:15-18).

18. Xó má naʼthí náa Proverbios 17:17, dí gándoo mu̱ʼni̱ índo̱ mbáa ndxájulú xtáa gíná rá.

¹⁸ Rí mbiʼi xúgi̱, a̱ngiu̱lú nuraʼníí mbaʼa enii xkujndu. Mbá xkri̱da, mbaʼin numíniiʼ ga̱jma̱a̱ gamiéjunʼ dí narígá ga̱jma̱a̱ rí nuni xa̱bu̱. Á mu xúʼko̱ erígá, mbáa ma̱ndoo mundríguíin tikhun a̱ngiu̱lú náa guʼwúlú. Mbáa eʼwíínʼ ma̱ndoo mumbañún ga̱jma̱a̱ mbújkha̱a̱. Mú, rí xúgiáanʼ ma̱ndoo mu̱ʼni̱ nindxu̱u̱ rí muʼtákáñii Jeobá mu mambáñun. Á mu nuʼdxawíín rí mbáa ndxájulú xtáa gíná, mbáa tséʼyáá xóo muʼthán o xóo endxa̱ʼwáminaʼ. Mú, xúgiáanʼ mbaʼa rí ma̱ndoo mu̱ʼni̱. Xóo muʼthá, ma̱ndoo makuwáanʼ gajmiúlú ikhaa mbá xngaa, muʼdxawíín ga̱jma̱a̱ májánʼ rí gaʼthulú ma̱ngaa ma̱ndoo muʼthán ga̱jma̱a̱ texto ndrígóo Biblia rí ikháanʼ nimbáyulúʼ (Is. 50:4). Rí itháan gíʼdoo numuu nindxu̱u̱ rí makuwáanʼ gajmiúlú índo̱ gáʼñúnʼ (atraxnuu Proverbios 17:17). *

19. Xú káʼnii gambáyulú nda̱wa̱á rí mambáxulu májánʼ gajmiúlú a̱ngiu̱lú asndu nákha xúgi̱ rá.

¹⁹ Gíʼmaa muʼni mbóó a̱jkiu̱lú ga̱jma̱a̱ rí mambáxulú májánʼ gajmiúlú a̱ngiu̱lú rí mbiʼi xúgi̱. Náá numuu rá. Numuu rí xa̱bu̱ sia̱nʼ maʼndún muni rí murkuajimíjnalú ga̱jma̱a̱ nduwaʼ rí gúthi. Munimíjna̱ muniulúʼ rí muniʼñáʼ rumbáyumíjná ga̱jma̱a̱ rí muʼnimbulúʼ kuʼyamijná. Mú xájmiin. Xáʼngu̱u̱n gúní rí murkuajímijnalu ga̱jma̱a̱ rí nandulú kuʼyamijná. Nimbá rí muni ikhiin xáʼngo̱o̱ gáʼni rí mambáa rí nambáxulúʼ. Numuu rí xóo nambáxulúʼ, raʼkháa i̱ndó mani̱ndxu̱u̱ índo̱ gámbáa dí rígá náa numbaaʼ rígi̱, mambáxulu má xúʼko̱ asndu kámuu mbiʼi.