1, 2. Náá numuu rí ndayóoʼ manigulúʼ libro ndrígóo Levítico bi̱ ni̱ndxu̱lú cristiano rí mbiʼi xúgi̱ rá.

APÓSTOL Pablo niʼni marmáʼáan a̱jkiu̱u̱n Timoteo bi̱ nambáxu̱u̱ ga̱jma̱a̱ rí “xúgíʼ Escritura na̱ʼkha̱ náa Dios ga̱jma̱a̱ nayambáá” (2 Tim. 3:16). Náa mbá chíʼgíiʼ rí na̱ʼkha̱ raʼthí náa “Escritura” rígi̱ nindxu̱u̱ libro ndrígóo Levítico. Ndiéjunʼ ku̱ma̱a̱ʼ ikháán ga̱jma̱a̱ numuu libro rígi̱ rá. Mbaʼin xa̱bu̱ nakumu̱ún rí nindxu̱u̱ i̱ndó mbóʼ libro náa na̱ʼkha̱ ikha rí tseyambáá mbiʼi xúgi̱. Mú bi̱ ni̱ndxu̱lú cristianos gajkhun tsékumulú xúʼko̱.

² Naʼni má mbá ajtsú míí tikhuu tsiguʼ rí nigumaraʼmáʼ Levítico, mú Jeobá niyexi̱i̱ “mu maxnúlúʼ ikha” (Rom. 15:4). Libro rígi̱ rí nigumaraʼmáʼ ga̱jma̱a̱ xi̱ʼ ndrígóo Dios nambáyulúʼ mbuʼyáá xóo endxa̱ʼwáminaʼ ikhaa, ikha jngó ndayóoʼ rí manigulúʼ índo̱ gúʼnigajmaa. Mbaʼa rí gándoo gajmañulú ikhí. Guʼyáá a̱jkhu̱ rí ikhaa.

3. Náá numuu rí nuxnaxi̱ tsigijñaʼ Mbiʼi rí Najngudi̱i̱ aʼkhá rá.

³ Timbá rí najmañulúʼ: Ndayúlú rí Jeobá ma̱ndoo kaʼyulú mu magruigú tsigijñaʼ rí gúxnáá. Mbiʼi rí nagumariyaaʼ náa mambá tsiguʼ mu Majngudi̱i̱ Aʼkhá, israelitas nagimbíi̱n ga̱jma̱a̱ bi̱ Kayá edxu̱u̱ náa ndxajkun natsikharámiin xujkhúʼ. Rígi̱ naʼni marmáʼáan a̱jkiu̱ún israelitas rí makuwá kaʼwiin rí ni xaguaʼdáá aʼkhún. Mú rígá mbá rí ndayóoʼ maʼni wapháá bi̱ Kayá edxu̱u̱ náa ndxajkun nákha xóó tséto̱ʼo̱o̱ kayóo eʼdiuu xujkhúʼ bi̱ maxnájxi̱i̱ Náa rí phú mikaʼwu wéñuʼ, nindxu̱u̱ mbá rí itháan gíʼdoo numuu ki xóo rí majngudi̱i̱ aʼkhá ndrígu̱ún xa̱bu̱ xuajen.

4. Xó má eʼthí náa Levítico 16:12, 13, dí eʼni bi̱ kayá edxu̱u̱ náa ndxajkun índo̱ nato̱ʼo̱o̱ timbá miʼtsú Náa rí phú mikaʼwu wéñuʼ índo̱ naʼni Mbiʼi rí Majngudi̱i̱ aʼkhá rá. (Atayáá xtiʼkhuu rí na̱ʼkha̱ náa timbá ináa).

 ⁴ (Atraxnuu Levítico 16:12, 13). * Gundxaʼwamíjna̱ rí xtáa rarígá. Bi̱ kayá edxu̱u̱ náa ndxajkun nato̱ʼo̱o̱ náa tabernáculo. Náa mbá ñawúunʼ kayá incienso rí ndataun ga̱jma̱a̱ náa i̱mba̱ ñawúunʼ kayá rí ki̱ʼni̱ ga̱jma̱a̱ oro náa kajti Chámbu̱ʼ. Nawi̱ji̱ náa xtíin rí narugoo náa natu̱ʼu̱u̱n Náa rí phú mikaʼwu wéñuʼ. Ga̱jma̱a̱ gamajkhu nato̱ʼo̱o̱ timbá aʼphu̱ mbiʼi rúʼko̱ (ga̱jma̱a̱ mato̱ʼo̱o̱ imbá gijma̱ aʼphu̱ itháan) ma̱ngaa nawi̱ji̱ náa inuu e̱jna̱ rí nimbánuu. Rí nandoo gáʼthúu̱n, xtáa náa inuu Jeobá. Ikhú narajkuáa incienso náa Chámbu̱ʼ, ga̱jma̱a̱ náa naguáʼti̱i̱n xa̱bu̱ najnííʼ xu̱u̱ʼ rí ndataun. * Ga̱jma̱a̱ nda̱wa̱á nataʼaa mbu̱júu̱ʼ Náa rí phú mikaʼwu wéñuʼ ga̱jma̱a̱ kayá eʼdiuu xujkhúʼ xóo tsigijñaʼ ga̱jma̱a̱ numuu aʼkhá. Guʼyáá ga̱jma̱a̱ numuu rígi̱: Natsikarámáʼ incienso nákha xóó tsexnáxi eʼdiuu tsigijñaʼ ga̱jma̱a̱ numuu aʼkhá.

5. Ndiéjunʼ ejmañuluʼ ga̱jma̱a̱ numuu rí nijmaa incienso nákha Mbiʼi rí nini Kaʼwii aʼkhá xá.

⁵ Dí ejmañuluʼ ga̱jma̱a̱ numuu xóo nijmún incienso Mbiʼi rí Najngudi̱i̱ aʼkhá rá. Náa Biblia naʼni mbríguii incienso ga̱jma̱a̱ rí nutajkháan xa̱bi̱i̱ Dios bi̱ guájun jmbu, ikhaa nagruigú rí nutháán xa̱bi̱i̱ bi̱ guájun jmbu (Sal. 141:2; Apoc. 5:8). Garmáʼáan a̱jkiu̱lú rí bi̱ kayá edxu̱u̱ náa ndxajkun na̱jkha̱ kayóo incienso náa inuu Jeobá ga̱jma̱a̱ gamajkhu. Xúʼko̱ má kayúʼ, índo̱ nuʼtajkháan náa Dios, nu̱ʼni̱ ga̱jma̱a̱ gamajkhu. Nduʼyamajkuíí wéñuʼ rí bi̱ Niʼnian naniñuuʼ rí mu̱ʼgua̱ kanuu náa ikhaa, xó má eʼni mbáa ada̱ ga̱jma̱a̱ anu̱u̱ (Sant. 4:8). Nagruiguáanlú xó mbáa bi̱ nambáxu̱u̱ ga̱jma̱a̱ (Sal. 25:14). Rígi̱ nindxu̱u̱ mbá gamajkhu mba̱a̱ náa ikháanʼ rí tsíyulú mu̱ʼni̱ nditháan rí tsénigu̱u̱ʼ.

6. Ndiéjunʼ eʼsngúlú ga̱jma̱a̱ numuu Jesús rí bi̱ kayá edxu̱u̱ náa ndxajkun natsikhá incienso nákha xóó tsexnáxi tsigijñaʼ rá.

⁶ Guguaʼdáá kaʼwu rígi̱, rí bi̱ kayá edxu̱u̱ náa ndxajkun gíʼmaa matsikarámáʼ incienso nákha xóó tsexnáxi tsigijñaʼ. Xúʼko̱ nandoo ndaʼyoo rí Jeobá nagruigú. Ndiéjunʼ eʼsngúlú rá. Índo̱ Jesús nixtáa náa tsu̱du̱u̱ ku̱ba̱ʼ, ndiyóoʼ rí maʼni mbá rí itháan gíʼdoo numuu nákha xóó tsexnáximinaʼ xóo tsigijñaʼ, mbá rí itháán gíʼdoo numuu ki xóo rí maʼni káwíin xa̱bu̱ numbaaʼ. Mu xúʼko̱ Jeobá magruigú tsigijñaʼ ndrígóo, ndiyóoʼ rí maʼnimbo̱o̱ má xúʼko̱ xúgíʼ mbiʼi rí nixtáa. Xúʼko̱ nisngájma rí Jeobá nandoo makuwáánʼ xóo phú gíʼmaa. Jesús nisngajma rí Anu̱u̱ naʼtáñajuunʼ májánʼ ga̱jma̱a̱ jmbu.

7. Náá numuu rí Jeobá niniguuʼ rí niʼni Jesús nákha nixtáa náa tsu̱du̱u̱ ku̱ba̱ʼ rá.

⁷ Jesús niʼnimbo̱o̱ kuduun ikha ndrígóo Jeobá náa xúgíʼ mbiʼi rí nixtáa náa tsu̱du̱u̱ ku̱ba̱ʼ. Táʼni nimbá rí nagua̱ʼa̱ náa xuyuuʼ ga̱jma̱a̱ tsáʼkhá, asndu rí makhañúu, niʼni rí makáguabaaʼ mu xáʼthi ga̱jma̱a̱ numuu xóo naʼtáñajuunʼ Anu̱u̱ (Filip. 2:8). Jesús niʼtájkháan “ga̱jma̱a̱ nindxaʼwá gakhi̱i̱ wéñuʼ asndu nigajtaa iyooʼ iduu” índo̱ ikhaa niraʼnuu tsáʼkhá (Heb. 5:7). Ga̱jma̱a̱ numuu rí ikhaa niʼtájkháan rí nagájnuu asndu náa a̱jkiu̱u̱n rúʼko̱ nixnúu tsiakii mu maʼnimbo̱o̱ má xúʼko̱. Rí niʼtájkháan náa Jeobá nigruigú xóo mbá rí ndataun incienso.  Xúgíʼ rí Jesús niʼni nákha nixtáa náa tsu̱du̱u̱ ku̱ba̱ʼ nixnúu gamajkhu Anu̱u̱ ga̱jma̱a̱ niʼni mba̱a̱ rí naʼtáñajuunʼ Dios.

8. Xú káʼnii guʼyaridáá Jesús rá.

⁸ Ma̱ndoo mbuʼyaridáá Jesús á mu nu̱ʼni̱ xó má eʼngulú mu muʼnimbánii xtángoo ndrígóo Dios ga̱jma̱a̱ muguajún jmbu náa ikhaa. Índo̱ naguáʼnii mbá gamiéjunʼ, nunda̱ʼa̱a̱ Jeobá rí mambáyulúʼ numuu rí nandulú mbuʼyamajkuíí. Á mu nu̱ʼni̱ xúgíʼ rígi̱, nusngajmá rí numbáyii xóo naʼtáñajuunʼ. Nduʼyáá rí ikhaa xagruigú rí nuʼtajkháan á mu nu̱ʼni̱ mbá rí tsénigu̱u̱ʼ. Á mu nuʼgíʼ makuwáanʼ xó má eyoo Dios, ma̱ndoo mbuʼyáá rí nuʼtajkháan nagájnuu asndu náa a̱jkiu̱lú mani̱ndxu̱u̱ náa ikhaa xóo mbá incienso rí ndataun. Ga̱jma̱a̱ ma̱ndoo mbuʼyáá rí nakuwáánʼ jmbu ma̱ngaa rí nuʼnimbulúʼ maʼdxun Anu̱lú bi̱ xtáa mekhuíí (Prov. 27:11).

9. Náá numuu rí nuxnaxi tsigijñaʼ rí makuwíin tsímáá gajmiún Dios xá.

⁹ Raga̱jma̱ rí najmañulúʼ: Nuʼni ñajuunʼ Jeobá numuu rí nuxnálú núma̱aʼ. Guʼyáá imbo̱o̱ rí gíʼdoo numuu, xóo ndiyamajkuíí Dios xa̱bu̱ Israel: Tsigijñaʼ rí makuwá tsímáá gajmiún Dios. * Náa libro ndrígóo Levítico, najmañulúʼ rí israelitas ma̱ndoo muxnaxi tsigijñaʼ mu makuwá tsímáá gajmiún Dios nindxu̱u̱ mbá rí ‹nusngajma xóo rí nuxnáa numa̱a̱ Dios› (Lev. 7:11-13, 16-18). Tuxnajxii tsigijñaʼ rígi̱ ga̱jma̱a̱ numuu rí gíʼma muni, nixnaxi numuu rí ikhiin nandún muni. Ikha jngó nuxnaxi tsigijñaʼ rí nandún ikhiin ga̱jma̱a̱ numuu ngajua rí guáʼdáá náa  Dios Jeobá. Bi̱ naxnáxi tsigijñaʼ rígi̱, bi̱ kuwa náa goʼwóo ga̱jma̱a̱ ndxajkun naʼphu̱ xuyuuʼ xujkhúʼ bi̱ nitsikaramaaʼ. Mú mbá xíʼtáa xujkhú i̱ndó Jeobá kaʼyoo. Ndiéjunʼ nindxu̱u̱ rá.

10. Ndiéjunʼ eʼsngúlú tsigijñaʼ xóo makuwíin tsímáá gajmiún Dios dí na̱ʼkha̱ raʼthí náa Levítico 3:6, 12, 14-16 ga̱jma̱a̱ numuu rí Jesús niʼni ñajuunʼ Anu̱u̱ rá.

¹⁰ Ajtsú rí najmañulúʼ: Nuxnáá rí itháán májánʼ Jeobá numuu rí nandulú kuʼyáá. Jeobá ndaʼyoo rí xtangoo xujkhúʼ nindxu̱u̱ mbá rí itháan májánʼ. Ma̱ngaa niʼthí rí tikhu dí rígá náa xuyuuʼ gíʼdoo numuu, xó má roniu̱u̱ (atraxnuu Levítico 3:6, 12, 14-16). * Ikha jngó naxtáa gagi Jeobá índo̱ mbáa israelita naxnaxi tsigijñaʼ rí nagájnuu náa a̱jkiu̱u̱n xó má xuyuuʼ rí gíʼdoo numuu ga̱jma̱a̱ xtangoo. Israelita bi̱ naxnaxi tsigijñaʼ rígi̱ nasngájma rí nandoo maxnúu rí itháan májánʼ Jeobá. Xúʼko̱ má kayuuʼ, Jesús nixnúu mbá rí itháan májánʼ Anu̱u̱, rí niʼni ñajuunʼ ga̱jma̱a̱ xúgíʼ a̱jkiu̱u̱n ma̱ngaa numuu rí nindoo kaʼyoo (Juan 14:31). Mu Jesús, ndiʼyoo rí maʼni ñajuunʼ Anu̱u̱ nindxu̱u̱ mitsaanʼ wéñuʼ, ga̱jma̱a̱ nindoo kaʼyoo xtángoo ndrígóo (Sal. 40:8). ¡Ra̱ʼkhá tháán nidxuu Jeobá índo̱ ndiʼyoo rí a̱ʼdióo xtáa raʼni ñajuunʼ!

11. a) Xú káʼnii embánii ñajunʼ rí nu̱ʼni̱ náa Dios ga̱jma̱a̱ tsigijñaʼ rí makuwáánʼ tsímáá gajmiúlú xá. b) Xú káʼnii eʼni̱i̱ a̱jkiu̱lú rígi̱ rá.

¹¹ Tsigijñaʼ dí makuwíin tsímáá gajmiún Dios ga̱jma̱a̱ rí musngajma ngajua rí guaʼdáá náa ikhaa. Rí nu̱ʼni̱ ñajuunʼ Jeobá nindxu̱u̱ ikháá má xóo tsigijñaʼ, numuu rí nagájnuu asndu náa a̱jkiu̱lú rí nandulú kuʼyáá ikhaa. Nuxnáá rí itháán gíʼdoo numuu ga̱jma̱a̱ xúgíʼ a̱jkiu̱lú. Ikhaa nadxuu índo̱ ndaʼyoo rí mbaʼin wéñuʼ xa̱bu̱ nuni ñajuunʼ numuu rí nandún kuyáá ma̱ngaa xúʼko̱ má ikha ndrígóo. Naʼni̱i̱ a̱jkiu̱lú índo̱ nduʼyáá rí ikhaa ndaʼyoo ga̱jma̱a̱ ndaʼyamajkuu raʼkháa i̱ndó rí nu̱ʼni̱, ma̱ngaa náá numuu rí nu̱ʼni̱. Mbá xkri̱da, á mu ga̱jma̱a̱ numuu rí niganiánʼ tséniñulú mu̱ʼni̱ xúgíʼ rí nanigulúʼ, ma̱ndoo mbuʼyáá gajkhun rí Jeobá tseʼyoo rúʼko̱. Mbáa mundxaʼwamíjna̱ dí tséʼngulú gúʼni wéñuʼ ñajuunʼ, mú ikhaa ndaʼyoo ngajua rí naxkaxáanʼ mu mu̱ʼni̱ xúgíʼ rígi̱. Nadxuu rí nuxnáá rí itháán májánʼ asndu xó má naʼngo̱o̱.

12. Xú káʼnii nikumu̱u̱ Jeobá índo̱ nixnaxi tsigijñaʼ rí makuwíin tsímáá gajmiún ga̱jma̱a̱ ndiéjunʼ rí nduʼyáá gajkhun rá.

¹² Ndiéjunʼ eʼsngúlú tsigijñaʼ rí makuwáánʼ tsímáá gajmiúlú Dios rá. Jeobá nadxuu índo̱ natu̱xu̱u̱ gúniúu xujkhúʼ bi̱ nakarámaaʼ. Ikha jngó ma̱ndoo mbuʼyáá gajkhun rí Jeobá xtáa gagi índo̱ nu̱ʼni̱ ñajuunʼ ga̱jma̱a̱ xúgíʼ a̱jkiu̱lú (Col. 3:23). Gundxaʼwamíjna̱ dí raʼkháa tháán gagi xtáa. Xúgíʼ rí nu̱ʼni̱ naxkajxáanʼ ga̱jma̱a̱ ngajua rí kuaʼdáá náa ikhaa mu mu̱ʼni̱ ñajuunʼ, tséʼniuu á mu mba̱a̱ o chíʼgíiʼ, mbá dí gíʼdoo wéñuʼ numuu dí marmáʼáan a̱jkiu̱u̱n má xúʼko̱ (Mat. 6:20; Heb. 6:10).

13. Xó má naʼthí náa Levítico 9:23, 24, xú káʼnii nisngajma Jeobá rí nigruiguíí ndxajkun bi̱ ndiʼkhú nigi̱ʼi̱ rá.

¹³ A̱jkhu̱ rí najmañulúʼ: Jeobá naʼni tsajkurámiinʼ xa̱bi̱i̱ bi̱ kúwá náa tsu̱du̱u̱ ku̱ba̱ʼ. Guʼyáá dí nirígá tsiguʼ 1512 nákha xóó tséʼkha̱ Cristo, índo̱ niguma tabernáculo náa kúbá Sinaí (Éx. 40:17). Moisés nigíʼdu̱u̱ ni̱ʼni̱ mbá ndxa̱a̱ náa nigíiʼ ndxajkun Aarón gajmíi̱n e̱ji̱i̱n. Xa̱bu̱ israelitas nigimbu̱ún mu mbuñún ndxajkun xóo guxnaxi timbá miʼtsú tsigijñaʼ rí  mutsikarami̱i̱nʼ xujkhúʼ (Lev. 9:1-5). Xú káʼnii nisngájma Jeobá rí nigruiguíí ndxajkun bi̱ ndiʼkhú nigi̱ʼi̱ rá. Índo̱ Aarón ga̱jma̱a̱ Moisés nini tsajkurámiinʼ israelitas, Jeobá nikuʼma aguʼ asndu mekhuíí mu mi̱kha mbá kayuuʼ tsigijñaʼ rí grígu náa altar (atraxnuu Levítico 9:23, 24). *

14. Náa numuu rí naxmiéjunlú mbuʼyáá rí mbiʼi xúgi̱ rí Dios nimbáyúu ndxajkun Aarón rá.

¹⁴ Xígi̱ káʼnii nikujmaa rí Jeobá nimbáyúu ndxajkun Aarón. Índo̱ israelitas ndiyáá kaʼwu rígi̱ rí ndxajkun nakumu̱ún kuyáá Dios, niguánu ndiyáá rí mangiin ndayóoʼ mumbañún. Rígi̱ rí gíʼdoo numuu náa ikháanʼlu, ndxajkun bi̱ nikúwá náa Israel ninindxu̱u̱ mbá ndájkua̱ náa ndxajkun bi̱ gíʼdoo itháán numún. Cristo nindxu̱u̱ bi̱ Kayá Edxu̱u̱ náa Ndxajkun, ikhaa gajmiin bi̱ 144,000 muʼtáñajuunʼ mekhuíí, mani̱ndxu̱ún ndxajkun ga̱jma̱a̱ reyes (Heb. 4:14; 8:3-5; 10:1).

15, 16. Ndiéjunʼ kujmaa rí Jeobá nambáyúu “ñumba tsi jmbi, tsi majan indxaʼhuaminaʼ” rá.

¹⁵ Tsiguʼ 1919, Jesús nigruigíín mbá chímbaʼin cristianos bi̱ kaxtaʼwíin mu mani̱ndxu̱u̱n “ñumba tsi jmbi, tsi majan indxaʼhuaminaʼ”. Yumbáá bigi̱ naxná ikha náa najuiʼtáraʼa ga̱jma̱a̱ “naxná ganitsu índo̱ ndayóoʼ” náa xa̱bi̱i̱ Cristo (Mat. 24:45). Lá nduʼyáá kaʼwu rí Dios nagruiguíi yumbáá tsi jmbi, tsi majan indxaʼhuaminaʼ ráʼ.

¹⁶ Satanás gajmíi̱n xa̱bi̱i̱ nindri̱ga̱ tsáʼkhá náa ñajunʼ rí nuni yumbáá tsi jmbi, tsi majan indxaʼhuaminaʼ. Rígi̱ xándoo marigá á mu Jeobá tseyambáá. Nirígá guerra mba̱ʼu̱ náa xúgíʼ numbaaʼ  ga̱jma̱a̱ nini gíníi xa̱bu̱ ma̱ngaa nuniu̱u̱n dí ra̱májánʼ ga̱jma̱a̱ nuxkúún gakhii wéñuʼ xa̱bi̱i̱ Dios. Maski ajndu nirígá xúgíʼ rígi̱ ñumba tsi jmbi, tsi majan indxaʼhuaminaʼ nixnún má xúʼko̱ ganitsu rí na̱ʼkha̱ náa Dios xa̱bi̱i̱ Cristo bi̱ kúwá náa tsu̱du̱u̱ ku̱ba̱ʼ. Gundxaʼwamíjna̱ ga̱jma̱a̱ numuu dí ra̱ʼkhá tháán mbaʼa i̱yi̱i̱ʼ dí nuxnáraʼa xúʼkhiín náa mbá 900 ajngáa. Rígi̱ nakujmaa kaʼwu dí xtáa rambáyulúʼ Dios. Náa nuʼtáraʼa nindxu̱u̱ imbo̱o̱ rí Jeobá naʼni tsajkurámuuʼ. Ajngáa rí májánʼ najuiʼtáraʼa “náa xúgíʼ numbaaʼ” (Mat. 24:14). Nakujmaa kaʼwu rí Jeobá naxná ikha ga̱jma̱a̱ naʼni tsajkurámuuʼ xuajñuu.

17. Xú káʼnii esngájma rí nuyambáá náa xuajñuu Jeobá rá.

¹⁷ Guraximíjna̱: Lá nadxuʼ numuu rí kaʼyoʼ maxtáa náa tsu̱du̱u̱ ku̱ba̱ʼ gajmíi̱nʼ eʼwíínʼ xa̱bi̱i̱ Dios ráʼ. Rí Jeobá nasngájmulúʼ nakujmaa kaʼwu xóo nambáyúu xuajñuu naʼniulú mbuʼyáá xóo aguʼ rí nagajtaa náa mekhuíí nákha mbiʼi ndrígóo Moisés ga̱jma̱a̱ Aarón. Ikha jngó kuaʼdáá mbaʼa rí muxnáa numa̱a̱ (1 Tes. 5:18). Xú káʼnii esngajmá rí nuyambáá náa xuajñuu Jeobá rá. Rí muʼgíiʼ muʼnimbánii xtágabu rí na̱ʼkha̱ náa Biblia rí nagájnuu náa i̱ʼwáʼ iyiiʼ, náa reunión, náa asamblea ma̱ngaa nuʼtáraʼa xó ma eʼngulú ga̱jma̱a̱ mbuʼñíinʼ xa̱bu̱ bi̱ mani̱ndxu̱ún discípulos (1 Cor. 15:58).

18. Ndiéjunʼ rí ndayóoʼ muʼgíʼ mu̱ʼni̱ rá.

¹⁸ Ndayóoʼ rí muʼgíʼ mu̱ʼni̱ ikha rí na̱ʼkha̱ náa Libro ndrígóo Levítico. Gu̱ʼni̱ tsiakimíjna̱ mu̱ʼni̱ rí naniguuʼ Jeobá mu xúʼko̱ ma̱ndoo magruigú tsigijñaʼ ndrígúlú. Nu̱ʼni̱ ñajuunʼ Dios numuu rí nandulú kuʼyáá. Guxnáá má xúʼko̱ rí itháán májánʼ numuu rí nandulú kuʼyáá ga̱jma̱a̱ xúgíʼ a̱jkiu̱lú. Ma̱ngaa gumbáyii ga̱jma̱a̱ xúgíʼ a̱jkiu̱lú xuajñuu dí rígá mbiʼi xúgi̱. Rí mu̱ʼni̱ xúgíʼ rígi̱, nusngajmáá Jeobá rí nduʼyamajkuíí gíʼdoo itháán numuu ga̱jma̱a̱ rí ni̱ndxu̱lú xa̱bi̱i̱.