NÁKHA wajyúúʼ, mbáa mayordomo nañewu̱u̱n goʼwóo o rí kaʼyoo imba̱a̱ xa̱bu̱.

Índo̱ José a̱ʼdióo Jacob, ninindxu̱u̱ yumbáá náa Egipto, bi̱ nañajuunʼ ga̱jma̱a̱ nigíiʼ mayordomo o bi̱ mbayá edxu̱u̱ náa goʼwóo. Ikhaa xa̱bu̱ bigi̱ ninindxu̱u̱ egipcio ‹niniñuuʼ rí José mañewu̱u̱n xúgíʼ rí gíʼdoo› (Gén. 39:2-6). Nda̱wa̱á índo̱ José ninindxu̱u̱ mbáa Xa̱bu̱ Ñajunʼ bi̱ nigiʼdoo numuu náa Egipto, ma̱ngaa nigiʼdaa mbáa mayordomo bi̱ mañewu̱u̱n goʼwóo (Gén. 44:4).

Mbiʼi rí nixtáa Jesús, bi̱ guaʼdáá mbaaʼ bi̱ kúwi̱i̱n náa xuajen mba̱ʼu̱, mitsínguánʼ nikúwi̱i̱n náa mbañúunʼ. Ikha jngó nundri̱gi̱i̱n mayordomos mu mbuyáá ñajunʼ rí nuni mámbá mbiʼi bi̱ nuñajuunʼ ikhí.

Ndiéjunʼ eyóoʼ maʼnimbánuu mbáa mayordomo rá. Mbáa xa̱bu̱ romano bi̱ mbiʼyuu Columela bi̱ nixtáa nákha timbá siglo, niʼnirámáʼ rí mbáa xa̱bu̱ bi̱ nagi̱ʼi̱ mu maʼtáñajuunʼ o bi̱ mani̱ndxu̱u̱ mayordomo ndayóoʼ maʼni mbáa xa̱bu̱ bi̱ najmañuu. Ndayóoʼ magiʼdoo cualidad ndrígóo xi̱ʼ mu xúʼko̱ xáʼnimbamína ga̱jma̱a̱ rí xánindxu̱u̱ xa̱bu̱ ra̱májáanʼ. Columela niʼthí xóó: “ Mbá cualidad rí itháán ndayóoʼ magiʼdoo bi̱ maʼtáñajuunʼ rí xándxaʼwáminaʼ rí najmañuu má xúgíʼ ga̱jma̱a̱ rí maxtáa xawii majmañuu itháan”.

Náa Ajngá rawunʼ Dios najmuu ajngáa mayordomo mu maʼtájuíi tikhu ñajunʼ rí naguma náa congregación cristiana. Mbá xkri̱da, apóstol Pedro niʼthúún cristianos dí majmúún rí najmañún nuni mu mumbañún eʼwíínʼ “gajmala mu mumbáñún eʼwíínʼ xóo mayordomo [...] rí májánʼ a̱jkiu̱u̱n Dios” (1 Ped. 4:10).

Asndu Jesús niʼthí ga̱jma̱a̱ numuu mbáa mayordomo mu maʼthí mbá xkri̱da rí na̱ʼkha̱ náa Lucas 16:1-8. Ma̱ngaa náa nijuiʼthá ga̱jma̱a̱ numuu rí makujmaa índo̱ gánindxu̱u̱ Rey, niʼthúún xa̱bi̱i̱ rí magíiʼ mbáa “ñumba tsi jmbi, tsi majan indxaʼhuamina” o “mayordomo tsí jmbi”. Ñajunʼ rí phú magiʼdoo mayordomo bugi̱ nindxu̱u̱ rí maxnún ganitsu cristianos rí na̱ʼkha̱ náa Dios rí mbaʼñúunʼ índo̱ gáʼni iwáá mbiʼi (Mat. 24:45-47; Luc. 12:42). Ra̱ʼkhá tháán edxu̱lúʼ rí nundrígú i̱yi̱i̱ʼ rí naʼni mújúunʼ mayordomo tsí jmbi ga̱jma̱a̱ naxnáraʼa náa xúgíʼ numbaaʼ mu maʼni gujkhuʼ fe ndrígúlú.