ESTEBAN xtáa náa inún xa̱bu̱ ra̱míjínʼ, náa mbá 71 jueces bi̱ kuwa náa Sanedrín, náa tribunal supremo ndrígóo judío. Ni̱ndxu̱ún tikhun xa̱bekha bi̱ guáʼdáá wéñuʼ numuu náa xuajen. Ndxajkun Caifás niʼthún maguwáʼ, ikhaa má nindxu̱u̱ bi̱ niʼthí rí magíʼnuu Jesús nguáthá gu̱nʼ ginii (Mat. 26:57, 59; Hech. 6:8-12). Mbaʼin testigos nagún mu muthi rí minduwaʼ. Ikhú, índo̱ bi̱ kuwa náa Sanedrín ndiyáá inuu Esteban rí nakujmaa xóo ángel, niguanún tsiánguá (Hech. 6:13-15).

Xú káʼnii niʼngo̱o̱ Esteban matsijnuu rí gamíi wéñuʼ rá. Nákhi xóó tsegun ku̱ya̱a̱ náa Sanedrín, naʼni má xúʼko̱ ñajunʼ dí rígá náa congregación ga̱jma̱a̱ tsiakii rí naxná náa xi̱ʼ kaʼwu ndrígóo Dios (Hech. 6:3-7). Índo̱ nindxa̱ʼwa̱a̱ náa guʼwá ñajunʼ, xi̱ʼ kaʼwu má rúʼko̱ niʼni̱i̱ a̱jkiu̱u̱n ga̱jma̱a̱ niʼni nirmáʼáan a̱jkiu̱u̱n (Juan 14:16). Índo̱ ni̱jkha̱ gáʼthi náa guʼwá ñajunʼ na̱nguá nimiñuu, xó má eʼthí náa capítulo 7 ndrígóo Hechos, xi̱ʼ kaʼwu niʼni marmáʼáan a̱jkiu̱u̱n mbá skíñúʼ rí na̱ʼkha̱ náa Escrituras Hebreas (Juan 14:26). Mú fe ndrígóo Esteban niʼni itháan gújkhuʼ índo̱ ndiʼyoo visión rí Jesús wíji̱ náa ñawún mújúnʼ Dios (Hech. 7:54-56, 59, 60).

Mbáa mangáanʼ maʼga̱nú magíʼnulú xúʼko̱ kaʼnii rí xáʼndun gúyulu ga̱jma̱a̱ muxkulú (Juan 15:20). Á mu naguʼwunlú nuʼnigajmaa má xúʼko̱ Ajngá rawunʼ Dios ga̱jma̱a̱ nuʼtáraʼa má xúʼko̱, muniʼñáʼ rí xi̱ʼ kaʼwu ndrígóo Jeobá marigá náa ikháanʼlu. Ma̱ngaa mundrígúlú tsiakii mu maʼngulú náa xkujndu ga̱jma̱a̱ maʼni rí makuwáanʼ tsímáá xó má nákha ginii (1 Ped. 4:12-14).