1, 2. Xú káʼnii ñajunʼ kiejunʼ nigruigú Josué nda̱wa̱á rí nikháñu Moisés rá.

JOSUÉ xóó narmáʼáan a̱jkiu̱u̱n rí niʼthúu̱n Jeobá: “Xa̱bi̱ʼ Moisés nikháñu, ga̱jma̱a̱ rí xúgi̱ atani rataminaʼ ikháánʼ mu manújngaʼ xtiin xúgínʼ xa̱bu̱ náa mañu Jordán, asndu mi̱dxu̱ʼnú náa ku̱ba̱ʼ rí maxnu̱u̱n e̱ji̱i̱n Israel” (Jos. 1:1, 2). ¡Mbá nacha̱ nixtiʼkhuu xúgíʼ! Josué nimbáyúu Moisés itháan maʼni a̱jma̱ skiñúʼ tsiguʼ, mú xúgi̱ nindxu̱u̱ bi̱ kayá edxu̱u̱ náa xuajen Israel.

² Numuu rí Moisés niyéjkha̱ edxu̱u̱ náa xuajen mba̱yu̱ʼ tsiguʼ, mbáa Josué niraximínáʼ xú káʼnii gákumu̱ún xa̱bu̱ rí ikhaa gáxnún ikha (Deut. 34:8, 10-12). Mbá i̱yi̱i̱ʼ naʼthí ga̱jma̱a̱ numuu Josué 1:1, 2: “Xó má nákha wajyúúʼ ga̱jma̱a̱ xóo rí mbiʼi xúgi̱, índo̱ naxtiʼkhuu mbáa Xa̱bu̱ Ñajunʼ xuajen nánguá wíji̱ gújkhuʼ”.

3, 4. Xú káʼnii eʼyáá rí Josué tajngawa̱a̱n índo̱ nikumu̱u̱ kaʼyoo Dios, ga̱jma̱a̱ káʼnii graxe̱ gándoo gúʼnimíjna̱ rá.

³ Mbáa Josué nimíñuu, ga̱jma̱a̱ nguáthá mbiʼi nigíʼdu̱u̱ niʼni ñajunʼ Jeobá ga̱jma̱a̱ nikumu̱u̱ kaʼyoo (Jos. 1:9-11). Ga̱jma̱a̱ tajngawa̱a̱n índo̱ niʼni rígi̱. Xóo eʼthí náa Biblia, Jeobá nijmiuu mbáa ángel mu maxnúu ikha Josué ga̱jma̱a̱ xuajen Israel. Mbáa ángel  buʼko̱ ninindxu̱u̱ “Ajngáa”, aʼdá giʼnii ndrígóo Dios (Juan 1:1; Éx. 23:20-23).

⁴ Numuu rí Jeobá nimbáñun xuajen Israel, táʼniun mingíjyúuʼ muniñami̱jna̱ maxnún ikha Josué bi̱ nuxi̱ʼ kayá edxu̱u̱. Mangáanʼ kuwáanʼ mbiʼi náa naxtiʼkhuu wéñuʼ xúgíʼ. Ikha jngó, mbáa muraximíjna̱: “Rí xúgi̱ rí xuajñu Jeobá na̱jkha̱ nacha̱ wéñuʼ, lá rígá mbaʼa numuu mu makumulúʼ kuʼyáá Jesús bi̱ kayá edxu̱u̱ ráʼ.” (Atraxnuu Mateo 23:10.) * Guʼyáá xú káʼnii Jeobá nixnúu ikha xuajñu nákha wajyúúʼ nákha nirígá rí nixtiʼkhuu.

5. Tsáa niraʼnuminaʼ ga̱jma̱a̱ Josué náa mijngii Jericó rá. (Atayáá timbá xtiʼkhu.)

⁵ Tájyúuʼ rí índo̱ Israel nikidaa náa mañu Jordán, Josué niraʼnuminaʼ ga̱jma̱a̱ mbáa. Mijngii náa xuajen Jericó, ndiʼyoo mbáa xa̱bu̱ bi̱ kayá mbá espada náa ñawúunʼ. Numuu rí tseʼyoo tsáa nindxu̱u̱, niraxu̱u̱: “Lá xtaa náa ikháanʼxu o náa xa̱bu̱ sia̱nʼ ndrígúxu̱ ráʼ”. Josué niʼniuu tsiánguá rí xa̱bu̱ bugi̱ niʼthúu̱n tsáa nindxu̱u̱. Ninindxu̱u̱ “bi̱ kayá edxu̱u̱ náa ejercito ndrígóo Jeobá”, bi̱ xtáa xawii mu mañewu̱u̱n xuajñu Dios (atraxnuu Josué 5:13-15 ga̱jma̱a̱ náa nota). * Maski ajndu i̱mba̱ níʼkhá naʼthí rí Jeobá ninindxu̱u̱ bi̱ niʼthúu̱n Josué, mú xó má náa i̱ʼwáʼ mbiʼi nijmiuu mbáa ángel mu maʼni rígi̱ (Éx. 3:2-4; Jos. 4:1, 15; 5:2, 9; Hech. 7:38; Gál. 3:19).

6-8. a) Náa numuu nikujmaa rí xáyambáá tikhuu ikha rí nixná Jeobá rá. b) Náa numuu rí niyambáá ga̱jma̱a̱ ninindxu̱u̱ májánʼ ikha rúʼko̱ rá. (Atayáá ma̱ngaa nota).

⁶ Josué nigruigú ikha kaʼwu ga̱jma̱a̱ numuu rí xú káʼnii gáto̱ʼo̱o̱ náa xuajen Jericó. Mbáa nákha ginii ikhaa tákro̱ʼo̱o̱ májánʼ tikhuu ikha. Mbá xkri̱da, Dios niʼtáñajunʼ rí murujtu xtóo xuñúnʼ xúgínʼ xa̱bekha. Ikhaa rígi̱ gáʼni rí ikhiin xándoo muxmijná mba̱yu̱ʼ mbiʼi. Lá májánʼ gáʼni rí ikhú murujtu xtóo xuñúnʼ xáʼ. (Gén. 34:24, 25; Jos. 5:2, 8.)

⁷ Mbáa soldados buʼko̱ niraximíjna̱ xú káʼnii guñewu̱u̱n bi̱ kuwa náa guʼwún á mu xa̱bu̱ sia̱nʼ nuxmijná gajmiún. Mú xa̱bu̱ bi̱ kuwa náa Jericó tuxmijná gajmiún, rí phú nini, nimiñun. Náa Biblia naʼthí: “Jericó kúgoo xa̱ʼ ga̱jma̱a̱ numún israelitas. Nimbáa na̱nguá xóo mato̱ʼo̱o̱ ni má magajnúu” (Jos. 6:1). Rígi̱ niʼni rí israelitas makumún kuyáá itháan Jeobá ga̱jma̱a̱ ikha rí nixnúún.

⁸ Ma̱ngaa Jeobá niʼthún rí xuxmijná gajmiún xa̱bu̱ Jericó. Niʼthún rí magún náa mbájndi xuajen mbá miʼtsú rí mbá mbiʼi mbá juwan mbiʼi ga̱jma̱a̱ juwan nuthu rí juwan mbiʼi. Mbáa soldados nikumu̱ún rí nandáti̱ga̱ wéñuʼ mbiʼi ga̱jma̱a̱ tsiakii. Mú Jeobá, bi̱ Kayá edxu̱u̱ náa Israel, ndiʼyoo májánʼ rí xtáa raʼni. Rí muni xóo awan rí niríyaʼ ikhaa nimbáñun israelitas mu matu̱ʼu̱u̱n náa xuajen ga̱jma̱a̱ niʼni maguaʼdáá itháan fe. Ma̱ngaa, niʼni káwíin mu xuxmijná gajmiún soldados ndrígóo Jericó bi̱ guáʼdáá wéñuʼ tsiakii (Jos. 6:2-5; Heb. 11:30). *

9. Náa numuu rí gíʼmáanʼ muʼnimbánii ikha rí nundrígú náa xuajñu Dios rá. Araxná mbá xkri̱da.

⁹ Ndiéjunʼ eʼsngúlúʼ rígi̱ rá. Mbáa marigá mbiʼi rí xákru̱ʼu̱lú náa numuu rí xuajñu  Jeobá naraʼwíí tikhuu rí maʼni. Mbá xkri̱da, mbáa nákha ginii tánigulú majmulúʼ ajua̱nʼ xóo celular o mbá tableta índo̱ muʼnigajmaa ndajkuáanʼ, náa nuʼtáraʼa ga̱jma̱a̱ náa nagimbáanʼ. Mú rí xúgi̱ nduʼyáá xóo embáyulú rí majmúlú á mu nandoo muguaʼdáá mbóo. Ikha jngó maski ajndu nguáná tsekru̱ʼu̱lú májánʼ rí muʼni, guʼnimbánii ikha rí naxná xuajñu Dios. Índo̱ nduʼyáá xú káʼnii embáyulú rí naxtiʼkhuu, fe ndrígúlú naʼni itháan gújkhuʼ ga̱jma̱a̱ nakuwáanʼ itháan jnduʼ.

10. Tsáa nixná ikha náa reunión rí gíʼdoo numuu rí niguáʼdáá cuerpo gobernante náa Jerusalén rá.

¹⁰ Mbá gu̱wa̱ʼ i̱jtsu̱ tsiguʼ nda̱wa̱á rí ninindxu̱u̱ cristiano Cornelio, mbáa bi̱ na̱nguá nindxu̱u̱ judío, tikhun cristianos judíos xóó nuthi rí muthu mbájndi xtóo xuñúnʼ xa̱bekha (Hech. 15:1, 2). Índo̱ nirígá mbá xkujndu ga̱jma̱a̱ numuu rígi̱ náa Antioquía, nitháán Pablo rí maʼga̱ náa Jerusalén mu maʼthí rígi̱ náa cuerpo gobernante. Mú tsáa exná ikha náa xkujndu rígi̱ rá. Pablo niʼthí rí ni̱jkha̱ ‹numuu dí nirígá mbá rí ndiʼyoo›. Nakujmaa kaʼwu rí Cristo niríyaʼ awan rí cuerpo gobernante maʼnimbánuu xkujndu (Gál. 2:1-3).

11. a) Ndiéjunʼ nindxa̱ʼwa̱míjna̱ má xúʼko̱ mbaʼin cristianos judíos ga̱jma̱a̱ numuu rí muthu mbájndi xtóo xuñúnʼ rá. b) Xú káʼnii nimbáñun Pablo bi̱ kuya̱ edxu̱u̱ náa Jerusalén rá. (Atayáá ma̱ngaa nota.)

¹¹ Ga̱jma̱a̱ ikha ndrígóo Cristo, cuerpo gobernante niniñuʼ kaʼwu rí cristianos bi̱ na̱nguá ni̱ndxu̱ún judíos na̱nguá xóo magumiin tsiakii mu muthu mbájndi xtóo xuñúnʼ (Hech. 15:19, 20). Mú mba̱yu̱ʼ tsiguʼ nda̱wa̱á mbaʼin cristianos judíos nurujtu mbájndi xtóo xuñúnʼ e̱jñún. Ikhú, índo̱ bi̱ kuya̱ edxu̱u̱ náa Jerusalén nidxawíín rí Pablo na̱nguá eʼnimbánuu Xtángoo ndrígóo Moisés, nitháán rí maʼni mbá rí tági̱ʼthu̱u̱n (Hech. 21:20-26). * Gíʼmaa maʼga̱ kagu̱u̱n mbá a̱jkhu̱u̱n xa̱bekha mu muni kaʼwumijná ga̱jma̱a̱ rí xa̱bu̱ mbuyáá rí ikhaa naʼnimbánuu má xúʼko̱ “Xtángoo”. Pablo ma̱ndoo maʼthí dí rúʼko̱ na̱nguá nindxu̱u̱ májánʼ ga̱jma̱a̱ rí cristianos judíos tsekru̱ʼu̱u̱n májánʼ ga̱jma̱a̱ numuu rí muthu mbájndi xtóo xuñúnʼ. Mú táʼni rígi̱,  rí niʼni, niʼnimbo̱o̱ rí ninda̱ʼa̱ maʼni bi̱ kuya̱ edxu̱u̱ mu xúʼko̱ makuwa mbá jnduʼ cristianos. Mbáa xúgi̱ nuraximíjna̱lú: “Á mu nijmangudi̱i̱ Xtángoo índo̱ Jesús nikháñu, náa numuu rí niniñuʼ mambanúu mba̱yu̱ʼ tsiguʼ xá.” (Col. 2:13, 14.)

12. Náa numuu rí Cristo niniñuʼ manújngoo mba̱yu̱ʼ mbiʼi mu maʼnimbánuu xkujndu ga̱jma̱a̱ numuu rí muthu mbájndi xtóo xuñúnʼ xá.

¹² Tikhun cristianos nda̱ñúnʼ mba̱yu̱ʼ tsiguʼ mu maguʼwún ga̱jma̱a̱ numuu mbá nuxi̱ʼ rí najuiʼthá o ga̱jma̱a̱ numuu mbá rí nuʼnimbulúʼ. Cristianos judíos ndiyóoʼ mba̱yu̱ʼ tsiguʼ mu muriʼkhuíí xóo endxaʼwamíjna̱ ga̱jma̱a̱ numuu rí muthu mbájndi xtóo xuñúnʼ (Juan 16:12). Tikhun na̱nguá nindúún gúnimbu̱ún dí rígi̱ na̱nguá eyóoʼ muni mu mambaxúún májánʼ gajmiún Dios (Gén. 17:9-12). Eʼwíínʼ nimiñun rí majuixkhún náa xuajñún numuu rí ni̱ndxu̱ún mixtiʼkun (Gál. 6:12). Mú nda̱wa̱á Cristo nixná itháan ikha náa cartas rí niʼnirámáʼ Pablo ga̱jma̱a̱ xi̱ʼ kaʼwu (Rom. 2:28, 29; Gál. 3:23-25).

13. Ndiéjunʼ embáyulú rí muyambáá náa ikha rí naxná Cristo rí mbiʼi xúgi̱ rá.

¹³ Índo̱ tsekru̱ʼu̱lú náa numuu rí náa organización narígá rí naxtiʼkhuu, májánʼ gáʼni rí mundxaʼwamíjna̱ xú káʼnii Cristo nixnúún ikha xa̱bi̱i̱ Dios nákha wajyúúʼ. Xó má mbiʼi rí nixtáa Josué ga̱jma̱a̱ náa siglo timbá, nixnúún ikha xúgíʼ mbiʼi, maʼni maguaʼdáá itháan fe ga̱jma̱a̱ rí makuwa jnduʼ (Heb. 13:8).

14-16. Xú káʼnii esngájma ikha ndrígóo Cristo rí naxná “ñumba tsi jmbi, tsi majan indxaʼhuaminaʼ” bi̱ naxmiéjunʼ mu maxnúlúʼ rí ndayúlú ga̱jma̱a̱ numuu Dios rá.

¹⁴ “Ñumba tsi jmbi, tsi majan indxaʼhuaminaʼ” naxnúlú ikha náa mbiʼi rí kaʼyoo (Mat. 24:45). Rígi̱ nasngájma ngajua ndrígóo Jesús ga̱jma̱a̱ xóo exmiéjunʼ kaʼyulú nandoo rí mambaxúlúʼ májánʼ gajmiúlú Jeobá. Marc, bi̱ gíʼdiin mbá a̱jkhu̱u̱n e̱ji̱i̱n, naʼthí: “Satanás nagíʼ naʼni guabaaʼ congregación índo̱ nagrui̱ga̱ xkujndu náa bi̱ kuwa náa mbá guʼwíin. Xúgi̱ najuiʼtúlú rí muʼnigajmaa mbá guʼwáanʼ xúgíʼ xmáná. Kaʼwu nindxu̱u̱ ajngáa rígi̱ náa bi̱ kuya̱ edxu̱u̱ náa mbá guʼwíin: Guñewu̱u̱n bi̱ kuwa náa guʼwála”.

¹⁵ Índo̱ nduʼyáá ikha ndrígóo Cristo, nduʼyáá rí nandoo mambáyulúʼ mu muguaʼdáá mbá fe gújkhuʼ. Mbáa bi̱ kayá edxu̱u̱ bi̱ mbiʼyuu Patrick naʼthí: “Nákha ginii tikhun na̱nguá eñún gugimbíin náa grupo ma̱jkha̱ʼ mu mutaraʼa índo̱ námbáa xmáná. Mú rígi̱ naʼni magajnuriyoʼ mbá cualidad ndrígóo Jesús rí phú ikhaa: Rí naxmiéjunʼ kaʼñún xa̱bu̱ guabiinʼ. A̱ngiu̱lú bi̱ namiñun bi̱ tsegájnun wéñuʼ gutaraʼa, rí xúgi̱ nakumu̱ún rí guáʼdáá numún ga̱jma̱a̱ rí nandoo nuyambáá. Rígi̱ naʼni rí makuwa runi itháan ñajunʼ Jeobá”.

¹⁶ Cristo raʼkháa i̱ndó naxnúlú rí ndayúlú ga̱jma̱a̱ numuu Dios. Ma̱ngaa nambáyulúʼ mu makuwáanʼ ru̱ʼni̱ ñajunʼ rí itháan gíʼdoo numuu rí mbiʼi xúgi̱ (atraxnuu Marcos 13:10). * André nindxu̱u̱ mbáa bi̱ ndiʼkhún kayá edxu̱u̱ bi̱ xtáa xawii náa ikha nuxi̱ʼ rí naxná xuajñu Dios. Ikhaa naʼthí: “Rí na̱jkha̱ raʼni nguéjmi̱i̱n a̱ngiu̱lú bi̱ kuwa náa sucursal naʼni mbuʼyáá rí kuwáanʼ náa iwáá mbiʼi ga̱jma̱a̱ rí gíʼmaa muʼtáraʼa má xúʼko̱”.

17, 18. Náa numuu rí gíʼmaa mundxaʼwáá edxu̱lúʼ xú káʼnii embáyulú rí na̱jkha̱ raxtiʼkhuu rá.

¹⁷ Ikha rí naxnúlú Cristo, bi̱ nindxu̱u̱ Rey ndrígúlú, nambáyulúʼ xúgi̱ ga̱jma̱a̱ nda̱wa̱á. Ikha jngó, gíʼmaa maʼdxulú xú káʼnii gambáyulú rí naxtiʼkhuu. Náa numuu rí tséʼyaa índo̱ nuʼnigajmaa mbá guʼwáanʼ rí xóo narígá náa reunión ga̱jma̱a̱ náa nutaráʼa ma̱ngaa xú káʼnii gándoo mambáyulúʼ rígi̱ rá. Rígi̱ ma̱ndoo maxnúlúʼ tsiakii.

 ¹⁸ Á mu nduʼyáá xi̱ʼ dí rígá náa ikha rí nundrígú náa xuajñu Jeobá ga̱jma̱a̱ nuʼnimbulúʼ, mambáyulúʼ wéñuʼ. Gajkhun rí nadxulú índo̱ nduʼyáá rí najmaa májánʼ mbújkha̱a̱ índo̱ nagájnuu nguáthá i̱yi̱i̱ʼ. Núma̱aʼ ga̱jma̱a̱ numuu ajua̱nʼ rí nagájnuu xúgi̱ nandoo nagumaa mbaʼa ñajunʼ mu miʼtáruʼun mbaʼin xa̱bu̱. Ikha jngó, náa numuu rí tséndrigú itháan i̱yi̱i̱ʼ náa celular ga̱jma̱a̱ náa tableta ma̱ngaa náa multimedia á mu nandoo rá. Á mu nuʼni xúʼko̱ musngájma gamajkhu náa Jesús á mu najmulú májánʼ rí naxná xuajñu Jeobá.

19. Náa numuu gíʼmaa muʼnimbulúʼ náa ikha ndrígóo Cristo rá.

¹⁹ Á mu nuʼnimbánii ga̱jma̱a̱ xúgíʼ a̱jkiu̱lú ikha rí naxná Cristo maʼni itháan gújkhuʼ fe ndrígúlú ga̱jma̱a̱ makuwáanʼ mbó jnduʼ gajmiúlú a̱ngiu̱lú. André, bi̱ niʼthálú ga̱jma̱a̱ numuu nákha ginii, niʼthí xú káʼnii niʼni nguéjmi̱i̱n bi̱ kuwa náa Betel dí rígá náa xúgíʼ numbaaʼ: “Índo̱ nda̱yo̱o̱ xú káʼnii eʼwíínʼ nundrígú índo̱ rígá rí naxtiʼkhuu naʼni rí maku̱mu̱ʼ ka̱ñu̱u̱n ga̱jma̱a̱ mbayamajkún. Kuwa gagi ga̱jma̱a̱ asndu náa biʼyaa má ñajunʼ rí nuni ga̱jma̱a̱ xúʼko̱ nagún nacha̱ náa kidxuuʼ carro ndrígóo Jeobá”.

20, 21. a) Náa numuu rí ndayóoʼ makumulúʼ kuʼyáá Cristo, bi̱ Kayá edxu̱u̱ náa ikháanʼlu rá. b) Ndiéjunʼ rí gajmañulú náa i̱mba̱ artículo rá.

²⁰ Inu má, Jesucristo, bi̱ Kayá edxu̱u̱ náa ikháanʼlu, magajnúu “gaxmínaʼ” ga̱jma̱a̱ maʼni rí mitsaan wéñuʼ (Rev. 6:2; Sal. 45:4). Ikha jngó, xtáa raʼniratúún xa̱bi̱i̱ Dios mu makuwa náa numbaaʼ nuxi̱ʼ ga̱jma̱a̱ ñajunʼ rí marigá, ga̱jma̱a̱ mámbáa rí ikháanʼ muʼsngúún bi̱ magabiín ma̱ngaa muñambáá mu maʼni̱i̱ mitsaan Ku̱ba̱ʼ.

²¹ Rey ndrígúlú maxnúlúʼ mbá Ku̱ba̱ʼ nuxi̱ʼ, á mu nakumulú kuʼyáá má xúʼko̱, tséʼniuu asndu xú káʼnii má rí gárígá (atraxnuu Salmo 46:1). * Gajkhun, mbáa nguáná maʼniuluʼ mingíjyúuʼ maguʼunlú muni ñajunʼ rí najuixnúlú, itháan índo̱ náa vida ndrígúlú na̱ʼkha̱nú rí na̱nguá kuaʼti̱i̱nlú. Xú káʼnii gándoo gúʼni mu marigá rí tsímáá náa ikháanʼlu ga̱jma̱a̱ rí makumulúʼ kuʼyáa Jeobá rá. Rúʼko̱ gúʼyáá náa i̱mba̱ artículo.