1, 2. a) Ndiéjunʼ ñajunʼ niʼni Jesús, ga̱jma̱a̱ náa numuu rá. b) Ndiéjunʼ gíʼmáanʼ muʼni mu mumbáyii Dios rá.

JESUCRISTO niʼtóo ixi̱ ga̱jma̱a̱ niʼsngáa ajngáa rí májánʼ (Mar. 6:3; Rom. 15:8). Nájma̱ ñajunʼ rígi̱ niʼni májánʼ wéñuʼ. Nijmañuu majmuu herramientas rí najmuu mbáa bi̱ naʼtóo ixi̱ mu maʼni mbaʼa ñajunʼ ga̱jma̱a̱ xajpa. Ga̱jma̱a̱ nijmuu májánʼ rí najmañuu náa Escrituras mu mambáñun xa̱bu̱ muniʼnuʼ Ajngá rawunʼ Dios (Mat. 7:28; Luc. 24:32, 45). Índo̱ nigiʼdoo 30 tsiguuʼ, niniñuʼ raʼtóo ixi̱ mu maxnáximinaʼ maʼthúún xa̱bu̱ ga̱jma̱a̱ numuu Reino. Ndiʼyoo rí ñajunʼ rúʼko̱ gíʼdoo wéñuʼ numuu, ikhaa niʼthí rí Dios nikuʼmaa náa tsu̱du̱u̱ Ku̱ba̱ʼ ga̱jma̱a̱ numuu rúʼko̱ (Mat. 20:28; Luc. 3:23; 4:43). Ikhaa nigíʼ ginii rí maʼtáraʼa ga̱jma̱a̱ nindoo rí eʼwíínʼ muni ikháá kayúʼ (Mat. 9:35-38).

² Mbaʼánʼ rí ikháanʼ na̱nguá eʼtáá ixi̱, mú xúgiáanʼ nuʼsngáa ajngáa rí májánʼ. Ñajunʼ rígi̱ gíʼdoo wéñuʼ numuu rí asndu Dios naʼni rígi̱. Náa Biblia naʼthí rí “numbáyii Dios” (1 Cor. 3:9; 2 Cor. 6:4). Ikháanʼ nduʼyáá rí Biblia nigumaraʼmáʼ mu miʼsngúún xa̱bu̱ rí gajkhun ga̱jma̱a̱ numuu Dios (Sal. 119:159, 160). Ikha jngó, nuʼgíʼ majmulúʼ májánʼ “ajngá rawunʼ xóo phú gíʼmaa” índo̱ nuʼtáraʼa (atraxnuu 2 Timoteo 2:15). * Ikha jngó gíʼmaa majmañulúʼ majmulúʼ itháan májánʼ Biblia, rí nindxu̱u̱ mbá herramienta rí phú ikhaa mu muʼsngáa rí gajkhun  ga̱jma̱a̱ numuu Jeobá, Jesús ga̱jma̱a̱ Reino. Mú muʼni májánʼ ñajunʼ rígi̱ Jeobá niraʼwíí i̱ʼwáʼ herramientas rí gíʼmáanʼ muniʼnúʼ májánʼ ga̱jma̱a̱ na̱ʼkha̱ náa rí nuxnambíʼilu caja ndrígóo herramientas mu muʼsngáa.

3. a) Ndiéjunʼ gíʼmaa muʼni mbiʼi rí gájyúuʼ numbaaʼ rígi̱ rá. b) ga̱jma̱a̱ xóo eʼthí náa Hechos 13:48, tsíin gíʼmaa mbuʼñíinʼ rá.

³ Mbáa nuraximíjna̱ náa numuu rí nagumbiʼyuu caja ndrígóo herramientas mu muʼsngáa ga̱jma̱a̱ raʼkháa caja ndrígóo herramientas mu muʼtáraʼa. Numuu rí índo̱ nuʼtáraʼa nuʼthá ga̱jma̱a̱ ajngáa. Mú índo̱ nuʼthá ga̱jma̱a̱ numuu rí muʼsngáa, nuʼthá xóo nindxu̱u̱ ajngáa mu xa̱bu̱ makro̱ʼo̱o̱ ga̱jma̱a̱ maxkajxi̱i̱ maʼnimbánuu rí najmañuu. Mbiʼi rí gájyúuʼ numbaaʼ rígi̱, gíʼmaa muʼgíʼ muʼsngúún xa̱bu̱ ga̱jma̱a̱ numuu Biblia ga̱jma̱a̱ muʼsngáa rí gajkhun. Rígi̱ ma̱ngaa nandoo gáʼthúu̱n rí mbuʼñíinʼ májánʼ bi̱ nandún makuwá kámuu mbiʼi ga̱jma̱a̱ mumbáñuun mani̱ndxu̱ún xa̱bi̱i̱ Jeobá (atraxnuu Hechos 13:44-48). *

4. Xú káʼnii gándoo gúxkamiin “bi̱ nandún makuwá kámuu” rá.

⁴ Xú káʼnii gándoo gúxkamiin “bi̱ nandún makuwá kámuu” rá. Xó má nákha siglo timbá, i̱ndó ma̱ndoo á mu nuʼtáraʼa. Ikha jngó, gíʼmaa muʼnimbánii ikha ndrígóo Jesús: “Asndu náa má xuajen mba̱a̱ o xuajen chíʼgíʼ náa gáta̱ʼa̱la, guʼyááʼ asndu náa muxkamaa tsáa kaʼyoo” (Mat. 10:11). Nduʼyáá rí xa̱bu̱ bi̱ tsénigunʼ xundrigú ajngáa rí májánʼ, bi̱ nuni mbaʼumíjna̱ o bi̱ tséyááʼ mbuyáá ga̱jma̱a̱ numuu Dios. Guʼñíínʼ xa̱bu̱ bi̱ nanigu̱nʼ ga̱jma̱a̱ bi̱ guabiinʼ, ga̱jma̱a̱ bi̱ nandún mbuyáá rí gajkhun. Guʼgíʼ mbá xkri̱da. Índo̱ Jesús niʼtóo ixi̱, mbáa ndiyááʼ xajpa rí májánʼ mu maʼni muebles, xkrugua ga̱jma̱a̱ yoko. Índo̱ naxkamaa najmuu májánʼ herramientas ndrígóo mu maʼni xúgíʼ rígi̱. Mangáanʼ gíʼmáanʼ muʼni ikháá kayúʼ: Timbá, mbuʼñíinʼ xa̱bu̱ bi̱ májánʼ a̱jkiu̱ún, ga̱jma̱a̱ ikhú majmulúʼ májánʼ herramientas mu muʼsngúún xa̱bu̱ (Mat. 28:19, 20).

5. Gajmaaʼ mbá xkri̱da mu maratha ndiéjunʼ gíʼmaa mbuʼyáá ga̱jma̱a̱ numuu mámbá herramienta rí najmulú mu muʼsngáa (atayáá timbá xtiʼkhu).

⁵ Mámbá herramienta naʼni mixtiʼkhu ñajunʼ. Mbá xkri̱da, gundxaʼwamíjna̱ rí nijmuu Jesús nákha niʼtóo ixi̱ *. Tikhuu nijmaa mu muñéwan xajpa; i̱ʼwáʼ mu muni iñúnʼ o mutáá, ga̱jma̱a̱ i̱ʼwáʼ, mu muni mbánii, mu maʼni jmbu ga̱jma̱a̱ muruwa̱a̱. Xúʼko̱ má, mámbá herramienta rí najmulú mu muʼsngáa gíʼdoo mámbá rí maʼni. Numuu rí xúgíʼ gíʼdoo numuu, mbuʼyáá xú káʼnii gándoo gájmulúʼ.

6, 7. a) Xú káʼnii ejmaaʼ tarjetas náa naʼthí tsíin ni̱ndxu̱lú rá. b) Xú káʼnii a̱jma̱ numuu ejmaa invitación ndrígóo reunión náa congregación rá.

⁶ Tarjetas náa naʼthí tsíin ni̱ndxu̱ún xa̱bi̱i̱ Jeobá. Herramientas rígi̱ ma̱jkha̱ʼ nindxu̱u̱, mú nayambáá mu muʼthúún xa̱bu̱ tsíin ni̱ndxu̱lú ga̱jma̱a̱ muʼthúún rí matu̱ʼu̱u̱n náa ináa ndrígúlú náa Internet. Ikhí ma̱ndoo muxkamaa náa naʼthí itháan ga̱jma̱a̱ numulúʼ ga̱jma̱a̱ munda̱ʼa̱ rí majuiʼsngúún ga̱jma̱a̱ numuu Biblia. Asndu xúgi̱, itháan rí 400 mil xa̱bu̱ nunda̱ʼa̱ náa jw.org rí miʼsngúún ga̱jma̱a̱ numuu Biblia. ¡Ga̱jma̱a̱ mámbá mbiʼi mbaʼin wéñuʼ xa̱bu̱ nunda̱ʼa̱ rígi̱! Náa numuu rí tsiyejkua tikhuu tarjetas náa na̱jkua̱lú rá. Xúʼko̱ ma̱ndoo muʼthúún xa̱bu̱ asndu náa má ejkua̱ o asndu náa má rí nuʼni.

 ⁷ Invitación. Invitación ndrígóo reunión náa congregación najmaa ga̱jma̱a̱ a̱jma̱ numuu. Naʼthúu̱n xa̱bu̱: “Nutha̱nʼ matanigajmaa Biblia gajmiáanʼ xa̱bi̱i̱ Jeobá”. Nda̱wa̱á najuiʼthán rí ma̱ndoo maʼga̱ náa nagimbáanʼ o musngáá náa goʼwóo. Raʼkháa i̱ndó herramienta rígi̱ najmaa mu maʼthí tsáa ni̱ndxu̱lú, ma̱ngaa mu muʼthúún bi̱ “ndañúnʼ mbuyáaʼ Dios” rí munigajmaa Biblia gajmiúlú (Mat. 5:3). Nundrígúun xúgínʼ xa̱bu̱ náa nagimbáanʼ, maski ajndu xóó tsejuiʼsngúún ga̱jma̱a̱ numuu Biblia. Á mu nagún ikhí, mbuyáá nguáthá gándoo gajmañún ga̱jma̱a̱ numuu Biblia.

8. Ndíjkha gíʼdoo numuu rí xa̱bu̱ magún náa nagimbáanʼ maski ajndu mbá miʼtsú rá. Araxná mbá xkri̱da.

⁸ Gíʼdoo numuu muʼthúún xa̱bu̱ rí magún náa nagimbáanʼ maski ajndu mbá miʼtsú. Náa numuu rá. Numuu rí xúʼko̱ mbuyáá rí bi̱ ni̱ndxu̱lú xa̱bi̱i̱ Jeobá nuʼsngáa rí gajkhun ga̱jma̱a̱ numuu Biblia ga̱jma̱a̱ numbáñuun xa̱bu̱ muniʼniiʼ Dios rí tseni náa religión dí ragájkhun (Is. 65:13). Rúʼko̱ rí niguáʼnii Ray ga̱jma̱a̱ Linda nákha nguáthá tsiguʼ kidíiʼ, xa̱bu̱ gajmii bi̱ kuwa náa Estados Unidos. Nunimbu̱ún kuyáá Dios ga̱jma̱a̱ nikumu̱ún rí nda̱ñúnʼ magún náa mbá guʼwá ndxájkun mu muniʼniiʼ májánʼ. Ikha jngó nithi magún náa mámbá guʼwá ndxájkun dí rígá náa xuajñún. Rígá mbaʼa wéñuʼ guʼwá ndxájkun ga̱jma̱a̱ religión. Asndu nákha ginii, niraʼwi̱i̱ maguanún náa mbá guʼwá ndxájun á mu rígá a̱jma̱ numuu. Timbá, rí gíʼmaa majmañún rí gagimbíin ikhí. Raga̱jma̱, rí májánʼ gáʼni xtíñún bi̱ nagún ikhí, gíʼmaa maʼni xóo bi̱ nuthi rí nuni ñajunʼ Dios. Nda̱wa̱á rí ninújngoo mba̱yu̱ʼ tsiguʼ, nigún náa mbaʼa guʼwá ndxájkun náa xuajen rúʼko̱ ga̱jma̱a̱ nikuwa gíná numuu rí nda̱a̱ rí nijmañún ga̱jma̱a̱ rí xtíñún bi̱ nagún ikhú na̱nguá májánʼ nindxu̱u̱. Índo̱ nigájni̱i̱n náa iwáá guʼwá ndxájkun rí kama náa lista ndrígu̱ún, Linda ni̱jkha̱a̱ gáñajunʼ ga̱jma̱a̱ Ray nitanga̱a̱ goʼwóo. Índo̱ xtáa rajkha̱a̱ kamba̱a̱, ikhaa ninújngoo náa gíʼ mbá Guʼwá nagimbáanʼ ga̱jma̱a̱ nindxa̱ʼwáminaʼ: “Náa numuu rí tséto̱ʼo̱ʼ mu mba̱yo̱o̱ rí eni xá.” Ikhaa niniguʼ wéñuʼ. Xúgínʼ ninindxu̱ún míjínʼ xa̱bu̱ ga̱jma̱a̱ májánʼ xtíñún. Ray nigi̱ʼi̱ asndu inuu ga̱jma̱a̱ niniguʼ wéñuʼ rí nijmañuu. Ninindxu̱u̱ xóo niʼthí apóstol Pablo ga̱jma̱a̱ numuu xa̱bu̱ bi̱ na̱jkha̱ timbá miʼtsú náa mbá reunión ga̱jma̱a̱ naʼthí: “Dios xtáa náa ikháanʼla” (1 Cor. 14:23-25). Asndu nákha ikhú, Ray nigíʼdu̱u̱ ni̱jkha̱ náa nagimbáanʼ mámbá domingo ga̱jma̱a̱ nda̱wa̱á ni̱jkha̱ reunión rí narígá i̱ʼwáʼ mbiʼi. Nda̱wa̱á ni̱jkha̱ ga̱jma̱a̱ Linda. Ga̱jma̱a̱ ikhiin nindúún miʼsngúún ga̱jma̱a̱ numuu Biblia ma̱ngaa nijngún iyááʼ maski ajndu guáʼdáá mbá ajtsú skíñúʼ gu̱wa̱ʼ tsigúnʼ.

9, 10. a) Náa numuu dí ra̱mingíjyúuʼ majmulúʼ tratados rá. b) Arathá xú káʼnii gándoo gájmulúʼ tratado Ndiéjunʼ nindxu̱u̱ Reino ndrígóo Dios rá.

⁹ Tratados. Kuaʼdáálu mbá migiñuʼ tratados, rí na̱nguá nindxu̱u̱ mingíjyúuʼ ga̱jma̱a̱ nayambáá mu mugíʼdi̱i̱ muʼtámíjná gajmiúlú xa̱bu̱. Asndu nákha nigi̱ʼdu̱u̱ nigájnuu, nákha tsiguʼ 2013, nigájnuu mbá witsu mil millón i̱yi̱i̱ʼ. Á mu najmañulúʼ majmulúʼ mbóʼ, nduʼyáá xú káʼnii gájmulúʼ i̱ʼwáʼ, numuu rí mbríguu nindxu̱u̱ xúgíʼ. Xú káʼnii gándoo gájmulúʼ mu mugíʼdi̱i̱ muʼtámíjná gajmiúlú xa̱bu̱ rá.

¹⁰ Guʼthá rí nandulúʼ majmulúʼ tratado Ndiéjunʼ nindxu̱u̱ Reino ndrígóo Dios rá. Ma̱ndoo musngájmaa xa̱bu̱ inuu i̱yi̱i̱ʼ ga̱jma̱a̱ muʼtháán: “Lá nitraximínaʼ mbá miʼtsú ndiéjunʼ nindxu̱u̱ Reino ndrígóo Dios ráʼ. Náa rí ajtsú enii rígi̱ gárata rí nindxu̱u̱ májánʼ rá.” Xúʼtháán á mu niriʼña májánʼ o na̱nguá, ganújngulú náa imbo̱o̱ ináa, gusngájmaa sección “Rí e̱ʼkha̱ raʼthí náa Biblia” ga̱jma̱a̱ guraxnuu Daniel 2:44 ga̱jma̱a̱ Isaías 9:6, rí kama má ikhí. Á mu nandoo guʼtháán xóó xa̱bu̱. Nda̱wa̱á kayuʼ gusngajmáá graxe̱ rí kama kidxuuʼ i̱yi̱i̱ʼ, náa kayá edxu̱u̱ “Atraxi̱mínáʼ”: “Xóo gákuwáanʼ índo̱ gáxtáa raʼtáñajunʼ Reino ndrígóo Dios rá.” Xúʼko̱ ma̱ndoo muniʼñáʼ mbá graxe̱ mu ma̱ndoo muʼtámíjná gajmiúlú xa̱bu̱ imbo̱o̱ mbiʼi. Índo̱ gagutangáanʼlu mu muʼtámíjná gajmiúlú  xa̱bu̱, ma̱ndoo musngajmáá níʼkhóo 7 náa folleto Ajngáa rí májánʼ na̱ʼkha̱ náa Dios, rí nindxu̱u̱ mbá herramienta mu mugíʼdi̱i̱ muʼsngáa ga̱jma̱a̱ numuu Biblia.

11. Náa numuu kiʼni revistas ndrígúlú, ga̱jma̱a̱ ndiéjunʼ eyóoʼ mbuʼyáá náa mámbá rígi̱ rá.

¹¹ Revistas. Bi̱ Nayejngoo ga̱jma̱a̱ ¡Despertad! nindxu̱u̱ revistas rí itháan najuiʼtájuíi ga̱jma̱a̱ rí naguiʼtaraʼaa náa xúgíʼ numbaaʼ. Numuu rí nagixnuu náa mbaʼa xuajen mba̱ʼu̱, rí kayá edxu̱u̱ náa inuu i̱yi̱i̱ʼ nuraʼwíí mu manigu̱nʼ xa̱bu̱ bi̱ kuwa náa xúgíʼ numbaaʼ. Gíʼmáanʼ majmulúʼ mu muʼni rí xa̱bu̱ maʼndún majmañún rí itháan gíʼdoo numuu rí mbiʼi xúgi̱. Mu muniʼñáʼ náa xa̱bu̱ bi̱ naniguʼ, gíʼmáanʼ mbuʼyáá tsáa inuu ejkha̱ mámbá revista.

12. a) Tsíin ejkha̱ inún revista ¡Despertad!, ga̱jma̱a̱ náa numuu eguma rá. b) Xú káʼnii nindxu̱u̱ experiencia rí niraʼdáá ikháánʼ ga̱jma̱a̱ herramienta rígi̱ rá.

¹² Revista ¡Despertad! * kiʼni mu muraxnuu xa̱bu̱ bi̱ nduyáá mbá chíʼgíʼ ga̱jma̱a̱ numuu Biblia o bi̱ tséyáá kañúnʼ. Mbáa tséyáá rí naʼsngáa náa Biblia, o tsénimbu̱ún kuyáá májánʼ religión o tséyáá á mu náa Biblia na̱ʼkha̱ mbaʼa xtágabu májánʼ rí mambáñun náa vida ndrígu̱ún. Revista rígi̱ niguma ga̱jma̱a̱ mbá numuu, rí mu̱ʼni̱ rí xa̱bu̱ maʼnimbo̱o̱ rí xtáa Dios (Rom. 1:20; Heb. 11:6). Ma̱ngaa nagíʼ mambáyúu mu maʼnimbo̱o̱ rí Biblia nindxu̱u̱ Ajngá rawunʼ Dios (1 Tes. 2:13). Nájtsu rí kayá edxu̱u̱ rí na̱ʼkha̱ náa tsiguʼ 2018 nindxu̱u̱ “El camino de la felicidad”, “12 claves para una familia feliz” ga̱jma̱a̱ “Ayuda para quienes están de duelo”.

13. a) Revista bi̱ Nayejngoo rí na̱jkha̱ náa inún xa̱bu̱, náa numuu jngó niguma rígi̱ rá. b) Ndiéjunʼ májánʼ experiencias niraʼdáá ikháánʼ xíkhoo ga̱jma̱a̱ herramienta rígi̱ rá.

¹³ Revista Bi̱ Nayejngoo rí na̱jkha̱ náa inún xa̱bu̱ naʼthúún rí naʼsngáa náa Biblia, xa̱bu̱ bi̱ nduyamajkuíí Dios ga̱jma̱a̱ Ajngá rawunʼ. Mbá guáʼdáá mbá chíʼgíʼ ku̱ma̱ ga̱jma̱a̱ numuu Biblia, mú tsíkru̱ʼu̱u̱n májánʼ rí naʼsngáa (Rom. 10:2; 1 Tim. 2:3, 4). Nájtsu edxu̱u̱ rí tsiguʼ rígi̱ 2018 nariʼña̱a̱ graxe̱ rígi̱: “Lá xóó nayambáá Biblia rí mbiʼi xúgi̱ ráʼ.” “Ndiéjunʼ kuaʼti̱i̱n marigá nda̱wa̱á rá.”, ga̱jma̱a̱ “Lá naxmiéjunʼ Dios kaʼyaʼ ráʼ.”

14. a) Náa ejmaa nájkhu̱ videos rí na̱ʼkha̱ náa caja ndrígóo herramientas mu muʼsngáa rá. b) Káʼnii esperiencia xtaʼdáá ikháánʼ índo̱ najmaaʼ videos rígi̱ rá.

¹⁴ Videos. Nákha mbiʼi rí nixtáa Jesús, bi̱ nutáá ixi̱ i̱ndó guáʼdáá rí najmún muni ga̱jma̱a̱ ñawúunʼ, mú xúgi̱ guáʼdáá herramientas rí na̱ʼkhu̱u̱ aguʼ, xóo sierra mecánica, taladro, lijadora ga̱jma̱a̱ clavadora. Ikháanʼ mangáanʼ kuaʼdáá i̱yi̱i̱ʼ, mú ma̱ngaa kuaʼdáá mitsaan video. A̱jkhu̱ rí ikhaa na̱ʼkha̱ náa caja ndrígóo herramientas mu muʼsngáa: Náa numuu rí gíʼmaa muʼnigajmaa Biblia rá. Xú káʼnii nindxu̱u̱ rí miʼsngáa ga̱jma̱a̱ numuu Biblia rá. Káʼnii erígá náa Guʼwá nagimbáanʼ rá. Ga̱jma̱a̱, Tsíin ni̱ndxu̱xu̱ʼ bi̱ nutaráʼaxu numuu Jeobá rá. Videos rígi̱ rí tséʼni a̱jma̱ minutos ma̱ndoo majmaʼ índo̱ naratámíjná timbá miʼtsú ga̱jma̱ʼ xa̱bu̱. Ga̱jma̱a̱ rí ndajyúuʼ itháan ma̱ndoo majmaa índo̱ naguma revisitas ga̱jma̱a̱ musngajmúún bi̱ naguapiin. Herramientas rígi̱ ma̱ndoo maxkajxi̱i̱n xa̱bu̱ mundrigú munigajmaa Biblia ga̱jma̱a̱ magún náa nagimbáanʼ.

15. Arathá mbá xkri̱da náa nasngájma xú káʼnii exkaxi̱i̱ mbáa xa̱bu̱ índo̱ ndaʼyoo videos ga̱jma̱a̱ ajngóo.

¹⁵ Guʼyáá xú káʼnii embáñun video xa̱bu̱. Mbáa ndxájulú nixkamaa mbáa a̱ʼgu̱ bi̱ nigájnuu náa Micronesia mu maʼga̱ gáxtáa i̱mba̱ níʼkhá ga̱jma̱a̱ nisngájmuu video Náa numuu rí gíʼmaa muʼnigajmaa Biblia rá., náa ajngáa yapés, rí naʼthí ikhaa. Índo̱ video nigi̱ʼdu̱u̱, a̱ʼgu̱ niʼthí: “¡Na̱nguá eyoo gánimbooʼ, rígá náa ajngóoʼ! Xa̱bu̱ bi̱ xtáa raʼthí gi̱i̱, naʼthí xóo ethi náa xtáá. ¡Naʼthí ajngóoʼ!”. Nda̱wa̱á niʼthí rí maguxnuu ga̱jma̱a̱ mbaʼyoo xúgíʼ rí nakujmaa náa jw.org náa ajngáa yapés (atayáá  ma̱ngaa Hechos 2:8, 11). Xúʼko̱ má ma̱ngaa nigíʼnuu mbáa ndxájulú a̱ʼgu̱ bi̱ xtáa náa Estados Unidos bi̱ nikuʼma mbá ináa mu mbaʼyoo aʼdá giʼtio̱o̱ bi̱ xtáa náa i̱mba̱ xuajen mba̱a̱, mu mbaʼyoo ikháá má video náa ajngóo. Nda̱wa̱á rí ndiʼyoo, ikhaa niʼthúu̱n náa mbá correo electrónico: “Rí niniguʼ itháan náa naʼthí rí mbáa bi̱ gíʼdoo tsiakii ga̱jma̱a̱ bi̱ ra̱májánʼ wéñuʼ naʼtáñajunʼ náa numbaaʼ. Ninda̱ʼa̱ musngóʼ ga̱jma̱a̱ Biblia”. Ikhaa xtáa náa mbá xuajen náa tséniñunʼ mutaraʼa.

16. Arathá xú káʼnii ejmaa mámbá folleto rígi̱: a) Atadxawíín Diúu̱ ga̱jma̱a̱ araxtaa kámuu mbiʼi. b) Ajngáa rí májánʼ na̱ʼkha̱ náa Dios. c) Tsíin lá eni rí nandoo Jeobá rí mbiʼi xúgi̱ rá.

¹⁶ Folletos. Á mu mbáa xa̱bu̱ tsejmañuu gaguxnuu májánʼ i̱yi̱i̱ʼ o á mu nda̱a̱ i̱yi̱i̱ʼ rí nagájnuu náa Biblia náa ajngóo, xú káʼnii gándoo gúʼsngáá rí gajkhun rá. Kuaʼdáá mbá herramienta kiejunʼ: Folleto Atadxawíín Diúu̱ ga̱jma̱a̱ araxtaa kámuu mbiʼi. * Imbo̱o̱ herramienta mu mugíʼdi̱i̱ muʼsngúún xa̱bu̱ ga̱jma̱a̱ numuu Biblia nindxu̱u̱ folleto Ajngáa rí májánʼ na̱ʼkha̱ náa Dios. Ma̱ndoo musngajmáá xa̱bu̱ níʼkhóo 14 rí kayá edxu̱u̱ náa iwáá ináa, muraxi̱i̱ náa biʼyaa rí naniguʼ itháan ga̱jma̱a̱ mugíʼdi̱i̱ muʼnigajmaa níʼkhóo rúʼko̱. Lá ni̱ʼni̱ má rígi̱ índo̱ na̱jkua̱ gúʼñúún xa̱bu̱ ráʼ. Ragajtsú folleto rí na̱ʼkha̱ náa caja ndrígóo herramientas mu muʼsngáa nindxu̱u̱ Tsíin lá eni rí nandoo Jeobá rí mbiʼi xúgi̱ rá. Kiʼni mu majmañún xa̱bu̱ ga̱jma̱a̱ numuu organización. Mu mbuʼyáá xú káʼnii majmulúʼ, ma̱ndoo mbuʼyáá número rí nigájnuu nákha gu̱nʼ marzo tsiguʼ 2017 náa I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos.

17. a) Náa ejmaa mámbá libro rí nuʼnigajmaa gajmiúlú xa̱bu̱ rá. b) Ndiéjunʼ gíʼmaa muni xúgínʼ bi̱ najngún iyááʼ, ga̱jma̱a̱ náa numuu rá.

¹⁷ Libros. Á mu nugíʼdi̱i̱ nuʼsngáá xa̱bu̱ ga̱jma̱a̱ numuu Biblia ga̱jma̱a̱ najmulú mbá folleto, asndu náa má mbiʼi ma̱ndoo muriʼkhuíí ga̱jma̱a̱ majmulúʼ mbá libro Ndiéjunʼ phú eʼsngáa náa Biblia rá. Ga̱jma̱a̱ numuu herramienta rígi̱, bi̱ najuiʼsngáá majmañuu itháan kiʼsngáa rí na̱ʼkha̱ náa Biblia rí gíʼdoo itháan numuu. Á mu bi̱ najuiʼsngáá námbóo libro ga̱jma̱a̱ xtáa rariʼkuminaʼ, manújngulú ga̱jma̱a̱ libro Guni rí Dios ma̱ndoo kaʼyala. * Rígi̱ mambáyúu magíʼ maʼnimbánuu ikha rí na̱ʼkha̱ náa Biblia náa vida ndrígóo. Garmáʼáan a̱jkiu̱lú rí gíʼmaa mambóo nájma̱ libro maski ajndu majngúun iyááʼ ginii nákha xóó tsémbóo libro. Xúʼko̱, majmañún májánʼ rí gajkhun (atraxnuu Colosenses 2:6, 7). *

18. a) Xó má eʼthí náa 1 Timoteo 4:16, ndiéjunʼ gíʼmaa muʼni, ga̱jma̱a̱ ndiéjunʼ gárígá rá. b) Náa numuu gíʼmaa majmulúʼ caja ndrígóo herramientas mu muʼsngáa rá.

¹⁸ Bi̱ ni̱ndxu̱lú xa̱bi̱i̱ Jeobá gíʼmaa muʼtáraʼa ajngáa rí gajkhun rí maʼni rí xa̱bu̱ makuwa kámuu mbiʼi (Col. 1:5; atraxnuu 1 Timoteo 4:16). * Mu ma̱ndoo muʼni, nindrígú mbá caja ndrígóo herramientas mu muʼsngáa ga̱jma̱a̱ xúgíʼ rí ndayúlú (atayáá kúgumaʼá “ Caja ndrígóo herramientas mu muʼsngáa”). Gajmulú májánʼ wéñuʼ. Mámbáa bi̱ naʼtáraʼa maraʼwíí ndiéjunʼ herramienta gájmuu ga̱jma̱a̱ nguáná gáʼni. Mú garmáʼáan a̱jkiu̱lú dí raʼkháa i̱ndó muxnáraʼa i̱yi̱i̱ʼ. Ma̱ngaa ragíʼmaa muniʼñáʼ náa ñawúunʼ xa̱bu̱ bi̱ tsínigu̱nʼ mudxawíín. Rí phú nandulúʼ rí “bi̱ nandún makuwá kámuu”, bi̱ nandún majmañún rí gajkhun ga̱jma̱a̱ bi̱ ni̱ndxu̱ún xa̱bu̱ guabiinʼ maguanu mani̱ndxu̱ún discípulos ndrígóo Cristo (Hech. 13:48; Mat. 28:19, 20).