1, 2. Ndiéjunʼ nindxu̱u̱ rí naʼni mamínuʼ itháan xa̱bu̱, ga̱jma̱a̱ tsáa gíʼdoo aʼkhúun rá.

TELÉFONO, bombilla rí na̱ʼkhu̱u̱ aguʼ, carro ga̱jma̱a̱ refrigerador nindxu̱u̱ mbá rí nini kumaa xa̱bu̱ rí naʼni makuwáanʼ itháan májánʼ. Mú rígá i̱ʼwáʼ rí naʼni makuwáanʼ itháan gamíi, xóo pistolas, minas, ndíí ga̱jma̱a̱ bombas, rígi̱ nindxu̱u̱ nguátháá. Mú rí itháan naʼni mumíniiʼ xa̱bu̱ nindxu̱u̱ mbá dí rígá asndu nákha ginii nákha xóó nda̱a̱ rígi̱. Ndiéjunʼ nindxu̱u̱ rá. Nuʼthá ga̱jma̱a̱ numuu nduwaaʼ, nindxu̱u̱ mbá rí nduʼyáá dí ragájkhun nindxu̱u̱, mú najmún mu xa̱bu̱ muni nduwaaʼ. Timbá bi̱ niʼni nduwaaʼ nindxu̱u̱ Gixa̱a̱, bi̱ Jesucristo nixná mbiʼyuu “anu̱u̱ rí minduwaʼ” (atraxnuu Juan 8:44). * Nguáná nigíʼdu̱u̱ niʼni nduwaaʼ xá.

² Asndu nákha wajyúúʼ, náa ixi̱ ri̱ʼi̱ Edén. Adán ga̱jma̱a̱ Eva nikuwa tsímáá náa Ku̱ba̱ʼ mitsaan rí Dios nixnúún. Mú ikhaa niʼthún rí xúphu̱ “ixi̱ ku̱ma̱ dí májánʼ ga̱jma̱a̱ dí ra̱májánʼ”. Á mu tsénimbu̱ún, makhañún. Maski ajndu Satanás ndaʼyoo xúgíʼ rígi̱, nijmiuu mbáa a̱bu̱nʼ mu maʼthúu̱n Eva timbá nduwaʼ: “Xaʼguanú makhañála”. Ga̱jma̱a̱ xóó niʼthí: “Numuu rí Dios ndaʼyoo rí índo̱ ikháanʼ guphula xndúu ixi̱ rúʼko̱ mambaʼto idala ga̱jma̱a̱ manindxala xóo Dios, muniʼnuʼ dí májánʼ ga̱jma̱a̱ dí ra̱májánʼ” (Gén. 2:15-17; 3:1-5).

3. a) Náa numuu nuʼthá rí nduwaʼ ndrígóo Satanás nindxu̱u̱ ra̱májánʼ kayuʼ rá. b) Ndiéjunʼ ni̱jkha̱nú nirígá rá.

 ³ Nduwaʼ ndrígóo Satanás nindxu̱u̱ ra̱májánʼ kayuʼ, numuu rí ikhaa ndiʼyoo májánʼ rí Eva makhañúu á mu naʼnimbo̱o̱ ga̱jma̱a̱ na̱ʼkhu̱ xndú dí ragíʼmaa mikhu. Ikhaa ga̱jma̱a̱ ajmbio̱o̱ túnimbu̱ún kuyáá Jeobá ga̱jma̱a̱ nda̱wa̱á nikháñun (Gén. 3:6; 5:5). Rí itháan raʼkhí, “rí nakháñulú nigadráʼa náa xúgínʼ xa̱bu̱” ga̱jma̱a̱ numuu aʼkhá ma̱ngaa “niʼtáñajunʼ asndu náa [...] bi̱ túxudami̱jna̱ aʼkhá xóo nikiéʼkúun Adán” (Rom. 5:12, 14). Xa̱bu̱ numbaaʼ na̱nguá xóo makuwá májánʼ kámuu mbiʼi, xóo Dios nindoo asndu nákha ginii. Rí xúgi̱ xa̱bu̱ nakuwa mbá 70 tsiguʼ o asndu 80 á mu guáʼdáá itháan tsiakii. Á mu xúʼko̱ “mú nuraʼníí gamiéjunʼ ga̱jma̱a̱ gaʼkhu” (Sal. 90:10). ¡Nindxu̱u̱ mbá xkujndu mba̱a̱! Xúgíʼ rígi̱ nirígá ga̱jma̱a̱ numuu nduwaʼ ndrígóo Gixa̱a̱.   

4. a) Ndiéjunʼ graxe̱ rí gíʼdoo numuu muriʼña̱a̱ rá. b) Xó má naʼthí náa Salmo 15:1, 2, tsíin gándoo mambaxúún gajmiún Jeobá rá.

⁴ Índo̱ Jesús niʼthí xóo eʼni Satanás, niʼthí rígi̱: “Táxtáa náa rí gajkhun, numuu rí nda̱a̱ rí gajkhun náa ikhaa”. Ga̱jma̱a̱ xóó naʼni xúʼko̱. Gixa̱a̱ “naʼninduwiinʼ xúgínʼ xa̱bu̱ bi̱ kuwa náa xúgíʼ tsu̱du̱u̱ ku̱ba̱ʼ” ga̱jma̱a̱ nduwaʼ ndrígóo (Rev. 12:9). Mú ikháanʼ na̱nguá eyulú majpátriguáanʼ náa tsáʼkhá ndrígóo. Ikha jngó, muriʼña̱a̱ ajtsú graxe̱ rígi̱: Xú káʼnii eʼni nduwiinʼ Satanás xa̱bu̱ rá. Náa numuu rí nuni nduwaʼ xa̱bu̱ rá. Ga̱jma̱a̱ numuu rí na̱nguá eyulú manindxu̱lúʼ xóo Adán ga̱jma̱a̱ Eva ma̱ngaa rí tsíyulú muniʼñáʼ rambáxulú gajmiúlú Jeobá, xú káʼnii esngajmá rí nuʼthá rí gajkhun xúgíʼ mbiʼi rá. (Atraxnuu Salmo 15:1, 2.) *

5. Xú káʼnii eʼni nduwiinʼ xa̱bu̱ rí mbiʼi xúgi̱ Satanás rá.

⁵ Apóstol Pablo ndiʼyoo rí Gixa̱a̱ xáʼngo̱o̱ gáʼni nduwánʼ “numuu rí nuniʼnúuʼ májánʼ dí raʼkhí eyoo maʼni” (2 Cor. 2:11). Nduʼyáá má rí Satanás nindxu̱u̱ bi̱ naʼtáñajunʼ náa numbaaʼ, rí ma̱ngaa náa religión nduwaʼ, Xa̱bu̱ Ñajunʼ bi̱ nuni ku̱ʼwáʼ ga̱jma̱a̱ náa naxtango̱jo̱o̱ (1 Juan 5:19). Tséʼniulú tsiánguá, ga̱jma̱a̱ xúgíʼ rí naʼni ikhaa gajmíi̱n xa̱bu̱ wéñiʼ, mu muni rí xa̱bu̱ bi̱ guáʼdáá wéñuʼ muthi rí nduwaʼ (1 Tim. 4:1, 2). Mbá xkri̱da, tikhun xa̱bu̱ bi̱ nagujua̱ nuni nduwaʼ náa i̱yi̱i̱ʼ mú ma̱ndoo magu̱jua̱ dí ra̱májánʼ ma̱ngaa rí muni nduwiinʼ wéñuʼ xa̱bu̱ rí asndu naguanún ga̱jma̱a̱ mbújku̱ún.

6, 7. a) Náa numuu rí guáʼdáá aʼkhún xa̱bu̱ bi̱ nusngáa náa religión nduwaʼ rá. b) Ndiéjunʼ nduwaʼ etadxuun ikháánʼ rí nusngáa xa̱bu̱ ede̱ rá.

⁶ Guáʼdáá aʼkhún xa̱bu̱ bi̱ nusngáa náa religión nduwaʼ. Náa numuu rá. Numuu rí xúgínʼ bi̱ nunimbu̱ún nduwaʼ nuni rí tsénigu̱ʼ Dios ga̱jma̱a̱ migamíi munimbáti̱ga̱ rí ma̱ndoo makuwá kámuu mbiʼi (Os. 4:9). Jesús ndiʼyoo rí xa̱bu̱ ede̱ náa mbaʼa guʼwá ndxájkun nuni nduwiinʼ xa̱bu̱. Niʼthún náa inún: “¡Phú migínáanʼla, escribas ga̱jma̱a̱ fariseos, bi̱ a̱jma̱ inala!, numuu rí na̱jkua̱ náa inuu xúgíʼ lamáa ga̱jma̱a̱ náa ku̱ba̱ʼ mixooʼ mu murtaxi̱i̱ mbáa xa̱bu̱, ga̱jma̱a̱ bugi̱ índo̱ na̱jkha̱nú nartaximínáʼ, nuni rí maʼga̱ náa Gehena [rí mandáti̱ga̱a̱ kámuu] a̱jma̱ nuthu itháan ki xóo ikháanʼla” (Mat. 23:15 nota). Jesús niʼthún rí mugíʼnii ga̱jma̱a̱ niʼthún ajngáa rígi̱: “Ikháanʼ naguwáʼ náa ana̱la Gixa̱a̱”, bi̱ “nagudíin xa̱bu̱” (Juan 8:44).

⁷ Báxtúu, ndxajkun, gaʼyee, bi̱ nuni xawan... Tséʼniuu xú káʼnii mbiʼñún, rí mbiʼi xúgi̱ náa numbaaʼ kuwa wéñuʼ xa̱bu̱ ede̱.  Xó má fariseos bi̱ nikuwa nákha wajyúúʼ, “tsethi rí gajkhun” rí naʼthí náa Ajngá rawunʼ Dios ga̱jma̱a̱ nuriʼkuíí “rí gajkhun ga̱jma̱a̱ nduwaʼ” (Rom. 1:18, 25). Nusngáa má xúʼko̱ rí nduwaʼ índo̱ nuthi rí xóó nduya xa̱bu̱ índo̱ nakháñun o rí nakhiin náa aguʼ ga̱jma̱a̱ nusngáa rí Dios naniguʼ rí xa̱bu̱ mani̱ndxu̱ún a̱jma̱ ñajúnʼ.

8. a) Ndiéjunʼ nindxu̱u̱ nduwaʼ rí inu muthi políticos rá. b) Xú káʼnii gúʼni ikháanʼ rá.

⁸ Bi̱ políticos mangiin najmún nduwaʼ mu nuni nduwiinʼ xa̱bu̱. Xájyúuʼ muthi nduwaʼ rí itháan mba̱a̱ rí kuwaanʼ ‹tsímáá ga̱jma̱a̱ nda̱a̱ rí gugíʼniinlú›. Mu “ikhú nda̱a̱ tsu̱ma̱ gaguma gámbíin” xa̱bu̱. Xúniʼñáʼ rí muni nduwáanʼ ga̱jma̱a̱ xúgíʼ rí ikhiin nuthi muni náa numbaaʼ xkawiʼ rígi̱. Ikháanʼ nduʼyáá májánʼ “rí mbiʼi ndrígóo Jeobá na̱ʼkha̱ xóo mbáa kuʼwáʼ índo̱ mbruʼun” (1 Tes. 5:1-4).

9, 10. a) Náa numuu rí nuni nduwaʼ xa̱bu̱, ga̱jma̱a̱ ndiéjunʼ gárígá rá. b) Ndiéjunʼ rí gíʼmaa marmáʼáan a̱jkiu̱lú náa Jeobá rá.

⁹ Náa numbaaʼ kuwáanʼ, xa̱bu̱ naguʼún nuni nduwaʼ. Ga̱jma̱a̱ raʼkháa i̱ndó xa̱bu̱ bi̱ guáʼdaa numún. Náa mbá artículo rí kayá edxu̱u̱ “Náa numuu rí nuʼni nduwaʼ”, mbá revista rí najmaʼnuʼ wéñuʼ naʼthí: “Rí nduwaʼ narígá má xúʼko̱ náa a̱jkiu̱ún xa̱bu̱ numbaaʼ”. Xó má rí nithi mbaʼin xa̱bu̱ náa mbá artículo, xa̱bu̱ nuni nduwaʼ, nuni mu muñeumíjna̱ ga̱jma̱a̱ nurkaʼwún, nuni rígi̱ numuu rí nandún makhánun mbá májánʼ ñajunʼ náa ma̱ndoo muda̱ mba̱a̱ mbújkha̱a̱. Náa artículo naʼthí rí xa̱bu̱ “tséʼniún mingíjyúuʼ muni nduwaʼ, nduwaʼ rí itháan mba̱ʼu̱ ga̱jma̱a̱ dí ma̱jkha̱ʼ, bi̱ nuñajunʼ gajmiún bi̱ na̱nguá eniʼnuunʼ, bi̱ nambáxu̱u̱n gajmiún ga̱jma̱a̱ bi̱ nandún kuñún”.

¹⁰ Ndiéjunʼ gárígá á mu nuni nduwamijná wéñuʼ xá. Na̱nguá enimbu̱ún kuyamijná ga̱jma̱a̱ na̱nguá embáxu̱u̱n májánʼ. Mbá xkri̱da, gundxa̱ʼwámi̱jna̱ xú káʼnii ku̱mu̱u̱ mbáa xa̱bu̱ índo̱ a̱ʼgiu̱u̱ naʼni nduwaaʼ ga̱jma̱a̱ narkaʼumáʼa rí naʼni. Ga̱jma̱a̱ phú raʼkhí nindxu̱u̱ índo̱ mbáa xa̱bu̱ bi̱ gíʼdaa a̱ʼgiu̱u̱ ga̱jma̱a̱ bi̱ gíʼdiin e̱ji̱i̱n, naʼniún dí ra̱májánʼ. Mú garmáʼáan a̱jkiu̱lú rí xa̱bu̱ bugi̱ xáʼngu̱u̱n gurkaʼwu rí nuni náa inuu Jeobá, numuu rí “xúgíʼ paʼtati̱ga̱ ga̱jma̱a̱ ndaʼyoo” májánʼ ikhaa (Heb. 4:13).

11. Ndiéjunʼ eʼsngúlúʼ xkri̱da ndrígu̱ún Ananías ga̱jma̱a̱ Safira rá. (Atayáá timbá xtiʼkhu.)

¹¹ Náa Biblia ma̱ndoo muxkamaa xkri̱da ndrígu̱ún xa̱bu̱ gajmii bi̱ nikuwa nákha siglo timbá, ikhaa ni̱ndxu̱ʼ Ananías ga̱jma̱a̱ Safira, bi̱ Satanás niʼniuu mu muni nduwaʼ Dios. Nigujua̱ mbá mbaaʼ ga̱jma̱a̱ nithúún apóstoles rí nuxna xúgíʼ mbújkho̱o̱ mbaaʼ, mú i̱ndó nindxu̱u̱ mbá tapha mbújkha̱a̱. Nindúún maguaʼdáá wéñuʼ numún náa a̱ngiu̱lú ga̱jma̱a̱ nindúún musngajma rí ni̱ndxu̱ún míjínʼ xa̱bu̱. Mú Jeobá ndiʼyoo rí nini nduwaʼ ga̱jma̱a̱ nixnúún castigo (Hech. 5:1-10).

12. Ndiéjunʼ rí gúgiʼnii xa̱bu̱ bi̱ nuni nduwaʼ á mu tsítanga̱a̱ a̱jkiu̱ún, ga̱jma̱a̱ náa numuu rá.

¹² Xú káʼnii eʼyoo Jeobá nduwaʼ rá. Satanás ga̱jma̱a̱ xúgínʼ bi̱ nuni nduwaʼ bi̱ tseta̱nga̱a̱ a̱jkiu̱ún maguma gámbíin “náa awúu̱n aguʼ”. Xó muʼthá, maguma gámbíin kámuu mbiʼi (Rev. 20:10; 21:8; Sal. 5:6). Náa numuu rá. Numuu rí Jeobá ndaʼñún kuʼwáʼ buʼko̱ xó má eni “xu̱wán”, xóo muʼthá, xa̱bu̱ bi̱ naguʼún nuni rí Dios tsénigu̱ʼ nditháan (Rev. 22:15).

13. Ndiéjunʼ rí ejmañuluʼ ga̱jma̱a̱ numuu Jeobá, ga̱jma̱a̱ ndiéjunʼ exkaxáanʼ muʼni rá.

¹³ Nduʼyáá májánʼ rí Jeobá “Dios na̱nguá nindxu̱u̱ mbáa xa̱bu̱ mu maʼni nduwaʼ”. Ma̱ngaa “Dios xándoo maʼni nduwaʼ” (Núm. 23:19; Heb. 6:18). Náa Biblia naʼthí rí ikhaa nawiyuʼ kaʼñúún “bi̱ nuni nduwaʼ” (Prov. 6:16, 17). Mu muʼni rí ikha naniguʼ,  ndayóo muʼnimbulúʼ ikha ndrígóʼ ga̱jma̱a̱ muʼthá ma xúʼko̱ rí gajkhun. Ndayóo rí muʼnimbulúʼ kiʼtáñajunʼ rígi̱: “Xúninduwamijnála” ga̱jma̱a̱ “Gutamijná rí gajkhun gajmiála eʼwíínʼ” (Col. 3:9).

14. a) Ndiéjunʼ eʼni makujmáanʼ mixtiʼkuáanʼ náa bi̱ nusngáa náa mbá religión nduwaʼ rá. b) Arathá rí naʼthí náa Lucas 6:45.

¹⁴ Ndiéjunʼ rí naʼni makujmaa mixtiʼkhu xóo ni̱ndxu̱ún cristianos bi̱ gajkhun ga̱jma̱a̱ bi̱ nusngáa náa religión nduwaʼ rá. Rí xa̱bi̱i̱ Dios nuʼthá rí gajkhun (atraxnuu Zacarías 8:16, 17). * Pablo niʼthí rí xúʼko̱ nusngájma dí ñajunlú “xa̱bi̱i̱ Dios” (2 Cor. 6:4, 7). Jesús niʼthí dí rígá náa a̱jkiu̱u̱n xa̱bu̱ naʼthí náa rawunʼ (Luc. 6:45). Ikha jngó, índo̱ rígá rí gajkhun náa awúu̱n a̱jkiu̱lú, nagájnuu nuʼthá rí gajkhun. Na̱nguá eʼthá nduwaʼ rí mba̱ʼu̱ ní má rí ma̱jkha̱ʼ, nuʼthúún rí gajkhun xa̱bu̱ bi̱ na̱nguá eniʼnúnʼ, bi̱ nuñajunʼ gajmiúlú, bi̱ nambáxulúʼ gajmiúlú ga̱jma̱a̱ bi̱ nandulúʼ kuʼñúún. Mbuʼyáá tikhuu ikha náa gándoo gúʼthá rí gajkhun.

15. a) Náa numuu dí ra̱májánʼ nindxu̱u̱ rí muʼni a̱jma̱ inulú rá. b) Ndiéjunʼ gambayaaʼ índo̱ eʼwíínʼ gatsudáán rí matani rá. (Atayáá náa nota.)

¹⁵ Á mu ni̱ndxa̱ʼ mbáa dxámá o mbáa dxáʼgú, mbáa nguáná maʼnda̱ʼ matani xóo eni bi̱ nambáxa̱ʼ gajmiáanʼ, mú xáʼni a̱jma̱ inaʼ, xóo eni tikhun. Náa inún bi̱ kuñún ga̱jma̱a̱ náa congregación nusngajma rí nindxúu̱n míjínʼ cristianos, mu índo̱ nakuwa gajmiún eʼwíínʼ jiáma o índo̱ kuwa náa redes sociales nuni má rí ikhiin nandún. Nuthi ajngáa xkawiʼ, nugíʼ xtíin dí ra̱májánʼ, nudxuun ajmúú rí naʼthí xkawiʼ, najngi̱i̱n, najmún drogas, guáʼdíín novias o novios ngu̱ʼwa̱ o nuni rí itháan xkawiʼ. Kuwa ga̱jma̱a̱ nduwaʼ: Nuni nduwiinʼ anu̱ún, a̱ngiu̱ún ga̱jma̱a̱ Dios (Sal. 26:4, 5). Mú Jeobá ndaʼyoo májánʼ á mu i̱ndó nuʼthá rí nduʼyamajkuíí, mú a̱jkiu̱lú xtáa mitsínguánʼ náa ikhaa (Mar. 7:6). Itháan májánʼ gáʼni rí muʼni xóo niʼthá proverbio rígi̱: “Xaxígúu a̱jkia̱nʼ kaʼñún xa̱bu̱ aʼkhá; mú gamiñúu kaʼyoo Jeobá xúgíʼ mbiʼi” (Prov. 23:17). *

16. Xú káʼnii gándoo gúʼni majtíí mbá solicitud á mu nandulúʼ muʼni káxi̱ ñajunʼ Jeobá rá.

 ¹⁶ Mbáa nandaʼ manindxa̱ʼ precursor regular o mbáa nandaʼ matani káxi̱ ñajunʼ Jeobá, xóo maraxtaa náa Betel. Índo̱ gátani majtíí mbá solicitud, gíʼdoo wéñuʼ numuu rí matriʼña̱a̱ rí gajkhun náa xúgíʼ graxe̱ rí naʼthí á mu tséʼniaʼ nandii, xú káʼnii tani gagiminaʼ ga̱jma̱a̱ xóo nindxa̱a̱ʼ (Heb. 13:18). Ga̱jma̱a̱ á mu ikháánʼ nitani̱ mbá dí ra̱májánʼ, lá xóó tsératún bi̱ kuya̱ edxu̱u̱ ráʼ. Á mu xúʼko̱ kaʼnii, atandu̱ʼu̱u̱n rí mumbayáʼ mu xúʼko̱ xáʼni gawáanʼ rí nitani̱, xúʼko̱ ma̱ndoo matani májánʼ ñajunʼ Jeobá (Rom. 9:1; Gál. 6:1).

17. Ndiéjunʼ gúʼni á mu nuraxulú ga̱jma̱a̱ numún a̱ngiu̱lú xá.

¹⁷ Rí xúgi̱, gundxaʼwamíjna̱ rí Xa̱bu̱ Ñajunʼ nánguá eniñu̱lúʼ muʼtáraʼa ga̱jma̱a̱ numuu Reino ma̱ngaa nuraxulú ga̱jma̱a̱ numún a̱ngiu̱lú. Lá muʼthá xúgíʼ rí nduʼyáá ráʼ. Gundxa̱ʼwámi̱jna̱ rí niʼni Jesús índo̱ niraxu̱u̱ Xa̱bu̱ Ñajunʼ romano. Niʼnimbánuu má xúʼko̱ rí naʼthí, rígá “mbiʼi dí xárata ga̱jma̱a̱ mbiʼi dí marata̱”, ga̱jma̱a̱ nguáná nda̱a̱ rí niʼthí (Ecl. 3:1, 7; Mat. 27:11-14). Á mu xúʼko̱ garigá, itháan májánʼ gáʼni rí nda̱a̱ dí gúʼthá mu xúʼko̱ nda̱a̱ rí guguaʼnii a̱ngiu̱lú (Prov. 10:19; 11:12).

18. Ndiéjunʼ gíʼmaa muʼni á mu bi̱ kuya̱ edxu̱u̱ nuraxulú ga̱jma̱a̱ numuu mbáa ndxájulú rá.

¹⁸ Gundxa̱ʼwámi̱jna̱ ga̱jma̱a̱ i̱mba̱ numuu. Á mu mbáa nakudaminaʼ mbá aʼkhá rí gakhi̱i̱ wéñuʼ ga̱jma̱a̱ ndiʼyáá xú káʼnii nirígá. A̱ngiu̱lú bi̱ kuya̱ edxu̱u̱ gíʼmaa muni rí congregación marigá kaʼwu, mbáa muraxulú á mu ndiʼyáá dí nirígá. Ndiéjunʼ guriʼña̱a̱ á mu nindxu̱u̱ mbáa bi̱ nambáxulúʼ gajmiúlú o mbáa bi̱ kuʼyáá rá. Náa Biblia naʼthí rí mbáa xa̱bu̱ jmbii “naʼthí rí gajkhun” (Prov. 12:17; 21:28). Ikha jngó, gíʼmaa muʼthúún ndiéjunʼ nirígá bi̱ kuya̱ edxu̱u̱, xúʼthá i̱mba̱ núthu ga̱jma̱a̱ xurkaʼwu nimbá. Ikhiin gíʼmaa mudxawíín rí gajkhun mu xúʼko̱ mbuyáá xú kaʼnii gándoo gumbáyii bi̱ nikudaminaʼ aʼkháʼ mú mata̱nga̱a̱ náa Jeobá (Sant. 5:14, 15).

19. Ndiéjunʼ gúʼyáá náa i̱mba̱ artículo rá.

¹⁹ David niʼtájkáan náa Jeobá: “Nanigua̱ʼ wéñuʼ rí gajkhun dí rígá awúu̱n” (Sal. 51:6). Ikhaa ndiʼyoo rí gíʼdoo wéñuʼ numuu muʼthá má xúʼko̱ rí gajkhun. Náa xúgíʼ vida ndrígúlú, bi̱ ni̱ndxu̱lú cristianos gajkhun nuʼtámíjná má xúʼko̱ rí gajkhun, xó má eʼthí texto rí kayá edxu̱u̱ náa artículo rígi̱. I̱mba̱ rí xóo ma̱ndoo musngájma rí xa̱bi̱i̱ Dios ni̱ndxu̱lú mixtiʼkuáanʼ índo̱ nuʼsngúún xa̱bu̱ rí gajkhun. Náa i̱mba̱ artículo mbuʼyáá xú káʼnii gándoo gúʼni.