NIGUMÚN nákha tsiguʼ 1934. Anu̱ʼ, Fred ga̱jma̱a̱ ru̱dúʼ Edna Molohan, mbá skíñúʼ tsiguʼ má rí ni̱ndxu̱ún bi̱ Nunigajmaa Biblia (xa̱bi̱i̱ Jeobá). Naxni̱i̱n wéñuʼ núma̱aʼ numuu rí ikhiin nisngóʼ rí maʼndo̱ʼ ka̱yo̱o̱ Dios. Nikúwáanʼxu náa Parsons, mbá xuajen rí naguanúu xígií sureste rí kaʼyoo Kansas. Nikúwáanʼxu náa mbá congregación náa mbaʼin ni̱ndxu̱ún bi̱ kaxtaʼwíin. Tséndatiguxu nimbá reunión ga̱jma̱a̱ nagajnuxu rutaráʼa má xúʼko̱ Ajngá rawunʼ Dios. Rí wakhííʼ sábado nutaráʼaxu náa calle, rí xúgi̱ nuxnambíʼi rí muʼtáraʼa náa kuwa mbaʼin xa̱bu̱. Nguáná nagáanʼxu, mú índo̱ naguámbuxu anu̱ʼ na̱jkha̱ kaguáanʼ mu muphúxu helado o nieve.

Congregación ndrígúxu̱ nindxu̱u̱ chíʼgíʼ ga̱jma̱a̱ gíʼdoo mbaʼa xuajen ma̱jkha̱ʼ náa majuiʼtáraʼa ga̱jma̱a̱ mbaʼa xuajen náa guáʼdiin xujkhúʼ. Índo̱ nuxnu̱u̱nxu i̱yi̱i̱ʼ xa̱bu̱ nuxnuxu verduras, xndú rí ndiʼkhún niraxi̱i̱ ga̱jma̱a̱ asndu nuxniuxu xtílá. Numuu rí na̱nguá guáʼdááxu mba̱a̱ mbújkha̱a̱ ga̱jma̱a̱ anu̱ʼ má nixná mbújkha̱a̱ ga̱jma̱a̱ numuu i̱yi̱i̱ʼ, rí nuxnuxu nunimagáʼxuʼ rí muphúxu.

Anu̱ʼ ga̱jma̱a̱ ru̱dúʼ nikhanun mbá gramófono mu mutaráʼaxu. Numuu rí xóó chíʼgiúnʼ xóó tséjmún gájmuʼ, mú naniguʼ wéñuʼ mambáñun marígú discursos rí niʼni grabar ndxájulú Rutherford índo̱ ikhiin nagún guni revisitas o musngáa ga̱jma̱a̱ numuu Biblia.

Anu̱ʼ nigrígú náa tsu̱du̱u̱ carro rí nigájnuu nákha tsiguʼ 1936 mbá ajua̱nʼ rí nawáán gakhi̱i̱. Carro rígi̱ nimbáyuxu wéñuʼ náa nitaráʼaxu. Ginii nugrígúuxu ajmúú mu maʼndún mudxawíín xa̱bu̱ ga̱jma̱a̱ nda̱wa̱a̱ nugriguxu mbá discurso rí niguma grabar. Índo̱ naguámbá, nuxnarúʼúnxu i̱yi̱i̱ʼ xa̱bu̱ bi̱ nanigu̱nʼ munigajmaa.

Náa mbá xuajen chíʼgíʼ rí kaʼyoo Kansas rí mbiʼyuu Cherryvale, policía niʼthúu̱n anu̱ʼ rí xárigu grabación náa parque, náa nagún gúyáa xúnʼ xa̱bu̱ rí mbiʼi domingo. Mú niʼthúu̱n rí ma̱ndoo  marígú kaníí. Ikhú anu̱ʼ nda̱a̱ rí niʼthí ga̱jma̱a̱ ni̱jkha̱ kayóo carro ga̱jma̱a̱ nitsiji náa calle rí na̱jkha̱ náa parque. Anu̱ʼ mbu̱júu̱ nirígúu grabación mu xa̱bu̱ mudxawíín. Ikhúúnʼ niniguʼ maraʼnuu xúgíʼ rúʼko̱ ga̱jmu̱ʼ anu̱ʼ ma̱ngaa ndxájuʼ Jerry.

Índo̱ inuu maʼni tsiguʼ 1940 niyambááxu mu “mutaráʼaxu nacha̱” náa xuajen rí tsénigunʼ mudxuun xa̱bu̱. Xó má nitha nákha ginii índo̱ nitha ga̱jma̱a̱ numuu Joplin (Misuri), naguáxunʼxu nákha xóó tséjtsi ga̱jma̱a̱ nguʼwáá eniʼñáʼxu tratados o folletos náa agoo xkrugua. Nda̱wa̱á nawáánʼxu náa rawunʼ xuajen mu mbu̱ya̱a̱xu á mu policía na̱nguá nirugua̱a̱ nimbáa ndxájulú.

Nákha tsiguʼ rúʼko̱, imbo̱o̱ ñajunʼ kiejunʼ rí niguáʼdááxu nindxu̱u̱ rí nuxnambíʼixu marchas. Nundrájkhaxu letreros náa rexuxu ga̱jma̱a̱ eniʼ ejkuáxu náa xuajen mu muthaxu ga̱jma̱a̱ numuu Reino. Narmáʼáan a̱jkiu̱nʼ mbá marcha náa xuajñuʼ. A̱ngiu̱lú kuya̱ mbá cartel rí naʼthí “Religión nindxu̱u̱ mbá tsáʼkhá ga̱jma̱a̱ naʼninduwaʼ”. Nigájnun náa guʼwúxu, nigún itháan rí mbá kilómetro tikhu ga̱jma̱a̱ nda̱wa̱á nitangi̱i̱n. Májánʼ rí na̱nguá ndiñún xa̱bu̱ bi̱ nakiʼníin, mú mbaʼin xa̱bu̱ ninigu̱nʼ rígi̱.

Nigájnuxu náa Kansas asndu Texas mu mu̱ʼguáxu asambleas. Anu̱ʼ nañajunʼ náa compañía ndrígóo ferrocarril rí na̱jkha̱ Misuri ga̱jma̱a̱ nanújngoo Kansas ma̱ngaa Texas, ikha jngó tseninumááxu índo̱ na̱jkuá gúñu̱u̱n bi̱ ku̱ñu̱u̱nxu ga̱jma̱a̱ índo̱ na̱jkuáxu̱ náa asambleas. Ndxájuu ru̱dúʼ, Fred Wismar, ga̱jma̱a̱ a̱ʼgiu̱u̱, Eulalie, kuwa náa Temple (Texas). Amuʼ Fred nijmañuu rí gajkhun nákha gi̱ʼdu̱u̱ siglo mbá skíñúʼ, nákha nindxu̱u̱ dxámá nijngúun iyááʼ ga̱jma̱a̱ niʼthún a̱ngui̱i̱n rí nijmañuu, ma̱ngaa ru̱dúʼ. A̱ngiu̱lú bi̱ kuwa náa centro ndrígóo Texas niniʼniiʼ májánʼ, ninindxu̱u̱ mbáa siervo de zona, rí xúgi̱ najmaʼnunʼ xóo superintendentes de circuito. Naniguxuʼ makuwáanʼxu gajmiúxu̱ numuu rí májánʼ a̱jkiu̱u̱n ga̱jma̱a̱ nadxuu. Naniguʼ wéñuʼ rí gajkhun ga̱jma̱a̱ ikhaa nimbáyuʼ nákha chíʼgiúnʼ.

Nákha tsiguʼ 1941, ni̱jkuáxu ga̱jma̱a̱ tren náa San Luis (Misuri) mu makuwaanʼxu náa mbá asamblea rí mba̱a̱. Xúgínʼ e̱ji̱n ga̱jma̱a̱ jiáma nituxu muʼguá gutrigáanʼxu mbóó níʼkhóo mu mudxáwiinxu discurso rí maxná ndxájulú Rutherford rí kayá edxu̱u̱ “Eji̱i̱n Rey”. Nini̱ndxu̱xu̱ʼ itháan rí mbá 15,000. Índo̱ niguámbá, ndxájulú Rutherford gajmíi̱n bi̱ numbayíí nixnuxu mbá regalo mitsaan mámbáa, mbá nuxi̱ʼ libro rí nigumbiʼyuu E̱ji̱n.

Nákha gu̱nʼ abril tsiguʼ 1943, náa Coffeyville (Kansas) niguáʼdááxu mbá asamblea chíʼgíʼ, mu mitsaan ninindxu̱u̱, rí nigumbiʼyuu “Najuiʼthún muni”. Ikhí nijuiʼthá rí náa xúgíʼ congregación magi̱ʼdu̱u̱ muguaʼdáá náa Najuiʼsngáá Mi̱ʼtháráʼa Májánʼ. Ma̱ngaa nixnaxi̱ mbá folleto rí kagu̱ mbá 52 níʼkhóo ga̱jma̱a̱ majmaa náa escuela rígi̱. Nda̱wa̱á ikhú má tsiguʼ rúʼko̱, nixna timbá discurso ndrígóʼ. Náa asamblea rúʼko̱ nijngúnʼ iyááʼ gajmíi̱nʼ  eʼwíínʼ náa mbá pila miguéʼtsi náa mijngii guáʼdiin xujkhúʼ xa̱bu̱. Ninindxu̱u̱ mbá mbiʼi kiejunʼ náa ikhúúnʼ.

Índo̱ niguámboʼ ninigajmaa secundaria, nákha tsiguʼ 1951, ndiyóoʼ maraʼwíí rí mani náa vida ndrígóʼ. Ra̱ʼkhá tháán nindoʼ maxtáá náa Betel, náa nixtáa ndxájuʼ Jerry. Ikha jngó nacha̱ nikuʼmá solicitud ndrígóʼ náa Brooklyn. Tájyúuʼ índo̱ nithu̱nʼ rí maʼgá gáñajunʼ náa Betel nákha 10 ñajunʼ gu̱nʼ marzo tsiguʼ 1952. Rígi̱ rí niraʼwíí mani nimbáyuʼ wéñuʼ mu mambaxúʼ májánʼ ga̱jmu̱ʼ Jeobá.

Nindoʼ mañajunʼ náa imprenta mu mayambáá náa naguma revistas ga̱jma̱a̱ i̱ʼwáʼ i̱yi̱i̱ʼ. Mú nimbá miʼtsú táñajunʼ ikhí numuu rí nixnuʼ imbo̱o̱ ñajunʼ mani, nixnuʼ mani mesero ga̱jma̱a̱ nda̱wa̱á nixuʼmún náa cocina. Niniguʼ wéñuʼ rí nini ikhí ga̱jma̱a̱ ra̱ʼkhá tháán nijmañuʼ. Ma̱ngaa numuu rí bi̱ nuñajunʼ náa cocina nuñajunʼ ga̱jma̱a̱ turnos, naguapún manigajmaa rí mbiʼi náa biblioteca rí mba̱a̱ dí rígá náa Betel. Rígi̱ nimbáyuʼ mu mambaxúʼ májánʼ ga̱jmu̱ʼ Jeobá, ga̱jma̱a̱ fe ndrígóʼ maʼni itháan gújkhuʼ ga̱jma̱a̱ rí maʼndo̱ʼ maxtáá náa Betel asndu náa gándoo. Jerry niniñuʼ rañajunʼ náa Betel nákha tsiguʼ 1949 ga̱jma̱a̱ ndiyáa mbáa ndxájulú bi̱ mbiʼyuu Patricia, mú nikuwa náa mijngii Brooklyn. Nákha ndiʼkhún ninindxu̱ʼ Betelita ikhiin nimbayúʼ wéñuʼ ga̱jma̱a̱ nixnuʼ tsiakii.

Tájyúuʼ rí ni̱jkhánú, a̱ngiu̱lú nigíʼdi̱i̱ nini pruebas mu muguaʼdiin itháan bi̱ muxna discurso náa Betel. Bugi̱ najuixnún ñajunʼ rí magún mbá tsiguʼ náa congregación dí rígá mbá 322 kilómetros rí mitsínguánʼ náa Brooklyn. Nuxna mbá discurso público rí mbá hora ga̱jma̱a̱ nutaraʼa gajmiún a̱ngiu̱lú. Ikhúúnʼ ninindxu̱ʼ mbáa dí ikhiin. Índo̱ nigíʼdu̱u̱ nigájnuʼ mu maxna discurso namíñuʼ wéñuʼ. Índo̱ nagájnuʼ na̱jkhá ga̱jma̱a̱ tren. Narmáʼáan a̱jkiu̱nʼ rí nirígá nákha tsiguʼ 1954 mbá wakhííʼ domingo índo̱ naʼni miguwan wéñuʼ. Natangu̱ún ga̱jma̱a̱ tren náa xuajen Nueva York, ga̱jma̱a̱ nikumuʼ ma̱ʼkhánúʼ náa Betel índo̱ na̱jkha̱ rakína. Mú nigajtaa wéñuʼ idiʼ ga̱jma̱a̱ ra̱ʼkhá tháán niʼni giñánʼ ma̱ngaa niʼni wéñuʼ miguwan rí asndu niʼni gachúu motor ndrígóo tren. Ni̱ʼkhánú náa estación ndrígóo tren xóo a las cinco rí miʼcha̱ rí mbiʼi lunes. Nitsimuʼ náa metro rí na̱jkha̱ xígií Brooklyn, ga̱jma̱a̱ ni̱jkháaʼ mbájmbu náa cocina, ni̱ʼkhánúʼ wakhaʼ ga̱jma̱a̱ nagúnʼ wéñuʼ numuu rí nixtáá mbá kañiʼ mbruʼun náa tren ga̱jma̱a̱ tígú mbá kayuʼ. Mú xkujndu xóo rígi̱ nda̱a̱ rí nindxu̱u̱, itháan niʼni maxtáá gagi rí mambáñun a̱ngiu̱lú ga̱jma̱a̱ rí maniʼnúnʼ itháan bi̱ mambaxúʼ gajmíi̱nʼ mbiʼi kiejunʼ rúʼko̱.

Nákha ndiʼkhún ni̱jkhánú mu mañajunʼ náa Betel, nithu̱nʼ maʼgá gáyambáá náa emisora ndrígóo radio, WBBR, rí nákha ikhú rígá náa raga̱jma̱ piso guʼwá 124 náa calle Columbia Heights. Nirígá mbá programa mámbá xmáná náa nugíʼ mbá xkri̱da rí xóo nunigajmaa Biblia mbá grupo xa̱bu̱. Ikhúúnʼ ninindxu̱ʼ mbáa rí ikhiin. Ndxájulú A. H. Macmillan, bi̱ nutha̱a̱nxu Mac, niyambáá ma̱ngaa náa programas ndrígóo WBBR. Mba̱yu̱ʼ tsiguʼ nixtáa náa Betel, ga̱jma̱a̱ ninindxu̱u̱ mbá májánʼ xkri̱da, bi̱ niʼngo̱o̱ niʼni ñajunʼ Jeobá mba̱yu̱ʼ tsiguʼ.

Nákha tsiguʼ 1958, nithu̱nʼ maʼgá gáyambáá náa Escuela ndrígóo Galaad. Ñajunʼ rí nigúʼdoo ninindxu̱u̱ rí mambáñun misioneros bi̱ nuxunʼ mu makhánun visa ndrígu̱ún ga̱jma̱a̱ naríyaʼ awan náa mbi̱ʼi̱i̱ gágajnun. Tsiguʼ rúʼko̱ minumuu wéñuʼ rí mbáa maʼga̱ ga̱jma̱a̱ avión, ikha jngó nguéjmi̱i̱n ni̱ndxu̱ún bi̱ naʼngu̱u̱n nagún ga̱jma̱a̱. Mbaʼin bi̱ nagún náa África ga̱jma̱a̱ náa Lejano Oriente nagún náa lamáa ga̱jma̱a̱ barcos rí kagu̱ eʼda wéñuʼ. Índo̱ nánguá niʼni minumuu wéñuʼ rí magún ga̱jma̱a̱ avión, misioneros nigi̱ʼdi̱i̱ nigún ga̱jma̱a̱ avión náa kaʼñún magún.

Nigúʼdoo itháan ñajunʼ nákha tsiguʼ 1960, numuu rí ni̱jkuáa ñawúunʼ maríyaʼ awan mu a̱ngiu̱lú magún ga̱jma̱a̱ avión náa Estados Unidos asndu Europa náa marigá asambleas internacionales  tsiguʼ 1961. Ikhúúnʼ mangúún ni̱jkhá náa avión rí nigájnuu náa Nueva York asndu Hamburgo (Alemania). Nda̱wa̱á rí nirígá asamblea náa xuajen rígi̱, ikhúúnʼ gajmíi̱nʼ ajtsíin betelitas nitíʼñaaxu mbá carro ga̱jma̱a̱ ni̱jkuáxu Italia, ni̱jkuáxu náa sucursal dí rígá náa Roma. Nda̱wa̱á ni̱jkuáxu náa Francia, ninújnguxu náa kúbá Pirineos ga̱jma̱a̱ ni̱jkuánúxu náa España, náa tseniñuʼ mutaraʼa. Ra̱ʼkhá tháán májánʼ ninindxu̱u̱ rí muniʼnúnʼ a̱ngiu̱lú náa Barcelona ga̱jma̱a̱ rí muxnu̱u̱n tikhuu i̱yi̱i̱ʼ rí nimbúxixu xóo regalos. Náa España nigájnuxu ga̱jma̱a̱ ni̱jkuáxu náa Ámsterdam ga̱jma̱a̱ ikhí ni̱jkuáxu ga̱jma̱a̱ avión asndu náa Nueva York.

Mbá tsiguʼ nda̱wa̱á, nijuiʼthúnʼ maríyaʼ awan mu marigá mbá viaje náa xúgíʼ numbaaʼ mu magún mbá 583 a̱ngiu̱lú náa asambleas internacionales. Asamblea rígi̱ nigumbiʼyuu “Ajngáa rí májánʼ rí marigá kámuu”, tsiguʼ 1963. Magún náa Europa, Asia ga̱jma̱a̱ Pacífico sur, rí iwáá nindxu̱u̱ náa Honolulú (Hawái) ga̱jma̱a̱ Pasadena (California). Náa magún mani̱ndxu̱u̱ Líbano ga̱jma̱a̱ Jordania, mu muniʼnuʼ ku̱ba̱ʼ rí naʼthí náa Biblia. Rí nunixu nuráwíi boletos ga̱jma̱a̱ náa hotel maguanún, náa departamento náa xtáá rañajunʼ ma̱ngaa gíʼmaa maguwíi visa rí nunda̱ʼa̱ náa mbaʼa xuajen mba̱ʼu̱.

Nákha tsiguʼ 1963 ninindxu̱u̱ kiejunʼ náa ikhúúnʼ ga̱jma̱a̱ imbo̱o̱ numuu. Nákha 29 ñajunʼ gu̱nʼ junio niniʼgúnʼ ga̱jmu̱ʼ mbáa ndxájulú bi̱ na̱ʼkha̱ náa Misuri bi̱ mbiʼyuu Lila Rogers, bi̱ naʼni mbá ajtsú tsiguʼ rí nindxu̱u̱ betelita. Mbá xmáná nda̱wa̱á rí niniʼgúnʼ, ni̱jkuáxu mangáanʼ ga̱jma̱a̱ ni̱jkuá gúyaxu náa Grecia, Egipto ga̱jma̱a̱ Líbano. Ni̱jkuáxu mbá chíʼmbaʼ náa Beirut asndu náa aeropuerto chíʼgíʼ ndrígóo Jordania. Numuu rí ikhí tséniñuʼ mutaraʼa ga̱jma̱a̱ nituxu rí xa̱bi̱i̱ Jeobá tsexnun visa mu ma̱ndoo matu̱ʼu̱u̱n ikhí, niraximíjna̱ ndiéjunʼ gárígá índo̱ guʼguanúxu. Niʼniuxu tsiánguá índo̱ ndiya̱a̱xu rí náa tsu̱du̱u̱ terminal kuwa mbá grupo a̱ngiu̱lú bi̱ guáʼtuxu ga̱jma̱a̱ mbá cartel rí naʼthí “Májánʼ rí niguwaʼ, xa̱bi̱i̱ Jeobá”. Ra̱ʼkhá tháán mitsaan ninindxu̱u̱ rí muniʼnúʼxu ku̱ba̱ʼ rúʼko̱ rí naʼthí náa Biblia: Náa nikuwa patriarcas (o xa̱bu̱ wanii), náa niʼtáraʼa Jesús gajmíi̱n apóstoles, ga̱jma̱a̱ náa cristianos nigi̱ʼdi̱i̱ nitaraʼa “asndu náa guambari̱go̱o̱ ku̱ba̱ʼ” (Hech. 13:47).

Naʼni mbá a̱jma̱ skiñúʼ gu̱wa̱ʼ iwitsu tsiguʼ rí a̱ʼgiu̱ʼ Lila nambáyuʼ náa ñajunʼ rí gúʼdoo. Nájmáanʼxu ni̱jkuáxu mbaʼa nuthu náa España ga̱jma̱a̱ Portugal nákha ikhí tsíniñaʼ mutaraʼa. Ikhú nixnu̱u̱nxu tsiakii a̱ngiu̱lú ga̱jma̱a̱ ni̱jkuá kudúxu i̱yi̱i̱ʼ ga̱jma̱a̱ i̱ʼwáʼ rí ndayóoʼ. Asndu ni̱jkuá gúñu̱u̱nxu tikhun a̱ngiu̱lú bi̱ kuguariʼin náa guʼwá e̱jua̱nʼ wayuu náa nikuwa soldados náa xuajen Cádiz (España). Ra̱ʼkhá tháán nidxuuʼ rí nindoo nixnu̱u̱n tsiakii ga̱jma̱a̱ mbá discurso rí nigájnuu náa Biblia.

Asndu nákha tsiguʼ 1963, nigúʼdoo ñajunʼ rí maríyaʼ awan mu magún náa asamblea internacional  náa África, América Central ga̱jma̱a̱ náa Sur, Australia, Europa, Hawái, Lejano Oriente, Nueva Zelanda ga̱jma̱a̱ Puerto Rico. Ikhúúnʼ ga̱jmu̱ʼ Lila ni̱jkuáxu náa mbaʼa asamblea mitsaan, xóo rí nirígá náa Varsovia (Polonia) nákha tsiguʼ 1989. Mbaʼin a̱ngiu̱lú bi̱ kuwa náa Rusia timbá miʼtsú nikuwa náa asamblea rígi̱. Tikhun bi̱ niniʼnúnʼ nikuwa mba̱yu̱ʼ tsiguʼ náa guʼwá e̱jua̱nʼ ga̱jma̱a̱ numuu religión ndrígu̱ún.

Imbo̱o̱ ñajunʼ mitsaan wéñuʼ rí muʼguá gúñu̱u̱nxu bi̱ kuwa náa Betel ga̱jma̱a̱ misioneros náa i̱ʼwáʼ xuajen mba̱ʼu̱ mu muxnu̱u̱n tsiakii. Náa rí ni̱jkuáxu iwáá, ninindxu̱u̱ náa Corea del Sur ga̱jma̱a̱ niniʼnúnʼxu mbá 50 a̱ngiu̱lú bi̱ kuwa náa guʼwá e̱jua̱nʼ náa xuajen Suwon. Xúgínʼ nadxún ga̱jma̱a̱ nandún magajnún mu muni ñajunʼ Jeobá mbu̱júu̱. Nixnúxu wéñuʼ tsiakii rí muniʼnúnʼxu (Rom. 1:11, 12).

Náa xúgíʼ tsiguʼ rígi̱, nda̱yo̱o̱ xú káʼnii naʼni itháan mba̱a̱ xuajñu Jeobá ga̱jma̱a̱ numuu rí ikhaa naʼni tsajkurámááʼ. Índo̱ nijngúnʼ iyááʼ nákha tsiguʼ 1943, nini̱ndxu̱xu̱ʼ mbá cien mil publicadores. Rí xúgi̱ naʼni itháan rí mbá migiñuʼ millón bi̱ nuʼni ñajunʼ Jeobá náa mbá 240 xuajen mba̱ʼu̱ ga̱jma̱a̱ náa mbaaʼ rí kaʼyoo. Ga̱jma̱a̱ gíʼmaa muxníin núma̱aʼ a̱ngiu̱lú bi̱ nigi̱ʼdi̱i̱ nitaraʼa bi̱ nikuwa náa Galaad. Ikhúúnʼ xtáá tsímáá wéñuʼ numuu rí niñajunʼ xúgíʼ tsiguʼ rígi̱ gajmíi̱nʼ mbaʼin misioneros ga̱jma̱a̱ mambáñun mu magún náa asignación ndrígu̱ún.

Nadxuʼ rí niraʼwíí asndu nákha dxámá mani ñajunʼ Jeobá ga̱jma̱a̱ rí nini solicitud mu ma̱ʼkhá náa Betel. Asndu nákha ikhú, Jeobá naʼni tsajkurámunʼ má xúʼko̱. Ma̱ngaa rí niʼni makuwáanʼxu gagi náa Betel, Lila ga̱jma̱a̱ ikhúúnʼ nadxuxu rí niyambáá mba̱yu̱ʼ tsiguʼ náa mbaʼa congregación dí rígá náa Brooklyn ga̱jma̱a̱ mambaxúxu kámuu gajmiúxu̱ a̱ngiu̱lú.

Nani xóó ñajunʼ náa Betel tsejtsí mbiʼi numuu rí Lila nambáyuʼ. Xúgi̱ gúʼdoo itháan rí 84 tsiguʼ, mú xóó nandoo nañajunʼ, rí mariʼña̱a̱ correos ndrígóo sucursal.

Nagui̱i̱ wéñuʼ rí makuwáanʼ náa xuajñu Jeobá ga̱jma̱a̱ rí mbuʼyáá xóo embánuu ajngáa rí na̱ʼkha̱ náa Malaquías 3:18: “Ikháanʼla mbu̱ya̱a̱ mbu̱júu̱ rí mixtiʼkuii mbáa bi̱ naʼni rí jmbu ga̱jma̱a̱ mbáa bi̱ naʼni dí ra̱májánʼ, mbáa bi̱ naʼni ñajunʼ Dios ga̱jma̱a̱ bi̱ xóó tséʼni ñajunʼ”. Mámbá mbiʼi rí nanújngoo nduʼyáá rí numbaaʼ ndrígóo Satanás na̱jkha̱ rámbáa ga̱jma̱a̱ xa̱bu̱ nándáa rí guáʼthi̱i̱n ga̱jma̱a̱ na̱nguá kuwa gagi. Mú bi̱ nandulúʼ kuʼyáá Jeobá nuʼni ñajunʼ ga̱jma̱a̱ kuwáanʼlu gagi, maski ajndu kuwáanʼ náa mbiʼi gakhi̱i̱, numuu dí rígá rí kuaʼthi̱i̱n nda̱wa̱á. Nadxuxu rí nandoo na̱jkuá kuyuxu ajngáa ndrígóo Reino (Mat. 24:14). Xa̱bu̱ Ñajunʼ bugi̱ mbá nacha̱ má maʼni gámbáa numbaaʼ wayuu rígi̱ ga̱jma̱a̱ ma̱ʼkha̱ kayóo mbá ku̱ba̱ʼ mitsaan. ¡Ra̱ʼkhá tháán eyulu ma̱ʼkha̱nú mbiʼi rúʼko̱! Ikhú xa̱bi̱i̱ Jeobá bi̱ ni̱ndxu̱ún jmbiin makuwá májánʼ ga̱jma̱a̱ makuwá kámuu mbiʼi náa tsu̱du̱u̱ Ku̱ba̱ʼ.