1, 2. a) Ndiéjunʼ eniu̱u̱n xa̱bi̱i̱ Jeobá tikhun xa̱bu̱ ñájunʼ ga̱jma̱a̱ ndiéjunʼ eni̱ a̱ngiu̱lú rá. b) Náa numuu dí ma̱ndoo makuwáanʼlu gagi maski ajndu nuni̱ gínáanʼlu xá. (Arathá numuu xtiʼkhuu rí na̱ʼkha̱ náa timbá ináa.)

 DÍ MBIʼI xúgi̱, itháán dí 30 país ga̱jma̱a̱ xuajen majkhaʼ, tséniña̱a̱ʼ muʼtáraʼa ajngáa rí májánʼ. Náa tikhu xuajen rúʼko̱ xa̱bu̱ ñajunʼ nuxudi̱i̱nʼ náa guʼwá e̱jua̱nʼ a̱ngiu̱lú. Náá numuu rá. Jeobá ndaʼyoo dí ikhiin na̱nguá nini̱ mbá dí ra̱májánʼ. Numuu dí i̱ndó nuraxnuu Biblia, nuthúún eʼwíinʼ dí najmañún ma̱ngaa nagún reunión gajmiún eʼwíinʼ a̱ngiu̱ún. Ma̱ngaa tséxudamíjna̱ náa política. Maski ajndu nuni̱ gíníi wéñuuʼ, mu naʼngu̱u̱n naguajún jmbu b ma̱ngaa nusngájma dí i̱ndó Jeobá nuxnáá gamajkhu, rígi̱ naʼni makúwá gagi wéñuʼ.

² Mbáa ikháán nitañún tikhunʼ a̱ngiu̱lú náa fotiún rí tsimiñúún ga̱jma̱a̱ nundu̱ʼwa̱. Kúwá gagi numuu dí nduyáá dí Jeobá nadxuu kaʼñúún numuu dí naguájun jmbu (1 Crón. 29:17a). Jesús niʼthí: “Gagi kúwá xa̱bu̱ bi̱ naguma gíníin ga̱jma̱a̱ numuu rí nuni̱ dí jmbu […]. Gakuwáanʼla gagi índo̱ gárígá rígi̱, gaʼdxala wéñuuʼ, numuu dí ra̱ʼkhá tháán mba̱a̱ dí gáxnala Dios” (Mat. 5:10-12).

3. Xó má eʼthí náa Hechos 4:19, 20, ndiéjunʼ nini̱ apóstoles índo̱ niguma gíníi, náá numuu dí xúʼko̱ nini̱ xá.

³ A̱ngiu̱lú xúgi̱ ma̱ngaa naguáʼníí ikháá má kayuuʼ xóo niguáʼníí  apóstoles bi̱ nikúwá nákha siglo timbá índo̱ nini̱ gíníi numuu dí nitaraʼa ga̱jma̱a̱ numuu Jesús. Mbaʼa aʼphu̱ xa̱bu̱ ñajunʼ judío “nitañajúúnʼ dí muniña̱a̱ʼ ruthi ga̱jma̱a̱ numuu mbiʼyuu Jesús” (Hech. 4:18; 5:27, 28, 40). Ndiéjunʼ nini apóstoles rá. (Atraxnuu Hechos 4:19, 20). Nduyáá dí itháán gíʼdoo numuu bi̱ niʼtáñajúúnʼ mutaruʼúún xa̱bu̱ xuajen ga̱jma̱a̱ muthúún xúgíinʼ xa̱bu̱ numuu Cristo (Hech. 10:42). Ikha jngóo Pedro ga̱jma̱a̱ Juan, niguájun nithi ga̱jma̱a̱ numún xúgíinʼ apóstoles, tamiñúún nithi dí xúnimbu̱ún kuñúún ikhiin,dí i̱ndó Dios gúnimbu̱ún kuyáá ga̱jma̱a̱ dí xúniñaaʼ ruthi numuu Jesús. Dí nini̱ xúʼko̱ nikujmaa dí asndu xóo nirajxu̱u̱n xa̱bu̱ ñajunʼ: “Náa numuu dí xúʼko̱ eni̱la rá. Lá nakumalaʼ dí ikháánʼ kuaʼdáá itháán numala ki xóo Dios ráʼ.”

4. Xó má eʼthí Hechos 5:27-29, ndiéjunʼ xkri̱da niniñaaʼ apóstoles ga̱jma̱a̱ xú káʼnii gándoo guʼyaridáá rá.

⁴ Apóstoles niniñaaʼ mbá májánʼ xkri̱da dí xúgíinʼ cristianos mambáñún dí mbiʼi xúgi̱ mu ‹munimbu̱ún ku̱yáá Dios xóo xa̱bu̱ ñajunʼ ki xóo xa̱bu̱ numbaaʼ› (atraxnuu Hechos 5:27-29). Nda̱wa̱á dí nixnúún, nigájni̱ín náa xa̱bu̱ ñajunʼ judío “gagi nigájni̱i̱n náa kúwá xa̱bu̱ ede̱, nidxún numuu rí ndiyáá dí ikhiin kaʼñún mumíniiʼ ga̱jma̱a̱ numuu mbiʼyuu Jesús”, ga̱jma̱a̱ nitaraʼa má xúʼko̱ (Hech. 5:40-42).

5. Ndiéjunʼ graxe̱ gúriʼña̱a̱ rá.

⁵ Xkri̱da dí niniñaaʼ apóstoles naʼni dí murajximíjna̱lu. Xú káʼnii embríguíi dí muraʼwíí munimbulú kuʼyáá Dios ki xóo xa̱bu̱ numbaaʼ ga̱jma̱a̱ kiʼtáñajunʼ dí na̱ʼkha̱ náa Biblia dí muʼnimbaníí dí nuthi xa̱bu̱ ñajunʼ rá. (Rom. 13:1.) Xú káʼnii guʼnimbulúʼ kuʼñúún “xa̱bu̱ ñajunʼ ga̱jma̱a̱ bi̱ guáʼdáá mbá ñajunʼ” xó má niʼthí apóstol Pablo, ga̱jma̱a̱ rí maguajúnlú jmbu náa Dios bi̱ nindxu̱u̱ xa̱bu̱ ñajunʼ itháán mba̱a̱ rá. (Tito 3:1.)

6. a) Tsíin nindxu̱ún “xa̱bu̱ ñajunʼ” bi̱ naʼthí náa Romanos 13:1, ndiéjunʼ gíʼmaa muʼni náa ikhiin xá. b) Ndiéjunʼ dí guʼyáá numún xúgíinʼ xa̱bu̱ ñajunʼ bigi̱ rá.

⁶ (Atraxnuu Romanos 13:1). Náá versículo rígi̱ “xa̱bu̱ ñajunʼ” nandoo gáʼthúu̱n xa̱bu̱ ñajunʼ má bi̱ kúwá náa numbaaʼ rígi̱ bi̱ guáʼdáá tsiakii ga̱jma̱a̱ nutañajúúnʼ eʼwíinʼ  xa̱bu̱. Bi̱ ni̱ndxu̱lú cristianos gíʼmaa munimbulú kuʼñúún xa̱bu̱ ñajunʼ bugi̱. Ikhiin nuni̱ marigá awan xó má kaʼyoo ga̱jma̱a̱ nuni̱ dí maguma mbáníí xtángoo, nguáná asndu numbañún xa̱bi̱i̱ Jeobá (Apoc. 12:16). Ikha jngóo kaʼyulú muʼni numáá xúgíʼ dí kaʼyoo ga̱jma̱a̱ guʼyamajkún (Rom. 13:7). Rí mbiʼi xúgi̱ xa̱bu̱ ñajunʼ bugi̱ nutañajunʼ numuu dí Jeobá naniñúúnʼ makuwá. Jesús niʼthí kaʼwu índo̱ xa̱bu̱ ñajunʼ romano Poncio Pilato nirajxu̱u̱. Índo̱ niʼthúu̱n dí ma̱ndoo maʼtáñajunʼ mu muni̱ mbá a̱jkiu̱ún kuyáá o dí muxiyáá, Jesús niriʼñuu: “Ikháán xándoo maratañájunʼ á mu raʼkháa ñajunʼ rígi̱ ni̱ʼkha̱ rijma̱a̱ matani̱” (Juan 19:11). Ikhaa má kayuuʼ xóo Pilato xúgíinʼ xa̱bu̱ ñajunʼ ga̱jma̱a̱ políticos bi̱ kúwá dí mbiʼi xúgi̱, xándoo mutañajunʼ xúgíʼ dí marigá.

7. Nguáná rí xándoo munimbulú kuʼñúún xa̱bu̱ ñájunʼ ga̱jma̱a̱ ndiéjunʼ gíʼmaa mbuyáá ikhiin xá.

⁷ Bi̱ ni̱ndxu̱lú cristianos nunimbulú kuʼyáá xa̱bu̱ ñajunʼ índo̱ tsenújngorámuuʼ xtángoo ndrígóo Jeobá. Mú índo̱ nundu̱ʼu̱lú muʼni mbóoʼ dí Dios tsénigu̱u̱ʼ o tséniñúlu muʼni mbá dí ikhaa nandoo muʼni, xunimbulú kuʼñúún. Mbá xkri̱da, índo̱ nutsudiin jiámá mani̱ndxu̱ún soldado náa xuajen dí kúwi̱i̱n. c O tséniñaaʼ marigá Biblia ga̱jma̱a̱ i̱yi̱i̱ʼ ndrígúlú, dí muʼtáraʼa ga̱jma̱a̱ dí magimbáanʼlú. Índo̱ xa̱bu̱ ñajunʼ najmún ñajunʼ ndrígún muni̱ gíníi eʼwíinʼ, xóo índo̱ nuni̱ ginii xa̱bi̱i̱ Cristo, Dios mandi̱ʼi̱i̱n cuenta. ¡Jeobá ndaʼyoo xúgíʼ dí kúwi̱i̱n runi! (Ecl. 5:8).

8. Xú káʼnii mixtiʼkhu nindxu̱u̱ Jeobá náa eʼwíinʼ xa̱bu̱ ñajunʼ rá.

⁸ Ajngáa “xa̱bu̱ ñajunʼ” nandoo gáʼthúu̱n mbáa bi̱ gíʼdoo mbá ñajunʼ mba̱a̱ náa eʼwíinʼ. Mú raʼkháa rígi̱ e̱yo̱o̱ gáʼthúu̱n rí ikhaa nindxu̱u̱ jmbii o itháan mba̱a̱. Xtáa mbáa bi̱ itháan jmbii ga̱jma̱a̱ itháan mba̱a̱ ki xóo eʼwíinʼ, ikhaa nindxu̱u̱ Jeobá Dios. Náa Biblia na̱ʼkha̱ mbaʼa aʼphu̱ dí Jeobá nagumbiʼyuu ‹bi̱ itháan Mba̱a̱› (Dan. 7:18, 22, 25, 27).

9. Ndiéjunʼ ndiʼyoo Daniel náa mbá visión rá.

⁹ Profeta Daniel ndiʼyoo visión náa nisngájma kaʼwu dí Jeobá nindxu̱u̱ bi̱ itháan mba̱a̱ ki xóo xúgínʼ xa̱bu̱ ñajunʼ bi̱ kúwá. Ginii ndiʼñún a̱jkhui̱i̱n xujkhúʼ mbaʼwi̱i̱n bi̱ nandoo gáʼthúu̱n potencia mundial dí nirígá nákha ginii, ikhaa nindxu̱u̱: Babilonia, Medopersia, Grecia ga̱jma̱a̱ Roma, ma̱ngaa potencia mundial dí rígá mbiʼi xúgi̱ Reino Unido ga̱jma̱a̱ Estados Unidos (Dan. 7:1-3, 17). Nda̱wa̱á Daniel ndiʼyoo Jeobá grígu náa trono ndrígóo dí rígá mekhuíí (Dan. 7:9, 10). Dí ndiʼyoo nda̱wa̱á profeta bugi̱ nindxu̱u̱ dí maguáʼníí xa̱bu̱ ñájunʼ bi̱ kúwá dí mbiʼi xúgi̱.

10. Xó má eʼthí Daniel 7:13, 14, 27, tsíin nixnúún dí mutañajunʼ Jeobá náa tsu̱du̱u̱ Ku̱ba̱ʼ rígi̱, ga̱jma̱a̱ ndiéjunʼ esngájma rúʼko̱ náa ikhaa xá.

¹⁰ (Atraxnuu Daniel 7:13, 14, d 27). e Daniel ndaʼyoo dí Dios nagruigúu ñajúúnʼ xa̱bu̱ ñajunʼ bi̱ kúwá náa numbaaʼ rígi̱ ga̱jma̱a̱ naxnún bi̱ kaʼñúún mutañajunʼ ga̱jma̱a̱ bi̱ guáʼdáá itháán tsiakii. Tsíin ñajúúnʼ rá. Ikhaa nindxu̱u̱ Jesucristo bi̱ nindxu̱u̱ xóo “a̱ʼdióo xa̱biya̱”, gajmíi̱n “bi̱ kaʼwi̱i̱n ndrígióo bi̱ itháán Mba̱a̱”, ikhiin ni̱ndxu̱ún bi̱ 144,000 bi̱ maʼtáñajunʼ gajmíi̱n  asndu kámuu mbiʼi (Dan. 7:18). Nakujmaa kaʼwu dí Jeobá nindxu̱u̱ bi̱ itháan Mba̱a̱, numuu dí i̱ndó ikhaa kaʼyoo maʼthí ndiéjunʼ dí marigá.

11. Ndiéjunʼ itháan niʼnirámáʼ Daniel náa nisngájma dí Jeobá nindxu̱u̱ bi̱ tháan mba̱a̱ ki xóo xúgíinʼ bi̱ nutañajunʼ náa numbaaʼ rá.

¹¹ Rí ndiʼyoo Daniel náa visión nambánii ga̱jma̱a̱ rí ndiʼyoo má nákhi ginii. Profeta bugi̱ niʼthí dí Dios bi̱ xtáa mekhuíí nagruigúu ñajúúnʼ reyes ga̱jma̱a̱ nagruiguíin reyes, ga̱jma̱a̱ niʼthí xóó: “Bi̱ xtáa itháan mitsídánʼ nindxu̱u̱ bi̱ Naʼtáñajunʼ náa kúwá rutañajunʼ xa̱bu̱ numbaaʼ ga̱jma̱a̱ […] naxnúu maʼtáñajunʼ bi̱ ikhaa nandoo” (Dan. 2:19-21; 4:17). Lá mbá miʼtsú nigruigúu ñajúúnʼ reyes ga̱jma̱a̱ nigruigi̱i̱n reyes xáʼ. Xúʼko̱.

12. Arathá mbá xkri̱da xú káʼnii Jeobá nigruigúu ñajúúnʼ reyes nákha wajyúuʼ. (Atayáá xtiʼkhu.)

¹² Jeobá nisngájma dí nindxu̱u̱ itháan mba̱a̱ ki xóo “xa̱bu̱ ñajunʼ” bi̱ kúwá náa numbaaʼ rígi̱. Guʼyáá ajtsú xkri̱da, faraón bi̱ nixtáa náa Egipto niʼni gíníin xa̱bi̱i̱ Jeobá, mbaʼa aʼphu̱ tándoo ganiñúún magajnúú. Mú ikhaa niʼni káwíin ga̱jma̱a̱ nirguʼwi̱i̱ faraón náa lamáa maña̱ʼ (Éx. 14:26-28; Sal. 136:15). Rey Belsasar, bi̱ nixtáa náa Babilonia, niʼni mbá ndxa̱a̱ ga̱jma̱a̱ na̱nguá niʼni mba̱a̱ ‹Tátá bi̱ xtáá mekhuíí›, nixnúún gamajkhu ‹dioses bi̱ ki̱ʼni̱i̱n ga̱jma̱a̱ plata ma̱ngaa oro› ki xóo Jeobá (Dan. 5:22, 23). Mú Dios niʼni dí maguma gínáa xa̱bu̱ ra̱májáanʼ bugi̱. Mbruʼun má rúʼko̱ nixiyáa Belsasar, reino ndrígóo nijuixnún medos ga̱jma̱a̱ bi̱ persas (Dan. 5:28, 30, 31). Rey Herodes Agripa I, bi̱ nixtáa náa Palestina, nixíyáa apóstol Santiago ga̱jma̱a̱ nikuda̱a̱ʼ guʼwá e̱jua̱nʼ apóstol Pedro, numuu dí nindoo maxíyáa. Mú Dios tániñuuʼ mambanúu awan dí niriyaʼ. ‹Mbáa ángel ndrígóo Jeobá niʼni rí ma̱ndoo káñuu› xúʼko̱ niʼni dí nikháñúu Herodes (Hech. 12:1-5, 21-23).

13. Arathá mbá xkri̱da xú káʼnii Jeobá niʼngo̱o̱ niʼni gajmíi̱n mbaʼiin xa̱bu̱ ñajunʼ bi̱ niruwami̱jna̱.

¹³ Jeobá nisngájma dí nindxu̱u̱ itháán mba̱a̱ náa xúgíinʼ xa̱bu̱ ñajunʼ bi̱ niruwami̱jna̱. Nixmínaʼ ga̱jma̱a̱ numún israelitas, ma̱ngaa nimbañúún mu muni̱ gajmiún mbá 31 reyes bi̱ kúwá náa Canaán, ga̱jma̱a̱ nimbañúún mu mundrígúu Ku̱ba̱ʼ rí niʼthí Jeobá maxnún (Jos. 11:4-6, 20; 12:1, 7, 24). Ma̱ngaa ni’ni mbá dí magíʼnuu rey Ben-Hadad ga̱jma̱a̱ i̱mbá 32 reyes sirios bi̱ nigún guxmíjná gajmiún Israel (1 Rey. 20:1, 26-29).

14, 15. a) Ndiéjunʼ niʼthí rey Nabucodonosor ga̱jma̱a̱ Darío numuu Jeobá rá. b) Ndiéjunʼ niʼthí bi̱ niʼnirámáʼ salmo numuu Jeobá ga̱jma̱a̱ xuajñuu rá.

 ¹⁴ Jeobá nisngájma mbaʼa aʼphu̱ dí ikhaa nindxu̱u̱ bi̱ itháán Mba̱a̱. Índo̱ imba̱a̱ rey ndrígóo Babilonia, Nabucodonosor, niʼni mbamínáʼ jma̱a̱ numuu tsiakii dí gíʼdoo ma̱ngaa numuu ñajunʼ dí gíʼdoo ki xóo dí mbaʼyoo dí Jeobá kaʼyoo magruigú gamajkhu, Dios niʼni rí maguajtha skáguiinʼ. Nda̱wa̱á dí niʼni̱i̱ a̱jkiu̱u̱n Nabucodonosor nixnúu gamajkhu bi̱ phú Mba̱a̱ ga̱jma̱a̱ ni̱jkha̱nú ndiʼyoo dí Jeobá nindxu̱u̱ bi̱ xtáa asndu kámuu mbiʼi. Ga̱jma̱a̱ niʼthí xóó, dí ndawaa nimbáa bi̱ maguijitu̱u̱n rí ikhaa nandoo maʼni (Dan. 4:30, 33-35). Nda̱wa̱á dí Daniel niguiji jmbu niraʼnuu tsáʼkhá ga̱jma̱a̱ Jeobá niʼni kríyaaʼ náa iñá dí kajtiin león. Rey Darío nixná kiʼtáñajunʼ rígi̱: “Xúgíinʼ xa̱bu̱ bi̱ kúwi̱i̱n náa dí ikhúún natañájunʼ gíʼmaa mamiñún kuyáá Dios ndrígóo Daniel. Numuu dí ikhaa nindxu̱u̱ mbáa Dios ndaʼya ga̱jma̱a̱ xtáa asndu kámuu. Nditháan xámbáriga̱a̱ Reino ndrígóo ga̱jma̱a̱ tsiakii dí gíʼdoo mbajyúuʼ asndu kámuu” (Dan. 6:7-10, 19-22, 26, nota, 27).

¹⁵ Bi̱ niʼnirámáʼ salmo niʼthí: “Jeobá niʼni rí xagájnuu májánʼ consejo ndrígu̱ún bi̱ ra̱míjínʼ náa xa̱bu̱ xuajen; ga̱jma̱a̱ niʼni gámbáa awan ndrígu̱ún”. Ga̱jma̱a̱ niʼthí xóó: “¡Xtáa gagi xuajin mba̱a̱ índo̱ Jeobá ñajunʼ Dios ndrígu̱ún, xuajin rí ndiyáaʼ mu maʼni ndrígóo ikhaa!” (Sal. 33:10, 12). ¡Ra̱ʼkhá tháán májánʼ nindxu̱u̱ rí muguajún jmbu náa Jeobá!

16. Ndiéjunʼ nindxu̱u̱ rí gajkhun marigá ga̱jma̱a̱ náá numuu rá. (Atayáá xtiʼkhu.)

¹⁶ Xó má ndiʼyáá rí Jeobá niʼni nákha ginii. Ikha jngóo, ndiéjunʼ kuaʼti̱i̱n dí marigá nda̱wa̱á rá. Ma̱ndoo mbuʼyáá gajkhun rí Jeobá maʼni káwíin xa̱bi̱i̱ bi̱ nuni rí jmbu índo̱ garigá “ga̱ʼkhu̱ rí majphú mba̱a̱” (Mat. 24:21; Dan. 12:1). Maʼni rígi̱, índo̱ mbá grupo xa̱bu̱, Gog ndrígóo Magog, muni rí xúgíʼ numbaaʼ mawiñunʼ kuñún xa̱bi̱i̱ Jeobá bi̱ nuni rí jmbu. Asndu mangiin muwi̱i̱n bi̱ mbá  193 bi̱ kúwá náa Naciones Unidas, Jeobá bi̱ nindxu̱u̱ itháan Mba̱a̱ xáʼniuu mingíjyúuʼ rígi̱ gajmíi̱n ejército ndrígio̱o̱ bi̱ kúwá mekhuíí. Jeobá naʼthí: “Mani rí magúʼdoo numuʼ ga̱jma̱a̱ mani kaʼwi̱i̱ mbiʼyuʼ ga̱jma̱a̱ mani rí muninuwúnʼ náa mbaʼa xuajin; ga̱jma̱a̱ xúʼko̱ mbuyáá rí ikhúúnʼ ni̱ndxu̱ʼ Jeobá” (Ezeq. 38:14-16, 23; Sal. 46:10).

17. Ndiéjunʼ gugíʼnin reyes bi̱ kúwá náa numbaaʼ ga̱jma̱a̱ bi̱ maguájun jmbu rá.

¹⁷ Xkujndu rí maʼni Gog ndrígóo Magog mani̱ndxu̱u̱ rí marigá iwáá náa Armagedón, ikhú Jeobá maʼni gámbíin xúgíinʼ “reyes bi̱ kúwá náa xúgíʼ ku̱ba̱ʼ” (Apoc. 16:14, 16; 19:19-21). Mú, i̱ndó “xa̱bu̱ jmbiin makuwá náa tsu̱du̱u̱ ku̱ba̱ʼ, ga̱jma̱a̱ xa̱bu̱ bi̱ nda̱a̱ aʼkhúún maguanún ikhí” (Prov. 2:21, nota).

18. Ndiéjunʼ rí niraʼwi̱i̱ muni mbaʼin cristianos ga̱jma̱a̱ náá numuu rá. (Daniel 3:28.)

¹⁸ Mbayuuʼ tsiguʼ má, mbaʼin cristianos nuni̱ asndu xó má eʼngo̱o̱ ga̱jma̱a̱ rí asndu migamíi makhañún numuu rí nandún kuyáá Jeobá ga̱jma̱a̱ Xa̱bu̱ ñajunʼ ndrígóo. Ikhiin nuraʼwi̱i̱ rí muguajún jmbu má xúʼko̱, xó má ajtsíin jiáma hebreos bi̱ nikáwíin náa horno rí nakha ga̱jma̱a̱ numuu rí niguájun jmbu náa bi̱ itháan Mba̱a̱ (atraxnuu Daniel 3:28). f

19. a) Ndiéjunʼ gáʼyoo Jeobá índo̱ gáʼthí dí mugiʼníí xa̱bi̱i̱ rá. b) Ndiéjunʼ gíʼmaa muʼni asndu nákha xúgi̱ rá.

¹⁹ Salmista David ni̱jkha̱nú ndiʼyoo dí gíʼdoo numuu maguajún jmbu náa Dios. Ikhaa niʼnirámáʼ: “Jeobá naʼthí ndiéjunʼ gáʼni gajmíi̱n xa̱bi̱i̱, arathúnʼ má ikháán oh Jeobá xó má rí nani ga̱jma̱a̱ xó má rí naguájun jmbu náa ikháán” (Sal. 7:8). Ma̱ngaa niʼthí xóó: “Rí maguájun jmbu ga̱jma̱a̱ mani rí jmbu mañe̱wu̱nʼ” (Sal. 25:21). Rí maguajún jmbu náa Jeobá nindxu̱u̱ mbá rí gíʼdoo wéñuʼ numuu muʼni, xanújngorámulúʼ náa inuu ikhaa garigá má dí gárígá. Ikha jngó makumulúʼ ikháá kayuʼ xóo nikumu̱u̱ salmista bugi̱ bi̱ niʼnirámáʼ: “Gagi kúwi̱i̱n bi̱ nuni̱ dí jmbu ga̱jma̱a̱ nuni̱ xóo ma eʼthí náa xtángoo ndrígóo Jeobá” (Sal. 119:1).