1. Ndiéjunʼ eʼni Jeobá dí muguaʼthi̱i̱nlu nda̱wa̱á rá.

 JEOBÁ nixnulú dí muguaʼthi̱i̱n makuwáánʼ kámuu mbiʼi nda̱wa̱á, tikhun xa̱bi̱i̱ nuguaʼthi̱i̱n makuwá kámuu mekhuíí xóo bi̱ nditháan xáguánu makhañún (1 Cor. 15:50, 53). Mú mbaʼin nuguaʼthi̱i̱n makuwá kámuu náa tsu̱du̱u̱ ku̱ba̱ʼ, makuwá gagi ga̱jma̱a̱ nditháan xándoo kháñuun (Apoc. 21:3, 4). Xúgiáanʼ nduʼyáá dí gíʼdoo numuu dí kuáʼti̱i̱n nda̱wa̱á, tséʼniuu á mu makuwáánʼ mekhuíí o náa tsu̱du̱u̱ Ku̱ba̱ʼ.

2. Ndiéjunʼ nindxu̱u̱ dí nuguáʼthi̱i̱nlu ga̱jma̱a̱ náá numuu rá.

² Índo̱ náa Biblia naʼthí dí muguaʼthi̱i̱n naʼni makru̱ʼu̱lú dí marigá dí májánʼ nda̱wa̱á. Nduʼyáá dí gajkhun mambanúu dí kuaʼti̱i̱n nda̱wa̱á numuu dí Jeobá ekudaminaʼ maʼni (Rom. 15:13). Nuniʼnúuʼ xúgíʼ dí nakudaminaʼ maʼni ga̱jma̱a̱ nduʼyáá dí ikhaa maʼnimbánuu (Núm. 23:19). Nduʼyáá gajkhun dí Jeobá nandoo ga̱jma̱a̱ maʼngo̱o̱ maʼnimbánuu dí naʼthí maʼni. Ikha jngóo dí nuguaʼthi̱i̱n nindxu̱u̱ gajkhun na̱nguá nindxu̱u̱ ndíí o i̱ndó dí ikháanʼ nandulúʼ.

3. Ndiéjunʼ gúʼyáá náa artículo rígi̱ rá. (Salmo 27:14.)

³ Anu̱lú bi̱ xtáa mekhuíí nandoo kaʼyulú ga̱jma̱a̱ nandoo dí makumulúʼ kuʼyáá ikhaa (atraxnuu Salmo 27:14). b Á mu nduʼyáá dí gajkhun nindxu̱u̱ dí nikudaminaʼ maʼni Jeobá nda̱wa̱á, rúʼko̱ gámbáyulú muraʼníí xkujndu ga̱jma̱a̱ makuwáánʼ gagi ma̱ngaa xámiñulu asndu ndiéjunʼ má dí gárígá nda̱wa̱á. Náa artículo rígi̱ mbuʼyáá xú káʼnii eña̱wu̱nlú dí kuaʼti̱i̱n marigá nda̱wa̱á. Ginii mbuʼyáá ndíjkha nuʼthá dí kuáʼti̱i̱n nda̱wa̱á nindxu̱u̱ xóo mbá ancla ga̱jma̱a̱ xóo mbá casco. Nda̱wa̱á mbuʼyáá xóo gándoo muʼni itháan gujkhuʼ.

4. Ndíjkha rí nuraʼthi̱i̱nʼlu nda̱wa̱á nindxu̱u̱ xóo mbá ancla rá. (Hebreos 6:19.)

⁴ Náa carta dí niʼnirámáʼ náa inún bi̱ Hebreos, apóstol Pablo niʼni mbríguii dí kuaʼti̱i̱n nda̱wa̱á xóo mbá ancla (atraxnuu Hebreos 6:19). Mbaʼa nuthu ikhaa ni̱jkha̱ náa lamáa, ikha jngóo ndiʼyoo dí ancla nambáyúu barco mu xáʼga̱ nijnííʼ o xáʼga̱ kayóo giñánʼ. Mbóo mbiʼi índo̱ ikhaa ni̱jkha̱ náa barco, niʼni mbá giñánʼ mbiʼ. Nákha ikhú bi̱ nigún kuñu̱u̱n barco nidama̱ʼa̱ ancla náa iyaʼ mu xúʼko̱ barco xáxpatúma náa itsí (Hech. 27:29, 39-41). Xó má mbóoʼ ancla nambáyúu barco, dí kuáʼthi̱i̱nlu nda̱wa̱á nambáyulú mu xúʼni tsíngumi̱jna̱ náa Jeobá índo̱ naguáʼdáá xkujndu dí nindxu̱u̱ asndu xóo giñánʼ mbiʼ. Índo̱ nduʼyáá dí nánguá má mbayuuʼ makuwáánʼ májánʼ nambáyulúʼ muraʼníí xkujndu. Garmáʼáan a̱jkiu̱lú dí Jesús niʼthí dí muni gínáanʼ (Juan 15:20). Índo̱ nundxaʼwamíjná dí nikudaminaʼ maxnúlú Jeobá nda̱wa̱á rúʼko̱ nambáyulúʼ mu xúʼgua̱ níjni náa vida ndrígúlú náa kuwáánʼ ru̱ʼni̱ ñajuunʼ Dios.

5. Xú káʼnii nimbáyúu dí nigíʼthu̱u̱n nda̱wa̱á Jesús índo̱ ikha inuu makhañúu rá.

⁵ Guʼyáá xú káʼnii nimbáyúu dí nigi̱ʼthu̱u̱n nda̱wa̱á Jesús mu mawiji̱ jmbu maski ajndu ndiʼyoo dí inu muxiyáa. Nákha mbiʼi Pentecostés tsiguʼ 33, apóstol Pedro niʼthí mbá dí kiʼtáriyaʼ náa Salmo náa na̱ʼkha̱ raʼthí xú káʼnii nikumu̱u̱ Jesús: “Marigá rí magúʼthu̱u̱n, numuu rí xátatsiʼñúʼ náa Iñá wajinʼ, ní xátatsiʼñáánʼ rí xuyuuʼ xa̱bia̱a̱ʼ bi̱ naʼni rí jmbu mi̱ga. Matani̱ dí maʼdxuʼ náa inaaʼ” (Hech. 2:25-28; Sal. 16:8-11). Maski ajndu Jesús ndiʼyoo dí makhañúu, mú ni̱jkha̱nú ndiʼyoo dí Dios má gáʼni dí matuxi̱i̱ ga̱jma̱a̱ dí mata̱nga̱a̱ maxtáa mbu̱júu̱ʼ ga̱jma̱a̱ Anu̱u̱ mekhuíí (Heb. 12:2, 3).

6. Ndiéjunʼ niʼthí mbáa ndxájulú ga̱jma̱a̱ numuu dí nigi̱ʼthu̱u̱n nda̱wa̱á rá.

⁶ Núma̱aʼ má ga̱jma̱a̱ numuu dí nuguaʼthi̱i̱n nda̱wa̱á mbaʼin a̱ngiu̱lú niʼngu̱u̱n niraʼníí xkujndu. Guʼyáá xkri̱da ndrígóo Leonard Chinn, mbáa ndxájulú bi̱ niwi̱ji̱ jmbu bi̱ nixtáa náa Inglaterra. Nákha nirígá raga̱jma̱ Guerra náa xúgíʼ Numbaaʼ, ikhaa nixuda̱a̱ʼ náa guʼwá e̱jua̱nʼ numuu rí tándoo mani̱ndxu̱u̱ soldado ma̱ngaa túniñanʼ maʼtámijná ga̱jma̱a̱ nimbáa a̱jma̱ igu̱nʼ nda̱wa̱á nini dí mañajunʼ gakhii wéñuʼ. Nda̱wa̱á kayuuʼ, ikhaa niʼnirámáʼ: “Rí nigíʼnuʼ xúʼko̱ niʼni mba̱yo̱o̱ dí gíʼdoo wéñuʼ numuu marigá dí maraʼti̱i̱n nda̱wa̱á numuu dí rúʼko̱ nambáyaʼ maʼngaaʼ. Xkri̱da ndrígóo Jesús, apóstoles ga̱jma̱a̱ profetas, ga̱jma̱a̱ xúʼko̱ má xúgíʼ dí mitsaanʼ dí naʼthí náa Biblia marigá nayambáá wéñuʼ dí muraʼti̱i̱n dí májánʼ nda̱wa̱á ga̱jma̱a̱ naxnúlú tsiakii maʼngulú”. Leonard ni̱jkha̱nú ndiʼyoo dí nindxu̱u̱ asndu xóo mbá ancla dí magiʼthu̱u̱n dí májánʼ nda̱wa̱á, xúʼko̱ má ma̱ndoo mbuʼyáá mangáán.

7. Índo̱ nuraʼníí xkujndu, xú kaʼnii eʼni dí muguaʼthi̱i̱n má xúʼko̱ dí májánʼ nda̱wa̱á rá. (Romanos 5:3-5; Santiago 1:12.)

⁷ Naʼni dí muguaʼthi̱i̱n má xúʼko̱ dí májánʼ nda̱wa̱á índo̱ naʼngulú náa xkujndu ma̱ngaa índo̱ nduʼyáá dí Jeobá nambáyulúʼ ga̱jma̱a̱ nandoo kaʼyulú (atraxnuu Romanos 5:3-5; Santiago 1:12). Ikha jngóo mbiʼi xúgi̱ nuguaʼthi̱i̱n itháan dí májánʼ nda̱wa̱á ki xóo nákha inu nigíʼdi̱i̱ nijmañulúʼ dí gajkhun. Gixa̱a̱ nandoo dí maʼni maxmiéjunlú wéñuʼ xkujndu dí naguáʼdáá, mú Jeobá má nambáyulúʼ muraʼníí mámbá dí ikhaa.

8. Ndíjkha dí nuguaʼthi̱i̱n nda̱wa̱á nindxu̱u̱ xóo mbá casco rá. (1 Tesalonicenses 5:8.)

⁸ Náa Biblia ma̱ngaa naʼthí dí nuguaʼthi̱i̱n nda̱wa̱á nindxu̱u̱ xóo mbá casco (atraxnuu 1 Tesalonicenses 5:8). Mbáa soldado najmuu casco mu mañewu̱u̱n edxu̱u̱ mu xúni̱ gawíínʼ xa̱bu̱ sia̱nʼ. Ikháanʼ ma̱ngaa gíʼmaa muñewa̱a̱n  edxu̱lúʼ náa tsáʼkhá dí nagruiga̱ Gixa̱a̱. Ikhaa najmuu mbaʼa dí nagua̱ʼa̱ muʼni ga̱jma̱a̱ dí nundxaʼwamíjná mu maʼni gachúu edxu̱lúʼ. Xó má casco nañewu̱u̱n edxu̱u̱ mbáa soldado, xúʼko̱ má kayuuʼ dí nuguaʼthi̱i̱n nda̱wa̱á nañewu̱u̱n edxu̱lúʼ mu maguajún má xúʼko̱ jmbu náa Jeobá.

9. Ndiéjunʼ erígá índo̱ xa̱bo̱ nda̱a̱ dí guáʼthi̱i̱n nda̱wa̱á rá.

⁹ Dí nuguaʼthi̱i̱n makuwáánʼ kámuu mbiʼi nda̱wa̱á nambáyulúʼ muraʼwíí májánʼ dí muʼni. Mú, á mu i̱ndó nundxaʼwamíjná ga̱jma̱a̱ i̱ndó dí nandulú ikháanʼ, rúʼko̱ gáʼni dí mbuʼyáá dí nánguá gíʼdoo numuu muguaʼthi̱i̱n dí marigá nda̱wa̱á. Gundxaʼwámíjná dí niguáʼníí tikhun cristianos bi̱ nikúwá náa xuajen Corinto. Ikhiin nini mbáti̱ga̱ fe dí niguaʼdáá, dí matuxi̱ín xa̱bu̱ bi̱ nikháñúún (1 Cor. 15:12). Pablo niʼthí dí bi̱ na̱nguá enimbu̱ún kiʼsngáa rígi̱ i̱ndó nakúwá rí mbiʼi xúgi̱ (1 Cor. 15:32). Rí mbiʼi xúgi̱ mbaʼin xa̱bu̱ na̱nguá enimbu̱ún rí nakudaminaʼ maʼni Dios nda̱wa̱á, ikha jngó i̱ndó nuni gagimijná xó má eñún ikhiin rí mbiʼi xúgi̱. Mú, ikháanʼ nakumulú dí gajkhun mambanúu dí nikudaminaʼ maʼni Dios nda̱wa̱á. Dí nuguaʼthi̱i̱n nda̱wa̱á nindxu̱u̱ xó mbá casco dí nañewu̱u̱n edxu̱lúʼ ga̱jma̱a̱ nambáyulúʼ rí xákuwáanʼ xó má eyulú ikháanʼ rí migamíi maʼnimbáti̱ga̱a̱ dí mambáxulu gajmiúlú Jeobá (1 Cor. 15:33, 34).

10. Xú káʼnii embáyulú dí nuguaʼthi̱i̱n nda̱wa̱á mu xúndxaʼwamíjna dí raʼkhí rá.

¹⁰ Dí nuguaʼthi̱i̱n nda̱wa̱á rí nindxu̱u̱ xóo mbáa casco nañewu̱u̱n edxu̱lúʼ dí xúndxaʼwamíjna rí nda̱a̱ numuu muʼnimijna muʼni dí nandoo Jeobá. Mbá xkri̱da, mbáa maxtáa mbáa bi̱ mandxaʼwáminaʼ: “Ikhúún nditháan xáxtáa kámuu mbiʼi, na̱nguá nindxu̱u̱ mbáa májáanʼ xa̱bu̱. Nditháan xáʼngo̱o̱ maʼgánú mani̱ndxu̱ʼ xóo Dios gíʼthu̱u̱n mani̱ndxu̱ún xa̱bi̱i̱”. Garmáʼáan a̱jkiu̱lú dí Elifaz mbáa bi̱ nimbájxu̱u̱ ga̱jma̱a̱ Job niʼthí xúʼko̱ kayuuʼ. “Xú káʼnii gándoo mani̱ndxu̱u̱ kaʼwii mbáa xa̱bu̱ aʼkhá rá.” Nda̱wa̱á niʼthí: “Atayáá, Dios na̱nguá eku̱mu̱u̱ kaʼñún bi̱ kaʼwiin, ni má mekhu na̱nguá nindxu̱u̱ kaʼwu eʼyoo ikhaa” (Job 15:14, 15). ¡Ra̱ʼkhá tháán mindu̱wa̱ʼ rúʼko̱! Garmáʼáan a̱jkiu̱lú dí Gixa̱a̱ nandoo mundxaʼwamíjná xúʼko̱. Ikhaa ndaʼyoo, dí á mu nundxaʼwamíjná má xúʼko̱ rígi̱, rúʼko̱ gáʼni mundxaʼwamíjná dí nda̱a̱ dí májánʼ kuaʼti̱i̱n nda̱wa̱á. Xúniʼñáʼ dí maʼni nduwáánʼlú ku̱ma̱ dí mindu̱wa̱ʼ rúʼko̱, gundxaʼwámíjná má xúʼko̱ xúgíʼ dí nakudaminaʼ maʼni Jeobá nda̱wa̱á. Nditháan xúʼni a̱jma̱ a̱jkiu̱lú dí ikhaa nandoo rí xúgínʼ xa̱bi̱i̱ makuwíi̱n kámuu mbiʼi ga̱jma̱a̱ rí mambáñún makuwá ikhí (1 Tim. 2:3, 4).

11. Ndíjkha dí gíʼmaa maʼngo̱o̱ a̱jkiu̱lú índo̱ kuwáánʼ raguaʼthi̱i̱n mbiʼi dí mambanúu dí marigá nda̱wa̱á rá.

¹¹ Nguáná má naʼni gakhii dí muguaʼthi̱i̱n má xúʼko̱ dí marigá nda̱wa̱á, mbáa nánguá eʼngo̱o̱ a̱jkiu̱lú índo̱ kuwáánʼ ruguaʼthi̱i̱n dí Dios maʼnimbánuu dí nikudaminaʼ maʼni. Mú Jeobá xtáa kámuu mbiʼi ga̱jma̱a̱ na̱nguá eʼyoo mbiʼi xó má ikháanʼlu (2 Ped. 3:8, 9). Ikhaa maʼnimbánuu dí nikudaminaʼ maʼni, mú, mbáa xáʼni mbiʼi dí ikháanʼ nandulú. Mú ndiéjunʼ gámbáyulú muguaʼthi̱i̱n má xúʼko̱ dí marigá nda̱wa̱á ga̱jma̱a̱ dí maʼngo̱o̱ a̱jkiu̱lú asndu índo̱ gáʼga̱nú mbiʼi dí Dios gaʼnimbánuu dí nikudaminaʼ maʼni rá. (Sant. 5:7, 8.)

12. Xó má naʼthí náa Hebreos 11:1, 6, xú káʼnii mbríguii dí kuaʼti̱i̱n nda̱wa̱á ga̱jma̱a̱ fe ndrígúlú rá.

¹² Mbuʼyáá dí nindxu̱u̱ gajkhun dí kuaʼti̱i̱n nda̱wa̱á á mu kuwáánʼ mijngii gajmiúlú Jeobá numuu rí ikhaa naʼthí dí gajkhun mambanúu. Náa Biblia naʼni mbríguii dí kuaʼti̱i̱n nda̱wa̱á ga̱jma̱a̱ fe ndrígúlú ma̱ngaa dí “ikhaa maʼni numi̱ín bi̱ nduyáaʼ ga̱jma̱a̱ xúgíʼ a̱jkiu̱ún” (atraxnuu Hebreos 11:1, 6). Índo̱ nduʼyáá gajkhun dí Jeobá xtáa, itháan gúʼyáá gajkhun dí maʼnimbánuu xúgíʼ dí nikudaminaʼ maʼni. Guʼyáá ndiéjunʼ gándoo muʼni mu mambaxúlúʼ itháan gajmiúlú ikhaa ga̱jma̱a̱ muguaʼthi̱i̱n má xúʼko̱ dí marigá nda̱wa̱á.

13. Xú káʼnii gándoo gambáxulúʼ gajmiúlú Dios rá.

 ¹³ Guʼtákáñii Jeobá ga̱jma̱a̱ guraxnuu Ajngá rawuunʼ. Gajkhun má dí xándoo mbuʼyáá Jeobá mú ma̱ndoo mambaxúlúʼ gajmiúlú. Ma̱ndoo mbuʼyáá gajkhun dí ikhaa naʼdxawuun índo̱ nuʼtháán (Jer. 29:11, 12). Ma̱ngaa nandoo nuʼdxawíín dí naʼthúlú índo̱ nuraxnuu Ajngá rawuunʼ ga̱jma̱a̱ índo̱ nundxaʼwamíjná dí naʼthí ikhí. Índo̱ nuraxnulú xú káʼnii niñewu̱u̱n Jeobá xa̱bi̱i̱ bi̱ niguájun jmbu nákha wájyúuʼ, rúʼko̱ naʼni dí muguaʼthi̱i̱n má xúʼko̱ dí marigá nda̱wa̱á. Xúgíʼ dí kiʼnirámáʼ náa Ajngá rawuunʼ Dios “nigumarámáʼ mu maʼsngúlú, rí naʼthí náa Kiʼniraʼmáʼ naʼni rí maʼngulú ma̱ngaa naʼni̱i̱ a̱jkiu̱lú, rúʼko̱ naʼni rí maguaʼdáá mbá rí muguaʼthi̱i̱n nda̱wa̱á” (Rom. 15:4).

14. Ndíjkha dí májánʼ mundxaʼwamíjná xúgíʼ dí Jeobá niʼni ga̱jma̱á ni̱ndxu̱lú rá.

¹⁴ Gundxaʼwámíjná xú káʼnii niʼnimbánuu Jeobá dí nikudaminaʼ. Gundxaʼwamijna ga̱jma̱a̱ numuu Abrahán ga̱jma̱a̱ Sara. Ga̱jma̱a̱ numuu dí ikhiin wanii má ni xándoo muguaʼdiin e̱jñún, mú Dios nikudaminaʼ dí maguaʼdaa mbáa ada̱ (Gén. 18:10). Xú káʼnii nikumu̱u̱ Abrahán rá. Náa Biblia naʼthí “nigiʼdoo fe dí maʼga̱nú mani̱ndxu̱u̱ anu̱ún xa̱bu̱ bi̱ gákúwá náa mbaʼa xuajen mba̱ʼu̱” (Rom. 4:18). Mbáa xa̱bu̱ numbaaʼ mandxaʼwáminaʼ dí nándáa dí gíʼthu̱u̱n, mú Abrahán ni̱jkha̱nú ndiʼyoo gajkhun dí Jeobá maʼnimbánuu dí nikudaminaʼ maʼni. Xa̱bi̱i̱ Dios jmbii bugi̱ ni̱jkha̱nú má ndiʼyoo gajkhun dí Jeobá má gaʼnimbánuu dí nikudaminaʼ maʼni (Rom. 4:19-21). Historia xóo rígi̱ naʼsngúlú dí ma̱ndoo mbuʼyáá gajkhun dí Jeobá naʼnimbánuu dí naʼthí, maski ajndu ikháanʼ nakumulú dí mingíjyúuʼ nindxu̱u̱.

15. Ndíjkha rí gíʼmaa mundxaʼwamíjná má xúʼko̱ rí niʼni Dios ga̱jma̱á ni̱ndxu̱lú rá.

¹⁵ Gundxaʼwámíjná rí niʼni Dios ga̱jma̱á ni̱ndxu̱lú. Lá nindxaʼwamíjná xú káʼnii nimbánuu náa ikháanʼlu tikhu dí Dios nikudaminaʼ náa Ajngá rawuunʼ ráʼ. Mbá xkri̱da,  Jesús nikudaminaʼ dí Anu̱u̱ maxnúlú rí gáʼyulúʼ makuwáánʼ ga̱jma̱a̱ (Mat. 6:32, 33). Jesús ma̱ngaa niʼthí dí Jeobá maxnúlú xi̱ʼ kaʼwu ndrígóo á mu ikháanʼ nunda̱ʼa̱a̱lú (Luc. 11:13). Jeobá niʼnimbánuu dí nikudaminaʼ maʼni rígi̱. Mbáa ikháanʼ nundxaʼwamíjná i̱ʼwáʼ dí nikudaminaʼ rí ikhaa niʼnimbánuu náa ikháanʼlu, xóo maʼni mba̱a̱ a̱jkiu̱u̱n kaʼyulú, maʼni̱i̱ a̱jkiu̱lú ga̱jma̱a̱ dí maxnúlú ganitsu dí na̱ʼkha̱ náa ikhaa (Mat. 6:14; 24:45; 2 Cor. 1:3). Á mu nundxa̱ʼwamijnalu ndiéjunʼ niʼni Dios ga̱jma̱a̱ ni̱ndxu̱lú, rúʼko̱ gáʼni dí muguaʼthi̱i̱n má xúʼko̱ dí marigá nda̱wa̱á.

16. Ndíjkha dí kuaʼti̱i̱n nda̱wa̱á nindxu̱u̱ mbá regalo dí gíʼdoo numuu rá.

¹⁶ Dí kuaʼti̱i̱n makuwáánʼ kámuu mbiʼi nda̱wa̱á nindxu̱u̱ mbá regalo dí gíʼdoo wéñuʼ numuu dí nixnúlú Dios. Ra̱ʼkhá tháán nandulú dí maʼga̱nú mbiʼi rúʼko̱ dí kuaʼti̱i̱n ga̱jma̱a̱ nduʼyáá gajkhun dí mambanúu. Rí kuaʼti̱i̱n marigá nda̱wa̱á nindxu̱u̱ xóo mbá ancla numuu dí nambáyulúʼ índo̱ nuraʼníí xkujndu, índo̱ nuni gínáanʼ ga̱jma̱a̱ índo̱ migamíi muradiáanʼlu. Ma̱ngaa nindxu̱u̱ xóo mbá casco numuu rí nañewu̱u̱n edxu̱lúʼ ga̱jma̱a̱ nambáyulúʼ muʼnigaʼduunʼ dí raʼkhí ga̱jma̱a̱ muʼni dí májánʼ. Rí Biblia nambáyulúʼ muguaʼthi̱i̱n nda̱wa̱á naʼni rí makuwáánʼ itháan mijngii náa Dios ga̱jma̱a̱ xúʼko̱ nasngájmulú dí Dios nandoo kaʼyulú wéñuʼ. Dí muguaʼthi̱i̱n má xúʼko̱ dí marigá nda̱wa̱á nambáyulúʼ wéñuʼ.

17. Ndíjkha rí naʼni maʼdxuu a̱jkiu̱lú dí kuaʼti̱i̱n nda̱wa̱á rá.

¹⁷ Náa carta dí niʼnirámáʼ Pablo náa inún cristianos bi̱ Roma, niʼthúún: “Gaʼdxala ga̱jma̱a̱ numuu rí kuaʼti̱i̱n” (Rom. 12:12). Pablo nidxuu numuu dí ni̱jkha̱nú ndiʼyoo dí á mu nawi̱ji̱ má xúʼko̱ jmbu náa Jeobá ikhaa maxtáa kámuu mbiʼi mekhuíí. Ikháanʼlu ma̱ngaa ma̱ndoo maʼdxulu ga̱jma̱a̱ numuu dí kuaʼti̱i̱n marigá nda̱wa̱á numuu rí nduʼyáá gajkhun dí Jeobá maʼnimbánuu dí nikudaminaʼ maʼni. Xó má niʼthí mbáa bi̱ niʼnirámáʼ mbá salmo: “Gagi xtáa […] bi̱ gíʼthu̱u̱n náa Jeobá Dios ndrígóo, […] bi̱ nindxu̱u̱ má xúʼko̱ jmbi” (Sal. 146:5, 6).