1. a) Ndiéjunʼ e̱yo̱o̱ gáʼthúu̱n dí ndayúlú mbuʼyáaʼ Dios rá. b) Xkáʼnii kuajtuminaʼ ga̱jma̱a̱ dí makuwáanʼlu gagi rá.

 DÍ MAKUWÁANʼLU gagi ma̱ndoo mbajyúuʼ kámuu mbiʼi. Náa discurso dí nixná Jesús náa kúbá niʼthí: “Gagi kúwá bi̱ nduyáá rí nda̱ñúnʼ mbuyáaʼ Dios” (Mat. 5:3). Ikhaa ndiʼyoo dí ikháanʼ nigumawáanʼ mu ma̱ndoo muniʼníiʼ ga̱jma̱a̱ mbuʼyamajkuíí Jeobá bi̱ Niʼniwáánʼlú. Ikhaa rúʼko̱ nindoo gaʼthí náa Biblia índo̱ niʼthí ‹ndayúlú mbuyáaʼ Dios›. Numuu dí Jeobá nindxu̱u̱ mbáa “Dios gagi”, ikha jngóo mangáanʼlu ma̱ndoo makuwáanʼ gagi (1 Tim. 1:11).

2, 3. a) Tsíin eʼwíinʼ ma̱ndoo makuwíin gagi niʼthí Jesús rá. b) Ndiéjunʼ guʼyáá náa artículo rígi̱ rá. Ndíjkha dí ndayóoʼ muʼthá rígi̱ rá.

² Lá ndaʼyóoʼ makuwáanʼlu májánʼ mu ma̱ndoo makuwáanʼlu gagi ráʼ. Na̱nguá, náa Discurso dí Jesús nixná náa Kúbá niʼthí mbóoʼ dí naʼniulú tsiánguá. Niʼthí “bi̱ kúwi̱i̱n ngíná” ma̱ndoo makuwíin gagi, maski ajndu naʼni gawúúnʼ wéñuʼ eʼni mbá aʼkhá dí nini̱ o nuraʼníí mbóoʼ gaʼkhu gakhii. Ma̱ngaa niʼthí dí “bi̱ naguma gíníin ga̱jma̱a̱ numuu rí nuni̱ dí jmbu” o numíníiʼ numuu dí nuthi wéñúúnʼ ga̱jma̱a̱ numuu dí nindxu̱ún xa̱bi̱i̱, ma̱ndoo makúwi̱i̱n gagi (Mat. 5:4, 10, 11). Mú, lá gajkhun ma̱ndoo makuwáanʼlu gagi índo̱ gúraʼníí xkujndu xóo rúʼko̱ ráʼ.

³ Jesús niʼthí, raʼkháa rí makuwáanʼlu májánʼ maʼni dí makuwáanʼlu  gagi, rí ndayóoʼ muʼni nindxu̱u̱ dí mbuʼyáaʼ Dios ga̱jma̱a̱ dí muʼguá kanuu náa ikhaa (Sant. 4:8). Ndiéjunʼ gámbáyulú rá. Náa artículo rígi̱ mbuʼyáá ajtsú enii dí ma̱ndoo mambáyulú mu makuwáanʼlu itháán gagi.

4. Ndiéjunʼ nindxu̱u̱ timbá dí ndayóoʼ muʼni mu makuwáanʼlu gagi rá. (Salmo 1:1-3.)

⁴ TIMBÁ: Mu makuwáanʼlu gagi, ndayóoʼ muraxnuu ga̱jma̱a̱ muʼnigajmaa Ajngá rawuunʼ Dios. Jesús niʼni mbríguíi Ajngá rawuunʼ Dios ga̱jma̱a̱ mbá ganitsu. Xó má xujkhúʼ ga̱jma̱a̱ ikháanʼ ndayúlú muphiʼtsu mu makuwáanʼ. Mú i̱ndó ikháanʼlu ma̱ndoo muraxnuu Ajngá rawuunʼ Dios, ga̱jma̱a̱ ndayóoʼ muʼni rígi̱. Ikha jngóo Jesús niʼthí: “Raʼkháa i̱ndó rí makuiʼtsu gíʼmaa maxtáa ga̱jma̱a̱ xa̱bu̱, gíʼmaa maʼnimbánuu xúgíʼ rí naʼthí Jeobá” (Mat. 4:4). Xúgíʼ mbiʼi ndayóoʼ muʼnigajmaa ma xúʼko̱ Biblia, mbáa bi̱ niʼnirámáʼ salmo niʼthí: ‹Ra̱ʼkhá tháán xtáa gagi xa̱bu̱ […] bi̱ naniguuʼ maʼni xó má eʼthí náa xtángoo ndrígóo Jeobá, ga̱jma̱a̱ mbiʼí mbruʼun nandxaʼwáminaʼ rí niguxnuu› (atraxnuu Salmo 1:1-3). b

5, 6. a) Ndiéjunʼ gándoo gajmañulú náa Biblia rá. b) Xú káʼnii gámbáyulú á mu nuraxnuu rá.

⁵ Numuu dí Jeobá nandoo kaʼyulú ikha jngóo náa Biblia naʼthúlú ndiéjunʼ guʼni mu makuwáanʼlu gagi. Mbáa xkri̱da, ikhaa naʼsngúlú náa numuu dí niʼniwáanʼlú, xóo guʼni  mu mambajxú gajmiúlú ga̱jma̱a̱ ndiéjunʼ guʼni mu maʼni mba̱a̱ a̱jkiu̱u̱n kaʼyoo aʼkhúlú. Ma̱ngaa naʼthúlú mbóoʼ dí mitsaanʼ dí nakudaminaʼ maʼni ga̱jma̱a̱ ni̱ndxu̱lú nda̱wa̱á (Jer. 29:11). Índo̱ nuniʼnúuʼ dí gajkhun rígi̱ índo̱ nuʼnigajmaa Biblia naʼni makuwáanʼlu gagi wéñuuʼ.

⁶ Xó má eʼyáá, Biblia kagu̱ mbaʼa consejo dí ma̱ndoo mambáyulú makuwáanʼ. Nakuwáanʼlu gagi índo̱ nuʼni mbáníí dí naʼthí ikhí. Á mu naxmiéjunlú eʼni xkujndu, guriʼyáʼ mbiʼi mu muraxnuu Ajngá rawuunʼ Jeobá ga̱jma̱a̱ gundxaʼwamíjna̱ dí naʼthí ikhí. Jesús niʼthí: “¡Gagi kúwá bi̱ nudxawíín Ajngá rawuunʼ Dios ga̱jma̱a̱ nugíʼ nunimbáníí!” (Luc. 11:28).

7. Ndiéjunʼ gíʼmaa muʼni índo̱ guraxnuu Ajngáa rawuunʼ Dios rá.

⁷ Índo̱ guraxnuu Ajngáa rawuunʼ Dios ndayóoʼ muriʼyáʼ mbiʼi mu “mbuʼyáá ndiéjunʼ phú e̱ʼkha̱ raʼthí”. Ndiéjunʼ eyoo gáʼthúu̱n rígi̱ rá. Guʼgíʼ mbóoʼ xkri̱da. Gundxaʼwamíjna̱ dí mbáa naʼni mújúunʼ mbóoʼ ganitsu dí nanigulúʼ mu̱ʼphu̱. Numuu dí ra̱ʼkhá tháán e̱chu̱lu ga̱jma̱a̱ mbaʼa dí nundxa̱ʼwáá edxu̱lú ikha jngóo i̱ndó naʼphu̱ rajngulu. Índo̱ naguámbulú na̱jkuánu nduʼyáá dí ra̱ʼkhá tháan nacha̱ ni̱ʼphu̱lu, nda̱wa̱á nagáwíinʼ a̱jkiu̱lú numuu dí nindulú mu̱ʼphu̱ itháan mañúú mu xúʼko̱ mbuʼyáá xóo phú miʼtsí ganitsu. Ma̱ndoo magíʼnulú ikháá kayúʼ índo̱ nuraxnuu Biblia. Mbáa numuu dí ra̱ʼkhá tháán nachulú ikha jngóo na̱nguá kuaʼdáá mbiʼi mu mbuʼyáá dí Jeobá nandoo maʼsngúlú. Guríyáʼ mbiʼi mu manigulúʼ dí kuwáanʼ ruraxnuu xóo dí asndu makumulú ndiéjunʼ dí xtáa rarígá ikhí ga̱jma̱a̱ muʼnimíjna̱ muʼdxawíín dí nithi ma̱ngaa dí mundxaʼwamíjna̱ náa dí niraxnuu. Á mu nuʼni xúgíʼ rígi̱ makuwáanʼlu itháan gagi.

8. Xú káʼnii eʼnimbánúu ñajunʼ dí nijuixnájxi̱i̱ “ñumbáá jmbii bi̱ májánʼ endxa̱ʼwáminaʼ” rá. (Atayáá nota ma̱ngaa.)

⁸ Jesús nixnáxu̱u̱ “ñumbáá jmbii bi̱ májánʼ endxa̱ʼwáminaʼ”, mu maxnúlú ganitsu dí na̱ʼkha̱ náa Dios mbiʼi dí kaʼyoo, ga̱jma̱a̱ na̱jkuánu nduʼyáá dí nuxnulú xúgíʼ ganitsu rígi̱ (Mat. 24:45). c Mbóoʼ dí itháan gíʼdoo numuu dí ñumbáá jmbii naʼni mújúunʼ, nindxu̱u̱ Biblia (1 Tes. 2:13). Rígi̱ nambáyulú mu muniʼnuuʼ dí Jeobá nandxa̱ʼwáminaʼ. Ikha jngóo nuraxnuu i̱yi̱i̱ʼ Bi̱ Nayejngoo ga̱jma̱a̱ ¡Awaxunʼ! Ga̱jma̱a̱ i̱ʼwáʼ dí rígá náá jw.org. Ma̱ngaa nuʼni ratamíjná dí mbuʼyáá náa reunión ga̱jma̱a̱ nduʼyáá JW Broadcasting^® dí nagájnuu mambá igu̱nʼ ga̱jma̱a̱ nduʼyáá náa ajngúlú á mu rígá. Á mu nuʼnigajmaa xúgíʼ ganitsu rígi̱ makuwáanʼlu gagi wéñuuʼ.

9. Ndiéjunʼ nindxu̱u̱ dí ragajma dí ndayóoʼ muʼni mu makuwáanʼlu gagi rá.

⁹ RAGAJMA: Mu makuwáanʼlu gagi, ndayóoʼ munimbulú kiʼtáñajunʼ ndrígóo Jeobá. Mbáa bi̱ niʼnirámáʼ salmo niʼthí: “Gagi kuwa xúgínʼ xa̱bu̱ bi̱ namiñun kuyáá Jeobá, bi̱ jngruigu̱u̱n náa kambo̱o̱” (Sal. 128:1). Dí mamiñulúʼ kuʼyáá Jeobá nandoo gáʼthúu̱n dí mbuʼyamajkuíí, dí asndu tsíyulú muʼni nimbá dí ikhaa tsénigu̱u̱ʼ (Prov. 16:6). Ikha jngóo nuʼnimíjna̱ má xúʼko̱ munimbulú kiʼtáñajunʼ dí nindxu̱u̱ májánʼ ga̱jma̱a̱ dí ra̱májánʼ dí na̱ʼkha̱ náa Biblia (2 Cor. 7:1). Á mu nuʼni dí Jeobá naniguuʼ ga̱jma̱a̱ naguiyulú kuʼyáá dí ikhaa tsénigu̱u̱ʼ, makuwáanʼlu itháán gagi (Sal. 37:27; 97:10; Rom. 12:9).

10. Xó má eʼthí náa Romanos 12:2, Ndiéjunʼ eyóoʼ muʼni rá.

¹⁰ (Atraxnuu Romanos 12:2). Mbáa xa̱bu̱ ma̱ndoo maʼga̱nú mbaʼyoo dí Jeobá kaʼyoo maʼtáñajunʼ mu maʼthí ndiéjunʼ nindxu̱u̱ dí májánʼ ga̱jma̱a̱ dí ra̱májánʼ, mú ma̱ngaa ndayóoʼ  maʼnimbo̱o̱ kiʼtáñajunʼ ndrígóo Dios. Guʼgíʼ mbá xkri̱da. Mbáa xa̱bu̱ ndaʼyoo dí mbáa xa̱bu̱ ñajunʼ nagrui̱ga̱ xtángoo xóo magún kuñu̱u̱n carro náa kamba̱a̱, mú ikhaa tsíyoo gáʼnimbo̱o̱ xtángoo rúʼko̱. Ikha jngóo nagáyúu asndu xó má eyoo. Xóo eʼnilú masngajmá á mu gajkhun nduʼyamajkuíí kiʼtáñajunʼ ndrígóo Jeobá dí nindxu̱u̱ itháán májánʼ (Prov. 12:28). David ni̱jkha̱nú ndiʼyoo dí nindxu̱u̱ gajkhun rúʼko̱, numuu dí niʼthún Jeobá: “Natani maniʼnuuʼ kamba̱a̱ rí naʼni maxtáá. Rí xtaa naʼni maʼdxuʼ wéñuʼ; náa ñawún májáanʼ marígá gagi asndu kámuu” (Sal. 16:11).

11, 12. a) Ndíjkha jngóo ndayóoʼ muñeumíjna̱ índo̱ naxmiéjunlú o kuwáanʼ gíná rá. b) Xóo káʼnii embáyulú Filipenses 4:8 mu muraʼwíí májánʼ dí muʼni gagimijná ga̱jma̱a̱ rá.

¹¹ Índo̱ naxmiéjunlú o nakáguabáanʼ, mbáa nduʼyáʼ rí muʼni mu mambumulú xkujndu ndrígulú, lá ragájkhun ráʼ. Mú ndayóoʼ muñeumíjna̱ mu xúʼni̱ mbá dí Jeobá nawiyuuʼ kaʼyoo (Efes. 5:10-12, 15-17).

¹² Náa carta dí niʼnirámáʼ apóstol Pablo rí nikuʼmá náa inún a̱ngiu̱lú Filipos, niʼthúún dí ndayóoʼ mundxaʼwamíjna̱ má xúʼko̱ rí nindxu̱u̱ jmbu, kaʼwu, rí naʼni marigá ngajua xúgíʼ rí nindxu̱u̱ májánʼ (atraxnuu Filipenses 4:8). Maski ajndu Pablo na̱nguá niʼthí mbájmbu ndiéjunʼ gúraʼwíí dí muʼni gagimijná ga̱jma̱a̱, mú ajngáa dí niʼthí gíʼmaa maxná ikhulú índo̱ gúraʼwíí mbá dí muʼni. Xúgíʼ náa guxkamaa ajngáa “xúgíʼ dí rígá” náa versículo rígi̱, guriʼkuri̱ya̱a̱ʼ mu muʼthá “ajmúú ”, “películas”, “libros” o “videojuegos”. Rígi̱ gámbáyulú mbuʼyáá ndiéjunʼ dí naniguuʼ Dios ga̱jma̱a̱ ndiéjunʼ dí tséniguuʼ. Nandulú makuwáanʼlu xó má eʼthí náa kiʼtáñajunʼ ndrígóo Jeobá (Sal. 119:1-3). Dí maguaʼdáálu mbá ku̱ma̱ kaʼwu ma̱ndoo mambáyulú mbuyáá dí maʼni ajtsú enii rí mambáyulú makuwáanʼlu gagi (Hech. 23:1).

13. Ndiéjunʼ nindxu̱u̱ dí maʼni ragajtsú rí naʼni makuwáanʼlu gagi rá. (Juan 4:23, 24.)

¹³ RAGAJTSÚ: Guʼyáá dí mbuʼyamajkuíí Jeobá gíʼdoo itháan numuu. Numuu dí Jeobá nindxu̱u̱ bi̱ niʼniwáánʼlú, Ikha jngóo kaʼyoo mbuʼyamajkuíí (Apoc. 4:11; 14:6, 7). Dí itháan gíʼdoo numuu nindxu̱u̱ dí mbuʼyamajkuíí Jeobá xó ma ikhaa eyoo, “espíritu ga̱jma̱a̱ rí gajkhun” (atraxnuu Juan 4:23, 24). Nandulú dí espíritu santo maxná ikhulú mu mbuʼyamajkuíí Dios xó má e̱ʼkha̱ raʼthí náa Biblia. Rí muʼni ñajuunʼ ikhaa gíʼmaa magiʼdoo itháan numuu, maski ajndu náa xuajen dí kuwáanʼlu tséniñulú muʼtáraʼa. Rí mbiʼi xúgi̱ itháán dí 100 a̱ngiu̱lú kajchún náa guʼwá e̱jua̱nʼ numuu dí nindxu̱ún testigos de Jeobá. d Maski ajndu xúʼko̱, kúwá gagi ga̱jma̱a̱ nuni̱ asndu xó má eʼngu̱u̱n mu mutajkáan, munigajmaa, muthúún eʼwíinʼ numuu Dios ga̱jma̱a̱ numuu Reino ndrígóo. Maski ajndu nuthi wéñulú nuni̱ gínáanʼlu mu kúwáanʼ gagi, nduʼyáá dí Jeobá xtáa ga̱jma̱a̱ ni̱ndxu̱lú ga̱jma̱a̱ ikhaa maʼni tsajkurámááʼlu (Sant. 1:12; 1 Ped. 4:14).

14. Ndiéjunʼ nigíʼnuu mbáa ndxájulú bi̱ na̱ʼkha̱ Tayikistán, ga̱jma̱a̱ náá numuu rá.

¹⁴ Rígá experiencia dí narígá mbiʼi rí kuwáanʼlu, náa nasngájma xó má ndiʼyáá náa ajtsú enii dí nambáyulú mu makuwáanʼ gagi, tséʼniuu má xóo káʼnii kuwáanʼlu. Guʼyáá dí nigíʼnuu Yovidón Boboyónov, mbá dxámá bi̱ gíʼdoo 19 tsiguuʼ bi̱ na̱ʼkha̱ náa Tayikistán. Numuu rí tándoo mani̱ndxu̱u̱ soldado ikha jngóo nigún gúya̱a̱ ga̱jma̱a̱ tsiakii náa goʼwóo nákha 4 ñajunʼ gu̱nʼ octubre tsiguʼ 2019. Mbaʼa igu̱nʼ niguáʼdaa, na̱nguá nixnáá maʼga̱a̱ náa goʼwóo ga̱jma̱a̱ nini gínáa xó má eni̱ mbáa bi̱ naʼni dí  raʼkhí. Náa i̱ʼwáʼ País niwán dí nini̱. Nithi dí nixnáá numuu dí nitsudaa rí maʼthí dí mani̱ndxu̱u̱ mbáa soldado ga̱jma̱a̱ dí magíʼ xtiñúún. Ndawaá dí nithi rí magíʼnuu ga̱jma̱a̱ nixuʼmaa dí mañajunʼ gakhii, xa̱bu̱ ñajunʼ bi̱ xtáa náa xuajen rúʼko̱ nigáwíinʼ a̱jkiu̱ún ga̱jma̱a̱ niʼthí dí muniña̱a̱ʼ maʼga̱a̱. Maski ajndu Yovidón niraʼnuu xúgíʼ xkujndu rígi̱, ikhaa niguiji jmbu má xúʼko̱ ga̱jma̱a̱ nixtáa gagi. Ndiéjunʼ nimbáyúu xá. Dí mbayáaʼ má xúʼko̱ Dios.

15. Xú káʼnii niʼnigajmaa Yovidón índo̱ nixtáa náa guʼwá ejua̱a̱nʼ rá.

¹⁵ Índo̱ Yovidón nixtáa náa guʼwá ejua̱a̱nʼ tániñuuʼ raʼnigajmaa maski ajndu ikhaa tágiʼdoo Biblia ga̱jma̱a̱ nimbá i̱yi̱i̱ʼ ndrígúlú. Ndiéjunʼ niʼni xá. Índo̱ a̱ngiu̱lú nigún kuñu̱u̱ dí miʼkhu, náa awúu̱n bolsa eni̱raʼmáʼ texto dí kaʼyoo mámbá mbiʼi mu maguxnuu, ikha jngóo Yovidón nindoo niguxnuu Biblia ga̱jma̱a̱ nidxaʼwáminaʼ rí niguxnuu xúgíʼ mbiʼi. Índo̱ nigájna̱a̱ náa guʼwá ejua̱a̱nʼ, niʼthúún bi̱ xóo na̱nguá niraʼníí mbá xkujndu gakhii: “Dí ndayóoʼ muni̱ xó má eʼngo̱o̱ mu magún kanuu itháán mijngii náa Jeobá. Mú dí itháán gíʼdoo numuu nindxu̱u̱ dí muraxnuu Biblia ga̱jma̱a̱ dí muʼnigajmaa i̱yu̱lúʼ”.

16. Ndiéjunʼ niʼni Yovidón rá.

¹⁶ Ndxájulú Yovidón niʼnimbo̱o̱ kiʼtáñajunʼ  ndrígóo Jeobá. Nigíminaʼ maʼni dí Jeobá naniguuʼ ga̱jma̱a̱ rí ikhaa ndaʼyoo dí gíʼdoo numuu ki xóo maʼni dí ra̱májánʼ. Niríyaʼ mbiʼi mu mbaʼyoo ga̱jma̱a̱ tsumáá xúgíʼ dí Dios niʼniwíi. Mámbá miʼcha̱ dí ndajui̱i̱ naʼdxun nuni̱ ajmúú ño̱ʼo̱, ga̱jma̱a̱ mbruʼun ndaʼyoo gu̱nʼ ga̱jma̱a̱ a̱ʼgua̱a̱n. Niʼthí: “Xúgíʼ dí Jeobá niʼniwíi naʼni maʼdxuʼ ga̱jma̱a̱ naʼni maxtáá májánʼ”. Índo̱ nduʼyamajkuíí xúgíʼ dí najmañulú numuu Dios ga̱jma̱a̱ xúgíʼ dí Jeobá niʼniwíi naʼni makuwáanʼlu gagi, ga̱jma̱a̱ rígi̱ naxnulu tsiakii mu maʼngulú.

17. Xú káʼnii gándoo gámbáyúu 1 Pedro 1:6, 7 mbáa bi̱ xtáa ikhaa kayuuʼ xóo nixtáa Yovidón rá.

¹⁷ Yovidón ma̱ngaa nigíʼ ginii rí maʼni ñajuunʼ Jeobá. Ndiʼyoo rí gíʼdoo wéñuʼ numuu dí maguiji jmbu náa Dios bi̱ gajkuwiin. Jesús niʼthí: “I̱ndó Jeobá Dios ndrígáaʼ gátayamajkuíí ga̱jma̱a̱ i̱ndó ikhaa gátani̱ ñajuunʼ” (Luc. 4:8). Comandantes ga̱jma̱a̱ soldados nindúún dí Yovidón maniñuʼ ranindxu̱u̱ testigo de Jeobá. Mú ikhaa niʼtákáñuu mbiʼí mbruʼún Jeobá dí mambáyúu mu maʼngo̱o̱ ga̱jma̱a̱ maguiji jmbu. Maski ajndu nimínuuʼ mu ikhaa niʼngo̱o̱ ga̱jma̱a̱ táʼni guabaminaʼ. Ikhaa nixtáa gagi numuu dí nigiʼdoo mbóoʼ dí tágiʼdoo nákha ginii, ikhaa nindxu̱u̱: Mbá fe dí niraʼnuu xkujndu dí itháán gíʼdoo numuu (atraxnuu 1 Pedro 1:6, 7).

18. Ndiéjunʼ gándoo gúʼni mu makuwáanʼlu gagi má xúʼko̱ rá.

¹⁸ Jeobá ndaʼyóoʼ ndiéjunʼ dí ndayúlú mu makuwáanʼlu gagi. Á mu nuʼgíʼ nuʼni mbá najtsú enii dí ndiʼyáálu náa artículo rígi̱, ma̱ndoo makuwáanʼlu ma xúʼko̱ gagi maski ajndu nuraʼníí xkujndu. Ikha jngóo ma̱ngoo muʼthá: “¡Gagi xtáa xuajin bi̱ Dios ndrígóo nindxu̱u̱ Jeobá!” (Sal. 144:15).