1. Xú káʼnii eni̱ mbaʼin xa̱bu̱ índo̱ nudxawíín ku̱ma̱ ndrígóo Jeobá rí mbiʼi xúgi̱ rá. (Proverbios 1:20, 21.)

 NÁA mbaʼa xuajen dí rígá náa xúgíʼ numbaaʼ matañun bi̱ nutaraʼa ga̱jma̱a̱ gagi numuu Reino nuxnaraʼa i̱yi̱i̱ʼ náa nanújngúún mbaʼin xa̱bu̱. Lá nitruguambáá má ikháán náa najuiʼtaraʼa xóo rígi̱ rá. Á mu nitani̱ má, mbáa na̱ʼkha̱ náa edxa̱ʼ mbá rí nambríguii ga̱jma̱a̱ rí naʼthí náa Proverbios, índo̱ naʼthí dí ku̱ma̱ nandxaʼwá náa kúwá mbaʼin xa̱bu̱ mu mudxawíín consejo ndrígóo (atraxnuu Proverbios 1:20, 21). b Náa Biblia ga̱jma̱a̱ náa i̱yi̱i̱ʼ ndrígúlú na̱ʼkhá “ku̱ma̱ rí nindxu̱u̱ gajkhun”: Ku̱ma̱ ndrígóo Jeobá. Ajngáa rígi̱ nindxu̱u̱ rí ndañún mudxawíín xa̱bu̱ mú mambáñún makuwá nda̱wa̱á. Nanigulúʼ índo̱ nduʼyáá rí mbáa nagruigú i̱yi̱i̱ʼ ndrígúlú. Mú raʼkháa xúgíinʼ nanigúun. Tikhun asndu tsíñún má maratúun ga̱jma̱a̱ numuu Biblia eʼwíínʼ nunduʼwajmanʼlú nakumu̱ún rí Biblia nindxu̱u̱ mbá i̱yi̱i̱ʼ wayuu. Ma̱ngaa eʼwíínʼ nutanumulú ga̱jma̱a̱ numuu rí najmañulúʼ náa Biblia, nuthí rí bi̱ nduyamajkuíí Biblia tséniñáʼ matani rí nanigua̱ʼ. Ga̱jma̱a̱ tséyamajkuíí rí nunimbu̱ún maski má xúʼko̱, Jeobá bi̱ májánʼ a̱jkiu̱u̱n naniñuʼ rí xúgíinʼ xa̱bu̱ majmañún ku̱ma̱ rí nindxu̱u̱ gajkhun. Xú káʼnii eʼni xá.

2. a Xú káʼnii gándoo guxkamaa ku̱ma̱ rí nindxu̱u̱ gajkhun rí mbiʼi xúgi̱ rá. b) Ndiéjunʼ eraʼwíí muni mbaʼin xa̱bu̱ rá.

² Jeobá najmuu Biblia mu xa̱bu̱ mudxawíín ku̱ma̱ dí gajkhun. Mbaʼin má xa̱bu̱ bi̱ kúwá náa numbaaʼ guaʼdáá libro rígi̱. Ndiéjunʼ gándoo gúʼthá ga̱jma̱a̱ numuu i̱yi̱i̱ʼ ndrígúlú dí nagájnuu náa Biblia rá. Núma̱aʼ má ga̱jma̱a̱ numuu rí Jeobá naʼni tsajkurámúu ñajunʼ rígi̱, rígá i̱yi̱i̱ʼ ndrígúlú náa itháan rí  1,000 ajngáa. Bi̱ nudxawíín, xóo muʼthá bi̱ nuraxnuu Biblia ga̱jma̱a̱ i̱yi̱i̱ʼ ndrígúlú nugíiʼ nuni rí najmañún ga̱jma̱a̱ nambáñun maski má mbaʼin xa̱bu̱ nuraʼwíí dí xúdxawíín ku̱ma̱ rí nindxu̱u̱ gajkhun. Índo̱ ikhiin nuraʼwíi rí muni, nakumu̱ún kuyamijná i̱ndó ikhiin o nunimbu̱ún rí nuthi eʼwíinʼ xa̱bu̱. Mbáa nguáná asndu tsíñún gúyulú numuu rí nanigulúʼ muʼnimbulúʼ rí naʼthí náa Biblia. Náa artículo rígi̱ muʼthá náa numuu xa̱bu̱ nuni xúʼko̱. Mú, ginii mbuʼyáá xú káʼnii gándoo muxkamaa ku̱ma̱ rí na̱ʼkha̱ náa Jeobá.

3. Ndiéjunʼ gíʼmaa muʼni mu majmañulúʼ mundxaʼwáá májánʼ edxu̱lúʼ rá.

³ Ku̱ma̱ nindxu̱u̱ dí nambáyulúʼ muraʼwíí májánʼ rí muʼni. Mú, ku̱ma̱ rí nindxu̱u̱ gajkhun rígá itháan dí eyoo gáʼthúu̱n. Náa Biblia naʼthí: “Rí mamiñáanʼ xtayáá Jeobá ikhú nagi̱ʼdu̱u̱ naraʼdáá ku̱ma̱, rí ejmañaaʼ ga̱jma̱a̱ numuu bi̱ Mikaʼwii naʼni dí makruaʼaaʼ” (Prov. 9:10). Ikha jngóo á mu nuraʼwíí mbá rí gíʼdoo numuu rí muʼni gíʼmaa majmulú dí ‹najmañulu ga̱jma̱a̱ numuu bi̱ Mikaʼwii›, xóo muʼthá, mundxaʼwáá edxu̱lúʼ xóo ndxaʼwóo edxu̱u̱ Jeobá. Ma̱ndoo muxkamaa ku̱ma̱ rígi̱ náa Biblia ga̱jma̱a̱ náa i̱yi̱i̱ʼ ndrígúlú. Á mu nuʼni xúʼko̱ musngajmá gajkhun rí najmañulúʼ mundxa̱ʼwa̱a̱ májánʼ edxu̱lúʼ (Prov. 2:5-7).

4. Náá numuu rí i̱ndó Jeobá gíʼdoo ku̱ma̱ rí nindxu̱u̱ gajkhun rá.

⁴ I̱ndó Jeobá gíʼdoo ku̱ma̱ rí nindxu̱u̱ gajkhun (Rom. 16:27). Náá numuu rí xúʼko̱ eʼthá rá. Timbá, numuu rí ikhaa niʼniwáánʼlú ga̱jma̱a̱ gíʼdoo mbá ku̱ma̱ rí nimbáa bi̱ nigumariya̱a̱ʼ na̱nguá xóo magiʼdoo (Sal. 104:24). Raga̱jma̱, xúgíʼ rí ikhaa niʼni nasngájma ku̱ma̱ ndrígóo (Rom. 11:33). Ragajtsú, numuu rí consejo ndrígóo nambáñun bi̱ nugíiʼ nuni rí najmañún (Prov. 2:10-12). Á mu nandulúʼ rí gajkhun majmañulúʼ, ndayóo mundrígú ajtsú enii rí muʼni ga̱jma̱a̱ muniʼñáaʼ rí ikhaa maxnúlúʼ ikha náa dí guraʼwí muʼni.

5. Xú káʼnii kúwíin xa̱bu̱ bi̱ tsénimbu̱ún rí i̱ndó náa Jeobá e̱ʼkha̱ ku̱ma̱ rí nindxu̱u̱ májánʼ rá.

⁵ Mbaʼin Xa̱bu̱ bi̱ nuʼtáruʼun naguanu nduyáá rí nagui̱i̱ rí nigumawíi, mú tsíñún gúnimbu̱ún rí xtáa mbáa bi̱ niʼniwíi ikhiin nunimbu̱ún náa evolución. Eʼwíínʼ nuthi rí nunimbu̱ún kuyáá Dios, mú nakumu̱ún rí naʼthí náa Biblia nindxu̱u̱ wayuu ikha jngóo nakúwi̱i̱n xó má eñún ikhiin. Ndiéjunʼ erígá rá. Lá na̱jkha̱ raʼnii májánʼ numbaaʼ numuu rí xa̱bu̱ nakumu̱ún kuyáá ku̱ma̱ ndrígu̱ún raʼkháa náa Dios ráʼ. Lá gajkhun kúwi̱i̱n gagi ga̱jma̱a̱ mambanúu dí guáʼthi̱i̱n nda̱wa̱á xáʼ. Na̱nguá. Rí nduʼyáá náa kuwáanʼlu nambáyulúʼ ajngáa rígi̱: “Nda̱a̱ nimbá ku̱ma̱ ni má consejo dí itháan gíʼdoo numuu ki xóo dí naxná Jeobá” (Prov. 21:30). Ajngáa rígi̱ naxkajxáánʼ munda̱ʼa̱a̱ má xúʼko̱ Jeobá maxnúlúʼ ku̱ma̱ rí nindxu̱u̱ gajkhun. Mú, gíná nindxu̱u̱ rí mbaʼin xa̱bu̱ na̱nguá e̱nda̱ʼa̱ ku̱ma̱ rígi̱. Náa numuu rí na̱nguá rá.

6. Xó má eʼthí náa Proverbios 1:22-25, tsíin bi̱ tsíñún gudxawíín ku̱ma̱ rí nindxu̱u̱ gajkhun rá.

⁶ Mbaʼin tsíñún gudxawíín ku̱ma̱ rí nindxu̱u̱ gajkhun índo̱ “nandxaʼwá náa kamba̱a̱”. Náa Biblia naʼthí ajtsú enii xa̱bu̱ bi̱ tsíñún gudxawíín ku̱ma̱ rígi̱: “Bi̱ tsíjmañún”, “bi̱ nutsijma” ga̱jma̱a̱ “bi̱ skágunʼ” (atraxnuu Proverbios 1:22-25). c Guʼyáá náa numuu rí xa̱bu̱  bugi̱, tsíñún gudxawíín ku̱ma̱ ndrígóo Dios ga̱jma̱a̱ ndiéjunʼ gándoo guʼni mú xánindxu̱lú xóo ikhiin.

7. Náá numuu rí tikhun nuraʼwi̱i̱ rí “xájmañún ” má rá.

⁷ “Bi̱ tsíjmañún” ni̱ndxu̱ún bi̱ nuniñamijná maguma nduwiinʼ mbá nacha̱ (Prov. 14:15). Mbaʼin xa̱bu̱ bi̱ nuxkamiin náa nuʼtáraʼa xúʼko̱ ni̱ndxu̱ún. Gajkhun má rí kúwá mbaʼin wéñuʼ xa̱bu̱ bi̱ naguma nduwiinʼ náa religión ndrígu̱ún o náa políticos. Tikhun nakuwa ngíná índo̱ naguanu nduyáá rí niguma nduwiinʼ. Mú, bi̱ naʼthá numún náa Proverbios 1:22 nuraʼwi̱i̱ rí xájmañún numuu rí xúʼko̱ ma nanigu̱u̱nʼ maguanún (Jer. 5:31). Nanigu̱u̱nʼ muni̱ rí nandún ikhiin ga̱jma̱a̱ tsíñún majmañún rí naʼthí náa Biblia ni má rí munimbu̱ún xtángoo ndrígóo. Mbaʼin nundxa̱ʼwáá edxu̱ún ikhaa kayuʼ xóo eʼthí mbáa a̱ʼgu̱ bi̱ gíʼdoo religión ndrígóo náa Quebec (Canadá), bi̱ niʼthúu̱n mbáa Testigo bi̱ nijkha gáʼyoo: “Á mu ndxajkun niʼni nduwáanʼxu, a̱ʼkhúu̱n má ikhaa, raʼkháa aʼkhuxu ikháanʼ”. Gajkhun má rí tsíyulú mbuʼyáridún xa̱bu̱ bi̱ nuni kiejunʼ rí tsíñún majmañún (Prov. 1:32; 27:12).

8. Ndiéjunʼ gámbáyulú muguaʼdáá ku̱ma̱ rá.

⁸ Ikha jngóo, náa Biblia naʼtulúʼ rí xúniʼñámíjná rí manindxu̱lú mbáa bi̱ tséjmañuu. Guʼnimbulúʼ consejo rígi̱: “Gundxaʼwamíjna̱ xóo xabuanii” (1 Cor. 14:20). Nuguaʼdáá ku̱ma̱ índo̱ nuʼgíiʼ nuʼni náa vida ndrígúlú rí naʼthí náa Biblia. Mañu mañúú ejkua rajmañulú xú kaʼnii guraʼwí rí muʼni mu xúguaʼdáá xkujndu. Májánʼ gaʼni rí mundxaʼwamíjná nguáthá mba̱a̱ rí ejmañuluʼ. Mbá xkri̱da, á mu ikháánʼ mbayuuʼ tsiguʼ má tanigajmaa Biblia ga̱jma̱a̱ nadxuʼ reunión mú xóó na̱nguá tagíʼ maraxnajxíminaʼ matani ñajuunʼ Jeobá ni má xóó tséjnguáanʼ iyááʼ, ma̱ndoo matraximináʼ náá numuu rí xóó tsítani rígi̱. O, á mu nijnguáanʼ má iyááʼ, xú káʼnii ratáraʼa ga̱jma̱a̱ dí narasngáa ajngáa rí májánʼ rá. Lá nakujmaa rí natatsíñaminaʼ maxnáaʼ ikha rí naʼthí náa Biblia ráʼ. Nataniu̱u̱n eʼwíinʼ xó má niʼni Jesús rá. Á mu nduʼyáá rí ma̱ndoo muʼni xóó itháan, guʼdxawíín kiʼtáñajunʼ ndrígóo Jeobá bi̱ “naʼni rí majmañuu xa̱bu̱ bi̱ tséʼyoo” (Sal. 19:7).

9. Xú kaʼnii esngajmá xa̱bu̱ “bi̱ nutsijma” dí tsíñún gúdxuun ku̱ma̱ ndrígóo Dios rá.

⁹ Raga̱jma̱ enii, xa̱bu̱ bi̱ tsíñún gudxawíín ku̱ma̱ ndrígóo Dios ni̱ndxu̱ún “bi̱ nutsijma”. Nguáná nuxkamiin xa̱bu̱ bi̱ xúʼko̱ ni̱ndxu̱ún náa nuʼtáraʼa. Nanigu̱u̱nʼ mutsijmiin eʼwíinʼ (Sal. 123:4). Náa Biblia naʼthí rí índo̱ gáʼni iwáá mbiʼi makuwá mbaʼin xa̱bu̱ bi̱ mutsijma (2 Ped. 3:3, 4). Xó má ni̱gui̱i̱nʼ Lot, tikhuin xa̱bu̱ bi̱ kúwá mbiʼi xúgi̱ na̱nguá edxawíín rí naʼthí Dios (Gén. 19:14). Mbaʼin nunduʼwajmiin bi̱ nuni xóo rí naʼthí náa Biblia. Xa̱bu̱ bi̱ nutsijma nuniñamíjná “muni̱ rí tséjmaa xó má eñún ikhiin” (Jud. 7, 17, 18). Lá ragájkhun xóo má eʼthí náa Biblia dí nambríguii xa̱bu̱ bi̱ nutsijma ga̱jma̱a̱ xóo ni̱ndxu̱ún apóstatas ma̱ngaa eʼwíinʼ xa̱bu̱ bi̱ tsíñún gúyáá Jeobá rá.

10. Xóo má eʼthí náa Salmo 1:1, ndiéjunʼ gándoo muʼni mu xúʼni̱ xóo eni̱ xa̱bu̱ bi̱ nutsijma rá.

¹⁰ Ndiéjunʼ gúʼni mu xúʼni xóo má eni̱ bi̱ nutsijma rá. Mbá xkri̱da, xámbájxulú gajmiúlú xa̱bu̱ bi̱ nuxieʼkhá má xúʼko̱ (atraxnuu Salmo 1:1). d Rígi̱ nandoo gáʼthúu̱n rí tsédxaʼwíín ni ma tsíraxnuu dí nurawíi bi̱ ni̱ndxu̱ún apóstatas. Á mu tsiñewumíjnalú, xáʼni mingíjyúuʼ manindxu̱lú mbáa bi̱ naʼthí numaʼ ga̱jma̱a̱ mugíʼdi̱i̱ muʼni a̱jma̱ a̱jkiu̱lú náa Jeobá ma̱ngaa náa ikha rí naxná xuajñuu. Mu xúgíʼníí rúʼko̱ guraximíjna̱: “Lá na̱tha̱ dí raʼkhí índo̱ naxtiʼkhu̱u̱ mbá rí xóo nakru̱ʼu̱lú o mbá ikha rá. Lá i̱ndó ndaʼyáʼ mba̱yo̱o̱ rí nakiéʼkún a̱ngiu̱lú ráʼ.” Á mu nuriʼkhu̱u̱ mbá nacha̱ xóo endxaʼwamíjná Jeobá maxtáa gagi ga̱jma̱a̱ numulúʼ (Prov. 3:34, 35).

11. Xú káʼnii eyáá “bi̱ skágunʼ” kiʼtáñajunʼ ndrígóo Jeobá rá.

 ¹¹ Ragajtsú enii, xa̱bu̱ bi̱ tsíñún gudxawíín ku̱ma̱ rí nindxu̱u̱ gajkhun. Ni̱ndxu̱ún “bi̱ skágunʼ” (o sgúndíin). Nagumbiʼñún xúʼko̱ numuu rí tsíñún gúnimbu̱ún makuwá xóo eʼthí xtángoo ndrígóo Dios. Nuni xó má eñún ikhiin rí nakumu̱ún dí nindxu̱u̱ májánʼ (Prov. 12:15). Tsíñún gudxawíín Jeobá, náa bi̱ phú na̱ʼkhá ku̱ma̱ (Sal. 53:1). Índo̱ nuxkamiin náa nuʼtáraʼa mbaʼa aʼphu̱ nuta numulúʼ, ga̱jma̱a̱ numuu rí nduʼyamajkuíí kiʼtáñajunʼ ndrígóo Biblia, mú nda̱a̱ imbo̱o̱ rí muthi. Náa Biblia naʼthí: “Ku̱ma̱ rí nindxu̱u̱ gajkhun na̱nguá xkamaa bi̱ skágunʼ; ikhaa nda̱a̱ rí maʼthí náa riejun xuajen” (Prov. 24:7). Ikhiin na̱nguá ejmañún kayuʼ rí muthi. Ikha jngóo Jeobá naʼtulúʼ: “Atani̱ tsínguminaʼ náa xa̱bu̱ bi̱ skágunʼ” (Prov. 14:7).

12. Ndiéjunʼ gámbáyulú mu xánindxu̱lú xóo bi̱ skágunʼ rá.

¹² Ikháanʼ najmañulúʼ rí maʼndulú kuʼyáá rí nandxaʼwóo edxu̱u̱ Dios ga̱jma̱a̱ xúgíʼ xtángoo ndrígóo, mú mixtiʼkhu eni̱ bi̱ nawiñunʼ kuyáá. Mu maʼndulú kuʼyáá má xúʼko̱ ma̱ndoo muʼni mbríguii ndiéjunʼ dí májánʼ narígá índo̱ nuʼnimbulú ga̱jma̱a̱ índo̱ tséʼnimbulú. Guʼyáá náa xúgíʼ xkujndu dí naguáʼdáá xa̱bu̱ bi̱ tsíñún gúnimbu̱ún consejo ndrígóo Jeobá. Ikha jngóo guʼyáá rí kúwáanʼ itháan májánʼ índo̱ nuʼnimbulúʼ kuʼyáá Dios (Sal. 32:8, 10).

13. Lá natsudáánʼ Jeobá muʼnimbulúʼ consejo ndrígóo ráʼ.

¹³ Jeobá nandoo rí xúgiáanʼ mundrígú ku̱ma̱ ndrígóo, mú na̱nguá etsudaa nimbáa dí maʼni rígi̱. Mú naʼthí ndiéjunʼ gúgíʼníí bi̱ tsédxawíín ku̱ma̱ ndrígóo (Prov. 1:29-32). Bi̱ nuraʼwíí rí xúnimbu̱ún kuyáá Jeobá “ikhiin má guraʼní ga̱jma̱a̱ xóo rí nuni”. I̱ndó makuwá ga̱jma̱a̱ xkujndu, gamiéjunʼ ma̱ngaa nda̱wa̱á maguma gámbíin. Bi̱ gudxawíín consejo ndrígóo Jeobá ga̱jma̱a̱ nuni xóo eʼthí, ikhiin mundrígú rí nakudaminaʼ náa ajngáa rígi̱: “Mú bi̱ naʼdxawunʼ ikhaa maxtáa májánʼ, ga̱jma̱a̱ índo̱ garigá gaʼkhu ikhaa xaxmiéjuunʼ” (Prov. 1:33).

14, 15. Ndiéjunʼ ejmañuluʼ rí naʼthí náa Proverbios 4:23 rá.

¹⁴ Rí makuwáanʼ ga̱jma̱a̱ ku̱ma̱ ndrígóo Dios nambáyulúʼ má xúʼko̱. Xó má ndiʼyáá, Jeobá nandoo rí xúgiáánʼ ikháanʼlu mundrígú consejo ndrígóo. Mbá xkri̱da, náa i̱yi̱i̱ʼ ndrígóo Proverbios, naxnulu mbaʼa consejo rí mambáyulúʼ wéñuʼ xóo makuwáanʼ, ga̱jma̱a̱ makuwáanʼlu itháan májánʼ á mu nuʼni xóo eʼthí. Guʼyáá a̱jkhu̱ enii consejo rígi̱ rí ma̱ndoo mambáyulúʼ.

¹⁵ Gúñewa̱a̱n a̱jkiu̱lú rí tsékujmaa. Náa Biblia naʼthí: “A̱jkia̱nʼ gíʼdoo itháan numuu ki xóo i̱ʼwáʼ, atie̱wa̱a̱n wéñuʼ, numuu rí ikhí na̱ʼkha̱ rí naʼni maraxtaa” (Prov. 4:23). Gundxaʼwámíjná rí xóo ndayóoʼ muñewa̱a̱n a̱jkiu̱lú. Ndayóoʼ mu̱ʼphu̱ ganitsu rí májánʼ rí ma̱ndoo mambáyulúʼ, muʼni ejercicio ga̱jma̱a̱ xuʼphu̱ rí xambáyulúʼ. Xúʼkhíin má kayuʼ gíʼmaa muʼni ga̱jma̱a̱ a̱jkiu̱lú rí tsékujmaa. Gíʼmaa muʼnigajmaa xúgíʼ mbiʼi Ajngá rawuunʼ Dios. Ma̱ngaa ndayóoʼ  muʼni raʼtámíjná muʼgua reunión, índo̱ na̱jkua̱ ikhí guxnáá comentario ndrígúlú, ma̱ngaa guʼtáraʼa má xúʼko̱. Ga̱jma̱a̱ nuʼni gaʼduunʼ dí raʼkhí rí gamíi maʼni gachúu edxu̱lúʼ, xóo rí muʼni gagimijná náa dí ra̱májánʼ ga̱jma̱a̱ xóo rí mambajxulú gajmiúlú bi̱ nuni dí raʼkhí.

16. Náá numuu rí mbiʼi xúgi̱ nambáyulúʼ consejo ndrígóo Proverbios 23:4, 5 rá.

¹⁶ Gakuwáánʼlú gagi ga̱jma̱a̱ rí kuaʼdáá. Náa Biblia naʼthí consejo rígi̱: “Xátani gínáminaʼ mu maraʼdáá wéñuuʼ. […] Á mu natayáá, ikhú mambáríga̱a̱, numuu rí ma̱ʼkha̱ xniu̱u̱nʼ xó má eʼni bi̱yú ga̱jma̱a̱ maʼga rijma̱a̱” (Prov. 23:4, 5). Rí xtaʼdáá xájyúuʼ gándatiga̱a̱. Maski má asndu xúʼko̱ mbiʼi xúgi̱ xóo bi̱ guaʼdáá ga̱jma̱a̱ bi̱ na̱nguá guaʼdáá ra̱ʼkhá tháán eyaʼ xóo makhánun wéñuʼ mbújkha̱a̱. Rúʼko̱ na̱jkha̱ kagui̱i̱n muni dí raʼkhí rí maʼni gachiín xóo embájxu̱u̱n gajmiún eʼwíinʼ ga̱jma̱a̱ xóo kúwíin (Prov. 28:20; 1 Tim. 6:9, 10). Ku̱ma̱ nambáyulúʼ mbuʼyáá awáanʼ ga̱jma̱a̱ numuu mbújkha̱a̱. Ma̱ngaa nambáyulúʼ makuwáánʼlú gagi ga̱jma̱a̱ rí kuaʼdáá rí xágua̱ʼa̱ muguaʼdáá wéñuʼ (Ecl. 7:12).

17. Xú káʼnii gándoo guʼni “rí nuthi xa̱bu̱ bi̱ nundxa̱ʼwa̱a̱ májánʼ edxu̱ún”, rí naʼthí náa Proverbios 12:18 rá.

¹⁷ Gúndxaʼwáá májánʼ edxu̱lúʼ rí muʼthá. Á mu tsiñewumíjna̱ migamíi muʼthá mbá rí maʼni gawúunʼ mbáa. Náa Biblia naʼthí: “Rí naʼthí bi̱ tsindxaʼwóo edxu̱u̱ nindxu̱u̱ asndu xóo rí narujtáanʼ mbóo espada, mú, rí nuthi xa̱bu̱ bi̱ nundxa̱ʼwa̱a̱ májánʼ edxu̱ún nindxu̱u̱ xóo rí naʼni thana” (Prov. 12:18). Á mu tséʼthá numún a̱ngiu̱lú ga̱jma̱a̱ rí nakiéʼkúun makuwáánʼlú májánʼ gajmiúlú eʼwíinʼ (Prov. 20:19). Mu xuʼnigawúún a̱ngiu̱lú náa xúgíʼ rí gúʼthá, ndayóoʼ mugiwánʼ náa a̱jkiu̱lú ku̱ma̱ ndrígóo ajngá rawuunʼ Dios (Luc. 6:45). Índo̱ gundxaʼwámíjná ga̱jma̱a̱ numuu consejo rí naʼthí náa Biblia, ajngáa rí gúʼthá mani̱ndxu̱u̱ mbá ku̱ma̱ rí mambáñún eʼwíinʼ (Prov. 18:4).

18. Xú káʼnii embáyuluʼ Proverbios 24:6 náa nuʼtáraʼa rá.

¹⁸ Guʼnimbulúʼ ikha ndrígóo organización. Náa Biblia naʼthúlúʼ consejo rígi̱: “Matani guerra ga̱jma̱a̱ mbá ikha dí májánʼ; náa kúwá mbaʼin xa̱bu̱ bi̱ nuxna ikha naʼni dí maʼnga̱a̱ʼ” (Prov. 24:6). Mundxaʼwamíjná xú káʼnii guʼnimbánii texto rígi̱, mambáyulúʼ rí magajnúu  májánʼ ñajunʼ rí nuʼni náa nuʼtáraʼa ga̱jma̱a̱ dí nuʼsngáa rí gajkhun. Tséʼtaraʼa xóo eyúluʼ ikháanʼ, nuʼgíiʼ nuʼnimbáníí ikha rí najuixnúlú. Nundrígú ikha rígi̱ rí nindxu̱u̱ májánʼ índo̱ najkua náa reunión, ikhí nuʼdxawíín discurso dí nuxna a̱ngiu̱lú ga̱jma̱a̱ xkri̱da rí na̱ʼkhá náa Biblia rí ma̱ndoo mambáyulúʼ. Ma̱ngaa, organización ndrígóo Jeobá naxnúlú i̱yi̱i̱ʼ ga̱jma̱a̱ video rí nambáñun xa̱bu̱ makru̱ʼu̱u̱n rí naʼthí náa Biblia. Nakruaʼaʼ májánʼ xóo majmaʼ herramientas rígi̱ ráʼ.

19. Ndiéjunʼ ratá ikháánʼ ga̱jma̱a̱ numuu ku̱ma̱ ndrígóo Jeobá rá. (Proverbios 3:13-18.)

¹⁹ (Atraxnuu Proverbios 3:13-18). e ¡Nadxulú rí kuaʼdáá consejo rí májánʼ dí na̱ʼkha̱ náa ajngá rawuunʼ Dios! Nda̱a̱ dí gajmaaʼ guʼni á mu na̱nguá kuaʼdáá. Náa artículo rígi̱, ndiʼyáá tikhu xkri̱da ndrígóo ku̱ma̱ rí naʼthí náa Proverbios. Ma̱ngaa, Jeobá naxnúlú consejo dí májánʼ rí na̱ʼkha̱ náa Biblia. Guʼnimbulúʼ má xúʼko̱ ku̱ma̱ ndrígóo Dios. Mú tsixmiéjunʼlú xóo e̱ndxa̱ʼwa̱míjna̱ xa̱bu̱ ga̱jma̱a̱ numuu ku̱ma̱ rígi̱. Nduʼyáá gajkhun rí, “bi̱ tséniñaaʼ ga̱jma̱a̱ bi̱ nurajtuun má xúʼko̱ makuwá gagi”.