NÁKHÁ nirígá ragajma guerra náa xúgíʼ numbaaʼ, mbáa soldado nazi nindxaʼwájmiin mbá nguéjmi̱i̱n testigos de Jeobá, niʼthúún: “Á mu mbáa dí ikháanʼ tsíyoo gáʼga gaxmínaʼ ga̱jma̱a̱ Francia ma̱ngaa Inglaterra xúgiáanʼ makañáanʼla!” Maski ajndu mijngii ikhí kúwi̱i̱n mbaʼin soldados nazi bi̱ kuda ajua̱nʼ, mú nimbáa ndxájulú taʼkawábaaʼ, ¡Támiñún a̱ngiu̱lú bugi̱! Xóo nini̱ a̱ngiu̱lú buʼko̱ ninindxu̱u̱ mbá májánʼ xkri̱da náa xúgiáánʼ ikháánʼ bi̱ ni̱ndxu̱lú testigos de Jeobá numuu dí na̱nguá ejkualú guerra dí narígá náa numbaaʼ, maski ajndu nutulúʼ dí muradiáánʼ á mu tsénimbulúʼ.

1. XÚGÍNʼ XA̱BI̱I̱ DIOS NIKÚWI̱I̱N NÁA IKHÁÁ MÁ XUAJEN

Nákha wajyúúʼ, Jeobá niraʼwíí xuajen Israel mu mani̱ndxu̱u̱ xuajñuu, niʼthí dí bi̱ israelitas nindxu̱ún bi̱ kúwi̱i̱n náa ‹xuajñuu kiejunʼ ki xóo i̱ʼwáʼ xuajen› (Éx. 19:5). Ma̱ngaa nixnúún ku̱ba̱ʼ náa makuwá tsímáá. Ikha jngóo índo̱ nakuʼmiin magún gúni gajmiún i̱ʼwáʼ xuajen, israelita túni gajmiún ni má tséradíin eʼwíinʼ xa̱bi̱i̱ Dios. a

Mbiʼi xúgi̱, xa̱bi̱i̱ Jeobá nindxu̱ún bi̱ “naguwáʼ náa xuajen mba̱ʼu̱, xuajen majkhaʼ, xúgíinʼ enii xa̱bu̱, ga̱jma̱a̱ bi̱ nuthi mixtiʼkhu ajngáa” (Apoc. 7:9). Á mu nagún guerra, magi̱ʼdu̱u̱n gajmiún ga̱jma̱a̱ muradíin a̱ngiu̱ún bi̱ nuni mbóó ñajunʼ Dios.

 2. JEOBÁ MÁ NIKUʼMIIN MAGÚN GUERRA ISRAELITA

Nákha wájyúuʼ, Jeobá nindxu̱u̱ bi̱ naʼthúún náá mbiʼi ga̱jma̱a̱ náá numuu magún guerra bi̱ israelitas. Mbá xkri̱da, niʼthúún dí muni gámbíin bi̱ cananeos numuu dí ikhiin nijmaʼniúnʼ xóo bi̱ ndiyamajkhún xa̱bu̱ wéñiʼ, nubúnʼ xkawiʼ kayuʼ ga̱jma̱a̱ dí nutsikarámiin e̱jñún. Jeobá niʼtañajúnʼ isarelitas dí muni gámbíin xa̱bu̱ buʼko̱ náa Ku̱ba̱ʼ dí ikhaa nikudaminaʼ maxnúún numuu dí xúʼko̱ xúni̱ mangiin xóo nini xa̱bu̱ buʼko̱ (Lev. 18:24, 25). Índo̱ israelita nitu̱ʼu̱u̱n mu makúwi̱i̱n náa Ku̱ba̱ʼ dí nikudaminaʼ maxnún, mbaʼa nuthu Jeobá má niniñuuʼ dí muni gajmiún xa̱bu̱ sia̱nʼ bi̱ ra̱májánʼ kayuuʼ a̱jkiu̱ún (2 Sam. 5:17-25). Mú, nimbá miʼtsú tániñuu dí ikhiin muraʼwíí nguáná magún guerra. Índo̱ dí ikhiin nagún guerra náa Jeobá na̱nguá eʼthúún, ikhiin numíniiʼ wéñuʼ (Núm. 14:41-45; 2 Crón. 35:20-24).

Mbiʼi xúgi̱, Jeobá na̱nguá eniñuu magún guerra xa̱bu̱ numbaaʼ. Tikhu xuajen nuxmijná numáá mu makhánun dí ikhiin nandún raʼkháa dí nandoo Dios. Mbáa nagún guerra numuu dí nandún maʼni itháan mba̱a̱ ku̱bu̱únʼ, makhánun itháan mbújkha̱a̱ o ga̱jma̱a̱ numuu política. Mú, xú káʼni gíʼmaa mbuʼñún bi̱ nuthi dí nuxmijná ga̱jma̱a̱ numuu dí Dios má naniñúúnʼ mu xúʼko̱ muñewa̱a̱n dí ikhiin nunimbu̱ún o muni gámbíin xa̱bu̱ sia̱nʼ ndrígóo Dios xá. Dios na̱nguá eni̱gu̱u̱ʼ dí muni xúʼko̱ kaʼnii. Jeobá naʼthí dí ikhaa mínaʼ mañewu̱u̱n xa̱bi̱i̱ ga̱jma̱a̱ maʼni gámbíin xa̱bu̱ sia̱nʼ ndrígóo náa guerra dí marigá nda̱wa̱á dí nagu mbiʼyuu Armagedón (Apoc. 16:14, 16). Náa guerra rúʼko̱ muxmijná ángeles raʼkhíin xa̱bu̱ bi̱ kúwá náa tsu̱du̱u̱ ku̱ba̱ʼ gi̱jyooʼ (Apoc. 19:11-15).

3. ISRAELITA NINI MBA̱A̱ A̱JKIU̱ÚN KUYÁÁ BI̱ NISNGAJMA FE NÁA JEOBÁ

Nákha wájyúuʼ, israelita nigáwi̱i̱nʼ a̱jkiu̱ún kuñúún bi̱ nisngajmá fe náa Dios, i̱ndó niradíin bi̱ Dios má niʼthún dí muradíin. Guʼyáá a̱jma̱ xkri̱da. Maski ajndu Jeobá niʼthún dí muni gámbáa Jericó mú israelita nini kríyaaʼ Rahab ga̱jma̱a̱ bi̱ kúwi̱i̱n náa goʼwóo numuu dí ikhaa nisngájma fe (Jos. 2:9-16; 6:16, 17). Nda̱wa̱á nini mba̱a̱ a̱jkiu̱ún kuñúún  xúgínʼ xa̱bu̱ bi̱ nikúwi̱i̱n náa xuajen Gabaón numuu dí nisngajma gamajkhu náa Dios (Jos. 9:3-9, 17-19).

Mbiʼi xúgi̱, xa̱bu̱ bi̱ nagún náa guerra na̱nguá egáwi̱i̱nʼ a̱jkiu̱ún kuñúún bi̱ nusngajma fe náa Dios ga̱jma̱a̱ nuradíin xa̱bu̱ bi̱ nda̱a̱ aʼkhúun.

4. ÍNDO̱ NAGÚN GUERRA ISRAELITAS NDAYÓOʼ MUNIMBÁNII XÓ MÁ DIOS NIʼTHÚÚN DÍ GIʼMAA MUNI

Nákha wájyúuʼ, Jeobá nixnúún ikha soldados israelitas índo̱ nagún guerra. Mbá xkri̱da, nguáná Dios niʼthúún muthúún xa̱bu̱ sia̱nʼ mambaxi̱ín gajmiún (Deut. 20:10). Jeobá ma̱ngaa niʼthún dí soldados gíʼmaa maʼni kaʼwiin ga̱jma̱a̱ campamento ndrígu̱ún gíʼmaa maʼni kaʼwu (Deut. 23:9-14). Ma̱ngaa Jeobá niʼthún dí xúniu̱u̱ violar gu̱ʼu̱ bi̱ nduñúún náa mbaaʼ dí nagún guxmijná, xó eguʼwún eni soldados bi̱ kúwá náa xuajen dí rígá mijngii ikhí. Á mu mbáa soldado israelita nandoo manigúnʼ ga̱jma̱a̱ mbáa a̱ʼgu̱ bi̱ niguwáʼ kuya̱a̱ náa xuajen dí nixmijná gajmiún, ndiyóoʼ magiʼthu̱u̱n mbá gu̱nʼ (Deut. 21:10-13).

Mbiʼi xúgi̱, mbaʼa xuajen mba̱ʼu̱ nurawíi xtángoo dí munimbaníí índo̱ narígá guerra. Maski ajndu awan rígi̱ nigájnuu mu muñewu̱u̱n xa̱bu̱ xuajen, mú mbaʼa nuthu tsénimbáníí.

5. DIOS NIXMÍNAʼ GA̱JMA̱A̱ NUMUU XUAJÑUU

Nákha wájyúuʼ, Jeobá nixmínaʼ ga̱jma̱a̱ numuu xuajñuu ga̱jma̱a̱ mbaʼa nuthu niʼni milagro mu maʼngu̱u̱n. Mbá xkri̱da, nimbáñun matu̱ʼu̱u̱n náa Jericó. Numuu dí ikhiin ninimbu̱ún ikha ndrígóo Jeobá, bi̱ israelita “nindxa̱ʼwa̱” ikhú “nijngudi̱i̱ muro ndrígóo Jericó”. Xúʼko̱ niʼni Jeobá mu ma̱ndoo matu̱ʼu̱u̱n muni gámbáa xuajen (Jos. 6.20). Nda̱wa̱á niʼngu̱u̱n nixmijná gajmiún eʼwíinʼ xa̱bu̱ sia̱nʼ bi̱ ni̱ndxu̱ún amorreos. Xú káʼnii nini xá. “Jeobá nisngutígú asndu mekhuíí itsí mba̱ʼu̱ xóo eʼtsí […]. Ikhú nikháñun itháan mbaʼin ga̱jma̱a̱ eʼtsí ki xóo bi̱ niradíin israelitas” (Jos. 10:6-11).

BI̱ NI̱NDXU̱ÚN GAJKHUN CRISTIANOS NDUYÁAʼ MARIGÁ DÍ TSÍMÁÁ

Xó má ndiʼyáá, xóo dí nirígá nákha wájyúuʼ náa Israel ga̱jma̱a̱ dí narígá mbiʼi xúgi̱ mixtiʼkhu nindxu̱u̱. Mú, raʼkháa i̱ndó rúʼko̱ naʼni rí maʼni mixtiʼkhu rí na̱nguá e̱jkua̱ náa guerra, rígá itháan. Mbá xkri̱da, Dios niʼtáriyaʼ dí náa iwáá mbiʼi, bi̱ gúniñami̱jna̱ majuiʼsngúún ga̱jma̱a̱ numuu ikhaa ni ‹xajmañún muni itháan guerra›, ni má xagun ikhí (Is. 2:2-4). Ma̱ngaa Cristo niʼthúún xa̱bi̱i̱ dí xánindxu̱ún xóo bi̱ kúwá náa tsu̱du̱u̱ numbaaʼ rígi̱, rí xaxuda̱mi̱jna̱ náa xkujndu dí narígá náa numbaaʼ rígi̱ (Juan 15:19).

Cristo nindu̱ʼu̱u̱n xa̱bi̱i̱ dí munimi̱jna̱ itháan. Niʼsngúún dí gíʼmaa muniña̱a̱ʼ xúgíʼ dí maʼni maguaʼdáá sia̱nʼ, dí maʼni makiʼníin ga̱jma̱a̱ dí maʼni marigá guerra (Mat. 5:21, 22). Ma̱ngaa niʼsngúún xa̱bi̱i̱ dí mbuyáaʼ makuwá tsímáá ga̱jma̱a̱ dí maʼndún kuñúún xa̱bu̱ sia̱nʼ ndrígu̱ún (Mat. 5:9, 44).

Xú káʼnii gándoo muʼgíʼ muʼnimbánii rúʼko̱ mámbáa dí ikháanʼ rá. Gajkhun má, nimbáa dí ikháanʼ tsíyoo maʼga̱ náa guerra. Mú, lá kuaʼdáá náa a̱jkiu̱lú mbóoʼ dí maʼni markuájíinʼ o magi̱ʼdu̱u̱n a̱ngiu̱lú bi̱ kúwá náa congregación ráʼ. Guʼni xó má eʼngo̱o̱ mu muriʼyáaʼ xúgíʼ dí gíwanʼ náa a̱jkiu̱lú dí raʼkhí (Sant. 4:1, 11).

Ikháanʼ na̱nguá embáñún náa nugiʼdu̱u̱n xa̱bu̱, bi̱ ni̱ndxu̱lú cristianos nduʼyáaʼ dí marigá dí tsímáá ma̱ngaa dí nandulú kuʼyamijná (Juan 13:34, 35). Guraʼwíí muguajúnlu má xúʼko̱ jmbu índo̱ kuwáánʼ ruguaʼthi̱i̱n mbiʼi dí Jeobá má gáʼni gámbáa xúgíʼ guerra kámuu mbiʼi (Sal. 46:9).