NÁKHA tsiguʼ 1935, anu̱ʼ James ga̱jma̱a̱ ru̱dúʼ Jessie Sinclair, nigún gakuwa náa Bronx, rí kaʼyoo xuajen Nueva York. Ikhí niniʼniiʼ Willie Sneddon, bi̱ ndiʼkhún ni̱ʼkha̱ náa Escocia, xó má ikhiin. Índo̱ niniʼnumijná, nigi̱ʼdi̱i̱ nitamijná ga̱jma̱a̱ numún bi̱ kuwa náa guʼwún. Rígi̱ nirígá nákha ikhúúnʼ xóo tsegumún.

Ru̱dúʼ niʼthúu̱n Willie rí anu̱u̱ ga̱jma̱a̱ ndxájuu giʼnii nigu̱ʼwi̱i̱n náa lamáa dí rígá xígií náa Norte nákha xóo tsígi̱ʼdu̱u̱ Guerra rí itháán mba̱a̱. Barco náa nagún ninújngoo rayá mbá mina. Willie niʼthúu̱n: “Ana̱ʼ xtáa náa infierno”. Willie ninindxu̱u̱ xa̱bi̱i̱ Jeobá, ga̱jma̱a̱ ajngáa rígi̱ niʼni dí ru̱dúʼ maʼniuu tsiánguá índo̱ nininuʼ dí gajkhun.

Ajngáa rúʼko̱ tániguʼ ru̱dúʼ, numuu rí ikhaa ndiʼyoo rí anu̱u̱ ninindxu̱u̱ mbáa xa̱bu̱ májánʼ. Mú Willie xóó niʼthí: “Lá maʼni maraxtaa itháan májánʼ á mu matha̱nʼ rí Jesús ma̱ngaa ni̱jkha̱a̱ náa infierno ráʼ.” Ru̱dúʼ nirmáʼáan a̱jkiu̱u̱n tsajkhun rí nuni náa guʼwá ndxájkuun ndrígóo, náa niʼthí rí Jesús ni̱jkha̱a̱ náa infierno ga̱jma̱a̱ rí nituxi̱i̱ índo̱ ninújngoo ajtsú mbiʼi. Ikha jngó niraximínáʼ, náa numuu rí Jesús ni̱jkha̱a̱ náa nakhiin ga̱jma̱a̱ aguʼ xa̱bu̱ bi̱ ra̱míjínʼ. Ikhaa rúʼko̱ nixkaxi̱i̱ ru̱dúʼ mu maniguuʼ maninuʼ rí gajkhun. Ikhú nigíʼdu̱u̱ ni̱jkha̱ reunión náa congregación ndrígóo Bronx ga̱jma̱a̱ nijngúun iyááʼ tsiguʼ 1940.

Nákha ikhú tsijuiʼtún xa̱bu̱ guanii rí gíʼmaa munigajmaa Biblia gajmiún e̱jñún. Índo̱ chíʼgiúnʼ, naguanúʼ ga̱jmu̱ʼ anu̱ʼ índo̱ ru̱dúʼ na̱jkha̱ reunión ga̱jma̱a̱ índo̱ na̱jkha̱ gáʼtaraʼa índo̱ námbáa xmáná. Tsiguʼ nda̱wa̱á, anu̱ʼ ga̱jma̱a̱ ikhúúnʼ nigíʼdi̱i̱ ni̱jkuáxu reunión gajmiúxu̱ ikhaa. Ru̱dúʼ naʼtáraʼa wéñuʼ ga̱jma̱a̱ gíʼdiin mbaʼin bi̱ naʼsngúún ga̱jma̱a̱ numuu Biblia. Nirígá mbóo mbiʼi rí tikhun ninigajmaa mbóó numuu rí kuwa mijngii. Índo̱ nagúʼdoo vacación náa escuela, ikhú na̱jkha̱ gátaráʼa ga̱jmu̱ʼ ikhaa. Ga̱jma̱a̱ xúʼko̱ nijmañuʼ wéñuʼ rí naʼthí náa Biblia ma̱ngaa xóo masngúún eʼwíínʼ.

Nati̱yu̱ʼ rí mata, mú nákha chíʼgiúnʼ na̱nguá e̱yo̱o̱ rí gíʼdoo wéñuʼ numuu rí gajkhun. Índo̱ nigúʼdoo 12 tsiguʼ ninindxu̱ʼ publicador, ga̱jma̱a̱ asndu nákha ikhú tániʼñúʼ rí mataraʼa. Índo̱ nigúʼdoo 16 tsiguʼ nixnaxí vida  ndrígóʼ náa Jeobá. Nijngúnʼ iyááʼ 24 ñajunʼ gu̱nʼ julio tsiguʼ 1954 náa mbá asamblea dí nirígá náa Toronto (Canadá).

Tikhun a̱ngiu̱lú bi̱ kuwa náa congregación ndrígúxu̱ ninindxu̱ún betelitas o niñajunʼ náa Betel. Ikhiin nimbayúʼ wéñuʼ. Ma̱ngaa niniguʼ xóo nuthi náa kuwa mbaʼin xa̱bu̱ ga̱jma̱a̱ xóo nusngáa rí gajkhun dí naʼthí Biblia. Maski ajndu bi̱ nisngóʼ nindúún rí maʼgá náa universidad, mú ikhúúnʼ nindoʼ rí maʼgá Betel. Ikha jngó náa asamblea dí nirígá náa Toronto nixnaxí solicitud ndrígóʼ. Ga̱jma̱a̱ nitangu̱ún nixnaxí mbu̱júu̱ʼ imbo̱ʼ tsiguʼ índo̱ nirígá i̱mba̱ asamblea náa Nueva York, náa Estadio ndrígóo Yankees. Nda̱wa̱á, índo̱ nigúʼdoʼ 17 tsiguʼ, nigruígú mbá invitación rí magíʼdu̱u̱ mañajunʼ índo̱ gáʼni 19 ñajunʼ gu̱nʼ septiembre tsiguʼ 1955 náa Betel ndrígóo Brooklyn. Rí maʼni a̱jma̱ mbiʼi rí xtáá náa Betel, ni̱jkhá náa taller ndrígóo encuadernación, dí rígá náa número 117 náa calle rí mbiʼyuu Adams. Ikhí gánindxu̱u̱ náa maxtáá mañajunʼ. Tájyúuʼ índo̱ rí nigíʼdu̱u̱ nijmuʼ ajua̱nʼ rí mbiʼyuu alzadora de pliegos, mbá ajua̱nʼ dí naruwa̱a̱ mbaʼa níʼkhóo i̱yi̱i̱ʼ rí gíʼdoo mbá 32 ináa ga̱jma̱a̱ naʼni mújuunʼ mú i̱mba̱ ajua̱nʼ maʼxmí libro.

Nda̱wa̱á rí nixtáá mbá gu̱nʼ náa taller ndrígóo encuadernación, nixuʼmún náa Departamento ndrígóo Suscripciones numuu rí najmañuʼ naniraʼmáʼ náa máquina. Nákha ikhú, nikuwa a̱ngiu̱lú bi̱ nuniraʼmáʼ náa máquina dirección ndrígu̱ún bi̱ nandún mudrigú La Atalaya ga̱jma̱a̱ ¡Despertad! náa mbá ajua̱nʼ chíʼgíʼ. Nguáthá gu̱nʼ nda̱wa̱á, ni̱jkhá náa Departamento ndrígóo Envíos. Klaus Jensen, bi̱ kajkuáa ñawun, niraxuʼ á mu maʼndo̱ʼ mambáyúu bi̱ na̱jkha̱ kayóo camión mu maʼgá ka̱gu̱ʼ caja dí kajtíí i̱yi̱i̱ʼ mu maʼga̱ náa eʼwáʼ xuajen. Ma̱ngaa ndiyóoʼ maʼgá ka̱gu̱ʼ náa oficina ndrígóo correo mú maʼga̱ revistas náa congregaciones dí rígá náa Estados Unidos.  Ndxájulú Jensen niʼthúnʼ rí mambáyuʼ dí mañajunʼ, numuu rí ikhúúnʼ smidiuun wéñuʼ. Káaʼ kiñu̱u̱n mbá 57 kilo. Nda̱wa̱á, rí nigájnuʼ ni̱jkhá náa i̱ʼwáʼ xuajen ga̱jma̱a̱ náa oficina ndrígóo correo niʼni rí magúʼdo̱ʼ itháan tsiakii. ¡Ndxájulú Jensen gajkhun rí niʼthúnʼ!

Náa Departamento ndrígóo Suscripciones ma̱ngaa nakuʼma rí nunda̱ʼa̱ náa congregación. Xúʼko̱ niniʼnúnʼ mbiʼyuu mbaʼa ajngáa rí nagumaa imprimir revistas náa Brooklyn. Nditháan tádxuun xóo ethi xúgíʼ, mú nadxuʼ índo̱ nda̱yo̱o̱ rí mbaʼa wéñuʼ revistas na̱jkha̱ ki̱ʼda̱ náa xuajen dí rígá mitsínguánʼ. Mú nákha ikhú, ikhúúnʼ tándxaʼwamínaʼ rí matangaán náa xuajen rúʼko̱ tsiguʼ nda̱wa̱á.

Nákha tsiguʼ 1961 nikhánuʼ ñajunʼ náa Tesorería, ga̱jma̱a̱ bi̱ ninindxu̱u̱ supervisor ndrígóo nindxu̱u̱ ndxájulú Grant Suiter. Nguáthá tsiguʼ nda̱wa̱á, nithu̱nʼ rí maʼgá náa oficina ndrígóo ndxájulú Nathan Knorr, bi̱ kayá edxu̱u̱ náa ñajunʼ ndrígúlú nákha ikhú. Ndxájulú Knorr niʼthúnʼ rí ndxájulú bi̱ nañajunʼ ga̱jma̱a̱ xáxtáa mbá gu̱nʼ numuu rí maʼga̱ náa Najuiʼsngúún ga̱jma̱a̱ numuu Reino, ga̱jma̱a̱ índo̱ gátanga̱a̱ mañajunʼ náa Departamento ndrígóo Servicio. Nindo̱ʼo̱ʼ rí mani ikhúúnʼ ñajunʼ ndrígóo ga̱jma̱a̱ rí mañajunʼ mbóó ga̱jmu̱ʼ ndxájulú Don Adams. Ikhaa nigruigú solicitud ndrígóʼ náa mañajunʼ náa Betel náa asamblea dí nirígá nákha tsiguʼ 1955. Imbá gi̱jmi̱i̱n a̱ngiu̱lú bi̱ kuwa má ikhí índo̱ ikhúúnʼ ni̱jkhánú nindxu̱u̱ Robert Wallen ga̱jma̱a̱ Charles Molohan. Ajkuáanʼxu niñajunʼxu mbóó itháan rí a̱jma̱ skiñúʼ gu̱wa̱ʼ tsiguʼ. Ninindxu̱u̱ phú gagi rí mañajunʼ gajmíi̱nʼ a̱ngiu̱lú bi̱ guájun jmbu ga̱jma̱a̱ rí nandún kuyáá Dios (Sal. 133:1).

Nákha tsiguʼ 1970 nijuixnúʼ i̱mba̱ nuxi̱ʼ ñajunʼ: Mámbá o a̱jma̱ tsiguʼ mbaʼyóoʼ maʼgá mbaʼa xmáná náa mixtiʼkhu sucursal ndrígóo  Watch Tower Society. Numuu rí phú na̱jkhá nindxu̱u̱ rí maxnu̱u̱ tsiakii bi̱ kuwa náa Betel ga̱jma̱a̱ misioneros ma̱ngaa mba̱yo̱o̱ i̱yi̱i̱ʼ rí nixtagixi̱i̱ náa sucursal, rígi̱ nijmaʼnuuʼ xóo visitas de zona nákha ginii. Ma̱ngaa ni̱jkhánú niniʼniúunʼ a̱ngiu̱lú bi̱ nikuwa náa timbá clase ndrígóo Galaad ga̱jma̱a̱ tsiguʼ nda̱wa̱á rí niguámbu̱u̱n clase niñejunʼ má xúʼko̱ náa xuajen rí nigún. Ni̱jkhá itháan rí mbá a̱jkhu̱ skiñúʼ gu̱wa̱ʼ xuajen mba̱ʼu̱ rani̱ ñajunʼ rígi̱. Nindxu̱u̱ mbá ñajunʼ mitsaan wéñuʼ.

Betelitas bi̱ kuwa náa Brooklyn nuthúún rí magún náa congregación dí rígá náa xuajen Nueva York, ga̱jma̱a̱ ikhúúnʼ nithu̱nʼ rí maʼgá náa Bronx. Timbá congregación dí nirígá náa Bronx niʼni mba̱a̱ ikha jngó ndiyóoʼ rí maguiʼtáa. Rí nirígá ginii nigumbiʼyuu Congregación Upper Bronx, ga̱jma̱a̱ ikhí na̱jkhá ikhúúnʼ.

Nákha tsiguʼ 1965, mbá familia bi̱ naguwaʼ náa Letonia bi̱ niniʼnunʼ rí gajkhun náa sur ndrígóo Bronx kaʼyoo congregación ndrígúxu̱. Livija, dxáʼgú giʼnii, ninindxu̱u̱ precursora regular índo̱ niguámbóo escuela. Nguáthá gu̱nʼ nda̱wa̱á ni̱jkhá náa Massachusetts náa xuajen rí nda̱ñúnʼ bi̱ mutaraʼa. Ikhúúnʼ niniraʼmáʼ mu mathu̱u̱n xú káʼnii rígá náa congregación, ga̱jma̱a̱ ikhaa naʼthúnʼ dí ra̱ʼkhá tháán májánʼ ejkha̱ náa naʼtáraʼa náa xuajen Boston.

Nguáthá tsiguʼ nda̱wa̱á, Livija nikhánúu ñajunʼ xóo precursora especial. Numuu rí ikhaa má nandoo maʼni xúgíʼ xó má eʼngo̱o̱ mú maʼni ñajunʼ Jeobá, ma̱ngaa niʼni majtíí mbá solicitud mu maʼgá Betel ga̱jma̱a̱ nitháán ma̱ʼkha̱ nákha tsiguʼ 1971. ¡Nikujmaa xóo Jeobá rígá mbá dí xtáa raʼthúnʼ! Nidamíjna̱xu nákha 27 ñajunʼ gu̱nʼ octubre tsiguʼ 1973, ga̱jma̱a̱ niguáʼdááxu privilegio dí ndxájulú Knorr maxná discurso. Proverbios 18:22 naʼthí: “Bi̱ nixkamaa mbá a̱ʼgu̱ májáánʼ nixkamaa mbá rí májánʼ ga̱jma̱a̱ Jeobá naxnúu mbaʼa rí májánʼ wéñuʼ”. Ga̱jma̱a̱ rúʼko̱ nindxu̱u̱ gajkhun. Numuu rí Jeobá niʼni tsajkurámáánʼxu ga̱jma̱a̱ rí makúwáanʼxu mbóó a̱jma̱ skiñúʼ tsiguʼ náa Betel. Ma̱ngaa, nuyambááxu náa imbo̱o̱ congregación ikhí má náa Bronx.

Rí niñejunʼ ga̱jmu̱ʼ ndxájulú Knorr ninindxu̱u̱ májánʼ wéñuʼ. Ninindxu̱u̱ mbáa xa̱bu̱ bi̱ niñejunʼ wéñuʼ, rí nindoo kaʼyoo rí gajkhun ga̱jma̱a̱ nindoo kaʼñún wéñuʼ misioneros. Mbaʼin rí ikhiin ninindxu̱ún timbíi̱n xa̱bi̱i̱ Jeobá náa xuajen náa nijuiʼthún magún. Ndxájulú Knorr niʼniuu cáncer nákha tsiguʼ 1976, ga̱jma̱a̱ niʼniuʼ mingíjyúuʼ mba̱yo̱o̱ xóo nixtáa ramínuʼ. Mbóo mbiʼi índo̱ ikhaa kaʼmáaʼ náa xiyoo, nindo̱ʼo̱ʼ rí magúxnuu mbá i̱yi̱i̱ʼ rí magajnúu nacha̱. Niʼthúnʼ rí mandxa̱ʼo̱o̱ Frederick Franz mu ikhaa ma̱ngaa maʼdxaun rí magúxnuu. Nda̱wa̱á ndi̱yo̱o̱ rí ndxájulú Franz nánguá krui̱go̱o̱, ikha jngó ndxájulú Knorr nixtáa raguxnuu i̱yi̱i̱ʼ mu maʼdxun ndxájulú buʼko̱.

Ndxájulú Knorr nikháñuu nákha tsiguʼ 1977, mú bi̱ niniʼníínʼxu ga̱jma̱a̱ ninduxu  ku̱ya̱a̱ wéñuʼ, nidxuxu numuu rí niʼnimbánuu májánʼ ñajunʼ rí nigiʼdoo náa tsu̱du̱u̱ numbaaʼ (Rev. 2:10). Ikhú ndxájulú Franz niguanúu ga̱jma̱a̱ ñajunʼ rígi̱.

Ikhú, ikhúúnʼ ninindxu̱ʼ secretario ndrígóo Milton Henschel, bi̱ niñajunʼ ga̱jma̱a̱ ndxájulú Knorr mba̱yu̱ʼ tsiguʼ. Ikhaa niʼthúunʼ rí xúgi̱ kaʼyoʼ mambáyúu ndxájulú Franz xúgíʼ rí gáʼyóóʼ. Nagúxnuu má xúʼko̱ mu maʼdxun i̱yi̱i̱ʼ rí magajnúu. Ra̱ʼkhá tháán guabaaʼ edxu̱u̱, ma̱ngaa naʼniuu guabaaʼ rí magíʼ májánʼ edxu̱u̱ rí xtáá ragúxnuu. Nidxuʼ wéñuʼ rí mañajunʼ ga̱jma̱á ninduxu̱ʼ asndu índo̱ nikháñuu náa tsu̱du̱u̱ Ku̱ba̱ʼ nákha gu̱nʼ diciembre tsiguʼ 1992.

Anu̱ʼ ga̱jma̱a̱ ru̱dúʼ mangiin nini káxi̱ ñajunʼ Jeobá asndu índo̱ nikháñun, ga̱jma̱a̱ ra̱ʼkhá tháán eyoʼ magruíguin náa mbá numbaaʼ rí itháan májánʼ (Juan 5:28, 29). Rí mbá ajtsú skíñúʼ i̱mba̱ tsiguʼ rí nixtáá náa Betel ninújngoo nacha̱ wéñuʼ. Naku̱mu̱ʼ rí nimbá rí naxná numbaaʼ rígi̱ xambriguii ga̱jma̱a̱ rí muñajunʼ ga̱jma̱a̱ numún a̱ngiu̱lú bi̱ kuwa náa xúgíʼ numbaaʼ bi̱ naguáju̱n jmbu. Ikhúúnʼ ga̱jmu̱ʼ Livija ma̱ndoo mutaxu ga̱jma̱a̱ xúgíʼ a̱jkiu̱xuʼ rí xúgíʼ tsiguʼ rígi̱ rí niñajunʼxu káxi̱ niʼni gújkuáanʼxu “gagi ndrígóo Jeobá” (Neh. 8:10).

Organización ndrígóo Jeobá na̱nguá kaʼyoo mbáa xa̱bu̱; ñajunʼ rígi̱ rí majmaʼnuʼ rí gajkhun ga̱jma̱a̱ numuu Reino maʼga̱ ragiʼi má xúʼko̱ garigá má dí garigá. Nindxu̱u̱ mitsaan ga̱jma̱a̱ mbá ñajunʼ kiejunʼ rí muñajunʼxu gajmiúxu̱ a̱ngiu̱lú bi̱ naguáju̱n jmbu. Mbaʼin bi̱ kaxtaʼwíin bi̱ niñajunʼ gajmíi̱nʼ nánguá kuwa náa tsu̱du̱u̱ Ku̱ba̱ʼ. Mú naxna̱a̱ núma̱aʼ numuu rí nindoo niñajunʼ gajmíi̱nʼ a̱ngiu̱lú bugi̱ bi̱ niguájun jmbu ga̱jma̱a̱ nini ñajunʼ Jeobá.