1. Índo̱ mbáa nagumaa expulsar, xú káʼnii kúwá bi̱ kaʼñún xá.

ÍNDO̱ mbáa nagumaa expulsar náa congregación, a̱ngui̱i̱n ga̱jma̱a̱ bi̱ kaʼñún naguanún gíná. Mbáa ndxájulú bi̱ mbiʼyuu Hilda * naʼthí: “A̱jmbio̱ʼ nikháñuu nda̱wa̱á dí 41 tsiguʼ rí nindamijnáxu, ikhúún nindxa̱ʼwáminaʼ dí rúʼko̱ nindxu̱u̱ itháan gakhi̱i̱ rí nigíʼnuu, mú itháán nigawúnʼ índo̱ a̱ʼdióʼ niniñuuʼ xuajñuu Jeobá ga̱jma̱a̱ a̱ʼgiu̱u̱ gajmíi̱n e̱ji̱i̱n”.

2, 3. Xó má eʼthí náa Salmo 78:40, 41, xú káʼnii eku̱mu̱u̱ Jeobá índo̱ xa̱bi̱i̱ nuniña̱a̱ʼ rá.

² Índo̱ mbaʼin ángeles bi̱ ni̱ndxu̱ún e̱ji̱i̱n Jeobá niniña̱a̱ʼ, ikhaa nigawuuʼ wéñuʼ (Jud. 6). Gundxaʼwamíjna̱ xú káʼnii nikumu̱u̱ índo̱ ndiʼyoo rí xuajñuu bi̱ nandoo kaʼñún bi̱ ni̱ndxu̱ún israelitas niniña̱a̱nʼ ruyamajkuíí mbaʼa nuthu (atraxnuu Salmo 78:40, 41). * Á mu mbáa bi̱ nandaaʼ xtayáá ikháán naniñuuʼ Jeobá, ma̱ndoo ma̱ta̱ya̱a̱ rí Anu̱lú bi̱ xtáa mekhuíí nagáwíinʼ a̱jkiu̱u̱n ma̱ngaa. Ikhaa nakro̱ʼo̱o̱ rí ikháán xtaa ratamíniiʼ ga̱jma̱a̱ masngájmaaʼ rí nagáwíin a̱jkiu̱u̱n kaʼyaaʼ, naxnáaʼ tsiakii ga̱jma̱a̱ nambáyaaʼ índo̱ ndayáaʼ.

³ Náa artículo rígi̱, mbuʼyáá ndiéjunʼ gíʼmaa mu̱ʼni̱ mu mudrígú rí na̱ʼkha̱ náa Jeobá índo̱ nagumaa expulsar mbáa bi̱ nandulú kuʼyáá. Ma̱ngaa muʼthá xú káʼnii gúmbáñún a̱ngiu̱lú bi̱ kúwá náa congregación índo̱ guáʼdáá gajmá rígi̱. Mú ginii mbuʼyáá ndiéjunʼ rí gíʼmaa muʼnigaʼduunʼ.

4. Xú káʼnii ekumu̱ún tikhun xabuanii índo̱ e̱jñún nuniña̱a̱ʼ Jeobá rá.

⁴ Índo̱ mbáa ada̱ naniñuuʼ Jeobá, mbaʼin xabuanii nuraximíjna̱ ndiéjunʼ rí ndiyóoʼ muni̱ mu muru̱gua̱mbañúún makuwá náa rí gajkhun.  Mbáa ndxájulú bi̱ mbiʼyuu Luke niʼthí nda̱wa̱á rí nigumaa expulsar a̱ʼdióo: “Nindxa̱ʼwa̱mínáʼ rí ikhúún gúʼdoo aʼkhúnʼ, asndu tségú májánʼ. Nguáná nambiyaʼ asndu nagawúunʼ a̱jkiu̱nʼ”. Imba̱a̱ ndxájulú bi̱ mbiʼyuu Elizabeth bi̱ nigíʼnuu ikháá má kayuuʼ naʼthí: “Tániʼñu̱u̱ʼ randxa̱ʼwamínáʼ ga̱jma̱a̱ nirajximínáʼ, ndiéjunʼ ndiyóoʼ maʼni ikhúún xóo a̱ʼgú nikhi̱i̱ rá. Niku̱mu̱ʼ rí ikhúún na̱nguá nijmún ma̱ni̱ itháán mu masngóo a̱ʼdióʼ rí maxtáa náa rí gajkhun”. 

5. Á mú mbáa xa̱bu̱ naniñuuʼ Jeobá, tsáá gíʼdoo aʼkhúun rá.

⁵ Garmáʼáan a̱jkiu̱lú rí Jeobá nixnúlú xúgiáánʼ rí muraʼwíí rí mu̱ʼni̱. Ikha jngóo mámbáa gíʼmaa maraʼwíí rí maʼni. Á mu maʼnimbo̱o̱ kaʼyoo o na̱nguá. Tikhun jiámá bi̱ asndu xóo rakáʼnii mani̱ndxu̱ún xa̱bi̱i̱ Jeobá, ikhiin niraʼwíi muni̱ ñajuunʼ ga̱jma̱a̱ niguájun jmbu. Eʼwíinʼ niguáʼdiin anu̱ún bi̱ nini̱ mbá tsiakii rí musngúún ga̱jma̱a̱ rí naʼthí náa Biblia, mú índo̱ niganun niniña̱a̱nʼ Jeobá. Mámbáa má kaʼyoo maraʼwíí rí maʼni ñajuunʼ Jeobá o na̱nguá (Jos. 24:15). Ikha jngóo xabuanii, á mu e̱jña̱la nuniña̱a̱ʼ Jeobá, xáku̱ma̱la rí ikháanʼ kuaʼdáá aʼkhála.

6. Xú káʼnii gakumu̱ún e̱ji̱n índo̱ anu̱ún nuniña̱a̱ʼ Dios rá.

⁶ Nguáná xabuanii nuniña̱a̱ʼ rí gajkhun o asndu xúgíinʼ bi̱ kúwíin mbá guʼwíin (Sal. 27:10). Rígi̱ naʼniún mingíjyúuʼ tikhun e̱ji̱n índo̱ nduyáá rí anu̱ún ni̱ndxu̱ún xóo mbá xkri̱da. Esther naʼthí xóo nikumu̱u̱ índo̱ nigumaa expulsar anu̱u̱: “Nambiyaʼ má xúʼko̱ numuu rí ndiyo̱o̱ dí anu̱ʼ na̱nguá ni̱jkha̱ raniñu̱u̱ʼ mañu mañu̱ú rí gajkhun, ikhaa niraʼwíí mbá nacha̱ dí maniñuuʼ Jeobá. Nandoʼ ka̱yo̱o̱ wéñuʼ anu̱ʼ. Ikha jngóo índo̱ nigumaa expulsar nixmiéjunʼ má xúʼko̱ mu mba̱yo̱o̱ xú káʼnii xtáa. Asndu niku̱mu̱ʼ rí makhañúʼ”.

7. Xú káʼnii ku̱mu̱u̱ Jeobá náa Jiámá ga̱jma̱a̱ wa̱ʼxa̱ʼ bi̱ nagumiin expulsar anu̱ún rá.

⁷ Jiámá ga̱jma̱a̱ wa̱ʼxa̱ʼ, á mu rí ana̱la nigumiin expulsar, mangáanʼ nagawúnxu wéñuuʼ. Ga̱jma̱a̱ xúni̱ a̱jma̱ a̱jkia̱la rí Jeobá xtáa xawii ga̱jma̱a̱ ndaʼyoo xóo ku̱ma̱la. Ikhaa nandoo kaʼyála ga̱jma̱a̱ xtáa gagi rí ikháanʼ kúwáanʼla runi̱ má xúʼko̱ ñajuunʼ ga̱jma̱a̱ ikháanʼ bi̱ ni̱ndxu̱xu̱ʼ a̱ngia̱la nakumuxu ikháá má kayuuʼ. Ma̱ngaa garmáʼáan a̱jkia̱la dí raʼkháa aʼkhála ikháanʼ dí niraʼwi̱i̱ muni̱ ana̱la. Xó má ndiʼyáálú rí Jeobá nixnúlú xúgiáánʼ dí ma̱ndoo muraʼwíí, á mu mu̱ʼni̱ ñajuunʼ o na̱nguá. Mámbáa xa̱bi̱i̱ Dios bi̱ nixnáximinaʼ majngúun iyááʼ “gíʼmaa maʼni ñajuunʼ rí kaʼyoo maʼni” Gál. 6:5).

8. Ndiéjunʼ gíʼmaa muni̱ bi̱ kúwíin náa mbá guʼwíin índo̱ kúwá ruguaʼthi̱i̱n bi̱ kuyáá mu mata̱nga̱a̱ náa Jeobá rá. (Atayáá náa kúgumaʼá “ Jeobá nandoo rí matanga̱án”.)

⁸ Índo̱ mbáa bi̱ nandaaʼ xtayáá naniñuuʼ rí gajkhun, mbáa ikháán xtaʼti̱i̱n rí mbóoʼ mbiʼi mata̱nga̱a̱ náa Jeobá. Ndiéjunʼ gíʼmaa matani rá. Atiewumínáʼ má xúʼko̱ mu maraxtaa májánʼ náa xuajñuu Dios. Mu xúʼko̱ mani̱ndxa̱a̱ʼ mbá xkri̱da náa eʼwíinʼ bi̱ kúwá náa guʼwáaʼ ga̱jma̱a̱ asndu bi̱ nigumaa expulsar. Ma̱ngaa Jeobá má gáxnáaʼ tsiakii rí gáʼyóoʼ mu maʼnga̱a̱ʼ náa ga̱ʼkhu̱ ga̱jma̱a̱ náa tsíginá. Guʼyáá tikhuu rí ma̱ndoo mambáyaaʼ maraxtaa má xúʼko̱ náa xuajñuu Jeobá.

9. Ndiéjunʼ gámbáyaaʼ mu maraʼdáá mbá fe gújkhúʼ rá. (Atayáá náa kúgumaʼá “ Textos rí ma̱ndoo mambáyaaʼ índo̱ mbáa bi̱ xtayáá naniñuuʼ Jeobá”.)

⁹ Atanigajmaa̱ ma xúʼko̱. Gíʼdoo wéñuʼ numuu rí mambajxáaʼ ga̱jma̱a̱ʼ Jeobá ma̱ngaa bi̱ kúwá náa guʼwáaʼ. Xú káʼnii gíʼmaa matani rá. Mbá rí ma̱ndoo mambáyaaʼ maraʼdáá mbá fe gújkhúʼ rí  matraxnuu má xúʼko̱ Ajngá rawuunʼ Dios ga̱jma̱a̱ rí matatsaʼwamínáʼ náa naʼthí rí mi̱dxu̱ʼ reunión. Gundxa̱ʼwa̱míjna̱ ga̱jma̱a̱ xkri̱doo Joanna, índo̱ anu̱u̱ ga̱jma̱a̱ ndxájuu niniñaaʼ rí gajkhun, ikhaa naʼthí: “Índo̱ nagúxnuu xkri̱da ndrígu̱ún xa̱bi̱i̱ Jeobá rí na̱ʼkha̱ náa Biblia xóo Abigaíl, Ester, Job, José ga̱jma̱a̱ Jesús naku̱mu̱ʼ rí naxtáá tsímáá. Xkri̱da ndrígu̱ún nambáyúu a̱jkiu̱nʼ ga̱jma̱a̱ rí mandxa̱ʼwa̱mínáʼ rí májánʼ, rúʼko̱ naʼni rí xágawunʼ wéñuʼ ga̱jma̱a̱ Ajmúú rí na̱ʼkha̱ náa JW Broadcasting naxnúʼ wéñuʼ tsiakii”.

10. Xó má eʼthí Salmo 32:6-8, ndiéjunʼ gíʼmaa mu̱ʼni̱ á mu naxmiéjunlú wéñuʼ rá.

¹⁰ Aratháán ga̱jma̱a̱ xúgíʼ a̱jkia̱nʼ Jeobá. Índo̱ nakuma̱a̱ʼ rí naxmiéjuanʼ wéñuʼ, xátatsiʼñáʼ raratakháñii. Aratháán Anu̱lú Dios bi̱ nandoo kaʼyaaʼ rí mambáyaaʼ ma̱ta̱ya̱a̱ xkujndu xó má eʼyoo ikhaa ga̱jma̱a̱ rí ikhaa maʼni rí majmañaaʼ ga̱jma̱a̱ maʼsngáaʼ náa kamba̱a̱ rí ikháán gíʼmaa midxu̱ʼ (atraxnuu Salmo 32:6-8). * Gajkhun rí maʼniaaʼ mingíjyúuʼ maratha̱a̱n xóo eku̱ma̱a̱ʼ. Mú Jeobá nakro̱ʼo̱o̱ májánʼ. Ikhaa nandoo kaʼyaaʼ wéñuʼ ga̱jma̱a̱ naʼtháanʼ rí marata̱a̱n ga̱jma̱a̱ xúgíʼ a̱jkia̱nʼ (Éx. 34:6; Sal. 62:7, 8). 

11. Xó má eʼthí náa Hebreos 12:11, náá numuu rí gíʼmaa maku̱mu̱lú rí Jeobá naxprígulú ga̱jma̱a̱ ngajua rá. (Atayáá náa kúgumaʼá “ Índo̱ Jeobá naxprígúu mbáa nasngájma rí nandoo kaʼyoo”.)

¹¹ Guruʼguambáá náa rí niraʼwi̱i̱ muni̱ bi̱ kuya̱ edxu̱u̱. Índo̱ nagumaa expulsar mbáa, nindxu̱u̱ mbá awan rí nariyaʼ Jeobá mu mambáñún xúgíinʼ asndu bi̱ nini̱ aʼkhá (atraxnuu Hebreos 12:11). * Mbáa nguáná tikhuun muthi rí bi̱ kuya̱ edxu̱u̱ nijngawi̱i̱n rí nini̱i̱ expulsar mbáa, mú garmáʼáan a̱jkiu̱lú rí xa̱bu̱ buʼko̱ i̱ndó muthi  rí májánʼ eʼni bi̱ nigumaa expulsar. Ma̱ngaa dí ikháanʼlu na̱nguá eʼyáá xúgíʼ dí nirígá. Ikha jngó gakumulú kuʼñúún má xúʼko̱ bi̱ kuya̱ edxu̱u̱ bi̱ nikúwá náa comité judicial ikhiin nini̱ mbá tsiakii majmúún ikha rí na̱ʼkha̱ náa Ajngá rawuunʼ Dios mu muthi “xó má eʼthí Jeobá” (2 Crón. 19:6).

12. Xú káʼnii nimbañúún tikhun rí munimbu̱ún ikha dí naxná Jeobá rá.

¹² Á mu ikháán natambáyii ikha dí niraʼwi̱i̱ muni̱ bi̱ kuya̱ edxu̱u̱ índo̱ nini̱i̱ expulsar mbáa bi̱ xtayáá, rúʼko̱ gáʼni rí mambáyúu mu mata̱nga̱a̱ náa Jeobá. Elizabeth bi̱ niʼthá náa kutriga̱ 4 naʼthí: “Niʼniuʼ miʼskhoo rí maniʼñúuʼ rambájxuʼ ga̱jmu̱ʼ a̱ʼdióʼ bi̱ nikhi̱i̱ má. Mú índo̱ nitanga̱a̱ náa Jeobá ikhaa niʼthí rí kaʼyoo má magumaa expulsar ga̱jma̱a̱ tsiguʼ nda̱wa̱á niʼthí rí nijmañuu mbaʼa wéñuuʼ rí gíʼdoo numuu. Rúʼko̱ niʼniuu rí mbayamajkuu rí Jeobá naxprígulú”. Ajmbio̱o̱ bi̱ mbiʼyuu Mark, naʼthí: “Tsiguʼ nda̱wa̱á, a̱ʼdióʼ niʼthúnʼ rí ikhaa niraʼwíí mata̱nga̱a̱ náa Jeobá numuu rí ikháanʼxu nini̱ dí gíʼmaa muníxu, naxna̱a̱ núma̱aʼ Jeobá dí ikhaa nimbáyúxu mu munimbuxu kuya̱a̱”.

13. Ndiéjunʼ gámbáyaaʼ mu xágawáanʼ wéñuʼ rá.

¹³ Aratamíjná gajmiáanʼ amigiaaʼ bi̱ nakru̱ʼu̱u̱n kuyaaʼ. Araxtaa mba̱yu̱u̱ʼ gajmiáanʼ a̱ngiu̱lú bi̱ guáʼdáá mbá fe gújkhúʼ mu xúʼko̱ mumbayáaʼ mu xákáguabáánʼ (Prov. 12:25; 17:17). Joanna bi̱ niʼthá náa kutriga̱ 9 naʼthí: “Gajkhun rí nikumu̱ʼ rí nixtáá mbáwún. Mú nimbáyúʼ rí matamíjná gajmíʼ amigiuʼ bi̱ naku̱mu̱ʼ ka̱ñu̱u̱n”. Mú ndiéjunʼ gándoo matani̱ a mu mbáa ndxájulú naʼtháanʼ rí naʼnigawáanʼ itháan rá.

14. Náá numuu rí gíʼmaa ma̱ngoo a̱jkiu̱lú ga̱jma̱a̱ mu̱ʼni̱ mba̱a̱ a̱jkiu̱lú kuʼyamijná rá.

¹⁴ Gaʼngo̱o̱ a̱jkia̱nʼ gúni̱ a̱ngiu̱lú. Xúguaʼthi̱i̱n rí xúgíinʼ muthulú ajngáa xó má kaʼyoo (Sant. 3:2). Numuu rí xúgiáánʼ ni̱ndxu̱lú xa̱bu̱ aʼkhá, ikha jngóo xáguanúlú tsiánguá á mu tikhuun tséyáá rí muthulú o índo̱ nuthi ajngáa rí naʼnigawúnlú. Garmáʼáan a̱jkia̱nʼ rí niʼthí apóstol Pablo: “Gaʼngo̱o̱ a̱jkia̱la kuyamíjna̱ ga̱jma̱a̱ gu̱ni̱ mba̱a̱ a̱jkia̱la kuyamíjna̱ má xúʼko̱, maski ajndu mbáa gíʼdoo mbá numuu rí maxiéʼkha ga̱jma̱a̱ numuu imba̱a̱” (Col. 3:13). Mbáa ndxájulú a̱ʼgu̱ bi̱ gíʼdaa bi̱ nandoo kaʼyoo bi̱ nigumaa expulsar naʼthí: “Jeobá nimbáyúʼ mu maʼngo̱o̱ ma̱ni̱ mba̱a̱ a̱jkiu̱nʼ ka̱ñu̱u̱n a̱ngiu̱lú bi̱ nunimíjna̱ muni̱ rí nindxu̱u̱ májánʼ, mú ga̱jma̱a̱ numuu rí nindxu̱ún xa̱bu̱ aʼkhá nunigawúnʼ itháan”. Rí xúgi̱ guʼyáá ndiéjunʼ gándoo muni̱ bi̱ kúwíin náa Guʼwá nagimbáanʼ mu mumbañún bi̱ guájun jmbu bi̱ guáʼdaa mbáa bi̱ nigumaa expulsar.

15. Xú káʼnii gándoo gumbañúún bi̱ kúwá mbá guʼwíin bi̱ guáʼdaa mbáa bi̱ nigumaa expulsar rá.

¹⁵ Guʼñu̱u̱n rí májánʼ ga̱jma̱a̱ gaʼndulúʼ kuʼñúún bi̱ mbá guʼwíin bi̱ kúwíin jmbu. Mbáa ndxájulú a̱ʼgu̱ bi̱ mbiʼyuu Míriam naʼthí rí namiñun rí maʼga reunión nda̱wa̱á rí ikhaa nigumaa expulsar ndxájuu. Ikhaa naʼthí: “Nimíñúʼ rí gúthi eʼwíinʼ, mú nikúwi̱i̱n bi̱ nimbájxuʼ gajmíʼ bi̱ míjíinʼ bi̱ mangiin nikúwi̱i̱n gíná ga̱jma̱a̱ na̱nguá ethi dí raʼkhí ga̱jma̱a̱ numuu ndxájuʼ, núma̱a̱ má ga̱jma̱a̱ numuu ikhiin niku̱mu̱ʼ rí na̱nguá xtáá mbáwún”. Imba̱a̱ ndxájulú naʼthí: “Índo̱ nigumaa expulsar a̱ʼdióʼ, niguwáʼ tikhuun a̱ngiu̱lú bi̱ nandún kuyoʼ mu muxnuʼ tsiakii. Tikhuun na̱nguá ndiyáá rí  muthi, nimbiyaʼ ga̱jma̱á nindxu̱ʼ ga̱jma̱a̱ niniraʼmáʼ ajngáa náa inuʼ, rúʼko̱ nimbáyúʼ wéñuʼ. Rí nini̱ ikhiin ra̱ʼkhá tháán nimbáyúʼ”.

16. Xú káʼnii gándoo a̱ngiu̱lú mumbañún náa mbá guʼwíin bi̱ naguájun jmbu rá.

¹⁶ Gumbañúún má xúʼko̱ bi̱ mbá guʼwíin bi̱ guájun jmbu. Ikhiin nda̱ñúunʼ rí maʼndulú kuʼñúún ga̱jma̱a̱ rí muxnún tsiakii (Heb. 10:24, 25). Nguáná, tikhuun bi̱ mbá guʼwíin guáʼdiin bi̱ nigumiin expulsar, mú naguánú nduyáá rí a̱ngiu̱lú nánguá ethún rí asndu xóo mangiin nigumiin expulsar. Nditháan xúʼni̱ xúʼko̱. Jiámá ga̱jma̱a̱ wa̱ʼxa̱ʼ bi̱ guáʼdiin anu̱ún bi̱ nigumiin expulsar ndayóoʼ rí muxnún tsiakii ga̱jma̱a̱ muʼthúún rí májánʼ eni̱. Mbáa ndxájulú bi̱ mbiʼyuu María naʼthí ndiéjunʼ nigíʼnuu índo̱ ajmbio̱o̱ nigumaa expulsar ga̱jma̱a̱ niniñúúnʼ bi̱ kúwá náa goʼwóo, naʼthí: “Tikhuun bi̱ nambájxuʼ gajmíʼ niguwáʼ náa goʼwóʼ nini̱ májánʼ ganitsu ga̱jma̱a̱ nimbayúʼ xóo manigajmaa gajmíʼ e̱ji̱n. Mangiin nigawúnʼ ga̱jma̱a̱ nimbiyaʼ ga̱jma̱á nindxu̱ʼ. Ma̱ngaa nimbayúʼ índo̱ tikhuun xa̱bu̱ nithi dí ra̱májánʼ ga̱jma̱a̱ numuʼ, nixnúʼ wéñuʼ tsiakii” (Rom. 12:13, 15).

17. Ndiéjunʼ gándoo muni̱ bi̱ kuya̱ edxu̱u̱ mu muni̱i̱ a̱jkiu̱ún bi̱ numíniiʼ rá.

¹⁷ Ikháanʼla bi̱ kuya̱ edxu̱u̱, xúniʼñánʼ manújngoo xúʼkhíinʼ mbiʼi rí muxnu̱u̱n tsiakii náa mbá guʼwíin bi̱ guájun jmbu, ikháanʼ kajkuáa ñawánla dí muni̱i̱ a̱jkiu̱ún a̱ngiu̱lú bi̱ guáʼdaa mbáa ndxájúún bi̱ niniñuuʼ Jeobá (1 Tes. 5:14). Atagíminaʼ maraxnu̱u̱n tsiakii nákhá xóó tségi̱ʼdu̱u̱ ga̱jma̱a̱ índo̱ naguámbá reunión, ayuʼ gátañu̱u̱n ga̱jma̱a̱ aratájkháan gajmiáanʼ, ma̱ngaa ma̱ndoo marataráʼa gajmiáanʼ o marathu̱u̱n maguwáʼ índo̱ natanigajmaa gajmiáanʼ bi̱ kúwá náa guʼwáaʼ. Báxtúu ndrígio̱o̱ Dios gíʼmaa musngajmúún mugiu̱u̱ rí nagáwíinʼ a̱jkiu̱ún ga̱jma̱a̱ rí nandún kuñún, ma̱ngaa gíʼmaa mumbañún índo̱ nda̱ñúunʼ (1 Tes. 2:7, 8).

18. Xó má eʼthí náa 2 Pedro. 3:9, ndiéjunʼ rí eyoo Jeobá muni̱ bi̱ niniña̱a̱nʼ runi̱ ñajuunʼ ndrígóo xá.

¹⁸ Jeobá tsíyóo rí nimbáa mandáti̱ga̱a̱, ikhaa nandoo rí xúgíinʼ maguánú mata̱nga̱a̱ a̱jkiu̱ún (atraxnuu 2 Pedro 3:9). * Índo̱ mbáa nakudaminaʼ  aʼkhá mbiiʼ, ikhaa gíʼdoo má xúʼko̱ numuu náa Dios. Garmáʼáan a̱jkiu̱lú dí Jeobá niʼni numuu náa vida ndrígóo mámbáa xa̱bu̱ ga̱jma̱a̱ eʼdiuu A̱ʼdióo bi̱ nandoo kaʼyoo. Ga̱jma̱a̱ ngajua Dios nagíʼ má xúʼko̱ rí mambáñún bi̱ niniña̱a̱nʼ ga̱jma̱a̱ nandoo rí matangi̱ín náa ikhaa, ma̱ngaa gíʼthu̱u̱n rí ikhiin mugíʼ muni̱ xó má ejmañulú náa xkri̱da rí nigíʼ Jesús ga̱jma̱a̱ numuu dxámá bi̱ nindáti̱ga̱a̱ (Luc. 15:11-32). Mbaʼin nuniña̱a̱nʼ dí gajkhun ga̱jma̱a̱ nagutrígíin nda̱wa̱á náa Anu̱ún bi̱ xtáa mekhuíí bi̱ nandoo kaʼñún ga̱jma̱a̱ congregación nundriguíin májánʼ. Elizabeth bi̱ niʼthá nákhá ginii, nixtáa gagi wéñuʼ índo̱ a̱ʼdióo nitanga̱a̱ mbu̱júu̱ʼ, ikhaa naʼthí: “Naxni̱ín núma̱aʼ xúgíinʼ bi̱ nixnuʼ tsiakii mu ikhúún xákanajkhoʼ”.

19. Náá numuu rí gíʼmaa makumulú ma xúʼko̱ kuyáá Jeobá rá.

¹⁹ Gakumulú kuʼyáá má xúʼko̱ Jeobá, ikhaa xáʼthulu mu̱ʼni̱ mbá rí maʼni gawúnlú, nindxu̱u̱ mbáa Anu̱lú bi̱ naxná rí gíʼdoo ga̱jma̱a̱ nagáwíinʼ a̱jkiu̱u̱n ma̱ngaa nandoo kaʼñún xúgíinʼ bi̱ nandún kuyáá ga̱jma̱a̱ bi̱ nduyamajkuíí. Guʼyáá gajkhun rí Jeobá xániñulú náa mbiʼi mingíjyúuʼ (Heb. 13:5, 6). Mark bi̱ niʼthá náa kutriga̱ 12, naʼthí: “Jeobá tániñuxu nditháan, ikhaa nixtáa ga̱jma̱á nindxu̱xu náa mbiʼi mingíjyúuʼ”. Dios maxnúlú má xúʼko̱ tsiakii rí itháan mba̱a̱ ki xóo dí gíʼdoo mbáa xa̱bu̱ (2 Cor. 4:7). Ikha jngóo ma̱ndoo muguaʼdáá má xúʼko̱ fe ga̱jma̱a̱ rí xákanajkulú maski ajndu mbáa bi̱ nandulú kuʼyáá naniñuuʼ Jeobá.