1. Ndiéjunʼ rí májánʼ gándoo gúʼgíʼ mu̱ʼni̱ índo̱ gáʼga raganiáánʼ rá.

ÍNDO̱ naʼni waniáʼ, mbáa namíñulú índo̱ nundxaʼwamíjná rí ní xájmánʼ gúʼni̱ wéñuʼ ñajuunʼ Jeobá xó má eʼni̱ nákha ginii. Gajkhun má rí ni xáguáʼdáá wéñuʼ tsiakii, mú ma̱ndoo majmulú ku̱ma̱ ga̱jma̱a̱ xúgíʼ rí nijmañulú náa xúgíʼ tsiguʼ rí nikuwáan’lu mu mumbaʼñún jiámá majmiin náa xuajñuu Jeobá ga̱jma̱a̱ mudrigú i̱ʼwáʼ nuxi̱ʼ ñajunʼ, xó má niʼthí mbáa bi̱ mba̱yu̱u̱ʼ má kayá edxu̱u̱ náa nagimbáanʼ: “Índo̱ nikumuʼ rí nánguá eʼngoʼ ga̱jma̱a̱ numuu rí nikiu̱u̱n, nixnáa núma̱aʼ numuu rí kúwi̱i̱n a̱ngiu̱lú bi̱ itháan jiámá bi̱ nijuiʼsngúún ga̱jma̱a̱ kúwi̱i̱n xawii muni̱ ñajunʼ”.

2. Ndiéjunʼ gúʼyáá náa artículo rígi̱ rá.

² Artículo dí ninújngoo ndiʼyáá rí jiámá ga̱jma̱a̱ wa̱ʼxa̱ʼ nambáñun rí mambáxu̱u̱n gajmiún bi̱ guanii. Náa artículo rígi̱ mbuʼyáá rí manindxa̱a̱ʼ mbáa xa̱bu̱ guabaaʼ, dí ma̱ta̱ya̱a̱ náa mbríga̱a̱ eʼnga̱a̱ʼ matani̱, rí maraxna̱a̱ núma̱aʼ, ga̱jma̱a̱ dí maraxna dí xtaʼdáá ma̱ndoo mambáñun bi̱ guanii muñajunʼ mbá kambáxu̱u̱n gajmiún bi̱ itháán jiámá ga̱jma̱a̱ rígi̱ gámbáñun mbá xúgíinʼ bi̱ kúwi̱i̱n náa nagimbáanʼ.

3. a) Xó má naʼthí náa Filipenses 2:3, 4, ndiéjunʼ eyoo gáʼthúu̱n rí ma̱nindxa̱a̱ʼ xa̱bu̱ guabaaʼ rá. b) Xú kaʼnii embáyúu mbáa cristiano rí mani̱ndxu̱u̱ xa̱bu̱ guabaaʼ rá.

³ Á mu bi̱ guanii nandún mumbañún bi̱ itháan jiámá, ndayóoʼ mani̱ndxu̱ún xa̱bu̱ guabiin. Mbáa xa̱bu̱ guabaaʼ nandxa̱ʼwáminaʼ rí eʼwíinʼ guáʼdáá itháan numún ki xóo ikhaa (atraxnuu Filipenses 2:3, 4). * A̱ngiu̱lú guanii bi̱ ni̱ndxu̱ún xa̱bu̱ wabiinʼ nduyáá  kaʼwu dí rígá mbaʼa enii ikha dí na̱ʼkha̱ raʼthí náa Biblia rí ma̱ndoo maguma xóo kaʼyoo. Ikha jngóo na̱nguá guáʼthi̱i̱n rí ikháá gúni̱ xúgíinʼ xó má nini̱ ikhiin nákha ginii (Ecl. 7:10). Maski ajndu rígá mbaʼa wéñuʼ rí nandún musngáa, mú nduyáá dí “numbaaʼ rígi̱ na̱jkha̱ raxtiʼkhuu” ikha jngóo, mbáa mbaʼyóoʼ munimi̱jna̱ muriʼkui̱i̱ rí majmañún muni̱ (1 Cor. 7:31).

4. Xú káʼnii esngajma a̱ngiu̱lú viajante rí ni̱ndxu̱ún xóo levitas rá.

⁴ A̱ngiu̱lú guanii bi̱ ni̱ndxu̱ún xa̱bu̱ guabiinʼ nakru̱ʼu̱u̱n rí índo̱ gáʼni itháán guanii ni xájmiin muni̱ wéñuʼ xó má eni̱ nákha ginii. Mbá xkri̱da̱, gundxaʼwamíjna̱ ga̱jma̱a̱ numún a̱ngiu̱lú viajante, índo̱ ikhiin ndaya̱a̱ 70 tsigúnʼ, nakhánun imbo̱ʼ nuxi̱ʼ ñajunʼ rí muni̱. Mbáa rúʼko̱ maʼniún mingíjyúuʼ numuu rí ninigu̱u̱nʼ má xúʼko̱ mumbañún a̱ngiu̱lú xó má kúwá runi̱. Ninigu̱u̱nʼ wéñuʼ ñajunʼ rúʼko̱ ga̱jma̱a̱ narmáʼáan má xúʼko̱ a̱jkiu̱ún. Mú rí xúgi̱ ikhiin nakru̱ʼu̱u̱n rí itháán májánʼ rí makhánun muni̱ ñajunʼ rúʼko̱ bi̱ ni̱ndxu̱ún tikhu xa̱bu̱ú (Núm. 8:25, 26). Ikhiin kúwá runi̱ xó má nini̱ levitas bi̱ nikúwá náa Israel nákha wájyúuʼ, índo̱ ikhiin ndaya̱a̱ 50 tsigúnʼ ndiyóoʼ muniñaaʼ ruñajunʼ náa tabernáculo. Ikhiin na̱nguá nikúwá gagi i̱ndó ga̱jma̱a̱ numuu mbá ñajunʼ kiejunʼ dí niguáʼdáá muni̱. Nikúwá gagi muni̱ xúgíʼ xó má eʼngu̱u̱n ga̱jma̱a̱ nimbañún bi̱ itháan jiámá. Maski ajndu rí mbiʼi xúgi̱ a̱ngiu̱lú bi̱ ninindxu̱ún viajante nánguá egún náa mbaʼa congregación, mú nuyambáá wéñuʼ ga̱jma̱a̱ nuxna tsiakii náa congregación dí kúwi̱i̱n.

5. Ndiéjunʼ eʼsngáaʼ ikháán xkri̱da ndrígóo Dan ga̱jma̱a̱ Katie rá.

 ⁵ Guʼyáá xkri̱da ndrígóo Dan bi̱ nixtáa rañajunʼ 23 tsiguʼ xóo viajante. Índo̱ ndiyáa 70 tsiguʼ ikhaa ga̱jma̱a̱ a̱ʼgiu̱u̱ bi̱ mbiʼyuu Katie nithúún mani̱ndxu̱ún precursores especiales. Xú kaʼnii kúwi̱i̱n ga̱jma̱a̱ imbo̱ʼ nuxi̱ʼ ñajunʼ rí nikhánún xá. Dan naʼthí rí gíʼdoo wéñuʼ ñajunʼ náa congregación dí mambáñún a̱ngiu̱lú mu mani̱ndxu̱ún siervos ministeriales ga̱jma̱a̱ naʼni rathiin eʼwíinʼ mutaraʼa náa nanújngún mbaʼin xa̱bu̱ ga̱jma̱a̱ náa guʼwá e̱jua̱nʼ. Ikháanʼla a̱ngui̱nʼ bi̱ waniáanʼla, tséʼniuu a mú kúwáanʼ runi̱ kájxi̱ ñajuunʼ Jeobá o na̱nguá, mbaʼa enii rí xóo ma̱ndoo mumbáñunla eʼwíinʼ. Xú kaʼnii rá. Muni̱ guʼwamijná makuwáanʼla xó má kúwáanʼ, rí muʼgíʼ i̱ʼwáʼ dí ma̱ndoo muni̱ ga̱jma̱a̱ rí mbu̱ya̱a̱ náa dí majmáanʼla muni̱.

6. Ndíjkha rí gíʼdoo numuu ma̱ta̱ya̱a̱ náa mbríga̱a̱ eʼnga̱a̱ʼ matani̱ rá. Atagíʼ mbá xkri̱da.

⁶ Mbáa xa̱bu̱ wabaaʼ ndaʼyoo náa mbríga̱a̱ eʼngo̱o̱ maʼni (Prov. 11:2). Na̱nguá eʼniminaʼ maʼni itháan náa rí tséʼngo̱o̱ gáʼni, rúʼko̱ naʼni dí maxtáa gagi ma̱ngaa xúgíʼ rí naʼni magajnúu májánʼ. Mbáa bi̱ ndaʼyoo náa mbríga̱a̱ eʼngo̱o̱ maʼni nambríguii ga̱jma̱a̱ mbáa bi̱ na̱jkha̱ kayóo carro náa kamba̱a̱ aʼwán mu maʼngo̱o̱ matsimuu kayoo má xúʼko̱, ndayóoʼ makruígu̱u̱ velocidad maski má rúʼko̱ gáʼniuu rí maʼga itháan mañuu. Ikháá má kayuuʼ mbáa xa̱bu̱ bi̱ ndaʼyoo náa mbríga̱a̱ eʼngo̱o̱ maʼni ndaʼyoo náá mbiʼi rí “makruígu̱u̱ velocidad” mu maʼni má xúʼko̱ ñajuunʼ Jeobá ga̱jma̱a̱ mambáñun eʼwíinʼ (Filip. 4:5).

7. Xú káʼnii nisngájma Barzilái rí ndiʼyoo náa mbríga̱a̱ eʼngo̱o̱ maʼni rá.

⁷ Guʼyáá xkridoo Barzilái bi̱ nigiʼdoo 80 tsiguuʼ, rey David niʼthúu̱n dí maxtáa ga̱jma̱a̱ náa palacio. Mú ikhaa ndiʼyoo rí xáʼngo̱o̱ gáʼni xóo gíʼmaa ikha jngóo niʼnigaʼduunʼ rí niʼthúu̱n rey. Numuu dí ikhaa ndiʼyoo dí nikhi̱i̱ má ga̱jma̱a̱ ndiʼyoo dí rígá mbaʼa dí ní xáʼngo̱o̱ gáʼni, ikha jngóo ikhaa niʼthí dí Kimham maʼga ga̱jma̱a̱ numuu ikhaa, mbáa bi̱ itháan dxáma̱á (2 Sam. 19:35-37). Ikháá má kayuuʼ xó má Barzilái, a̱ngiu̱lú wanii nadxún rí muxnún tikhu ñajunʼ kiejunʼ muni̱ bi̱ itháan jiámá.

8. Xú kaʼnii nisngájma rey David rí niʼni xó má eʼngo̱o̱ índo̱ nindoo maʼni templo rá.

⁸ Ma̱ngaa rey David nixná mbá májánʼ xkri̱da mu mbuʼyáá náa mbríga̱a̱ eʼngulú mu̱ʼni̱. Ikhaa nindoo wéñuʼ maʼni goʼwóo Jeobá, mú índo̱ Jeobá niʼthúu̱n dí Salomón nindxu̱u̱ bi̱ maʼni goʼwóo, David nigruigú ga̱jma̱a̱ niyambáá xúgíʼ xó má eʼngo̱o̱ náa maguma ñajunʼ rúʼko̱ (1 Crón. 17:4; 22:5). David na̱nguá nikumu̱u̱ rí ikhaa nindxu̱u̱ bi̱ phú gíʼmaa maʼni ñajunʼ rígi̱ numuu rí Salomón kaʼníí chíʼgíiʼ ga̱jma̱a̱ nda̱a̱ xóó rí ejmañuu maʼni (1 Crón. 29:1). David ni̱jkha̱nú má ndiʼyoo rí i̱ndó á mu Jeobá nayambáá magajnúu májánʼ ñajunʼ, raʼkháa nguáthá tsiguaaʼ o xú káʼnii ejmañún bi̱ nuxna ikha náa maguma ñajunʼ. Xó má David, a̱ngiu̱lú bi̱ wanii rí mbiʼi xúgi̱ nuni̱ má xúʼko̱ ñajuunʼ Jeobá maski ajndu naxtiʼkhu̱u̱ ñajunʼ rí guáʼdáá ga̱jma̱a̱ nduyáá rí Jeobá má gámbáñun jiámá bi̱ guáʼdáá ñajunʼ rí ikhiin nini̱ nákha ginii.

9. Xú káʼnii nisngajma rí ndiʼyoo náa mbríga̱a̱ eʼngo̱o̱ maʼni mbáa ndxájulú bi̱ nindxu̱u̱ Comité ndrígóo Sucursal rá.

⁹ Mbá xkri̱da dí narígá mbiʼi xúgi̱, dí naʼsngúlú mbuʼyáá náa mbríga̱a̱ eʼngulú mu̱ʼni̱ ikhaa nindxu̱u̱ ndxájulú bi̱ mbiʼyuu Shigeo. Nákha 1976, índo̱ ikhaa nigiʼdoo 30 tsiguuʼ ninindxu̱u̱ Comité ndrígóo Sucursal. Nákha 2004 ni̱jkha̱nú ninindxu̱u̱ bi̱ naxná ikhúún comité buʼko̱. Nda̱wa̱á ni̱jkha̱nú ndiʼyoo rí nánguá gíʼdoo ikháá tsiakii xó má nákha ginii ga̱jma̱a̱ nánguá ejmaa mañajunʼ nacha̱ náa ñajunʼ ndrígóo. Ikha jngóo niʼtákáñuu Jeobá ga̱jma̱a̱ numuu rígi̱ ma̱ngaa nindxa̱ʼwáminaʼ ndiéjunʼ dí májánʼ gárígá á mu mbáa ndxájulú bi̱ tikhu xa̱bu̱ú maʼni ñajunʼ dí  naʼni ikhaa. Rí mbiʼi xúgi̱ nánguá nindxu̱u̱ bi̱ naxná ikhúún comité, mú nindxu̱u̱ xóó mbáa Comité ndrígóo Sucursal ga̱jma̱a̱ nañajunʼ mbóó gajmíi̱n a̱ngui̱i̱n. Xkri̱da ndrígóo Barzilái, rey David ga̱jma̱a̱ Shigeo naʼsngúlú dí mbáa xa̱bu̱ wabaaʼ ga̱jma̱a̱ bi̱ ndaʼyoo náa mbríga̱a̱ eʼngo̱o̱ maʼni na̱nguá eʼñún jiámá rí xóó nda̱a̱ dí ejmañún muni̱, rí phú naʼni ndaʼyoo ndiéjunʼ rí najmiin nuni̱. Ndaʼñún xóo bi̱ nañajunʼ gajmíi̱n raʼkháa bi̱ sia̱nʼ gajmíi̱n (Prov. 20:29).

10. Xú káʼnii eñún a̱ngiu̱lú wanii jiámá bi̱ kúwá náa guʼwá nagimbáanʼ rá.

¹⁰ A̱ngiu̱lú wanii nduñún bi̱ itháan jiámá xóo bi̱ nimínáanʼlu Jeobá ga̱jma̱a̱ nuxnáa wéñuʼ núma̱aʼ ga̱jma̱a̱ numuu xúgíʼ rí nuni̱. Numuu rí ikhiin nánguá guáʼdáá wéñuʼ tsiakii, ikha jngóo nduyáá rí gíʼdoo numuu rí bi̱ itháan jiáma nandún ga̱jma̱a̱ ma̱ndoo muni̱ ñajunʼ rí ndayóoʼ náa nagimbáánʼ.

11. Xú káʼnii esngájma náa Rut 4:13-16 dí bi̱ guanii nambáñun índo̱ nuxnáa núma̱aʼ rí numbañún bi̱ ni̱ndxu̱ún tikhu xa̱bu̱ú rá.

¹¹ Noemí nindxu̱u̱ mbá májánʼ xkri̱da bi̱ na̱ʼkha̱ raʼthí náa Biblia rí nixnáa núma̱aʼ ga̱jma̱a̱ nigruigú rí mambáyúu mbáa bi̱ ninindxu̱u̱ tikhu xa̱bu̱ú. Nda̱wa̱á rí nikháñuu a̱ʼdióo Noemí, niʼthúu̱n guʼgiúunʼ bi̱ mbiʼyuu Rut dí mata̱nga̱a̱ gajmíi̱n bi̱ kúwá náa goʼwóo. Mú índo̱ Rut niʼtákáñuu rí maniñuuʼ maʼga ga̱jma̱a̱ asndu Belén, Noemí nindoo má rí mambáyúu (Rut 1:7, 8, 18). Dí nini̱ xúʼko̱, niguma tsajkurámiinʼ mbá nájmi̱i̱n (atraxnuu Rut 4:13-16). * A̱ngiu̱lú guanii bi̱ ni̱ndxu̱ún xa̱bu̱ guabiinʼ nduyaridáá Noemí.

12. Xú káʼnii nisngájma apóstol Pablo dí nixnáa núma̱aʼ rá.

 ¹² Apóstol Pablo nindxu̱u̱ imba̱a̱ bi̱ nixnáa núma̱aʼ numuu rí nimbayíí. Mbá miʼtsú, nixníín núma̱aʼ a̱ngiu̱lú bi̱ nikúwá náa Filipos numuu rí nixuʼma rí ndiyóoʼ (Filip. 4:16). Ma̱ngaa, niʼthí rí naxnáa núma̱aʼ Timoteo ga̱jma̱a̱ numuu xúgíʼ rí niʼni ga̱jma̱a̱ numuu (Filip. 2:19-22). Ma̱ngaa nixnáa núma̱aʼ Dios ga̱jma̱a̱ numún a̱ngiu̱lú bi̱ nigún guxnáá tsiakii índo̱ ni̱jkha̱ kiʼyáa náa guʼwá e̱jua̱nʼ dí rígá náa Roma (Hech. 28:15). Pablo ninindxu̱u̱ mbáa xa̱biya̱ bi̱ gíʼdoo tsiakii bi̱ ni̱jkha̱ mitsínguánʼ wéñuʼ gáʼtaraʼa ga̱jma̱a̱ nixnúún tsiakii a̱ngiu̱lú bi̱ kúwá náa mixtiʼkhu congregación. Mú ninindxu̱u̱ xa̱bu̱ wabaaʼ ikha jngóo nigruigú rí eʼwíinʼ mumbayíí.

13. Xú káʼnii gándoo musngajma a̱ngiu̱lú bi̱ guanii rí nuxnáa núma̱aʼ rí nuni̱ bi̱ itháan jiámá rá.

¹³ A̱ngui̱nʼ bi̱ waniáanʼ, rígá mbaʼa rí ma̱ndoo muni̱ ikháanʼla rí musngajmá rí nuxnáa núma̱aʼ rí nuni̱ bi̱ itháan jiámá náa congregación ndrígála. Á mu nuthala rí magún kudáanʼ asndu náá má, rí magún gútsi o muni̱ i̱ʼwáʼ dí ndayóoʼ, guthu̱u̱n rí ma̱ndoo. Guya̱a̱la dí rúʼko̱ eʼni Jeobá dí nandoo kaʼyala. Mbáa xúʼko̱ gágíʼdu̱u̱ rí ma̱ndoo mambajxála májánʼ. Ma̱ngaa, gaxmiéjuanla má xúʼko̱ mu mbuya̱a̱ xóo embájxu̱u̱n gajmiún Jeobá a̱ngiu̱lú bugi̱. Guthu̱u̱n rí nadxa̱la rí ndu̱ñu̱u̱n kúwá jiámá bi̱ nunimi̱jna̱ muyambáá itháan náa congregación. Ga̱jma̱a̱ gakuwaanʼ xawii muriyaʼ mbiʼi muthu̱u̱n xóo nikuwáanʼla. Índo̱ nuni̱ xúʼko̱, nusngajmá dí ‹nuxnáa núma̱aʼ› Jeobá ga̱jma̱a̱ numuu dí ni̱ʼkha̱ kagui̱i̱n jiámá ga̱jma̱a̱ wa̱ʼxa̱ʼ náa congregación (Col. 3:15; Juan 6:44; 1 Tes. 5:18).

14. Xú káʼnii nisngájma rey David dí nixná dí gíʼdoo rá.

¹⁴ Rey David nisngájma i̱mba̱ cualidad rí gíʼdoo wéñuʼ numuu musngajma a̱ngiu̱lú bi̱ guanii, ikhaa nindxu̱u̱ rí muxna dí guáʼdáá. David nixná mbaʼa dí gíʼdoo wéñuʼ numuu dí nigiʼdoo ikhaa mu mayambáá náa maguma templo (1 Crón. 22:11-16; 29:3, 4). Niʼni xúʼko̱ maski ajndu ndiʼyoo rí a̱ʼdióo bi̱ mbiʼyuu Salomón majmaʼniiʼ bi̱ niʼni templo rúʼko̱. Á mu ikháán nikhi̱i̱n má ga̱jma̱a̱ nánguá xtaʼdáá tsiakii matiambáá náa naguma guʼwá nagimbáanʼ ma̱ndoo matiambáá má xúʼko̱ ga̱jma̱a̱ donación ndrígáaʼ asndu xó má eʼnga̱a̱ʼ. Ga̱jma̱a̱ arathún bi̱ itháan jiámá experiencia ndrígáaʼ dí niraʼdáá náa xúgíʼ tsiguʼ dí ni̱jkha̱ ranújngoo.

15. Ndiéjunʼ rí gíʼdoo wéñuʼ numuu nigruigú Timoteo dí nixnúu Pablo rá.

¹⁵ Apóstol Pablo ninindxu̱u̱ imba̱a̱ bi̱ nixná dí gíʼdoo. Niʼthúu̱n dxámá Timoteo rí maʼga ga̱jma̱a̱ náa niʼtáráʼa ma̱ngaa niʼsngóo xóo eʼtáraʼa ikhaa (Hech. 16:1-3). Rí nimbáyúu Pablo Timoteo niʼni rí ni̱jkha̱nú ninindxu̱u̱ mbáa bi̱ niʼsngáa májánʼ wéñuʼ ajngáa rí májánʼ (1 Cor. 4:17). Nda̱wa̱á Timoteo niʼsngúún eʼwíinʼ dí nijmañuu náa Pablo.

16. Ndíjkha rí niʼsngúún eʼwíinʼ ndxájulú Shigeo rá.

¹⁶ A̱ngiu̱lú bi̱ guanii bi̱ kúwá mbiʼi xúgi̱ na̱nguá ekumu̱ún dí nándáa dí gajmii ikhiin á mu nusngúún bi̱ itháan jiámá muni̱ dí ikhiin nini̱ nákha ginii náa congregación. Mbá xkri̱da, ndxájulú Shigeo bi̱ niʼthá náa kutriga̱ 9 mba̱yu̱u̱ʼ tsiguʼ niʼsngúún a̱ngiu̱lú bi̱ ni̱ndxu̱ún tikhu xa̱bu̱ú bi̱ kúwá náa Comité ndrígóo Sucursal. Niʼni rúʼko̱ mu mayambáá itháan náa ñajunʼ dí naguma ga̱jma̱a̱ numuu Reino náa país dí ikhaa xtáa rayambáá. Rúʼko̱ niʼni dí índo̱ ni̱jkha̱nú mbiʼi maniñuuʼ ñajunʼ ndrígóo xóo bi̱ naxná ikha, nixtáa imba̱a̱ ndxájulú bi̱ nijmañuu má mu maʼni ñajunʼ dí ikhaa niʼni nákha ginii. Shigeo xtáa raʼthún má xúʼko̱ a̱ngiu̱lú bi̱ itháan jiámá rí nijmañuu náa itháan dí 45 tsiguʼ índo̱ ninindxu̱u̱ Comité ndrígóo Sucursal. Na̱jkuánu nduʼyáá gajkhun rí a̱ngiu̱lú xóo Shigeo guáʼdáá wéñuʼ numún náa xuajñuu Dios.

17. Ndiéjunʼ gándoo muxnún eʼwíinʼ a̱ngiu̱lú bi̱ guanii rá. (Lucas 6:38.)

 ¹⁷ A̱ngui̱nʼ bi̱ guanii, ikháanʼ nindxa̱la bi̱ nusngajmá rí mu̱ʼni̱ má xúʼko̱ ñajuunʼ Jeobá ga̱jma̱a̱ xúgíʼ a̱jkiu̱lú nindxu̱u̱ mbá rí itháan májánʼ rí mu̱ʼni̱. Xkri̱da ndrígála nasngájma dí gíʼdoo numuu rí mu̱ʼni̱ mbá tsiakii muniʼnúuʼ ikha dí na̱ʼkha̱ náa Biblia ga̱jma̱a̱ rí muʼgíʼ muʼnimbánii. Ga̱jma̱a̱ rí xóo nikuwáanʼ ndi̱ya̱a̱ xóo niguma ñajunʼ nákha ginii, mú ma̱ngaa ndi̱ya̱a̱ dí gíʼdoo numuu muriʼkhuíí dí muni̱ índo̱ naxtiʼkhu̱u̱. Ma̱ngaa á mu mbáa dí ikháanʼ ndiʼkhún nijngúun iyááʼ, rígá mbaʼa dí ma̱ndoo muxna, ma̱ndoo muthu̱u̱n eʼwíinʼ ndíjkha rí niʼni makuwáanʼ gagi muniʼniiʼ Jeobá maski ajndu niʼni waniáánʼ má. Bi̱ itháan jiámá nanigu̱u̱nʼ mudxawíín xóo nikuwáanʼ ga̱jma̱a̱ ndiéjunʼ ikha nijmañala. Á mu ‹naguʼwanla muxna› dí nijmañala, Jeobá maʼni tsajkurámáanʼla wéñuʼ (atraxnuu Lucas 6:38). *

18. Xú káʼnii gándoo mumbayúmi̱jná má xúʼko̱ bi̱ guanii ga̱jma̱a̱ jiámá rá.

¹⁸ Á mu bi̱ guanii nagún kanuu náa bi̱ itháan jiámá, ma̱ndoo mumbáyumijná má xúʼko̱ (Rom. 1:12). Mámbáa gíʼdoo mbá rí gíʼdoo wéñuʼ numuu dí imba̱a̱ na̱nguá gíʼdoo. Bi̱ guanii guáʼdáá ku̱ma̱ ga̱jma̱a̱ mbaʼa rí nijmañún náa xúgíʼ tsiguʼ dí nikúwá. Bi̱ ni̱ndxu̱ún itháan jiámá guáʼdáá tsiakii. Índo̱ jiámá ga̱jma̱a̱ xa̱bu̱ guanii numbayumijná xóo bi̱ nambáxu̱u̱n, nduyamajkuíí Anu̱lú bi̱ xtáa mekhuíí ga̱jma̱a̱ a̱ngiu̱lú bi̱ kúwá náa congregación nambáñun wéñuʼ.