1, 2. a) Xó má naʼthí náa Proverbios 16:31, xú káʼnii gíʼmaa mbuʼñún a̱ngiu̱lú bi̱ guanii rá. b) Xkáʼnii graxe̱ gúriʼña̱a̱ náa artículo rígi̱ rá.

NÁA mbá parque dí rígá náa Arkansas mbá xuajen dí rígá náa (Estados Unidos), ma̱ndoo muxkamaa diamantes mbayííʼ. Maski ajndu rígá pa̱jnu̱ diamantes, ga̱jma̱a̱ numuu dí xóó na̱nguá nijuiʼtháá, mbáa mbaʼin xa̱bu̱ bi̱ nagún ikhí na̱nguá ejkha̱ idún ikhí ga̱jma̱a̱ na̱nguá eyáá dí gíʼdoo wéñuʼ numuu dí rígá ikhí.

² A̱ngiu̱lú bi̱ guanii ni̱ndxu̱ún xóo diamantes rúʼko̱: Mbá rí gíʼdoo wéñuʼ numuu. Náa Ajngá rawuunʼ Dios naʼni mbríguii xngiʼxá xóo mbá corona (atraxnuu Proverbios 16:31; * 20:29). Mú mingíjyúuʼ mbuʼyáá rí guáʼdáá numún. Jiámá ga̱jma̱a̱ wa̱ʼxa̱ʼ bi̱ najmañún nduyangajui̱i̱n a̱ngiu̱lú bi̱ guanii, naguánu nduyáá mbá rí itháan gíʼdoo numuu. Náa artículo rígi̱, muriʼña̱a̱ ajtsú graxe̱: Ndíjkha rí Jeobá nandxaʼwáminaʼ rí a̱ngiu̱lú bi̱ guanii guaʼdáá wéñuʼ numún rá. Xú káʼnii gíʼmaa mbuʼñún a̱ngiu̱lú bi̱ guanii bi̱ kúwá náa xuajñuu xá. Ga̱jma̱a̱ ndiéjunʼ gándoo mu̱ʼni̱ mu majmañulúʼ náa xkri̱da ndrígu̱ún xá.

3. Xó má naʼthí náa Salmo 92:12-15, ndíjkha dí Jeobá ndaʼyoo dí a̱ngiu̱lú bi̱ guanii guáʼdáá wéñuʼ numún rá.

³ Jeobá ndaʼyoo dí a̱ngiu̱lú bi̱ guanii guáʼdáá wéñuʼ numún. Ndaʼyoo májánʼ xóo ni̱ndxu̱ún ga̱jma̱a̱ nangajo̱o̱ xóo kaʼniún. Ra̱ʼkhá tháán nadxuu índo̱ a̱ngiu̱lú bi̱ guanii nuthúún jiáma ga̱jma̱a̱ wa̱ʼxa̱ʼ dí nijmañún náa xúgíʼ tsiguʼ dí nini̱ ñajuunʼ (Job 12:12; Prov. 1:1-4). Ma̱ngaa ndaʼyoo dí gíʼdoo wéñuʼ numuu dí  ikhiin niʼngu̱u̱n (Mal. 3:16). Maski ajndu niguáʼdáá xkujndu mú nisngajma má xúʼko̱ dí nikumu̱ún kuyáá káxi̱ Jeobá. Rí xúgi̱ ikhiin nduyáá dí itháan má tígo̱o̱ rí makuwá májánʼ ki xóo nákha nigi̱ʼdi̱i̱ nijmañún dí gajkhun. Jeobá nandoo kaʼñún má xúʼko̱ numuu rí nuthi má xúʼko̱ numuu ikhaa maski ajndu ‹ni̱ʼni̱ guanii› (atraxnuu Salmo 92:12-15). *

4. Ndiéjunʼ gáxnún tsiakii a̱ngiu̱lú bi̱ guanii rá.

⁴ Á mu ikháán na̱jkha̱ raʼni xa̱bu̱ nikhi̱i̱ nindxa̱a̱ʼ, ma̱ndoo ma̱ta̱ya̱a̱ gajkhun dí Jeobá narmáʼáan a̱jkiu̱u̱n ñajuunʼ dí ikháán nitani̱ nákha ginii (Heb. 6:10). Dí niratáraʼa xó má eʼngo̱o̱, rúʼko̱ naʼni dí maʼdxuu a̱jkiu̱u̱n Anu̱lú bi̱ xtáa mekhuíí. Dí niʼnga̱a̱ʼ nitraʼníí mbaʼa xkujndu dí gakhi̱i̱, dí nitanimbánii ikha dí na̱ʼkha̱ náa Biblia, dí nitani̱ mbaʼa ñajunʼ dí gíʼdoo wéñuʼ numuu ga̱jma̱a̱ dí nirasngúún eʼwíinʼ. Rí nataniminaʼ mi̱dxu̱ʼ xó ejkha̱ xuajñuu Jeobá maski ajndu na̱jkha̱ nacha̱ wéñuʼ. Ma̱ngaa dí nitambáñún ga̱jma̱a̱ naraxnún tsiakii bi̱ nuni̱ káxi̱ ñajuunʼ Jeobá. Jeobá nandoo kaʼyaaʼ wéñuʼ numuu dí nariejún jmbu, ikhaa nakudaminaʼ rí “xaniñúnʼ bi̱ nuni̱ rí jmbu” (Sal. 37:28). Ma̱ngaa naʼthí: “Maski ajndu xtátsúun edxa̱a̱ʼ gáʼkha̱ ngiʼxá maxtáá ga̱jma̱á ni̱ndxa̱ʼ” (Is. 46:4). Mú xákuma̱a̱ʼ rí ga̱jma̱a̱ numuu dí nikhi̱i̱n má nánguá xtaʼdáá numaaʼ náa xuajñuu Jeobá. ¡Ikháán xtaʼdáá numaaʼ!

5. Ndiéjunʼ gíʼmaa marmáʼáan a̱jkiu̱ún a̱ngiu̱lú bi̱ guanii rá.

⁵ A̱ngiu̱lú bi̱ guanii rígá mbaʼa dí ma̱ndoo muni̱. Maski ajndu nánguá guáʼdáá tsiakii xó má nákha ginii, mú rígá mbaʼa rí nijmañún náa xúgíʼ tsiguʼ dí nikúwá. Mbaʼa náa Jeobá ma̱ndoo majmiuu ikhiin, xó má gúʼyáá náa xkri̱da dí nirígá wájyúuʼ ga̱jma̱a̱ dí narígá mbiʼi xúgi̱.

6, 7. Arathá xkri̱da ndrígu̱ún tikhun xa̱bi̱i̱ Dios bi̱ naʼthí náa Biblia dí maski ajndu guanii niguma tsajkurámiinʼ numuu rí niguájun jmbu.

⁶ Náa Biblia nuxkamaa xkri̱da ndrígu̱ún xa̱bu̱ jmbiin bi̱ nini má xúʼko̱ ñajuunʼ Jeobá maski ajndu niʼni guanii. Mbáa dí ikhaa ninindxu̱u̱  Moisés, bi̱ nigiʼdoo 80 tsiguuʼ índo̱ ni̱jkha̱nú ninindxu̱u̱ profeta ga̱jma̱a̱ bi̱ ndiyá edxu̱u̱ náa xa̱bu̱ Israel. Imba̱a̱ ninindxu̱u̱ Daniel, ikhaa kaʼnííʼ ninindxu̱u̱ profeta ndrígóo Jeobá índo̱ nigiʼdoo itháan dí 90 tsiguuʼ. Ga̱jma̱a̱ apóstol Juan nigiʼdoo itháan má dí 90 tsiguuʼ índo̱ ga̱jma̱a̱ espíritu nimbáyúu niʼnirámáʼ libro dí nagumbiʼyuu Apocalipsis.

⁷ Nikúwá eʼwíinʼ xa̱bi̱i̱ Dios bi̱ niguájun jmbu mú na̱nguá má nijmaʼniúnʼ wéñuʼ, ikha jngóo mbáa xa̱bu̱ tájyúuʼ nimbumún kuñún. Mú Jeobá ndiʼñún ga̱jma̱a̱ niʼni tájkurámiin numuu rí niguájun jmbu. Mbá xkri̱da, náa Biblia na̱nguá eʼthí wéñuʼ ga̱jma̱a̱ numuu “mbáa xa̱bu̱ bi̱ mbiʼyuu Simeón, nindxu̱u̱ mbáa xa̱bu̱ májáanʼ, bi̱ ragíʼdoo aʼkhúun”, mú Jeobá nininiiʼ májánʼ, ikha jngóo niniñuuʼ mbaʼyoo Jesús nákha ninindxu̱u̱ a̱ʼdá cháñaʼ ga̱jma̱a̱ rí maʼtáriyaʼ numuu ikhaa ma̱ngaa ga̱jma̱a̱ numuu ru̱dúu̱ (Luc. 2:22, 25-35). Gundxaʼwámíjná ma̱ngaa ga̱jma̱a̱ numuu Ana bi̱ ninindxu̱u̱ profetisa. Ikhaa ninindxu̱u̱ mbáa a̱ʼgú xuáʼa̱ bi̱ nigiʼdoo 84 tsiguuʼ “ikhaa xtáa má xúʼko̱ náa guʼwá rí nduyamajkuíí Dios”. Jeobá niʼni tsajkurámaaʼ numuu rí niwi̱ji̱ jmbu índo̱ niniñuuʼ mbaʼyoo Jesús nákha ninindxu̱u̱ a̱ʼdá cháñaʼ. Nduʼyáá gajkhun dí Jeobá ndiʼyoo rí gíʼdoo wéñuʼ numuu Simeón ga̱jma̱a̱ Ana (Luc. 2:36-38).

8, 9. Ndiéjunʼ rí májánʼ wéñuʼ eni̱ má xúʼko̱ a̱ngiu̱lú gu̱ʼú xuáʼa̱ rá.

⁸ Rí mbiʼi xúgi̱, mbaʼin a̱ngiu̱lú bi̱ guanii ni̱ndxu̱ún mbá májánʼ xkri̱da náa bi̱ ni̱ndxu̱ún itháan jiámá. Guʼyáá xóo nixtáa ndxájulú a̱ʼgu̱ bi̱ mbiʼyuu Lois Didur. Índo̱ ikhaa nigiʼdoo 21 tsiguuʼ, nigíʼdu̱u̱ ninindxu̱u̱ precursora especial náa Canadá. Nda̱wa̱á dí ikhaa ninújuunʼ, ikhaa ga̱jma̱a̱ ajmbio̱o̱ bi̱ mbiʼyuu John, nikúwá mba̱yu̱u̱ʼ tsiguʼ runi̱ ñajuunʼ xóo viajantes. Nda̱wa̱á niñajunʼ náa Betel dí rígá náa Canadá itháan dí 20 tsiguʼ. Índo̱ ikhaa nigiʼdoo 58 tsiguuʼ nithúún rí magún gúni ñajuunʼ náa Ucrania. Ndiéjunʼ gúni̱ xá. Lá nikumu̱ún dí guanii má wéñuʼ rí xándoo magún gúyambáá i̱mba̱ país xáʼ. Ikhiin niriʼña rí magún ga̱jma̱a̱ nigíiʼ John mbáa bi̱ mani̱ndxu̱u̱ Comité ndrígóo Sucursal. Ikhaa nikháñuu juwan tsiguʼ nda̱wa̱á mú ndxájulú a̱ʼgu̱ niraʼwíí dí maguanúu rañajunʼ má xúʼko̱ náa xtáa. Rí xúgi̱ ndxájulú Lois gíʼdoo 81 tsiguuʼ ga̱jma̱a̱ naʼni má xúʼko̱ ñajuunʼ Jeobá náa Betel dí rígá náa Ucrania, xúgíinʼ a̱ngiu̱lú nandún kuyáá wéñuʼ.

⁹ Mbáa tikhun a̱ngiu̱lú gu̱ʼu̱ xóo Lois, na̱nguá ejmaniúnʼ índo̱ nakháñuu ajmbiu̱ún, mú Jeobá ndaʼyoo rí guáʼdáá wéñuʼ numún. Ikhaa ndaʼyoo rí gíʼdoo wéñuʼ numuu dí nimbañúún ajmbiu̱ún mba̱yu̱u̱ʼ tsiguʼ ga̱jma̱a̱ rí nuni̱ má xúʼko̱ ñajuunʼ ikhaa (1 Tim. 5:3). Ma̱ngaa ikhiin nuxnún tsiakii a̱ngiu̱lú jiámá ga̱jma̱a̱ wa̱ʼxa̱ʼ.

10. Ndiéjunʼ ejmañuluʼ náa xkri̱da ndrígóo Tony rá.

¹⁰ Kúwá mbaʼin a̱ngiu̱lú bi̱ guanii bi̱ kúwá náa mbá guʼwá kiejunʼ náa nagún gákuwá xa̱bu̱ guanii, ikhiin mangiin guáʼdáá wéñuʼ numún. Xúʼko̱ xtáa mbáa ndxájulú bi̱ mbiʼyuu Tony. Índo̱ ikhaa gíʼdoo 20 tsiguuʼ nijngúun iyááʼ náa Pensilvania mbá xuajen dí rígá náa (Estados  Unidos) nákha agosto tsiguʼ 1942, nda̱wa̱á ikhaa niʼni gaʼduunʼ mani̱ndxu̱u̱ mbáa soldado ikha jngóo nixuda̱a̱ʼ náa guʼwá e̱jua̱nʼ a̱jma̱ tsiguʼ tikhu. Ikhaa ga̱jma̱a̱ a̱ʼgiu̱u̱ bi̱ mbiʼyuu Hilda, nisngúún dí gajkhun a̱jmi̱i̱n e̱jñún. Índo̱ ninújngoo tsiguʼ, Tony ninindxu̱u̱ superintendente presidente náa ajtsú congregación (rí xúgi̱ najmaniúúnʼ xóo coordinador ndrígu̱ún bi̱ kuya̱ edxu̱u̱) ma̱ngaa ninindxu̱u̱ superintendente ndrígóo asamblea dí circuito. Ma̱ngaa ndiyá edxu̱u̱ índo̱ nirígá reunión ga̱jma̱a̱ niʼsngúún xa̱bu̱ náa guʼwá e̱jua̱nʼ. Ikhaa gíʼdoo 98 tsiguuʼ, mú na̱nguá endxa̱ʼwáminaʼ rí mbayáa xu̱u̱ʼ. Naʼniminaʼ xó má eʼngo̱o̱ mu maʼni ñajuunʼ Jeobá ga̱jma̱a̱ nayambáá náa congregación ndrígóo.

11. Xkáʼnii gúsngajmá dí nduʼyamajkhún a̱ngiu̱lú bi̱ kúwá náa guʼwá kiejunʼ náa nagún gákuwá xa̱bu̱ guanii rá.

¹¹ Xú káʼnii gándoo musngajmá dí nduʼyáá rí guáʼdáá numún a̱ngiu̱lú bi̱ guanii bi̱ kúwá náa guʼwá kiejunʼ náa nagún bi̱ guanii o bi̱ nánguá eyoo gágajnún náa guʼwún rá. A̱ngiu̱lú bi̱ kúwá náa congregación mumbañún xó má eʼngo̱o̱ dí mutaraʼa, dí makuwá o mudxawíín reunión. Ma̱ndoo musngajmá dí naxmiéjunlú kuʼñúún índo̱ na̱jkua̱ gúʼñún o índo̱ nuʼtámíjná gajmiúlú ikhiin náa celular. Gíʼdoo wéñuʼ numuu rí marmáʼáan a̱jkiu̱lú kuʼñúún bi̱ na̱nguá kúwá mijngii náa congregación. Xámbumulú kuʼñúún. Mbáa kúwá tikhun bi̱ naʼniún mingíjyúuʼ xóo kúwá o nakumu̱ún dí rakáʼyoo muthi. Mú mambáyulú wéñuʼ á mu nuríyaʼ mbiʼi muraxu̱u̱n ndiéjunʼ dí niʼni makuwá gagi xóo nikúwá náa xuajñuu Jeobá ga̱jma̱a̱ muʼdxawíín májánʼ dí gúthi.

12. Ndiéjunʼ gándoo muxkamaa náa congregación ndrígúlú má rá.

¹² Mbáa asndu maʼniulú tsiánguá dí náa congregación ndrígúlú má kúwá a̱ngiu̱lú guanii bi̱ ni̱ndxu̱ún májánʼ xkri̱da dí niguájun jmbu. Mbáa ndxájulú a̱ʼgu̱ bi̱ na̱ʼkha̱ náa Estados Unidos bi̱ mbiʼyuu Harriette niʼni ñajuunʼ Jeobá mba̱yu̱u̱ʼ tsiguʼ náa congregación ndrígóo dí rígá náa Nueva Jersey. Mú nda̱wa̱á ni̱jkha̱ gáxtáa ga̱jma̱a̱ wáxioo. A̱ngiu̱lú bi̱ kúwá náa i̱mba̱ congregación ndrígóo niriyaʼ mbiʼi muniʼniiʼ, ikhú nixkamaa mbá rí gíʼdoo wéñuʼ numuu. Ikhaa niʼthí xóo niʼtáráʼa ikhaa nákha tsiguʼ 1920, índo̱ ikhaa nininuuʼ dí gajkhun. Nákha ikhú, ikhaa nayéjkha̱ má xúʼko̱ cepillo dí najñáaʼ ga̱jma̱a̱ iñuuʼ á mu xúʼko̱ gárugua̱a̱ maʼga̱ guʼwá e̱jua̱nʼ. Xúʼko̱ má nirígá, nákha tsiguʼ 1933, a̱jma̱ aʼphu̱ ni̱jkha̱ náa guʼwá e̱jua̱nʼ mbá xmáná. Ajmbio̱o̱ bi̱ na̱nguá nindxu̱u̱ Testigo nimbáyúu má xúʼko̱, niñewu̱u̱n ajtsíin e̱ji̱i̱n índo̱ ikhaa xtáa náa guʼwá e̱jua̱nʼ. A̱ngiu̱lú bi̱ naguájun jmbu xóo Harriette kaʼyoo rí mbuʼyanga̱jui̱i̱n.

13. Ndiéjunʼ nijmañulúʼ rí xóo gíʼmaa mbuʼñún a̱ngiu̱lú bi̱ guanii náa xuajñuu Jeobá rá.

¹³ A̱ngiu̱lú bi̱ guanii guáʼdáá wéñuʼ numún náa xuajñuu Jeobá. Ndiyáá xú káʼnii Jeobá niʼni tsajkurámuuʼ xuajñuu ga̱jma̱a̱ xú káʼnii niʼni tsajkurámiinʼ ikhiin. Rígá mbaʼa dí nijmañún náa rí ikhiin má nikiéʼkhún. Ikha jngó guʼñún xóo náa bi̱ ma̱ndoo majmañulúʼ ga̱jma̱a̱ guʼyáʼ mambáyulú xóo nikúwá ikhiin (Prov. 18:4). Á mu nuríyaʼ mbiʼi muniʼniúnʼ májánʼ, maʼni itháan gújkhúʼ fe ndrígúlú ga̱jma̱a̱ majmañulúʼ itháan.

14. Ndiéjunʼ eʼthí náa Deuteronomio 32:7 rí gíʼmaa muni̱ jiámá ga̱jma̱a̱ wa̱ʼxa̱ʼ rá.

¹⁴ Xúguáʼthi̱i̱n dí eʼwíinʼ muthulú dí muʼtámíjná gajmiúlú a̱ngiu̱lú bi̱ guanii (atraxnuu Deuteronomio 32:7). * Gajkhun má dí nánguá krui̱gu̱u̱n xó má nákha ginii, nánguá eʼngu̱u̱n gágun wéñuʼ, ni má aʼwá ndrígu̱ún  nánguá nindxu̱u̱ xó má nákha ginii. Mú ni̱ndxu̱ún tikhu xa̱bu̱ú náa a̱jkiu̱ún ga̱jma̱a̱ nindxu̱ún “xa̱bu̱ bi̱ májáanʼ” náa inuu Jeobá (Ecl. 7:1, nota). Garmáʼáan a̱jkiu̱lú ndíjkha rí Jeobá ndaʼyoo rí guáʼdáá numún ga̱jma̱a̱ guʼyamajkún má xúʼko̱. Ganindxu̱lú xóo Eliseo, iwáá mbiʼi dí nixtáa ga̱jma̱a̱ Elías ikhaa niʼthí má xúʼko̱ rí xániñuuʼ. Ajtsú nuthu niʼthúu̱n: “Xániʼñáánʼ” (2 Rey. 2:2, 4, 6).

15. Ndiéjunʼ gándoo murajxu̱u̱n a̱ngiu̱lú bi̱ guanii rá.

¹⁵ Gusngajmá rí gajkhun naxmiéjunlú kuʼñúún a̱ngiu̱lú bi̱ guanii índo̱ nuʼniu̱u̱n graxe̱ ga̱jma̱a̱ tsumáá (Prov. 1:5; 20:5). Mbá xkri̱da, ma̱ndoo murajxu̱u̱n: “Nákha ikháán ninindxa̱a̱ʼ tikhu xa̱bu̱ú, ndiéjunʼ nitayáá ikháán dí niʼni ma̱ta̱ya̱a̱ dí nitaxkamaa dí gajkhun rá.” “Ndiéjunʼ nimbáyaaʼ dí mi̱dxu̱ʼ kanuu itháan náa Jeobá rá.” “Ndiéjunʼ nimbáyaaʼ dí matani̱ má xúʼko̱ ñajuunʼ Jeobá rá.” (1 Tim. 6:6-8.) Nda̱wa̱á guʼdxawíín májánʼ dí gúthi.

16. Índo̱ mbáa dxámá naʼtámíjná ga̱jma̱a̱ mbáa ndxájulú nikhi̱i̱, ndíjkha rí nájmi̱i̱n nuda̱a̱ tsiakii rá.

¹⁶ Índo̱ mbáa dxámá naʼtámíjná ga̱jma̱a̱ mbáa ndxájulú nikhi̱i̱, nájmi̱i̱n nuda̱a̱ tsiakii (Rom. 1:12). Dxámá maʼga̱nú mbaʼyoo gajkhun dí Jeobá nañewu̱u̱n xa̱bi̱i̱ bi̱ naguájun jmbu, ga̱jma̱a̱ ndxájulú nikhi̱i̱ maʼga̱nú mbaʼyoo di nandún kuyáá ga̱jma̱a̱ manigu̱u̱ʼ índo̱ naʼthí xú káʼnii nimbáyúu Jeobá náa xúgíʼ mbiʼi rí nixtáa.

17. Ndíjkha nandoo nuʼthá dí a̱ngiu̱lú guanii naʼni itháan mitsiʼñíin mámbá tsiguʼ dí nanújngoo rá.

¹⁷ Gajkhun má, rí xóo mitsiʼyáa dí mbájníí mbáa xa̱bu̱ nandáti̱ga̱a̱ índo̱ nanújngoo tsiguʼ. Mú mámbá tsiguʼ dí nanújngoo, Jeobá ndaʼyoo rí itháan mitsiʼñíin xa̱bi̱i̱ bi̱ naguájun jmbu (1 Tes. 1:2, 3). Náá numuu rá. Numuu rí xóo má ejkha̱ ranújngoo tsiguʼ niniñami̱jna̱ dí xi̱ʼ ndrígóo Dios mambáñún muriʼkhumijná ga̱jma̱a̱ rí mani̱ndxu̱ún itháan míjíinʼ xa̱bu̱. Índo̱ itháan nuniʼniunlú a̱ngiu̱lú bi̱ guanii, najmañulúʼ itháan ga̱jma̱a̱ numún, xúʼko̱ ma̱ndoo mbuʼñún itháan xóo bi̱ guáʼdáá wéñuʼ numún.

18. Ndiéjunʼ gúʼyáá náa i̱mba̱ artículo rá.

¹⁸ Náa congregación raʼkháa i̱ndó naʼni makuwáánʼ mbá kambáxulú índo̱ jiámá ga̱jma̱a̱ wa̱ʼxa̱ʼ nduyáá rí guáʼdáá numún bi̱ guanii, ma̱ngaa naʼni rí makuwáánʼ mbá kambáxulú índo̱ bi̱ guanii nduyáá rí guáʼdáá numún bi̱ ni̱ndxu̱ún jiámá ga̱jma̱a̱ wa̱ʼxa̱ʼ. Náa i̱mba̱ artículo mbuʼyáá xú káʼnii gándoo a̱ngiu̱lú bi̱ guanii mbuyáá rí guáʼdáá numún bi̱ ni̱ndxu̱ún jiámá o wa̱ʼxa̱ʼ bi̱ kúwá náa congregación.