ARTÍCULO RÍ MUʼNIGAJMAA 39
Lá ka̱ma mbiʼyaaʼ náa “libro rí ndaʼya” ráʼ.
“Náa inuu ikhaa nigumaraʼmáʼ mbá libro rí maʼni marmáʼáan a̱jkiu̱u̱n kaʼñún bi̱ namíñun kuyáá Jeobá” (MAL. 3:16).
AJMÚÚ 61 ¡Xámiñalaʼ xa̱bi̱i̱ Jeobá!
RÍ MUʼNIGAJMAA a
Asndu ma nákha wajyúuʼ Jeobá na̱ʼkha̱ ragi̱ʼi̱ raʼnirámáʼ mbiʼñún náa “libro rí ndaʼya”. (Atayáá kutriga̱ 1 ga̱jma̱a̱ 2).
1. Xó má eʼthí Malaquías 3:16, xkáʼnii libro eʼnirámáʼ Jeobá ga̱jma̱a̱ ndiéjunʼ eʼthí ikhí rá.
MBAYUUʼ tsiguʼ má Jeobá xtáa raʼnirámáʼ mbá libro kiejuunʼ náa tima mbiʼñún xa̱bu̱. Nagíʼdu̱u̱ ga̱jma̱a̱ mbiʼyuu Abel timbáa testigo bi̱ niwi̱ji̱ jmbu (Luc. 11:50, 51). b Asndu ma nákha wajyúuʼ Jeobá na̱ʼkha̱ ragi̱ʼi̱ raʼnirámáʼ mbiʼñún náa libro rúʼko̱ ikha jngóo mbaʼin ma tima mbiʼñún ikhí, náa Biblia naxná mbaʼa mbiʼyuu libro rúʼko̱: “Mbá libro rí maʼni marmáʼáan a̱jkiu̱u̱n”, “libro rí ndaʼya”. Náa artículo rígi̱ muxná mbiʼíí “libro rí ndaʼya” (atraxnuu Malaquías 3:16; c Apoc. 3:5; 13:8).
2. a) Tsíin mbiʼñún kiʼnirámáʼ náa libro rí ndaʼya rá. b) Ndiéjunʼ gándoo muʼni mu mbiʼyulú magumarámáʼ náa libro rúʼko̱ rá.
2 Náa libro kiejuunʼ rígi̱ katima̱ mbiʼñún xúgíinʼ bi̱ nduyamajkuíí Jeobá, namiñun kuyáá ga̱jma̱a̱ xúgíinʼ bi̱ nandún kuyáá mbiʼyuu. Tikhuin kuáʼti̱i̱n dí makuwá kámuu mbiʼi náa mekhuíí ga̱jma̱a̱ eʼwíinʼ náa tsu̱du̱u̱ Ku̱ba̱ʼ. Mbiʼyulu majuiʼnirámáʼ náa libro rúʼko̱ á mu nambájxulu májánʼ gajmiúlú Jeobá ga̱jma̱a̱ naguáʼdáá fe náa dí nixnajximinaʼ Jesucristo (Juan 3:16, 36). Lá ragájkhun dí nandulú magumarámáʼ mbiʼyulú ikhí ráʼ.
3, 4. a) Lá makuwáanʼ kámuu mbiʼi á mu kiʼnirámáʼ mbiʼyulú náa libro dí ndaʼya ráʼ. b) Ndiéjunʼ guʼyáá náa artículo rígi̱ ga̱jma̱a̱ dí e̱ʼkha̱ rá.
3 Lá ma̱ndoo makuwáanʼ kámuu mbiʼi á mu mbiʼyulú kama náa libro rí ndaʼya ráʼ. Nariʼña̱a̱ náa Éxodo 32:33, ikhí Jeobá niʼthúu̱n Moisés: “Bi̱ gakudaminaʼ aʼkhá náa ikhúúnʼ mani ngudi̱i̱ mbiʼyuu náa libro ndrígóʼ”. Rúʼko̱ nandoo gáʼthúu̱n dí mbiʼñún bi̱ kiʼnirámáʼ náa libro rúʼko̱ ma̱ndoo majngudi̱i̱, ni̱ndxu̱u̱ xóo Jeobá niʼnirámáʼ ga̱jma̱a̱ lápiz xúgi̱ (Apoc. 3:5). Ndayóoʼ mbuʼyáá dí mbiʼyulú majuiʼnirámáʼ náa libro rúʼko̱ kámuu mbiʼi, dí majuiʼnirámáʼ ga̱jma̱a̱ lapicero.
4 Mbáa nguáná nurajximíjnalu. Ndiéjunʼ eʼthí ga̱jma̱a̱ numún bi̱ kiʼnirámáʼ mbiʼñún náa libro dí ndaʼya ga̱jma̱a̱ bi̱ na̱nguá kiʼnirámáʼ rá. Nguáná gakúwi̱i̱n kámuu mbiʼi bi̱ kiʼnirámáʼ mbiʼñún ikhí rá. Ndiéjunʼ garigá ga̱jma̱a̱ numún bi̱ túniʼniiʼ Jeobá nikháñúún rá. Lá kiʼnirámáʼ mbiʼñún mangiin náa libro rígi̱ xáʼ. Mbuʼyáá ndiéjunʼ eriʼña̱a̱ náa artículo rígi̱ ga̱jma̱a̱ dí e̱ʼkha̱.
TSÍIN MBIʼÑÚN KIʼNIRÁMÁʼ NÁA LIBRO RÁ.
5, 6. a) Xó má eʼthí náa Filipenses 4:3, tsíin mbiʼñún kiʼnirámáʼ náa libro rí ndaʼya rá. b) Nguáná gágumaraʼmáʼ kámuu mbiʼñún xá.
5 Tsíin mbiʼñún kiʼnirámáʼ náa libro rí ndaʼya rá. Mu ma̱ndoo muriʼña̱a̱ graxe̱ rígi̱, muʼthá ga̱jma̱a̱ numún mbá witsu grupo xa̱bu̱. Tikhuun bi̱ náa grupo rígi̱ na̱nguá kiʼnirámáʼ mbiʼñún náa libro dí ndaʼya.
6 Bi̱ kúwíin náa timbá grupo rígi̱ ikhiin nindxu̱ún bi̱ kaxtaʼwíin mu mutañajunʼ gajmiún Jesús náa mekhuíí. Lá kiʼnirámáʼ ma mbiʼñún náa libro rí ndaʼya xáʼ. Xúʼko̱, xó má niʼthúún apóstol Pablo bi̱ numbáyíí náá Filipos dí mbiʼñún bi̱ kaxtaʼwíin xóo muʼthá, bi̱ nijuiʼthúún dí mutañajunʼ gajmiún Cristo, kiʼniraʼmáʼ náa libro rí ndaʼya (atraxnuu Filipenses 4:3). Mú mbiʼñún xájngudi̱i̱ náa libro rígi̱, ikhiin ndayóoʼ dí maguajún jmbu má xúʼko̱. Índo̱ gundrígú iwáá sello tséʼñuu á mu xóó tsékháñún o nákha xóó tségi̱ʼdu̱u̱ marigá majphú mba̱a̱ gaʼkhu, mbiʼñún magumarámáʼ kámuu mbiʼi náa libro rígi̱ (Apoc. 7:3).
7. Xó má eʼthí náa Apocalipsis 7:16, 17, nguáná gatima kámuu mbiʼñún náa libro rí ndaʼya xa̱bu̱ bi̱ mbaʼin rá.
7 Bi̱ ragajma grupo nindxu̱ún bi̱ mbaʼin xa̱bu̱ bi̱ nindxu̱ún eʼwíinʼ mugu̱. Lá kiʼnirámáʼ má mbiʼñún náa libro dí ndaʼya xáʼ. Xúʼko̱, lá mati̱ma̱ má xúʼko̱ mbiʼñún nda̱wa̱á dí gájngoo Armagedón xáʼ. Xúʼko̱ (Apoc. 7:14). Jesús niʼthí dí xa̱bu̱ bigi̱, bi̱ nindxu̱ún xóo mugu̱, “makuwá kámuu” (Mat. 25:46). Bi̱ gakáwíin náa Armagedón xundrígú mbá nacha̱ rí makuwá kámuu mbiʼi, xóo muʼthá mbiʼñún magumaraʼmáʼ ga̱jma̱a̱ lápiz náa libro rí ndaʼya. Índo̱ Jesús gáxtáa Raʼtáñajunʼ mbá Míí tsiguʼ, “mañewu̱u̱n ga̱jma̱a̱ maʼga kagui̱i̱n náa iduu iyaʼ rí ndaʼya”. Bi̱ gunimbu̱ún ikha ndrígóo Cristo ga̱jma̱a̱ bi̱ guguajún jmbu náa Jeobá marigá kámuu mbiʼñún náa libro rí ndaʼya (atraxnuu Apocalipsis 7:16, 17).
8. Tsíin ñajúúnʼ bi̱ na̱nguá kiʼnirámáʼ mbiʼñún náa libro rí ndaʼya ga̱jma̱a̱ ndiéjunʼ gaguaʼníí xá.
8 Bi̱ maʼni ragajtsíin grupo nindxu̱ún tsujthu̱nʼ, bi̱ maguma gámbíin náa Armagedón. Mbiʼñún ikhiin na̱nguá kiʼnirámáʼ náa libro rí ndaʼya. Jesús niʼthí dí “magún náa mambíin kámuu mbiʼi” (Mat. 25:46). Ga̱jma̱a̱ Pablo niʼthí dí xa̱bu̱ bugi̱ “mumíníiʼ rí asndu mambíin kámuu mbiʼi” (2 Tes. 1:9; 2 Ped. 2:9). Xúʼko̱ má kayuuʼ ga̱jma̱a̱ numún xa̱bu̱ bi̱ nuni̱ kiejuunʼ mbá aʼkhá, ikhiin xákúwá kámuu mbiʼi, maguma gámbíin kámuu, rígi̱ nasngájmulú dí ikhiin xátujxi̱ín (Mat. 12:32; Mar. 3:28, 29; Heb. 6:4-6). Nda̱wa̱á mbuʼyáá ga̱jma̱a̱ numún mbá gíjma grupo bi̱ matujxi̱ín náa tsu̱du̱u̱ Ku̱ba̱ʼ.
BI̱ MAGABI̱ÍN
9. Tsíin nindxu̱ún bi̱ a̱jma̱ grupo bi̱ magabi̱ín náa tsu̱du̱u̱ Ku̱ba̱ʼ ga̱jma̱a̱ ndiéjunʼ dí naʼni mixtiʼkuiin xá. (Hechos 24:15.)
9 Náa Biblia naʼthí dí a̱jma̱ grupo bugi̱ magabi̱ín ga̱jma̱a̱ makuwíin kámuu mbiʼi náa tsu̱du̱u̱ ku̱ba̱ʼ “xa̱bu̱ bi̱ nini̱ rí májánʼ” ga̱jma̱a̱ “bi̱ túni̱ rí májánʼ” (atraxnuu Hechos 24:15). “Xa̱bu̱ bi̱ nini̱ rí májánʼ” nindxu̱ún bi̱ niguájun jmbu runi̱ ñajuunʼ Jeobá índo̱ nikúwi̱i̱n. Ga̱jma̱a̱ “bi̱ túni̱ rí májánʼ” nindxu̱ún xa̱bu̱ bi̱ na̱nguá niguájun jmbu náa Jeobá ga̱jma̱a̱ tákúwi̱i̱n xó má Dios eni̱gu̱u̱ʼ. Numuu dí mbá nájmi̱i̱n grupo xa̱bu̱ bugi̱ magabi̱ín, lá nandoo gáʼthúu̱n rúʼko̱ dí kiʼnirámáʼ mbiʼñún náa libro rí ndaʼya xáʼ. Mu muriʼña̱a̱ graxe̱ rígi̱, mbuʼyáá itháan ga̱jma̱a̱ numún a̱jma̱ grupo rígi̱.
10. Ndíjkha dí gágabi̱ín bi̱ nini̱ dí májánʼ ga̱jma̱a̱ ndiéjunʼ dí gúni̱ tikhuin dí ikhiin xá. (Atayáá ma̱ngaa náa i̱yi̱i̱ʼ ma rígi̱ náa “Graxe̱ rí nuni bi̱ nuraxnuu” náa naʼthí ga̱jma̱a̱ numún bi̱ gátujxiín náa tsu̱du̱u̱ Ku̱ba̱ʼ.)
10 Bi̱ ragajkhu grupo ríge̱ ni̱ndxu̱ún “Xa̱bu̱ bi̱ nini̱ rí májánʼ”. Nákha xóó tsékáñún ikhiin kiʼniraʼmáʼ má mbiʼñún náa libro rí ndaʼya, lá nijngudi̱i̱ mbiʼñún índo̱ nikháñún xáʼ. Na̱nguá, numuu rí Jeobá kaʼníí ermáʼáan a̱jkiu̱u̱n eni̱. “Ikhaa nindxu̱u̱ Dios ndrígu̱ún bi̱ nduya raʼkháa bi̱ nikháñun, ikhaa ndaʼyoo rí xúgíinʼ ikhiin ka̱ʼníí xóó kúwá ruya” (Luc. 20:38). Rígi̱ eyoo gáʼthí dí índo̱ xa̱bu̱ bi̱ nini̱ rí májánʼ gátangi̱ín mu makuwíin náa tsu̱du̱u̱ Ku̱ba̱ʼ, mbiʼñún kiʼniraʼmáʼ náa libro rí ndaʼya mú ga̱jma̱a̱ lápiz (Luc. 14:14). Tikhuin dí ikhiin mani̱ndxu̱ún príncipes náa xúgíʼ tsu̱du̱u̱ ku̱ba̱ʼ (Sal. 45:16).
11. Ndiéjunʼ gáʼyóoʼ majmañún “bi̱ túni̱ rí májánʼ” mu mbiʼñún maguráʼmáʼ náa libro rí ndaʼya rá.
11 Rí maʼni iwáá kayuuʼ, rí witsu grupo ni̱ndxu̱ún “bi̱ túni̱ rí májánʼ”. Mbáa ga̱jma̱a̱ numuu dí túniʼnuu xtángoo ndrígóo Jeobá, ikha jngóo túni̱ rí májánʼ nákha nikúwi̱i̱n ga̱jma̱a̱ mbiʼñún tágumaraʼmáʼ náa libro dí ndaʼya. Mú índo̱ Dios gáʼni matuxi̱ín, ikhaa maniñuuʼ dí mbiʼñún magumaraʼmáʼ náa libro rúʼko̱. Bi̱ túni̱ rí májánʼ mbaʼyóoʼ dí mixtambáñuun. Nákha xóó tsékáñún tikhuun dí ikhiin nini̱ dí xkawiʼ kayuuʼ. Ikha jngóo ndayóoʼ majmañún makuwá xó má Jeobá e̱nda̱ʼa̱ mixtambáñuun xúgíinʼ xa̱bu̱ buʼko̱, Xa̱bu̱ Ñajunʼ ndrígóo Dios maríyaʼ awan xóo miʼsngúún xúgíinʼ xa̱bu̱ buʼko̱.
12. a) Tsíin gúsngúún bi̱ túni̱ rí májánʼ rá. b) Ndiéjunʼ gúgíʼníín bi̱ xúnimbu̱ún dí gajmañún rá.
12 Tsíin gúsngúún bi̱ túni̱ rí májánʼ rá. Xa̱bu̱ bi̱ mbaʼin ga̱jma̱a̱ bi̱ gágabi̱ín bi̱ nini̱ dí májánʼ. Ndiéjunʼ gáʼyóoʼ muni̱ bi̱ túni̱ rí májánʼ mu majuiʼnirámáʼ mbiʼñún náa libro rí ndaʼya xá. Mbaʼyóoʼ dí mamba̱xu̱ún gajmiún ga̱jma̱a̱ muxnáxi̱mi̱jna̱ náa ikhaa. Jesús gajmíi̱n bi̱ kaxtaʼwíin mani̱ndxu̱ún jueces makuwá xawii mbuyáá xkáʼnii e̱ʼni̱ mámbáa bi̱ táʼni rí májánʼ (Apoc. 20:4). Á mu mbáa tsíyoo gágruigú dí mixtambáyíí, makhañúu maski ajndu gíʼdoo 100 tsiguuʼ (Is. 65:20). Jeobá ga̱jma̱a̱ Jesús naʼngu̱u̱n nduyáá dí gíwanʼ náa a̱jkiu̱ún xa̱bu̱, ga̱jma̱a̱ mbuyáá á mu xúgíinʼ muni̱ dí májánʼ náa numbaaʼ nuxi̱ʼ (Is. 11:9; 60:18; 65:25; Juan 2:25).
MAGUAJXÚN MU MAKUWÁ GA̱JMA̱A̱ MAJUIʼTHÁ DÍ GÚGíʼNÍÍN
13, 14. a) Xú káʼnii ekru̱ʼu̱u̱ nákha ginii ajngáa dí niʼthí Jesús náa Juan 5:29 rá. b) Ndiéjunʼ gáʼyóoʼ mbuʼyáá índo̱ gúraxnuu ajngáa rígi̱ rá.
13 Jesús ma̱ngaa niʼthí ga̱jma̱a̱ numún bi̱ maguajxún náa tsu̱du̱u̱ Ku̱ba̱ʼ. Ikhaa niʼthí: “Na̱ʼkha̱nú mbiʼi rí xúgíinʼ bi̱ kúwá náa iñá wa̱jinʼ mudxawíín aʼwóo, muguajxúnʼ bi̱ nini̱ rí májánʼ mu makuwá kámuu mbiʼi, mú bi̱ nini̱ dí ra̱májánʼ maguajxúnʼ mu majuiʼthá rí gúgiʼníín” (Juan 5:28, 29). Ndiéjunʼ nindoo gáʼthí Jesús gi̱i̱ rá.
14 Nákha ginii nakru̱ʼu̱lú dí Jesús niʼthí ga̱jma̱a̱ numuu rí gúni̱ xa̱bu̱ bi̱ gátangi̱ín makuwá mbu̱júu̱. Xóo muʼthá, nda̱wa̱á dí gáwájxu̱ún tikhuun muni̱ rí májánʼ mú eʼwíinʼ muni̱ dí ra̱májánʼ. Jesús niʼthí dí ra̱májánʼ ga̱jma̱a̱ dí májánʼ dí nini̱ nákha xóó tsékáñún. Gajkhun nindxu̱u̱ rígi̱, numuu dí náa numbaaʼ nuxi̱ʼ nimbáa xúniña̱a̱’ maʼni dí ra̱májánʼ. Ikhaa jngóo, xú káʼnii gákru̱ʼu̱lú ajngáa maguajxúnʼ mu makuwá kámuu mbiʼi ga̱jma̱a̱ majuiʼthá dí gúgíʼníín xá.
15. Tsíin ni̱ndxu̱ún bi̱ “muguajxúnʼ mu makuwá kámuu mbiʼi”, ga̱jma̱a̱ náá numuu rá.
15 Xa̱bu̱ bi̱ nini̱ rí májánʼ nákhá xóó tsékáñún, “muguajxúnʼ mu makuwá kámuu mbiʼi” ikhiin muguaxún mu makuwá kámuu mbiʼi, numuu rí mbiʼñúún kiʼnirámáʼ má náa libro rí ndaʼya. Rígi̱ nandoo gáʼthúu̱n dí “bi̱ nini̱ rí májánʼ”, bi̱ na̱ʼkha̱ raʼthí náa Juan 5:29 ikháá má dí magabiín xa̱bu̱ bi̱ nini̱ rí májánʼ dí naʼthí náa Hechos 24:15. Ma̱ngaa nambánii dí naʼthí náa Romanos 6:7: “Índo̱ mbáa na̱jkha̱nú nakháñuu ikhú najngudi̱i̱ aʼkhúun”. Índo̱ bi̱ nuni̱ rí májánʼ nakháñún, najngudi̱i̱ aʼkhún, mú tsejmajngudii dí niguájun jmbu (Heb. 6:10). Índo̱ gaguajxún bi̱ nini̱ rí májánʼ mbaʼyóoʼ muguajún jmbu má xúʼko̱ mu xájngudi̱i̱ mbiʼñún náa libro rí ndaʼya.
16. Ndiéjunʼ nindxu̱u̱ rí “maguajxúnʼ mu majuiʼthá dí gúgíʼníín” xá.
16 Ndiéjunʼ gúʼthá ga̱jma̱a̱ numún bi̱ nini̱ dí ra̱májánʼ nákha xóo tsékáñún rá. Maski má nikháñúún aʼkhá ndríguún nijngudi̱i̱, mú na̱nguá kiʼnirámáʼ dí niguájun jmbu ga̱jma̱a̱ na̱nguá kiʼnirámáʼ mbiʼñún náa libro rí ndaʼya. Dí maguajxúnʼ “bi̱ nini̱ dí ra̱májánʼ” ga̱jma̱a̱ ikhiin má bi̱ magabi̱ín “bi̱ túni̱ rí májánʼ” bi̱ naʼthí náa Hechos 24:15. Ikhiin “maguajxúnʼ mu majuiʼthá rí gúgiʼníín”. d Bi̱ túni̱ rí májánʼ majuiʼyáá ga̱jma̱a̱ tsumáá xóo gánindxu̱ún mu xúʼko̱ majuiʼthá rí gúgiʼníín (Luc. 22:30). Mbaʼyóoʼ mbiʼi mu majuiʼyáá tsíin gágumaraʼmáʼ mbiʼñún náa libro rí ndaʼya. Mu marigá rígi̱, bi̱ nini̱ dí ra̱májánʼ mbaʼyóoʼ muniñaaʼ xúgíʼ dí ra̱májánʼ dí ikhiin nini̱ ga̱jma̱a̱ muxnaxímíjná muni̱ ñajuunʼ Jeobá.
17, 18. Ndiéjunʼ gáʼyóoʼ muni̱ bi̱ gagabi̱ín náa tsu̱du̱u̱ ku̱ba̱ʼ, ga̱jma̱a̱ ndiéjunʼ ni̱ndxu̱u̱ dí “nini̱” eʼthí náa Apocalipsis 20:12, 13 rá.
17 Tséʼñuu á mu nákha ginii nini̱ dí májánʼ o túni̱ rí májánʼ, bi̱ gagabi̱ín mbaʼyóoʼ munimbu̱ún xtángoo dí ma̱ʼkha̱ náa imbo̱ʼ nuxi̱ʼ rollo dí mambaʼtoo índo̱ gáʼni mbá Míí tsiguʼ. Apóstol Juan niʼthí ndiéjunʼ ndiʼyoo náa mbá dí niwasngájmáá. “Ndi̱ñu̱u̱n bi̱ nikháñún, bi̱ wanii ga̱jma̱a̱ bi̱ majkhiinʼ wájun náa inuu xílí, nimbaʼtoo mbaʼa rollo. Mú nimbaʼtoo i̱mba̱ libro: Libro rí ndaʼya. Xó má naʼthí náa rollos, nixtandi̱ʼi̱i̱n cuenta bi̱ nikháñún ga̱jma̱a̱ xó má rí nini̱” (Apoc. 20:12, 13).
18 Ndiéjunʼ nindxu̱u̱ rí “nini̱” dí majuiʼthúún ndiéjunʼ gaguaʼníí xá. Lá dí nini̱ nákha xóó tsékáñún xáʼ. Na̱nguá, garmáʼáan a̱jkiu̱lú dí índo̱ nakháñún najngudi̱i̱ aʼkhúún. Ikha jngóo ajngáa rígi̱ na̱nguá eyoo gáʼthúu̱n dí “nini̱” nákha xóó tsékáñún. Ajngáa “xó má rí nini̱” nandoo gáʼthúu̱n xú káʼnii ikhiin guriʼña dí gajuiʼsngún náa numbaaʼ nuxi̱ʼ. Asndu xa̱bu̱ bi̱ niguájun jmbu xóo Noé, Samuel, David ga̱jma̱a̱ Daniel mbaʼyóoʼ majmañún numuu Jesucristo ga̱jma̱a̱ mbaʼyóoʼ musngajmá fe náa dí ikhaa nixnáximinaʼ makhañúu. ¡Bi̱ túni̱ rí májánʼ rígá itháán mbaʼa rí majmañún!
19. Ndiéjunʼ gaguaʼníí bi̱ xúnimbu̱ún rá.
19 Ndiéjunʼ gaguaʼníí bi̱ xúnimbu̱ún rá. Apocalipsis 20:15 naʼthúlú: “Bi̱ na̱nguá kiʼnirámáʼ mbiʼñún náa libro rí ndaʼya nijuiʼdamiʼi̱i̱n náa mañu rí nakha”. Bi̱ xúnimbu̱ún maguma gámbíin mbá kayuuʼ. ¡Gíʼdoo numuu dí muʼnimi̱jna̱ mbuʼyáá á mu mbiʼyulu kiʼnirámáʼ ga̱jma̱a̱ marigá má xúʼko̱ náa libro rí ndaʼya!
Mbáa ndxájulú nañambáá náa najuiʼsngúún bi̱ nagabi̱ín náa mbá Míí tsiguʼ. (Atayáá kutriga̱ kutriga̱ 20).
20. Xú káʼnii ñajunʼ gáguma náa mbá Míí tsiguʼ dí gaxtáa Raʼtáñajunʼ Jesús rá. (Atayáá xtiʼkhu rí na̱ʼkha̱ náa timbá ináa.)
20 Ra̱ʼkhá tháán mitsaanʼ ganindxu̱u̱ índo̱ gaxtáa Raʼtáñajunʼ Jesús náa mbá Míí tsiguʼ. Numuu dí ikhú magajnúu mbáa awan dí majuiʼsngún itháan xa̱bu̱ ki xóo e̱ʼni̱ dí mbiʼi xúgi̱. Ikhú má ma̱ngaa majuiʼyáá ga̱jma̱a̱ tsumáá xóo eni̱ xa̱bu̱ bi̱ nini̱ rí májánʼ ga̱jma̱a̱ bi̱ túni̱ rí májánʼ (Is. 26:9; Hech. 17:31). Xú káʼnii gaguma ñajunʼ dí majuiʼsngún xa̱bu̱ rá. Náa i̱mba̱ artículo gajmañulú ga̱jma̱a̱ mambáyulú mbuʼyáá dí gíʼdoo numuu ñájunʼ rígi̱.
AJMÚÚ 147 Dios nakudaminaʼ rí makuwáanʼ kámuu mbiʼi
a Náa artículo rígi̱ makru̱ʼu̱lú itháan kaʼwu rí nindoo gáʼthi Jesús náa Juan 5:28, 29 índo̱ niʼthí “muguajxúnʼ bi̱ nini̱ rí májánʼ mu makuwá kámuu mbiʼi, mú bi̱ nini̱ dí ra̱májánʼ maguajxúnʼ mu majuiʼthá rí gúgiʼníín”. Mbuʼyáá ndiéjunʼ eyoo gáʼthúu̱n a̱jma̱ enii bi̱ maguajxúnʼ ga̱jma̱a̱ tsíin ni̱ndxu̱ún bi̱ makuwá ikhí.
b Libro rígi̱ nigíʼdu̱u̱ “asndu nákha nigi̱ʼi̱ numbaaʼ”, xóo muʼthá, xa̱bu̱ bi̱ kúwá náa numbaaʼ bi̱ Dios ndaʼyoo dí majngudi̱i̱ aʼkhúún (Mat. 25:34; Apoc. 17:8). Abel ninindxu̱u̱ timbáa bi̱ nigumaraʼmáʼ mbiʼyuu náa libro rí ndaʼya.
c Malaquías 3:16: “Mbiʼi rúʼko̱, bi̱ nimíñúún kuyáá Jeobá nigíʼdi̱i̱ nitamijná kaníkhiin, ga̱jma̱a̱ Jeobá nigíʼ edxu̱u̱ maʼdxuun. Náa inuu ikhaa nigumaraʼmáʼ mbá libro rí maʼni marmáʼáan a̱jkiu̱u̱n kaʼñún bi̱ namíñúún kuyáá Jeobá, ma̱ngaa bi̱ nundxa̱ʼwa̱míjna̱ ga̱jma̱a̱ numuu mbiʼyuu”.
d Nákha ginii ajngáa dí “majuiʼthá rí gúgíʼníín” nakru̱ʼu̱lú dí nandoo gáʼthúu̱n dí mumíniiʼ xa̱bu̱, gajkhun má, ma̱ndoo má gáʼthúu̱n rígi̱ ma̱ngaa, mú gi̱i̱ nakujmaa dí Jesús nijmuu ajngáa dí “majuiʼthá rí gúgíʼníín”, nindxu̱u̱ dí mbiʼyáá ga̱jma̱a̱ tsumáá xóo ni̱ndxu̱ún xa̱bu̱ mu xúʼko̱ xumíniiʼ o xóo eʼthí mbóoʼ diccionario dí ajngáa rígi̱ náa griego nandoo gáʼthúu̱n dí “mbuyáá xóo eʼni mbáa xa̱bu̱”.
