Guʼyáá rí nariʼña̱a̱ náa Biblia.

Hechos 24:15 naʼthí dí: “Magabiín xa̱bu̱ bi̱ nini̱ rí májánʼ ga̱jma̱a̱ bi̱ túni̱ rí májánʼ”. Bi̱ nini̱ rí májánʼ nindxu̱ún bi̱ ninimbu̱ún kuyáá Dios nákha xóó tsékáñún, ikha jngóo mbiʼñún kiʼniraʼmáʼ náa libro rí ndaʼya (Mal. 3:16). Bi̱ túni̱ rí májánʼ ma̱ngaa nindxu̱ún bi̱ nánguá niguaʼdáá mbayuuʼ mbiʼi majmañúú ga̱jma̱a̱ numuu Jeobá. Numuu rúʼko̱ jngóo mbiʼñún na̱nguá nigumaraʼmáʼ náa libro rí ndaʼya.

Juan 5:28, 29 naʼthí ga̱jma̱a̱ numuu ikháá má mbá nájma̱ grupo bi̱ naʼthí náa Hechos 24:15. Jesús niʼthí dí “bi̱ nini̱ rí májánʼ maguajxúnʼ mu makuwá kámuu mbiʼi, mú bi̱ nini̱ dí ra̱májánʼ maguajxúnʼ mu majuiʼthá rí gúgiʼníín”. Bi̱ nini̱ rí májánʼ nákha xóó tsékáñún maguajxúnʼ mu makuwá numuu dí mbiʼñún katima̱ náa libro rí ndaʼya. Mú bi̱ túni̱ rí májánʼ nákha xóo tsékáñún maguajxúnʼ mu majuiʼthá rí gúgíʼníín. Numuu dí mbiʼñún xóó na̱nguá kiʼniraʼmáʼ náa libro rí ndaʼya, mú ginii ndayóoʼ majuiʼyáá ga̱jma̱a̱ tsumáá xóo eni̱. Náa xúgíʼ tsiguʼ rúʼko̱ ma̱ndoo muniʼniiʼ Jeobá ga̱jma̱a̱ xúʼko̱ magumaraʼmáʼ mbiʼñún náa libro rí ndaʼya.

Apocalipsis 20:12, 13 naʼthí dí xúgíinʼ bi̱ gágabi̱ín mbaʼyóoʼ munimbu̱ún “xó má naʼthí náa rollos”, xóo muʼthá, imbo̱ʼ nuxi̱ʼ xtángoo dí maguaʼdáá náa numbaaʼ nuxi̱ʼ. Bi̱ xúnimbu̱ún makhañún (Is. 65:20).

Daniel 12:2 naʼthí dí tikhunʼ bi̱ nikháñún maguajxúnʼ “mu makuwa kámuu mbiʼi ga̱jma̱a̱ eʼwíinʼ mudrigú ma̱jti̱ʼ ga̱jma̱a̱ maguiñunʼ kuñún kámuu mbiʼi”. Náa versículo rígi̱ naʼthí ga̱jma̱a̱ numuu iwáá mbiʼi dí maguajxúnʼ: “Makuwa kámuu mbiʼi” o “maguiñunʼ kuñún kámuu mbiʼi”. Índo̱ gámbári̱go̱o̱ mbá Míí tsiguʼ, tikhun makuwíin kámuu mbiʼi ga̱jma̱a̱ eʼwíinʼ maguma gámbíin mbá kayuuʼ (Apoc. 20:15; 21:3, 4).

Náa a̱jma̱ grupo xa̱bu̱ bi̱ maguajxúnʼ ma̱ndoo mambrígui̱i̱ gajmiún xa̱bu̱ bi̱ nandún makuwá náa imbo̱ʼ país. Bi̱ nuni̱ rí májánʼ ni̱ndxu̱ún xóo xa̱bu̱ bi̱ naguwaáʼ, nakhánún i̱yi̱i̱ʼ mu ma̱ndoo muñajunʼ o makuwíin ikhí mu xúʼko̱ ma̱ndoo muni̱ tikhu dí nuni̱ xa̱bu̱ bi̱ kúwá náa xuajen rúʼko̱. Mú bi̱ nini̱ dí ra̱májánʼ ni̱ndxu̱ún xóo xa̱bu̱ bi̱ nakhánún mbá i̱yi̱i̱ʼ mbá nguáthá mbiʼi o xóo bi̱ nagún gúyá. Mu ma̱ndoo makuwá xóó náa país rúʼko̱, mbaʼyóoʼ musngajmá dí nunimbaníí dí naxtandu̱ʼu̱u̱n. Xúʼko̱ má kayuuʼ mu ma̱ndoo makuwá xóó náa Ku̱ba̱ʼ mitsaanʼ, bi̱ túni̱ rí májánʼ mbaʼyóoʼ munimbu̱ún xtángoo ndrígóo Jeobá ga̱jma̱a̱ musngajmá rí ni̱ndxu̱ún míjíinʼ xa̱bu̱. Tséʼniuu má xú káʼnii i̱yi̱i̱ʼ dí gákhánún náa xuajen rúʼko̱, majuiʼyáá xú káʼnii ni̱ndxu̱ún, nda̱wa̱á majuiʼthúún ndiéjunʼ garigá ga̱jma̱a̱ numún á mu majuixnún i̱yi̱i̱ʼ rí ma̱ndoo makuwá má xúʼko̱ o muxkawíin. Ikhaa má kayuuʼ garigá ga̱jma̱a̱ numún bi̱ gágabi̱ín náa numbaaʼ nuxi̱ʼ majuiʼthúún dí gundrígúu ga̱jma̱a̱ numuu dí gúni̱ ma̱ngaa á mu naguáʼdáá fe.

Jeobá raʼkháa i̱ndó nagáwíinʼ a̱jkiu̱u̱n ma̱ngaa nindxu̱u̱ mbáa Dios jmbii ga̱jma̱a̱ naʼni dí májánʼ (Deut. 32:4; Sal. 33:5). Masngájma ngajua dí gíʼdoo índo̱ gaʼni matuxi̱ín bi̱ nini̱ rí májánʼ ga̱jma̱a̱ bi̱ túni̱ rí májánʼ. Mú xúgíinʼ gáʼyóoʼ munimbu̱ún ikha ndrígóo dí mbuyáá ndiéjunʼ nindxu̱u̱ rí májánʼ ga̱jma̱a̱ dí ra̱májánʼ. I̱ndó bi̱ gaʼndún kuyáá ga̱jma̱a̱ bi̱ gúnimbu̱ún ikha ndrígóo makuwá kámuu mbiʼ náa numbaaʼ nuxi̱ʼ.