1, 2. Náá numuu rí kuwáanʼ gagi bi̱ nindxu̱lú xa̱bi̱i̱ Jeobá rá. (Santiago 1:​22-25.)

 JEOBÁ ga̱jma̱a̱ A̱ʼdióo nandoo rí makuwáanʼ gagi. Bi̱ niʼnirámáʼ Salmo 119:2 niʼthí: “Gagi kúwá bi̱ nunimbu̱u̱n rí naʼthí mangiin bi̱ nduyáaʼ ga̱jma̱a̱ xúgíʼ a̱jkiu̱ún”. Jesús ma̱ngaa niʼthí: “¡Itháán gagi kúwá bi̱ nudxawíín ajngá rawuunʼ Dios ga̱jma̱a̱ nugíʼ nunimbánii!” (Luc. 11:28).

² Náá numuu kuwáanʼ gagi bi̱ nindxu̱lú xa̱bi̱i̱ Jeobá rá. Rígá mbaʼa numuu, mbá dí ikhaa nindxu̱u̱ dí nuraxnuu Ajngá rawuunʼ Dios xúgíʼ mbiʼi ga̱jma̱a̱ nuʼnimíjna̱ muʼnimbáníí rí najmañulú (atraxnuu Santiago 1:​22-25).

3. Ndiéjunʼ embáyulú dí muʼgíʼ muʼnimbáníí Ajngá rawuunʼ Dios rá.

³ Índo̱ nuʼnimbáníí rí najmañulú náa Ajngá rawuunʼ Dios. Nuʼni dí maʼdxuu Jeobá ga̱jma̱a̱ rígi̱ naʼni makuwáanʼ gagi (Ecl. 12:13). Ma̱ngaa índo̱ nuʼnimbulú consejo rí na̱ʼkha̱ náa Ajngá rawuunʼ Dios nakuwáánʼ itháán májánʼ gajmiúlú bi̱ kúwá náa guʼwúlú ga̱jma̱a̱ a̱ngiu̱lú bi̱ kúwá náa congregación, mbáa ikháán mínaaʼ nitayáá dí gajkhun nindxu̱u̱ rígi̱. Ma̱ngaa na̱nguá kuaʼdáá wéñuuʼ xkujndu xóo dí guaʼdáá xa̱bu̱ bi̱ tsénimbu̱u̱n kiʼtáñajunʼ ndrígóo Jeobá. Nindxu̱u̱ xó má niʼthí rey David náa mbá ajmúú, nda̱wa̱á dí niʼthí ga̱jma̱a̱ numuu xtángoo ma̱ngaa rí naraʼwíí maʼni  Jeobá: “Bi̱ nunimbu̱u̱n mundrigúu mbá rí májánʼ wéñuuʼ” (Sal. 19:​7-11).

4. Ndíjkha rí nguáná naʼni gakhi̱i̱ muʼnimbáníí Ajngá rawuunʼ Dios rá.

⁴ Nguáná naʼni mingíjyúuʼ muraxnuu ga̱jma̱a̱ muʼnimbáníí Ajngá rawuunʼ Dios. Maski ajndu kuaʼdáá ñajunʼ mú gíʼmaa muríyaʼ mbiʼi mu muraxnuu ma̱ngaa mu muʼnigajma̱a̱ Biblia, mu xúʼko̱ makru̱ʼu̱lú ndiéjunʼ rí nandoo Jeobá mu̱ʼni̱. Ikha jngóo náa artículo rígi̱ mbuʼyáá tikhuʼ ikha dí mambáyulú mu muraxnuu Biblia xúgíʼ mbiʼi. Ma̱ngaa mbuʼyáá ndiéjunʼ gámbáyulú mu mundxa̱ʼwa̱míjna̱ dí nuraxnuu ma̱ngaa náá gándoo muʼgíʼ muʼnimbánii rí najmañulú.

ATRÍYA̱ʼ MBIʼI MU MATRAXNUU AJNGÁ RAWUUNʼ DIOS

5. Ndiéjunʼ nindxu̱u̱ tikhuu ñajunʼ dí naʼni dí xáguapháánʼ rá.

⁵ Mbaʼáánʼ bi̱ nindxu̱lú xa̱bi̱i̱ Jeobá kuaʼdáá mbaʼa wéñuuʼ ñajunʼ. Najmulú mbiʼi ndrígulú mu muʼnimbáníí dí naʼthí náa Biblia rí gíʼdoo numuu. Mbá xkri̱da, ndayóoʼ dí muñejunʼ mu maguaʼdáá dí makuwáanʼ ga̱jma̱a̱, ma̱ngaa mu muxnúún dí nda̱ñúunʼ bi̱ kúwá náa guʼwúlú (1 Tim. 5:8). Mbaʼin a̱ngiu̱lú nuñewu̱u̱n bi̱ kuñúún, bi̱ naʼniún nandii o bi̱ wanii ga̱jma̱a̱ xúgiáanʼ ndayóoʼ muríyaʼ mbiʼi mu muñeumíjna̱ ikháánʼ. Ma̱ngaa kuaʼdáá ñajunʼ náa congregación. Mbá dí gíʼdoo wéñuuʼ numuu nindxu̱u̱ dí mu̱ʼni̱ tsiakimíjna̱ muʼtáraʼa. Ga̱jma̱a̱ numuu dí ra̱ʼkhá tháán kuaʼdáá ñajunʼ dí mu̱ʼni̱, mbáa maʼni dí murajximíjna̱: “Ndiéjunʼ gándoo gáni̱ mu maríya̱ʼ mbiʼi maguxnuu Biblia xúgíʼ mbiʼi, mandxa̱ʼwa̱mínáʼ dí naʼthí ga̱jma̱a̱ mu manimbánuu rá.”

6. Ndiéjunʼ gándoo matani̱ mu matraxnuu Biblia xúgíʼ mbiʼi rá. (Atayáá ma̱ngaa xtiʼkhuu.)

⁶ Dí muraxnuu Biblia nindxu̱u̱ mbá rí “itháán gíʼdoo numuu” náa ikháanʼ bi̱ nindxu̱lú cristianos (Filip. 1:10). Náa libro ndrígóo Salmo nagi̱ʼdu̱u̱ naʼthí rí “gagi xtáa xa̱bu̱ bi̱ nanigu̱u̱ʼ maʼni xó má naʼthí  náa xtángoo ndrígóo Jeobá; ga̱jma̱a̱ mbiʼíí mbruʼún nandxa̱ʼwáminaʼ dí naguxnuu” (Sal. 1:​1, 2). Rígi̱ nandoo gaʼthí dí ndayóoʼ muríyaʼ mbiʼi mu muraxnuu Biblia. Nguáná ma̱ndoo muraxnuu rá. Mámbáa dí ikháanʼ, ma̱ndoo maraʼwíí nguáná gaguxnuu. Mbáa ndxájulú bi̱ mbiʼyuu Victor naʼthí: “Naniguʼ maguxnuu Biblia dí miʼcha̱, maski ajndu tsénigu̱ʼ magújxu̱u̱n miʼcha̱, mú nda̱yo̱o̱ dí ikhú nandoo naʼgíʼ itháán májánʼ edxu̱ʼ”. Mbáa xúʼko̱ má erathá mangáánʼ xó má eʼthí Victor. Atrajximínaʼ: “Nguáná gándoo gaguxnuu Biblia ikhúún rá.”

ATATSAʼWÁMINAʼ DÍ NATRAXNUU

7, 8. Gajmaaʼ mbá xkri̱da mu marata̱ ndiéjunʼ dí ragíʼmaa mu̱ʼni̱ índo̱ gúraxnuu Biblia.

⁷ Á mu niríyaʼ má mbiʼi dí muraxnuu Biblia, gíʼmaa muñewa̱a̱n dí xúraxnuu mbaaʼ muraxnuu. Lá mbá miʼtsú nitraxnuu mbá rí nda̱wa̱á nánguá nirmáʼáan a̱jkia̱a̱nʼ dí nitraxnuu ráʼ. Xígi̱ ma̱ngaa ma̱ndoo muguaʼníí índo̱ nuraxnuu Biblia. Mbá xkri̱da, ¡mámbá mbiʼi ma̱ndoo muraxnuu káaʼ tikhu capítulo ndrígóo Biblia! Májánʼ má nindxu̱u̱ dí muʼgími̱jna̱ muraxnuu Biblia ga̱jma̱a̱ dí mu̱ʼni̱ tsiakimíjna̱ muʼnimbáníí (1 Cor. 9:26). Mú, raʼkháa i̱ndó nandulúʼ muraxnuu Biblia ma̱ngaa nandulúʼ mbuʼyáá xú káʼnii gámbáyulú dí nuraxnuu.

⁸ Gundxaʼwamíjna̱ náa xkri̱da rígi̱. Ruʼwa nambáyúu planta mu maga̱ja̱a̱. Á mu mbaaʼ enújngóó exnúu ruʼwa, rígi̱ maʼni gachúu ku̱ba̱ʼ ga̱jma̱a̱ xámbáyuu mbaja̱a̱ májánʼ planta. Ikha jngóo itháán májánʼ índo̱ ruʼwa naxnúu mañu, numuu rí xúʼko̱ ma̱ndoo marmajan májánʼ ku̱ba̱ʼ ga̱jma̱a̱ planta ma̱ndoo mbaja̱a̱ májánʼ. Xúʼko̱ má kayuuʼ, ragíʼmaa muraxnuu Biblia mbá nacha̱, mu xúʼko̱ xámbumulú ga̱jma̱a̱ muʼgíʼ muʼnimbáníí dí niraxnuu (Sant. 1:24).

9. Ndiéjunʼ gúʼni̱ á mu naguʼunlú nuraxnuu Biblia mbá nacha̱ rá.

⁹ Atatsaʼwáminaʼ dí ikháán xtaa ratraxnuu Biblia ga̱jma̱a̱ natayáá dí natraxnuu mbá nacha̱. Ndiéjunʼ gándoo gátani̱ rá. Ataniminaʼ  matraxnuu itháán mañuu, mu ma̱ndoo matatsaʼwamínáʼ dí xtaa ratraxnuu o dí niguámbáa nitraxnuu. Ma̱ndoo matraxnuu káaʼ nguáthá versículo, mu xúʼko̱ matatsaʼwamínáʼ itháán. Víctor bi̱ niʼthá ga̱jma̱a̱ numuu náa kutriga̱ majun naʼthí: “Naniminaʼ dí xáguxnuu mbaʼa versículo, nguáná naguxnuu káaʼ mbá capítulo. Numuu rí naguxnuu miʼcha̱, rúʼko̱ naʼni dí náa mbá kañiiʼ mbiʼi mandxa̱ʼwa̱mínáʼ dí nagúxnuu”. Rí itháán gíʼdoo numuu nindxu̱u̱ rí mbuʼyáá xú káʼnii ma̱ndoo mambáyulú dí niraxnuu, raʼkháa nguáthá mba̱a̱ eraxnulú (Sal. 119:97; atayáá kúgumaʼá “ Grajxe̱ dí mambáyáaʼ matatsaʼwamínáʼ”).

10. Aratá mbá xkri̱da náá ma̱ndoo mataʼgíʼ matani̱ dí natraxnuu náa Biblia. (1 Tesalonicenses 5:​17, 18).

¹⁰ Tséʼniuu má nguáná ga̱jma̱a̱ nguáthá mba̱yu̱u̱ʼ gúriya̱ʼ muraxnuu Biblia, mú guʼyáʼ xú káʼnii gándoo gúnimbáníí dí niraxnuu. Índo̱ gúraxnuu mbá chíʼgíiʼ Ajngá rawuunʼ Dios, guraximíjna̱: “Xú káʼnii gándoo gánimbánuu xúgi̱ o nda̱wa̱á rí nijmañuʼ rá.” Mbá xkri̱da, atatsaʼwáminaʼ dí nitraxnuu 1 Tesalonicenses 5:​17, 18 (atraxnuu). Nda̱wa̱á atatsaʼwáminaʼ xú káʼnii nindxu̱u̱ dí naratájkáan. Lá naratájkáan ga̱jma̱a̱ kañiiʼ a̱jkia̱a̱nʼ ráʼ. Nguáthá nuthu ratajkáan rá. Ma̱ngaa náá numuu dí naraxnáa núma̱aʼ rá. Mbáa matraʼwi̱i̱ mbá ajtsú numuu dí maraxna̱a̱ núma̱aʼ Jeobá. Á mu natríyaʼ mbá nguáthá mba̱yu̱u̱ʼ mu matatsaʼwamínáʼ dí najmañaaʼ náa Biblia, mambáyáaʼ makrua̱ʼa̱a̱ʼ itháán Ajngá rawuunʼ Dios ga̱jma̱a̱ mu matanimbáníí rí naʼthí. Á mu xúgíʼ mbiʼi natani̱ xígi̱, mi̱dxu̱ʼnú mani̱ndxa̱a̱ʼ mbáa májáanʼ xa̱bi̱i̱ Jeobá. Mú, á mu natayáá dí rígá mbaʼa enii náa ndayóoʼ matriʼkhu̱u̱ rá.

ATAGÍʼ MATANI̱ RÍ MAʼNGA̱A̱ʼ MATANIMBÁNÍÍ

11. Náá numuu rí nguáná ma̱ndoo makaguábáánʼ rá. Atagíʼ mbá xkri̱da.

¹¹ Mbáa índo̱ gátra̱xnuu Biblia makawabáánʼ, índo̱ gáta̱ya̱a̱ dí rígá mbaʼa náa ndayóoʼ matriʼkui̱i̱. Atatsaʼwáminaʼ ga̱jma̱a̱ numuu rígi̱. Mbóoʼ mbiʼi natraxnuu tikhuʼ versículo náa naʼthí dí ragíʼmaa matraʼwíin xa̱bu̱ bi̱ mataniu̱u̱n rí májánʼ (Sant. 2:​1-8). Numuu rí nadxu̱ʼnú natayáá dí raʼkhí nindxu̱u̱ rígi̱, ikha jngóo natraʼwíí matriʼkui̱i̱ xóo etaniu̱u̱n eʼwíinʼ. ¡Ra̱ʼkhá tháán májánʼ nindxu̱u̱ rí etani̱! Mú imbo̱o̱ mbiʼi natraxnuu náa naʼthí dí gíʼmaa muñewa̱a̱n dí nuʼthá (Sant. 3:​1-12). Ikhú nadxuʼnú natayáá dí nirígá mbiʼi dí niratá dí raʼkhí ga̱jma̱a̱ numún eʼwíinʼ, ikha jngóo natraʼwíí marata̱ dí májánʼ ga̱jma̱a̱ maraxnu̱u̱n  tsiaki̱i̱ eʼwíinʼ. Dí maʼni ragajtsú mbiʼi natraxnuu dí ragíʼmaa mambájxulú gajmiúlú xa̱bu̱ numbaaʼ (Sant. 4:​4-12). Nadxuʼnú natayáá rí gíʼmaa matiewa̱a̱n itháán rí natayáá náa película ga̱jma̱a̱ ajmúú rí natadxawíín. Dí maʼni a̱jkhu̱ mbiʼi, mbáa nakaguábáanʼ ga̱jma̱a̱ numuu mbá xúgíʼ dí gíʼmaa matriʼkuminaaʼ.

12. Náá numuu dí ragíʼmaa makaguábáánʼ á mu índo̱ natraxnuu Biblia, natayáá rí ndayóoʼ matriʼkuminaʼ rá. (Atayáá ma̱ngaa nota.)

¹² Xákaguabáánʼ á mu natayáá dí ndayóoʼ matriʼku̱u̱ tikhuʼ xóo nindxa̱a̱ʼ. Numuu dí rígi̱ nasngájma dí ikháán natraxnuu Biblia numuu dí nandaʼ matriʼkuminaʼ ga̱jma̱a̱ tsétani mbamína ma̱ngaa natasngájma rí tsétani̱ nduwaminaʼ. a Garmáʼáan a̱jkia̱a̱nʼ dí gíʼmaa matriʼkuminaaʼ má xúʼko̱, mu mani̱ndxa̱a̱ʼ xóo “i̱mba̱a̱ nuxi̱i̱ʼ xa̱bu̱” xó má kaʼnii Dios (Col. 3:10). Ndiéjunʼ gámbáyáaʼ mu matanimbáníí dí na̱ʼkha̱ raʼthí náa Ajngá rawuunʼ Dios rá.

13. Ndiéjunʼ gándoo mambáyáaʼ mu matriʼkuminaʼ rá. (Atayáá ma̱ngaa xtiʼkhuu.)

¹³ Xáʼnga̱a̱ʼ matriʼkhu̱u̱ xúgíʼ mbá nacha̱, itháán májánʼ rí makrua̱ʼa̱a̱ʼ asndu náá gáʼngo̱o̱ gátani̱ (Prov. 11:2). Ma̱ndoo matani̱ rígi̱: Atani̱ mbá lista náa mbá xúgíʼ dí gíʼmaa matriʼkuminaʼ, ga̱jma̱a̱ nda̱wa̱á atraʼwíí mbóó o a̱jma̱ dí ikhaa mu matani̱ ginii. Nda̱wa̱á atriʼkhu̱u̱ dí i̱ʼwáʼ. Náá gátagíʼdi̱i̱ rá.

14. Ndiéjunʼ gátagíʼdi̱i̱ matanimbáníí rá.

¹⁴ Ginii ndayóoʼ ma̱ta̱ya̱a̱ ndiéjunʼ rí itháán xáʼniaaʼ miʼskhaa matani̱ o ndiéjunʼ rí itháán gíʼdoo numuu matriʼkhui̱i̱. Á mu natayáá má náa ndayóoʼ matriʼkhui̱i̱, atayáʼ itháán dí naʼthí náa Biblioteca náa Internet  Watch Tower o náa Ikha rí munigajmaa xa̱bi̱i̱ Jeobá. Aratakáñíí Jeobá ga̱jma̱a̱ “atanda̱ʼa̱a̱ rí maʼndaaʼ matani̱ ga̱jma̱a̱ tsiaki̱i̱ mu matanimbáníí” (Filip. 2:13). Nda̱wa̱á atagíʼ matani̱ rí nijmañaaʼ. Índo̱ gáta̱ya̱a̱ rí niʼnga̱a̱ʼ nitriʼkuminaʼ o nadxuʼ ranindxa̱a̱ʼ itháán májánʼ xa̱bu̱, maʼni rí maʼndaaʼ matriʼkuminaʼ itháán. Ga̱jma̱a̱ mbáa rúʼko̱ gáʼni rí xáʼniaaʼ miʼskhaa matanimbáníí i̱ʼwáʼ rí nitagíminaʼ matani̱.

GUNIʼÑÁÁʼ DÍ AJNGÁ RAWUUNʼ DIOS MAMBÁYULÚ

15. Ndiéjunʼ eʼni manindxu̱lú mixtiʼkuáanʼ bi̱ nindxu̱lú xa̱bi̱i̱ Jeobá, náa eʼwíinʼ xa̱bu̱ bi̱ nuraxnuu Biblia rá. (1 Tesalonicenses 2:13.)

¹⁵ Mbaʼin xa̱bu̱ nuthi rí mbaʼa nuthu nuraxnuu Biblia. Mú, lá gajkhun nunimbu̱u̱n dí naʼthí ikhí xáʼ. Lá nuniñanʼ dí mambáñún muriʼkumijnáa xáʼ. Na̱nguá, mbaʼin xa̱bu̱ tsénimbu̱u̱n consejo rí na̱ʼkha̱ náa Biblia. ¡Mú bi̱ nindxu̱lú xa̱bi̱i̱ Jeobá, mixtiʼkuáanʼ kayuuʼ! Ikháá má xó cristianos bi̱ nikúwá nákha siglo timbá, nundrígulú Biblia “xó má kaʼyoo, xóo ajngóo Dios”. Ikha jngóo nuʼni tsiakimíjna̱ muʼnimbáníí consejo rí na̱ʼkha̱ ikhí (atraxnuu 1 Tesalonicenses 2:13).

16. Ndiéjunʼ gámbáyulú mu muʼgíʼ muʼnimbáníí dí naʼthí náa Ajngá rawuunʼ Dios rá.

¹⁶ Nguáná naʼni mingíjyúuʼ muraxnuu ga̱jma̱a̱ muʼnimbáníí dí naʼthí náa Ajngá rawuunʼ Dios. Mbáa nguáná tséguaphán mu muraxnuu, ikha jngóo mbá nacha̱ eraxnuu rí asndu tséndxaʼwamíjna̱ rí naʼthí ikhí. O mbáa nákaguábáánʼ índo̱ nduʼyáá dí ra̱ʼkhá tháán mbaʼa náa ndayóoʼ muriʼkumijnááʼ. Tséʼniu̱u̱ má asndu ndiéjunʼ má rí naʼniulú mingíjyúuʼ, Jeobá ma̱ndoo mambáyulú. Guniʼñááʼ rí ikhaa mambáyulú mu muʼgíʼ muʼnimbáníí rí naʼthí náa Biblia, mú xúʼko̱ raʼkháa i̱ndó muʼdxawíín ga̱jma̱a̱ mambumulú dí nuraxnuu. Índo̱ itháán má guʼnimbáníí dí najmañulú, makuwáanʼ itháán gagi (Sant. 1:25).