1, 2. Náá numuu rí Jeobá niʼniwáánʼ mu makuwáánʼ gagi índo̱ numbáñún eʼwíinʼ rá.

 JEOBÁ niʼniwáánʼ mú makuwáánʼ itháán gagi índo̱ numbáñún eʼwíinʼ ki xóo índo̱ ikhiin nambáyulú ikháanʼ (Hech. 20:35). Gajkhun má nakuwáanʼ gagi índo̱ mbáa naxnúlú mbá regalo. Mú nakuwáanʼ itháán gagi índo̱ ikháanʼ numbáñún eʼwíinʼ. Májánʼ rí Jeobá niʼniwáánʼ xígi̱ káʼnii. Náá numuu rá.

² Ga̱jma̱a̱ numuu dí xígi̱ káʼnii niʼniwáánʼ Jeobá, ikháanʼ ma̱ndoo muʼni rí makuwáanʼ itháán gagi á mu nduʼyáá xóo ma̱ndoo mumbáñún eʼwíinʼ, maʼdxulu itháán. Raʼkháa tháán nagui̱i̱ nigumawáanʼlú rá. (Sal. 139:14.)

3. Náá numuu rí náa Biblia naʼthí rí Jeobá nindxu̱u̱ Dios gagi rá.

³ Náa Biblia naʼthí rí bi̱ numbañún eʼwíinʼ kúwá gagi, rígi̱ naʼni rí makru̱ʼu̱lú náá numuu rí Jeobá nindxu̱u̱ “Dios gagi” (1 Tim. 1:11). Ikhaa nindxu̱u̱ ginii bi̱ naxnún eʼwíinʼ ga̱jma̱a̱ ndawa̱a̱ nimbáa bi̱ naxnáa itháán mba̱a̱ ki xóo ikhaa. Xó má apóstol Pablo, niʼthí: “Ikháanʼ nduʼyalú nandoo numbayimíjna̱lu ga̱jma̱a̱ kuwáanʼ” (Hech. 17:28). Ma̱ngaa, ‹xúgíʼ dí nakánulú nindxu̱u̱ májánʼ ga̱jma̱a̱ nindxu̱u̱ kájxi̱› na̱ʼkha̱ náa Jeobá (Sant. 1:17).

4. Ndiéjunʼ gámbáyulú mu makuwáanʼ itháán gagi rá.

⁴ Ndiéjunʼ gándoo guʼni á mu nandulúʼ makuwáanʼ itháán gagi índo̱ gumbáñún eʼwíinʼ rá. Náa artículo rígi̱, mbuʼyáá xóo ma̱ndoo mbuʼyaridáá rí májáanʼ a̱jkiu̱u̱n Jeobá (Efes. 5:1). Ma̱ngaa mbuʼyáá ndiéjunʼ gándoo guʼni á mu nakumulú rí eʼwíinʼ tséngajun rí nuʼni. Xúgíʼ rígi̱ mambáyulú mu mumbáñún má xúʼko̱ eʼwíinʼ ga̱jma̱a̱ gagi ma̱ngaa mu maʼdxulu itháán.

 GUʼYARIDÁÁ RÍ MÁJÁANʼ A̱JKIU̱U̱N JEOBÁ

5. Ndiéjunʼ nindxu̱u̱ tikhuu rí Jeobá naxnúlú rá.

⁵ Guʼyáá tikhuu enii xóo Jeobá nasʼngajmalú rí májáanʼ a̱jkiu̱u̱n. Mbá xkri̱da, naxnúlú rí maguaʼdáá maski asndu tséʼni rí maguaʼdáá wéñuuʼ. Mu ikhaa naxnúlú muguaʼdáá rí ndayúlú xóo ganitsu xtiin ga̱jma̱a̱ náa makuwáanʼlu (Sal. 4:8; Mat. 6:​31-33; 1 Tim. 6:​6-8). Jeobá tséxnulú rígi̱ i̱ndó ga̱jma̱a̱ numuu dí naku̱mu̱u̱ rí ikhaa kaʼyoo maxnúlú. Náá numuu eʼni xá.

6. Ndiéjunʼ ejmañulúʼ rí naʼthí náa Mateo 6:​25, 26 rá.

⁶ Jeobá naxnúlú rí ndayúlú numuu rí nandoo kaʼyulú. Guʼyáá ajngáa rí niʼthí Jesús dí na̱ʼkha̱ náa Mateo 6:​25, 26 (atraxnuu). Náa versículo rígi̱, Jesús nijmuu xkri̱da ndrígún ñuʼún bi̱ jngruigu̱u̱n rijma̱a̱ ga̱jma̱a̱ niʼthí: “Tsédu ni má tsérajxi̱i̱ náa xtagaʼu”. Mú nda̱wa̱á niʼthí xóó: “Mú Anu̱lú bi̱ xtáa mekhuíí naxníʼtsún”. Ikhú nirajxi̱: “Lá raguáʼdáá itháan numala ikháanʼ ki xóo ikhiin xáʼ”. Ndiéjunʼ nindoo gáʼsngúlú xá. Dí Jeobá ndaʼyoo rí guaʼdáá itháán numún xa̱bi̱i̱ ki xóo xujkhú. Á mu Jeobá nañewu̱u̱n xujkhú ma̱ndoo mbuʼyáá gajkhun rí xúʼko̱ má gáñewunlúʼ mangáanʼ. Jeobá nindxu̱u̱ Anu̱lú ga̱jma̱a̱ nandoo kaʼyulú, naxnúlú rí ndayúlú (Sal. 145:16; Mat. 6:32).

7. Náá gándoo guʼyaridáá rí májáanʼ a̱jkiu̱u̱n Jeobá rá. (Atayáá ma̱ngaa xtiʼkhuu.)

⁷ Xó ma Jeobá, ikháanʼ nandulúʼ kuʼñúún eʼwíinʼ. Ikha jngóo nuxnún rí ndañún xó má eʼngulú. Mbá xkri̱da, lá ikháán natatsiniiʼ mbáa bi̱ ndayóo ganitsu o xtiin ráʼ. Jeobá ma̱ndoo majmiuu ga̱jma̱a̱ʼ nindxa̱a̱ʼ mu matambáyii ndxájulú buʼko̱. Bi̱ nindxu̱lú xa̱bi̱i̱ Jeobá najmaʼniáanʼ ga̱jma̱a̱ numuu rí numbáñún eʼwíinʼ índo̱ ndañún. Gundxaʼwamíjna̱ rí nirígá, índo̱ niʼni nandii COVID-19. Nikúwá a̱ngiu̱lú bi̱ nixnáa ganitsu, xtiin ga̱jma̱a̱ i̱ʼwáʼ mu mumbáñún bi̱ ndañún. Ma̱ngaa mbaʼin nixnáʼ ga̱jma̱a̱ xúgíʼ a̱jkiu̱ún mbújkha̱a̱ náa obra mundial mu xúʼko̱ mixtiembáá náa narígá gamiéjunʼ náa xúgíʼ numbaaʼ. Xúgíinʼ ikhiin ninimbaníí ajngáa rí naʼthí náa Hebreos 13:16: “Xámbumala mu̱ni̱ dí májánʼ, ga̱jma̱a̱ rí muxnu̱u̱ dí kuaʼdáála eʼwíinʼ numuu dí tsigijñaʼ xóo rígi̱ nanigu̱u̱ʼ wéñuuʼ Dios”.

8. Xú káʼnii embáyulú rí Jeobá naxnúlú tsiaki̱i̱ rá. (Filip. 2:13.)

⁸ Jeobá naxnúlú tsiaki̱i̱. Tsiaki̱i̱ rí ikhaa gíʼdoo nditháan tsértumuu ga̱jma̱a̱ naniguuʼ  maxnún xa̱bi̱i̱ bi̱ naguajún jmbu (atraxnuu Filipenses 2:13). Lá mbá miʼtsú nitanda̱ʼa̱a̱ rí maxnáa tsiaki̱i̱ mu matraʼníí mbá tsáʼkhá, gamiéjunʼ, o mu maʼngaaʼ matanimbáníí ñajunʼ rí xtaʼdáá ráʼ. Índo̱ Jeobá niriʼña nixnáa tsiaki̱i̱, mbáa niku̱ma̱a̱ʼ xó má nikumu̱u̱ apóstol Pablo índo̱ niʼthí: “Gúʼdoo tsiakii mu ma̱ni̱ xúgíʼ núma̱a̱ má bi̱ naxnúʼ tsiakii” (Filip. 4:13).

9. Xú káʼnii gándoo guʼyaridáá rí májáanʼ a̱jkiu̱u̱n Jeobá rá. (Atayáá ma̱ngaa xtiʼkhuu.)

⁹ Ikháanʼ na̱nguá kuaʼdáá tsiaki̱i̱ xóo dí gíʼdoo Jeobá mu mumbáñún eʼwíinʼ xó má eʼni ikhaa. Mú, ma̱ndoo mbuʼyaridáá rí májáanʼ a̱jkiu̱u̱n índo̱ guʼni xó má eʼngo̱o̱ mu mumbáñún eʼwíinʼ. Mbá xkri̱da, á mu mbáa ndxájulú nikhi̱i̱ o naʼniuu nandii, ma̱ndoo muʼgua gúʼtsi rí ndayóo o mumbáyíí ga̱jma̱a̱ ñajunʼ rí gíʼdoo náa goʼwóo. Ga̱jma̱a̱ á mu nandoo, guxnaximíjná mu muyambáá náa naguma kaʼwii ga̱jma̱a̱ náa naguma májáánʼ Guʼwá náa nagimbáanʼ. Índo̱ najmulú tsiaki̱i̱ ndrígulú mu muʼni rígi̱ ma̱ndoo mumbáñún wéñuuʼ a̱ngiu̱lú.

10. Xú káʼnii gúxnúún tsiaki̱i̱ eʼwíinʼ ga̱jma̱a̱ ajngáa dí nuʼthá rá.

¹⁰ Xámbumulú dí ajngáa dí nuʼthá ma̱ndoo maxnún tsiaki̱i̱ eʼwíinʼ. Lá natatsiniiʼ mbáa bi̱ maʼnii wéñuuʼ a̱jkiu̱u̱n á mu naratháán rí nangajua̱a̱ʼ xtayáá xáʼ. Á mu xúʼko̱, ma̱ndoo matani̱ mbaʼyoo dí naxmiéjuanʼ xtayáá. Ma̱ndoo mi̱dxu̱ʼ gátayaa náa goʼwóo, marataraʼaa náa teléfono o mataxuʼmá mbá nota o mbá mensaje. Xáxmiéjuaanʼ ga̱jma̱a̱ numuu dí gáratha̱a̱n, i̱ndó ndayóo magajnúu asndu náa a̱jkia̱a̱nʼ. Numuu dí maski asndu káaʼ tikhuu ajngáa dí wabaʼ ma̱ndoo maʼni dí maxnúʼ tsiaki̱i̱ mbáa xa̱bu̱ mu mawi̱ji̱ jmbu (Prov. 12:25; Efes. 4:29).

11. Xú káʼnii ejmúu Jeobá ku̱ma̱a̱ dí gíʼdoo rá.

¹¹ Jeobá naxnúlú ku̱ma̱a̱. Discípulo Santiago niʼnirámaaʼ: “Á mu mbáa dí ikháanʼla ndayóoʼ magiʼdoo xóó ku̱ma̱ gándo̱ʼo̱o̱ má xúʼko̱ Dios” ga̱jma̱a̱ niʼthí xóó: “Numuu rí ikhaa naxnún xúgíinʼ ga̱jma̱a̱ xúgíʼ a̱jkiu̱u̱n ma̱ngaa tsétanga̱a̱ maʼthí kikáá ga̱jma̱a̱ numuu rí naxná” (Sant. 1:5). Xó má eʼthí náa versículo rígi̱, Jeobá tsiyéjxi̱i̱ dí gíʼdoo mu majmuu i̱ndó ikhaa. Ikhaa naxnún eʼwíinʼ ga̱jma̱a̱ xúgíʼ a̱jkiu̱u̱n. Ma̱ngaa “tsétanga̱a̱ maʼthí kikáá ga̱jma̱a̱ numuu rí naxná” xóo muʼthá, tséʼni̱ makumulú dí raʼkhí eʼni índo̱ nunda̱ʼa̱a̱ ikha ndrígóo, ikhaa má naʼthúlúʼ rí munda̱ʼa̱a̱ (Prov. 2:​1-6).

12. Náá ma̱ndoo muʼsngúún eʼwíinʼ rí najmañulú rá.

¹² Ikháánʼlú rá. Ma̱ndoo mbuʼyaridáá Jeobá ga̱jma̱a̱ musngúún eʼwíinʼ dí najmañulú  (Sal. 32:8). Rígá mbaʼa náa ma̱ndoo muʼni rígi̱. Mbá xkri̱da, índo̱ nusngúún mutaraʼa a̱ngiu̱lú bi̱ nuxu̱u̱nʼ. Ma̱ngaa a̱ngiu̱lú bi̱ kuya̱ edxu̱u̱ naʼngo̱o̱ a̱jkiu̱u̱n ga̱jma̱a̱ numbañún siervos ministeriales ga̱jma̱a̱ eʼwíinʼ a̱ngiu̱lú bi̱ nijngún má iyááʼ mu munimbáníí ñajunʼ rí kuáʼdáá náa congregación. Ga̱jma̱a̱ mbaʼin a̱ngiu̱lú bi̱ najmañún nuni̱ guʼwá o najmañún nuni̱ májáanʼ Guʼwá náa nagimbáanʼ, ikhiin nusngúún eʼwíinʼ a̱ngiu̱lú mu mangiin muni̱ ñajunʼ rígi̱.

13. Xú káʼnii gándoo guʼyaridáá Jeobá índo̱ gúʼsngúún eʼwíinʼ rá.

¹³ Índo̱ gúʼsngúún eʼwíinʼ rí najmañulú, gíʼmaa mbuʼyaridáá xkri̱da ndrígóo Jeobá. Xó má ndiʼyáá ikhaa naxnún ku̱ma̱a̱ ndrígóo eʼwíinʼ ga̱jma̱a̱ xúgíʼ a̱jkiu̱u̱n. Ikháanʼ mangáanʼ gíʼma muʼsngúún eʼwíinʼ dí najmañulú. Tsérkaʼwu dí najmañulúʼ ga̱jma̱a̱ numuu rí tsíyulú dí bi̱ nusngáa marígú kaʼyulú “ñajunʼ rí kuáʼdáá”, ní tséndxaʼwa̱míjna̱lú: “Gájma̱ñuu má mbawíí, nimbáa ndawa̱a̱ tsáá niʼsngóʼ jún”. Nimbáa xa̱bi̱i̱ Jeobá ragíʼmaa mandxaʼwáminaʼ xígi̱ kaʼnii. Nadxulú dí muʼthúún eʼwíinʼ xúgíʼ dí najmañulú ga̱jma̱a̱ dí muʼni asndu xó má eʼngo̱o̱ mu muʼsngúún (1 Tes. 2:8). Nandulúʼ dí “xúʼko̱ ikhiin majmañún musngúún eʼwíinʼ” (2 Tim. 2:​1, 2). Á mu xúgiáanʼ núʼsngúún eʼwíinʼ dí najmañulú ga̱jma̱a̱ xúgíʼ a̱jkiu̱lú, xó má ikhiin ga̱jma̱a̱ ikháánʼlú majmañulú itháán ga̱jma̱a̱ makuwáanʼ itháán gagi.

Á MU NAKUMULÚ DÍ EʼWÍINʼ TSÉNGAJU̱U̱N RÍ NUʼNI RÁ.

14. Ndiéjunʼ erígá índo̱ nambáñúún eʼwíinʼ rá.

¹⁴ Mbaʼa nuthu índo̱ numbáñún eʼwíinʼ, itháán á mu nindxu̱ún a̱ngiu̱lú, nusngajmá rí nduyamajkuíí rí nuʼni ga̱jma̱a̱ numún. Mbáa nuniraʼmáʼ mbá nota o i̱ʼwáʼ rí nuni̱ mu muxna̱lú núma̱aʼ (Col. 3:15). Índo̱ nuxnanʼlú núma̱aʼ naʼni makuwáanʼ itháán gagi ga̱jma̱a̱ numuu rí niʼni.

15. Ndiéjunʼ gíʼmaa marmáʼáan a̱jkiu̱lú índo̱ nakumulú dí eʼwíinʼ tséyamajkuíí dí nuʼni rá.

¹⁵ Mú nguáná xa̱bu̱ tséxnalú núma̱aʼ ga̱jma̱a̱ numuu dí nuʼni. Mbá nguáná makumulú rí eʼwíinʼ tséyamajkuíí dí nuʼni ga̱jma̱a̱ numún, o tséyáá nguáthá mbiʼi, tsiaki̱i̱ ga̱jma̱a̱ mbújkhu̱lú ejmuluʼ mu mumbáñúún. Á mu xúʼko̱ erígá, ndiéjunʼ gámbáyulú mu xákuwáanʼ ngíná ga̱jma̱a̱ xákiʼnááʼ rá. Garmáʼáan a̱jkiu̱lú dí naʼthí náa texto dí kayá edxu̱u̱ náa artículo rígi̱, Hechos 20:35. Ra̱ʼkhá dí eʼwíinʼ muxnálúʼ núma̱aʼ maʼni dí makuwáanʼ gagi, ikháanʼ kaʼyulú dí mumbáñún má xúʼko̱ eʼwíinʼ ga̱jma̱a̱ gagi maski asndu nakumulú dí ikhiin tséyamajkuíí dí nuʼni. Guʼyáá tikhuu ikha dí ma̱ndoo mambáyulú.

16. Ndiéjunʼ gíʼmaa marmáʼáan a̱jkiu̱lú índo̱ gumbáñún eʼwíinʼ rá.

¹⁶ Garmáʼáan a̱jkia̱a̱nʼ dí índo̱ natambáñúún eʼwíinʼ xtaa ratayaridáá Jeobá. Ikhaa naxnún rí májánʼ xa̱bu̱ tséʼniuu á mu nduyamajkuíí o nánguá (Mat. 5:​43-48). Jeobá nakuʼdáminaʼ náa xa̱bi̱i̱ dí á mu tséguaʼthi̱i̱n rí murtanga̱a̱ muda̱a̱ ga̱jma̱a̱ numuu rí nuni̱, “mba̱a̱ rí gúda̱a̱ʼ” (Luc. 6:35). Ikha jngóo xáraxtaa ngíná, á mu nguáná eʼwíinʼ tséxnáá núma̱aʼ ga̱jma̱a̱ numuu rí natani̱. Garmáʼáan a̱jkia̱a̱nʼ rí Jeobá maʼni tsajkurámááʼ ga̱jma̱a̱ numuu rí nataniu̱u̱n rí májánʼ eʼwíinʼ ma̱ngaa numuu rí naraxná ga̱jma̱a̱ gagi (2 Cor. 9:7; Prov. 19: 17).

17. Ndíjkha jngóo rí nandulúʼ mumbáñún eʼwíinʼ rá. (Lucas 14:​12-14.)

¹⁷ Imbá rí ma̱ndoo mu’ni mu mbuʼyaridáá Jeobá nindxu̱u̱ rí muʼnimbáníí rí niʼthí Jesús náá Lucas 14:​12-14 (atraxnuu). Na̱nguá má nindxu̱u̱ raʼkhí dí muʼniu̱u̱n rí  májánʼ o rí mumbañún bi̱ mangiin ma̱ndoo muniulúʼ dí májánʼ. Mu, á mu na̱jkuánu nduʼyáá dí índo̱ rígá rí nuxnún eʼwíinʼ nuguaʼthi̱i̱n rí ikhiin martanga̱a̱ xá. Á mu xúʼko̱ guʼgímijná muʼni rí niʼthí Jesús: Gumbáñún bi̱ xándoo murtanga̱a̱ rí nuxnún, xígi̱ makuwáanʼ gagi numuu rí mbuʼyaridáá Jeobá. Á mu tséguáʼthi̱i̱n nimbáa índo̱ numbáñún eʼwíinʼ muxnáá má xúʼko̱ ga̱jma̱a̱ gagi maski asndu tséxʼnáalú núma̱aʼ.

18. Ndiéjunʼ gambáyulúʼ mu xundxa̱ʼwa̱míjna̱ dí raʼkhí ga̱jma̱a̱ numún eʼwíinʼ rá.

¹⁸ Xundxa̱ʼwa̱míjna̱ dí raʼkhí ga̱jma̱a̱ numún eʼwíinʼ (1 Cor. 13:7). Á mu numbayíí mbáa ga̱jma̱a̱ na̱nguá eʼthúlú nimbáa, mbáa murajximíjnalú: “Lá gajkhun tséʼyamajkhuu dí nini o nimbumuu gáxnáa núma̱a̱ dxe̱ʼ.” O rígá i̱mba̱ numuu jngóo bi̱ nimbayíí táʼni xóo nikumulú. Mbáa ra̱ʼkhá tháán naxnáa núma̱aʼ mú na̱nguá ejmaa gaʼthí xóo ku̱mu̱u̱, o mbáa nati̱yu̱u̱ʼ rí eʼwíinʼ mumbayíí, itháán má á mu nákhá ginii ikhaa nambáñúún eʼwíinʼ ga̱jma̱a̱ dí xúgi̱ nánguá eʼngo̱o̱ gámbañún. Tséʼniuu má asndu kaʼnii, ngajua dí kuaʼdáá náa eʼwíinʼ maxkajxáánʼ mumbañún ga̱jma̱a̱ á mu gajkhun nandulúʼ kuʼñúún a̱ngiu̱lú xundxa̱ʼwa̱míjna̱ dí raʼkhí ga̱jma̱a̱ numún ma̱ngaa mumbañún má xúʼko̱ ga̱jma̱a̱ gagi (Efes. 4:2).

19, 20. Ndíjkha dí májánʼ dí maʼngo̱o̱ a̱jkiu̱lú rá. (Atayáá ma̱ngaa xtiʼkhuu.)

¹⁹ Gáʼngo̱o̱ a̱jkiu̱lú. Rey Salomón bi̱ najmañuu niʼthí: “Atrajkuáa ganitsu ndrígáaʼ náa iyaʼ, ga̱jma̱a̱ índo̱ gánújngoo mbiʼi mataxkama̱a̱ mbu̱júu̱” (Ecl. 11:1). Ajngáa rígi̱, naʼsngúlú dí mbáa nguáná xa̱bu̱ bi̱ nuʼniu̱u̱n rí májánʼ muxna̱ʼlú núma̱aʼ “nda̱wa̱á rí gájngoo mbayuuʼ mbiʼi”. Rígi̱ nigíʼnuu mbáa ndxájulú.

²⁰ Nákhá niʼníí, a̱ʼgiu̱u̱ mbáa ndxájulú superintendente niʼnirámáʼ mbá nota mu maxnúu tsiaki̱i̱ mawi̱ji̱ jmbu náa Jeobá mbáa ndxájulú bi̱ ndiʼkhún nijngún iyááʼ. Migiñuʼ tsiguʼ nda̱wa̱á ndxájulú niriʼña náa mbá carta  dí naʼthí: “Nanirámáʼ náa inaaʼ mu ma̱tha̱a̱nʼ dí ra̱ʼkhá tháán nitambáyuʼ náa iwáá tsiguʼ rígi̱”. Ma̱ngaa naʼthí: “Ajngáa dí nitaniraʼmáʼ ninindxu̱u̱ nagui̱i̱. Mú dí nijkhanuʼ asndu náa a̱jkiu̱nʼ ninindxu̱u̱ texto ndrígóo Biblia rí nditháan tsémbumu”. a Nda̱wa̱á dí niʼthún tikhuu xkujndu dí niraʼnuu, niʼthí xóó: “Nirígá mbiʼi náa nindoo maniʼñún xúgíʼ, nindoʼ maniʼñún rani̱ ñajuunʼ Jeobá. Mú narmáʼáan a̱jkiu̱nʼ texto ndrígóo Biblia dí nitanirámáʼ ga̱jma̱a̱ rúʼko̱ nixnuʼ tsiaki̱i̱ mu maguajún jmbu má xúʼko̱ náa Jeobá. Náa mbá xúgíʼ tsiguʼ rígi̱ ndaa nimbá rí itháán nixnuʼ tsiaki̱i̱, xóo nota ga̱jma̱a̱ texto ndrígóo Biblia dí ikháán niraxnúʼ”. ¡Atatsaʼwáminaʼ xóo ra̱ʼkhá tháán gagi nixtáa a̱ʼgiu̱u̱ ndxájulú superintendente índo̱ niguxnuu carta rígi̱! Á mu ikháánʼ numbayíí mbáa, ma̱ndoo manújngoo “mbayuʼ mbiʼi” mu maxnálúʼ núma̱aʼ.

21. Ndíjkha dí májánʼ dí muʼni tsiakimijna dí mbuyaridáá má xúʼko̱ dí májáanʼ a̱jkiu̱u̱n Jeobá rá.

²¹ Xó má ndiʼyáá, Jeobá niʼniwáánʼ mu makuwáanʼ itháán gagi índo̱ nuxnún eʼwíinʼ, ki xóo índo̱ nakánulú. Nakuwáanʼ májánʼ índo̱ numbáñún a̱ngiu̱lú ga̱jma̱a̱ nanigulúʼ dí muxnáʼlú núma̱aʼ. Mú tséʼniuu á mu nuxnálúʼ núma̱aʼ o na̱nguá ma̱ndoo makuwáanʼ májánʼ numuu dí niʼni mbá dí májánʼ. Asndu ndiéjunʼ má dí gúxnalú, gármáʼáanʼ a̱jkiu̱lú dí naʼthí náa 2 Crónicas 25:9: “Jeobá ma̱ndoo maxnáaʼ itháan”. Ikha jngóo rí maʼni tsajkurámááʼ Jeobá mani̱ndxu̱u̱ itháán mba̱a̱ ki xóo dí ikháánʼ nuxná. Ra̱ʼkhá tháán naʼni makuwáanʼ gagi dí ikhaa maʼni numalú. Gajkhun dí gíʼdoo wéñuuʼ numuu dí mbuyaridáá má xúʼko̱ rí májáanʼ a̱jkiu̱u̱n Anu̱lú bi̱ xtáa mekhuíí.