1, 2. a) Xú káʼnii kúwíin a̱ngiu̱lú náa Judea índo̱ apóstol Pablo niʼnirámáʼ I̱yi̱i̱ʼ rí na̱jkha̱ inún Hebreos rá. b) Náá numuu dí ni̱jkha̱nú náa mbiʼi dí phú nda̱ñúunʼ xá.

 ÍNDO̱ nikháñuu Jesús, cristianos bi̱ kúwá náa Jerusalén ga̱jma̱a̱ náa Judea niraʼníí mbaʼa gamiéjunʼ. Nda̱wa̱á dí nigi̱ʼi̱ congregación náa Jerusalén, xa̱bu̱ niguáʼdi̱i̱ nixkúún a̱ngiu̱lú (Hech. 8:1). Mbá 20 tsiguʼ nda̱wa̱á, xa̱bi̱i̱ Cristo bi̱ kúwá náa Judea niraʼníí gamiéjunʼ ga̱jma̱a̱ numuu rí nda̱a̱ mbújkha̱a̱, numuu dí ikhú nirígá ewiʼ (Hech. 11:​27-30). Mú, mbáa mijngii tsiguʼ 61, ikhú bi̱ nindxu̱ún cristianos na̱nguá nini ngíníi wéñuuʼ ki xóo rí muni̱ ngíníin itháán nda̱wa̱á. Ikhú Jeobá, nijmuu espíritu santo mu apóstol Pablo maʼnirámáʼ consejo náa mbá i̱yi̱i̱ʼ mu maxnún tsiaki̱i̱ ga̱jma̱a̱ numuu dí ma̱ʼkha̱ nda̱wa̱á.

² Inu má mambanúu rí niʼthí Jesús, dí maʼga̱nú mambá dí nutañajunʼ bi̱ judíos (Luc. 21:20). Ikha jngóo I̱yi̱i̱ʼ dí ni̱jkha̱ náa inún bi̱ Hebreos, ni̱jkha̱nú mbiʼi rí phú nda̱ñúunʼ, numuu rí maʼga̱nú mbiʼi dí ni xákúwíin tsímáá. Náa i̱yi̱i̱ʼ dí niʼnirámáʼ apóstol Pablo nixnún consejo dí ma̱ndoo mambáñún a̱ngiu̱lú mu maʼngu̱u̱n muraʼníí dí gáʼkha̱. Gajkhun má dí Pablo ni má a̱ngiu̱lú bi̱ kúwá náa Judea na̱nguá ndiyáá náá phú mbiʼi gárígá. Mú a̱ngiu̱lú nijmún májánʼ mbiʼi ndrígu̱ún mu xúʼkhíin muni̱ dí maʼni itháan gújkhúʼ fe ndrígu̱ún, ma̱ngaa mu xúʼkhíin makuwíin xawii muraʼníí dí wíji̱ marigá (Heb. 10:25; 12:​1, 2).

3. Náá numuu dí májánʼ gáʼni dí mbiʼi xúgi̱ muraxnuu I̱yi̱i̱ʼ rí na̱jkha̱ inún Hebreos rá.

³ Ikháánʼlú inu má muraʼníí mbá ga̱ʼkhu̱ dí itháan gakhi̱i̱ ki xóo dí niraʼníí a̱ngiu̱lú hebreos (Mat. 24:21; Apoc. 16: 14,  16). Consejo dí Jeobá nixnún a̱ngiu̱lú buʼko̱ ma̱ndoo mambayúlú mangáánʼ dí mbiʼi xúgi̱. Ikha jngóo guʼyáá tikhuu dí ikhaa.

“GAGAJÁÁNʼLÚ MÁ XÚʼKO̱ XÓO MBÁA XA̱BU̱ NIKHI̱I̱”

4. Ndiéjunʼ niraʼníí cristianos bi̱ niniña̱a̱nʼ religión judía rá. (Atayáá ma̱ngaa xtiʼkhuu.)

⁴ Hebreos bi̱ Pablo niʼnirámáʼ inún, niniña̱a̱nʼ religión judía mu mani̱ndxu̱ún xa̱bi̱i̱ Cristo, ga̱jma̱a̱ rígi̱ niʼniún gakhi̱i̱. Xa̱bu̱ judíos ninindxu̱ún mbá xuajin dí Jeobá niraʼwíí. Mba̱yu̱u̱ʼ tsiguʼ Jerusalén ninindxu̱u̱ mbá xuajin dí ra̱ʼkhá tháán gíʼdoo numuu, numuu rí ikhí niʼtáñajunʼ rey bi̱ nigíiʼ Jeobá ga̱jma̱a̱ ikhí rígá templo. Xúgíinʼ judíos bi̱ naguájun jmbu nunimbánii Xtángoo ndrígóo Moisés ma̱ngaa nunimbu̱ún kiʼtáñajunʼ rí nusngáa xa̱bu̱ ede̱. Kuáʼdáá xtángoo ga̱jma̱a̱ numuu ganitsu, ga̱jma̱a̱ numuu rí muthu xtóo xuyuuʼ tsáʼkhún ga̱jma̱a̱ xú káʼnii gíʼmaa muniu̱u̱n eʼwíinʼ xa̱bu̱ bi̱ naguwáʼ i̱mba̱ níʼkhá xuajin. Mú, índo̱ nikháñuu Jesús Jeobá nánguá nigruigú tsigijñaʼ rí nuxnajxi̱ náa templo. Xúgíʼ rígi̱ niʼniún mingíjyúuʼ munimbáníí judíos bi̱ nanindxu̱ún cristianos numuu rí naguʼwún má munimbánii Xtángoo rí nikhánún (Heb. 10:​1, 4, 10). Asndu cristianos bi̱ itháán gujkhuʼ fe ndrígún xóo apóstol Pedro niʼniún gakhi̱i̱ maguʼun (Hech. 10:​9-14; Gál. 2:​11-14). Ma̱ngaa, numuu rí i̱mba̱ nuxi̱ʼ dí nunimbu̱ún judíos, xa̱bu̱ bi̱ kuya̱ edxu̱u̱ náa religión judía nigíʼdi̱i̱ nixkúún.

5. Náá ndiyóoʼ muñewumíjna̱ cristianos bi̱ kúwá náa Judea rá.

⁵ Nikúwá a̱jma̱ grupo xa̱bu̱ bi̱ tánigu̱u̱n dí nini̱ cristianos bi̱ kúwá náa Judea. Ikhiin nindxu̱ún ndxajkun judíos bi̱ tánigu̱u̱nʼ rí cristianos bugi̱ niriʼkhu̱u̱ dí nunimbu̱ún, ma̱ngaa nikúwá tikhuun cristianos bi̱ nithi rí ndayóoʼ munimbu̱u̱n má xúʼko̱ tikhuu Xtángoo ndrígóo Moisés mu xúʼko̱ xájuixkúún (Gál 6:12). Ndiéjunʼ gámbáñún cristianos bugi̱ mu maʼngu̱u̱n muguajún jmbu rá.

6. Ndiéjunʼ nixkajxi̱i̱n a̱ngui̱i̱n Pablo muni̱ rá. (Hebreos 5:​14–6:1.)

 ⁶ Náa i̱yi̱i̱ʼ dí Pablo niʼnirámáʼ náa inún bi̱ hebreos, niʼthúún a̱ngui̱i̱nʼ dí gíʼmaa munigajma̱a̱ ma̱ngaa gíʼmaa mundxa̱ʼwa̱míjna̱ dí naʼthí náa Ajngá rawuunʼ Dios (atraxnuu Hebreos 5:14–6:1). Nijmuu Escrituras Hebreas mu maʼthúún rí cristianos itháán májánʼ eyamajkuíí Jeobá ki xóo bi̱ judíos. a Pablo nixkajxi̱i̱n cristianos mu muniʼnuuʼ ga̱jma̱a̱ makru̱ʼu̱u̱n kisngáa dí gajkhun rí na̱ʼkha̱ náa Kiʼnirámáʼ. Mu xúʼko̱ xúnimbu̱u̱n náa kisngáa rí nindxu̱u̱ nduwaʼ ga̱jma̱a̱ xúni̱ tsíngumijná náa rí gajkhun.

7. Dí mbiʼi xúgi̱ ndiéjunʼ dí nuraʼníílú rá.

⁷ Rí mbiʼi xúgi̱ kúwá xa̱bu̱ bi̱ nuthi dí raʼkhí ga̱jma̱a̱ numuu ikha ndrígóo Jeobá. Mbaʼin xa̱bu̱ nuta numún testigos de Jeobá ga̱jma̱a̱ numuu rí nunimbu̱ún rí na̱ʼkha̱ náa Biblia, xóo rí nubúúnʼ xa̱bu̱. Mámbá mbiʼi naxtiʼkhuu itháán xóo eni̱ ga̱jma̱a̱ xóo endxa̱ʼwa̱míjna̱ xa̱bu̱ numbaaʼ, rí tsémbríguii xóo endxa̱ʼwáminaʼ Jeobá (Prov. 17:15). Ikha jngóo, mámbá mbiʼi gíʼmaa muʼni ratháá ku̱ma̱ ndrígulú mu mbuʼyáá ga̱jma̱a̱ muʼni gáʼdu̱u̱n rí naʼni majkhá guabáanʼ o dí gamíi maʼni tsíngulú náa rí gajkhun (Heb. 13:9).

8. Ndiéjunʼ gámbáyulú mu manindxu̱lú mbáa májáanʼ cristiano rá.

⁸ Pablo niʼthún cristianos bugi̱ dí magaji̱i̱n má xúʼko̱ xóo mbáa xa̱bu̱ nikhi̱i̱, ga̱jma̱a̱ mangáanʼ gíʼmaa muʼni xúʼko̱. Xú káʼnii rá. Rí muʼnigajma̱a̱ tsumáá Biblia mu xúʼko̱ muniʼníiʼ itháán májánʼ Jeobá ga̱jma̱a̱ mundxaʼwamíjna̱ xóo ikhaa. Maski ajndu nijngúlú má iyááʼ gíʼmaa muʼnigajma̱a̱ má xúʼko̱. Ikha jngóo gíʼmaa muraxnuu tsejtsi mbiʼi Ajngá rawuunʼ Dios, tséʼniuu á mu ndiʼkhún o niʼníí má kuwáánʼ náa xuajñuu Jeobá (Sal. 1:2). Rí muʼnilú rígi̱ mambáyulú muguaʼdáá mbá fe rí itháán gujkhuʼ dí nindxu̱u̱ mbá cualidad dí Pablo niʼthún cristianos rí gíʼmaa muguaʼdáá (Heb. 11:​1, 6).

“NAKÚWI̱I̱N MÁ XÚʼKO̱ GA̱JMA̱A̱ NUMUU FE RÍ GUÁʼDÁÁ”

9. Ndíjkha ndiyóoʼ muguaʼdáá mbá fe gújkhúʼ cristianos hebreos rá.

⁹ Cristianos buʼko̱ mbaʼyóoʼ muguaʼdáá mbá fe gujkhuʼ mu maʼngu̱u̱n muni̱ kawumijná náa gaʼkhu dí maraʼnuu Judea (Heb. 10:​37-39). Jesús niʼthún xa̱bi̱i̱ dí índo̱ gúyáá dí soldados romanos gúruguama̱ʼa̱a̱n Jerusalén mbaʼyóoʼ rí maga̱ñún náa kúbá, consejo rígi̱ mambáñún bi̱ kúwá náa Jerusalén ga̱jma̱a̱ bi̱ kúwá mijngii ikhí (Luc. 21:​20-24). Nákhá ikhú índo̱ soldados nandún gúgiʼdu̱u̱n gajmiún xa̱bu̱, mu muni̱ kawumijná xa̱bu̱ natu̱ʼu̱u̱n náa mbá xuajin dí gíʼdoo xtátsí, xó má Jerusalén. Ikha jngóo rí magañún náa kúbá ma̱ndoo makujmaa dí xámbáñún, mú ndiyóoʼ muguaʼdáá mbá fe gújkhúʼ ga̱jma̱a̱ munimbu̱ún dí niʼthí Jesús.

10. Ndiéjunʼ gúni̱ cristianos hebreos bi̱ gáguáʼdáá mbá fe gújkhúʼ rá. (Hebreos 13:17.)

¹⁰ Cristianos bugi̱ ma̱ngaa ndiyóoʼ maku̱mu̱ún kuñún a̱ngiu̱lú bi̱ Jesús nigruigi̱i̱n mu muyégún edxu̱u̱ náa congregación. Mbáa a̱ngiu̱lú bugi̱ mbaʼyóoʼ muxnún ikha mbájmbu mu a̱ngiu̱lú mbuyáá nguáná ga̱jma̱a̱ xú káʼnii gíʼmaa mugañún náa kúbá (atraxnuu Hebreos 13:17). Apóstol Pablo niʼthún a̱ngui̱i̱n cristianos: “Gunimbala ku̱ñu̱u̱n ga̱jma̱a̱ gunimbaníí rí nuthi bi̱ nuxna ikhala”, ikhaa na̱nguá niʼthí dí gíʼmaa munimbu̱ún kuñúún bi̱ kuya̱  edxu̱u̱ numuu dí rúʼko̱ kaʼñúún muni̱, niʼthún dí gíʼmaa muni̱ numuu rí nakumu̱ún eni̱. Cristianos ndiyóoʼ dí maku̱mu̱ún kuñúún itháán bi̱ kuya̱ edxu̱u̱ nákhá xóó tségi̱ʼdu̱u̱ ga̱ʼkhu̱ rí majphú mba̱a̱. Á mu ikhiin nakumu̱ún kuñúún asndu nákhá kúwá tsímáá, xáʼniún gakhi̱i̱ munimbu̱ún índo̱ gáʼkha̱ mbiʼi mingíjyúuʼ.

11. Ndíjkha rí ndayóoʼ muguaʼdáá mbá fe gújkhúʼ rá.

¹¹ Ikha̱á má xóo cristianos hebreos, mangáanʼ ndayóoʼ rí muguaʼdáá mbá fe gújkhúʼ. Rí mbiʼi xúgi̱ mbaʼin xa̱bu̱ tsénimbu̱ún dí inuu má mambáa xúgíʼ dí ra̱májánʼ dí rígá náa numbaaʼ rígi̱, ga̱jma̱a̱ asndu nutsijmáánʼ numuu dí ikháánʼlú nuʼnimbulú dí naʼthí náa Biblia (2 Ped. 3:​3, 4). Ma̱ngaa, maski ajndu náa Biblia naʼthí mbaʼa eni̱ dí marigá náa ga̱ʼkhu̱ rí majphú mba̱a̱, mú rígá mbaʼa dí tséʼyáálú xóo gárígá. Ndayóoʼ dí muguaʼdáá mbá fe gújkhúʼ mu makumulú rí gajkhun Jeobá maʼnimbánuu náa mbiʼi dí niraʼwíí maʼnigámbáa ga̱jma̱a̱ dí ikhaa má gáñewu̱nlú (Hab. 2:3).

12. Ndiéjunʼ gámbáyulú mu muʼni kawúmíjná náa ga̱ʼkhu̱ rí majphú mba̱a̱ rá.

¹² Mangáánʼ ndayóoʼ muʼnimbulú dí Jeobá najmiuu “ñumbáá jmbii bi̱ májánʼ endxa̱ʼwáminaʼ” mu maxnúlúʼ ikha rí mbiʼi xúgi̱ (Mat. 24:45). Ikháá má xóo cristianos hebreos nindrigú ikha índo̱ soldados romanos niruguama̱ʼa̱a̱n Jerusalén. Mbáa mangáánʼ mundrígú ikha rí naʼthí mbájmbu ndiéjunʼ gúʼni mu muʼni kawumíjna̱ índo̱ gagíʼdu̱u̱ ga̱ʼkhu̱ rí majphú mba̱a̱. Ikha jngóo asndu nákha xúgi̱ ndayóoʼ dí makumulú kuʼñúún bi̱ nuyégún edxu̱u̱ náa xuajñuu Jeobá. Á mu nuʼnimbulú ga̱jma̱a̱ nakumulú kuʼñúún ikhiin, rúʼko̱ gáʼni dí xáʼniulú mingíjyúuʼ muʼnimbulú índo̱ gákuwa̱a̱n náa gaʼkhu rí majphú mba̱a̱.

13. Ndíjkha rí gíʼdoo numuu consejo rí na̱ʼkha̱ náa Hebreos 13:5 rá.

¹³ Índo̱ cristianos hebreos kúwá ruguáʼthi̱i̱n mbuyáá rí mbaʼyóoʼ magañún, ndiyóoʼ rí xáguáʼdáá wéñuuʼ ga̱jma̱a̱ musngajma rí ‹tsíñún kuyáá mbújkha̱a̱› (atraxnuu Hebreos 13:5). Maski ajndu nákha ginii ikhiin nikúwá xawii mu muraʼníí gamiéjunʼ ga̱jma̱a̱ numuu dí mutaraʼa (Heb. 10:​32-34). Mú, ga̱jma̱a̱ numuu rí nimíniiʼ niʼni ewiʼ ga̱jma̱a̱ i̱ʼwáʼ tsingíná rúʼko̱ niʼni rí tikhuun niguáʼdi̱i̱ ndiyáʼ itháán mbújkha̱a̱ mu muñe̱wumíjna̱. Mú mbújkha̱a̱ xáʼngo̱o̱ gáʼni káwíin índo̱ Jerusalén gáguma gámbáa (Sant. 5:3). Á mu mbáa xa̱bu̱ nanigu̱u̱ʼ magiʼdoo wéñuuʼ mbújkha̱a̱, maʼniuu gakhi̱i̱ magayúu náa kúbá ga̱jma̱a̱ maniñuuʼ goʼwóo ga̱jma̱a̱ rí gíʼdoo.

14. Ndiéjunʼ guraʼwíí muʼni á mu kuaʼdáá mbá fe gújkhúʼ rá.

¹⁴ Á mu nduʼyáá gajkhun dí inu má Jeobá maʼni gámbóo numbaaʼ xkawiʼ rígi̱, rúʼko̱ gámbáyulú mbuʼyáá dí na̱nguá gíʼdoo numuu rí muguaʼdáá mbújkha̱a̱. Índo̱ gárígá gaʼkhu rí majphú mba̱a̱, mbújkha̱a̱ nánguá magiʼdoo numuu. Náa Biblia naʼthí dí xa̱bu̱ “muxidíí plata ndrígu̱ún náa kamba̱a̱” índo̱ gúyáá dí “plata ni má oro ndrígu̱ún xáʼngo̱o̱ gáʼni káwíin náa mbiʼi rí gákásngáñu̱u̱ʼ Jeobá” (Ezeq. 7:19). Itháán májánʼ dí muraʼwíí dí xáguaʼdáá wéñuuʼ, ki xóo dí muʼnimíjna̱ muguaʼdáá wéñuuʼ mbújkha̱a̱, ma̱ngaa ragíʼmaa muʼni gidxóó xóo majmulú mbaaʼ majmulú mbújkha̱a̱ o dí nújngóó guñewa̱a̱n rí kuáʼdáá dí asndu xáguaʼdáá mbiʼi mu muʼni i̱ʼwáʼ. Ma̱ngaa gíʼmaa muñe̱wumíjna̱ mu xágiʼdoo itháán numuu rí kuaʼdáá náa vida ndrígulú (Mat. 6:​19, 24). Mbáa nákha xóó tséguma gámbáa dí ra̱májánʼ náa tsu̱du̱u̱ numbaaʼ rígi̱, mbaʼyóoʼ  musngajmá á mu nakumulú kuʼyáá Jeobá o náa dí kuaʼdáá.

“IKHÁANʼ NDAYÓOʼ RÍ MAʼNGALA”

15. Ndíjkha dí ndiyóoʼ rí maʼngu̱u̱n cristianos hebreos rá.

¹⁵ Índo̱ náa Judea nijkha raʼni itháán xkawiʼ dí nirígá, cristianos bi̱ nikúwá ikhí ndiyóoʼ dí muraʼníí tsáʼkhá náa masngájmaa á mu guáʼdáá fe (Heb. 10:36). Maski ajndu nákha ginii niʼngu̱u̱n niraʼníí tsáʼkhá, mbaʼin dí ikhiin nindrigú rí gajkhun índo̱ nikúwá tsímáá. Mú, Pablo niʼthúún rí asndu má mbiʼi rúʼko̱ xóó tséminíiʼ xó má nimínuuʼ Jesús, xóo muʼthá, rí asndu muradíin (Heb. 12:4). Numuu rí mámbá mbiʼi na̱jkha̱ raʼni itháán mbaʼin cristianos, mbaʼin xa̱bu̱ bi̱ nawiñu̱u̱nʼ kuñún judíos niguáʼdi̱i̱ nikiʼníin kuñúún itháan. Nákhá tsiguʼ wapháá índo̱ Pablo nixtáa raʼtáraʼa náa Jerusalén, mbá nguéjmi̱i̱n xa̱bu̱ nini̱ ngínáa. Ga̱jma̱a̱ itháán dí 40 judíos “nimbánún dí xu̱phiʼtsu ni má xúwáan nimbá asndu índo̱ gámbu̱u̱n ruxiyáa Pablo, á mu tsénimbaníí muguáʼníí mbá dí ra̱májánʼ” (Hech. 22:22; 23:​12-14). Maski ajndu xa̱bu̱ mawiñu̱u̱n kuñún, cristianos ndiyóoʼ dí magimbíin má xúʼko̱, mutaraʼa ga̱jma̱a̱ xúniña̱a̱n dí fe ndrígún ma̱jkhá guabaaʼ.

16. Ndiéjunʼ gámbáyulú i̱yi̱i̱ʼ dí ni̱jkha̱ inún hebreos mu mbuʼyáá xú káʼnii gámbáyulú dí numíniiʼlú rá. (Hebreos 12:7.)

¹⁶ Ndiéjunʼ gámbáñún cristianos bugi̱ mu maʼngu̱u̱n índo̱ gúni̱ ngíníi xá. Pablo nindoo mambáñún cristianos mu mbuyáá xú káʼnii gámbáñún dí muraʼníí tsáʼkhá. Ikha jngóo niʼthún rí Dios ma̱ndoo maniñuuʼ rí mbáa xa̱bu̱ mamínuuʼ mu mani̱ndxu̱u̱ itháan májáanʼ cristiano (atraxnuu Hebreos 12:7). Rígi̱ maʼniratiin ga̱jma̱a̱ mambáñún mani̱ndxu̱ún itháan míjíinʼ xa̱bu̱, xó má nanigu̱u̱ʼ Jeobá. Á mu nduyáá rígi̱, xáʼniuu miʼskhaa muraʼníí tsáʼkhá dí gáʼkha̱ (Heb. 12:11).

17. Ndiéjunʼ dí Pablo ndiʼyoo ga̱jma̱a̱ numuu dí maʼngaaʼ matraʼníí tsáʼkhá rá.

¹⁷ Pablo nixnún tsiaki̱i̱ cristianos mu xámíñún ga̱jma̱a̱ xákaguabiinʼ índo̱ gúraʼníí  tsáʼkhá, ajngáa dí niʼthí ninindxu̱u̱ gajkhun. Náá numuu rá. Numuu dí nákha niʼníí, ikhaa nixkúún cristianos ikha jngóo ndaʼyoo májánʼ ndiéjunʼ gamiéjunʼ nuraʼníí. Ma̱ngaa ikhaa mbaʼa nuthu niʼngo̱o̱ niraʼnuu tsáʼkhá, numuu dí nda̱wa̱á dí ninindxu̱u̱ cristiano mbaʼa enii xóo nimínuuʼ (2 Cor. 11:​23-25). Pablo ndiʼyoo májánʼ ndiéjunʼ rí eyóoʼ mu maʼngu̱u̱n muraʼníí tsáʼkhá. Ikha jngóo niʼni marmáʼáan a̱jkiu̱ún cristianos dí gíʼmaa maku̱mu̱ún kuyáá Jeobá, raʼkháa dí i̱ndó maku̱mu̱ún kuyamijná ikhiin. Ikhaa mínaaʼ niʼthí: “Jeobá nindxu̱u̱ bi̱ nambáyuʼ. Xámiñuʼ” (Heb. 13:6).

18. Ndiéjunʼ dí gíʼmaa mbuʼyáá gajkhun ga̱jma̱a̱ ndiéjunʼ dí gíʼmaa mu̱ʼni̱ asndu nákha xúgi̱ rá.

¹⁸ Dí mbiʼi xúgi̱ mbaʼin a̱ngiu̱lú numíniiʼ ga̱jma̱a̱ numuu rí nuxkúún. Ma̱ndoo musngajmá dí nandulúʼ kuʼñúún índo̱ gúʼtájkáan ga̱jma̱a̱ numún, ma̱ngaa ma̱ndoo muxnún rí nda̱ñúunʼ (Heb. 10:33). Náa Biblia naʼthí kaʼwu: “Xúgíinʼ bi̱ nandún makuwá ruyamajkuíí Dios gajmiún Cristo Jesús, mangiin mumíniiʼ” (2 Tim. 3:12). Rígi̱ nandoo gáʼthúu̱n dí xúgiáánʼ gíʼmaa mu̱ʼni̱ ratamíjná nákha xóó tséʼkha̱ mbiʼi mingíjyúuʼ. Ndayóoʼ makumulúʼ kuʼyáá kájxi̱ Jeobá, ga̱jma̱a̱ mbuʼyáá gajkhun dí ikhaa má gámbáyulú muraʼníí asndu ndiéjunʼ má. Ikhaa maʼni̱i̱ a̱jkiu̱ún xa̱bi̱i̱ bi̱ naguájun jmbu índo̱ gáʼga̱nú mbiʼi (2 Tes. 1:​7, 8).

19. Ndiéjunʼ gándoo gúʼni mu makuwaanʼ xawii índo̱ gáʼkha̱nú ga̱ʼkhu̱ rí majphú mba̱a̱ rá. (Atayáá ma̱ngaa xtiʼkhuu.)

¹⁹ I̱yi̱i̱ʼ dí Pablo niʼnirámáʼ náa inún hebreos nimbáñún mu mbuyáá ndiéjunʼ gúni̱ índo̱ gúraʼníí rí gáʼkha̱. Pablo nixkajxi̱i̱n rí munigajma̱a̱ tsumáá ga̱jma̱a̱ dí makru̱ʼu̱u̱n dí Kiʼniraʼmáʼ. Mu xúʼko̱ makuwíin xawii mbuyáá ga̱jma̱a̱ munigaʼdu̱u̱n kisngáa nduwaʼ rí gamíi maʼni majkhá guabaaʼ fe ndrígún. Ma̱ngaa niʼthúún dí muni̱ itháán gújkhúʼ fe ndrígún mu munimbu̱ún ikha dí nixná Jesús ga̱jma̱a̱ ikha dí gúxna bi̱ kuya̱ edxu̱u̱ náa congregación. Ga̱jma̱a̱ xáʼniún mingíjyúuʼ maʼngu̱u̱n muraʼníí tsáʼkhá á mu nduyáá rí nindxu̱u̱ xóo nambáñúún Anu̱ún bi̱ nandoo kaʼñúún mu mani̱ndxu̱ún itháán mijíin cristianos. Á mu mangáanʼ nuʼni tsiakimijna mu nuʼnimbáníí consejos dí na̱ʼkha̱ náa Biblia, mambáyulú muguajún jmbu asndu índo̱ gártumuu mbiʼi (Heb. 3:14).