1. Ndiéjunʼ inuu má maʼni Jesús rá.

 KUWANLÚ náa mbá mbiʼi náa marigá mbaʼa dí maxtiʼkhuu, inuu má Jesús mandi̱ʼi̱i̱n cuenta xúgíinʼ bi̱ kúwá náa tsu̱du̱u̱ Ku̱ba̱ʼ. Xú káʼnii eʼyáá dí inuu má marigá rígi̱ rá. Numuu dí Jesús má niʼthún xa̱bu̱ “ndiéjunʼ gárígá” nákhá ikhaa xóó tséʼkha̱nú mu mandi̱ʼi̱i̱n cuenta xa̱bu̱ ga̱jma̱a̱ dí marigá “índo̱ gártumuu mbiʼi rí kuwáanʼ” (Mat. 24:3). Kiʼtáriyaʼ rígi̱ na̱ʼkha̱ náa Mateo capítulo 24 ga̱jma̱a̱ 25 xó má náa Marcos capítulo 13 ma̱ngaa náa Lucas capítulo 21.

2. Ndiéjunʼ gúʼyáá náa artículo rígi̱ ga̱jma̱a̱ náá numuu rá.

² Jesús nijmuu ajtsú xkri̱da mu maʼthúlú ndiéjunʼ guʼni mu makuwáanʼ xawii. Timbá, xkri̱da nindxu̱u̱ ga̱jma̱a̱ numún mugu̱ ga̱jma̱a̱ tsu̱jtuunʼ, raga̱jma̱, ga̱jma̱a̱ numún gu̱wi̱i̱nʼ wa̱ʼxa̱ʼ, ragajtsú, nindxu̱u̱ ga̱jma̱a̱ numuu talentos. Mámbá xkri̱da rígi̱ mambáyulú mbuʼyáá ndiéjunʼ gáʼyoo Jesús náa mámbáa xa̱bu̱ índo̱ gánda̱ʼa̱a̱ cuenta. Náa artículo rígi̱ mbuʼyáa ndiéjunʼ eʼsngúlú. Mugíʼdi̱i̱ mbuʼyáá ginii xkri̱da ndrígún mugu̱ ga̱jma̱a̱ tsu̱jtuunʼ.

MUGU̱ GA̱JMA̱A̱ TSU̱JTUUNʼ

3. Nguáná gándi̱ʼi̱i̱n cuenta xa̱bu̱ Jesús rá.

³ Jesús niʼthí dí índo̱ gáʼga̱nú mbiʼi dí manda̱ʼa̱a̱ cuenta mámbáa xa̱bu̱, mbaʼyoo á mu nigruigú ajngáa dí májánʼ ga̱jma̱a̱ á mu nimbáñún a̱ngui̱i̱n bi̱ kaxtaʼwíin (Mat. 25:​31-46). Nguáná gaʼthí Jesús á mu mbáa xa̱bu̱ nindxu̱u̱ mugu̱ o tsu̱jtuunʼ rá. Índo̱ gákuwáanʼ náa ga̱ʼkhu̱ rí majphú mba̱a̱, nákha xóó tséʼkha̱nú Armagedón (Mat. 24:21). Xó ma mbáa baxtúu naʼni wájíinʼ mugu̱ náa tsu̱jtuunʼ xúʼko̱ má gaʼni Jesús ma̱ngaa, maʼni wájíinʼ bi̱ numbañún a̱ngiu̱lú bi̱ kaxtaʼwíin náa bi̱ tsémbañún.

4. Xó má eʼthí náa Isaías 11:​3, 4, xú káʼnii eʼyáá dí Jesús maʼni dí jmbu índo̱ gándi̱ʼi̱i̱n cuenta xa̱bu̱ rá. (Atayáá ma̱ngaa xtiʼkhuu.)

 ⁴ Jeobá nigíiʼ Jesús mu maʼnimbánuu xkujndu. Náa Biblia naʼthí rí ikhaa maʼni dí nindxu̱u̱ jmbu índo̱ gándi̱ʼi̱i̱n cuenta xa̱bu̱ (atraxnuu Isaías 11:​3, 4). Ikhaa ndaʼyoo xóo endxaʼwamíjna̱ xa̱bu̱, rí nuthi ga̱jma̱a̱ rí nuni̱, ma̱ngaa xóo eniu̱u̱n a̱ngui̱i̱n bi̱ kaxtaʼwíin (Mat. 12:​36, 37; 25:40). Mbaʼyoo tsíín nikúwíin xawii mumbañún bi̱ kaxtaʼwíin ga̱jma̱a̱ ñajunʼ dí nuni̱. a Mbá dí xóo ma̱ndoo mumbaʼñún nindxu̱u̱ dí mutaraʼa, bi̱ nuni̱ rígi̱ majuiʼthá dí nindxu̱ún “míjíinʼ” ga̱jma̱a̱ ma̱ndoo makuwá kámuu mbiʼi náa tsu̱du̱u̱ Ku̱ba̱ʼ (Mat. 25:46; Apoc. 7:​16, 17). ¡Ra̱ʼkhá tháán nagui̱i̱ dí mundrígúu á mu naguajún jmbu! Á mu ikháán nañajún jmbu índo̱ gárígá ga̱ʼkhu̱ rí majphú mba̱a̱ ga̱jma̱a̱ nda̱wa̱á, mbiʼyaaʼ marigá má xúʼko̱ kiʼnirámáʼ “náa libro rí ndaʼya” (Apoc. 20:15).

5. Ndiéjunʼ eʼsngúlú náa xkri̱da ga̱jma̱a̱ numún mugu̱ ga̱jma̱a̱ tsu̱jtuunʼ ma̱ngaa tsíín gámbáñún rígi̱ rá.

⁵ Atasngájmaa dí xtiejún jmbu. Xkri̱da ga̱jma̱a̱ numún mugu̱ ga̱jma̱a̱ tsu̱jtuunʼ na̱jkha̱ inún bi̱ kua̱ʼthi̱i̱n makuwá kámuu mbiʼi náa tsu̱du̱u̱ Ku̱ba̱ʼ. Ikhiin nusngajma dí guáʼdáá fe índo̱ numbañún a̱ngui̱i̱n Cristo náa najuiʼtáraʼa ma̱ngaa índo̱ nunimbu̱ún ikha dí naxná ñumbáá jmbii bi̱ májánʼ endxa̱ʼwáminaʼ, bi̱ Jesús niraʼwíin (Mat. 24:45). Mú, bi̱ kua̱ʼthi̱i̱n makuwá mekhuíí mangiin ma̱ndoo mbuyáá ndiéjunʼ eyoo gáʼthúu̱n xkri̱da rígi̱. Náá numuu rá. Numuu dí Jesús xtáa raʼyoo dí nuni̱, dí nuthi ga̱jma̱a̱ dí nundxaʼwamíjna̱, ikha jngóo mangiin gíʼmaa musngajma dí kuájun jmbu. Ma̱ngaa Jesús niʼthí imbá gi̱jma̱ xkri̱da náa naʼthúún mbájmbu ndiéjunʼ muni̱ bi̱ kaxtaʼwíin, xkri̱da rígi̱ nuxkamaa náa Mateo capítulo 25. Rí xúgi̱ guʼyáá xkri̱da ndrígún gu̱wi̱i̱nʼ wa̱ʼxa̱ʼ.

GU̱WI̱I̱Nʼ WA̱ʼXA̱ʼ

6. Xú káʼnii nisngajmaaʼ dí nundxa̱ʼwa̱a̱ májánʼ edxu̱ún bi̱ mbá witsiin wa̱ʼxa̱ʼ rá. (Mateo 25:​6-10.)

⁶ Náa xkri̱da rígi̱, Jesús niʼthí ga̱jma̱a̱ numún mbá gu̱wi̱i̱nʼ wa̱ʼxa̱ʼ bi̱ nigúun gúraʼníí bi̱ manigúnʼ (Mat. 25:​1-4). Xúgíinʼ ikhiin nindúún matu̱ʼu̱u̱n náa ndxa̱a̱. Jesús niʼthí dí witsiin rí ikhiin “nundxa̱ʼwa̱a̱ májánʼ edxu̱ún” ga̱jma̱a̱ bi̱ i̱mbá witsiin “tséndxa̱ʼwa̱a̱ májánʼ edxu̱ún”. Bi̱ nundxa̱ʼwa̱a̱ májánʼ edxu̱ún, niniratamijná ga̱jma̱a̱ nikúwá xawii maguáʼthi̱i̱n bi̱ manigúnʼ tséʼniuu má á mu asndu wakíʼ gáʼkha̱nú. Ikha jngóo nidiégún candil dí na̱jnu̱ʼ aceite mu mambiʼñún náa kína ma̱ngaa asndu nidiégún ru̱jtu̱ náa ka̱jnu̱ʼ aceite mu xúʼko̱ xáguíyúuʼ candil ndrígún (atraxnuu Mateo 25:​6-10). Índo̱ ni̱ʼkha̱nú bi̱ manigúnʼ, wa̱ʼxa̱ʼ bi̱ nundxa̱ʼwa̱a̱ májánʼ edxu̱ún nitu̱ʼu̱u̱n gajmiún náa ndxa̱a̱. Mbáa ikha kayuuʼ gárígá ga̱jma̱a̱ numún a̱ngiu̱lú bi̱ kaxtaʼwíin. Bi̱ gúguajún jmbu ga̱jma̱a̱ bi̱ gakuwá xawii, asndu índo̱ gáʼkha̱nú bi̱ manigúnʼ xóo muʼthá Jesús, ma̱ndoo mata̱ʼa̱a̱n gajmiún náa maʼtáñajunʼ mekhuíí (Apoc. 7:​1-3). b Ndiéjunʼ niguáʼníí bi̱ mbá witsiin wa̱ʼxa̱ʼ bi̱ tséndxa̱ʼwa̱a̱ májánʼ edxu̱ún rá.

7. Ndiéjunʼ niguáʼníí bi̱ mbá witsiin wa̱ʼxa̱ʼ bi̱ tséndxa̱ʼwa̱a̱ májánʼ edxu̱ún ga̱jma̱a̱ náá numuu rá.

⁷ Wa̱ʼxa̱ʼ bi̱ tséndxa̱ʼwa̱a̱ májánʼ edxu̱ún na̱nguá nikúwá xawii maguáʼthi̱i̱n ma̱ʼkha̱nú bi̱ manigúnʼ xó ma nini̱ wa̱ʼxa̱ʼ bi̱ nundxa̱ʼwa̱a̱ májánʼ edxu̱ún. Náa xkri̱da naʼthí dí índo̱  nidxa̱wíín dí inuu ma̱ʼkha̱nú bi̱ manigúnʼ, ndiyáá dí candil ndrígún inuu maguíyúuʼ, numuu dí na̱nguá kuda aceite ikha jngóo nigún gúyáʼ mutsi. Índo̱ ni̱ʼkha̱nú bi̱ manigúnʼ, ikhiin xóó tsétangi̱i̱n. Ikhú “wa̱ʼxa̱ʼ bi̱ kúwá xawii nitu̱ʼu̱u̱n náa ndxa̱a̱ ga̱jma̱a̱ ikhú nixtúguáa xkrugua” (Mat. 25:10). Itháán nda̱wa̱á wa̱ʼxa̱ʼ bi̱ tséndxa̱ʼwa̱a̱ májánʼ edxu̱ún nitangi̱i̱n ga̱jma̱a̱ nindúún matu̱ʼu̱u̱n náa ndxa̱a̱, mú bi̱ manigúnʼ niʼthún: “Tséniʼniáanʼla jún” (Mat. 25:​11, 12). Na̱nguá niniratamijná mu maguáʼthi̱i̱n asndu náa gáʼkha̱nú bi̱ manigúnʼ. Ndiéjunʼ eʼsngúún rígi̱ bi̱ kaxtaʼwíin rá.

8, 9. Ndiéjunʼ eʼsngúún bi̱ kaxtaʼwíin xkri̱da ga̱jma̱a̱ numún mbá gu̱wi̱i̱nʼ wa̱ʼxa̱ʼ rá. (Atayáá ma̱ngaa xtiʼkhuu.)

⁸ Atasngájma rí natani̱ ratamínáʼ. Jesús na̱nguá nindoo gaʼthí dí makuwá a̱jma̱ enii grupo bi̱ kaxtaʼwíin, mbá grupo bi̱ muni̱ ratamíjná maguáʼthi̱i̱n asndu índo̱ gaguma gámbáa dí ra̱májánʼ náa numbaaʼ rígi̱ ga̱jma̱a̱ eʼwíinʼ bi̱ xúni̱ ratamíjná. Rí phú nindoo gáʼthúún a̱ngiu̱lú bi̱ kaxtaʼwíin nindxu̱u̱ dí á mu tséni ratamíjná muguajún jmbu asndu índo̱ gártumuu mbiʼi, xúndrigúu rí niʼthí maxnún (Juan 14:​3, 4). ¡Ra̱ʼkhá tháán gíʼdoo numuu rígi̱! Tséʼniuu á mu kuáʼti̱i̱n makuwáanʼ mekhuíí o náa tsu̱du̱u̱ Ku̱ba̱ʼ, xúgiáanʼ gíʼma mbuʼyáá ndiéjunʼ eʼsngúlú xkri̱da ndrígún gu̱wi̱i̱nʼ wa̱ʼxa̱ʼ. Ndayóo makuwáanʼ má xúʼko̱ xawii ga̱jma̱a̱ muʼni ratamíjná mu maʼngulú asndu índo̱ gártumuu mbiʼi (Mat. 24:13).

⁹ Xó má ndiʼyáá, náa xkri̱da ga̱jma̱a̱ numún gu̱wi̱i̱nʼ wa̱ʼxa̱ʼ Jesús niʼthí dí ra̱ʼkhá tháán gíʼdoo numuu dí muʼni ratamíjná ga̱jma̱a̱ makuwáanʼ xawii. Nda̱wa̱á niʼthí ga̱jma̱a̱ numuu xkri̱da ndrígóo telentos, náa niʼthí dí gíʼdoo wéñuuʼ numuu dí xáʼskhulú.

TALENTOS

10. Xú káʼnii nisngajmaaʼ dí niguájun jmbu bi̱ a̱jmi̱i̱n ñumbáá rá. (Mateo 25:​19-23.)

¹⁰ Náa xkri̱da rígi̱ Jesús niʼthí ga̱jma̱a̱ numún a̱jmi̱i̱n ñumbáá bi̱ niguájun jmbu náa patriúún ga̱jma̱a̱ i̱mba̱a̱ bi̱ táwi̱ji̱ jmbu (Mat. 25:​14-18). Nákha patriúún xóó tségájnuu maʼga̱ mitsínguaaʼ, nixnún tikhuu talentos  xóo muʼthá mbá nguáthá mbújkha̱a̱. A̱jmi̱i̱n ñumbáá nisngajmá dí niguájun jmbu ga̱jma̱a̱ dí nañajún gakhi̱i̱ índo̱ nini̱ tsiakimijna muriya̱a̱ʼ inuu mbújkho̱o̱ patriúún. Ikha jngóo índo̱ nitanga̱a̱ patriúún ndiʼyoo dí niriya̱a̱ʼ inuu mbújkha̱a̱ dí nixnún, ikhú niʼthún dí májánʼ rí nini̱ ga̱jma̱a̱ mámbáa dí ikhiin niʼthún: “Ayi̱ mu̱ʼni̱ gagimijnálu” (atraxnuu Mateo 25:​19-23). Ndiéjunʼ niʼni ñumbáá bi̱ maʼni ajtsíin ga̱jma̱a̱ mbújkha̱a̱ dí nikhánaaʼ rá.

11. Ndiéjunʼ nigíʼnuu ñumbáá bi̱ naskhoo ga̱jma̱a̱ náá numuu rá.

¹¹ Patrúun nixnúu bi̱ maʼni ajtsíin ñumbáá mbá talento mu ma̱ngaa makuíʼtóo inuu, mú ñumbáá bugi̱ naskhoo ikha jngóo niʼndii mbá iñá náa ku̱ba̱ʼ ga̱jma̱a̱ nirkaʼwu talento. Índo̱ patrúun nitanga̱a̱, ñumbáá i̱ndó nixnáa káaʼ mbóó talento, na̱nguá niʼthúu̱n patriúun rí maʼni mba̱a̱ a̱jkiu̱u̱n kaʼyoo numuu dí takhánáa inuu mbújkha̱a̱ʼ, ñumbáá niʼthúu̱n patriúun dí nindxu̱u̱ mbáa xa̱bu̱ bi̱ ‹gakhi̱i̱ a̱jkiu̱u̱n› rígi̱ niʼni dí patriúun marígú kaʼyúuʼ talento ga̱jma̱a̱ nixkriya̱a̱ʼ náa goʼwóo (Mat. 25:​24, 26-30).

12. Tsíín nindxu̱ún dí mbiʼi xúgi̱ a̱jmi̱i̱n ñumbáá bi̱ naguájun jmbu rá.

¹² A̱jmi̱i̱n ñumbáá bi̱ niguájun jmbu nandoo gáʼthúu̱n a̱ngiu̱lú bi̱ kaxtaʼwíin bi̱ naguájun jmbu. Jesús nindxu̱u̱ patrúun bi̱ naʼthúún mámbáa dí ikhiin: “Ayi̱ mu̱ʼni̱ gagimijnálu” xóo muʼthá naxnún rí mani̱ndxu̱ún timbíin bi̱ magabiín ga̱jma̱a̱ dí makuwá mekhuíí (Mat. 25:​21, 23; Apoc. 20:5a). Mú xkri̱da ndrígóo ñumbáá bi̱ naskhoo, i̱ndó naʼthúún ndiéjunʼ gamíi maguáʼníí a̱ngiu̱lú bi̱ kaxtaʼwíin. Guʼyáá náá numuu.

13, 14. Ndiéjunʼ ejmañún bi̱ kaxtaʼwíin náa xkri̱da ndrígóo talentos rá. (Atayáá ma̱ngaa xtiʼkhuu.)

¹³ Atasngájma rí tséskaaʼ. Náa xkri̱da dí Jesús niʼthí ga̱jma̱a̱ numuu talentos na̱nguá nindoo gaʼthí dí mbóo mbiʼi bi̱ kaxtaʼwíin maʼskúún. Ikháá má xó niʼthí náa xkri̱da ga̱jma̱a̱ numún gu̱wi̱i̱nʼ wa̱ʼxa̱ʼ, i̱ndó nindoo gáʼthí ndiéjunʼ gamíi maguáʼníí. Ndiéjunʼ gárígá á mu ikhiin nuniña̱a̱nʼ runimbaníí ga̱jma̱a̱ gagi ñajunʼ dí kuáʼdáá: Ikhiin ní xákúwi̱i̱n  náa majñúnʼ bi̱ Dios “niraʼwíin ga̱jma̱a̱ nindxaʼwúún” ma̱ngaa xándoo mata̱ʼa̱a̱n náa maʼtáñajunʼ Jesús mekhuíí (2 Ped. 1:10).

¹⁴ Náa xkri̱da ndrígún gu̱wi̱i̱nʼ wa̱ʼxa̱ʼ ga̱jma̱a̱ talentos, Jesús niʼthí kaʼwu dí xúgíinʼ cristianos bi̱ kaxtaʼwíin ndayóoʼ muni̱ ratamíjná, makuwíin xawii ga̱jma̱a̱ dí xaʼskúún. Mú ra̱ʼkhá i̱ndó rígi̱ dí Jesús niʼthún dí gíʼmaa muni̱ bi̱ kaxtaʼwíin. Nuxkamaa i̱mba̱ xkri̱da náa Mateo 24:40, 41. Guʼyáá versículos rígi̱.

TSÁÁ BI̱ MAʼGA KIʼYÁA RÁ.

15, 16. Xó ma eʼthí Mateo 24:​40, 41, ndíjkha rí gíʼdoo numuu dí bi̱ kaxtaʼwíin makuwíin xawii má xúʼko̱ rá.

¹⁵ Nákha Jesús xóó tséʼthí ajtsú xkri̱da rígi̱, niʼthí xú káʼni ganindxu̱u̱ índo̱ gáxtandi̱ʼi̱ínʼ cuenta bi̱ kaxtaʼwíin, índo̱ gájuiʼthá tsáá bi̱ magruiguíi. Ikhaa niʼthí ga̱jma̱a̱ numún a̱jmi̱i̱n xa̱bekha bi̱ nuñajunʼ náa xáná ga̱jma̱a̱ a̱jmi̱i̱n gu̱ʼu̱ bi̱ nunu̱ náa tsi̱nu̱. Mbá najmiin xa̱bekha ga̱jma̱a̱ gu̱ʼu̱ nakujmaa dí ikháá má ñajunʼ rí kúwá runi̱, mú Jesús niʼthí: “Mbáa maʼga kiʼyáa, i̱mba̱a̱ maguanáti̱go̱o̱” (atraxnuu Mateo 24:​40, 41). Náa mbá versículo nda̱wa̱á Jesús niʼthún xa̱bi̱i̱: “Gakuwáanʼ xawii má xúʼko̱, numuu rí tséya̱a̱ nguáná gátanga̱a̱ Tátá” (Mat. 24:42). Xúʼko̱ má niʼthí índo̱ niguámbóo niʼthí ga̱jma̱a̱ numuu xkri̱da ndrígún gu̱wi̱i̱nʼ wa̱ʼxa̱ʼ (Mat. 25:13). Ikha jngóo nakujmaa dí mbá nájma̱ ajngáa rígi̱ ikháá má dí endooʼ gáʼthúu̱n. I̱ndó bi̱ gajkhun nixtaʼwíi ga̱jma̱a̱ bi̱ nawi̱ji̱ jmbu “maʼga kiʼyáa”. Ga̱jma̱a̱ Jesús magruiguíi náa maʼtáñajunʼ mekhuíí (Juan 14:3).

¹⁶ Atasngájma rí xtaa xawii má xúʼko̱. Á mu mbáa ndxájulú bi̱ kaxtaʼwíi na̱nguá xtáa xawii ikhaa xándoo maxtáa mbóo gajmíi̱n bi̱ “kaxtaʼwíin” (Mat. 24:31). Mú xúgíinʼ bi̱ kua̱ʼthi̱i̱n makuwá náa tsu̱du̱u̱ Ku̱ba̱ʼ ma̱ngaa gíʼmaa mbuyáá ndiéjunʼ eyoo gáʼthúu̱n índo̱ Jesús niʼthí rí gíʼmaa muguajún jmbu ga̱jma̱a̱ makuwá xawii.

17. Ndíjkha dí ragíʼmaa maxmiéjunlú á mu Jeobá naraʼwíin xa̱bi̱i̱ náa iwáá tsiguʼ rígi̱ rá.

¹⁷ Ikháanʼ nuniʼniiʼ májánʼ Jeobá. Ikha jngóo nduʼyáá gajkhun dí nindxu̱u̱ jmbu rí ikhaa naraʼwíí maʼni. Á mú Jeobá naraʼwíin xa̱bi̱i̱ bi̱ naguájun jmbu náa iwáá tsiguʼ rígi̱. Ragíʼmaa maxmiéjunlú. c Gármáʼáanʼ a̱jkiu̱lú dí niʼthí Jesús náa xkri̱da ga̱jma̱a̱ numún bi̱ nigún guñajunʼ náa mbaaʼ dí najuiʼdu uva índo̱ na̱jkha̱ raguámbáa má mbiʼi (Mat. 20:​1-16). Bi̱ niguáʼdi̱i̱ niñajunʼ itháán wakíʼ ikháá má nidaaʼ xó ma bi̱ niguáʼdi̱i̱ niñajunʼ asndu nákha miʼcha̱. Ikháá ma kayúʼ xúgíinʼ bi̱ kaxtaʼwíin bi̱ naguájun jmbu, mundrígúu dí maguáan mekhuíí, tséʼniuu ma nguáná nixtaʼwíin.

ATAGÍʼ EDXA̱A̱ʼ NÁA DÍ WÍJI̱ MARIGÁ

18, 19. Ndiéjunʼ nijmañulúʼ náa xúgíʼ xkri̱da dí ndiʼyáá náa artículo rígi̱ rá.

¹⁸ Ndiéjunʼ ndiʼyáá náa artículo rígi̱ rá. Náa xkri̱da ga̱jma̱a̱ numún mugu̱ ga̱jma̱a̱ tsu̱jtuunʼ nijmañulúʼ dí gíʼdoo wéñuuʼ numuu dí bi̱ kuáʼti̱i̱n makuwá kámuu mbiʼi náa tsu̱du̱u̱ Ku̱ba̱ʼ, ndayóo maguajún jmbu xó ma xúgi̱ ga̱jma̱a̱ índo̱ gáʼkha̱ gaʼkhu rí majphú mba̱a̱. Índo̱ gáʼga̱nú mbiʼi rúʼko̱, Jesús maʼthí tsíín nindxu̱ún bi̱ naguájun jmbu mu “makuwá kámuu” (Mat. 25:46).

¹⁹ Ma̱ngaa nijmañulúʼ a̱jma̱ xkri̱da náa najuiʼthúún ndiéjunʼ gíʼmaa muni̱ bi̱ kaxtaʼwíin. Náa xkri̱da ndrígún gu̱wi̱i̱nʼ wa̱ʼxa̱ʼ, witsiin dí ikhiin nini̱ ratamíjná, nindxa̱ʼwa̱a̱ májánʼ edxu̱ún ga̱jma̱a̱ nikúwá xawii maguáʼthi̱i̱n bi̱ manigúnʼ tséʼniuu má asndu  nguáthá mbayuʼ. Numuu dí eʼwíinʼ túndxa̱ʼwa̱a̱ májánʼ edxu̱ún ga̱jma̱a̱ túni ratamíjná, bi̱ ninigúnʼ tániñuuʼ matu̱ʼu̱u̱n náa ndxa̱a̱, náa xkri̱da rígi̱ najmañulú dí gíʼmaa makuwáanʼ xawii muguaʼthi̱i̱n asndu nguáthá má mbayuʼ, asndu índo̱ Jesús gaʼni gámbóo dí xkawiʼ dí rígá náa numbaaʼ rígi̱. Náa xkri̱da ga̱jma̱a̱ numuu talentos, ndiʼyáá dí a̱jmi̱i̱n ñumbáá bi̱ na̱nguá niskúún, niguajún jmbu ga̱jma̱a̱ nini̱ tsiakimijna muríyaaʼ inuu mbújkho̱o̱ patriúún, ikha jngóo niʼthún dí májánʼ dí nini̱, mú ñumbáá bi̱ niskoo nixkriya̱a̱ʼ rexa̱a̱. Náa xkri̱da rígi̱ najmañulú dí gíʼma muʼni má xúʼko̱ ñajuunʼ Jeobá asndu índo̱ gártumuu mbiʼi. Iwáá kayuuʼ ndiʼyáá dí Jesús niʼsngáa rí a̱ngiu̱lú bi̱ kaxtaʼwíin gíʼmaa makuwíin xawii mu xúʼko̱ maʼga kiʼdiin náa maʼtáñajunʼ mekhuíí. Ikhiin nandún ga̱jma̱a̱ xúgíʼ a̱jkiu̱ún dí maʼga̱nú mbiʼi dí “muwíinʼ” gajmiún Jesús náa mekhuíí. Nda̱wa̱á rí gájngoo Armagedón, ikhiin mani̱ndxu̱ún novia bi̱ Jesús mbayáaʼ “náa nanigúnʼ A̱ʼdá múgú” (2 Tes. 2:1; Apoc. 19:9).

20. Ndiéjunʼ gáʼni Jeobá á mu nuʼnimbáníí dí niʼthí Jesús náa xkri̱da rá.

²⁰ Gítháán má tígo̱o̱ dí Jesús mandi̱ʼi̱i̱n cuenta xa̱bu̱, mú ragíʼmaa mamiñulúʼ. Á mu naguájun jmbu, Anu̱lú bi̱ nandoo kaʼyulú bi̱ xtáa mekhuíí maxnúlú “tsiakii dí itháan mba̱a̱ ki xóo dí gíʼdoo mbáa xa̱bu̱” mu xúʼko̱ “ma̱ndoo muguajún náa inuu A̱ʼdióo xa̱biya̱” (2 Cor. 4:7; Luc. 21:36). Ikha jngóo, tséʼniuu á mu naguáʼthi̱i̱n makuwálú náa tsu̱du̱u̱ Ku̱ba̱ʼ o náa mekhuíí, guʼnimbáníí rí nijmañulúʼ náa xkri̱da dí niʼthí Jesús. Á mu nuʼni xúʼko̱ Anu̱lú magruiguáanʼ. Ma̱ngaa numuu dí ra̱ʼkhá tháán májánʼ a̱jkiu̱u̱n, mbiʼyuu mámbáa dí ikháánʼ ‹magumaraʼmáʼ náa libro rí ndaʼya› (Dan. 12:1; Apoc. 3:5).