Índo̱ natrigáánʼ muʼnigajma̱a̱, mbáa nurajximíjna̱: “Ndiéjunʼ gájma̱ñuʼ rá.” Májánʼ má nindxu̱u̱ dí mundxa̱ʼwa̱míjna̱ dí gájmañulú, mú itháan gíʼdoo numuu dí muʼgíʼ edxu̱lúʼ majmañulú i̱ʼwáʼ dí Jeobá nandoo maʼsngulúʼ. Xú káʼnii gándoo gúʼni̱ rá.

Atanda̱ʼa̱a̱ Jeobá rí maxnáa ku̱ma̱. Atayáʼ i̱ʼwáʼ rí majmañaaʼ (Prov. 3:​5, 6). Atanda̱ʼa̱a̱ Jeobá mambáyáaʼ ma̱ta̱ya̱a̱ ndiéjunʼ dí ikhaa nandoo majmañaaʼ xúgi̱ (Sant. 1:5).

Atatsíñááʼ rí mambáyáaʼ Ajngá rawuunʼ Dios. Numuu dí “ajngá rawuunʼ Dios ndaʼya” (Heb. 4:12). Mámbá índo̱ gúraxnuu Biblia ma̱ndoo maʼsngulúʼ i̱ʼwáʼ dí nuxi̱ʼ, i̱ndó ma̱ndoo mambáyúlú á mu nuʼgíʼ edxu̱lúʼ majmañulú.

Araxnáa núma̱aʼ Jeobá numuu rí naʼsngáa. Ganitsu rí ikhaa naxnúlú nindxu̱u̱ xóo “mbá ndxa̱a̱ náa rígá ganitsu rí itháan májánʼ” (Is. 25:6). Á mu mbá dí xtaa ratraxnuu naku̱ma̱a̱ʼ dí xámbáyáaʼ xátaniʼñáánʼ ratraxnuu. Numuu rí xúʼko̱ natatsíñaminaʼ dí Dios mambáyáaʼ mani̱ndxa̱a̱ʼ itháan májáanʼ xa̱bu̱, ga̱jma̱a̱ á mu natraxnuu manigua̱a̱ʼ.